Read S'gaw Karen လံာ်သးသယုၢ်တၢ် 3 Bible Online

လံာ်သးသယုၢ်တၢ် 3 - S'gaw Karen bible

လံာ်သးသယုၢ်တၢ် 3

¹ယမ့ၢ်ပှၤတဂၤလၢအထံၣ်ဘၣ်တ့ၢ်တၢ်နးတၢ်ဖှီၣ်လၢကစၢ်ယွၤအတၢ်သး ဒိၣ်အနီၣ်တီၢ်အဖီလာ်လီၤ.

²နီၣ်ယၤဆူတၢ်ခံးတၢ်နၤအပူၤယိာ်ထီၣ်, ယိာ်ထီၣ်န့ၣ်လီၤ.

³ဒီးတီၢ်ယၤတဘျီဝံၤတဘျီလၢတၢ်သးကညီၤတအိၣ်ဘၣ်အနီၣ်တီၢ်တဖၣ် လီၤ.

⁴အဝဲကူးတဲာ်ကါတဲာ်ယဖံးယညၣ်ဒီးမၤကၢ်တ့ၢ်ယဃံယကွဲ တဖၣ်လီၤ.

⁵အဝဲဒုးဃာ်ယၤလၢတၢ်နးတၢ်ဖှီၣ်ဒီးတၢ်သူၣ်ကိၢ်သးဂီၤအဃိာ် ပူၤလီၤ.

⁶အဝဲမၤဆူၣ်မၤနၢၤယၤလၢယကအိၣ်မူလၢတၢ်သံ အတၢ်ခံးတၢ်နၤဂၢၢ်တပၢၢ်အပူၤန့ၣ်လီၤ.

⁷အဝဲစၢဃာ်တ့ၢ်ယၤလၢထးသွဲတဖၣ်လီၤ. ယမ့ၢ်ပှၤဃိာ်ဖိတဂၤလၢတၢ်ပူၤဖျဲးအဂီၢ်အတၢ်မုၢ်လၢ်တအိၣ်ဘၣ် န့ၣ်လီၤ.

⁸ယကိးပသူထီၣ်ဖးဒိၣ်လၢတၢ်မၤစၢၤအဂီၢ်ဘၣ်ဆၣ်ဒီးကစၢ်ယွၤဂ့ၢ် လိာ်လၢကဒိကနၣ်ယၤအဂီၢ်န့ၣ်လီၤ.

⁹ယလဲၤတၢ်ကနူၤကဆဲဖဲယဟး, ဒီးလၢၢ်တၢ်ဒူၣ်တဖၣ်အိၣ်တံာ်တၢၤ ယကျဲဖဲယဃၣ်ယသးတပူၤလၢ်လၢ်လီၤ.

¹⁰အဝဲအိၣ်ခိးခူသူၣ်ယၤဒ်တၤသူအသိး, စံၣ်ပှီၤယၤဒ်ခ့ယုၢ်တ ဒုအသိးန့ၣ်လီၤ.

¹¹အဝဲစိာ်ကွံာ်ယၤဆူကျဲကပၤ, ဖှီယာ်ကွံာ်ယၤတုၤယလီၤကလဲဒီး ကွံာ်တ့ၢ်ကွံာ်ယၤလီၤ.

¹²အဝဲဖ့ၣ်ထီၣ်သူထီၣ်အချံၣ်ဒီးဒုးကဲထီၣ်ယၤဒ်တၢ်ပညိၣ်ပနီၣ် လၢအပျၢ်တဖၣ်အဂီၢ်လီၤ.

¹³ခးဝဲအပျၢ်တဖၣ်ဆူယနီၢ်ခိအပူၤယိာ်ယိာ်ကလဲာ်လီၤ.

¹⁴ပှၤဂီၢ်မုၢ်နံၤဘၣ်ဖၣ်လဲယၤသ့တနံၤကျၢၤဒီးယမ့ၢ်တၢ်လီၤနံၤ လၢအဝဲသ့ၣ်ခဲလၢာ်အဂီၢ်လီၤ.

¹⁵ကယဲၢ်တၢ်လၢအဟ့ၣ်ယၤလၢတၢ်အီၣ်တၢ်အီအဂီၢ်န့ၣ်မ့ၢ်ထဲ တၢ်တူၢ်ဘၣ်ခီၣ်ဘၣ်အခၣ်တဖၣ်လီၤ.

¹⁶အဝဲဒံးဒူးယမဲာ်သၣ်လၢဟီၣ်ခိၣ်ဒီးမၤကၢ်ယမဲတဖၣ်လၢလ့တဖၣ် အဖီခိၣ်လီၤ.

¹⁷ယသးပ့ၤနီၣ်ကွံာ်တၢ်အိၣ်ဆူၣ်အိၣ်ချ့ဒီးတၢ်ဃူတၢ်မုာ်ဒီးတၢ် သူၣ်ခုသးခုမ့ၢ်တၢ်မနုၤတဖၣ်လဲၣ်န့ၣ်လီၤ.

¹⁸ယတအိၣ်မူလၢၤဘၣ်ဆူညါယံာ်ယံာ်ဘၣ်. ယတၢ်မုၢ်လၢ်လၢယွၤအပူၤန့ၣ်လၢာ်ကွံာ်လံ.

¹⁹တၢ်ဆိကမိၣ်ထီၣ်က့ၤယတၢ်ဆူးတၢ်ဆါဒီးဟံၣ်တအိၣ်ဃီ တအိၣ်ဘၣ်အဂ့ၢ်န့ၣ်လီၤဂာ်မးဒ်တၢ်စုၣ်တၢ်ပျၢ်အထံလၢအခၣ်ဒိၣ်မး အသိးလီၤ.

²⁰ယဆိကမိၣ်တၢ်အံၤတပယူာ်ဃီဒီးယသးလီၤစၢ်လီၤဘှါလၢယပူၤလီၤ.

²¹ဘၣ်ဆၣ်ဒီး, တၢ်မုၢ်လၢ်ဟဲက့ၤဆူယအိၣ်ဖဲယသ့ၣ်နီၣ်တၢ်အံၤ တမံၤလၢ,

²²ယွၤအတၢ်အဲၣ်ဒီးအတၢ်သးကညီၤလၢအတလီၤ တူၢ်လီၤကာ်ဘၣ်န့ၣ်အကတၢၢ်တအိၣ်ဘၣ်,

²³သီဝဲကိးမုၢ်ဂီၤဒဲးဒ်မုၢ်ဆ့ၣ်ထီၣ်, လီၤတံၢ်လီၤဆဲးဝဲဒ်မုၢ် ဟဲထီၣ်အသိးန့ၣ်လီၤ.

²⁴ယွၤမ့ၢ်တၢ်အိၣ်ဒီးယၤခဲလၢာ်လီၤ. မၤသးဒ်န့ၣ်ဒီး, ယကပာ်ယတၢ်မုၢ်လၢ်လၢအပူၤလီၤ.

²⁵ယွၤန့ၣ်ဂ့ၤဝဲလၢကယဲၢ်ပှၤလၢအအိၣ်ခိးအီၤဒီးပှၤလၢအသးဃု အီၤတဖၣ်အဂီၢ်လီၤ.

²⁶မၤသးဒ်န့ၣ်ဒီး, တၢ်အိၣ်ခိးယွၤလၢတၢ်သးစူၤအပူၤ, တၢ်အိၣ်ခိးအီၤလၢကအုၣ်က့ၤခီၣ်က့ၤပှၤအဂီၢ်န့ၣ်မ့ၢ်တၢ်အဂ့ၤ ကတၢၢ်လၢပဂီၢ်လီၤ.

²⁷တၢ်မၤလိတၢ်သူၣ်စူၤသးစူၤဖဲပမ့ၢ်ဒံးပှၤသးစၢ်န့ၣ် မ့ၢ်တၢ်ဂ့ၤကတၢၢ်န့ၣ်လီၤ.

²⁸ဖဲပတူၢ်ဘၣ်တၢ်န့ၣ်ကြၢးပဆ့ၣ်နီၤထဲတဂၤဧိၤကစုဒု လၢတၢ်သးစူၤအပူၤလီၤ.

²⁹ပကြၢးဆုးလီၤပခိၣ်လၢတၢ်ဟ့ၣ်လီၤဒိးပၢပသးအပူၤလီၤ. အဂ့ၢ်ဒ်အံၤ, တၢ်မုၢ်လၢ်ကအိၣ်ဒံးဝဲသ့ၣ်သ့ၣ်လီၤ.

³⁰ပမ့ၢ်ဘၣ်တၢ်တီၢ်ဒီးတၢ်ကတိၤတရီတပါပှၤဘၣ်ဆၣ်ပကြၢးတူၢ်လိာ် အီၤခဲလၢာ်လီၤ.

³¹ယွၤန့ၣ်သူၣ်ကညီၤသးကညီၤတၢ်အါဒီးတမ့ၢ်လၢကညိကွံာ် ပှၤလီၤထူလီၤယိာ်ဘၣ်.

³²အဝဲကဟဲစိာ်န့ၢ်ပှၤလၢတၢ်သးအုးဘၣ်ဆၣ်ဒီးအတၢ်အဲၣ်ပှၤန့ၣ် ကျၢၤဒီးဆူၣ်ဝဲလီၤ.

³³တမုာ်ဘၣ်အသးလၢတၢ်ဒုးလီၤဘၣ်ပှၤလၢတၢ်သးအုးမ့ၢ်ဂ့ၤတၢ်ဆူး တၢ်ဆါမ့ၢ်ဂ့ၤအပူၤန့ၣ်ဘၣ်.

³⁴ဖဲပသးတဖၣ်ဘၣ်တၢ်ဒိသဘှံးအီၤလၢဃိာ်ပူၤန့ၣ်ယွၤသ့ၣ်ညါဝဲ ဒၣ်လီၤ.

³⁵သ့ၣ်ညါဝဲဖဲတၢ်ခွဲးတၢ်ယာ်လၢအဟ့ၣ်လီၤပှၤတဖၣ်ဘၣ်တၢ်သမၢအီၤ န့ၣ်လီၤ.

³⁶ဖဲတၢ်စံၣ်ညီၣ်တီဘၣ်တၢ်ဘိးကဒါကွံာ်အီၤလၢကွီၢ်ဘျီၣ်ပူၤန့ၣ် အဝဲသ့ၣ်ညါဝဲလီၤ.

³⁷ယွၤမ့ၢ်တဘၣ်သူၣ်ဘၣ်သးဘၣ်ဒီးပှၤဒုးကဲထီၣ်လိၣ်ထီၣ်တၢ် တသ့ဘၣ်နီတမံၤနီတဂၤဘၣ်.

³⁸တၢ်ဂ့ၤမ့ၢ်ဂ့ၤတၢ်အၢမ့ၢ်ဂ့ၤန့ၣ်ကဲထီၣ်လိၣ်ထီၣ်ဝဲဒ်အမၤလိာ် တၢ်အသိးန့ၣ်လီၤ.

³⁹ဖဲပဘၣ်တၢ်စံၣ်ညီၣ်လၢပတၢ်ဒဲးဘးအဃိန့ၣ်ဘၣ်မနုၤလၢ ပကဒူးကဒ့ၣ်ထီရီၤတၢ်န့ၣ်လဲၣ်.

⁴⁰မ်ပကွၢ်ထံက့ၤပကျဲတဖၣ်လီၤတံၢ်လီၤဆဲးဒီးဃၣ်ကဒါက့ၤပသး ဆူယွၤအအိၣ်တက့ၢ်.

⁴¹မ်ပယူာ်ထီၣ်ပစုဃုာ်ဒီးပသးတဖၣ်ဆူကစၢ်ယွၤလၢမူခိၣ်, ဒီးဘါထုကဖၣ်ဒီးစံး,

⁴²“ပမၤတ့ၢ်တၢ်ဒဲးဘးဒီးပူထီၣ်တ့ၢ်တၢ်, ဒီးနဲဒၣ်ယွၤဧၢ, နတပျၢ်ဘၣ်ပတၢ်ကမၣ်ဘၣ်.

⁴³နလူၤဖီၣ်န့ၢ်ပှၤဒီးမၤသံပှၤလီၤ. နတၢ်သးကညီၤန့ၣ်ဘၣ်တၢ်အိၣ် သဒၢအီၤလၢနတၢ်သးဒိၣ်,

⁴⁴လၢတၢ်သးကဲၤထီၣ်အတၢ်အၢၣ်ဖးတီၣ်တလိၣ်အဃိန့ၣ် ပတၢ်ထုကဖၣ်တဖၣ်အကျဲတဖျိဘၣ်.

⁴⁵နဒုးကဲထီၣ်ပှၤလၢဟီၣ်ခိၣ်ချၢအတၢ်ဘၣ်စူးကွံာ်ဒီးတၢ်တဂိာ် တသီၣ်ဘၣ်တဖၣ်န့ၣ်လီၤ.

⁴⁶ပဘၣ်တၢ်ကတိၤတရီတပါဒီးဘၣ်တၢ်ဒုၣ်ဒွဲၣ်ပှၤလၢပဒုၣ်ပဒါခဲလၢာ် လီၤ.

⁴⁷ပဟဲခီဖျိလံတၢ်နးတၢ်ဖှီၣ်ဒီးတၢ်ဟးဂူာ်ဟးဂီၤ, ပအိၣ်မူလၢတၢ်လီၤပျံၤဒီးတၢ်သူၣ်ပျံၤသးဖုးအပူၤလီၤ.

⁴⁸ယမဲာ်ထံတဖၣ်ကယွၤလီၤလၢယမဲာ်ချံတဖၣ်အပူၤဒ်ထံကျိတဖၣ်အသိး လၢယပှၤဂီၢ်မုၢ်အတၢ်ဟးဂူာ်ဟးဂီၤအဃိန့ၣ်လီၤ.

⁴⁹ယမဲာ်ထံမဲာ်နိကပုာ်ထီၣ်ယွၤလီၤဒ်ထံမူကျိလၢအတလီၤသံးဘၣ်.

⁵⁰တုၤလၢယွၤကွၢ်လီၤဝဲလၢမူခိၣ်ဒီးထံၣ်ပှၤန့ၣ်လီၤ.

⁵¹ယသးအံၤသူၣ်အုးသးအုးဖဲယထံၣ်ဘၣ်တၢ်မၤတ့ၢ်အသးဒီးပိာ်မုၣ် တဖၣ်လၢဝ့ၢ်ပူၤလီၤ.

⁵²ယဘၣ်တၢ်ဖီၣ်န့ၢ်ယၤလၢထုဒ်ထိၣ်ဖိတဘ့ၣ်အသိးလၢဒုၣ်ဒါတဖၣ်လၢ အတၢ်ဂ့ၢ်တအိၣ်ဘၣ်ဒ်သိးအကသးဟ့ယၤန့ၣ်လီၤ.

⁵³အဝဲသ့ၣ်ကွံာ်နုာ်မူဒံးယၤဆူတၢ်ပူၤတပူၤဒီးကးတံၢ်အတြဲၤ လၢလၢၢ်တဖျၢၣ်လီၤ.

⁵⁴ထံဟဲထီၣ်ဘၢယၤလၢယခိၣ်ဖီခိၣ်ဒီးယဆိကမိၣ်တ့ၢ်လၢတၢ်သံန့ၣ် အိၣ်ဘူးဝဲလီၤ.

⁵⁵လၢတၢ်ယိာ်ပူၤအခံဒးန့ၣ်, ယွၤဧၢ, ယကိးပသူထီၣ်ဆူနအိၣ်လီၤ.

⁵⁶ဒီးဖဲယဃ့ကညးနၤလၢနကဒိကနၣ်ယတၢ်ကိးပသူထီၣ်ဒီးနနၢ်ဟူတ့ၢ် လီၤ.

⁵⁷နစံးဆၢဒီးတဲဘၣ်တ့ၢ်ယၤလၢယသုတပျံၤတၢ်တဂ့ၤလီၤ.

⁵⁸နတုၤအိၣ်ယၤလၢတၢ်အုၣ်က့ၤခီၣ်က့ၤအဂီၢ်ဒီးယွၤဧၢ, နမၤပူၤဖျဲးယသးသမူလီၤ.

⁵⁹စံၣ်ညီၣ်တၢ်လၢတၢ်ကွၢ်မဲာ်ယၤအပူၤတက့ၢ်. နသ့ၣ်ညါလၢတၢ်မၤကမၣ် တဖၣ်ဘၣ်တၢ်မၤအီၤထီဒါယၤန့ၣ်လီၤ.

⁶⁰နသ့ၣ်ညါလၢယဒုၣ်ယဒါတဖၣ်သးဟ့ယၤဒ်လဲၣ်ဒီးကူၣ်ထီၣ်တၢ်ထီဒါ ယၤဒ်လဲၣ်န့ၣ်လီၤ.

⁶¹နနၢ်ဟူတ့ၢ်အတၢ်ကတိၤတရီတပါယၤ, ယွၤဧၢ, နသ့ၣ်ညါကယဲၢ်အတၢ်ကူၣ်တၢ်ကျဲၤတဖၣ်လီၤ.

⁶²အဝဲသ့ၣ်စံးကတိၤတၢ်လၢယဂ့ၢ်သ့တနံၤကျၢၤဒီးမၤထီၣ်အတၢ်ကူၣ် တၢ်တိာ်တဖၣ်လီၤ.

⁶³စးထီၣ်လၢမုၢ်ဂီၤတုၤမုၢ်နၤတၢ်ခံးန့ၣ်အဝဲသ့ၣ်မၤလီၤနံၤ လီၤကျံးတၢ်လၢယၤလီၤ.

⁶⁴စံၣ်ညီၣ်အဝဲသ့ၣ်လၢတၢ်လၢအမၤတ့ၢ်ဝဲတဖၣ်အဃိတက့ၢ်, ယွၤဧၢ,

⁶⁵ဆိၣ်အၢအဝဲသ့ၣ်ဒီးမၤပှဲၤအီၤလၢတၢ်သးဟးဂီၤတက့ၢ်.

⁶⁶လူၤဃုဖီၣ်န့ၢ်အီၤဒီးတြူာ်ကွံာ်အီၤလၢဟီၣ်ခိၣ်အဖီခိၣ် တက့ၢ်.”