S'gaw Karen bible online

လံာ်ယဃ့းစက့လး 16

¹ယွၤကတိၤတၢ်ဒီးယၤလီၤ. အဝဲစံးဝဲ, “ပှၤကညီလၢအသံသ့ဧၢ, ဒုးနဲၣ်ဝ့ၢ်ယရူၤၡလ့ၣ်လၢ တၢ်လီၤသးဘၣ်အၢတဖၣ်လၢအမၤတ့ၢ်လံဝဲတက့ၢ်.

³တဲဘၣ်ဝ့ၢ်ယရူၤၡလ့ၣ်တၢ်လၢယွၤပၢဘၣ်တၢ်ခဲလၢာ်ကစၢ်စံးဘၣ်အီၤ န့ၣ်တက့ၢ်. နအိၣ်ဖျဲၣ်ထီၣ်လၢကီၢ်ကနၤဧၣ်အပူၤလီၤ. နပၢ်မ့ၢ်ပှၤအမိၢ်ဖိတဂၤဒီးနမိၢ်မ့ၢ်ပှၤဃ့ၤသးဖိတဂၤလီၤ.

⁴ဖဲနအိၣ်ဖျဲၣ်ထီၣ်န့ၣ်, ပှၤတကူးတဲာ်ဘၣ်နဒ့အပျံၤမ့ၢ်ဂ့ၤ, သ့ကဆှီဘၣ်နၤမ့ၢ်ဂ့ၤ, ထူးနၤလၢအံသၣ်မ့ၢ်ဂ့ၤ, ဒီးဘိၣ်ဘံနၤလၢတၢ်ကံးယာ်မ့ၢ်ဂ့ၤနီတဂၤဘၣ်.

⁵ပှၤတသးကညီၤဘၣ်နၤတုၤလၢကမၤတၢ်သ့ၣ်တဖၣ်န့ၣ် တမံၤမံၤလၢနဂီၢ်နီတဂၤဘၣ်. ဖဲနအိၣ်ဖျဲၣ်ထီၣ်န့ၣ်, ပှၤတအဲၣ်နၤနီတဂၤဘၣ်. နဘၣ်တၢ်ကွံာ်တ့ၢ်ကွံာ်နၤလၢတၢ်ပျီပူၤန့ၣ်လီၤ.

⁶ဒီးယလဲၤတြူာ်တၢ်ဒီးထံၣ်ဘၣ်နဝံာ်ပကံးနသးလၢနသွံၣ်ဒၣ်နဲအပူၤလီၤ. နဘၣ်တၢ်ကးဘၢနၤလၢတၢ်သွံၣ်, ဘၣ်ဆၣ်ယတပျဲနသံဘၣ်.

⁷ယဒုးဒိၣ်ထီၣ်နၤဒ်တၢ်မုၢ်တၢ်ဘိလၢအဂံၢ်အဘါထီၣ်တထံးအသိးန့ၣ် လီၤ. နဒိၣ်ထီၣ်ဒီးတၢ်ဂံၢ်တၢ်ဘါဒီးနနီၢ်ထီထီၣ်ဒီးကဲထီၣ်ပိာ်မုၣ် သးစၢ်တဂၤန့ၣ်လီၤ. နနုၢ်တဖၣ်အက့ၢ်အဂီၤဂ့ၤမး, ဒီးနခိၣ်သူထီထီၣ်, ဘၣ်ဆၣ်နအိၣ်ဘ့ၣ်ဆ့န့ၣ်လီၤ.

⁸ဖဲယလဲၤတြူာ်ကဒီးတၢ်န့ၣ်, ယထံၣ်ဘၣ်လၢအကတီၢ်ဘၣ်လံ ဝဲလၢနကအဲၣ်တၢ်ကွံတၢ်အဂီၢ်လီၤ. ယမၤဘၢနနီၢ်ခိလၢအအိၣ်ဘ့ၣ် ဆ့န့ၣ်ဒီးယဆ့ကၤဖီခိၣ်ဒီးအၢၣ်လီၤလၢယကအဲၣ်နၤန့ၣ်လီၤ. မ့ၢ်လီၤ, ယမၤတၢ်တ့တၢ်ဖျီအတၢ်အၢၣ်လီၤတမံၤဒီးနၤ, ဒီးနကဲထီၣ်ယတၢ်န့ၣ်လီၤ. အအံၤမ့ၢ်တၢ်လၢယွၤပၢဘၣ်တၢ်ခဲလၢာ်ကစၢ်စံးဝဲန့ၣ်လီၤ.

⁹အန့ၣ်ဝံၤဒီးယဟံးန့ၢ်ထံဒီးသ့ကွံာ်တၢ်သွံၣ်လၢနလိၤန့ၣ်လီၤ. ယဖှူသ့ၣ်စၤယံးအသိလၢနဖံးဘ့ၣ်ခိၣ်လီၤ.

¹⁰ယဒုးကူဒုးသိးထီၣ်နၤလၢဆ့ကၤဆးဒဲးကံၣ်ဒဲးဝ့ၤအသးတဘ့ၣ် ဒီးဟ့ၣ်လီၤနၤခီၣ်ဖံးလၢအဘၣ်တၢ်မၤအီၤလၢတၢ်ဖံးအဂ့ၤကတၢၢ်, ခိၣ်ကျီၤဖှီဝါကဆှၣ်တခါ, ဒီးဆ့ကၤဖးဒိၣ်သတိၢ်တဘ့ၣ်န့ၣ်လီၤ.

¹¹ယကယၢကယဲထီၣ်နၤလၢတၢ်မျၢ်ပလဲလၢအမ့ၢ်ထံဖှံၣ်တဖၣ်ဒီးဖဲ တဖၣ်န့ၣ်လီၤ.

¹²ယဟ့ၣ်လီၤနၤလၢနါဒ့ကွီၤတကွီၤဒီးနၢ်ဒံးတဖၣ်, ဒီးခိၣ်သလုးအဃံအလၤတဖျၢၣ်လၢနကကုာ်ထီၣ်အီၤအဂီၢ်န့ၣ်လီၤ.

¹³နအိၣ်ဒီးတၢ်ကယၢကယဲတဖၣ်လၢထူဒီးစ့, ဒီးထီဘိနကူသိးဒၣ်တၢ်ကူတၢ်ကၤဖှီဝါကဆှၣ် လၢတၢ်ဆးဒဲးကံၣ်ဒဲးဝ့ၤအီၤဒီးတၢ်ကူတၢ်ကၤသတိၢ်န့ၣ်လီၤ. နအီၣ်ကိၣ်လၢအဘၣ်တၢ်မၤအီၤလၢကိၣ်ကမူၣ်အဂ့ၤကတၢၢ်ဒီးနအိၣ်ဒီး ကနဲစီဒီးသ့ၣ်စၤယံးအသိလၢနကအီၣ်အီၤအဂီၢ်န့ၣ်လီၤ. နတၢ်ဃံတၢ်လၤန့ၣ်မၤကတုၤပှၤအသး ဒီးနကဲထီၣ်နီၢ်ပၤမုၣ်တဂၤန့ၣ်လီၤ.

¹⁴နကဲထီၣ်ပှၤလၢအမံၤဟူသၣ်ဖျါလၢပှၤကိးကလုာ်ဒဲး အကျါလၢနတၢ်ဃံတၢ်လၤအလၢအပှဲၤအဃိန့ၣ်လီၤ. အဂ့ၢ်ဒ်အံၤ, ယမ့ၢ်တ့ၢ်ပှၤတဂၤလၢအဒုးဃံဒုးလၤနၤထဲထဲအံၤညါန့ၣ်လီၤ. တၢ်အံၤမ့ၢ်တၢ်လၢယွၤပၢဘၣ်တၢ်ခဲလၢာ်ကစၢ်စံးဝဲန့ၣ်လီၤ.

¹⁵ဘၣ်ဆၣ်ဒီးနဟံးန့ၢ်နတၢ်ခွဲးတၢ်ယာ်လၢတၢ်နတၢ်ဃံတၢ်လၤဒီး နတၢ်မံၤဟူသၣ်ဖျါအဖီခိၣ်, လၢနကမံဃုာ်ဒီးပှၤကိးဂၤဒဲးလၢအဟဲဆူနအိၣ်အဂီၢ်န့ၣ်လီၤ.

¹⁶နသူနတၢ်ကူတၢ်သိးတနီၤလၢနကကယၢကယဲနတၢ်ဘူၣ်တၢ်ဘါ အလီၢ်တဖၣ်အဂီၢ်, ဒီးဒ်ပှၤဃဲသဲမုၣ်တဂၤအသိး, နဟ့ၣ်လီၤနသးဆူပှၤကိးဂၤဒဲးအအိၣ်လီၤ.

¹⁷နဟံးန့ၢ်စ့ဒီးထူတၢ်မျၢ်ပလဲလၢယဟ့ၣ်တ့ၢ်နၤတဖၣ်ဒီးသူအီၤ လၢနကမၤကဲထီၣ်ပိာ်ခွါအက့ၢ်အဂီၤတဖၣ်, ဒီးမၤကမၣ်မုၣ်ကမၣ်ခွါဒီးအဝဲသ့ၣ်န့ၣ်လီၤ.

¹⁸နဟံးန့ၢ်တၢ်ကူတၢ်သိးတဖၣ်လၢတၢ်ဆးဒဲးကံၣ်ဒဲးဝ့ၤအီၤန့ၣ် လၢယဟ့ၣ်နၤန့ၣ်ဒီးပာ်ထီၣ်အီၤလၢတၢ်ဂီၤတၢ်ဖီၣ်တဖၣ်အလိၤ, ဒီးနလုၢ်ထီၣ်သ့ၣ်စၤယံးအသိဒီးတၢ်နၢမူလၢယဟ့ၣ်တ့ၢ်နၤဆူ တၢ်ဂီၤတၢ်ဖီၣ်တဖၣ်အံၤအအိၣ်န့ၣ်လီၤ.

¹⁹ယဟ့ၣ်နၤလၢတၢ်အီၣ်လၢအမ့ၢ်ကိၣ်ကမူၣ်အဂ့ၤကတၢၢ်, သ့ၣ်စၤယံးအသိ, ဒီးကနဲစီ, ဘၣ်ဆၣ်ဒီးနလုၢ်ထီၣ်အီၤဒ်တၢ်လုၢ် တၢ်ပာ်တမံၤအသိး, ဒ်သိးနကမၤန့ၢ်တၢ်ဂီၤတၢ်ဖီၣ်တဖၣ်အတၢ်ကွၢ်မဲာ်နၤအဂီၢ်န့ၣ် လီၤ. အအံၤမ့ၢ်တၢ်လၢယွၤပၢဘၣ်တၢ်ခဲလၢာ်ကစၢ်စံးဝဲန့ၣ်လီၤ.

²⁰ဝံၤဒီး, နဟံးန့ၢ်ဖိခွါတဖၣ်ဒီးဖိမုၣ်တဖၣ်လၢနဆံးစၢ်ထီၣ်န့ၢ်ယၤ, ဒီးလုၢ်ထီၣ်အဝဲသ့ၣ်ဒ်တၢ်လုၢ်တၢ်ပာ်တဖၣ်အသိးဆူတၢ်ဂီၤတၢ်ဖီၣ် ဖၣ်န့ၣ်လီၤ. ထဲနတၢ်သးတတီဒီးယၤန့ၣ်, တအၢတ့ၢ်မးလံ.

²¹တၢ်န့ၣ်ဒၣ်လဲာ်တအိၣ်ဃုာ်ဒီးနဟံးန့ၢ်ယဖိတဖၣ်ဒီးလုၢ်ထီၣ်အဝဲ သ့ၣ်ဆူတၢ်ဂီၤတၢ်ဖီၣ်တဖၣ်န့ၣ်ဒံးဘၣ်.

²²ဖဲနအိၣ်မူတၢ်အိၣ်မူလီၤသးဘၣ်အၢဒ်ပှၤဃဲသဲမုၣ်တဂၤ အသိးအကတီၢ်န့ၣ်, နတသ့ၣ်နီၣ်ထီၣ်က့ၤနဖိသၣ်အမုၢ်နံၤတဖၣ်နီတဘျီ, ဖဲနအိၣ်ဘ့ၣ်ဆ့ဒီးတလ့ၣ်ကံးကူးနသးလၢနသွံၣ်ဒၣ်နဲအပူၤ အကတီၢ်န့ၣ်ဘၣ်.”

²³ယွၤပၢဘၣ်တၢ်ခဲလၢာ်ကစၢ်စံးဝဲ, “နကဘၣ်တၢ်စံၣ်ညီၣ်ဃါမနၤ, ဃါမနၤလီၤ. နမၤတၢ်အၢတၢ်သီန့ၣ်ခဲလၢာ်, ဝံၤဒီး,

²⁴လၢကျဲမုၢ်ကိးဘိဒဲးအသရ့ၤန့ၣ်, နသူၣ်ထီၣ်ဘှီထီၣ်တၢ်လီၢ်တဖၣ် လၢတၢ်ဘူၣ်ထီၣ်ဘါထီၣ်တၢ်ဂီၤတၢ်ဖီၣ်တဖၣ်အဂီၢ်ဒီးမၤပှၤဃဲသဲ မုၣ်အတၢ်မၤလီၤ.

²⁵နကွံာ်လီၤနတၢ်ဃံတၢ်လၤလၢကပံာ်ကျါလီၤ. နဟ့ၣ်လီၤနသး ဆူပှၤကိးဂၤဒဲးလၢအဟဲတြူာ်ဝဲန့ၣ်လီၤ. ဒီးတနံၤဘၣ်တနံၤန့ၣ်, နလီၤဂာ်ဒီးပှၤဃဲသဲမုၣ်ဒံးယံာ်ဒံးအါထီၣ်လီၤ.

²⁶နပျဲပှၤအဲၤကူပတူးဖိတဖၣ်လၢအအိၣ်လၢနဃၢၤလၢအသးကတၢန့ၣ် ကမံဃုာ်ဒီးနၤလၢလီၢ်မံခးအဖီခိၣ်လီၤ. ဒီးနသူနတၢ်မၤပှၤဃဲသဲမုၣ်အတၢ်မၤလၢကမၤသးထီၣ်ယၤအဂီၢ်န့ၣ် လီၤ.

²⁷ခဲကနံၣ်အံၤယယူာ်ထီၣ်ယစုလၢတၢ်စံၣ်ညီၣ်နၤအဂီၢ်ဒီးလၢ ယကထုးကွံာ်ယတၢ်ဆိၣ်ဂ့ၤအတၢ်နီၤဟ့ၣ်လၢနဂီၢ်န့ၣ်လီၤ. ယဟ့ၣ်လီၤနၤဆူပှၤဖလ့ၡသးဖိတဖၣ်အစုပူၤ, ပှၤလၢအသးဟ့ နၤဒီးသးဘၣ်အၢနလုၢ်လၢ်အၢသီအတၢ်မၤတဖၣ်န့ၣ်လီၤ.

²⁸မ့ၢ်လၢပှၤဂၤတဖၣ်တမၤသးမံဒံးနၤဘၣ်အဃိ, နဃ့ၢ်လူၤပိာ်ထွဲ ပှၤအၤၡူၢ်ဖိတဖၣ်အခံန့ၣ်လီၤ. နမ့ၢ်တ့ၢ်အဝဲသ့ၣ်အပှၤဃဲသဲ မုၣ်, ဘၣ်ဆၣ်ဒီးအဝဲသ့ၣ်စ့ၢ်ကီးတမၤသးမံဒံးနၤဘၣ်.

²⁹နမ့ၢ်စ့ၢ်ကီးပှၤဃဲသဲမုၣ်တဂၤလၢပှၤဘၤဘူၤလိၣ်ဖိတဖၣ် အဂီၢ်, ပှၤတကလုာ်န့ၣ်လၢအမ့ၢ်ပှၤကူၣ်တၢ်ကၤတၢ်တဖၣ်, ဘၣ်ဆၣ်ဒီးအဝဲသ့ၣ်စ့ၢ်ကီးတမၤသးမံဒံးနၤဘၣ်.”

³⁰အအံၤမ့ၢ်တၢ်လၢယွၤပၢဘၣ်တၢ်ခဲလၢာ်ကစၢ်စံးဝဲန့ၣ်လီၤ. “နမၤတ့ၢ်တၢ်အံၤခဲလၢာ်ဒ်ပှၤဃဲသဲမုၣ်တဂၤလၢအတၢ်မဲာ်ဆှး တအိၣ်ဘၣ်အသိးန့ၣ်လီၤ.

³¹လၢကျဲဘိကိးဘိဒဲးအလိၤန့ၣ်, နသူၣ်ထီၣ်ဘှီထီၣ်တၢ်လီၢ်တဖၣ် လၢတၢ်ဘူၣ်ထီၣ်ဘါထီၣ်တၢ်ဂီၤတၢ်ဖီၣ်တဖၣ်အဂီၢ်ဒီးမၤပှၤဃဲသဲ မုၣ်အတၢ်မၤန့ၣ်လီၤ. ဘၣ်ဆၣ်ဒီးတမ့ၢ်နဃုကျိၣ်ဃုစ့ဒ်ပှၤဃဲသဲမုၣ် ပတီၢ်မုၢ်တဂၤအသိးန့ၣ်ဘၣ်.

³²နလီၤဂာ်ဒီးပိာ်မုၣ်တဂၤလၢအမၤကမၣ်မုၣ်ကမၣ်ခွါဒီးပှၤစီစၣ်တဖၣ်, လၢကအဲၣ်အဝၤဒၣ်ဝဲအလီၢ်န့ၣ်လီၤ.

³³ပှၤဃဲသဲမုၣ်တဂၤန့ၣ်ဘၣ်တၢ်ဟ့ၣ်အီၤတၢ်အပှ့ၤလီၤ. မ့မ့ၢ်နဲနဟ့ၣ်တၢ်ဟ့ၣ်တဖၣ်ဆူပှၤလၢနအဲၣ်အီၤခဲလၢာ်ဒီးဟ့ၣ် အဝဲသ့ၣ်ခိၣ်ဖးလာ်ဆှိးလၢကဟဲလၢတၢ်လီၢ်ကိးပူၤဒဲးလၢ ကမံဃုာ်ဒီးနၤအဂီၢ်လီၤ.

³⁴နမ့ၢ်ပှၤဃဲသဲမုၣ်တဂၤလၢအလီၤဆီတကလုာ်လီၤ. ပှၤတမၤဆူၣ်နၤနီတဂၤလၢနကကဲထီၣ်ပှၤဃဲသဲမုၣ်အဂီၢ်ဘၣ်. ပှၤတဟ့ၣ်နၤတၢ်အပှ့ၤဘၣ်. နဟ့ၣ်ပှၤတၢ်အပှ့ၤတခီလီၤ. မ့ၢ်လီၤ, နလီၤဆီနဲလီၤ.”

³⁵မ့မ့ၢ်ဒ်န့ၣ်ဒီးခဲကနံၣ်အံၤ, ဝ့ၢ်ယရူၤၡလ့ၣ်, ပှၤဃဲသဲမုၣ်ဧၢ, ကနၣ်တၢ်လၢယွၤစံးဝဲန့ၣ်တက့ၢ်.

³⁶အအံၤမ့ၢ်တၢ်လၢယွၤပၢဘၣ်တၢ်ခဲလၢာ်ကစၢ်စံးဝဲန့ၣ်လီၤ. “နဘ့ၣ်ကွံာ်နကူနသိးခဲလၢာ်ဒီးဒ်ပှၤဃဲသဲမုၣ်အသိးန့ၣ်, နဟ့ၣ်လီၤနသးဆူပှၤလၢနအဲၣ်အီၤတဖၣ်ဒီးဆူနတၢ်ဂီၤတၢ်ဖီၣ်လၢ အလီၤသးဘၣ်အၢတဖၣ်အအိၣ်, ဒီးနမၤသံနဖိတဖၣ်ဒ်တၢ်လုၢ်တၢ်ပာ်တဖၣ်အသိးဒီးလုၢ်ထီၣ်အီၤ ဆူတၢ်ဂီၤတၢ်ဖီၣ်န့ၣ်လီၤ.

³⁷လၢတၢ်အံၤအဃိ, ယကဟဲပာ်ဖှိၣ်ပှၤလၢနအဲၣ်တ့ၢ်အီၤလၢညါတဖၣ်တပူၤဃီခဲလၢာ်, ပှၤတဖၣ်လၢနအဲၣ်အီၤဒီးပှၤတဖၣ်လၢနသးဟ့အီၤန့ၣ်လီၤ. ယကဟဲပာ်ဖှိၣ်အဝဲသ့ၣ်ဝးတရံးနၤဒီးကကဝီၤဃာ်နၤလီၤ. အန့ၣ်ဝံၤဒီး, ယကဘ့ၣ်လီၤကွံာ်နကူသိးတဖၣ်ဒီးပျဲအဝဲသ့ၣ်ထံၣ်ဘၣ် နတၢ်အိၣ်ဘ့ၣ်ဆ့န့ၣ်လီၤ.

³⁸ယကစံၣ်ညီၣ်ဃၣ်နၤလၢတၢ်မၤကမၣ်မုၣ်ကမၣ်ခွါဒီးတၢ်မၤသံတၢ် အဃိ, ဒီးလၢယတၢ်သးဒိၣ်ဒီးသးကဲၤထီၣ်အပူၤန့ၣ်, ယကစံၣ်ညီၣ်နၤလၢတၢ်သံန့ၣ်လီၤ.

³⁹ယကပာ်နၤလၢအဝဲသ့ၣ်အတၢ်စိတၢ်ကမီၤအဖီလာ်, ဒီးအဝဲသ့ၣ်ကမၤလီၤပှီၢ်ကွံာ်တၢ်လီၢ်တဖၣ်ဖဲနမၤပှၤဃဲသဲမုၣ် အတၢ်မၤဒီးဘူၣ်ထီၣ်ဘါထီၣ်တၢ်ဂီၤတၢ်ဖီၣ်တဖၣ်န့ၣ်လီၤ. အဝဲသ့ၣ်ကစိာ်ကွံာ်နကူနသိးတဖၣ်ဒီးတၢ်မျၢ်ပလဲတဖၣ်ဒီးကပာ် လီၤတဲာ်နၤအိၣ်ဘ့ၣ်ဆ့လၢာ်လၢာ်ဆ့ဆ့န့ၣ်လီၤ.

⁴⁰အဝဲသ့ၣ်ကထိၣ်ဂဲၤထီၣ်ပှၤဂီၢ်မုၢ်တဖုလၢကကွံာ်နၤလၢလၢၢ်, ဒီးအဝဲသ့ၣ်ကကျီကွံာ်နၤအကူာ်အကူာ်လၢအနးတဖၣ်န့ၣ်လီၤ.

⁴¹အဝဲသ့ၣ်ကဒွဲၣ်အူထီၣ်ကွံာ်နဟံၣ်တဖၣ်ဒီးပျဲပှၤပိာ်မုၣ်ဂီၢ် မုၢ်တဖုထံၣ်ဘၣ်တၢ်စံၣ်ညီၣ်နၤန့ၣ်လီၤ. ယကဒုးဆိကတီၢ်နၤလၢနတၢ်မ့ၢ်ပှၤဃဲသဲမုၣ်တဂၤ, ဒီးဆိကတီၢ်နၤလၢနတၢ်ဟ့ၣ်တဖၣ်ဆူပှၤလၢနအဲၣ်အီၤတဖၣ်န့ၣ်လီၤ.

⁴²အန့ၣ်ဒီး, ယတၢ်သးထီၣ်ကပူၤကွံာ်, ဒီးယကအိၣ်ဃိကလာ်န့ၣ်လီၤ. ယတသးထီၣ်လၢၤမ့ၢ်ဂ့ၤသူၣ်က့ၣ်သးကါလၢၤမ့ၢ်ဂ့ၤနီတစုဘၣ်.

⁴³ဖဲနသးစၢ်အခါယမၤဘၣ်နၤဒ်လဲၣ်န့ၣ်, နသးပ့ၤနီၣ်ကွံာ်အီၤလံ. ဒီးနမၤသးဒိၣ်ထီၣ်ယၤခီဖျိတၢ်ခဲလၢာ်လၢနမၤတ့ၢ်အီၤန့ၣ်လီၤ. လၢတၢ်န့ၣ်အဃိဒီး, ယမၢနဟ့ၣ်တၢ်အပှ့ၤလၢတၢ်သ့ၣ်တဖၣ်အံၤခဲလၢာ် အဂီၢ်လီၤ. ဘၣ်မနုၤအဃိနမၤအါထီၣ်တၢ်ကလုာ်ကလိၤလၢတၢ်အဂၤခဲလၢာ်လၢ နမၤတ့ၢ်လၢအလီၤသးဘၣ်အၢတဖၣ်အဖီခိၣ်န့ၣ်လဲၣ်.” ယွၤပၢဘၣ်တၢ်ခဲလၢာ်ကစၢ်ကတိၤလံတၢ်လံ.

⁴⁴ယွၤစံးဝဲဒၣ်, “ဝ့ၢ်ယရူၤၡလ့ၣ်ဧၢ, ပှၤဂီၢ်မုၢ်ကသူတၢ်ကတိၤ ဒိအံၤလၢအဘၣ်ဃးဒီးနၤဒီးစံးဝဲ, ဒ်မိၢ်အသိးန့ၣ်, ဖိမုၣ်မ့ၢ်ဒ်န့ၣ်အသိးလီၤ.

⁴⁵နမ့ၢ်နီၢ်နီၢ်နမိၢ်အဖိမုၣ်န့ၣ်လီၤ. အဝဲသးဟ့အဝၤဒီးအဖိ တဖၣ်လီၤ. နလီၤဂာ်ဒီးနဒီပုၢ်ဝဲၢ်မုၣ်တဖၣ်လၢအသးဟ့ အဝၤတဖၣ်ဒီးအဖိတဖၣ်န့ၣ်လီၤ. နၤဒီးနဒီပုၢ်ဝဲၢ်မုၣ်ဝ့ၢ်တဖၣ်အိၣ်ဒီးမိၢ်တဂၤလၢအမ့ၢ်ပှၤ ဃ့ၤသးဖိဒီးသုပၢ်မ့ၢ်ပှၤအမိၢ်ဖိတဂၤန့ၣ်လီၤ.

⁴⁶နဝဲၢ်မုၣ်မ့ၢ်ၡၤမရံဒီးအဒူအသဝီတဖၣ်လၢကလံၤစိးတခီန့ၣ် လီၤ. နပုၢ်မုၣ်ဃုာ်ဒီးအဒူသဝီတဖၣ်မ့ၢ်ဝဲဝ့ၢ်စဒိၣ်လၢကလံၤထံး န့ၣ်လီၤ.

⁴⁷မ့ၢ်နသးမံတ့ၢ်လၢနကပိာ်အဝဲသ့ၣ်အခီၣ်လီၢ်တဖၣ်ဒီးမၤဒီး အဝဲသ့ၣ်အတၢ်မၤတဖၣ်လၢအလီၤသးဘၣ်အၢန့ၣ်ဧါ. တမ့ၢ်ဘၣ်လၢတစိၢ်ဖိအတီၢ်ပူၤဒၣ်လဲာ်န့ၣ်, နအိၣ်မူအၢန့ၢ်ဒံးအဝဲသ့ၣ်လၢတၢ်ခဲလၢာ်လၢနမၤတ့ၢ်အီၤ အပူၤန့ၣ်လီၤ.

⁴⁸ယွၤပၢဘၣ်တၢ်ခဲလၢာ်ကစၢ်စံးဝဲ, ဒ်ယမ့ၢ်ကစၢ်ယွၤလၢ အမူဝဲသပှၢ်ကတၢၢ်အသိး, ယစံးလၢနဒီပုၢ်ဝဲၢ်မုၣ်ဝ့ၢ်စဒိၣ်ဒီး အဒူသဝီတဖၣ်ကမၤတ့ၢ်တၢ်အၢတၢ်သီလၢနၤဒီးနဒူသဝီ တဖၣ်မၤတ့ၢ်ဝဲန့ၣ်ဘၣ်.

⁴⁹အဝဲဒီးအဖိမုၣ်တဖၣ်ပာ်ထီၣ်ထီအသးမ့ၢ်လၢအဝဲသ့ၣ်အိၣ်ဒီး တၢ်လၢကအီၣ်ဝဲအါအါဂီၢ်ဂီၢ်, ဒီးအိၣ်ဆိးဝဲလၢတၢ်ဃူတၢ်ဖိးဒီးတၢ်ဘှ့ၣ်တၢ်ဘှီၣ်အပူၤအဃိ, ဘၣ်ဆၣ်ဒီးအဝဲသ့ၣ်တကဟု ကယာ်ပှၤဖှီၣ်ဖိယာ်ဖိပှၤအစုတတုၤလီၤအခီၣ်တတုၤလီၤတဖၣ်န့ၣ်ဘၣ်.

⁵⁰အဝဲသ့ၣ်ပာ်ထီၣ်ထီအသးဒီးအခိၣ်ကိၤ, ဒီးမၤတၢ်တဖၣ်လၢယသးဟ့ အီၤ, သတးဒီးယမၤဟးဂီၤတ့ၢ်အဝဲသ့ၣ်ဒ်နသ့ၣ်ညါနဲဂ့ၤမးအသိးန့ၣ် လီၤ.

⁵¹ဝ့ၢ်ၡၤမရံတမၤတၢ်ဒဲးဘးထဲသိးဒီးနမၤတ့ၢ်အီၤတဝာ်ဒၣ်လဲာ်ဘၣ်. နမၤတၢ်လီၤသးဘၣ်အၢအါန့ၢ်အဝဲမၤတ့ၢ်ဝဲတက့ၢ်လီၤ. ဖဲတၢ်ထိၣ်သတြီၤကွၢ်အီၤဒီး, နတၢ်မၤတတီတတြၢ်တၢ်န့ၣ်ဒုးကဲ ထီၣ်နပုၢ်မုၣ်တဖၣ်လၢပှၤလၢအဖျါလၢအတၢ်သရူးကမၣ်တအိၣ်န့ၣ်လီၤ.

⁵²ဒီးခဲကနံၣ်အံၤ, နကဘၣ်တူၢ်နတၢ်မဲာ်ဆှးန့ၣ်လီၤ. နတၢ်ဒဲးဘးတဖၣ်အၢဒိၣ်န့ၢ်ဒံးနဒီပုၢ်ဝဲၢ်မုၣ်တဖၣ်, တုၤဒၣ်လဲာ်ဖဲတၢ်ထိၣ်သတြီၤအီၤဒီးနၤန့ၣ်, ဖျါလၢအဝဲသ့ၣ်အတၢ်ကမၣ်တအိၣ်ဘၣ်လီၤ. ခဲကနံၣ်အံၤမဲာ်ဆှး, ဒီးဝံယိးနတၢ်မဲာ်ဆှးမ့ၢ်လၢနဒုးကဲထီၣ်နဒီပုၢ်ဝဲၢ်မုၣ်တဖၣ်အိၣ်ဖျါ ကဆှီအဃိတက့ၢ်.”

⁵³ယွၤစံးဘၣ်ဝ့ၢ်ယရူၤၡလ့ၣ်, “ယကဒုးဘီၣ်ထီၣ်ညီထီၣ်က့ၤကဒီး ဝ့ၢ်စဒိၣ်ဒီးအဒူသဝီတဖၣ်, ဒီးဝ့ၢ်ၡၤမရံဒီးအဒူသဝီတဖၣ်လီၤ. မ့ၢ်လီၤ. ယကဒုးဘီၣ်ထီၣ်ညီထီၣ်နၤစ့ၢ်ကီးလီၤ.

⁵⁴နကမဲာ်ဆှးလီၤက့ၤနသးဒၣ်နဲဒီးနတၢ်မဲာ်ဆှးန့ၣ်ကဒုးနဲၣ်ဝဲ လၢနဒီပုၢ်ဝဲၢ်မုၣ်တဖၣ်ဘီၣ်ဝဲညီဝဲဆံးအါလဲၣ်န့ၣ်လီၤ.

⁵⁵အဝဲသ့ၣ်ကဘီၣ်ထီၣ်ညီထီၣ်က့ၤကဒီးတဘျီ, ဒီးနၤဒီးနဒူသဝီ တဖၣ်စ့ၢ်ကီးကဘၣ်တၢ်ပာ်ကဒါက့ၤအီၤလၢအလီၢ်န့ၣ်လီၤ.

⁵⁶မ့ၢ်နတကတိၤလီၤနံၤဘၣ်ဖၣ်လဲတၢ်ဘၣ်ဃးဒီးဝ့ၢ်စဒိၣ် အဂ့ၢ်, ဖဲမုၢ်နံၤတဖၣ်လၢနပာ်ထီၣ်ထီနသး,

⁵⁷ဒီးတချုးဒံးလၢတၢ်အၢတၢ်သီလၢနမၤတ့ၢ်အီၤဘၣ်တၢ်လီၣ်ဖျါ အီၤန့ၣ်ဧါ. အခဲအံၤနလီၤဂာ်ဒၣ်ဒီးအီၤန့ၣ်လီၤ. နကဲထီၣ်တၢ်လီၤနံၤဘၣ်ဖၣ်လဲတမံၤလၢပှၤအဒိၣ်ဖိတဖၣ်, ပှၤဖလ့ၡသးဖိတဖၣ်, ဒီးပှၤလၢနဃၢၤအဂၤတဖၣ်လၢအသးဟ့နၤအဂီၢ်န့ၣ်လီၤ.

⁵⁸နကဘၣ်တူၢ်တၢ်လၢတၢ်ကလုာ်ကလိၤဒီးတၢ်လီၤသးဘၣ်အၢ တဖၣ်လၢနမၤတ့ၢ်အီၤအဃိန့ၣ်လီၤ.” ယွၤကတိၤလံတၢ်လံ.

⁵⁹ယွၤပၢဘၣ်တၢ်ခဲလၢာ်ကစၢ်စံးဝဲ, “ယကမၤနၤဒ်နကြၢးဘၣ်တၢ်မၤ နၤအသိး, မ့ၢ်လၢနတပာ်ကဲနတၢ်အၢၣ်လီၤတဖၣ်ဒီးမၤဟးဂီၤ တၢ်အၢၣ်လီၤအီလီၤအဃိန့ၣ်လီၤ.

⁶⁰ဘၣ်ဆၣ်ဒီးယကပာ်ကဲဒီးဟံးဃာ်တၢ်အၢၣ်လီၤအီလီၤလၢယမၤဒီးနၤ ဖဲနသးစၢ်အခါန့ၣ်ဒီးယကမၤတၢ်အၢၣ်လီၤအီလီၤတမံၤဒီးနၤလၢ ကအိၣ်ဂၢၢ်ဆိးကျၢၤဝဲလီၤထူလီၤယိာ်လီၤ.

⁶¹နကသ့ၣ်နီၣ်ထီၣ်က့ၤလၢနမၤတ့ၢ်တၢ်ဒ်လဲၣ်ဒီးမဲာ်ဆှးလၢတၢ်န့ၣ် အဃိဖဲနမၤန့ၢ်က့ၤနဝဲၢ်မုၣ်ဒီးနပုၢ်မုၣ်အဆၢကတီၢ်န့ၣ်လီၤ. ယကပျဲအဝဲသ့ၣ်ကဲထီၣ်ဒ်ဖိမုၣ်တဖၣ်အသိးလၢနဂီၢ်, ဖဲတၢ်အံၤမ့တမ့ၢ်တၢ်လၢအအိၣ်လၢယတၢ်အၢၣ်လီၤအီၤလီၤဒီးနၤ အပူၤဒၣ်လဲာ်န့ၣ်လီၤ.

⁶²ယကမၤသီထီၣ်က့ၤယတၢ်အၢၣ်လီၤအီလီၤဒီးနၤ, ဒီးနကသ့ၣ်ညါလၢယမ့ၢ်ယွၤန့ၣ်လီၤ.

⁶³ယကပျၢ်တၢ်ကမၣ်တၢ်တဖၣ်လၢနမၤတ့ၢ်အီၤခဲလၢာ်, ဘၣ်ဆၣ်ဒီးနကသ့ၣ်နီၣ်တၢ်တဖၣ်န့ၣ်, ဒီးနကမဲာ်ဆှးကဲၣ်ဆိးလၢနကအဲးထီၣ်နထးခိၣ်အဂီၢ်န့ၣ်လီၤ.” ယွၤပၢဘၣ်တၢ်ခဲလၢာ်ကစၢ်ကတိၤလံတၢ်လံ.

Read S'gaw Karen လံာ်ယဃ့းစက့လး 16 Bible Online

လံာ်ယဃ့းစက့လး 16 - S'gaw Karen bible

လံာ်ယဃ့းစက့လး 16