Read S'gaw Karen လံာ်ယဃ့းစက့လး 28 Bible Online

လံာ်ယဃ့းစက့လး 28 - S'gaw Karen bible

လံာ်ယဃ့းစက့လး 28

¹ယွၤကတိၤတ့ၢ်တၢ်ဒီးယၤလီၤ. အဝဲစံးဝဲဒၣ်, “ပှၤကညီလၢအသံသ့ဧၢ, တဲဘၣ်ဝ့ၢ်ထါယၢၣ်အပှၤပၢတၢ်လၢ, တၢ်လၢယၤ, ယွၤပၢဘၣ်တၢ်ခဲလၢာ်ကစၢ်စံးဘၣ်အီၤန့ၣ်တက့ၢ်. လၢတၢ်ပာ်ထီၣ်ထီသးအပူၤန့ၣ်, နစံးလီၤနသးလၢ နမ့ၢ်ယွၤတဂၤန့ၣ်လီၤ. နစံးလၢ, ဒ်ယွၤတဂၤအသိးန့ၣ် နဆ့ၣ်နီၤလၢ လီၢ်ပစိာ်တဖျၢၣ်အဖီခိၣ်, ဘၣ်တၢ်ကဝီၤဃာ်အီၤလၢ ပီၣ်လဲၣ်တဖၣ်န့ၣ်လီၤ. နကပာ်မၤနသး ဒ်ယွၤတဂၤအသိး, ဘၣ်ဆၣ်တမ့ၢ်ဘၣ်. နမ့ၢ်ဒၣ်ပှၤတဂၤလၢ အသံသ့, ဒီးတမ့ၢ်ဘၣ်တၢ်စီတၢ်ဆှံဘၣ်.

³နဆိကမိၣ်လၢ နကူၣ်တၢ်သ့ဒိၣ်န့ၢ်ဒံးစီၤဒၤနံးယ့လးတက့ၢ်, ဒီးတၢ်ခူသူၣ်အိၣ်တဒၢလၢ နမဲာ်ညါတသ့နီတမံၤဘၣ်န့ၣ်လီၤ.

⁴နတၢ်ကူၣ်သ့ဒီးတၢ်သ့တၢ်ဘၣ်မၤကဲဒိၣ်နၤဒီးတၢ်ထူးတၢ်တီၤ တဖၣ်လၢထူဒီးစ့န့ၣ်လီၤ.

⁵နမၤပနံၣ်တၢ်ကၤအတၢ်မၤအိၣ်ဒီးတၢ်သးဆး, တၢ်ပ့ၢ်တၢ်ဆှါဒီး နမၤအါထီၣ်နတၢ်စုလီၢ်ခီၣ်ခိၣ်ကွ့ၢ်ကွ့ၢ်န့ၣ်လီၤ. နပာ်ထီၣ်ထီနသးလၢ နတၢ်ထူးတၢ်တီၤတဖၣ်အဃိဒိၣ်မးလဲၣ်.

⁶လၢတၢ်န့ၣ်အဃိခဲကနံၣ်အံၤ အအံၤမ့ၢ်တၢ်လၢယၤ, ယွၤပၢဘၣ်တၢ်ခဲလၢကစၢ်စံးဝဲဒၣ်န့ၣ်လီၤ. မ့ၢ်လၢနဆိကမိၣ်နဲလၢ နကူၣ်ဘၣ်ကူၣ်သ့ထဲသိးဒီးယွၤတဂၤအဃိ,

⁷ယကဟဲစိာ်ဃီၤဒုၣ်ဒါတဖၣ်လၢအတအိၣ်ဒီးတၢ်သးကညီၤဘၣ်လၢ ကဟဲထီၣ်ဒုးနၤအဂီၢ်န့ၣ်လီၤ. အဝဲသ့ၣ်ကမၤဟးဂီၤကွံာ်တၢ်ဃံတၢ်လၤခဲလၢာ်လၢ နမၤန့ၢ်တ့ၢ်အီၤလၢနတၢ်သ့တၢ်ဘၣ်ဒီး တၢ်ကူၣ်သ့အပူၤန့ၣ်လီၤ.

⁸အဝဲသ့ၣ် ကမၤသံနၤဒီး ဆှၢနၤဆူတၢ်သွၣ်ခိၣ်တပူၤလၢအဘၣ်စီၣ်ဘၣ်သ့န့ၣ်လီၤ.

⁹ဖဲအဝဲသ့ၣ်ဟဲလၢ ကမၤသံနၤန့ၣ်မ့ၢ်နကစံးဒံး ဒၣ်လၢနမ့ၢ်ယွၤတဂၤန့ၣ်ဧါ. ဖဲနကွၢ်ဆၢၣ်မဲာ်ဘၣ်ဒီး ပှၤလၢကမၤသံနၤတဖၣ်န့ၣ်, နကမ့ၢ်ပှၤတဂၤလၢ အသံသ့ဒီးတမ့ၢ်ဘၣ် တၢ်စီတၢ်ဆှံလ့ၤတက့ၤဘၣ်န့ၣ်လီၤ.

¹⁰နကသံဒ်ထွံၣ်တဒုအသိးလၢပှၤတခီဘီမုၢ်ဖိတဖၣ်လၢ အယွၤတအိၣ်ဘၣ်အစုပူၤန့ၣ်လီၤ. ယၤ, ယွၤပၢဘၣ်တၢ်ခဲလၢာ် ကစၢ်ဟ့ၣ်လီၤအကလုၢ်န့ၣ်လီၤ.”

¹¹ယွၤကတိၤကဒီးတၢ်ဒီးယၤန့ၣ်လီၤ. အဝဲစံးဝဲဒၣ်, “ပှၤကညီလၢအသံသ့ဧၢ, သူၣ်အုးသးအုးလၢ တၢ်ဟဲဝံဟဲစိာ်လၢ အအိၣ်ခိးလီၤပာ်စၢၤဝ့ၢ်ထါယၢၣ်အစီၤပၤအခိၣ်, အဃိန့ၣ်တက့ၢ်. တဲဘၣ်အီၤတၢ်လၢယၤ, ယွၤပၢဘၣ်တၢ်ခဲလၢာ် ကစၢ်စံးဝဲန့ၣ်တက့ၢ်. တဘျီန့ၣ်နမ့ၢ်တ့ၢ်တၢ်လၢတၢ်ပှဲၤအတၢ် ဒိတၢ်တဲာ်တမံၤန့ၣ်လီၤ. နကူၣ်သ့ဒီးဃံလၤတ့ၢ်ဒိၣ်မးလဲၣ်.

¹³နအိၣ်ဆိးတ့ၢ်လၢ ဧ့ၤဒ့ၣ်, ကစၢ်ယွၤအတၤသၣ်လီၢ်အပူၤဒီး နသိးထီၣ်တ့ၢ်လၢၢ်တၢ်မျၢ်ကိးကလုာ်ဒဲး လၢအမ့ၢ်တၢ်မျၢ်ဆီသွံၣ် တဖၣ်, တၢ်မျၢ်မဟူယၤတိၤအသး, တၢ်မျၢ်ဘီအူး သဖးယၤ, တၢ်မျၢ်လါဟ့, တၢ်မျၢ်မဟူယၤဂီၤ, တၢ်မျၢ်နကၤသွဲး, တၢ်မျၢ်နံၤလါအဲးတဖၣ်, လၢၢ်လါဟ့တဖၣ်ဒီးလၢၢ်ဂီၤတဖၣ်န့ၣ်လီၤ. နအိၣ်စ့ၢ်ကီးဒီးတၢ်ကယၢကယဲတဖၣ်လၢထူန့ၣ်လီၤ. တၢ်တဖၣ်န့ၣ်ဘၣ်တၢ်မၤတ့ၢ်အီၤလၢနဂီၢ်ဖဲမုၢ်တနံၤလၢ နဘၣ်တၢ်တ့လီၤပာ်လီၤနၤန့ၣ်လီၤ.

¹⁴ယပာ်လီၤတ့ၢ် မူခိၣ်ကလူးတဂၤလၢအလီၤပျံၤလီၤဖုးဖဲန့ၣ်လၢ ကခိးဒီဒၣ်နၤန့ၣ်လီၤ. နအိၣ်လၢယကစၢၢ်စီဆှံအလိၤ, နလဲၤ တၢ်လၢလၢၢ်တၢ်မျၢ်ကပြုၢ်ကပြီၤတဖၣ် အကျါန့ၣ်လီၤ.

¹⁵နတၢ်သကဲးပဝးမ့ၢ် တၢ်လၢတၢ်ပှဲၤစးထီၣ်မုၢ်တနံၤလၢနဘၣ် တၢ်တ့လီၤပာ်လီၤနၤတုၤဃီၤလၢနစးထီၣ်မၤတၢ်အၢတၢ်သီတစုန့ၣ်လီၤ.

¹⁶နတၢ်ဖံးတၢ်မၤအါလၢ တၢ်ဆါတၢ်ပှ့ၤဒီး တၢ်အံၤန့ၣ်ဆှၢဃီၤနၤဆူတၢ်မၤဆူၣ်မၤစိးတၢ်ဒီးတၢ်မၤဒဲးဘးန့ၣ်လီၤ. လၢတၢ်န့ၣ်အဃိ, ယမၤဆူၣ်ဒ်သိး နကဟးထီၣ်ကွံာ်လၢယကစၢၢ်စီဆှံဒီးမူခိၣ်ကလူး တဂၤလၢအခိးဒီဒၣ်နၤန့ၣ်နီၣ်ဟးထီၣ်ကွံာ်နၤယံၤဒီး လၢၢ်တၢ်မျၢ်ကပြုၢ်ကပြီၤတဖၣ်န့ၣ်လီၤ.

¹⁷နပာ်ထီၣ်ထီတ့ၢ်နသးလၢနက့ၢ်ဘၣ်ဂီၤဂ့ၤအဃိဒီး နတၢ်မံၤဟူသၣ်ဖျါဒုးကဲထီၣ်နၤလီၤဂာ်ဒ်ပှၤဟးဂီၤဖိ တဂၤအသိးန့ၣ်လီၤ. မ့ၢ်လၢတၢ်အံၤအဃိယတ့ၢ်လီၤကွံာ် နၤလၢဟီၣ်ခိၣ်လိၤ, ပာ်တ့ၢ်နၤဒ်တၢ်ဟ့ၣ်ပလီၢ်တမံၤအသိးလၢ စီၤပၤအဂၤတဖၣ်အဂီၢ်လီၤ.

¹⁸နမၤတၢ်အၢတၢ်သီဒ်သိးအံၤတမံၤလၢတၢ်ဆါတၢ်ပှ့ၤအပူၤ တုၤနတၢ်လီၢ်တဖၣ်လၢတၢ်ဘူၣ်ထီၣ်ဘါထီၣ်အဂီၢ်န့ၣ်ဟးဂူာ် ဟးဂီၤကွံာ်ဝဲဒၣ်န့ၣ်လီၤ. လၢတၢ်န့ၣ်အဃိယဒွဲၣ်ကွံာ်ဝ့ၢ်န့ၣ်လၢမ့ၣ် အူဒီး မ့ၣ်အူအီၣ်ကွံာ်အီၤခဲလၢာ်န့ၣ်လီၤ. ပှၤလၢအကွၢ်ဃီၤနၤ ခဲလၢာ်န့ၣ်ခဲအံၤထံၣ်ဝဲလၢနကဲထီၣ်ဖၣ်ဆါလံန့ၣ်လီၤ.

¹⁹နတအိၣ်လၢၤဘၣ်. နဟါမၢ်ကွံာ်လံလီၤစိၤလီၤထီလံ, ဒီးကယဲၢ်ပှၤကလုာ်လၢအသ့ၣ်ညါတ့ၢ်နၤတဖၣ် ပျံၤတၢ်ဖုးတၢ်, ဒီးဘၣ်ယိာ်ဝဲလၢနတၢ်ဟဲဝံဟဲစိာ်အံၤကဘၣ်ဘၣ်ဖုးအဝဲသ့ၣ်န့ၣ်လီၤ.”

²⁰ယွၤစံးဘၣ်ယၤ,

²¹“ပှၤကညီလၢသံသ့ဧၢ, စံးလၢဝ့ၢ်စံဒိၣ်ကြၢးဘၣ်တၢ်စံၣ်ညီၣ်တက့ၢ်. တဲဘၣ်ပှၤဂီၢ်မုၢ်ဖဲန့ၣ်တဖၣ်လၢ, တၢ်လၢယၤ, ယွၤပၢဘၣ်တၢ် ခဲလၢာ်ကစၢ်တဲဝဲဘၣ်ဃးဒီးအဝဲသ့ၣ်အဂ့ၢ်န့ၣ်တက့ၢ်. ဝ့ၢ်စံဒိၣ်ဧၢ, ယမ့ၢ်နဒုၣ်နဒါလီၤ. ပှၤဂီၢ်မုၢ်ကစံးထီၣ်ပတြၢၤယၤလၢတၢ်လၢယမၤနၤသ့ၣ်တဖၣ်အဃိလီၤ. အဝဲသ့ၣ်ကသ့ၣ်ညါဝဲလၢယမ့ၢ်ယွၤ, ဖဲယပာ်ဖျါထီၣ်ယသးလၢ, ယစီဝဲဆှံဝဲထဲလဲၣ်ခီဖျိယစံၣ်ညီၣ်ပှၤလၢအအိၣ်ဆိးလၢ နပူၤတဖၣ်အဃိန့ၣ်လီၤ.

²³ယကဆှၢလီၤတၢ်ဆူးတၢ်ဆါတဖၣ်လၢနလိၤဒီး ယကဒုးယွၤလီၤ တၢ်သွံၣ်လၢနကျဲမုၢ်တဖၣ်အပူၤန့ၣ်လီၤ. နကဘၣ်တၢ်ဟဲထီၣ်ဒုးနၤလၢအကပၤကပၤဒီး နပှၤဂီၢ်မုၢ်ကဘၣ်တၢ်မၤသံကွံာ်အီၤန့ၣ်လီၤ. အန့ၣ်တစု, နကသ့ၣ်ညါလၢယမ့ၢ်ယွၤန့ၣ်လီၤ.”

²⁴ယွၤစံးဝဲဒၣ်, “ပှၤကလုာ်တဖၣ်လၢအအိၣ်ဝးတရံးကီၢ်အံၣ်စရ့လး, လၢအမၤတရီတပါအီၤန့ၣ်, တကဲထီၣ်လၢၤတၤဆှုၣ်တၤမဲတဖၣ် လၢကမၤဆါကဒီးအီၤနီတဖုလၢၤဘၣ်. ဒီးအဝဲသ့ၣ်ကသ့ၣ်ညါဝဲ လၢယမ့ၢ်ယွၤပၢဘၣ်တၢ်ခဲလၢာ်အကစၢ်န့ၣ်လီၤ.”

²⁵ယွၤပၢဘၣ်တၢ်ခဲလၢာ်ကစၢ်စံးဝဲဒၣ်, “ယကဟဲက့ၤစိာ်ကဒါက့ၤ ကီၢ်အံၣ်စရ့လးအပှၤဂီၢ်မုၢ်လၢထံကီၢ်တဖၣ်လၢယမၤလီၤပြံလီၤပြါ တ့ၢ်အဝဲသ့ၣ်ဒီးပှၤကလုာ်ခဲလၢာ်ကသ့ၣ်ညါဝဲလၢယမ့ၢ်တၢ်စီဆှံ န့ၣ်လီၤ. ကီၢ်အံၣ်စရ့လးအပှၤဂီၢ်မုၢ် ကအိၣ်ဆိးလၢ အထံကီၢ်ဒၣ်ဝဲအပူၤ, ထံကီၢ်တဘ့ၣ်လၢယဟ့ၣ်လီၤ တ့ၢ်ယခ့ယပှၤစီၤယၤကိာ်န့ၣ်လီၤ.

²⁶အဝဲသ့ၣ်ကအိၣ်ဆိးဝဲဖဲန့ၣ်လၢတၢ်ဘံၣ်တၢ်ဘၢအပူၤန့ၣ်လီၤ. အဝဲသ့ၣ်ကဘှီထီၣ်ဟံၣ်တဖၣ်ဒီး ကသူၣ်လီၤစပံးမုၢ်လီၢ်တဖၣ်လီၤ. ယကစံၣ်ညီၣ်ကယဲၢ်ပှၤအိၣ်ခိၣ် အိၣ်ဃၢၤအဝဲသ့ၣ်တဖၣ်လၢအဒုၣ်ဒွဲၣ်တ့ၢ်အဝဲသ့ၣ်, ဒီးကီၢ်အံၣ်စရ့လး ကအိၣ်ဂၢၢ်ဆိးကျၢၤဝဲလီၤ. အန့ၣ်တစု, အဝဲသ့ၣ်ကသ့ၣ်ညါဝဲလၢယမ့ၢ်ယွၤအဝဲသ့ၣ်အကစၢ်ယွၤန့ၣ်လီၤ.”