Read S'gaw Karen လံာ်ယဃ့းစက့လး 29 Bible Online

လံာ်ယဃ့းစက့လး 29 - S'gaw Karen bible

လံာ်ယဃ့းစက့လး 29

¹လၢပဘၣ်တၢ်စိာ်မၢကဲကုၢ်ပှၤအနံၣ်တဆံအပူၤ, လါဆံဆဲၣ်လါတလါထီၣ်တဆံခံသီ အနံၤန့ၣ်ယွၤကတိၤတၢ်ဒီးယၤန့ၣ်လီၤ.

²အဝဲစံးဝဲဒၣ်, “ပှၤကညီလၢအသံသ့ဧၢ, စံးလၢကီၢ်အဲၤကူပတူး အစီၤပၤကြၢးဘၣ်တၢ်စံၣ်ညီၣ်တက့ၢ်. တဲဘၣ်အီၤလၢအဝဲဒီး ကီၢ်အဲၤကူပတူးဒီဘ့ၣ် ကဘၣ်တၢ်စံၣ်ညီၣ်ဒ်လဲၣ်န့ၣ်တက့ၢ်.

³စံးလၢတၢ်အံၤမ့ၢ်တၢ်လၢယွၤပၢဘၣ်တၢ်ခဲလၢာ်ကစၢ်စံးဘၣ် ကီၢ်အဲၤကူပတူးအစီၤပၤန့ၣ်တက့ၢ်. ယမ့ၢ်နဒုၣ်နဒါ, နသမၣ် ဖးဒိၣ်လၢအမံလီၤလၢ နထံကျိအပူၤန့ၣ်လီၤ. နစံးနဲလၢထံကျိ နံၤလါမ့ၢ်နတၢ်ဒီးနမၤအီၤလၢ နနီၢ်ကစၢ်ဒၣ်နဲလီၤ.

⁴ယကတုၢ်ဖျိနခၣ်ဃံဒီးနီၣ်ကွးတခါ, ဒီးဒုးစဲဘူးညၣ်လၢန ထံပူၤတဖၣ်လၢနလိၤန့ၣ်လီၤ. အန့ၣ်ဝံၤဒီးယကထုးထီၣ် ကွံာ်နၤလၢထံကျိနံၤလါအပူၤဃုာ်ဒီး ညၣ်ခဲလၢာ်လၢအအိၣ်ဝဲလၢနလိၤန့ၣ်လီၤ.

⁵ယကစူးကွံာ်နၤဒီးကယဲၢ်ညၣ်တဖၣ်န့ၣ်ခဲလၢာ်ဆူမဲးမုၢ်ခိၣ်အပူၤလီၤ. နမိၢ်ပှၢ်ကလီၤတဲာ်လၢဟီၣ်ခိၣ်လိၤဒီးတၢ်တခူၣ်လီၤဘျၢလီၤဘၣ် အီၤန့ၣ်ဘၣ်. ယကဟ့ၣ်လီၤအီၤဆူထိၣ်တဖၣ်ဒီးဆၣ်ဖိကီၢ်ဖိတဖၣ် လၢအဝဲသ့ၣ်အတၢ်အီၣ်အဂီၢ်န့ၣ်လီၤ.

⁶အန့ၣ်တစုကီၢ်အဲၤကူပတူး အပှၤဂီၢ်မုၢ်ကသ့ၣ်ညါဝဲလၢ ယမ့ၢ်ယွၤန့ၣ်လီၤ.” ယွၤစံးဝဲဒၣ်, “ပှၤအံၣ်စရ့လးဖိတဖၣ်သန့ၤ အသးလၢနပှၤအဲၤကူပတူးဖိတဖၣ်, လၢတၢ်မၤစၢၤအဂီၢ်န့ၣ်လီၤ. ဘၣ်ဆၣ် နတဂ့ၤဘၣ်ထဲသိး နီၣ်က့လၢအစၢ်တဘိန့ၣ်ဘၣ်.

⁷ဖဲအဝဲသ့ၣ်ကနံၤလီၤအသးလၢနလိၤန့ၣ်နကၢ်ကွံာ်, ဒီးဆဲးဘၣ် အဝဲသ့ၣ်အတံၢ်လၢ်ဒီးမၤဆါအဝဲသ့ၣ်အချၢဃံန့ၣ်လီၤ.

⁸အန့ၣ်ဒီးခဲအံၤ, ယၤယွၤပၢဘၣ်တၢ်ခဲလၢာ် ကစၢ်စံး ဘၣ်နၤလၢယကမၤန့ၢ် ပှၤပိာ်ခွါတဖၣ်လၢ အကဟဲထီၣ်ဒုးနၤလၢနးတဖၣ်ဒီး အဝဲသ့ၣ်ကမၤသံကွံာ် နပှၤဂီၢ်မုၢ်ဒီး နဆၣ်ဖိကီၢ်ဖိတဖၣ်န့ၣ်လီၤ.

⁹ကီၢ်အဲၤကူပတူး ကကဲထီၣ်တၢ်အိၣ်ကလီအလီၢ်တပူၤလၢအဘျုး တအိၣ်ဘၣ်န့ၣ်လီၤ. အန့ၣ်ဒီးနကသ့ၣ်ညါလၢယမ့ၢ်ယွၤန့ၣ်လီၤ.

¹⁰မ့ၢ်လၢနစံးလၢထံကျိနံၤ လါမ့ၢ်နတၢ်ဒီးနမၤအီၤလၢ ကစၢ်ဒၣ်နဲအဃိ, ယမ့ၢ်နဒုၣ်နဒါဒီးနထံကျိနံၤလါ အဒုၣ်အဒါန့ၣ်လီၤ. ယကဒုးကဲထီၣ် ကီၢ်အဲၤကူပတူးဒီဘ့ၣ်လၢ တၢ်လီၢ်တတီၤလၢအအိၣ်လီၤဃီ, စးထီၣ်လၢ ဝ့ၢ်မံးကဒိးလးလၢ ကလံၤစိးတကပၤတုၤဆူစဝ့နၤလၢကလံၤထံးတခီ, ဒီကျဲညါပၢၢ်တုၤလၢပှၤကူၤၡးဖိတဖၣ်အထံဆၢကီၢ်ဆၢန့ၣ်လီၤ.

¹¹ပှၤကညီမ့ၢ်ဂ့ၤ ဆၣ်ဖိကီၢ်ဖိမ့ၢ်ဂ့ၤ တလဲၤခီဖျိဘၣ်အီၤဘၣ်. လၢအနံၣ်လွံၢ်ဆံအတီၢ်ပူၤတၢ်တအိၣ်ဆိးဖဲန့ၣ်နီတမံၤဘၣ်.

¹²ယကဒုးကဲထီၣ် ကီၢ်အဲၤကူပတူးလၢထံကီၢ်တဘ့ၣ်လၢအအိၣ် လီၤဃီကတၢၢ်ဟီၣ်ခိၣ်ချၢန့ၣ်လီၤ. လၢအနံၣ်လွံၢ်ဆံအတီၢ်ပူၤ ကီၢ်အဲၤကူပတူးအဝ့ၢ်တဖၣ် ကအိၣ်လၢတၢ်ဟးဂီၤအပူၤ, တၢ်ဟးဂီၤလၢကအၢဒိၣ်န့ၢ်ဒံးဝ့ၢ်အဂၤတဖၣ်တက့ၢ်န့ၣ်လီၤ. ယကဒုးကဲထီၣ် ပှၤအဲၤကူပတူးဖိတဖၣ်လၢပှၤတဖၣ်လၢ အဃ့ၢ်ပူၤဖျဲးအသးဆူထံကီၢ်အဂၤန့ၣ်လီၤ. အဝဲသ့ၣ်ကဃ့ၢ်ကွံာ်ဆူကယဲၢ်ထံကီၢ်တဖၣ်ဒီး ကအိၣ်ဆိးလၢ ပှၤဂီၢ်မုၢ်အဂၤတဖၣ်အကျါန့ၣ်လီၤ.”

¹³ယွၤပၢဘၣ်တၢ်ခဲလၢာ်ကစၢ်စံးဝဲဒၣ်, “အနံၣ်လွံၢ်ဆံဝံၤအလီၢ်ခံန့ၣ်ယကဟဲက့ၤစိာ်ကဒါက့ၤ ပှၤအဲၤကူပတူးဖိတဖၣ်လၢထံကီၢ်တဖၣ်ဖဲ ယမၤလီၤပြံလီၤပြါတ့ၢ်အဝဲသ့ၣ်,

¹⁴ဒီးယကဒုးအိၣ်ဆိးအဝဲသ့ၣ်လၢကီၢ်အဲၤကူပတူးကလံၤထံး, လၢအမ့ၢ်အဝဲသ့ၣ်အဟံၣ်အဃီ အဂံၢ်ထံးန့ၣ်လီၤ. ဖဲန့ၣ်အဝဲသ့ၣ်ကမ့ၢ်ဘီမုၢ်လၢ အဂံၢ်စၢ်ဘါစၢ်တဘ့ၣ်,

¹⁵ဘီမုၢ်အဂံၢ်စၢ်ဘါစၢ်ကတၢၢ်လၢဘီမုၢ်တဖၣ်အကျါ, ဒီးအဝဲသ့ၣ်တပၢကဒီးတၢ်လၢပှၤကလုာ်ဂၤတဖၣ်အဖီခိၣ် နီတစုလၢၤဘၣ်. ယကဒုးကဲထီၣ်အဝဲသ့ၣ်လၢပှၤလၢအကါ တဒိၣ်နီတစဲးဘၣ်, တုၤဒၣ်လဲာ်, အဝဲသ့ၣ်ထုးန့ၢ် ပှၤကလုာ်အဂၤဆူ အဝဲသ့ၣ်အတၢ်အဲၣ်ဒိးအပူၤ တသ့ဝဲနီတဖုဘၣ်န့ၣ်လီၤ.

¹⁶ကီၢ်အံၣ်စရ့လး တသန့ၤထီၣ်လၢၤအသးလၢအဖီခိၣ်လၢတၢ်မၤစၢၤ အဂီၢ်နီတစုလၢၤဘၣ်. ကီၢ်အဲၤကူပတူးအတၢ်ဟဲဝံဟဲစိာ်ကဒုးသ့ၣ်နီၣ် ကီၢ်အံၣ်စရ့လးလၢ တၢ်သန့ၤသးလၢအဝဲအဖီခိၣ်န့ၣ် မ့ၢ်တၢ်လၢအကမၣ်ဆံးအါလဲၣ်. အန့ၣ်တစု, ကီၢ်အံၣ်စရ့လးကသ့ၣ်ညါလၢယမ့ၢ်ယွၤပၢဘၣ်တၢ်ခဲလၢာ်ကစၢ် န့ၣ်လီၤ.”

¹⁷လၢပဘၣ်တၢ်စိာ်မၢကဲကုၢ်ပှၤပှဲၤထီၣ်ခံဆံနွံနံၣ်လါအခီၣ်ထံးတလါ, လါထီၣ်တသီအနံၤန့ၣ် ယွၤကတိၤတၢ်ဒီးယၤလီၤ.

¹⁸အဝဲစံးဝဲဒၣ်, “ပှၤကညီလၢအသံသ့ဧၢ, ကီၢ်ဘၤဘူၤလိၣ်အစီၤပၤနဘူၤကး န့စၢ်ဒုးလံတၢ်ဒီးဝ့ၢ်ထါယၢၣ်လံန့ၣ်လီၤ. အဝဲမၢအပှၤသုးဖိတဖၣ် စိာ်တၢ်အဃၢတုၤဒၣ်အခိၣ်တဖၣ်လ့ၤဝဲဒီးအဖံဘၣ်ခိၣ်တဖၣ် တီၣ်ထီၣ်ဒီးသွဲးဝဲဘၣ်ဆၣ် စီၤပၤမ့ၢ်ဂ့ၤအဝဲအသုးမ့ၢ်မ့ၢ်ဂ့ၤ တမၤန့ၢ်တၢ်နီတမံၤလၢ အတၢ်မၤကိၢ်ကိၢ်ဂီၤဂီၤတဖၣ်အံၤအဃိဘၣ်.

¹⁹အဃိသတးဒီး, ခဲကနံၣ်အံၤ, တၢ်အံၤမ့ၢ်တၢ်လၢယၤ, ယွၤပၢဘၣ်တၢ်ခဲလၢာ်ကစၢ်စံးဝဲန့ၣ်လီၤ. ယဟ့ၣ်လီၤကွံာ် ကီၢ်အဲၤကူပတူးဆူစီၤပၤနဘူၤကးန့စၢ်အအိၣ်လံ. အဝဲကဂုာ်န့ၢ်ဒီးဟံးန့ၢ်ဆူၣ်ဒီးစိာ်ထီၣ်ကွံာ်ကယဲၢ် ကီၢ်အဲၤကူပတူးအတၢ်ထူးတၢ်တီၤ ခဲလၢာ်ဒ်အမ့ၢ်တၢ်ဘူး တၢ်လဲလၢအဝဲအသုးမုၢ်အဂီၢ်န့ၣ်လီၤ.

²⁰ယဟ့ၣ်အီၤ ကီၢ်အဲၤကူပတူးဒ်အမ့ၢ် တၢ်အဘူး အလဲလၢအဝဲသ့ၣ်အတၢ်ဖံးတၢ်မၤတဖၣ်အဂီၢ်မ့ၢ်လၢ အဝဲအသုးမုၢ်န့ၣ်မၤတ့ၢ်တၢ်လၢယဂီၢ်အဃိန့ၣ်လီၤ. ယၤ, ယွၤပၢဘၣ်တၢ်ခဲလၢာ်ကစၢ်ကတိၤလံတၢ်လံ.

²¹ဖဲတၢ်န့ၣ်မၤအသးဒီး ယကဒုးဆူၣ်ထီၣ် ကီၢ်အံၣ်စရ့လးအပှၤဂီၢ်မုၢ်ဒီးပျဲနၤ, စီၤယဃ့းစက့လး ကတိၤတၢ်ဖဲပှၤကိးဂၤဒဲးနၢ်ဟူဝဲသ့, ဒ်သိးအဝဲသ့ၣ်ကသ့ၣ်ညါ ဝဲလၢ ယမ့ၢ်ယွၤန့ၣ်လီၤ.”