Read S'gaw Karen လံာ်ယဃ့းစက့လး 39 Bible Online

လံာ်ယဃ့းစက့လး 39 - S'gaw Karen bible

လံာ်ယဃ့းစက့လး 39

¹ယွၤပၢဘၣ်တၢ်ခဲလၢာ်ကစၢ်စံးဝဲ, “ပှၤကညီလၢအသံသ့ဧၢ, စံးလၢစီၤကိးလၢအမ့ၢ်ပှၤမ့ၤၡးဖိဒီးပှၤတူၤဘလးဖိအပှၤကလုာ် တဖၣ်အပှၤပၢတၢ်အဒိၣ်ကတၢၢ်ကြၢးဘၣ်တၢ်စံၣ်ညီၣ်ဒီးတဲဘၣ်အီၤ လၢယမ့ၢ်အဒုၣ်အဒါန့ၣ်တက့ၢ်.

²ယကဃၣ်တရံးအီၤဆူကျဲအသီတဘိအပူၤဒီးဆှၢထီၣ်အီၤလၢ ကလံၤစိးလၢအယံၤတခီတုၤအလဲၤတုၤဝဲဆူကီၢ်အံၣ်စရ့လး အကစၢၢ်ကလိတဖၣ်န့ၣ်လီၤ.

³အန့ၣ်ဝံၤဒီးယကမၤလီၤတဲာ်ကွံာ်အချံၣ်လၢအစုစ့ၣ်တခီ ဒီးအပျၢ်တဖၣ်လၢအစုထွဲတခီန့ၣ်လီၤ.

⁴စီၤကိးဒီးအဝဲအသုးမုၢ်ဒီးအသိၣ်အမှံၤတဖၣ်ကလီၤဃံၤကွံာ်လၢ ကီၢ်အံၣ်စရ့လးအကစၢၢ်ကလိတဖၣ်အဒီခိၣ်ဒီးယကဒုးကဲထီၣ် အနီၢ်ခိတဖၣ်လၢတၢ်အီၣ်လၢကယဲၢ်ထိၣ်တဖၣ် ဒီးဆၣ်ဖိကီၢ်ဖိအမံၤတဖၣ်အဂီၢ်န့ၣ်လီၤ.

⁵အဝဲသ့ၣ်ကလီၤဃံၤသံကွံာ်လၢစံာ်ပျီအပူၤန့ၣ်လီၤ. ယၤယွၤပၢဘၣ် တၢ်ခဲလၢာ်ကစၢ်ကတိၤလံတၢ်လံ.

⁶ယကစးထီၣ်မၢမ့ၣ်အူအီၣ်တၢ်လၢကီၢ်မကိးလၢအပူၤဒီးလၢပီၣ်လဲၣ် ကၢၢ်နံၤတဖၣ်ဖဲပှၤဂီၢ်မုၢ်အိၣ်ဆိးဝဲတအိၣ်ဒီးတၢ်မၤတံာ်တာ်အီၤ ဘၣ်ဒီးပှၤကိးဂၤဒဲးကသ့ၣ်ညါဝဲလၢယမ့ၢ်ယွၤန့ၣ်လီၤ.

⁷ယကမၤလီၤတံၢ်ဒ်သိးပှၤဂီၢ်မုၢ်အံၣ်စရ့လးကသ့ၣ်ညါယမံၤ စီဆှံဒီးယတပျဲယမံၤဘၣ်တၢ်မၤမဲာ်ဆှးအီၤနီတ ဘျီလၢၤဘၣ်. အန့ၣ်တစုပှၤကလုာ်တဖၣ်ကသ့ၣ်ညါဝဲလၢယၤ, ယွၤအံၤမ့ၢ်အံၣ်စရ့လးအတၢ်စီဆှံကစၢ်ယွၤန့ၣ်လီၤ.”

⁸ယွၤပၢဘၣ်တၢ်ခဲလၢာ်ကစၢ်စံးဝဲဒၣ်, “မုၢ်နံၤလၢယကတိၤပာ်စၢၤ လၢအဂ့ၢ်န့ၣ်ကဟဲဝဲသပှၢ်ကတၢၢ်န့ၣ်လီၤ.

⁹ပှၤဂီၢ်မုၢ်လၢအအိၣ်ဝဲလၢကီၢ်အံၣ်စရ့လးအဝ့ၢ်တဖၣ်ကဟးထီၣ် ဒီးထၢဖှိၣ်တၢ်စုကဝဲၤလၢအဘၣ်တၢ်ပာ်လီၤတဲာ်ကွံာ်အီၤ တဖၣ်လၢသ့ၣ်မုၣ်အဂီၢ်န့ၣ်လီၤ. အဝဲသ့ၣ်ကမၤကဲၤထီၣ်မ့ၣ်အူ လၢကတီၤတဖၣ်, ချံၣ်တဖၣ်, ပျၢ်တဖၣ်ဘီတဖၣ်ဒီးနီၣ်တီၢ်ဖိတဖၣ် ဒီးကအိၣ်လၢဝဲလၢနွံနံၣ်အတီၢ်ပူၤန့ၣ်လီၤ.

¹⁰အဝဲသ့ၣ်တဘၣ်ထၢဖှိၣ်လၢၤဘၣ်သ့ၣ်မုၣ်လၢပျီတဖၣ်အပူၤမ့ၢ်ဂ့ၤ, ကူာ်လီၤသ့ၣ်တဖၣ်လၢပှၢ်ပူၤမ့ၢ်ဂ့ၤလၢၤဘၣ်. အဂ့ၢ်ဒ်အံၤအဝဲသ့ၣ် ကအိၣ်ဒီးတၢ်စုကဝဲၤလၢအဘၣ်တၢ်ပာ်လီၤတဲာ်ကွံာ်အီၤတဖၣ် လၢကဆိၣ်ကဲၤဝဲအဂီၢ်န့ၣ်လီၤ. အဝဲသ့ၣ်ကဂုာ်ဆူၣ်ပျိဆူၣ်ဒီး ဂုာ်န့ၢ်ကွံာ်ပှၤတဖၣ်လၢအဂုာ်ဆူၣ်ပျိဆူၣ်ဒီးဂုာ်န့ၢ်တ့ၢ်အဝဲသ့ၣ် န့ၣ်လီၤ.” ယွၤပၢဘၣ်တၢ်ခဲလၢာ်ကစၢ်ကတိၤလံတၢ်လံ.

¹¹ယွၤစံးဝဲဒၣ်, “တုၤတၢ်တဖၣ်အံၤခဲလၢာ်မၤအသးန့ၣ်, ယကဟ့ၣ်လီၤစီၤကိးလၢတၢ်ခူၣ်လီၤဘျၢလီၤအလီၢ်တတီၤလၢ ကီၢ်အံၣ်စရ့လးအပူၤ, လၢပှၤလဲၤတၢ်ဖိတဖၣ်အတြီၤပူၤ, လၢပီၣ်လဲၣ်သံအမုၢ်ထီၣ်တခီန့ၣ်လီၤ. စီၤကိးဒီးကယဲၢ်အဝဲ အသုးမုၢ်ခဲလၢာ်, ကဘၣ်တၢ်ခူၣ်လီၤဘျၢလီၤအီၤဖဲန့ၣ်ဒီး တြီၤန့ၣ်ကဘၣ်တၢ်ကိးအီၤလၢစီၤကိးအသုးမုၢ်အတြီၤန့ၣ်လီၤ.

¹²ပှၤအံၣ်စရ့လးဖိတဖၣ်ကဘၣ်ခူၣ်လီၤဘျၢလီၤပှၤအစိၣ်တဖၣ် တယံာ်ဝဲနွံလါဒီးမၤကဆှီထီၣ်က့ၤကဒီးထံဧိၤကီၢ်ဧိၤန့ၣ်လီၤ.

¹³ပှၤကိးဂၤဒဲးလၢကီၢ်ပူၤကခူၣ်လီၤစၢၤအဝဲသ့ၣ်ဒီးအဝဲသ့ၣ်ကဘၣ် တၢ်မၤလၤကပီၤလၢတၢ်အံၤအဃိ, လၢယတၢ်မၤနၢၤအမုၢ်တနံၤ န့ၣ်လီၤ. ယၤယွၤ, ပၢဘၣ်တၢ်ခဲလၢာ်ကစၢ်ကတိၤလံတၢ်လံ.

¹⁴ဖဲနွံလါဝံၤအလီၢ်ခံန့ၣ်, ပှၤပိာ်ခွါတဖၣ်ကဘၣ်တၢ်ဃုထၢအီၤ လၢကလဲၤခီဂာ်တၢ်လၢကီၢ်ပူၤဒ်သိးကဃုထံၣ်ဒီးခူၣ်လီၤ ဘျၢလီၤကွံာ်ပှၤအစိၣ်တဖၣ်လၢအအိၣ်တ့ၢ်ဒံးလၢဟီၣ်ခိၣ်လိၤတဖၣ် ဒ်သိးကမၤကဆှီထီၣ်ထံကီၢ်အဂီၢ်န့ၣ်လီၤ.

¹⁵ဖဲအဝဲသ့ၣ်တဖၣ်လဲၤထီၣ်က့ၤလီၤလၢထံကီၢ်အပူၤန့ၣ်, တဘျီ လၢ်လၢ်ဖဲအဝဲသ့ၣ်ထံၣ်ဘၣ်ပှၤကညီအဃံန့ၣ်, အဝဲသ့ၣ်ကပာ်လီၤ တၢ်ပနီၣ်တမံၤလၢအကပၤဒ်သိးပှၤခူၣ်လီၤတၢ်ပူၤတဖၣ်ကဟဲဒီး ခူၣ်လီၤအီၤလၢစီၤကိးအသုးမုၢ်အတြီၤပူၤကသ့ဝဲအဂီၢ်န့ၣ်လီၤ.

¹⁶(ဝ့ၢ်ကအိၣ်ဘူးဖဲန့ၣ်တဖျၢၣ်လၢအမံၤကဘၣ်တၢ်ကွဲးထွဲအီၤလၢ သုးမုၢ်အမံၤန့ၣ်လီၤ.) ဒီးလၢတၢ်န့ၣ်အဃိ, ကီၢ်ကဘၣ်တၢ်မၤ ကဆှီထီၣ်က့ၤကဒီးအီၤန့ၣ်လီၤ.”

¹⁷ယွၤပၢဘၣ်တၢ်ခဲလၢာ်ကစၢ်စံးဘၣ်ယၤ, “ပှၤကညီလၢ အသံသ့ဧၢ, ကိးထီၣ်ကယဲၢ်ထိၣ်တဖၣ်ဒီးဆၣ်ဖိကီၢ်ဖိတဖၣ်ဒ်သိး ကဟဲလၢတၢ်လီၢ်ကိးပူၤဒဲးလၢအကအီၣ်တၢ်လုၢ်တၢ်ပာ်လၢ ယကတဲာ်ကတီၤပာ်လၢအဝဲသ့ၣ်အဂီၢ်န့ၣ်တက့ၢ်. တၢ်န့ၣ်ကမ့ၢ် တၢ်အီၣ်အမူးဖးဒိၣ်တမူးလၢကီၢ်အံၣ်စရ့လးအကစၢၢ်ကလိ တဖၣ်အဒီခိၣ်, ဖဲအဝဲသ့ၣ်အီၣ်တၢ်ညၣ်ဒီးအီတၢ်သွံၣ်ကသ့န့ၣ်လီၤ.

¹⁸အဝဲသ့ၣ်ကဘၣ်အီၣ်သုးဖိတဖၣ်အညၣ်ဒီးကဘၣ်အီဟီၣ်ခိၣ် အပဒိၣ်ဖးဒိၣ်တဖၣ်အသွံၣ်, ကယဲၢ်ပှၤခဲလၢာ်လၢအကဘၣ် တၢ်မၤသံအီၤဒ်သိဖါတဖၣ်မ့ၢ်ဂ့ၤ, သိဖိတဖၣ်မ့ၢ်ဂ့ၤမဲာ်တဲး လဲးတဖၣ်မ့ၢ်ဂ့ၤ, ကျီၢ်ဖါလၢအဘီၣ်တဖၣ်မ့ၢ်ဂ့ၤအသိးန့ၣ်လီၤ.

¹⁹တုၤမ့ၢ်ယမၤသံပှၤဂီၢ်မုၢ်တဖၣ်အံၤဒ်တၢ်လုၢ်တၢ်ပာ်တဖၣ်အသိးန့ၣ်, ထိၣ်တဖၣ်ဒီးဆၣ်ဖိကီၢ်ဖိတဖၣ်ကဘၣ်အီၣ်ကယဲၢ်တၢ်အသိတုၤ အအီၣ်ကုးအီပှဲၤဒီးကဘၣ်အီတၢ်သွံၣ်တဖၣ်တုၤအအီမူၤအသး န့ၣ်လီၤ.

²⁰လၢယစီၢ်နီၢ်ခိၣ်န့ၣ်, အဝဲသ့ၣ်ကအီၣ်ကူးအီပှဲၤဒီး ကယဲၢ်တၢ်လၢအဖီၣ်န့ၢ်ဝဲသ့ဒ်ကသ့ၣ်တဖၣ်ဒီးပှၤတဖၣ်လၢ အဒိးအဝဲသ့ၣ်ဒီးပှၤသုးဖိတဖၣ်ဒီးပှၤဒုးတၢ်ပိာ်ခွါတဖၣ်န့ၣ်လီၤ. ယၤ, ယွၤပၢဘၣ်တၢ်ခဲလၢာ်ကစၢ်ကတိၤလံတၢ်လံ.”

²¹ယွၤစံးဝဲဒၣ်, “ယကပျဲပှၤကလုာ်တဖၣ်ထံၣ်ဘၣ်ယလၤကပီၤဒီးယကဒုးနဲၣ် အဝဲသ့ၣ်လၢယသူယစိကမီၤဒ်လဲၣ်, လၢယကမၤထွဲယတၢ်ပာ်လီၤသး အတီအလိၤတဖၣ်အဂီၢ်န့ၣ်လီၤ.

²²အန့ၣ်တစု, စးထီၣ်ဖဲန့ၣ်, ပှၤအံၣ်စရ့လးဖိတဖၣ်ကသ့ၣ်ညါဝဲ လၢယမ့ၢ်ယွၤ, အဝဲသ့ၣ်အကစၢ်ယွၤန့ၣ်လီၤ.

²³ဒီးပှၤကလုာ်တဖၣ်ကသ့ၣ်ညါဝဲလၢ, ပှၤအံၣ်စရ့လးဖိတဖၣ်ဘၣ် လဲၤဆူတၢ်စိာ်မၢကဲကုၢ်အလီၢ်, မ့ၢ်လၢတၢ်ဒဲးဘးတဖၣ်လၢ အဝဲသ့ၣ်မၤတ့ၢ်ထီဒါယၤအဃိန့ၣ်လီၤ. ယကဃၣ်ကွံာ်ယသးလၢ အဝဲသ့ၣ်အအိၣ်ဒီးပျဲအဝဲသ့ၣ်အဒုၣ်အဒါတဖၣ်မၤနၢၤမၤဃၣ်အဝဲသ့ၣ် ဒီးမၤသံကွံာ်အဝဲသ့ၣ်လၢတၢ်ဒုးအပျီပူၤန့ၣ်လီၤ.

²⁴ယဟ့ၣ်လီၤအဝဲသ့ၣ်တၢ်လၢအကြၢးဝဲဘၣ်ဝဲဒီးအဝဲသ့ၣ်လၢ အတၢ်တစီတဆှံဒီးအတၢ်အၢတၢ်သီအဂီၢ်ဒီးယဃၣ်ကွံာ်ယသး လၢအဝဲသ့ၣ်အအိၣ်န့ၣ်လီၤ.”

²⁵ယွၤ, ပၢဘၣ်တၢ်ခဲလၢာ်ကစၢ်စံးဝဲဒၣ်, “မ့မ့ၢ်ခဲကနံၣ်အံၤ, ယကသူၣ်ကညီၤသးကညီၤစီၤယၤကိာ်အစၢၤအသွဲၣ်တဖၣ်, ကီၢ်အံၣ်စရ့လးအပှၤဂီၢ်မုၢ်, ဒီးမၤဘီၣ်ထီၣ်ညီထီၣ်ကဒီးအဝဲ သ့ၣ်န့ၣ်လီၤ. ယကဒီဒၣ်အိၣ်ပှိၤယမံၤစီဆှံန့ၣ်လီၤ.

²⁶တုၤအဝဲသ့ၣ်အိၣ်ဆိးဘၣ်ကဒီးတဘျီလၢတၢ်ပူၤဖျဲးအပူၤလၢ အကီၢ်ဒၣ်ဝဲအပူၤ, တအိၣ်ဒီးပှၤလၢကမၤပျံၤမၤဖုးအီၤနီတဂၤန့ၣ်, အဝဲသ့ၣ်သးပ့ၤနီၣ်ကွံာ်ဝဲလၢအဘၣ်တၢ်မၤမဲာ် ဆှးအီၤဒ်လဲၣ်. လၢအတတီဒီးယၤအဃိသ့ဝဲလီၤ.

²⁷ဒ်သိးယဒုးနဲၣ်ပှၤအါကလုာ်လၢယမ့ၢ်တၢ်စီဆှံကသ့ဝဲအဂီၢ်န့ၣ်, ယကဟဲစိာ်ကဒါက့ၤယပှၤဂီၢ်မုၢ်လၢကယဲၢ်ထံကီၢ်တဖၣ်လၢ အဝဲသ့ၣ်အဒုၣ်အဒါတဖၣ်အိၣ်ဆိးဝဲန့ၣ်လီၤ.

²⁸အန့ၣ်ဒီးယပှၤဂီၢ်မုၢ်ကသ့ၣ်ညါလၢယမ့ၢ်ယွၤ, အဝဲသ့ၣ်အကစၢ်ယွၤ န့ၣ်လီၤ. အဝဲသ့ၣ်ကသ့ၣ်ညါတၢ်အံၤမ့ၢ်လၢယဆှၢဃီၤအဝဲသ့ၣ် ဆူတၢ်စိာ်မၢကဲကုၢ်အလီၢ်, ဒီးခဲကနံၣ်အံၤ, ပာ်ဖှိၣ်က့ၤ အဝဲသ့ၣ်ဒီးဟဲက့ၤစိာ်ကဒါက့ၤအဝဲသ့ၣ်ဆူအကီၢ်ဒၣ်ဝဲအပူၤ တပာ်လီၤတဲာ်ကွံာ်ဘၣ်အဝဲသ့ၣ်နီတဂၤဒၣ်လဲာ်အဃိန့ၣ်လီၤ.

²⁹ယကလူလီၤယသးလၢကီၢ်အံၣ်စရ့လးအပှၤဂီၢ်မုၢ်အလိၤဒီး တဃၣ်ကွံာ်ဘၣ်ယသးလၢအဝဲသ့ၣ်အအိၣ်နီတစုလၢၤဘၣ်န့ၣ်လီၤ. ယၤယွၤ, ပၢဘၣ်တၢ်ခဲလၢာ်ကစၢ်ကတိၤလံတၢ်လံ.”