Read S'gaw Karen လံာ်ယဃ့းစက့လး 4 Bible Online

လံာ်ယဃ့းစက့လး 4 - S'gaw Karen bible

လံာ်ယဃ့းစက့လး 4

¹ကစၢ်ယွၤစံးဝဲဒၣ်, “ပှၤကညီလၢအသံသ့ဧၢ, ဟံးန့ၢ်ဒၢးခီတဖျၢၣ်, ပာ်လီၤအီၤလၢနမဲာ်ညါဒီးတိၤလီၤတၢ်လၢအလိၤလၢကပာ် ဖျါအီၤဒ်ဝ့ၢ်ယရူၤၡလ့ၣ်အဒိအသိးန့ၣ်တက့ၢ်.

²ဝံၤဒီး, လၢတၢ်ဒုးနဲၣ်တၢ်ကဝီၤဃာ်တၢ်အဂီၢ်န့ၣ်, ခူၣ်လီၤတၢ်ကျိၤတဖၣ်, ပူၣ်ထီထီၣ်ဟီၣ်ခိၣ်တဖၣ်, သူၣ်ဒဲတဖၣ်, ဒီးပာ်လီၤစုကဝဲၤလၢအဆဲးတိၢ်လီၤပှီၢ်တၢ်တဖၣ် ဝးတရံးအီၤတက့ၢ်.

³ဟံးန့ၢ်သပၢၤထးဘံၣ်သလၣ်တဖျၢၣ်ဒီးပာ်လီၤအီၤဒ်တၢ်အဒူၣ်အသိး လၢနၤဒီးဝ့ၢ်အဘၢၣ်စၢၤန့ၣ်တက့ၢ်. ဃၣ်နမဲာ်ဆူဝ့ၢ်န့ၣ်တက့ၢ်. ဝ့ၢ်ဘၣ်တၢ်ကဝီၤဃာ်အီၤလံဒီးနမ့ၢ်ပှၤတဂၤလၢအကဝီၤဃာ်အီၤန့ၣ်လီၤ. အဝဲအံၤကမ့ၢ်တၢ်ပနီၣ်တမံၤလၢအံၣ်စရ့လးအပှၤတကလုာ်အဂီၢ်န့ၣ်လီၤ.

⁴ဝံၤဒီးမံလီၤလၢနစုစ့ၣ်တကပၤဒီးယကပာ်ထီၣ်အံၣ်စရ့လးအပှၤ တကလုာ်အတၢ်ကမၣ်လၢနဖီခိၣ်န့ၣ်လီၤ.

⁵လၢအသီသၢကယၤခွံဆံအတီၢ်ပူၤ, နကအိၣ်ဖဲန့ၣ်, ဒီးတူၢ်တၢ်လၢအဝဲသ့ၣ်အတၢ်ကမၣ်အဃိန့ၣ်လီၤ. အဂ့ၢ်ဒ်အံၤ, ယစံၣ်ညီၣ်နၤတသီလၢအဝဲသ့ၣ်အတၢ်စံၣ်ညီၣ်ကယံာ်တနံၣ် အဂီၢ်န့ၣ်လီၤ.

⁶ဖဲနမၤတၢ်န့ၣ်ဝံၤဒီး, ဃၣ်နသးဆူနစုထွဲတကပၤဒီးတူၢ်တၢ်ဖဲ န့ၣ်လၢကီၢ်ယူဒၤအတၢ်ကမၣ်အဂီၢ်အသီလွံၢ်ဆံ, တသီလၢအဝဲသ့ၣ်ကဘၣ်တၢ်စံၣ်ညီၣ်အီၤတနံၣ်အဂီၢ်န့ၣ်လီၤ.

⁷ကွၢ်စူၣ်ဃီၤဆူဝ့ၢ်ယရူၤၡလ့ၣ်ဘၣ်တၢ်ကဝီၤဃာ်အီၤန့ၣ်တက့ၢ်. ဒုးနဲၣ်နစုခိၣ်ထီဒါဝ့ၢ်န့ၣ်, ဒီးကတိၤတၢ်လၢဝံအကျိာ်ထီဒါ အီၤတက့ၢ်.

⁸ယကစၢဃာ်နၤဒ်သိးနဃၣ်နသးလၢအံၤတကပၤဆူဘးခီတကပၤ အသုတသ့တဂ့ၤတုၤလၢတၢ်ကဝီၤဃာ်ဝ့ၢ်အံၤဝံၤဝဲတစုန့ၣ်လီၤ.

⁹ခဲအံၤ, ဟံးန့ၢ်ဘုကၠူၣ်တနီၤ, ဘုမုယီၤတနီၤ, ဘီဘၣ်ချံ တနီၤ, ပထိးချံတနီၤ, သွံသၣ်အချံတနီၤဒီးဘုကူးစမ့းတနီၤ တက့ၢ်. ဃါဃုာ်အီၤခဲလၢာ်ဒီးမၤကိၣ်တက့ၢ်. တၢ်န့ၣ်မ့ၢ်တၢ်လၢ နကဘၣ်အီၣ်အီၤဖဲနမံလီၤလၢနစုစ့ၣ်တကပၤလၢအသီသၢ ကယၤခွံဆံအတီၢ်ပူၤန့ၣ်လီၤ.

¹⁰လၢတနံၤအဂီၢ်န့ၣ်နကဘၣ်တၢ်ပျဲအီၣ်နၤကိၣ်အလီၤတယၢၢ်ၡက့လးခံ ဆံဒီးတၢ်န့ၣ်ကဘၣ်လၢဝဲတုၤလၢ, လၢခံတနံၤန့ၣ်လီၤ.

¹¹နကအိၣ်စ့ၢ်ကီးဒီးထံအီလၢတၢ်ထိၣ်တဲာ်လၢနကအီအီၤအဂီၢ်တနံၤ တဟံၣ်ဃုပူတပူလီၤ.

¹²နကဘၣ်မၤထီၣ်မ့ၣ်အူလၢပှၤကညီအအ့ၣ်ကိၢ်ဃ့, ကုၢ်ကိၣ်လၢမ့ၣ်အူန့ၣ်အဖီခိၣ်, ဒီးအီၣ်အီၤဖဲပှၤကိးဂၤဒဲး ထံၣ်ဘၣ်နၤသ့ဝဲန့ၣ်လီၤ.”

¹³ယွၤစံးဝဲဒၣ်, “အဝဲအံၤမ့ၢ်ကျဲအဒိအတဲာ်လၢပှၤအံၣ်စရ့လးဖိ တဖၣ်ကဘၣ်အီၣ်တၢ်အီၣ်လၢယူဒၤအတၢ်သိၣ်တၢ်သီတြီအီၤ, ဖဲယမၤလီၤပြံလီၤပြါအဝဲသ့ၣ်ဆူထံဂုၤကီၢ်ဂၤတဖၣ်အခါန့ၣ်လီၤ.”

¹⁴ဘၣ်ဆၣ်ဒီးယစံးဆၢအီၤ, “တမ့ၢ်ဘၣ်, ယွၤပၢဘၣ်တၢ်ခဲလၢာ်ကစၢ်ဧၢ, ယတမၤဘၣ်အၢဘၣ်သီယသးနီတစုဘၣ်. လၢယဖိသၣ်လံၤလံၤဒီးတုၤခဲအံၤန့ၣ်, ယတအီၣ်ဆၣ်ဖိကီၢ်ဖိလၢအသံဒၣ်တၢ်အညၣ်မ့ၢ်ဂ့ၤ, ဘၣ်တၢ်မၤသံအီၤလၢဆၣ်ဖိကီၢ်ဖိလၢအမံၤတဖၣ်အညၣ်မ့ၢ်ဂ့ၤ, နီတစုဘၣ်. တၢ်အီၣ်လၢတၢ်ပာ်အီၤလၢအတကဆှီဘၣ်န့ၣ်, ယတအီၣ်အီၤနီတစုဘၣ်.”

¹⁵လၢတၢ်န့ၣ်အဃိကစၢ်ယွၤစံးဝဲဒၣ်, “ဂ့ၤလံ. မ့မ့ၢ်ဒ်န့ၣ်ဒီး, လၢတၢ်န့ၣ်အလီၢ်, ယကပျဲနသူကျီၢ်အ့ၣ်ဒီးနကုၢ်ကိၣ်လၢအဖီခိၣ်သ့ဝဲလီၤ.”

¹⁶ဒီးကစၢ်ယွၤစံးအါထီၣ်, “ပှၤကညီလၢအသံသ့ဧၢ, ယကဒီၣ်တဲာ်ကွံာ်တၢ်ဆှၢလီၤကိၣ်လၢဝ့ၢ်ယရူၤၡလ့ၣ်အဂီၢ်န့ၣ်လီၤ. ပှၤဂီၢ်မုၢ်ဖဲန့ၣ်တဖၣ်ကဘၣ်တၢ်ကိၢ်တၢ်ဂီၤဒီးကအိၣ်ဒီးတၢ်ဘၣ် ယိၣ်ဘၣ်ဘီ, ဖဲအဝဲသ့ၣ်စီၤထီၣ်ဝဲတၢ်အီၣ်လၢအဝဲသ့ၣ်အီၣ်ဝဲဒီးဃီၣ်ဝဲထံ လၢအဝဲသ့ၣ်အီဝဲအခါန့ၣ်လီၤ.

¹⁷ကိၣ်ဒီးထံကလၢာ်ကွံာ်လၢအဝဲသ့ၣ်အဂီၢ်လီၤ. အဝဲသ့ၣ်ကအိၣ်လၢတၢ်သးဟးဂီၤအပူၤ, ဒီးအဝဲသ့ၣ်ကဟးဂီၤကလီ ကွံာ်လၢအတၢ်ဒဲးဘးတဖၣ်အဃိန့ၣ်လီၤ.”