Read S'gaw Karen လံာ်ယဃ့းစက့လး 44 Bible Online

လံာ်ယဃ့းစက့လး 44 - S'gaw Karen bible

လံာ်ယဃ့းစက့လး 44

¹ပှၤတဂၤန့ၣ်ဆှၢဃီၤယၤဆူတၢ်ချၢအတြဲၤဖးဒိၣ်လၢတၢ်လုၢ်ဟံၣ် အလီၢ်ကဝီၤအမုၢ်ထီၣ်တကပၤန့ၣ်လီၤ. တြဲၤဖးဒိၣ်န့ၣ်ကးတံာ်ဃး အသး,

²ဒီးယွၤစံးဘၣ်ယၤတြဲၤဖးဒိၣ်အံၤကကးတံာ်ဃးဒၣ်အသးဒီး တၢ်တအိးထီၣ်ဘၣ်အီၤနီတစုဘၣ်န့ၣ်လီၤ. တၢ်တဟ့ၣ်အခွဲးလၢပှၤကညီကသူအီၤနီတဂၤဘၣ်, မ့ၢ်လၢယၤ, ယွၤကီၢ်အံၣ်စရ့လးအကစၢ်ယွၤလဲၤနုာ်ခီဖျိအီၤအဃိန့ၣ်လီၤ. ကအိၣ်ကးတံာ်ဃးဒၣ်အသးန့ၣ်လီၤ.

³ဘၣ်ဆၣ်သနာ်က့, စီၤပၤဖိခွါလၢအပၢတၢ်ကလဲၤဝဲဖဲန့ၣ်ဒ်သိးကအီၣ် တၢ်အီၣ်စီဆှံလၢယမဲာ်ညါန့ၣ်လီၤ. အဝဲကလဲၤနုာ်ဝဲဒီးဟးထီၣ် လၢတြဲၤအကျဲစၢၤခီဖျိကျဲစၢၤကျိၤထံးအဒၢးလၢအအိၣ်ဖဲ တၢ်အိပူၤအကတၢၢ်န့ၣ်လီၤ.

⁴အန့ၣ်ဝံၤဒီးပှၤတဂၤန့ၣ်ဆှၢဃီၤယၤခီဖျိကလံၤစိးအတြဲၤဖးဒိၣ်, ဆူယွၤအတၢ်လုၢ်ဟံၣ်အမဲာ်ညါန့ၣ်လီၤ. ဖဲယကွၢ်တၢ်အဖၢမုၢ်န့ၣ်, ယထံၣ်ဘၣ်လၢယွၤအတၢ်လုၢ်ဟံၣ်န့ၣ်ပှဲၤဒီးယွၤအိၣ်ဝဲဆိးဝဲ အတၢ်ကပီၤကပြုၢ်ကပြီၤန့ၣ်လီၤ. ယထိၣ်လီၤဃံၤယသးဒီး ကျးလီၤယမဲာ်ဆူဟီၣ်ခိၣ်လိၤ,

⁵ဒီးယွၤစံးဘၣ်ယၤ, “ပှၤကညီလၢအသံသ့ဧၢ, ပာ်သူၣ်ပာ်သးလၢ ကယဲၢ်တၢ်ခဲလၢာ်လၢနထံၣ်ဘၣ်ဒီးနနၢ်ဟူဘၣ်န့ၣ်တက့ၢ်. ယကတဲ ဘၣ်နၤတၢ်သိၣ်တၢ်သီတဖၣ်ဒီးတၢ်ဘျၢတဖၣ်လၢကဘၣ် တၢ်မၤထွဲအီၤလၢယွၤအတၢ်လုၢ်ဟံၣ်အဂီၢ်, မတၤတဖၣ်ဘၣ်တၢ်ပျဲအီၤလၢကနုာ်က့ၤဟးထီၣ်လၢယွၤ အတၢ်လုၢ်ဟံၣ်အပူၤ, ဒီးမတၤကဖၣ်ကဘၣ်တၢ်ပျဲအီၤလဲၣ်န့ၣ်တိၢ် နီၣ်လီၤတံၢ်ဆဲးတက့ၢ်.

⁶တဲဘၣ်ကီၢ်အံၣ်စရ့လးအပှၤဂီၢ်မုၢ်လၢအပူထီၣ်တၢ်တဖၣ်လၢယၤ, ယွၤပၢဘၣ်တၢ်ခဲလၢာ်ကစၢ်တပျဲလၢၤဘၣ်, ဒီးတကွၢ်ကပာ် ကွံာ်ဘၣ်တၢ်လီၤသးဘၣ်အၢတဖၣ်လၢအဝဲသ့ၣ် မၤတ့ၢ်အီၤန့ၣ်လၢၤဘၣ်.

⁷အဝဲသ့ၣ်မၤဘၣ်အၢဘၣ်သီကွံာ်ယတၢ်လုၢ်ဟံၣ်ခီဖျိပျဲပှၤတခီဘီမုၢ် ဖိတဖၣ်လၢအတဒိးဘၣ်တၢ်ကူးတရံး, ပှၤဂီၢ်မုၢ်တဖၣ်လၢအတစူၢ် ဘၣ်ယၤလဲၤနုာ်ဆူယွၤအတၢ်လုၢ်ဟံၣ်အပူၤဖဲတၢ်လုၢ်တၢ်ပာ်တဖၣ် အသိဒီးအသွံၣ်ဘၣ်တၢ်လုၢ်ထီၣ်ဆူယအိၣ်အခါန့ၣ်လီၤ. လၢတၢ် န့ၣ်အဃိယပှၤဂီၢ်မုၢ်ဘိးဃၣ်ကွံာ်ယတၢ်အၢၣ်လီၤအီလီၤခီဖျိ တၢ်လီၤသးဘၣ်အၢအတၢ်မၤတဖၣ်လၢအဝဲသ့ၣ်မၤတ့ၢ်ဝဲခဲလၢာ် န့ၣ်လီၤ.

⁸အဝဲသ့ၣ်တဟံးန့ၢ်ဘၣ်မူဒါလၢတၢ်ဘူၣ်တၢ်ဘါအလုၢ်အလၢ်စီဆှံ တဖၣ်လၢယတၢ်လုၢ်ဟံၣ်ပူၤအဂီၢ်ဘၣ်. အခိၣ်တလိာ်အဝဲသ့ၣ် ပာ်လီၤမူဒါလၢပှၤတခီဘီမုၢ်ဖိတဖၣ်အစုပူၤန့ၣ်လီၤ.

⁹ယၤ, ယွၤပၢဘၣ်တၢ်ခဲလၢာ်ကစၢ်တဲဖျါလၢပှၤတခီ ဘီမုၢ်ဖိတဂၤလၢ်လၢ်လၢအတဒိးဘၣ်တၢ်ကူးတရံး, ပှၤတဂၤလၢ်လၢ်လၢအတစူၢ်ယၤဘၣ်န့ၣ်, တဟဲနုာ်ဘၣ်ဆူယတၢ်လုၢ်ဟံၣ်အပူၤဘၣ်. ပှၤတခီဘီမုၢ်ဖိတဂၤလၢအအိၣ်ဆိးလၢကီၢ်အံၣ်စရ့လး အပှၤဂီၢ်မုၢ်အကျါဒၣ်လဲာ်န့ၣ်တလဲၤနုာ် ဘၣ်ဝဲဆူယတၢ်လုၢ်ဟံၣ်အပူၤဘၣ်.”

¹⁰ယွၤစံးဘၣ်ယၤ, “ယစံၣ်ညီၣ်ပှၤလ့ၤဝံဖိတဖၣ်န့ၣ်လၢအဟးသဒၣ် ကွံာ်ယၤဒီးဘူၣ်ထီၣ်ဘါထီၣ်တၢ်ဂီၤတၢ်ဖီၣ်တဖၣ်ဃုာ်ဒီး ကီၢ်အံၣ်စရ့လးအပှၤဂီၢ်မုၢ်အဂၤတဖၣ်န့ၣ်လီၤ.

¹¹အဝဲသ့ၣ်ကမၤယတၢ်မၤလၢယွၤအတၢ်လုၢ်ဟံၣ်အပူၤခီဖျိလၢ တၢ်ပၢၤတြဲၤဖးဒိၣ်တဖၣ်ဒီးခီဖျိတၢ်မၤယွၤအတၢ်လုၢ်ဟံၣ် အတၢ်မၤန့ၣ်လီၤ. အဝဲသ့ၣ်ကဘၣ်မၤသံဆၣ်ဖိကီၢ်ဖိတဖၣ်လၢ ပှၤဂီၢ်မုၢ်လုၢ်ထီၣ်အီၤဒ်တၢ်ဆိၣ်ကဲၤအတၢ်လုၢ်တဖၣ် ဒီးတၢ်လုၢ်တၢ်ပာ်တဖၣ်အသိးဒီးအဝဲသ့ၣ်ကဘၣ်အိၣ်မူအိၣ်ဒါ လၢကမၤန့ၢ်ပှၤဂီၢ်မုၢ်အတၢ်အဂီၢ်န့ၣ်လီၤ.

¹²ဘၣ်ဆၣ်မ့ၢ်လၢအဝဲသ့ၣ်မၤတၢ်ဘူၣ်ထီၣ်ဘါထီၣ်တၢ်ဂီၤတၢ်ဖီၣ် လၢကီၢ်အံၣ်စရ့လးအဂီၢ်, ဒီးလၢကျဲဒ်အံၤန့ၣ်အဝဲသ့ၣ်ဆှၢ ဃီၤပှၤဂီၢ်မုၢ်ဆူတၢ်ဒဲးဘးအပူၤအဃိ, ယၤ, ယွၤပၢဘၣ်တၢ် ခဲလၢာ်ကစၢ်ဆိၣ်တၢ်သမှံၤသပှၢ်လၢအဝဲသ့ၣ်ကဘၣ် တၢ်စံၣ်ညီၣ်န့ၣ်လီၤ.

¹³အဝဲသ့ၣ်တဘၣ်မၤယတၢ်မၤဒ်ပှၤလုၢ်တၢ်အခိၣ်အသိးမ့ၢ်ဂ့ၤ, တဘၣ်လဲၤဘူးဒီးတၢ်တမံၤလၢ်လၢ်လၢအစီဆှံလၢယဂီၢ်မ့ၢ်ဂ့ၤ, တဘၣ်လဲၤနုာ်ဆူတၢ်လီၢ်စီဆှံကတၢၢ်မ့ၢ်ဂ့ၤန့ၣ်ဘၣ်. တၢ်အံၤမ့ၢ်တၢ်စံၣ်ညီၣ်လၢတၢ်လီၤသးဘၣ်အၢ အတၢ်မၤတဖၣ်လၢအဝဲသ့ၣ်မၤတ့ၢ်အီၤအဂီၢ်န့ၣ်လီၤ.

¹⁴ယပာ်လီၤတၢ်ခ့တၢ်ပှၤအတၢ်မၤလၢတၢ်ကဘၣ်မၤအီၤလၢယွၤ အတၢ်လုၢ်ဟံၣ်အပူၤန့ၣ်လၢအဝဲသ့ၣ်အစုပူၤလီၤ.”

¹⁵ယွၤပၢဘၣ်တၢ်ခဲလၢာ်ကစၢ်စံးဝဲ, “မ့မ့ၢ်ပှၤလုၢ်တၢ်အခိၣ် တဖၣ်လၢအဘၣ်ဃးဒီးလ့ၤဝံအဒူၣ်လၢအဟဲလီၤစၢၤလီၤ သွဲၣ်လၢစီၤစၤဒိးန့ၣ်ဖဲကီၢ်အံၣ်စရ့လးအပှၤဂီၢ် မုၢ်အဂၤတဖၣ်ဃၣ်ကဒါကွံာ်အသးလၢယၤအခါန့ၣ် အဝဲသ့ၣ်မ့ၢ်ပှၤမၤထွဲဒံးတၢ်လၢယဂီၢ်လၢတၢ်သူၣ်တီသးရၤ အပူၤလၢယွၤအတၢ်လုၢ်ဟံၣ်အပူၤန့ၣ်လီၤ. အဃိ, ခဲကနံၣ်အံၤအဝဲသ့ၣ်မ့ၢ်ပှၤတဖၣ်လၢကဘၣ်မၤယတၢ်မၤ, ဒီးကဟဲနုာ်လၢယမဲာ်ညါဒ်သိးကလုၢ်ထီၣ်ယၤ လၢတၢ်လုၢ်တၢ်ပာ်တဖၣ်အသိဒီးအသွံၣ်န့ၣ်လီၤ.

¹⁶ထဲအဝဲသ့ၣ်ဧိၤန့ၣ်ကဟဲနုာ်လၢယတၢ်လုၢ်ဟံၣ်အပူၤ, မၤတၢ်လၢယတၢ်လုၢ်လီၢ်ဒီးမၤတၢ်ဘူၣ်ထီၣ်ဘါထီၣ် တဖၣ်လၢယတၢ်လုၢ်ဟံၣ်အပူၤန့ၣ်လီၤ.

¹⁷တုၤအဝဲသ့ၣ်လဲၤနုာ်ဆူယွၤအတၢ်လုၢ်ဟံၣ် အဂၢၤလၢတၢ်အိပူၤအကျဲစၢၤကျိၤထံးန့ၣ် အဝဲသ့ၣ်ကဘၣ်ကူထီၣ်သိးထီၣ်တၢ်ကံးညၣ် ဖှီဝါကဆှၣ်န့ၣ်လီၤ. ဖဲအဝဲသ့ၣ်မၤအတၢ်မၤ လၢတၢ်လုၢ်ဟံၣ်အဂၢၤလၢတၢ်အိပူၤအခါမ့ၢ်ဂ့ၤ, လၢယွၤအတၢ်လုၢ်ဟံၣ်အပူၤအခါမ့ၢ်ဂ့ၤန့ၣ်, အဝဲသ့ၣ်တဘၣ်ကူသိးတၢ်လၢအဘၣ်တၢ်မၤအီၤလၢ သိဆူၣ်နီတမံၤဘၣ်.

¹⁸ဒ်သိးအဝဲသ့ၣ်အကပၢၤသုတထီၣ်တဂ့ၤအဂီၢ်န့ၣ်, အဝဲသ့ၣ် ကဘၣ်ဖၢၣ်ထီၣ်ခိၣ်ဖၢၣ်တၢ်ကံးညၣ်ဖှီဝါကဆှၣ်ဒီးကူထီၣ်ဖျီၣ်ခံ တၢ်ကံးညၣ်ဖှီဝါကဆှၣ်တဖၣ်ဘၣ်ဆၣ်တဘၣ်စၢထီၣ်ယီၢ်တကိးဘၣ်.

¹⁹တချုးဒံးလၢအဝဲသ့ၣ်လဲၤထီၣ်ဆူတၢ်လုၢ်ဟံၣ်အဂၢၤလၢတၢ်ချၢ ဖဲပှၤဂီၢ်မုၢ်တဖၣ်အိၣ်ဝဲန့ၣ်, အဆိကတၢၢ်အဝဲသ့ၣ်ကဘၣ်ဘ့ၣ်လီၤ ကွံာ်တၢ်ကူတၢ်ကၤတဖၣ်လၢအဝဲသ့ၣ်ကူသိးတ့ၢ်ဝဲဖဲအမၤအမူ အဒါလၢယွၤအတၢ်လုၢ်ဟံၣ်ပူၤအခါဒီးပာ်တ့ၢ်အီၤလၢဒၢးစီဆှံ တဖၣ်အပူၤန့ၣ်လီၤ. အဝဲသ့ၣ်ကဘၣ်ကူသိးထီၣ်တၢ်ကူ တၢ်ကၤအဂၤတဖၣ်ဒီးဒ်သိးကတြီအတၢ်ကူတၢ်သိး စီဆှံတဖၣ်လၢသုတမၤဘၣ်ဒိပှၤဂီၢ်မုၢ်တဂ့ၤအဂီၢ်န့ၣ်လီၤ.

²⁰ပှၤလုၢ်တၢ်အခိၣ်တဖၣ်တဘၣ်လူၤအခိၣ်မ့ၢ်ဂ့ၤ, တဘၣ်ပာ်ထီအခိၣ်သူမ့ၢ်ဂ့ၤန့ၣ်ဘၣ်. အဝဲသ့ၣ်ကပာ်ဒၣ်အီၤထီဖဲအကြၢးဝဲဘၣ်ဝဲန့ၣ်လီၤ.

²¹ပှၤလုၢ်တၢ်အခိၣ်တဖၣ်တချုးလၢအနုာ်ဆူတၢ်လုၢ်ဟံၣ်အဂၢၤ လၢတၢ်အိပူၤန့ၣ်တဘၣ်အီစပံးထံနီတမံၤဘၣ်.

²²ပှၤလုၢ်တၢ်အခိၣ်တဂၤဂ့ၤတဂၤဂ့ၤတဘၣ်ဒိးတ့ဒိးဖျီအသးဒီး ပိာ်မုၣ်လၢအလီၤဖးဒီးအဝၤဘၣ်. အဝဲကဘၣ်ဒိးတ့ဒိးဖျီဒၣ်အ သးထဲဒၣ်ဒီးပှၤအံၣ်စရ့လးဖိအပှၤမုၣ်ကနီၤမ့တမ့ၢ်ပှၤလုၢ်တၢ် အခိၣ်တဂၤဂၤအမုၣ်ကမဲမ့ၢ်ဂ့ၤန့ၣ်လီၤ.

²³ပှၤလုၢ်တၢ်အခိၣ်တဖၣ်ကဘၣ်သိၣ်လိယပှၤဂီၢ်မုၢ်လၢတၢ်လီၤဆီ လၢတၢ်စီဆှံဒီးတၢ်လၢအတစီဆှံဘၣ်အဘၢၣ်စၢၤဒီးတၢ်လၢ အကဆှီဒ်တၢ်ဘူၣ်တၢ်ဘါအလုၢ်အလၢ်အသိးဒီးတၢ်လၢ တကဆှီဘၣ်အဘၢၣ်စၢၤန့ၣ်လီၤ.

²⁴တုၤမ့ၢ်တၢ်လိာ်ဘၢလိာ်ကွီၢ်တမံၤအိၣ်ထီၣ်ဝဲန့ၣ်, ပှၤလုၢ်တၢ်အခိၣ် တဖၣ်ကဘၣ်စံၣ်ညီၣ်ကွီၢ်န့ၣ်, ဒ်တၢ်ဘူၣ်တၢ်ဘါအတၢ်သိၣ်တၢ်သီ တဖၣ်အသိးန့ၣ်လီၤ. အဝဲသ့ၣ်ကဘၣ်တိၢ်န့ၢ်ဖံးဃာ်တၢ်ဘူၣ် တၢ်ဘါအမူးတဖၣ်ဒ်ယတၢ်သိၣ်တၢ်သီတဖၣ်ဒီးတၢ်ဘျၢတဖၣ်လၢ တၢ်ကဘၣ်မၤထွဲအီၤအသိး, ဒီးအဝဲသ့ၣ်ကဘၣ်ပာ်စီဆှံ ယမုၢ်အိၣ်ဘှံးနံၤတဖၣ်န့ၣ်လီၤ.

²⁵မ့တမ့ၢ်ဘၣ်လၢတၢ်စိၣ်တခါမ့ၢ်အဝဲအမိၢ်အပၢ်မ့ၢ်ဂ့ၤ, အဖိတဖၣ် တဂၤဂၤအကျါမ့ၢ်ဂ့ၤ, အဒီပုၢ်ဝဲၢ်ခွါတဂၤဂၤမ့ၢ်ဂ့ၤ, အဒီပုၢ်ဝဲၢ်မုၣ် တဂၤဂၤလၢတဒိးတ့ဒိးဖျီဒံးဘၣ်အသးမ့ၢ်ဂ့ၤန့ၣ်, ပှၤလုၢ်တၢ်အခိၣ် တဂၤတဘၣ်ထိးဘၣ်တၢ်အစိၣ်တခါ, ဒီးမၤတကဆှီအသးဒ် တၢ်ဘူၣ်တၢ်ဘါအလုၢ်အလၢ်အိၣ်ဝဲအသိးန့ၣ်ဘၣ်.

²⁶တုၤမ့ၢ်အဝဲကဆှီထီၣ်က့ၤကဒီးဝံၤန့ၣ်အဝဲကဘၣ်ခိးတၢ်နွံသီ,

²⁷ဝံၤဒီးကဘၣ်လဲၤနုာ်ဆူယွၤအတၢ်လုၢ်ဟံၣ်အဂၢၤလၢတၢ်အိ ပူၤဒီးလုၢ်ထီၣ်တၢ်လုၢ်တၢ်ပာ်တမံၤလၢအဝဲအတၢ်မၤကဆှီ ထီၣ်သးအဂီၢ်ဒ်သိးအဝဲကမၤကဒီးတၢ်လၢယွၤအတၢ်လုၢ်ဟံၣ် အပူၤကသ့ဝဲန့ၣ်လီၤ. ယၤ, ယွၤပၢဘၣ်တၢ်ခဲလၢာ်ကစၢ်ကတိၤလံတၢ်လံ.

²⁸ပှၤလုၢ်တၢ်အခိၣ်တဖၣ်အိၣ်ဒီးပှၤလုၢ်တၢ်အခိၣ်အလီၢ်ဒ်အဝဲသ့ၣ် အတၢ်န့ၢ်သါအသိးလၢယဟ့ၣ်လီၤတ့ၢ်ကီၢ်အံၣ်စရ့လးဒ်သိး ကဟ့ၣ်လီၤဝဲဆူပှၤတစိၤဘၣ်တစိၤအဂီၢ်န့ၣ်လီၤ. အဝဲသ့ၣ် တဘၣ်အိၣ်ဒီးတၢ်စုလီၢ်ခီၣ်ခိၣ်လၢကီၢ်အံၣ်စရ့လးအပူၤဘၣ်. ယမ့ၢ်တၢ်ခဲလၢာ်လၢအဝဲသ့ၣ်လိၣ်ဘၣ်ဝဲန့ၣ်လီၤ.

²⁹တၢ်လုၢ်ဘုဧိၤဟုဧိၤ, တၢ်လုၢ်တၢ်ဒဲးဘးဒီးတၢ်လုၢ်တၢ်ကမၣ်တဖၣ်က မ့ၢ်ပှၤလုၢ်တၢ်အခိၣ်တဖၣ်အတၢ်အီၣ်ဒီးအဝဲသ့ၣ်ကဒိးန့ၢ် ဘၣ်တၢ်ခဲလၢာ်လၢကီၢ်အံၣ်စရ့လးအပူၤလၢတၢ်ပာ်လီၤဆီအီၤလၢ ယဂီၢ်န့ၣ်လီၤ.

³⁰ပှၤလုၢ်တၢ်အခိၣ်တဖၣ်ကဘၣ်မၤန့ၢ်တၢ်အဂ့ၤကတၢၢ်လၢတၤသၣ်ဆိ တဖၣ်ဒီးတၢ်ခဲလၢာ်လၢတၢ်လုၢ်ထီၣ်ယၤအကျါန့ၣ်လီၤ. တဘျီလၢ်လၢ်ဖဲပှၤဂီၢ်မုၢ်ကုၢ်ကိၣ်န့ၣ်အဝဲသ့ၣ်ကဘၣ်ဟ့ၣ် ကိၣ်အဆိကတၢၢ်တဖျၢၣ်ဆူပှၤလုၢ်တၢ် အခိၣ်တဖၣ်အအိၣ်ဒ်တၢ်လုၢ်တၢ်ပာ်တမံၤ အသိးဒီးယတၢ်ဆိၣ်ဂ့ၤကလီၤဘၣ်လၢအဝဲ သ့ၣ်အဟံၣ်တဖၣ်အလိၤန့ၣ်လီၤ.

³¹ပှၤလုၢ်တၢ်အခိၣ်တဖၣ်တဘၣ်အီၣ်ထိၣ်မ့တမ့ၢ်ဆၣ်ဖိကီၢ်ဖိလၢအသံဒၣ် အတၢ်မ့ၢ်ဂ့ၤ, လၢဆၣ်ဖိကီၢ်ဖိအဂၤတဒုဒုမၤသံအီၤမ့ၢ်ဂ့ၤန့ၣ်ဘၣ်.”