Read S'gaw Karen လံာ်ယဃ့းစက့လး 45 Bible Online

လံာ်ယဃ့းစက့လး 45 - S'gaw Karen bible

လံာ်ယဃ့းစက့လး 45

¹ဖဲကီၢ်န့ၣ်ဘၣ်တၢ်နီၤဖးလီၤအီၤဆူပှၤတဒူၣ်ဘၣ်တဒူၣ်လၢအတၢ် န့ၢ်သါအဂီၢ်န့ၣ်, တၢ်နီၤဖးအကျါတတီၤန့ၣ်, တၢ်ကဘၣ်ပာ်စီဆှံအီၤလၢယွၤအဂီၢ်န့ၣ်လီၤ. တၢ်လီၢ်န့ၣ်ကဘၣ်ထီဝဲအမံးလာ်တဆံ, ဒီးလဲၢ်ဝဲဃိးမံးလာ်န့ၣ်လီၤ. တၢ်လီၢ်ဒီတခါန့ၣ်ကစီဆှံဝဲလီၤ.

²လၢတၢ်လီၢ်အံၤအပူၤန့ၣ်တၢ်လီၢ်လၢအထီဒီးအဒီၣ်ဃီၤဒ်သိးလိာ် အသးကဘၣ်အိၣ်ဝဲတတီၤလၢယွၤအတၢ်လုၢ်ဟံၣ်အဂီၢ် လၢအတၢ်ထိၣ်မ့ၢ်တကပၤအပျၢ်ယဲၢ်ကယၤစုာ်စုာ်, ဒီးဘၣ်တၢ်အိၣ်ကဝီၤဃာ်အီၤလၢတၢ်လီၢ်လီၤပျီလၢ အလဲၢ်ဝဲဒၣ်တကပၤအပျၢ်ယဲၢ်ဆံစုာ်စုာ်န့ၣ်လီၤ.

³လီၢ်ကဝီၤအံၤတဝာ်လၢအမ့ၢ်အထီအမံၤလာ်တဆံဒီးအဒီၣ်ဃီၤ လွံၢ်မံၤလာ်န့ၣ်ကဘၣ်တၢ်ထိၣ်အီၤန့ၣ်လီၤ. တၢ်လီၢ်စီဆှံကတၢၢ် လၢအမ့ၢ်ယွၤအတၢ်လုၢ်ဟံၣ်, ကအိၣ်ဖဲန့ၣ်လီၤ.

⁴တၢ်လီၢ်န့ၣ်ကမ့ၢ်ထံကီၢ်အတၢ်လီၢ်စီဆှံတတီၤလၢအဘၣ် တၢ်ပာ်လီၤဆီအီၤလၢပှၤလုၢ်တၢ်အခိၣ်တဖၣ်လၢ အမၤယွၤအတၢ်မၤလၢယွၤအတၢ်လုၢ်ဟံၣ်ပူၤအဂီၢ်န့ၣ်လီၤ. အဝဲသ့ၣ်အဟံၣ်တဖၣ်ဒီးတၢ်လီၢ်လၢယွၤအတၢ်လုၢ်ဟံၣ်အဂီၢ် ကအိၣ်ဖဲန့ၣ်လီၤ.

⁵လီၢ်ကဝီၤအံၤအဂၤတဝာ်န့ၣ်တၢ်ကဘၣ်ပာ်လီၤဆီအီၤဒ်အမ့ၢ် တၢ်လီၢ်လၢပှၤလ့ၤဝံဖိတဖၣ်လၢအမၤတၢ်လၢယွၤအတၢ်လုၢ်ဟံၣ် ပူၤအဂီၢ်န့ၣ်လီၤ. ဖဲန့ၣ်ကအိၣ်ဒီးဝ့ၢ်တဖၣ်လၢအဝဲသ့ၣ်ကအိၣ်ဆိးလၢအပူၤ အဂီၢ်န့ၣ်လီၤ.

⁶လၢလီၢ်ကဝီၤစီဆှံအကပၤန့ၣ်, တၢ်လီၢ်အဂၤတတီၤလၢအထီအိၣ်ဝဲ အမံၤလာ်တဆံဒီးအဒီၣ်ဃီၤအိၣ်ဝဲခံမံၤလာ်, ကဘၣ်တၢ်ပာ်လီၤဆီအီၤလၢဝ့ၢ်တဝ့ၢ်အဂီၢ်, လၢကီၢ်အံၣ်စရ့လးအပှၤဂီၢ်မုၢ်တဂၤ လၢ်လၢ်ကအိၣ်ဆိးဝဲအဂီၢ်န့ၣ်လီၤ.

⁷တၢ်လီၢ်ကဘၣ်တၢ်ပာ်လီၤဆီစ့ၢ်ကီးအီၤလၢစီၤပၤဖိခွါလၢအပၢ တၢ်အဂီၢ်န့ၣ်လီၤ. စးထီၣ်လၢတၢ်စီဆှံအလီၢ်ကဝီၤအမုၢ်နုာ် အီၢ်ဆၢန့ၣ်တၢ်ကဘၣ်မၤလဲၢ်ထီၣ်အီၤဆူမုၢ်နုာ် တကပၤတုၤဆူပီၣ်လဲၣ်မဲးဒံးထၢၣ်ရ့နယၢၣ်အကပၤ ဒီးစးထီၣ်လၢမုၢ်ထီၣ်အီၢ်ဆၢန့ၣ်ကဘၣ်တၢ်မၤလဲၢ်ထီၣ်တုၤဆူထံကီၢ်အ မုၢ်ထီၣ်ကီၢ်ဆၢ, ဒ်သိးဒီးအထီန့ၣ်ကတုၤသိး သိးဒီးတၢ်လီၢ်အါတီၤအကျါတတီၤလၢအဘၣ်တၢ်နီၤဖးလီၤတ့ၢ်အီၤလၢ ပှၤအံၣ်စရ့လးအဒူၣ်တဖၣ်အဂီၢ်န့ၣ်လီၤ.

⁸တၢ်ကဝီၤအံၤကမ့ၢ်တၢ်နီၤဖးလၢစီၤပၤဖိခွါလၢအပၢတၢ်ကမၤန့ၢ် အီၤလၢကီၢ်အံၣ်စရ့လးအပူၤ, ဒ်သိးအဝဲသုတမၤနးမၤဖှီၣ် လၢၤပှၤဂီၢ်မုၢ်လၢၤတဂ့ၤ, မ့မ့ၢ်ကပျဲတၢ်လီၢ်လၢအဂၤလၢအအိၣ် လီၤတဲာ်လၢထံကီၢ်အပူၤခဲလၢာ်ဘၣ်ဃးဒီးပှၤအံၣ်စရ့လးဖိအဒူၣ် တဖၣ်အဂီၢ်န့ၣ်လီၤ.

⁹ယွၤပၢဘၣ်တၢ်ခဲလၢာ်ကစၢ်စံးဝဲဒၣ်, “သုဝဲကီၢ်အံၣ်စရ့လးအပှၤပၢတၢ်သ့ၣ်ဧၢ, သုမၤတ့ၢ်တၢ်ဒဲးဘး ယံာ်တ့ၢ်မးလံ. ဆိကတီၢ်သုတၢ်မၤဆူၣ်မၤစိးဒီး တၢ်မၤနးမၤဖှီၣ်န့ၣ်တက့ၢ်. မၤတၢ်လၢအဘၣ်ဒီးအမ့ၢ်အ တီန့ၣ်တက့ၢ်. သုတဘၣ်နီၣ်ဟးထီၣ်ကွံာ်လၢၤယပှၤဂီၢ်မုၢ် လၢအကီၢ်ပူၤနီတဘျီဘၣ်. ယၤ, ယွၤပၢဘၣ်တၢ်ခဲလၢာ် ကစၢ်တဲဘၣ်သုတၢ်အံၤန့ၣ်လီၤ.

¹⁰ပှၤကိးဂၤဒဲးကဘၣ်သူစီၤပီၢ်တဖၣ်ဒီးနီၣ်ဃီၣ်တၢ်ဒီးနီၣ်ထိၣ် တဖၣ်လၢအတီန့ၣ်လီၤ.

¹¹အ့ဖးလၢတၢ်စီၤအဃ့ထီအဂီၢ်န့ၣ်, အ့ဖးကဘၣ်ပှဲၤသိးဒီးဘၤသးလၢ တၢ်ဃီၣ်အဘၣ်စီၣ်အဂီၢ်န့ၣ်လီၤ. နီၣ်ထိၣ်အတီၤန့ၣ်မ့ၢ်ဃိမ့ၤန့ၣ်လီၤ. နီၣ်ထိၣ်တၢ်အစၢတဖၣ်န့ၣ်မ့ၢ်ဒ်လာ်အံၤအသိးန့ၣ်လီၤ. တဃိမ့ၤပှဲၤသိးဒီးတဆံအ့ဖး, ဒီးတဃိမ့ၤပှဲၤသိးဒီး တဆံဘၤသးန့ၣ်လီၤ.

¹²နစီၤပီၢ်သၣ်တဖၣ်ကဘၣ်မ့ၢ်ဒ်အဖီလာ်အသိးန့ၣ်လီၤ. ခံဆံက့ရၤ ပှဲၤသိးဒီးတၡက့လး, ဃုဆံၡက့လးပှဲၤသိးဒီးတမၤနၤန့ၣ်လီၤ.

¹³အအံၤမ့ၢ်တၢ်အဂ့ၢ်အခီၣ်ထံးလၢသုကဘၣ်ဒိးသန့ၤထီၣ်သုသး လၢသုကမၤတၢ်လုၢ်မၤဘူၣ်တဖၣ်အဂီၢ်န့ၣ်လီၤ. ဘုကၠူၣ်ဘၤသးဃုဆံပူတပူလၢတၢ်လၢသုကူးက့ၤအီၤအကျါ. ဘုမုယီၤဘၤသးဃုဆံပူတပူလၢတၢ်လၢသုကူးက့ၤအီၤအကျါ,

¹⁴သ့ၣ်စၤယံးအသိတကယၤပူတပူလၢသုသ့ၣ်တဖၣ်ဟ့ၣ်ထီၣ်ဝဲအပူၤ, (ဘၣ်တၢ်ဃီၣ်အီၤလၢဘၤသးန့ၣ်လီၤ. တဆံဘၤသးပှဲၤသိးသိးဒီးတဃိမ့ၤ, တဆံဘၤသးပှဲၤသိးသိးဒီးတကိၢ်န့ၣ်လီၤ.)

¹⁵လၢတၢ်လုၢ်မၤဘူၣ်သိအဂီၢ်န့ၣ်, လၢကီၢ်အံၣ်စရ့လးအတၢ်အီၣ် ဆၣ်လီၢ်တဖၣ်အပူၤ, လၢသိအဖုလၢအအိၣ်အဒုခံကယၤအကျါ န့ၣ်သုဘၣ်ဟံးန့ၢ်တဒုလီၤ. သုကဘၣ်ဟဲစိာ်တၢ်လုၢ်ဘုဧိၤဟု ဧိၤတဖၣ်, ဆၣ်ဖိကီၢ်ဖိတဖၣ်လၢကဘၣ်တၢ်ဆိၣ်ကဲၤထီၣ်အီၤဒီတဒု, ဒီးဆၣ်ဖိကီၢ်ဖိတဖၣ်လၢတၢ်လုၢ်မၤဃူမၤဖိးတဖၣ်အဂီၢ်, ဒ်သိး သုတၢ်ဒဲးဘးတဖၣ်ကဘၣ်တၢ်ပျၢ်ကွံာ်အီၤအဂီၢ်န့ၣ်လီၤ. ယၤ, ယွၤပၢဘၣ်တၢ်ခဲလၢာ်ကစၢ်မၤလိာ်တၢ်အံၤန့ၣ်လီၤ.

¹⁶ကယဲၢ်ပှၤဂီၢ်မုၢ်လၢကီၢ်ပူၤခဲလၢာ်ဘၣ်လဲၤစိာ်တၢ်လုၢ်တဖၣ်ဆူကီၢ် အံၣ်စရ့လးအစီၤပၤဖိခွါလၢအပၢတၢ်အအိၣ်န့ၣ်လီၤ.

¹⁷တၢ်န့ၣ်ကမ့ၢ်အဝဲအမူအဒါလၢကဘၣ်ဟ့ၣ်ထီၣ်ဘၣ်ဆၣ်ဖိကီၢ်ဖိ တဖၣ်လၢကဘၣ်တၢ်ဆိၣ်ကဲၤအီၤဒီတဒု, တၢ်လုၢ်ဘုဧိၤဟုဧိၤတဖၣ် ဒီးတၢ်လုၢ်စပံးထံတဖၣ်လၢကီၢ်အံၣ်စရ့လးအပှၤကလုာ် ဒီကလုာ်အဂီၢ်, ဖဲလါထီၣ်သီအမူးတဖၣ်, အိၣ်ဘှံးနံၤတဖၣ်ဒီး မူးအဂၤတဖၣ်အကတီၢ်န့ၣ်လီၤ. အဝဲကဘၣ်ဟ့ၣ်ထီၣ်တၢ်လုၢ် တၢ်ပျၢ်တၢ်ဒဲးဘး, တၢ်လုၢ်မၤဘူၣ်ဘုဧိၤဟုဧိၤ, တၢ်လုၢ်တဖၣ် လၢတၢ်ကဆိၣ်ကဲၤအီၤဒီတဒုဒီးတၢ်လုၢ်မၤဃူမၤဖိးတၢ်တဖၣ် ဒ်သိးကစိာ်ကွံာ်ကီၢ်အံၣ်စရ့လးအပှၤဂီၢ်မုၢ်အတၢ်ဒဲးဘးတဖၣ် အဂီၢ်န့ၣ်လီၤ.”

¹⁸ယွၤပၢဘၣ်တၢ်ခဲလၢာ်ကစၢ်စံးဝဲ, “လၢလါအခီၣ်ထံးတလါ ထီၣ်အခီၣ်ထံးတနံၤန့ၣ်နဘၣ်လုၢ်ထီၣ်ဂီၤဖံးဖါဖိလၢအလၢအပှဲၤ တဒုဒီးမၤကဆှီထီၣ်ယွၤအတၢ်လုၢ်ဟံၣ်န့ၣ်လီၤ.

¹⁹ပှၤလုၢ်တၢ်အခိၣ်ကဟံးန့ၢ်တၢ်လုၢ်တၢ်ပျၢ်တၢ်ဒဲးဘးအံၤ အသွံၣ်တနီၤဒီးပာ်ထီၣ်အီၤလၢယွၤအတၢ်လုၢ်ဟံၣ်အတြဲၤအထူၣ် တဖၣ်အလိၤ, လၢတၢ်လုၢ်အသနၢၣ်လွံၢ်သနၢၣ်အလိၤ, ဒီးလၢ ကျဲစၢၤကျိၤထံးလၢအလဲၤနုာ်ဆူတၢ်လုၢ်ဟံၣ်အဂၢၤလၢ တၢ်အိပူၤ, အပဲတြီအထူၣ်တဖၣ်အလိၤန့ၣ်လီၤ.

²⁰လၢလါထီၣ်နွံသီတသီန့ၣ်သုကဘၣ်မၤတၢ်တမံၤဃီဒ်အံၤလၢပှၤတဂၤဂၤ လၢအမၤတၢ်ဒဲးဘးလၢတၢ်တပာ်သူၣ်ပာ်သးအဃိမ့ၢ်ဂ့ၤ, လၢအတၢ်နူၤပၢၢ်နၢ်ဘှါတအိၣ်အဃိမ့ၢ်ဂ့ၤအဂီၢ်န့ၣ်လီၤ. လၢကျဲဒ်အံၤအပူၤန့ၣ်သုကပာ်စီပာ်ဆှံယွၤအတၢ်လုၢ်ဟံၣ်န့ၣ်လီၤ.

²¹လၢလါအခီၣ်ထံးတလါထီၣ်တဆံလွံၢ်သီတသီအနံၤန့ၣ်သုကဘၣ် စးထီၣ်မၤဘူၣ်လဲၤကပာ်အမူးန့ၣ်လီၤ. လၢနွံသီအတီၢ်ပူၤန့ၣ်, ပှၤကိးဂၤဒဲးကဘၣ်အီၣ်ကိၣ် လၢတၢ်တမၤအီၤဒီးကိၣ်မံၣ်ဘၣ်န့ၣ်လီၤ.

²²လၢမူးအခီၣ်ထံးတသီအနံၤန့ၣ်စီၤပၤဖိခွါလၢအပၢတၢ်ကဘၣ် လုၢ်ထီၣ်ဂီၤဖံးဖါဖိတဒုဒ်တၢ်လုၢ်တၢ်ပာ်တမံၤအသိးလၢအဝဲ အတၢ်ဒဲးဘးတဖၣ်အဂီၢ်ဒီးလၢကယဲၢ်ပှၤဂီၢ်မုၢ်တဖၣ်အတၢ်ဒဲးဘး တဖၣ်အဂီၢ်န့ၣ်လီၤ.

²³ကိးမုၢ်နံၤဒဲးလၢမူးနွံသီအတီၢ်ပူၤန့ၣ်အဝဲကဘၣ်လုၢ်ထီၣ်ဂီၤဖံးဖါ အလၢအပှဲၤနွံဒု, သိဖါအလၢအပှဲၤနွံဒုဆူယွၤအအိၣ်ဒီးကဘၣ် ဆိၣ်ကဲၤထီၣ်အီၤဒီဒုန့ၣ်လီၤ. အဝဲကဘၣ်လုၢ်ထီၣ်စ့ၢ်ကီး မဲာ်တဲးလဲးဖါတဒုကိးမုၢ်နံၤဒဲးဒ်တၢ်လုၢ်တၢ်ဒဲးဘးအသိးန့ၣ်လီၤ.

²⁴လၢဂီၤဖံးဖါတဒုစုာ်စုာ်, ဒီးသိဖါတစုစုာ်စုာ်လၢတၢ်လုၢ် ထီၣ်အီၤအဂီၢ်န့ၣ်, တၢ်လုၢ်မၤဘူၣ်တမံၤလၢဘုဧိၤ ဟုဧိၤတအ့ဖးဒီးသ့ၣ်စၤယံးအသိတအ့ဖးကဘၣ် တၢ်ဟ့ၣ်ထီၣ်စ့ၢ်ကီးအီၤန့ၣ်လီၤ.

²⁵လၢဘူၣ်ဒဲအမူးလၢအဘၣ်တၢ်စးထီၣ်မၢအီၤလၢလါနွံလါတလါ ထီၣ်တဆံယဲၢ်သီတသီအဂီၢ်န့ၣ်ကိးမုၢ်နံၤဒဲးနွံသီအတီၢ်ပူၤ, စီၤပၤ ဖိခွါကဘၣ်လုၢ်တၢ်လုၢ်တမံၤဃီတဖၣ်လၢတၢ်ဒဲးဘးအဂီၢ်, တၢ်လုၢ်တမံၤဃီတဖၣ်လၢတၢ်ကဆိၣ်ကဲၤအီၤဒီဒုအဂီၢ်, ဒီးတၢ်လုၢ် မၤဘူၣ်တၤဖၣ်လၢဘုဧိၤဟုဧိၤဒီးသ့ၣ်စၤယံးအသိန့ၣ်လီၤ.”