Read S'gaw Karen လံာ်ယဃ့းစက့လး 46 Bible Online

လံာ်ယဃ့းစက့လး 46 - S'gaw Karen bible

လံာ်ယဃ့းစက့လး 46

¹ယွၤပၢဘၣ်တၢ်ခဲလၢာ်ကစၢ်စံးဝဲ, “ကျဲစၢၤကျိၤထံးလၢမုၢ်ထီၣ်လၢ တၢ်လဲၤနုာ်ဆူတၢ်လုၢ်ဟံၣ်အဂၢၤလၢတၢ်အိပူၤန့ၣ်ကဘၣ်ကးတံာ် ဃးအီၤဖဲတၢ်ဖံးတၢ်မၤအနံၤလၢဃုသီအတီၢ်ပူၤ, ဘၣ်ဆၣ်ကဘၣ်တၢ် ကိးထီၣ်အီၤလၢမုၢ်အိၣ်ဘှံးနံၤဒီးဖဲလါထီၣ်သီအမူးအခါန့ၣ်လီၤ.

²စီၤပၤဖိခွါလၢအပၢတၢ်ကလဲၤတၢ်လၢတၢ်လုၢ်ဟံၣ်အဂၢၤလၢ တၢ်ပျီပူၤဒီးလဲၤနုာ်ဆူကျဲစၢၤထံးအဒၢးပူၤခီဖျိကျဲစၢၤကျိၤထံး ဒီးဆၢထၢၣ်ဖဲတြဲၤဖးဒိၣ်အထူၣ်တဖၣ်အကပၤဖဲပှၤလုၢ်တၢ်အခိၣ် တဖၣ်ဆိၣ်ကဲၤထီၣ်အဝဲအတၢ်လုၢ်တၢ်ပာ်တဖၣ်ဒီတဒုညါဒီးလုၢ်ထီၣ် အဝဲအတၢ်လုၢ်မၤဃူမၤဖိးတဖၣ်အခါန့ၣ်လီၤ. ဖဲတြဲၤဖးဒိၣ် န့ၣ်အဝဲကဘူၣ်ထီၣ်ဘါထီၣ်တၢ်ဝံၤဒီးဟးထီၣ်ကွံာ်ကဒါက့ၤဆူ တၢ်ချၢန့ၣ်လီၤ. တချုးလၢမုၢ်ဟါလီၤဒံးဘၣ်န့ၣ်တၢ်တဘၣ် ကးတံာ်ဃာ်တြဲၤဖးဒိၣ်ဘၣ်.

³လၢမုၢ်အိၣ်ဘှံးနံၤကိးနံၤဒဲးဒီးလၢလါထီၣ်သီအမူးကိးဘျီဒဲးန့ၣ် ကယဲၢ်ပှၤဂီၢ်မုၢ်ခဲလၢာ်ကဘၣ်သကူးလီၤအသးဒီးဘူၣ်ထီၣ်ဘါထီၣ် စ့ၢ်ကီးယွၤဖဲတြဲၤဖးဒိၣ်အမဲာ်ညါန့ၣ်လီၤ.

⁴လၢမုၢ်အိၣ်ဘှံးအနံၤန့ၣ်, စီၤပၤဖိခွါကဘၣ်ဟဲစိာ်သိဖိအလၢ အပှဲၤဃုဒုဒီးသိဖါတဒုဒ်တၢ်လုၢ်တၢ်ပာ်တဖၣ်အသိး, လၢတၢ်ကဆိၣ်ကဲၤအီၤဒီတဒု, ဆူယွၤအအိၣ်န့ၣ်လီၤ.

⁵ဃုာ်ဒီးသိဖါတဒုစုာ်စုာ်န့ၣ်, အဝဲကဘၣ်ဟဲစိာ်တၢ်လုၢ်မၤဘူၣ် တမံၤလၢအမ့ၢ်ဘုဧိၤဟုဧိၤတအ့ဖး, ဒီးဃုာ်ဒီးသိဖိတဒုစုာ်စုာ် န့ၣ်အဝဲကဘၣ်ဟဲစိာ်တၢ်တမံၤလၢ်လၢ်လၢအအဲၣ်ဒိးဟ့ၣ် ဝဲန့ၣ်လီၤ. လၢတၢ်လုၢ်မၤဘူၣ်ဘုဧိၤဟုဧိၤဒ်န့ၣ်အသိးတ ခါစုာ်စုာ်အဂီၢ်န့ၣ်အဝဲကဘၣ်ဟဲစိာ်သ့ၣ်စၤယံးအသိတအ့ဖးန့ၣ်လီၤ.

⁶လၢလါထီၣ်သီအမူးန့ၣ်အဝဲကဘၣ်လုၢ်ထီၣ်ဂီၤဖံးဖါအလၢအပှဲၤတဒု, သိဖိအလၢအပှဲၤဃုဒုဒီးသိဖါအလၢအပှဲၤတဒုန့ၣ်လီၤ.

⁷ဃုာ်ဒီးဂီၤဖံးဖါတဒုစုာ်စုာ်န့ၣ်, တၢ်လုၢ်မၤဘူၣ်ကဘၣ်မ့ၢ်ဝဲ ဘုဧိၤဟုဧိၤတအ့ဖး, ဒီးဃုာ်ဒီးသိဖိတဒုစုာ်စုာ်န့ၣ်, တၢ်လုၢ်မၤဘူၣ်ကဘၣ်မ့ၢ် တၢ်တမံၤလၢ်လၢ်လၢစီၤပၤဖိခွါအဲၣ်ဒိးဟ့ၣ်ဝဲန့ၣ်လီၤ. သ့ၣ်စၤယံး အသိတအ့ဖးန့ၣ်ကဘၣ်တၢ်မၤဘူၣ်အီၤဃုာ်ဒီးတၢ်လုၢ်မၤဘူၣ် ဘုဧိၤဟုဧိၤဒ်န့ၣ်အသိးတမံၤန့ၣ်လီၤ.

⁸စီၤပၤဖိခွါကဘၣ်ဟးထီၣ်လၢကျဲစၢၤထံးအဒၢးဒီးဟးထီၣ် ဆူတၢ်ချၢခီဖျိကျဲစၢၤကျိၤထံးတခါဃီလၢအဝဲဟဲနုာ်တ့ၢ်ဝဲ န့ၣ်လီၤ.

⁹ဖဲပှၤဂီၢ်မုၢ်ဟဲဒ်သိးကဘူၣ်ထီၣ်ဘါထီၣ်ယွၤလၢမူးတခါဂ့ၤတခါဂ့ၤ န့ၣ်, ပှၤတဖၣ်လၢအဟဲနုာ်လၢကလံၤစိးအတြဲၤဖးဒိၣ်န့ၣ်ကဘၣ် ဟးထီၣ်လၢကလံၤထံးအတြဲၤဖးဒိၣ်တခီ, ဖဲအဝဲသ့ၣ်ဘူၣ်ထီၣ်ဘါ ထီၣ်တၢ်ဝံၤ, ဒီးပှၤတဖၣ်လၢအဟဲနုာ်လၢကလံၤထံးအတြဲၤ ဖးဒိၣ်န့ၣ်ကဘၣ်ဟးထီၣ်လၢကလံၤစိးအတြဲၤဖးဒိၣ်န့ၣ်လီၤ. ပှၤတဘၣ်ဟးထီၣ်လၢကျဲတဘိဃီလၢအဟဲနုာ်တ့ၢ်ဝဲန့ၣ်နီတဂၤဘၣ်. မ့မ့ၢ်ကဘၣ်ဟးထီၣ်လၢတြဲၤဖးဒိၣ်လၢ အအိၣ်ကွၢ်ဆၢၣ်မဲာ်လိာ်အသးတခီန့ၣ်လီၤ.

¹⁰စီၤပၤဖိခွါကဘၣ်ဟဲနုာ်ဝဲဖဲပှၤဂီၢ်မုၢ်ဟဲနုာ်ဝဲ, ဒီးကဘၣ်ဟးထီၣ်ဝဲဖဲအဝဲသ့ၣ်ဟးထီၣ်န့ၣ်လီၤ.

¹¹ဒီးလၢတၢ်မၤဘူၣ်အမုၢ်နံၤတဖၣ်ဒီးဖဲမူးတဖၣ်အခါန့ၣ်တၢ်လုၢ် မၤဘူၣ်ဘုဧိဟုဧိၤကဘၣ်မ့ၢ်တအ့ဖးလၢဂီၤဖံးဖါတဒုစုာ်စုာ်မ့ၢ်ဂ့ၤ, သိဖါတဒုစုာ်စုာ်မ့ၢ်ဂ့ၤအဂီၢ်ဒီးလၢသိဖိတဒုအဂီၢ်န့ၣ်ကမ့ၢ် ဖဲပှၤဘူၣ်ထီၣ်ဘါထီၣ်တၢ်အဲၣ်ဒိးဟ့ၣ်ဝဲန့ၣ်လီၤ. သ့ၣ်စၤယံးအသိတအ့ဖးကဘၣ်တၢ်လုၢ် ထီၣ်အီၤဃုာ်ဒီးတၢ်လုၢ်မၤဘူၣ်ဘုဧိၤဟုဧိၤဒ်န့ၣ်အသိးတမံၤန့ၣ်လီၤ.

¹²ဖဲပှၤပၢတၢ်စီၤပၤဖိခွါအဲၣ်ဒိးမၤဘူၣ်တၢ်သးအိၣ်အတၢ်လုၢ်မၤဘူၣ် တမံၤလၢတၢ်ကဆိၣ်ကဲၤအီၤဒီဒုမ့ၢ်ဂ့ၤ, တၢ်လုၢ်မၤဃူမၤဖိးတ မံၤမ့ၢ်ဂ့ၤန့ၣ်, မုၢ်ထီၣ်အတြဲၤဖးဒိၣ်လၢတၢ်လဲၤနုာ်ဆူတၢ်လုၢ်ဟံၣ် အဂၢၤလၢတၢ်အိပူၤ, ကဘၣ်တၢ်အိးထီၣ်အီၤလၢအဝဲအဂီၢ်န့ၣ်လီၤ. အဝဲကဘၣ်မၤဘူၣ်တၢ်ဒ်အမၤဝဲတမံၤဃီလၢမုၢ်အိၣ်ဘှံးနံၤ အသိးဒီးတြဲၤဖးဒိၣ်န့ၣ်ကဘၣ်တၢ်ကးတံာ်က့ၤအီၤ ဖဲအဝဲဟးထီၣ်ကွံာ်ဝဲန့ၣ်လီၤ. ”

¹³ယွၤစံးဝဲဒၣ်, “ကိးမုၢ်ဂီၤဒဲးန့ၣ်သိဖိအလၢအပှဲၤလၢအသး ပှဲၤထီၣ်တနံၣ်ဖိတဒုကဘၣ်တၢ်ဆိၣ်ကဲၤအီၤဒီဒုဒ် တၢ်လုၢ်မၤဘူၣ်တမံၤအသိးဆူယွၤအအိၣ်န့ၣ်လီၤ. တၢ်လုၢ်မၤဘူၣ်အံၤကဘၣ်တၢ်မၤအီၤကိးနံၤဒဲးန့ၣ်လီၤ.

¹⁴တၢ်လုၢ်မၤဘူၣ်တမံၤလၢအမ့ၢ်ကိၣ်ကမူၣ်တအ့ဖးဃုပူတပူကဘၣ် တၢ်မၤဘူၣ်စ့ၢ်ကီးအီၤကိးမုၢ်ဂီၤဒဲးဃုာ်ဒီးသ့ၣ်စၤယံးအသိတအ့ဖး သၢပူတပူလၢတၢ်ကဃါဃုာ်ဒီးကိၣ်ကမူၣ်အဂီၢ်န့ၣ်လီၤ. တၢ်သိၣ် တၢ်သီတဖၣ်လၢအဘၣ်ထွဲဒီးတၢ်လုၢ်မၤဘူၣ်ဆူယွၤအအိၣ်အံၤ မ့ၢ်တၢ်လၢကဘၣ်တၢ်မၤအီၤသပှၢ်ကတၢၢ်လီၤထူလီၤယိာ်န့ၣ်လီၤ.

¹⁵သိဖိ, ကိၣ်ကမူၣ်ဒီးသ့ၣ်စၤယံးအသိတဖၣ်န့ၣ်ကဘၣ်တၢ်လုၢ်ထီၣ် အီၤဆူယွၤအအိၣ်ကိးမုၢ်ဂီၤဒဲးလီၤထူလီၤယိာ်န့ၣ်လီၤ.”

¹⁶ယွၤပၢဘၣ်တၢ်ခဲလၢာ်ကစၢ်မၤလိာ်ဝဲဒၣ်န့ၣ်လီၤ. “စီၤပၤဖိခွါလၢအပၢတၢ်တဂၤမ့ၢ် ဟ့ၣ်လီၤတၢ်လီၢ်လၢအမ့ၢ်အဝဲအတၢ်ဒၣ်ဝဲတတီၤတီၤ, ဆူအဝဲအဖိခွါတဖၣ်အကျါတဂၤဒ်တၢ်ဟ့ၣ်ကနၢၤတခါအသိးန့ၣ်, တၢ်လီၢ်အဝဲန့ၣ်ကဘၣ်ထွဲက့ၤဆူဖိခွါအဝဲန့ၣ် ဒ်အဝဲအဟံၣ်ဖိဃီဖိအတၢ်စုလီၢ်ခီၣ်ခိၣ်အကျါတမံၤန့ၣ်လီၤ.

¹⁷ဘၣ်ဆၣ်စီၤပၤဖိခွါလၢအပၢတၢ်, မ့ၢ်ဟ့ၣ်လီၤအဝဲအတၢ်လီၢ် တတီၤဆူပှၤတဂၤဂၤလၢအအိၣ်လၢအဝဲအတၢ်မၤအပူၤဒီး, တၢ်လီၢ်န့ၣ်ကကဲထီၣ်ကဒါက့ၤကဒီးစီၤပၤဖိခွါန့ၣ် အတၢ်စုလီၢ်ခီၣ်ခိၣ်ဖဲတၢ်ထူၣ်ဖျဲးအနံၣ်ဟဲတုၤဝဲန့ၣ်လီၤ. တၢ်န့ၣ်မ့ၢ်အဝဲ အတၢ်ဒီးထဲအဝဲဒီးအဖိခွါတဖၣ်ဧိၤပၢဘၣ်ဝဲလီၤစိၤလီၤထီသ့ န့ၣ်လီၤ.

¹⁸စီၤပၤဖိခွါလၢအပၢတၢ်တဘၣ်ဟံးန့ၢ်ကွံာ်အပှၤဂီၢ်မုၢ်အတၢ် စုလီၢ်ခီၣ်ခိၣ်တမံၤမံၤလၢအဝဲသ့ၣ်အအိၣ်ဘၣ်. တၢ်လီၢ်တၢ်ကျဲ တတီၤတီၤလၢအဘၣ်ဟ့ၣ်လီၤအဖိခွါတဖၣ်န့ၣ်ကဘၣ်မ့ၢ်တၢ်လီၢ် လၢတၢ်ဟ့ၣ်နီၤတ့ၢ်ဃာ်ပာ်အီၤအကျါ, ဒ်သိးအဝဲသုတမၤနး ယပှၤဂီၢ်မုၢ်နီတဂၤခီဖျိတၢ်ဟံးန့ၢ်ကွံာ်အဝဲသ့ၣ်အတၢ်လီၢ်တၢ်ကျဲ တဂ့ၤအဂီၢ်န့ၣ်လီၤ.’

¹⁹အန့ၣ်ဝံၤဒီးပှၤတဂၤန့ၣ်ဆှၢယၤဆူဒၢးတဖၣ်အတၢ်လဲၤနုာ်ကျဲစၢၤ လၢအမဲာ်ကွၢ်တၢ်ဆူကလံၤစိးတခီဘူးဒီးတြဲၤဖးဒိၣ်လၢအအိၣ်လၢ တၢ်လုၢ်လီၢ်အဂၢၤလၢအအိပူၤတခီအကလံၤထံးတကပၤန့ၣ်လီၤ. တၢ်တဖၣ်အံၤမ့ၢ်ဒၢးစီဆှံတဖၣ်လၢပှၤလုၢ်တၢ်အခိၣ်အဂီၢ်န့ၣ်လီၤ. အဝဲဒုးနဲၣ်ယၤတၢ်လီၢ်တတီၤလၢဒၢးတဖၣ်အမုၢ်နုာ်တကပၤ,

²⁰ဒီးစံးဝဲဒၣ်, “အအံၤမ့ၢ်တၢ်လီၢ်လၢပှၤလုၢ်တၢ်အခိၣ်တဖၣ်ကဘၣ်ချီတၢ် ညၣ်လၢအဘၣ်တၢ်လုၢ်ထီၣ်အီၤဒ်တၢ်လုၢ်တၢ်ပာ်တဖၣ် အသိးလၢတၢ်လုၢ်တၢ်ကမၣ်အဂီၢ်မ့ၢ်ဂ့ၤ, တၢ်လုၢ်တၢ်ဒဲးဘး အဂီၢ်မ့ၢ်ဂ့ၤ, ဒီးလၢကကုၢ်တၢ်လုၢ်မၤဘူၣ်ကိၣ်ကမူၣ်အဂီၢ်, မ့ၢ်ဒ်သိးတၢ်လၢအစီဆှံတမံၤလၢ်လၢ်န့ၣ်သုတဘၣ်တၢ်စိာ်ထီၣ်အီၤ ဆူတၢ်လုၢ်ဟံၣ်အဂၢၤလၢတၢ်ချၢနီတမံၤဖဲအကမၤဆါပှၤဂီၢ်မုၢ် န့ၣ်တဂ့ၤ.”

²¹အန့ၣ်ဝံၤဒီးအဝဲလဲၤဆှၢထီၣ်ယၤဆူဂၢၤလၢတၢ်ချၢဒီးဒုးနဲၣ်ယၤ လၢဂၢၤအသနၢၣ်လွံၢ်သနၢၣ်န့ၣ်,

²²ဂၢၤလၢအဆံးလီၤအသးတခါစုာ်စုာ်အိၣ်ဝဲလၢအထီမ့ၢ်ဝဲ အပျၢ်လွံၢ်ဆံ, ဒီးအဒီၣ်ဃီၤမ့ၢ်ဝဲအပျၢ်သၢဆံန့ၣ်လီၤ.

²³တခါစုာ်စုာ်န့ၣ်အိၣ်ဒီးလၢၢ်အတၢ်ဒူၣ်တခါလၢအအိၣ်ဝးတရံး အီၤဃုာ်ဒီးဖၣ်ကပူၤတဖၣ်လၢအဘၣ်တၢ်ဘှီထီၣ်အီၤသန့ၤလီၤအသး ဖဲတၢ်ဒူၣ်န့ၣ်လီၤ.

²⁴ပှၤတဂၤန့ၣ်စံးဘၣ်ယၤ, “အအံၤမ့ၢ်ဖၣ်ကပူၤဖဲယွၤအတၢ်လုၢ်ဟံၣ် အခ့အပှၤတဖၣ်ကချီတၢ်လုၢ်တၢ်ပာ်တဖၣ်လၢပှၤဂီၢ်မုၢ်လုၢ်ထီၣ်ဝဲန့ၣ်လီၤ.”