Read S'gaw Karen လံာ်ယဃ့းစက့လး 8 Bible Online

လံာ်ယဃ့းစက့လး 8 - S'gaw Karen bible

လံာ်ယဃ့းစက့လး 8

¹လၢပတၢ်ကဲကုၢ်ဃုနံၣ်တနံၣ်, လါဃုလါတလါထီၣ်ယဲၢ်သီ အနံၤန့ၣ်, ကီၢ်ယူဒၤအပှၤခိၣ်ပှၤနၢ်လၢတၢ်ကဲကုၢ်အပူၤတဖၣ် ဆ့ၣ်နီၤသကိးဒီးယၤလၢယဟံၣ်ပူၤန့ၣ်လီၤ. သတူၢ်ကလာ်, ယွၤပၢဘၣ်တၢ်ခဲလၢာ်ကစၢ်အစိကမီၤလီၤဘၣ်လၢယလိၤန့ၣ်လီၤ.

²ယကွၢ်ထီၣ်တၢ်ဒီးထံၣ်တၢ်ထံၣ်လၢညါခီတမံၤဘၣ်ဃးဒီးပှၤကညီ တဂၤအက့ၢ်အဂီၤလၢအမၤအသးဒ်မ့ၣ်အူအသိးန့ၣ်လီၤ. လၢအယီၢ်ဒ့ဒီးဆူအဖီလာ်န့ၣ်အနီၢ်ခိအိၣ်ဖျါလီၤဂာ်ဒ်မ့ၣ်အူ အသိး, ဒီးလၢအယီၢ်ဒ့ဒီးဆူအဖီခိၣ်န့ၣ်, အဝဲကပီၤထီၣ်ဝဲဒ်တိၢ်ဘီ လၢအဘၣ်တၢ်ထူးကတြ့ၣ်ထီၣ်အီၤအသိးန့ၣ်လီၤ.

³အဝဲယူာ်ထီၣ်တၢ်လၢအလီၤဂာ်ဖျါဒ်စုတခီအသိးဒီးစှီၤယၤဖဲ ယခိၣ်သူန့ၣ်လီၤ. ဒီးလၢတၢ်ထံၣ်လၢညါခီအံၤအပူၤန့ၣ်, ကစၢ်ယွၤအသးစိာ်ထီၣ်ယၤလၢကလံၤအကျါဒီးဆှၢယၤဆူ ဝ့ၢ်ယရူၤၡလ့ၣ်န့ၣ်လီၤ. အဝဲလဲၤစိာ်ယၤဆူယွၤအတၢ်လုၢ်ဟံၣ် အကလံၤစိးအတြဲၤဆူတၢ်အိပူၤအကျဲစၢၤဖဲတၢ်ဂီၤတၢ်ဖီၣ်အိၣ် ဝဲတခါလၢအမၤသးကဲၤထီၣ်ကစၢ်ယွၤန့ၣ်လီၤ.

⁴ဖဲန့ၣ်ယထံၣ်ဘၣ်တၢ်ကပီၤဆဲးကပြုၢ်ကပြီၤလၢအပာ်ဖျါထီၣ်ကီၢ် အံၣ်စရ့လးအကစၢ်ယွၤအတၢ်အိၣ်ဝဲ, ဒ်သိးဒၣ်ယထံၣ်ဘၣ်တ့ၢ်အီၤဖဲယအိၣ်လၢထံကျိကဘၢ်အနံၤ အခါန့ၣ်လီၤ.

⁵ကစၢ်ယွၤစံးဘၣ်ယၤ, “ပှၤကညီလၢအသံသ့ဧၢ, ကွၢ်ဃီၤတၢ်ဆူကလံၤ စိးတကပၤတက့ၢ်.” ယကွၢ်ဃီၤတၢ်, ဒီးဖဲန့ၣ်ဘူးဒီးတၢ်လုၢ်လီၢ် လၢအအိၣ်ဖဲတၢ်လဲၤနုာ်အကျဲစၢၤထံးန့ၣ်ယထံၣ်ဘၣ်တၢ်ဂီၤတၢ်ဖီၣ် တခါလၢအမၤအသးကဲၤထီၣ်တ့ၢ်ကစၢ်ယွၤန့ၣ်လီၤ.

⁶ကစၢ်ယွၤစံးဘၣ်ယၤ, “ပှၤကညီလၢအသံသ့ဧၢ, နထံၣ်ဘၣ်တၢ်လၢအမၤ အသးလံကစီဒီဧါ, ကွၢ်ဃီၤတၢ်လၢအလီၤသးဘၣ်အၢတဖၣ်, လၢကီၢ် အံၣ်စရ့လးအပှၤဂီၢ်မုၢ်မၤဝဲဖဲအံၤ, ဒီးနီၣ်ထီၣ်ကွံာ်ယၤယံၤထီၣ်ယံၤထီၣ်ဒီးယတၢ်လီၢ်စီဆှံန့ၣ်တက့ၢ်. နကထံၣ်ဘၣ်ဒံးတၢ်လီၤမဲာ်ဆှးတဖၣ်အါန့ၢ်ဒိၣ်န့ၢ်ဒံးဒၣ်လဲာ်တၢ် အံၤန့ၣ်လီၤ.”

⁷အဝဲလဲၤဆှၢယၤဆူဂၢၤလၢတၢ်ချၢအကျဲစၢၤဒီးဒုးနဲၣ်ယၤတၢ် ပူၤတပူၤလၢအအိၣ်လၢတၢ်အဒူၣ်အလိၤန့ၣ်လီၤ.

⁸အဝဲစံးဝဲဒၣ်, “ပှၤကညီလၢအသံသ့ဧၢ, ဘၢၣ်ဖျိတၢ်ဒူၣ်ဖဲအံၤတက့ၢ်.” ယဘၢၣ်ဖျိအီၤဒီးထံၣ်ဘၣ်ပဲတြီတဘ့ၣ်န့ၣ်လီၤ.

⁹အဝဲစံးဘၣ်ယၤ, “လဲၤနုာ်ဆူတၢ်အိပူၤဒီးကွၢ်တၢ်အၢတၢ်သီဒီး တၢ်လီၤသးဘၣ်အၢတဖၣ်လၢအဝဲသ့ၣ်မၤဝဲဖဲန့ၣ်တက့ၢ်.”

¹⁰အန့ၣ်ဒီး, ယလဲၤနုာ်ဒီးကွၢ်တၢ်လီၤ. တၢ်အဒူၣ်တဖၣ်ဘၣ်တၢ်ကးဘၢ အီၤလၢပှၤတ့ဃာ်တၢ်ဂီၤလၢအမ့ၢ်ဂုၢ်သ့ၣ်တဖၣ်ဒီးဆၣ်ဖိကီၢ်ဖိလၢ အတကဆှီဘၣ်အဂၤတဖၣ်အဂီၤ, ဒီးတၢ်အဂၤတဖၣ်လၢပှၤအံၣ် စရ့လးဖိတဖၣ်ဘူၣ်ထီၣ်ဘါထီၣ်တ့ၢ်ဝဲန့ၣ်လီၤ.

¹¹ကီၢ်အံၣ်စရ့လးအခိၣ်အနၢ်အဂၤနွံဆံအိၣ်ဝဲဖဲန့ၣ်, အိၣ်ဃုာ်ဒီးစီၤၡၤဖၣ်အဖိခွါစီၤယၤစါနယၤလီၤ. တဂၤစုာ်စုာ်ဟံးဃာ်တၢ်နၢမူအသပၢၤမ့ၣ်အူ, ဒီးတၢ်နၢမူအမ့ၣ်အူလုၣ်ခုၣ်ထီၣ်ဝဲန့ၣ်လီၤ.

¹²ကစၢ်ယွၤသံကွၢ်ယၤ, “ပှၤကညီလၢအသံသ့ဧၢ, မ့ၢ်နထံၣ်ဘၣ်တၢ်လၢ ပှၤအံၣ်စရ့လးဖိအခိၣ်အနၢ်တဖၣ်မၤဝဲလၢတၢ်ခူသူၣ်အပူၤန့ၣ်လံ ဧါ. အဝဲသ့ၣ်ခဲလၢာ်ဘူၣ်ထီၣ်ဘါထီၣ်တၢ်လၢဒၢးတဖျၢၣ်လၢအပှဲၤ ဒီးတၢ်ဂီၤတၢ်ဖီၣ်တဖၣ်အပူၤန့ၣ်လီၤ. အဝဲသ့ၣ်ကတိၤပူၤဖျဲး အသးစံးဝဲလၢ, ယွၤတထံၣ်ပှၤဘၣ်. အဝဲပာ်လီၤတဲာ်ကွံာ်ထံကီၢ်လံ.”

¹³အန့ၣ်ဒီးယွၤစံးဘၣ်ယၤ, “နကထံၣ်အဝဲသ့ၣ်မၤတၢ်လၢအလီၤသးဘၣ် အၢဒိၣ်န့ၢ်အါန့ၢ်ဒံးတၢ်န့ၣ်တဖၣ်ဒၣ်လဲာ်န့ၣ်လီၤ.”

¹⁴လၢတၢ်န့ၣ်အဃိ, အဝဲလဲၤဆှၢယၤဆူယွၤအတၢ်လုၢ်ဟံၣ်ကလံၤစိး အတြဲၤဒီးဒုးနဲၣ်ယၤပိာ်မုၣ်တဖၣ်ဟီၣ်တၢ်ယၢၤတၢ်လၢကစၢၢ်တးမူး အတၢ်သံအဃိန့ၣ်လီၤ.

¹⁵အဝဲသံကွၢ်တၢ်ဒီးစံးဝဲ, “ပှၤကညီလၢအသံသ့ဧၢ, မ့ၢ်နထံၣ်တၢ်န့ၣ်ဧါ. နကထံၣ်ဘၣ်ဒံးဒၣ်လဲာ်တၢ်လီၤသးဘၣ်အၢတဖၣ်လၢ အအါန့ၢ်အအံၤတက့ၢ်န့ၣ်လီၤ.”

¹⁶လၢတၢ်န့ၣ်အဃိ, အဝဲဆှၢယၤဆူယွၤအတၢ်လုၢ်ဟံၣ်အဂၢၤလၢတၢ်အိ ပူၤတခီလီၤ. ဖဲန့ၣ်, ဘူးဒီးတၢ်လီၢ်စီဆှံအကျဲစၢၤ, လၢတၢ်လုၢ်လီၢ်ဒီးတၢ်ခိၣ်ဒုးထီၣ်ဘးအဘၢၣ်စၢၤန့ၣ်ပှၤကအိၣ်ဝဲ ခံဆံယဲၢ်ဂၤဃၣ်ဃၣ်န့ၣ်လီၤ. အဝဲသ့ၣ်ဒီအချၢလၢတၢ်လီၢ်စီ ဆှံတခီဒီးသကူးလီၤအသးဆူမုၢ်ထီၣ်တခီဒီးဘူၣ်ထီၣ်ဘါထီၣ်မုၢ် လၢအဟဲထီၣ်န့ၣ်လီၤ.

¹⁷ယွၤစံးဘၣ်ယၤ, “ပှၤကညီလၢအသံသ့ဧၢ, နထံၣ်တၢ်န့ၣ်ကစီဒီဧါ. ကီၢ်ယူဒၤအပှၤဂီၢ်မုၢ်တဖၣ်အံၤတသးမံထဲလၢအမၤ တၢ်လီၤသးဘၣ်အၢတဖၣ်လၢနထံၣ်ဘၣ်တ့ၢ်ဖဲအံၤ, ဒီးရၤလီၤတၢ်စုဆူၣ်ခီၣ်တကးလၢထံကီၢ်ဒီဘ့ၣ်ညါဧိၤန့ၣ်ဘၣ်. မ့မ့ၢ်အဝဲသ့ၣ်ကဘၣ်ဟဲဒီးမၤတၢ်သ့ၣ်တဖၣ်အံၤ, ဖဲအံၤလၢယွၤအတၢ်လုၢ်ဟံၣ်အပူၤအံၤ, ဒီးမၤသးဒိၣ်အါထီၣ်ယၤ ဒၣ်လဲာ်န့ၣ်လီၤ. အဝဲသ့ၣ်မၤတရီတပါယၤလၢကျဲအၢအၢသီသီထဲလဲၣ်န့ၣ်ကွၢ် တက့ၢ်. တၢ်န့ၣ်မ့ၢ်တၢ်လီၤသးဆါကတၢၢ်န့ၣ်လီၤ.

¹⁸အဝဲသ့ၣ်ကကလၢၢ်ဘၣ်ယတၢ်သးကဲၤထီၣ်အသဟီၣ်ခဲလၢာ်န့ၣ်လီၤ. ယတပျၢ်ဖျဲးအဝဲသ့ၣ်မ့ၢ်ဂ့ၤ, ဒီးဒုးနဲၣ်အဝဲသ့ၣ်လၢတၢ်သး ကညီၤမ့ၢ်ဂ့ၤန့ၣ်ဘၣ်. အဝဲသ့ၣ်ကကိးထီၣ်တၢ်ထုကဖၣ်တဖၣ်ဆူယအိၣ်, သီၣ်ဒိၣ်တသ့ဖဲအသ့, ဘၣ်ဆၣ်ယတဒိကနၣ်အဝဲသ့ၣ်ဘၣ်.”