Read S'gaw Karen လံာ်ဒၤနံးယ့လး 12 Bible Online

လံာ်ဒၤနံးယ့လး 12 - S'gaw Karen bible

လံာ်ဒၤနံးယ့လး 12

¹မူခိၣ်ကလူးလၢအသိးဆ့ဖှီဝါကဆှၣ်စံးဝဲ, “အကတီၢ်ဖဲန့ၣ် မူခိၣ်ကလူးဖးဒိၣ်မံၤက့လး, ပှၤလၢအပၢၤဃးနပှၤဂီၢ်မုၢ်က အိၣ်ဖျါထီၣ်ဝဲလီၤ. ဒီးဖဲန့ၣ်တၢ်ကီတၢ်ခဲတဖၣ် အကတီၢ်ကတုၤဝဲ, တၢ်ကီတၢ်ခဲအနးကတၢၢ် လၢအတမၤတ့ၢ်အသးဒံးဘၣ်, စးထီၣ်လၢပှၤတကလုာ်ကဲ ထီၣ်ဝဲတုၤမုၢ်တနံၤန့ၣ်လီၤ. ဘၣ်ဆၣ်ဒီးအကတီၢ်ဖဲန့ၣ်န့ၣ်, နပှၤဂီၢ်မုၢ်ကဘၣ်တၢ်မၤပူၤဖျဲးအီၤ, ကယဲၢ်ပှၤလၢအမံၤအိၣ်ကွဲးအသး လၢကစၢ်ယွၤအလံာ်ပူၤန့ၣ်ကတုၤလၢတၢ်အုၣ်က့ၤခီၣ်က့ၤန့ၣ်လီၤ.

²ဒီးပှၤအါဂၤလၢအသံတ့ၢ်လံတဖၣ်ကမူထီၣ်က့ၤဝဲ, တနီၤဆူတၢ်မူအထူအယိာ်ဒီးတနီၤဆူတၢ်မဲာ်ဆှးဒီးတၢ်လီၤ သးဘၣ်အၢအထူအယိာ်န့ၣ်လီၤ.

³ပှၤခိၣ်ပှၤနၢ်လၢအကူၣ်သ့ကူၣ်ဘၣ်တဖၣ်ကကပီၤထီၣ်ဒ်မူခိၣ်အတၢ် ကပီၤကပြုၢ်ကပြီၤထီၣ်န့ၣ်လီၤ. ဒီးပှၤလၢအဒုးဃၣ်က့ၤပှၤ အါဂၤဆူတၢ်တီတၢ်လိၤတဖၣ်ကကပီၤထီၣ်ဒ်ဆၣ်တဖၣ်လီၤစိၤ လီၤထီန့ၣ်လီၤ.

⁴မ့မ့ၢ်နဲဒၣ်အံၤစီၤဒၤနံးယ့လးဧၢ, ကးတံၢ်လံာ်န့ၣ်ဒီးပာ် တၢ်စဲပနီၣ်လၢအလိၤတုၤလၢတၢ်အကတၢၢ်မၤအသးန့ၣ်တက့ၢ်. ပှၤအါဂၤကလဲၤဆူအံၤဆူနုၤဒ်သိးဒီးအတၢ်သ့ၣ်ညါကအါ ထီၣ်န့ၣ်လီၤ.”

⁵အန့ၣ်ဝံၤဒီး, ယထံၣ်တ့ၢ်ပှၤခံဂၤဆၢထၢၣ်လၢထံကျိတဘိ အဃၢၤတဂၤအိၣ်လၢအံၤ, တဂၤအိၣ်လၢဘးခီတကပၤန့ၣ်လီၤ.

⁶လၢအကျါတဂၤသံကွၢ်တ့ၢ်မူခိၣ်ကလူးလၢအဆၢထၢၣ်စီၤစုၤ ဒီးအီၤလၢထံခံန့ၣ်ဒီးစံး, “တုၤတၢ်မၤအသးလီၤလိၢ်လီၤလး တဖၣ်ကတၢၢ်ဝဲတစုန့ၣ်မ့ၢ်ကယံာ်ဆံးယံာ်ဒံးလဲၣ်.”

⁷မူခိၣ်ကလူးန့ၣ်ယူာ်ထီၣ်အစုခံခီလိာ်ဆူမူခိၣ်ဒီးမၤတၢ်အၢၣ်လီၤ အီလီၤလၢကစၢ်ယွၤလၢအမူဝဲလီၤထူလီၤယိာ်တဂၤအမံၤန့ၣ်လီၤ. ယနၢ်ဟူအဝဲဒၣ်စံး, “တၢ်န့ၣ်ကမ့ၢ်သၢနံၣ်ဃုလါန့ၣ်လီၤ. ဖဲတၢ်မၤအၢမၤနးကစၢ်ယွၤအပှၤဂီၢ်မုၢ်ဝံၤဝဲန့ၣ်, တၢ်ခဲလၢာ် အံၤကလၢထီၣ်ပှဲၤထီၣ်ဝဲဒၣ်န့ၣ်လီၤ.”

⁸ယနၢ်ဟူတ့ၢ်တၢ်လၢအစံးဝဲတဖၣ်လီၤ. ဘၣ်ဆၣ်ဒီးယတနၢ် ပၢၢ်အီၤဘၣ်. ဒီးယသံကွၢ်, “တၢ်ဒိၣ်ဧၢ, တၢ်ခဲလၢာ်န့ၣ် ကကတၢၢ်ဝဲဒ်လဲၣ်.”

⁹အဝဲစံးဆၢဝဲဒၣ်, “စီၤဒၤနံးယ့လးဧၢ, နကဘၣ်က့ၤခဲအံၤလီၤ. အဂ့ၢ်ဒ်အံၤ, တၢ်ကတိၤတဖၣ်အံၤကဘၣ်တၢ်ကးတံၢ်ဒီးစဲပနီၣ် ဃာ်အီၤတုၤတၢ်အကတၢၢ်မၤအသးတစုန့ၣ်လီၤ.

¹⁰ပှၤအါဂၤကဘၣ်တၢ်မၤကဆှီထီၣ်အီၤလီၤ. ပှၤအၢပှၤသီတဖၣ်န့ၣ်တမ့ၢ်က နၢ်ပၢၢ်ဝဲဘၣ်ဒီးကမၤဒံးတၢ်အၢတၢ်သီဆူညါဆူညါန့ၣ်လီၤ. ထဲဒၣ်ပှၤလၢအကူၣ်တၢ်သ့တဖၣ်ဧိၤကနၢ်ပၢၢ်ဝဲဒၣ်လီၤ.

¹¹“စးထီၣ်လၢတၢ်လုၢ်တၢ်ပာ်ကိးနံၤဒဲးတဖၣ်ဆိကတီၢ်အသးန့ၣ်, ဒီးတၢ်လီၤပျံၤလီၤဖုးလၢအလီၤသးဘၣ်အၢဒိၣ်ဒိၣ်ကလဲာ် ဘၣ်တၢ်ပာ်ထီၣ်အီၤန့ၣ်မုၢ်နံၤတဖၣ်ကပူၤကွံာ်ဝဲအနံၤတကထိ ခံကယၤခွံဆံန့ၣ်လီၤ.

¹²ပှၤလၢအသူၣ်တီသးလိၤတုၤအနံၤတကထိသၢကယၤသၢ ဆံယဲၢ်န့ၣ်ဘၣ်ဆိၣ်ဂ့ၤဝဲလီၤ.

¹³ဒီးနဲဒၣ်စီၤဒၤနံးယ့လးဧၢ, တီတုၤအကတၢၢ်တက့ၢ်. တၢ်န့ၣ်ဝံၤဒီးနကသံနဲဘၣ်ဆၣ် ဒီးနကဂဲၤဆၢထၢၣ်ဒီးဒိးန့ၢ်နတၢ်န့ၢ်သါလၢမုၢ်နံၤခံကတၢၢ်န့ၣ်လီၤ.”