Read S'gaw Karen လံာ်ဒၤနံးယ့လး 4 Bible Online

လံာ်ဒၤနံးယ့လး 4 - S'gaw Karen bible

လံာ်ဒၤနံးယ့လး 4

¹စီၤပၤနဘူၤကးန့စၢ်ဘိးဘၣ်သ့ၣ်ညါလီၤတၢ်ဆူကယဲၢ်ပှၤဂီၢ် မုၢ်လၢထံကီၢ်ခဲလၢာ်, ပှၤကိးကလုာ်ဒဲး, ဒီးပှၤကတိၤကျိာ် အကလုာ်ကလုာ်လၢအအိၣ်လၢဟီၣ်ခိၣ်ဒီဘ့ၣ်, “မ်တၢ်ဃူတၢ်မုာ်ဂံၢ်အါထီၣ်အသးလၢသုဂီၢ်တက့ၢ်.

²ယဆိကမိၣ်တၢ်, မ့ၢ်တၢ်ဂ့ၤဘၣ်ယၤလၢယကဒုးသ့ၣ်ညါက့ၤ တၢ်ပနီၣ်တဖၣ်ဒီးတၢ်လီၤလးတဖၣ်လၢတၢ်ထီကတၢၢ်ကစၢ် ယွၤလီၣ်ဖျါထီၣ်တ့ၢ်လၢယၤန့ၣ်လီၤ.

³ယွၤအတၢ်ပနီၣ်တဖၣ်ဒိၣ်နီၢ်မး, အတၢ်လီၤလးတဖၣ်လီၤဘီလီၤမုၢ်မးလီၤ. ကစၢ်ယွၤအဘီအမုၢ်န့ၣ်မ့ၢ်ဘီမုၢ်အထူအယိာ်ဒီးအတၢ်ပၢတၢ် ပြးမ့ၢ်တၢ်အစိၤစိၤအဃၣ်ဃၣ်တမံၤန့ၣ်လီၤ.

⁴ယၤ, စီၤပၤနဘူၤကးန့စၢ်အိၣ်မုာ်ဆိးပၢၤလၢယဟံၣ်ပူၤ, ဒီးမုာ်လၤ သးခုလၢယတၢ်ဘီၣ်ထီၣ်ညီထီၣ်ဖးဒိၣ်လၢယနူၢ်ပူၤစီၤပူၤလီၤ.

⁵ဖဲယမံသပ့ၤဘၣ်ယသးအခါန့ၣ်ယအိၣ်ဒီးတၢ်မံမီၢ်ဒီးတၢ်ထံၣ် လၢညါခီတဖၣ်လၢအလီၤပျံၤလီၤဖုးဒိၣ်ဒိၣ်ကလဲာ်န့ၣ်လီၤ.

⁶မၤသးဒ်န့ၣ်ဒီး, ယဟ့ၣ်လီၤယကလုၢ်လၢယပှၤဟ့ၣ်ကူၣ်တၢ် အိၣ်လၢကီၢ်ဘၤဘူၤလိၣ်ပူၤခဲလၢာ်ကဘၣ်တၢ်ဆှၢထီၣ်အီၤဆူ ယမဲာ်ညါလၢကဖးဒီးလီၣ်ဖျါထီၣ်န့ၢ်ယၤလၢယတၢ်မံမီၢ် အခီပညီန့ၣ်လီၤ.

⁷တုၤနုၤတစု, ပှၤဖးတၢ်ဟဲဝံဟဲစိာ်, ပှၤမၤကဒါမဲာ်, ပှၤသ့သမူပယၢ် တၢ်ဒီးပှၤဖးဆၣ်ဧိၤဖီဧိၤအဂ့ၢ်တဖၣ်ဟဲဝဲဒီးယစံးဘၣ်တဲ ဘၣ်အဝဲသ့ၣ်လၢယတၢ်မံမီၢ်န့ၣ်လီၤ. ဘၣ်ဆၣ်ဒီးအဝဲသ့ၣ်ဖးဖျါထီၣ်န့ၢ် ယၤလၢယတၢ်မံမီၢ်အခီပညီတန့ၢ်ဘၣ်.

⁸လၢခံကတၢၢ်န့ၣ်စီၤဒၤနံးယ့လး, လၢအဘၣ်တၢ်ယုၢ်က့ၤအမံၤ လၢဘ့ၤလးတၡါစၢ်ဒ်ယကစၢ်အမံၤအသိးန့ၣ်, ဟဲနုာ်ဆူ ယမဲာ်ညါလီၤ. ကစၢ်ယွၤလၢအစီဆှံတဂၤအသးအိၣ်လၢ အပူၤသတးဒီးယစံးဘၣ်အီၤတၢ်လၢယမံမီၢ်တ့ၢ်န့ၣ်လီၤ.

⁹ယစံးဘၣ်အီၤ, ပှၤဟ့ၣ်ကူၣ်တၢ်တဖၣ်အခိၣ်အဒိၣ်ကတၢၢ် စီၤဘ့ၤလးတၡါစၢ်ဧၢ, ယသ့ၣ်ညါလၢကစၢ်ယွၤလၢအစီဆှံ တဂၤအသးအိၣ်လၢနပူၤဒီးနနၢ်ပၢၢ်တၢ်ခူသူၣ်အဒိၣ်အယိာ် ခဲလၢာ်န့ၣ်လီၤ. အအံၤ, မ့ၢ်ယတၢ်မံမီၢ်န့ၣ်လီၤ. ဖးန့ၢ်ယၤလၢအခီပညီန့ၣ်တက့ၢ်.

¹⁰ဖဲလၢယမံသပ့ၤဘၣ်ယသးန့ၣ်ယထံၣ်တ့ၢ်တၢ်လၢညါခီတမံၤ, ဒီးကွၢ်ကွၢ်, သ့ၣ်ဖးဒိၣ်တထံးအိၣ်ဝဲလၢဟီၣ်ခိၣ်အခၢၣ်သးန့ၣ်လီၤ.

¹¹သ့ၣ်တထံးအံၤဒိၣ်ထီၣ်ထီထီၣ်ဝဲဒီးအဂံၢ်အဘါဆူၣ်ထီၣ်ဝဲလီၤ. အစိးထီၣ်ဘးဝဲဆူမူခိၣ်ဒီးဘၣ်တၢ်ထံၣ်အီၤသ့လၢပှၤကိးဂၤဒဲး လၢဟီၣ်ခိၣ်ချၢန့ၣ်လီၤ.

¹²အလၣ်သ့ၣ်တဖၣ်ဃံလၤဝဲဒီးအသၣ်တဖၣ်အိၣ်ပှဲၤလုၣ်ကွံာ်လၢ အလိၤတုၤအလၢဝဲလီၣ်ဝဲလၢပှၤဟီၣ်ခိၣ်ဖိခဲလၢာ်ကအီၣ်ဝဲအဂီၢ် န့ၣ်လီၤ. ဆၣ်ဖိကီၢ်ဖိအမံၤတဖၣ်အိၣ်ဘှံးလၢအကဒုအဖီလာ်, ထိၣ်ဖိလံာ်ဖိတဖၣ်မၤအသွံတဖၣ်လၢအဒ့အတြၢ်တဖၣ်အလိၤဒီး တၢ်အိၣ်ဒီးအသးသမူခဲလၢာ်အီၣ်ဘၣ်အီဘၣ်အသၣ်တဖၣ်န့ၣ်လီၤ.

¹³ဖဲယဆိကမိၣ်တၢ်ထံၣ်လၢညါခီတမံၤန့ၣ်အဂ့ၢ်အဖၢမုၢ်ယထံၣ်ဘၣ် ကလူးဟဲလီၤလၢမူခိၣ်တဂၤလၢအအိၣ်ဒီးတၢ်သူၣ်ပ့ၢ်သးဆှါ ဒီးတၢ်မဲာ်စီၣ်နါစီၣ်န့ၣ်လီၤ.

¹⁴အဝဲဘိးဘၣ်သ့ၣ်ညါဝဲလၢတၢ်ကကူာ်လီၤကွံာ်သ့ၣ်တထံးန့ၣ်ဒီး ပဲာ်တဲာ်ကွံာ်အဒ့အတြၢ်တဖၣ်, တြုၤလီၤကွံာ်အလၣ် ခဲလၢာ်ဒီးမၤလီၤပြံလီၤပြါကွံာ်အသၣ်တဖၣ်, နီၣ်ကွံာ်ဆၣ်ဖိကီၢ်ဖိတဖၣ်လၢအကဒုဖီလာ်ဒီးထိၣ်ဖိလံာ်ဖိ တဖၣ်လၢအဒ့အတြၢ်တဖၣ်အလိၤန့ၣ်လီၤ.

¹⁵မ့မ့ၢ်အခိၣ်ဆၢၣ်အိၣ်ဒီးအဂံၢ်တဖၣ်လၢဟီၣ်ခိၣ်လာ်န့ၣ်တၢ် ကဘၣ်စၢတံၢ်ဃာ်အီၤလၢထးသွဲဒီးတိၢ်ဘီအပျံၤ, ဒီးပာ်တ့ၢ်အီၤလၢတပံၢ်တမါတဖၣ်အကျါလၢပျီပူၤန့ၣ်လီၤ. ပှၤတဂၤန့ၣ်ကဘၣ်စီၣ်ဒၣ်ဝဲလၢမူခိၣ်အပစီၤထံ, ဒီးမ်ကအိၣ်ဒၣ် ဝဲလၢဆၣ်ဖိကီၢ်ဖိအသိးဒီးနီၣ်ဧိၤမံၤဧိၤအကျါန့ၣ်တက့ၢ်.

¹⁶လၢနွံနံၣ်အတီၢ်ပူၤန့ၣ်ပှၤကညီအသးကလီၤမၢ်ကွံာ်လၢအပူၤ ဒီးဆၣ်ဖိကီၢ်ဖိအသးကအိၣ်လၢအပူၤလီၤ.

¹⁷တၢ်စံၣ်ညီၣ်အံၤဘၣ်တၢ်ပာ်လီၤအီၤလၢကလူးလၢအသူၣ်ပ့ၢ်သး ဆှါဒီးမဲာ်စီၣ်နါစီၣ်တဖၣ်န့ၣ်လီၤ. မၤသးဒ်န့ၣ်ဒီး, တုၤလၢတၢ် အကတၢၢ်တစုန့ၣ်မ်ပှၤအမူတဖၣ်ကသ့ၣ်ညါဝဲလၢတၢ်ထီ ကတၢၢ်ကစၢ်ယွၤတဂၤအိၣ်ဒီးတၢ်စိတၢ်ကမီၤ လၢကပၢတၢ်လၢပှၤကညီအဘီအမုၢ်တဖၣ်အဖီခိၣ်ဒီးဟ့ၣ်လီၤဝဲဆူ ပှၤလၢအဃုထၢဝဲတဂၤလၢ်လၢ်ဒ်အတၢ်ဘၣ်အသးဒၣ်ဝဲအသိးသ့, တုၤဒၣ်လဲာ်ဆူပှၤအသးစူၤဒီးဆီၣ်လီၤအသးနးကတၢၢ်န့ၣ်တက့ၢ်.

¹⁸တၢ်မံမီၢ်အံၤ, ယၤစီၤပၤနဘူၤကးန့စၢ်ထံၣ်တ့ၢ်ဝဲလီၤ. ဒီးခဲကနံၣ်အံၤ, စီၤဘ့ၤလးတၡါစၢ်ဧၢ, ဖးဖျါထီၣ်အခီပညီတက့ၢ်. အဂ့ၢ်ဒ်အံၤ, ယပှၤဟ့ၣ်ကူၣ်တၢ်အိၣ်လၢယဘီမုၢ်အပူၤခဲလၢာ်န့ၣ်ဖးဖျါထီၣ် န့ၢ်ယၤတသ့ဘၣ်. မ့မ့ၢ်နဲဒၣ်အံၤနမၤနဲသ့လီၤ. အဂ့ၢ်ဒ်အံၤ, ကစၢ်ယွၤလၢအစီဆှံတဂၤအသးအိၣ်လၢနပူၤလီၤ.”

¹⁹တုၤနုၤတစု, စီၤဒၤနံးယ့လးလၢအဘၣ်တၢ် ကိးစ့ၢ်ကီးအီၤလၢစီၤဘ့ၤလးတၡါစၢ်အသးလီၤကတုၤတစိၢ် တလီၢ်ဒီးအတၢ်ဆိကမိၣ်မၤကိၢ်မၤဂီၤအသးန့ၣ်လီၤ. စီၤပၤစံးဘၣ်အီၤ, “စီၤဘ့ၤလးတၡါစၢ်ဧၢ, ပျဲတၢ်မံမီၢ်မ့ၢ်ဂ့ၤ, အခီပညီအဒိၣ်အယိာ်မ့ၢ်ဂ့ၤမၤကိၢ်မၤဂီၤနသးတဂ့ၤ.” စီၤဘ့ၤလးတၡါစၢ်စံးဆၢဝဲဒၣ်, “နဲဒၣ်စီၤပၤဧၢ, ယဆၢလၢတၢ်မံမီၢ်အံၤကမ့ၢ်ဒၣ်ဝဲလၢပှၤလၢအ သးဟ့နၤတဖၣ်အဂီၢ်ဒီးအခီပညီအဒိၣ်အယိာ်ကမ့ၢ်ဒၣ်လၢန ဒုၣ်နဒါတဖၣ်အဂီၢ်န့ၣ်လီၤ.

²⁰သ့ၣ်တထံးလၢနထံၣ်ဘၣ်အီၤလၢအဒိၣ်ထီၣ်ထီထီၣ်ဝဲဒီးအဂံၢ် အဘါဆူၣ်ထီၣ်တုၤအစိးထီၣ်ဘးဆူမူခိၣ်ဒီးဘၣ်တၢ်ထံၣ်အီၤ သ့လၢပှၤကိးဂၤဒဲးလၢဟီၣ်ခိၣ်ချၢ,

²¹အလၣ်တဖၣ်ဃံလၤဝဲဒီးအသၣ်တဖၣ်အိၣ်ပှဲၤလုၣ်ကွံာ်တုၤအလၢ ဝဲလီၣ်ဝဲလၢဟီၣ်ခိၣ်ဖိခဲလၢာ်ကအီၣ်အဂီၢ်ဒီးမ့ၢ်ဝဲတၢ်အီၣ်လၢပှၤကိး ဂၤအဂီၢ်, ဒီးဆၣ်ဖိကီၢ်ဖိအမံၤတဖၣ်အိၣ်ဘှံးလၢအကဒုဖီလာ်, ဒီးထိၣ်ဖိလံၣ်ဖိတဖၣ်မၤအသွံလၢအဒ့အတြၢ်တဖၣ်အလိၤန့ၣ်

²²မ့ၢ်ဒၣ်နၤလီၤစီၤပၤဧၢ. နဒိၣ်ထီၣ်နထီထီၣ်နဂံၢ်နဘါဆူၣ်ထီၣ်လီၤ. နတၢ်ဒိၣ်တၢ်မုၢ်, ထီၣ်ဘးဝဲတုၤလၢမူခိၣ်ဒီးနတၢ်ပၢတၢ်ပြး န့ၣ်လဲၤတုၤပၢၢ်တုၤလၢဟီၣ်ခိၣ်အကတၢၢ်လီၤ.

²³နဲဒၣ်စီၤပၤထံၣ်ဘၣ်ကလူးဟဲလီၤလၢမူခိၣ်တဂၤလၢအအိၣ်ဒီး တၢ်သူၣ်ပ့ၢ်သးဆှါဒီးတၢ်မဲာ်စီၣ်နါစီၣ်စံးဝဲဒၣ်, ကူာ်လီၤကွံာ် သ့ၣ်တထံးန့ၣ်ဒီးမၤဟးဂီၤကွံာ်အီၤတက့ၢ်. မ့မ့ၢ်အခိၣ်ဆၢၣ်အိၣ်ဒီးအ ဂံၢ်တဖၣ်လၢဟီၣ်ခိၣ်လာ်န့ၣ်စၢဃးအီၤလၢထးသွဲဒီးတိၢ်ဘီအပျံၤဒီးပာ်တ့ၢ် အီၤလၢတပံၢ်တမါတဖၣ်အကျါလၢပျီပူၤတက့ၢ်. ပှၤတဂၤန့ၣ် ကဘၣ်စီၣ်ဒၣ်ဝဲလၢမူခိၣ်အပစီၤထံဒီးမ်အအိၣ်ဒၣ်ဝဲလၢ ဆၣ်ဖိကီၢ်ဖိတဖၣ်အသိးအကျါတုၤအယံာ်နွံနံၣ်တက့ၢ်န့ၣ်,’

²⁴အခီပညီမ့ၢ်ဒ်အံၤနဲဒၣ်စီၤပၤဧၢ, တၢ်န့ၣ်မ့ၢ်တၢ်ထီကတၢၢ်ကစၢ် ယွၤအတၢ်စံၣ်ညီၣ်အကလုၢ်လၢအလီၤဘၣ်လၢယကစၢ်စီၤပၤ အလိၤန့ၣ်လီၤ.

²⁵နကဘၣ်တၢ်နီၣ်ထီၣ်ကွံာ်နၤလၢပှၤကညီအသိးအကျါဒီးနတၢ် အိၣ်တၢ်ဆိးအလီၢ်ကမ့ၢ်ဝဲလၢဆၣ်ဖိကီၢ်ဖိအမံၤတဖၣ်အသိး အကျါလီၤ. နကအီၣ်တပံၢ်တမါဒ်ဂီၤဖံးတဒုအသိးဒီးမံလီၤလၢတၢ် ပျီပူၤဖဲပစီၤထံကလီၤဘၣ်လၢနလိၤကယံာ်ဝဲနွံနံၣ်လီၤ. တုၤနုၤတစု, နကအၢၣ်လီၤက့ၤလၢတၢ်ထီကတၢၢ်ကစၢ်ယွၤတဂၤပၢတၢ်လၢ ပှၤဟီၣ်ခိၣ်ဖိအဘီအမုၢ်တဖၣ်အဖီခိၣ်ဒီးဟ့ၣ်လီၤဝဲတၢ်စိတၢ် ကမီၤဆူပှၤလၢအဃုထၢဝဲတဂၤလၢ်လၢ်ဒ်အတၢ်ဘၣ်အသး ဒၣ်ဝဲအသိးသ့ဝဲန့ၣ်လီၤ.

²⁶ဒီးဒ်တၢ်မၤလိာ်အိၣ်ဝဲလၢသ့ၣ်အခိၣ်ဆၢၣ်အိၣ်ဒီးအဂံၢ်တဖၣ်န့ၣ် ကဘၣ်တၢ်ပာ်တ့ၢ်အီၤအသိးနဘီနမုၢ်န့ၣ်, ကမ့ၢ်က့ၤသပှၢ်ကတၢၢ် လၢနဂီၢ်ဖဲအကတီၢ်လၢနသ့ၣ်ညါက့ၤလၢကစၢ်ယွၤပၢတၢ်န့ၣ်လီၤ.

²⁷မၤသးဒ်န့ၣ်, ဒီးနဲဒၣ်စီၤပၤဧၢ, တူၢ်လိာ်ယတၢ်ဟ့ၣ်ကူၣ်နၤတက့ၢ်. ဆိကတီၢ်ကွံာ်တၢ်မၤတၢ်ဒဲးဘး, မၤတၢ်လၢအဘၣ်ဒီးသူၣ်ကညီၤသးကညီၤပှၤဖှီၣ်ဖိယာ်ဖိတက့ၢ်. အန့ၣ်တစုနကဘီၣ်ထီၣ်ညီထီၣ်ဆူညါကွ့ၢ်ကွ့ၢ်န့ၣ်လီၤ.”

²⁸ဒီးတၢ်စံးပာ်ခဲလၢာ်န့ၣ်လီၤဘၣ်လၢစီၤပၤနဘူၤကးန့စၢ်အလိၤန့ၣ်လီၤ.

²⁹တၢ်မၤအသးဖဲ, ထဲတဆံခံလါဝံၤအလီၢ်ခံန့ၣ် အဝဲဟးယဲၤယီၤလၢတၢ်လီၢ်ထီၣ်ထီအလီၢ်ပၢၤအိၣ်လၢအနူၢ်အစီၤအပူၤ,

³⁰ဒီးစံးဝဲဒၣ်, “ဘၤဘူၤလိၣ်ဒိၣ်ဝဲဆံးဒိၣ်ဆံးဒိၣ်လဲၣ်န့ၣ်ကွၢ်တက့ၢ်. ယသူၣ်ထီၣ်အီၤဒ်ယဝ့ၢ်ခိၣ်အသိးလၢကလီၣ်ဖျါ ထီၣ်ယစိကမီၤဒီးယဂံၢ်ယဘါယလၤကပီၤယကဟုကညီၢ်လီၤ.”

³¹ဖဲတၢ်ကတိၤတဖၣ်အံၤအိၣ်ဒံးလၢစီၤပၤအထးခိၣ်အဖၢမုၢ်န့ၣ်, တၢ်ကလုၢ်သီၣ်ထီၣ်ဝဲလၢမူခိၣ်, “စီၤပၤနဘူၤကးန့စၢ်ဧၢ, ယစံးဘၣ်နၤခဲကနံၣ်အံၤ, ဘီမုၢ်အံၤဘၣ်တၢ်ဟံးထီၣ်ကွံာ် လၢနအိၣ်လံ.

³²ဒီးနကဘၣ်တၢ်နီၣ်ထီၣ်ကွံာ်နၤလၢပှၤကညီအကျါ, ဒီးနတၢ်အိၣ်တၢ်ဆိးအလီၢ်ကမ့ၢ်ဝဲလၢဆၣ်ဖိကီၢ်ဖိအမံၤတဖၣ် အသိးအကျါလီၤ. နကအီၣ်တပံၢ်တမါဒ်ဂီၤဖံးတဒုအသိး လၢနွံနံၣ်အတီၢ်ပူၤလီၤ. တုၤနုၤတစု, နကသ့ၣ်ညါက့ၤလၢတၢ်ထီကတၢၢ်ကစၢ်ယွၤတဂၤပၢတၢ်လၢပှၤဟီၣ် ခိၣ်ဖိအဘီအမုၢ်တဖၣ်အဖီခိၣ်ဒီးဟ့ၣ်လီၤတၢ်ဆူပှၤလၢအဃု ထၢဝဲဒ်အသးအိၣ်ဒၣ်ဝဲအသိးအစုပူၤသ့ဝဲန့ၣ်လီၤ.”

³³တၢ်ကတိၤတဖၣ်အံၤလၢထီၣ်ပှဲၤထီၣ်ဝဲတကီၢ်ခါလၢစီၤနဘူၤကး န့စၢ်အလိၤန့ၣ်လီၤ. အဝဲဘၣ်တၢ်ဟီထီၣ်ကွံာ်အီၤလၢပှၤကညီ အသိးအကျါဒီးအီၣ်ဝဲတပံၢ်တမါဒ်ဂီၤဖံးတဒုအသိး, ဒီးအနီၢ်ခိဘၣ်စီၣ်လၢမူခိၣ်အပစီၤထံတုၤအဆူၣ်အဒံးတဖၣ်ထီ ထီၣ်ဝဲဒ်လံာ်ကြီကြာ်တဖၣ်အဆူၣ်အဒံးအသိး, ဒီးအစုမ့ၣ်ခီၣ်မ့ၣ်တဖၣ်ထီဝဲဒ်ထိၣ်ဧိၤလံာ်ဧိၤတဖၣ်အခီၣ်မ့ၣ် အသိးန့ၣ်လီၤ.

³⁴“တုၤနွံနံၣ်ပူၤကွံာ်ဝဲဒီး, ယၤ, စီၤနဘူၤကးန့စၢ်ကွၢ်ထီၣ်တၢ်ဆူ မူခိၣ်ဒီးယအိၣ်က့ၤဒီးယတၢ်သူၣ်ထံသးဆးလီၤ. ယစံးထီၣ်ပ တြၢၤတၢ်ထီကတၢၢ်ကစၢ်ယွၤဒီးဟ့ၣ်တၢ်ယူးယီၣ်ဒီးတၢ်လၤ ကပီၤဆူပှၤလၢအမူဝဲအထူအယိာ်တဂၤအအိၣ်န့ၣ်လီၤ. “အဂ့ၢ်ဒ်အံၤ, အတၢ်ပၢတၢ်ပြးန့ၣ်မ့ၢ်တၢ်ပၢတၢ်ပြး အထူအယိာ်, ဒီးအဘီအမုၢ်အိၣ်ဂၢၢ်အိၣ်ကျၢၤ အစိၤစိၤအဃၣ်ဃၣ်လီၤ.

³⁵ကယဲၢ်ပှၤအိၣ်လၢဟီၣ်ခိၣ်ချၢခဲလၢာ်န့ၣ်ပာ်ဝဲဒ်တမ့ၢ် တၢ်နီတမံၤအသိး, ဒီးမၤတၢ်ဖဲအတၢ်ဘၣ်အသးဒၣ်ဝဲလၢမူခိၣ် တၢ်သုးမုၢ်ဂီၢ်မုၢ်အကျါ, ဒီးလၢပှၤအိၣ်လၢဟီၣ်ခိၣ်ချၢတဖၣ် အကျါန့ၣ်လီၤ. ပှၤတြီအစုမ့ၢ်ဂ့ၤ, သံကွၢ်အီၤမ့ၢ်နမၤတၢ်မနုၤလဲၣ်မ့ၢ်ဂ့ၤ တန့ၢ်ဘၣ်နီတဂၤဘၣ်.

³⁶ဒီးဖဲယအိၣ်က့ၤဒီးယတၢ်သူၣ်ထံသးဆးန့ၣ်ယဘီယမုၢ်အတၢ် လၤတၢ်ကပီၤ, ယတၢ်ကဟုကညီၢ်ဒီးယလၤယကပီၤတဖၣ် ဘၣ်တၢ်ဟ့ၣ်ကဒါက့ၤယၤလီၤ. ယပှၤဟ့ၣ်ကူၣ်တၢ်တဖၣ်ဒီး ယပဒိၣ်ပပှၢ်တဖၣ်တူၢ်လိာ်မုာ်က့ၤယၤဒီးယဘၣ် တၢ်ပာ်ထီၣ်ထီက့ၤယၤလၢယဘီယမုၢ်အပူၤ, ဒီးတၢ်လၤတၢ်ကပီၤဂံၢ်အါထီၣ်အသးဒီးယၤအါန့ၢ်ဒံး လၢညါဒၣ်လဲာ်လီၤ.

³⁷ခဲကနံၣ်အံၤ, ယၤစီၤနဘူၤကးန့စၢ်စံးထီၣ်ပတြၢၤ, ယူးယီၣ်ဒီး မၤလၤကပီၤမူခိၣ်အစီၤပၤန့ၣ်လီၤ. အဂ့ၢ်ဒ်အံၤ, အတၢ်မၤခဲလၢာ်ဘၣ်ဝဲ, ဒီးအကျဲတဖၣ်တီဝဲလိၤဝဲန့ၣ်လီၤ. ပှၤလၢအမၤတၢ်လၢတၢ် ပာ်ထီၣ်ထီအသးတဖၣ်န့ၣ်ဆီၣ်လီၤဝဲဒၣ်သ့လီၤ.”