Read S'gaw Karen လံာ်ဒၤနံးယ့လး 5 Bible Online

လံာ်ဒၤနံးယ့လး 5 - S'gaw Karen bible

လံာ်ဒၤနံးယ့လး 5

¹မုၢ်တနၤန့ၣ်စီၤပၤဘ့ၤလၡါစၢ်ကွဲဃီၤန့ၣ်အပဒိၣ်ပပှၢ်တကထိဆူတၢ်အီၣ် တၢ်အီအမူးဖးဒိၣ်ဒီးအီသကိးဝဲစပံးထံန့ၣ်လီၤ.

²ဒီးဖဲအဝဲသ့ၣ်အီသကိးတၢ်အဖၢမုၢ်န့ၣ်စီၤဘ့ၤလၡါစၢ်မၤလိာ် ဝဲလၢလီခီထူ, လီခီစ့တဖၣ်လၢအပၢ်စီၤနဘူၤကးန့စၢ်ဟံးထီၣ် ကွံာ်ဝဲလၢဝ့ၢ်ယရူၤရှလ့ၣ်အတၢ်လုၢ်ဟံၣ်အပူၤန့ၣ်ကဘၣ်တၢ်ဟဲ စိာ်အီၤဒ်သိးစီၤပၤဒီးအပဒိၣ်ပပှၢ်တဖၣ်, အမါတဖၣ်ဒီးအသံၣ် မါတဖၣ်ကဒၢနုာ်အီဝဲစပံးထံလၢအပူၤအဂီၢ်န့ၣ်လီၤ.

³ဒီးလီခီထူလီခီစ့တဖၣ်န့ၣ်ဘၣ်တၢ်ဟဲစိာ်အီၤတဘျီဃီ, ဒီးအဝဲသ့ၣ်ဒၢနုာ်အီစပံးထံလၢအပူၤန့ၣ်လီၤ.

⁴အဝဲသ့ၣ်အီစပံးထံဒီးစံးထီၣ်ပတြၢၤကစၢ်တဖၣ်လၢဘၣ်တၢ်မၤ အီၤလၢထူ, စ့, တိၢ်ဘီ, ထး, သ့ၣ်, ဒီးလၢၢ်တဖၣ်န့ၣ်လီၤ.

⁵ဒီးတၢ်မၤအသးသတူၢ်ကလာ်လၢပှၤကညီအစုတခီအိၣ်ဖျါ ထီၣ်ဝဲဒီးကွဲးတၢ်လၢစီၤပၤအနူၢ်ပူၤဖဲဂီၤပၤကျံးဘျ့သးအလိၤ ဒီးမ့ၣ်အူဒၢတဖၣ်အတၢ်ကပီၤဆဲးလီၤကပြုၢ်ဘၣ်ဝဲအလီၢ်န့ၣ်လီၤ. ဒီးစီၤပၤထံၣ်ဘၣ်တ့ၢ်စုန့ၣ်ဖဲအကွဲးတၢ်လၢဂီၤပၤအလိၤန့ၣ်လီၤ.

⁶တုၤနုၤတစု, စီၤပၤအမဲာ်သၣ်လီၤဝါဒီးအသူၣ်ပျံၤသးဖုးနးနးကလဲာ်လီၤ. တၢ်မၤအသးဒ်အဆၢတဖၣ်လီၤဖျုကွံာ်ဝဲအသိးဒီးအခီၣ် လ့ၢ်ခိၣ်တဖၣ်ကနိးကစုာ်ဝဲဒၣ်န့ၣ်လီၤ.

⁷ဒီးစီၤပၤကိးပသူထီၣ်လၢအကလုၢ်ဖးဒိၣ်လၢပှၤကဆှၢနုာ်ပှၤ မၤကဒါမဲာ်တဖၣ်, ပှၤသ့သမူပယၢ်တၢ်တဖၣ်ဒီးပှၤဖးဆၣ်ဧိၤ ဖီဧိၤအဂ့ၢ်တဖၣ်န့ၣ်လီၤ. စီၤပၤစံးဘၣ်ပှၤဟ့ၣ်ကူၣ်တၢ် တဖၣ်လၢဘၤဘူၤလိၣ်အပူၤန့ၣ်, “ပှၤတဂၤလၢ်လၢ်လၢအဖးတၢ် ကွဲးအသးအံၤဒီးမၤဖျါထီၣ်န့ၢ်ယၤအခီပညီမ့ၢ်သ့န့ၣ် ယကဒုးသိးထီၣ်အီၤလၢစီၤလိၣ်စီၤပၤအတၢ်ကူတၢ်သိး အလွဲၢ်လုးတကုာ်ဒုးလံာ်ထီၣ်အီၤလၢဖဲထူတပျံၤလၢ အကိာ်လိၤဒီးကဘၣ်တၢ်ဒုးကဲထီၣ်အီၤလၢပှၤပၢတၢ် သၢဂၤတဂၤလၢဘီမုၢ်အံၤအပူၤန့ၣ်လီၤ.”

⁸မၤသးဒ်န့ၣ်ဒီး, စီၤပၤအပှၤဟ့ၣ်ကူၣ်တၢ်တဖၣ်ဟဲဝဲလီၤ. ဘၣ်ဆၣ်ဒီးဖးဝဲတၢ်ကွဲးအသးမ့ၢ်ဂ့ၤ, မၤဖျါထီၣ်တၢ်အခီပညီ မ့ၢ်ဂ့ၤတသ့ဘၣ်နီတဂၤဘၣ်.

⁹လၢတၢ်ကိၢ်တၢ်ဂီၤအပူၤစီၤပၤဘ့ၤလၡါစၢ်အမဲာ်လီၤဝါနး ထီၣ်ဒီးအပဒိၣ်ပပှၢ်တဖၣ်ကဘၣ်မၤဒ်လဲၣ်ဒ်လဲၣ်ဆိ ကမိၣ်ဝဲတဘၣ်ဘၣ်.

¹⁰စီၤပၤအမိၢ်နၢ်ဟူဘၣ်စီၤပၤဒီးအပဒိၣ်ပပှၢ်တဖၣ်အကလုၢ်သီၣ်သဲ သတးဒီးဟဲနုာ်ဃီၤဆူတၢ်အီၣ်တၢ်အီအမူးအဒၢးပူၤလီၤ. ဒီးပိာ်မုၣ်န့ၣ်စံးဝဲဒၣ်, “မ်စီၤပၤမူဝဲအထူအယိာ်တက့ၢ်. ပျဲနတၢ်ဆိကမိၣ်မၤပျံၤမၤဖုးနၤတဂ့ၤဒီးမ်နမဲာ်သၣ် အသုတလီၤဝါတဂ့ၤ.

¹¹ပှၤအိၣ်ဝဲဒၣ်တဂၤလၢနဘီနမုၢ်အပူၤလၢကစၢ်ယွၤလၢအစီဆှံ တဂၤအသးအိၣ်လၢအပူၤန့ၣ်လီၤ. လၢနပၢ်အမုၢ်နံၤတဖၣ်အက တီၢ်န့ၣ်ဘၣ်တၢ်ထံၣ်န့ၢ်အီၤလၢတၢ်ကူၣ်တၢ်ဆးအဂ့ၤ, တၢ်သ့ၣ်ညါဒီးတၢ်ကူၣ်သ့ဒ်ကစၢ်တဖၣ်အတၢ်ကူၣ်သ့အသိးန့ၣ် အိၣ်လၢအပူၤလီၤ. ဒီးနပၢ်, စီၤပၤနဘူၤကးန့စၢ်ဒုးကဲထီၣ် အီၤလၢပှၤဖးတၢ်ဟဲဝံဟဲစိာ်, ပှၤမၤကဒါမဲာ်, ပှၤသ့သမူ ပယၢ်တၢ်, ဒီးပှၤဖးဆၣ်ဧိၤဖီဧိၤအဂ့ၢ်တဖၣ်, အခိၣ်အဒိၣ်က တၢၢ်န့ၣ်လီၤ.

¹²အဝဲအိၣ်ဒီးတၢ်သ့တၢ်ဘၣ်လီၤဆီဒီးမ့ၢ်ပှၤကူၣ်သ့ဒီးပှၤအသ့ အဘၣ်လၢအဖးတၢ်မံမီၢ်တဖၣ်အခီပညီ, မၤဖျါထီၣ်တၢ်ပှိၤပှံ ပှိၤပှီၢ်တဖၣ်ဒီးတဲဖျါထီၣ်တၢ်ခူသူၣ်အဒိၣ်အယိာ်တဖၣ်သ့န့ၣ်လီၤ. မၤသးဒ်န့ၣ်ဒီး, မၤလိာ်လၢပှၤကလဲၤကိးန့ၢ်နၤစီၤဒၤနံးယ့လး လၢစီၤပၤယုၢ်တ့ၢ်အမံၤလၢစီၤဘ့ၤလးတၡါစၢ်န့ၣ်တက့ၢ်. ဒီးအဝဲကတဲဘၣ်နၤလၢတၢ်ခဲလၢာ်အံၤအခီပညီမ့ၢ်တၢ်မနုၤ လဲၣ်န့ၣ်လီၤ.”

¹³တုၤနုၤတစုစီၤဒၤနံးယ့လးဘၣ်တၢ်ဆှၢထီၣ်အီၤဆူစီၤပၤအမဲာ် ညါတဘျီဃီန့ၣ်လီၤ. ဒီးစီၤပၤတဲဘၣ်အီၤ, “နမ့ၢ်စီၤဒၤနံးယ့လး, ပှၤယူဒၤဖိတဂၤ, လၢပှၤဘၣ်တၢ်စိာ်မၢကဲကုၢ်အီၤအကျါ လၢယပၢ်ဟဲက့ၤကိးအီၤလၢကီၢ်ယူဒၤန့ၣ်ဧါ.

¹⁴ယနၢ်ဟူတ့ၢ်တၢ်လၢနဂ့ၢ်, လၢကစၢ်ယွၤလၢအစီဆှံတဂၤ အသးန့ၣ်အိၣ်လၢနပူၤဒီးတၢ်ထံၣ်န့ၢ်လၢနမ့ၢ်ပှၤအသ့အဘၣ်, ဒီးပှၤအိၣ်ဒီးတၢ်သ့ၣ်ညါဒီးတၢ်ကူၣ်သ့န့ၣ်လီၤ.

¹⁵ပှၤဟ့ၣ်ကူၣ်တၢ်တဖၣ်ဒီးပှၤမၤကဒါမဲာ်တဖၣ်ဘၣ်တၢ်ဟဲစိာ်ထီၣ် အီၤဆူယမဲာ်ညါဒ်သိးကဖးတၢ်ကွဲးအသးအံၤဒီးတဲယၤလၢ အခီပညီန့ၣ်လီၤ. ဘၣ်ဆၣ်ဒီးအဝဲသ့ၣ်ဃုထံၣ်န့ၢ်တၢ်ကွဲးအသး အခီပညီတန့ၢ်ဘၣ်.

¹⁶ခဲကနံၣ်အံၤယနၢ်ဟူတ့ၢ်လၢနဃုထံၣ်တၢ်အခီပညီလီၤဘၢ တဖၣ်ဒီးတဲဖျါတၢ်ခူသူၣ်အဒိၣ်အယိာ်တဖၣ်သ့ဝဲဒၣ်လီၤ. နဖးတၢ်ကွဲးအသးအံၤဒီးတဲယၤလၢအခီပညီတဖၣ်မ့ၢ်သ့ဒီး, နကဘၣ်တၢ်ဒုးသိးထီၣ်နၤလၢစီၤလိၣ်စီၤပၤအဆ့ကၤဖးထီတဖၣ် အိၣ်ဒီးအလွဲၢ်လုးတကုာ်ဒီးဒုးလံာ်ထီၣ်နၤလၢတၢ်မၤလၤက ပီၤအဖဲထူတဝီလၢနကိာ်လိၤဒီးနကကဲထီၣ်ဘၣ်ပှၤပၢတၢ်သၢဂၤ တဂၤလၢဘီမုၢ်အပူၤန့ၣ်လီၤ.”

¹⁷ဒီးစီၤဒၤနံးယ့လးစံးဆၢတၢ်လၢစီၤပၤအမဲာ်ညါ, “ပာ်နတၢ်ဟ့ၣ်တဖၣ်လၢနဂီၢ်ဒၣ်နဲမ့တမ့ၢ်ဒီးဟ့ၣ်အီၤဆူပှၤအဂၤ တဂၤအအိၣ်တက့ၢ်. ယကဖးန့ၢ်နဲဒၣ်စီၤပၤလၢတၢ်ကွဲးတ့ၢ် အသးဒီးတဲဘၣ်နၤလၢအခီပညီတဖၣ်န့ၣ်လီၤ.

¹⁸တၢ်ထီကတၢၢ်ကစၢ်ယွၤဒုးကဲထီၣ်တ့ၢ်နပၢ်စီၤနဘူၤကးန့စၢ် လၢစီၤပၤဖးဒိၣ်တဂၤဒီးဟ့ၣ်အီၤလၢတၢ်လၤကပီၤဒီးတၢ်က ဟုကညီၢ်န့ၣ်လီၤ.

¹⁹အဝဲဒၣ်အစိကမီၤဒိၣ်တုၤဒၣ်လဲာ်လၢပှၤဂီၢ်မုၢ်လၢထံကီၢ်ခဲလၢာ်, ပှၤကိးကလုာ်ဒဲးဒီး, ပှၤကတိၤကျိာ်အကလုာ်ကလုာ်ခဲလၢာ်, ပျံၤဘၣ်အီၤဒီးကနိးကစုာ်တ့ၢ်မးလီၤ. မ့ၢ်အဲၣ်ဒိးမၤသံပှၤ တဂၤဂၤ, မ့ၢ်အဲၣ်ဒိးပာ်မူပှၤတဂၤဂၤ, ဒီးမၤဝဲဒၣ်လီၤ. တၢ်မၤလၤကပီၤပှၤတဂၤဂၤမ့ၢ်ဂ့ၤ, တၢ်မၤမဲာ်ဆှးပှၤတဂၤဂၤ မ့ၢ်ဂ့ၤ, ဖဲဒၣ်အသးန့ၣ်မၤဝဲဒၣ်လီၤ.

²⁰ဘၣ်ဆၣ်ဒီးအဝဲပာ်ထီၣ်ထီအသး, ပာ်ဆူၣ်အကိာ်ဒီးအၢသီဝဲဒၣ်အဃိ, အဝဲဘၣ်တၢ်သုးကွံာ်အီၤလၢအစီၤလိၣ်စီၤပၤအလီၢ်ပစိာ်ဒီးအလၤ ကပီၤအလီၢ်လီၤမၢ်ကွံာ်ဝဲန့ၣ်လီၤ.

²¹အဝဲဘၣ်တၢ်နီၣ်ထီၣ်ကွံာ်အီၤလၢပှၤကညီတဖၣ်အသိးအကျါ ဒီးအသးကဲထီၣ်ဒ်ဆၣ်ဖိကီၢ်ဖိတဒုအသးအသိးလီၤ. အဝဲအိၣ်ဆိးတ့ၢ်ဝဲလၢ ကသ့ၣ်ယီၤမံၤတဖၣ်အကျါ, အီၣ်တပံၢ်တမါဒ်ဂီၤဖံးတ ဒုအသိးဒီးမံလီၤဝဲလၢတၢ်ပျီပူၤဒီးဘၣ်စီၣ်ဝဲလၢမူခိၣ်ပစီၤထံလီၤ. လၢခံကတၢၢ်န့ၣ်, သ့ၣ်ညါက့ၤဝဲလၢတၢ်ထီကတၢၢ်ကစၢ်ယွၤ တဂၤန့ၣ်ပၢတၢ်လၢပှၤဟီၣ်ခိၣ်ဖိအဘီအမုၢ်တဖၣ် အဖီခိၣ်ဒီးဟ့ၣ်လီၤတၢ်ဆူပှၤလၢအဃုထၢဝဲဒ်အသးအိၣ်ဒၣ်ဝဲအ သိးတဂၤလၢ်လၢ်အစုပူၤန့ၣ်လီၤ.

²²ဒီးအဝဲဒၣ်အဖိခွါနဲဒၣ်, စီၤဘ့ၤလၡါစၢ်ဧၢ, နသ့ၣ်ညါ တ့ၢ်တၢ်ဂ့ၢ်တဖၣ်အံၤခဲလၢာ်ဒၣ်လဲာ်န့ၣ်နတဆီၣ်လီၤတ့ၢ် ဘၣ်နသးဘၣ်.

²³နပာ်ထီၣ်ထီတ့ၢ်နသးထီဒါမူခိၣ်အကစၢ်ဒီးဟဲစိာ်နုာ်လီခီတဖၣ်လၢ ဘၣ်တၢ်ဟဲက့ၤစိာ်အီၤလၢအတၢ်လုၢ်ဟံၣ်ဒီးနဲဒၣ်ဒီးနပဒိၣ်ပပှၢ်တဖၣ်, နမါတဖၣ်ဒီးနသံၣ်မါတဖၣ်ဒၢနုာ်အီစပံးထံလၢအပူၤလီၤ. ဒီးနစံးထီၣ်ပတြၢၤကစၢ်ထူ, ကစၢ်စ့, ကစၢ်တိၢ်ဘီ, ကစၢ်ထး, ကစၢ်သ့ၣ်ဒီးကစၢ်လၢၢ်လၢအတထံၣ်တၢ်, တနၢ်ဟူတၢ်ဒီး တသ့ၣ်ညါတၢ်နီတမံၤတဖၣ်န့ၣ်လီၤ. မ့မ့ၢ်ကစၢ်ယွၤလၢအစံၣ်ညီၣ် နတၢ်မူ, တၢ်သံဒီးအပၢၤဃးကယဲၢ်နမၤတၢ်တမံၤလၢ်လၢ်န့ၣ်နတမၤလၤ ကပီၤတ့ၢ်အီၤဘၣ်.

²⁴လၢတၢ်န့ၣ်အဃိကစၢ်ယွၤမၢလီၤတ့ၢ်စုတခီလၢကကွဲးတၢ်ကတိၤ တဖၣ်အံၤန့ၣ်လီၤ.

²⁵တၢ်လၢဘၣ်တၢ်ကွဲးလီၤတ့ၢ်အီၤတဖၣ်မ့ၢ်အအံၤ, “မန့ၤ, မန့ၤ, တက့လးဒီးပၤစ့ၣ်,” န့ၣ်လီၤ.

²⁶ဒီးအခီပညီမ့ၢ်တၢ်အံၤလီၤ. “မန့ၤစံးတၢ်န့ၣ်မ့ၢ်နီၣ်ဂံၢ်, ဒီးကစၢ်ယွၤဂံၢ်နဘီန မုၢ်အမုၢ်နံၤမုၢ်သီတဖၣ်ဒီးမၤကတၢၢ်ကွံာ်အီၤလီၤ.

²⁷တက့လးစံးတၢ်န့ၣ်မ့ၢ်တၢ်အတယၢၢ်ဒီးနဘၣ်တၢ်စီၤနၤလၢ စီၤပီၢ်အပူၤဒီးနတဃၢဘၣ်လီၤ.

²⁸ပၤစ့ၣ်စံးတၢ်န့ၣ်မ့ၢ်တၢ်နီၤဖးတဖၣ်ဒီး, နဘီနမုၢ်အံၤဘၣ်တၢ် နီၤဖးအီၤဒီးဟ့ၣ်လီၤအီၤဆူပှၤမၤဒဲဖိဒီးပှၤပၤရၣ်ဖိတဖၣ်အအိၣ်လီၤ.”

²⁹အန့ၣ်ဝံၤတကီၢ်ခါ, စီၤဘ့ၤလၡါစၢ်ဟ့ၣ်လီၤအကလုၢ်လၢအ တၢ်ခ့တၢ်ပှၤတဖၣ်ကဒုးသိးထီၣ်စီၤဒၤနံးယ့လးလၢစီၤလိၣ်စီၤပၤ အဆ့ဖးထီတဘ့ၣ်အိၣ်ဒီးအလွဲၢ်လုးတကုာ်, ဒုးလံာ်ထီၣ်အီၤ လၢတၢ်လၤကပီၤအဖဲထူလၢအကိာ်လိၤန့ၣ်လီၤ. ဒီးဒုးကဲထီၣ်အီၤလၢပှၤပၢ တၢ်သၢဂၤတဂၤလၢအဘီမုၢ်အပူၤန့ၣ်လီၤ.

³⁰ဒီးလၢမုၢ်တနၤဃီန့ၣ်အပူၤ, ကီၢ်ဘၤဘူၤလိၣ်အစီၤပၤစီၤပၤ ဘ့ၤလၡါစၢ်ဘၣ်တၢ်မၤသံကွံာ်အီၤန့ၣ်လီၤ.

³¹ဒီးပှၤမၤဒဲဖိစီၤဒၤရယါဝ့ၣ်လၢအသးပှၢ်ဝဲဃုဆံခံနံၣ်န့ၣ် ဒိးန့ၢ်ဘၣ်ဘီမုၢ်အဝဲန့ၣ်လီၤ.