Read S'gaw Karen လံာ်ဒၤနံးယ့လး 8 Bible Online

လံာ်ဒၤနံးယ့လး 8 - S'gaw Karen bible

လံာ်ဒၤနံးယ့လး 8

¹“လၢစီၤပၤဘ့ၤလၡါစၢ်ပၢတၢ်သၢနံၣ်တနံၣ်န့ၣ်ယထံၣ်တ့ၢ် တၢ်လၢညါခီခံမံၤတမံၤန့ၣ်လီၤ.

²လၢတၢ်ထံၣ်လၢညါခီအံၤအပူၤယထံၣ်လီၤက့ၤယသးသတူၢ် ကလာ်လၢယအိၣ်လၢကီၢ်ဧ့ၤလၣ်အဝ့ၢ်ခိၣ်ဝ့ၢ်ၡူၡၣ်အပူၤန့ၣ်လီၤ. ယဆၢထၢၣ်တ့ၢ်ဖဲထံကျိဖးဒိၣ်အူလဲၤအကၢၢ်နံၤန့ၣ်လီၤ.

³ဒီးဖဲထံကျိဖးဒိၣ်အံၤအကပၤန့ၣ်ယထံၣ်တ့ၢ်သိဖါတဒုလၢ အအိၣ်ဒီးအနၢၤဖးထီခံဘိ, လၢအကျါတဘိန့ၣ်ထီဝဲဒီးသီ ဝဲအါန့ၢ်ဒံးအဂၤတဘိန့ၣ်လီၤ.

⁴ယအိၣ်ခိးကွၢ်တ့ၢ်သိဖါတဒုန့ၣ်ဘျၢၣ်တၢ်လၢအနၢၤဆူမုၢ်နုာ်, ကလံၤစိးဒီးကလံၤထံးတကပၤန့ၣ်လီၤ. တၢ်မံၤလာ်လၢအတြီအီၤန့ၢ်မ့ၢ်ဂ့ၤ, ဃ့ၢ်ပူၤဖျဲးလၢအစိကမီၤမ့ၢ်ဂ့ၤတအိၣ်ဘၣ်နီတဒုဘၣ်. မၤဝဲဖဲဒၣ်အသးဒီးမၤဒိၣ်မၤဆူၣ်ထီၣ်အသးန့ၣ်လီၤ.

⁵ဖဲယဆိကမိၣ်တၢ်တမံၤအံၤအခီပညီမ့ၢ်တၢ်ဒ်လဲၣ်အခါန့ၣ်မဲာ်တဲး လဲးတဒုဟဲဃ့ၢ်သဖှိထီၣ်လၢမုၢ်နုာ်တခီ, ဃ့ၢ်ဝဲချ့နးမး တုၤအခီၣ်တဖၣ်တထိးဘၣ်ဟီၣ်ခိၣ်ဒၣ်လဲာ်ဘၣ်န့ၣ်လီၤ. အဝဲအိၣ်ဒီးအနၢၤဖျါလီၤတိၢ်လီၤဆီတဘိဖဲအမဲာ်ချံခံဖျၢၣ် အဘၢၣ်စၢၤန့ၣ်လီၤ.

⁶အဝဲဟဲဃ့ၢ်လိၤလိၤဆူသိဖါတဒုလၢယထံၣ်တ့ၢ်လၢထံကျိဖး ဒိၣ်အဃၢၤန့ၣ်အအိၣ်ဒီးသဖှိဃီၤဝဲဆူအအိၣ်လၢအဂံၢ်အဘါ ခဲလၢာ်န့ၣ်လီၤ.

⁷ယအိၣ်ခိးကွၢ်တ့ၢ်အတၢ်ဟဲမၤဒၢၣ်သိဖါန့ၣ်လီၤ. အဝဲအသးထီၣ်ဆူၣ်မးဒီးဘျၢၣ်အီၤဒီးမၤကၢ်ကွံာ်အနၢၤခံဘိ လိာ်န့ၣ်လီၤ. သိဖါကတြီဆၢက့ၤအီၤန့ၣ်အဂံၢ်အဘါတအိၣ်ဘၣ်. ဘၣ်တၢ်ကွံာ်လီၤအီၤဆူဟီၣ်ခိၣ်လိၤဒီးယီၢ်တံၢ်ကွံာ်အီၤလီၤ. ပှၤလၢအမၤပူၤဖျဲးအီၤသ့တအိၣ်ဘၣ်နီတဂၤဘၣ်.

⁸မဲာ်တဲးလဲးတဒုန့ၣ်အဂံၢ်အဘါဒိၣ်ထီၣ်ဆူၣ်ထီၣ်အါထီၣ်ဝဲပှီၢ်ပှီၢ်လီၤ. ဘၣ်ဆၣ်ဒီးဖဲအတုၤလၢအစိကမီၤအထီကတၢၢ်န့ၣ် အနၢၤကၢ်ကွံာ်ဝဲဒၣ်လီၤ. လၢအလီၢ်န့ၣ်တၢ်အနၢၤဖျါလီၤ တိၢ်လီၤဆီလွံၢ်ဘိပၢၢ်ထီၣ်ဝဲဒီးယူာ်ဃီၤအသးဆူတၢ်အလီၢ် ကိးကပၤဒဲးန့ၣ်လီၤ.

⁹လၢတၢ်အနၢၤလွံၢ်ဘိအကျါတဘိအလိၤန့ၣ်တၢ်အနၢၤဖိတ ဘိဟဲထီၣ်ဝဲဒီးအစိကမီၤလဲၢ်ထီၣ်ဆူကလံၤထံးဒီးဆူမုၢ်ထီၣ်ဒီး ဆူကီၢ်တၢ်စံးပာ်န့ၣ်လီၤ.

¹⁰ဒိၣ်ထီၣ်ဆူၣ်ထီၣ်ဝဲထီၣ်ဘးတုၤအထီဒါမူခိၣ်အသုးမုၢ်, ဆၣ်ဧိၤဖီဧိၤတဖၣ်, ဒီးတ့ၢ်လီၤကွံာ်အီၤဆူဟီၣ်ခိၣ်တနီၤဒီးယီၢ်တံၢ်အီၤန့ၣ်လီၤ.

¹¹အဝဲတၤဒၣ်လဲာ်မူခိၣ်အသုးမုၢ်စီၤပၤဖိ, တြီတၢ်လုၢ်တၢ်ပာ်တ ဖၣ်လၢဘၣ်တၢ်လုၢ်ထီၣ်ဆူအအိၣ်ကိးမုၢ်နံၤန့ၣ်ဒီးမၤဟးဂီၤကွံာ်တ့ၢ် ဝဲတၢ်လုၢ်ဟံၣ်န့ၣ်လီၤ.

¹²လၢတၢ်လုၢ်ထီၣ်တၢ်လုၢ်တၢ်ပာ်ကိးနံၤဒဲးဘၣ်ဘျီးဘၣ်ဒါအလီၢ် န့ၣ်ပှၤဂီၢ်မုၢ်မၤတ့ၢ်တၢ်ဒဲးဘးဖဲန့ၣ်ဒီးတၢ်ဘူၣ်တၢ်ဘါအမ့ၢ် အတီန့ၣ်ဘၣ်တၢ်ကွံာ်လီၤအီၤဆူဟီၣ်ခိၣ်လိၤလီၤ. တၢ်အနၢၤန့ၣ် မၤနၢၤတၢ်လၢကယဲၢ်အမၤတ့ၢ်တၢ်တမံၤလၢ်လၢ်အပူၤန့ၣ်လီၤ.

¹³အန့ၣ်ဝံၤဒီး, ယနၢ်ဟူတ့ၢ်မူခိၣ်ကလူးတဂၤသံကွၢ်အဂၤတဂၤ, “မ့ၢ်တၢ်တဖၣ်အံၤလၢတၢ်ထံၣ်အီၤလၢညါခီအပူၤန့ၣ်ကမၤ ဒံးအသးဆူညါဆံးယံာ်လဲၣ်. မ့ၢ်တၢ်ဒဲးဘးလီၤပျံၤလီၤဖုး နးမးတမံၤဟံးန့ၢ်တၢ်လုၢ်တၢ်ပာ်ကိးနံၤဒဲးအလီၢ်အံၤကယံာ် ဒံးဆံးယံာ်လဲၣ်. မ့ၢ်မူခိၣ်အသုးမုၢ်ဒီးတၢ်လုၢ်ဟံၣ်ကဘၣ်တၢ် ယီၢ်တံၢ်အီၤဆံးယံာ်ဒံးလဲၣ်.”

¹⁴ယနၢ်ဟူဘၣ်ကလူးအဂၤတဂၤစံးဆၢတၢ်, “ကမၤဒံးအသး ဆူညါမုၢ်ဟါမုၢ်ဂီၤခံကထိသၢကယၤ, အကတီၢ်ဖဲတၢ်လုၢ်မ့ၣ်အူတဘၣ်တၢ်လုၢ်ထီၣ်ဘၣ်အီၤန့ၣ်လီၤ. အန့ၣ်ဝံၤဒီးတၢ်လုၢ်ဟံၣ်ကဘၣ်တၢ်မၤန့ၢ်ကဒါက့ၤအီၤန့ၣ်လီၤ.”

¹⁵ဖဲယကျဲးစၢးတ့ၢ်ဒ်သိးယကနၢ်ပၢၢ် တၢ်ထံၣ်လၢညါခီအံၤအခီပညီ မ့ၢ်တၢ်ဒ်လဲၣ်အခါန့ၣ်ပှၤတဂၤဆၢထၢၣ်လၢယမဲာ်ညါသတူၢ် ကလာ်န့ၣ်လီၤ.

¹⁶ဒီးယနၢ်ဟူဘၣ်တၢ်ကလုၢ်ကိးစိဃီၤလၢအူလဲၤအထံကျိဖး ဒိၣ်ဒီးစံးဝဲဒၣ်, “ကၤဘြံၤအ့လးဧၢ, တဲဖျါထီၣ်အီၤတၢ်လၢအထံၣ်ဘၣ် တ့ၢ်ဝဲတဖၣ်အခီပညီတက့ၢ်.”

¹⁷မူခိၣ်ကလူးကၤဘြံၤ အ့လးဟဲဒီးဆၢထၢၣ်တ့ၢ်ဝဲဖဲယကပၤ, ဒီးယပျံၤတၢ်ဒိၣ်ဒိၣ်ကလဲာ်တုၤယလီၤဃံၤဆူဟီၣ်ခိၣ်လိၤအီ ထီလာ်န့ၣ်လီၤ. ဒီးစံးဘၣ်ယၤ, “ပှၤဟီၣ်ခိၣ်ဖိဧၢ, နၢ်ပၢၢ်တၢ်အခီပညီတက့ၢ်. တၢ်ထံၣ်လၢညါခီအံၤမ့ၢ်တၢ်ကမၤ အသးဘၣ်ဃးဟီၣ်ခိၣ်အကတၢၢ်န့ၣ်လီၤ.”

¹⁸ဖဲအဝဲဒၣ်ကတိၤတၢ်ဒီးယၤအဖၢမုၢ်န့ၣ်, ယလီၤဃံၤလၢဟီၣ်ခိၣ် လိၤသပ့ၤသူၣ်သပ့ၤသးန့ၣ်လီၤ. ဘၣ်ဆၣ်ဒီးအဝဲဝံၢ်ထီၣ်က့ၤယၤဒီးဒုးဆၢထၢၣ်က့ၤယၤလၢယခီၣ်အလိၤ,

¹⁹ဒီးစံးဝဲဒၣ်, “ယကဒုးနဲၣ်နၤတၢ်လၢကစၢ်ယွၤ အတၢ်သးဒိၣ်အကတၢၢ်ကမ့ၢ်တၢ်ဒ်လဲၣ်န့ၣ်လီၤ. တၢ်ထံၣ်လၢညါခီပာ်ဖျါတၢ်အကတၢၢ်အဆၢကတီၢ်န့ၣ်လီၤ.

²⁰သိဖါအိၣ်ဒီးအနၢၤခံဘိလၢနထံၣ်တ့ၢ်အီၤန့ၣ်ဒိလီၤပှၤမၤဒဲဖိဒီး ပှၤပၤရၣ်ဖိအဘီအမုၢ်တဖၣ်န့ၣ်လီၤ.

²¹မဲာ်တဲးလဲးတဒုန့ၣ်ဒိလီၤပှၤကြံး(ခ်) ဖိအဘီအမုၢ်ဒီးတၢ်အနၢၤ ဖျါလီၤတိၢ်လီၤဆီတဘိလၢအမဲာ်ချံခံဖျၢၣ်အဘၢၣ်စၢၤန့ၣ် မ့ၢ်စီၤပၤအဆိကတၢၢ်တဂၤန့ၣ်လီၤ.

²²ဖဲတၢ်အနၢၤအခီၣ်ထံးကတၢၢ်တဘိကၢ်ကွံာ်ဝဲဒီးတၢ်အနၢၤ လွံၢ်ဘိဟဲပၢၢ်ထီၣ်လၢအလီၢ်န့ၣ်ဒိလီၤဝဲဘီမုၢ်ဖးဒိၣ်န့ၣ်ကဘၣ် တၢ်နီၤဖးအီၤဆူဘီမုၢ်ဖိလွံၢ်ဘ့ၣ်လၢအဂံၢ်အဘါတဆူၣ်ဘၣ် ထဲသိးဘီမုၢ်လၢအခီၣ်ထံးကတၢၢ်တဘ့ၣ်န့ၣ်ဘၣ်အဂ့ၢ်လီၤ.

²³ဘီမုၢ်တဖၣ်န့ၣ်အကတၢၢ်ဘူးထီၣ်ဝဲ, ဒီးအဝဲသ့ၣ်အၢထီၣ်သီထီၣ် နးနးကလဲာ်တုၤကဘၣ်တၢ်စံၣ်ညီၣ်အကတီၢ်န့ၣ်စီၤပၤလၢအခိၣ် ကိၤ, အၢတူာ်ကိာ်ဒီးကူၣ်လီတၢ်သ့တဂၤကအိၣ်ထီၣ်ဝဲလီၤ.

²⁴အဂံၢ်အဘါကဆူၣ်ထီၣ်အါထီၣ်ဝဲ, ဘၣ်ဆၣ်ဒီးတမ့ၢ်ဘၣ်လၢ အစိကမီၤဒၣ်ဝဲအဃိဘၣ်. ကဒုးကဲထီၣ်ဝဲတၢ်မၤဟးဂီၤလီၤပျံၤ လီၤဖုးဒီးလၢအမၤတၢ်ကိးမံၤဒဲးအပူၤန့ၣ်ကမၤနၢၤတၢ်လီၤ. အဝဲကဟဲစိာ်တၢ်မၤဟးဂီၤလၢပှၤအဂံၢ်ဆူၣ်အဘါဆူၣ်တဖၣ် အဖီခိၣ်ဒီးလၢအကစၢ်ယွၤအကစၢ်ဒၣ်ဝဲအပှၤဂီၢ်မုၢ်အဖီခိၣ်န့ၣ်လီၤ.

²⁵မ့ၢ်ပှၤလၢအသးက့ၣ်ကူသတးဒီးကမၤနၢၤတၢ်လၢအတၢ်ကူၣ် လီကူၣ်ဝ့ၤအပူၤန့ၣ်လီၤ. ကပာ်ထီၣ်ထီအသးလၢအကစၢ်ဒၣ်ဝဲ အဃိဒီးမၤဟးဂီၤပှၤအါဂၤလၢအသွံၣ်ခုၣ်ခုၣ်အပူၤန့ၣ်လီၤ. အဝဲကတၤဒၣ်လဲာ်စီၤပၤအဒိၣ်ကတၢၢ်လၢစီၤပၤခဲလၢာ် အဖီခိၣ်န့ၣ်ဘၣ်ဆၣ်ဒီးတၢ်စိကမီၤလၢအတသူဘၣ်ပှၤ ကညီအစုဘၣ်န့ၣ်ကမၤဟးဂီၤကွံာ်အီၤန့ၣ်လီၤ.

²⁶တၢ်ထံၣ်လၢညါခီဘၣ်ဃးတၢ်လုၢ်တၢ်ပာ်တဖၣ်လၢမုၢ်ဟါ ဒီးမုၢ်ဂီၤအကတီၢ်တဖၣ်, လၢအဘၣ်တၢ်တဲဖျါထီၣ်အီၤဆူ နအိၣ်န့ၣ်ကလၢထီၣ်ပှဲၤထီၣ်ဝဲဒၣ်လီၤ. ဘၣ်ဆၣ်ဒီးတၢ်ဂ့ၢ်အံၤပာ်ခူသူၣ်အီၤခဲအံၤတက့ၢ်. အဂ့ၢ်ဒ်အံၤ, တချုးအလၢထီၣ်ပှဲၤထီၣ်ဒံးဘၣ်ဒီးတၢ်ဆၢကတီၢ်ယံာ်ဒံးဝဲလီၤ.”

²⁷ဒီးယဲဒၣ်စီၤဒၤနံးယ့လးအံၤ, ယသးလီၤဘှါဒီးယဆူးယဆါ တ့ၢ်တဘျုးသီန့ၣ်လီၤ. အန့ၣ်ဝံၤဒီးယဆၢထၢၣ်ဒီးက့ၤကဒါ က့ၤဆူတၢ်မၤလၢစီၤပၤဟ့ၣ်မူဟ့ၣ်ဒါယၤန့ၣ်လီၤ. ဘၣ်ဆၣ်ဒီးယသးအိၣ်တတုၤလီၤတတီၤဘၣ်လၢတၢ်ထံၣ်လၢ ညါခီလၢတၢ်နၢ်ပၢၢ်အီၤတသ့ဘၣ်အဃိန့ၣ်လီၤ.