Read S'gaw Karen လံာ်ဒၤနံးယ့လး 9 Bible Online

လံာ်ဒၤနံးယ့လး 9 - S'gaw Karen bible

လံာ်ဒၤနံးယ့လး 9

¹ဖဲပှၤမၤဒဲဖိစီၤအဃၤၡဝ့ရိၣ်အဖိခွါစီၤပၤစီၤဒၤရယါဝ့ၣ်ပၢတၢ်လၢ ဘၤဘူၤလိၣ်အဘီအမုၢ်ပူၤအခီၣ်ထံးတနံၣ်အပူၤန့ၣ်,

²ယမၤလိလံာ်တၢ်ကွဲးစီဆှံတဖၣ်လၢယွၤကတိၤတ့ၢ်တၢ်ဒီး ဝံယံးရမံယၤဒီးဆိကမိၣ်တၢ်ဘၣ်ဃးဝ့ၢ်ယရူၤၡလ့ၣ်ကအိၣ်လၢ အတၢ်လီၤပှီၢ်တဖၣ်အပူၤအနံၣ်နွံဆံအဂ့ၢ်န့ၣ်လီၤ.

³ဒီးယဘါထုကဖၣ်တၢ်လၢသူၣ်လၢသးသပှၢ်ပှၢ်ဆူယွၤ, ကစၢ်ယွၤအအိၣ်ဒီးဒုၣ်တၢ်အီၣ်တၢ်အီ, ကူထီၣ်သိးထီၣ်ဆ့ဆးအသးလၢတၢ် ကံးယာ်ဒီးဆ့ၣ်နီၤလၢဖၣ်ဆါကျါဒီးဃ့ကညးအီၤလီၤ.

⁴ယဃ့ဘါထုကဖၣ်ဆူယွၤ, ယကစၢ်ယွၤအအိၣ်ဒီးအၢၣ်လီၤ အီလီၤယပှၤဂီၢ်မုၢ်အတၢ်ဒဲးဘးတဖၣ်န့ၣ်လီၤ. ဒီးယစံး, “ယွၤ, ကစၢ်ယွၤဧၢ, နဒိၣ်ဝဲထီဝဲဒီးပမၤလၤကပီၤနၤလီၤ. နတီဒီးနတၢ်အၢၣ်လီၤဒီးပာ်ဖျါထီၣ်နတၢ်အဲၣ်တဘိယူၢ် ဃီဆူပှၤလၢအအဲၣ်နၤဒီးမၤတၢ်လၢနမၤလိာ်အီၤတဖၣ်န့ၣ်လီၤ.

⁵ပမၤတ့ၢ်တၢ်ဒဲးဘး, ပအၢပသီတ့ၢ်, ပမၤတ့ၢ်တၢ်ကမၣ်လီၤ. ပညိကွံာ်တ့ၢ်တၢ်မၤလိာ်လၢနမၤလိာ်တ့ၢ်ပှၤလၢပကဘၣ်မၤအီၤ တဖၣ်ဒီးဃၣ်ကွံာ်တ့ၢ်လံပသးလၢတၢ်အလိၤအဘၣ်လၢနဒုးနဲၣ် တ့ၢ်ပှၤန့ၣ်လီၤ.

⁶ပတဒိကနၣ်တ့ၢ်ဘၣ်နခ့နပှၤဝံသ့ၣ်တဖၣ်လၢအကတိၤတ့ၢ်တၢ်လၢ နမံၤအပူၤဆူပစီၤပၤတဖၣ်, ပပှၤပၢတၢ်တဖၣ်, ပမိၢ်ပၢ်ဖံဖုလၢပျၢၤတဖၣ်ဒီး ပပှၤဒီကလုာ်ညါန့ၣ်ဘၣ်.

⁷နဲဒၣ်, ယွၤဧၢ, နမၤတၢ်အဘၣ်တဘိယူၢ်ဃီ, ဘၣ်ဆၣ်ဒီးပဒုးလီၤဘၣ်တၢ်မဲာ်ဆှးလၢပဖီခိၣ်ဒၣ်ပဝဲတဘိယူၢ်ဃီလီၤ. တၢ်အံၤတီဒီးပဝဲကိးဂၤဒဲးလၢအအိၣ်လၢကီၢ်ယူဒၤဒီးဝ့ၢ်ယရူၤ ၡလ့ၣ်အပူၤ, ဒီးကယဲၢ်ပှၤအံၣ်စရ့လးဖိခဲလၢာ်လၢနမၤလီၤ ပြံလီၤပြါအီၤဆူထံကီၢ်အဘူးအယံၤတဖၣ်အဂီၢ်လၢအဝဲသ့ၣ် တတီဘၣ်ဒီးနၤအဃိန့ၣ်လီၤ.

⁸ယွၤဧၢ, ပစီၤပၤတဖၣ်, ပပှၤပၢတၢ်တဖၣ်, ဒီးမိၢ်ပၢ်ဖံဖုလၢပျၢၤတဖၣ်မၤတ့ၢ်တၢ်လၢအလီၤမဲာ်ဆှး ဒီးမၤတ့ၢ်တၢ်ဒဲးဘးထီဒါနၤလီၤ.

⁹နပှဲၤဒီးတၢ်သးကညီၤဒီးနပျၢ်ပတၢ်ကမၣ်ဖဲပပူထီၣ်ထီဒါတ့ၢ်နၤ အခါဒၣ်လဲာ်န့ၣ်လီၤ.

¹⁰အိယွၤ, ပကစၢ်ယွၤဧၢ, ဖဲနစံးဘၣ်ပှၤလၢပကဘၣ်အိၣ်မူဒ် နတၢ်သိၣ်တၢ်သီတဖၣ်အသိးလၢနဟ့ၣ်လီၤပှၤခီဖျိနခ့နပှၤဝံသ့ၣ် တဖၣ်န့ၣ်, ပတဒိကနၣ်တ့ၢ်ဘၣ်နၤဘၣ်.

¹¹ပှၤအံၣ်စရ့လးဖိခဲလၢာ်လုၣ်သ့ၣ်ခါပတာ်လံနတၢ်သိၣ်တၢ် သီတဖၣ်ဒီးဂ့ၢ်လိာ်ဝဲဒ်သိးအသုတဒိကနၣ်ဘၣ်တၢ်လၢနကတိၤတ့ၢ် တဖၣ်တဂ့ၤန့ၣ်လီၤ. ပမၤတ့ၢ်တၢ်ဒဲးဘးထီဒါနၤလီၤ. မၤသးဒ်န့ၣ်ဒီးနဒုးလီၤဘၣ်ပှၤလၢတၢ်ဆိၣ်အၢဒ်အဘၣ်တၢ်ကွဲး တ့ၢ်အသးလၢနခ့နပှၤစီၤမိၤၡ့အတၢ်သိၣ်တၢ်သီအပူၤအသိးန့ၣ်လီၤ.

¹²နမၤတ့ၢ်တၢ်လၢနစံးတ့ၢ်နကမၤအီၤလၢပလိၤဒီးပပှၤပၢတၢ် တဖၣ်အလိၤန့ၣ်လီၤ. နစံၣ်ညီၣ်တ့ၢ်ဝ့ၢ်ယရူၤၡလ့ၣ်နးဒိၣ်န့ၢ်ဒံး ဝ့ၢ်အဂုၤအဂၤလၢဟီၣ်ခိၣ်ချၢ,

¹³ဒီးဟ့ၣ်လီၤပှၤကယဲၢ်တၢ်စံၣ်ညီၣ်ဒ်တၢ်ကွဲးဖျါတ့ၢ်လၢစီၤမိၤၡ့ အတၢ်သိၣ်တၢ်သီအပူၤလီၤ. အိယွၤ, ပကစၢ်ယွၤဧၢ, ခဲကနံၣ်အံၤဒၣ်လဲာ်ပတကျဲးစၢးမၤမုာ်နသးခီဖျိတၢ်ဃၣ်ကွံာ် ပသးလၢပတၢ်ဒဲးဘးတဖၣ်မ့ၢ်ဂ့ၤ, ခီဖျိတၢ်မၤထွဲနတၢ်မ့ၢ်တၢ်တီမ့ၢ်ဂ့ၤဒံးဘၣ်.

¹⁴အိယွၤ, ပကစၢ်ယွၤဧၢ, နအိၣ်ကတဲာ်ကတီၤတ့ၢ်နသးလၢတၢ်စံၣ် ညီၣ်ပှၤအဂီၢ်ဒီးနမၤတ့ၢ်အီၤလီၤ. အဂ့ၢ်ဒ်အံၤနမၤတၢ်အဘၣ် တဘိယူၢ်ဃီဒီးပတဒိကနၣ်တ့ၢ်ဘၣ်နၤဘၣ်.

¹⁵အိယွၤ, ပကစၢ်ယွၤဧၢ, နဒုးနဲၣ်တ့ၢ်နစိကမီၤလၢတၢ်ထုးထီၣ် နပှၤဂီၢ်မုၢ်လၢကီၢ်အဲၤကူပတူးအပူၤ, ဒီးနစိကမီၤအံၤပသ့ၣ် နီၣ်ဒံးအီၤလီၤ. ပမၤတ့ၢ်တၢ်ဒဲးဘး, ပမၤကမၣ်တ့ၢ်တၢ်လီၤ.

¹⁶နအိၣ်ပှိၤတ့ၢ်ပှၤလၢပျၢၤလီၤ. မၤသးဒ်န့ၣ်ဒီးသးဒိၣ်ဝ့ၢ်ယရူၤ ၡလ့ၣ်လၢၤတဂ့ၤ. မ့ၢ်ဝဲနဝ့ၢ်, နကစၢၢ်စီဆှံလီၤ. ကယဲၢ်ပှၤ ဂီၢ်မုၢ်ခဲလၢာ်လၢအအိၣ်လၢထံကီၢ်ခိၣ်ဃၢၤတဖၣ်ကွၢ်တလီၤ ဝ့ၢ်ယရူၤၡလ့ၣ်ဒီးနပှၤဂီၢ်မုၢ်, လၢပတၢ်ဒဲးဘးတဖၣ်အဃိ, ဒီးတၢ်အၢတၢ်သီလၢမိၢ်ပၢ် ဖံဖုလၢပျၢၤတဖၣ်မၤတ့ၢ်ဝဲအဃိန့ၣ်လီၤ.

¹⁷အိကစၢ်ယွၤဧၢ, ဒိကနၣ်လၢ်ယတၢ်ထုကဖၣ်ဒီးယတၢ်ဃ့ ကညးတက့ၢ်. မၤအိၣ်ထီၣ်က့ၤနတၢ်လုၢ်ဟံၣ်လၢအဘၣ်တၢ် မၤဟးဂီၤအီၤတက့ၢ်. မၤအိၣ်ထီၣ်က့ၤအီၤဒ်သိးပှၤကိးဂၤ ကသ့ၣ်ညါလၢနမ့ၢ်ကစၢ်ယွၤတက့ၢ်.

¹⁸အိကစၢ်ယွၤဧၢ, ဒိကနၣ်လၢ်ပှၤတက့ၢ်. ကွၢ်လီၤပှၤဒီးထံၣ်လီၤ ပတၢ်ကိၢ်တၢ်ဂီၤလၢအအိၣ်လၢပပူၤဒီးဝ့ၢ်တဝ့ၢ်လၢအအိၣ်ဒီး နမံၤအတၢ်ဘၣ်နးဘၣ်ဖှီၣ်န့ၣ်တက့ၢ်. ပဘါထုကဖၣ်တၢ်ဆူနအိၣ်န့ၣ်မ့ၢ် လၢနလၢပှဲၤဒီးတၢ်သးကညီၤအဃိလီၤ. တမ့ၢ်ဘၣ်လၢပမၤ တ့ၢ်တၢ်လိၤတၢ်ဘၣ်အဃိဘၣ်.

¹⁹ယွၤဧၢ, ဒိကနၣ်လၢ်ပှၤတက့ၢ်. ယွၤဧၢ, ပျၢ်လၢ်ပကမၣ်တက့ၢ်. ယွၤဧၢ, ဒိကနၣ်ပှၤဒီးမၤတၢ်တက့ၢ်. ဒ်သိးပှၤကိးဂၤကသ့ၣ်ညါလၢန မ့ၢ်ကစၢ်ယွၤဒီး, မၤယံာ်မၤနီၣ်နသးတဂ့ၤ. ဝ့ၢ်တဝ့ၢ်အံၤဒီးပှၤဂီၢ်မုၢ်အံၤမ့ၢ်နတၢ်လီၤ.”

²⁰ယဘါထုကဖၣ်ဆူညါ, အၢၣ်လီၤယတၢ်ဒဲးဘးဒီးယပှၤဂီၢ် မုၢ်အံၣ်စရ့လးအတၢ်ဒဲးဘးတဖၣ်ဒီးဃ့ကညးယွၤ, ယကစၢ်ယွၤလၢကမၤအိၣ်ထီၣ်က့ၤအတၢ်လုၢ်ဟံၣ်စီဆှံန့ၣ်လီၤ.

²¹ဖဲယဘါထုကဖၣ်ဒံးတၢ်အဖၢမုၢ်ဒီး, ကလူးကၤဘြံၤအ့လးလၢယထံၣ်ဘၣ် တ့ၢ်လၢတၢ်ထံၣ်လၢညါခီအခီၣ်ထံးတဘျီအပူၤ န့ၣ်ဟဲယူၤလီၤဆူယအိၣ်တၢ်အလီၢ်န့ၣ်လီၤ. အကတီၢ်န့ၣ်မ့ၢ်ဝဲတၢ်လုၢ်မၤဘူၣ်လၢဟါ ကဘၣ်တၢ်လုၢ်ထီၣ်အီၤအကတီၢ်န့ၣ်လီၤ.

²²အဝဲတဲဖျါထီၣ်ဝဲ, “စီၤဒၤနံးယ့လးဧၢ, ယဟဲဖဲအံၤဒ်သိးယကမၤစၢၤနၤလၢ နကနၢ်ပၢၢ်ဝံအတၢ်စံးပာ်အဂ့ၢ်န့ၣ်လီၤ.

²³ဖဲလၢနစးထီၣ်သကွံၢ်ကညးတၢ်ဒီးကစၢ်ယွၤန့ၣ်အဝဲစံးဆၢတ့ၢ်နၤလီၤ. အဝဲအဲၣ်နၤသတးဒီးယဟဲယဲဒ်သိးယကတဲနၤတၢ်စံးဆၢန့ၣ်လီၤ. ခဲကနံၣ်အံၤကနၣ်လီၤတံၢ်လီၤဆဲးဖဲယတဲဖျါ ထီၣ်တၢ်ထံၣ်လၢညါခီအဂ့ၢ်န့ၣ်တက့ၢ်.

²⁴တၢ်အနံၣ်နွံဆံအဘျီနွံဝီအံၤမ့ၢ်တၢ်ဆၢကတီၢ်လၢကစၢ်ယွၤ ပာ်လီၤအီၤလၢတၢ်မၤထူၣ်ဖျဲးနပှၤဂီၢ်မုၢ်, ဒီးနဝ့ၢ်စီဆှံလၢတၢ် ဒဲးဘးဒီးတၢ်အၢတၢ်သီအပူၤလီၤ. တၢ်ဒဲးဘးကဘၣ်တၢ်ပျၢ်အီၤဒီး တၢ်စံၣ်ညီၣ်တီအထူအယိာ်ကဘၣ်တၢ်ဒုးအိၣ်ဂၢၢ်ကျၢၤအီၤ, ဒ်သိးတၢ်ထံၣ်လၢညါခီဒီးဝံအတၢ်စံးပာ်ကလၢထီၣ်ပှဲၤထီၣ်ဝဲ, ဒီးတၢ်လုၢ်ဟံၣ်စီဆှံကဘၣ်တၢ်ပာ်စီဆှံထီၣ်ကဒါက့ၤအီၤအဂီၢ်လီၤ.

²⁵ပာ်သူၣ်ပာ်သးတၢ်ဂ့ၢ်အံၤဒီးနၢ်ပၢၢ်အီၤတက့ၢ်. စးထီၣ်လၢတၢ်ဟ့ၣ် လီၤတၢ်ကလုၢ်လၢဝ့ၢ်ယရူၤၡလ့ၣ်ကဘၣ်တၢ်သူၣ်ထီၣ်ဘှီထီၣ်အီၤ အကတီၢ်တုၤလီၤလၢပှၤခိၣ်ပှၤနၢ်လၢကစၢ်ယွၤဃုထၢအီၤတဂၤဟဲဝဲန့ၣ်, တၢ်ဆၢကတီၢ်ကပူၤကွံာ်နွံနံၣ်နွံဘျီန့ၣ်လီၤ. ဝ့ၢ်ယရူၤၡလ့ၣ်ကဘၣ်တၢ်သူၣ်ထီၣ်ဘှီထီၣ် ကဒါက့ၤအီၤဃုာ်ဒီးကျဲမုၢ်ကျဲဘိတဖၣ်, ဝ့ၢ်ခိၣ်ဒူအဒိၣ်အကျၢၤဒီးကအိၣ်ခၢၣ်သ နၢၣ်ဃုဆံခံနံၣ်အဘျီနွံဘျီန့ၣ်လီၤ. ဘၣ်ဆၣ်ဒီးအဝဲအံၤကမ့ၢ်တၢ်ကိၢ်တၢ်ဂီၤအကတီၢ်န့ၣ်လီၤ.

²⁶ဒီးဖဲတၢ်ဆၢကတီၢ်အံၤအကတၢၢ်န့ၣ်, ပှၤခိၣ်ပှၤနၢ်လၢကစၢ်ယွၤဃုထၢအီၤတဂၤန့ၣ်ကဘၣ်တၢ်မၤသံ ကွံာ်အီၤလၢတၢ်တတီတလိၤအပူၤလီၤ. ဝ့ၢ်ဒီးတၢ်လုၢ်ဟံၣ်န့ၣ်ကဘၣ် တၢ်မၤဟးဂီၤကွံာ်အီၤလၢပှၤပၢတၢ်လၢအစိကမီၤဒိၣ် တဂၤအသုးမုၢ်လၢအဟဲနုာ်လီၤဒုးန့ၢ်အီၤန့ၣ်လီၤ. တၢ်အကတၢၢ်ကဟဲဒ်ထံလုၣ်ဘၢတၢ်, ဟဲစိာ်ဝဲတၢ်ဒုးတၢ်ယၤ ဒီးတၢ်မၤဟးဂီၤ, လၢကစၢ်ယွၤကတဲာ်ကတီၤပာ်စၢၤဝဲန့ၣ်လီၤ.

²⁷ပှၤပၢတၢ်တဂၤန့ၣ်ကမၤတၢ်အၢၣ်လီၤအီလီၤအဂၢၢ်အကျၢၤ ဃုာ်ဒီးအပှၤအါဂၤလၢနွံနံၣ်အတီၢ်ပူၤန့ၣ်လီၤ. ဖဲနွံနံၣ်အကတီၢ်အံၤအဖးဖီနံၣ်ပူၤကွံာ် ဒီးကဆိကတီၢ်ကွံာ်တၢ်လုၢ်တၢ်ပာ်တဖၣ် ဒီးတၢ်လုၢ်မၤဘူၣ်တဖၣ်န့ၣ်လီၤ. ဒီးတၢ်လီၤပျံၤလီၤဖုးလၢအလီၤသးဘၣ်အၢဒိၣ်ဒိၣ်က လဲာ်ကဘၣ်တၢ်ပာ်ထီၣ်အီၤလၢတၢ်လုၢ်ဟံၣ်အပျိာ်အထီ ကတၢၢ်ဒီးကအိၣ်ဖဲန့ၣ်တုၤပှၤလၢအပာ်ထီၣ်အီၤဖဲန့ၣ် တဂၤန့ၣ်ဘၣ်သဂၢၢ်အမုၢ်နံၤလၢခံကတၢၢ်လၢကစၢ် ယွၤကတဲာ်ကတီၤပာ်စၢၤလၢအဂီၢ်န့ၣ်လီၤ.”