Read S'gaw Karen လံာ်ဟိၤၡ့ 2 Bible Online

လံာ်ဟိၤၡ့ 2 - S'gaw Karen bible

လံာ်ဟိၤၡ့ 2

¹လၢတၢ်န့ၣ်အဃိကိးနဒီပုၢ်ဝဲၢ်ပှၤအံၣ်စရ့လးဖိတဖၣ်လၢ “ဧၣ်မံၤ” ဒီး “ရူဃမၤ” န့ၣ်တက့ၢ်.

²ယဖိသ့ၣ်ဧၢ, ဃ့ကညးတၢ်ဒီးသုမိၢ်တက့ၢ်. အဝဲတမ့ၢ်လၢၤယမါဘၣ်ဒီးယတမ့ၢ်စ့ၢ်ကီးလၢၤအဝၤဘၣ်. သနာ်က့, ဃ့ကညးတၢ်ဒီးအီၤဒ်သိးကပာ်တ့ၢ်ကွံာ်အ တၢ်ကမၣ်မုၣ်ကမၣ်ခွါန့ၣ်ဒီးအတၢ်မၤဃဲသဲမုၣ်အတၢ်တက့ၢ်.

³အဝဲမ့ၢ်တပာ်ကတီၢ်ဝဲဘၣ်ဒီး, ယကဘ့ၣ်ကွံာ်အကူအကၤခဲ လၢာ်ဒီးဒုးအိၣ်ဘ့ၣ်ဆ့အီၤဒ်မုၢ်တနံၤလၢအအိၣ်ဖျဲၣ်ဝဲအသိး န့ၣ်လီၤ. ယကမၤအီၤလီၤဂာ်ဒ်ဟီၣ်ခိၣ်လၢအဃ့ထီဒီးတဟ့ၣ်ထီၣ်တၤ သူတၤသၣ်တပူၤအသိးဒီးအဝဲကသံလၢတၢ်သူအသးလၢထံအဃိ န့ၣ်လီၤ.

⁴ယတဒုးနဲၣ်ဘၣ်တၢ်သးကညီလၢအဖိတဖၣ်ဘၣ်. အဝဲသ့ၣ်တဖၣ်န့ၣ်မ့ၢ်ပှၤဃဲသဲမုၣ်လၢအတၢ်မဲာ်ဆှးတအိၣ် အဖိတဖၣ်လီၤ.

⁵အဝဲအနီၢ်ကစၢ်ဒၣ်ဝဲစံးဝဲ, ယကလဲၤဆူပှၤလၢယအဲၣ်အီၤသ့ၣ်တဖၣ်အအိၣ်, အဝဲသ့ၣ်ဟ့ၣ်ယၤလၢတၢ်အီၣ်ဒီးထံ, သိဆူၣ်ဒီးတၢ်ကံးယာ်လုၣ်, သိဧိၤချါဧိၤဒီးစပံးထံလီၤ.

⁶လၢတၢ်န့ၣ်အဃိ, ယကဒူၣ်ဃးအီၤဒီးတပှီာ်တၢ်ဆှုၣ်တဖၣ်ဒီးသူၣ် ထီၣ်တၢ်တၢ်ဒူၣ်တခါလၢကတြီဃာ်အကျဲလီၤ.

⁷အဝဲကဃ့ၢ်လူၤပိာ်ပှၤလၢအအဲၣ်ဝဲသ့ၣ်တဖၣ်အခံ, ဘၣ်ဆၣ်တချုးန့ၢ်ဝဲဘၣ်. ကဃုအဝဲသ့ၣ်တဖၣ်, ဘၣ်ဆၣ်တထံၣ်န့ၢ်ဘၣ်ဝဲဘၣ်. အန့ၣ်ဒီးအဝဲကစံးဝဲ, ယကက့ၤကဒါက့ၤဆူယဝၤအခီၣ်ထံးတဂၤအအိၣ်လီၤ. အဂ့ၢ်ဒ်အံၤ, အကတီၢ်ဖဲန့ၣ်ဂ့ၤန့ၢ်ဒံးအကတီၢ်ခဲအံၤလၢယဂီၢ်န့ၣ်လီၤ.

⁸အဝဲတအၢၣ်လီၤသ့ၣ်ညါဝဲနီတစုလၢယမ့ၢ်ပှၤတဂၤ လၢအဟ့ၣ်တ့ၢ်အီၤဘုဧိၤဟုဧိၤ, စပံးထံ, သိဧိၤချါဧိၤဒီး ကယဲၢ်စ့ဒီးထူလၢအသူတ့ၢ်ဝဲလၢတၢ်သူၣ်ထီၣ်ဘါထီၣ်ဘၤဧလး အပူၤန့ၣ်ဘၣ်.

⁹အဃိသတးဒီး, လၢကူးဘုအဆၢကတီၢ်န့ၣ်ယကဟံးန့ၢ်က့ၤယတၢ်ဟ့ၣ် တဖၣ်လၢအမ့ၢ်ဘုဧိၤဟုဧိၤဒီးစပံးထံ ဒီးစိာ်ထီၣ်ကွံာ်သိဆူၣ်ဒီးလုၣ်တၢ်ကံၣ်ယာ်လၢယဟ့ၣ်တ့ၢ်အီၤလၢ အတၢ်ကူတၢ်သိးအဂီၢ်န့ၣ်လီၤ.

¹⁰ယကဘ့ၣ်ကွံာ်အကူအသိးဒီးဒုးအိၣ်ဘ့ၣ်ဆ့အီၤလၢ ပှၤလၢအအဲၣ်ဝဲသ့ၣ်တဖၣ်အမဲာ်ညါဒီးပှၤမၤထူၣ်ဖျဲးအီၤလၢယ စိကမီၤပူၤကသ့တအိၣ်ဘၣ်နီတဂၤဘၣ်.

¹¹ယကမၤကတၢၢ်ကွံာ်ကယဲၢ်အဝဲဒၣ်အမူးဧိၤပွဲဧိၤတဖၣ်လၢအမ့ၢ်, တနံၣ်တဘျီဒီးတလါတဘျီအဘူၣ်တဖၣ်ဒီးအမုၢ်အိၣ်ဘှံးနံၤအဘူၣ်တဖၣ်, ကယဲၢ်အတၢ်ဘူၣ်တၢ်ဘါအတၢ်အိၣ်ဖှိၣ်တဖၣ်န့ၣ်လီၤ.

¹²ယကမၤဟးဂီၤကွံာ်အစပံးမုၢ်တဖၣ်ဒီးအချၢၣ်ဒၢအထူၣ်တ ဖၣ်လၢအစံးဝဲလၢပှၤလၢအအဲၣ်အီၤတဖၣ်ဟ့ၣ်တ့ၢ်အီၤလၢအဝဲမၤတၢ် ခ့တၢ်ပှၤအတၢ်မၤလၢအဝဲသ့ၣ်တဖၣ်အဂီၢ်အဃိန့ၣ်လီၤ. ယကဒုးကဲထီၣ်အစပံးလီၢ်ဒီးတၤသၣ်အလီၢ်တဖၣ်ဆူပှၢ်မုၢ်ကနၢတတီၤ, ဒီးဆၣ်ဖိကီၢ်ဖိအမံၤတဖၣ်ကမၤဟးဂီၤကွံာ်အဝဲသ့ၣ်တဖၣ်န့ၣ်လီၤ.

¹³လၢတၢ်ဆၢကတီၢ်တဖၣ်လၢအဝဲသးပ့ၤနီၣ်ကွံာ်ယၤဖဲအဆိၣ်ကဲၤထီၣ် တၢ်နၢမူဆူဘဧၤလးဒီးကယၢကယဲထီၣ်အသးလၢအတၢ်မျၢ် ပလဲတဖၣ်ဒ်သိးကလူၤပိာ်ပှၤလၢအအဲၣ်ဝဲတဖၣ်အခံအဃိန့ၣ်, ယကစံၣ်ညီၣ်အီၤလီၤ. ယွၤကတိၤတ့ၢ်တၢ်လံ.

¹⁴လၢတၢ်န့ၣ်အဃိ, ယကက့ၤကိးကဒါက့ၤကဒီးအီၤဆူပှၢ်မုၢ်ကနၢ အပူၤန့ၣ်လီၤ. ဖဲန့ၣ်ယကမၤန့ၢ်ကဒါက့ၤအီၤလၢတၢ်အဲၣ်တၢ်ကွံအတၢ်ကတိၤတဖၣ် န့ၣ်လီၤ.

¹⁵ယကဟ့ၣ်ကဒါက့ၤအီၤအစပံးလီၢ်တဖၣ်လၢအအိၣ်တ့ၢ်ဝဲဒီးအီၤ, ဒီးယကဒုးကဲထီၣ်ဧၤကိၢ်လၢအမ့ၢ်တၢ်မၤကိၢ်မၤဂီၤအတၢ်တြီၤ ဆူတၢ်မုၢ်လၢ်အတြဲၤန့ၣ်လီၤ. အဝဲကမၤဆၢကဒါက့ၤယၤဖဲန့ၣ်ဒ်အမၤတ့ၢ်ဝဲဖဲအသးစၢ်အကတီၢ် အသိး, ဖဲအဟဲက့ၤထီၣ်လၢကီၢ်အဲၤကူပတူးအခါန့ၣ်လီၤ.

¹⁶တုၤနုၤတစုအဝဲကကိးက့ၤကဒီးယၤလၢအဝၤန့ၣ်လီၤ. အဝဲတကိးလၢၤယၤလၢအဘဧၤလးနီတစုလၢၤဘၣ်.

¹⁷ယတပျဲအဝဲကိးထီၣ်ကဒီးဘဧၤလးအမံၤနီတဘျီလၢၤဘၣ်.

¹⁸ဖဲအဆၢကတီၢ်အဝဲန့ၣ်, ယကမၤတၢ်အၢၣ်လီၤအီ လီၤတမံၤဒီးကယဲၢ်ဆၣ်ဖိကီၢ်ဖိအမံၤတဖၣ်ဒီးထိၣ်တဖၣ် ဒ်သိးအဝဲသ့ၣ်တဖၣ်အသုတမၤဆါဘၣ်ယပှၤဂီၢ်မုၢ်တဂ့ၤန့ၣ်လီၤ. ယကသုးကွံာ်စ့ၢ်ကီးတၢ်ဒုးတၢ်ယၤအတၢ်စုကဝဲၤခဲလၢာ်လၢကီၢ် ပူၤ, ကယဲၢ်ဘီတဖၣ်ဒီးချံၣ်တဖၣ်ဒီးကဒုးအိၣ်ဒုး ဆိးယပှၤဂီၢ်မုၢ်လၢတၢ်ဃူတၢ်ဖိးဒီးတၢ်အိၣ်ပူၤအိၣ်ဖျဲးအပူၤ န့ၣ်လီၤ.

¹⁹ကီၢ်အံၣ်စရ့လးဧၢ, ယကဒုးကဲထီၣ်နၤလၢယမါ, ယကတီ ယဲဒီးသူၣ်တီသးရၤလီၤ. ယကဒုးနဲၣ်နၤယတၢ်အဲၣ်အဂၢၢ်အကျၢၤ ဒီးတၢ်သးကညီၤ, ဒီးဒုးကဲထီၣ်နၤလၢယတၢ်လီၤထူလီၤယိာ်န့ၣ်လီၤ.

²⁰ယကဟံးဃာ်ဂၢၢ်ကျၢၤယတၢ်အၢၣ်လီၤဒီးဒုးကဲထီၣ်နၤလၢယတၢ် လီၤ. ဒီးနကအၢၣ်လီၤသ့ၣ်ညါယၤဒ်ယွၤအသိးန့ၣ်လီၤ.

²¹ဖဲအကတီၢ်အဝဲန့ၣ်, ယကစံးဆၢယပှၤဂီၢ်မုၢ်အံၣ်စရ့လးအတၢ်ထုကဖၣ် တဖၣ်န့ၣ်လီၤ. ယကဒုးစူၤလီၤတၢ်လၢဟီၣ်ခိၣ်အဖီခိၣ်,

²²ဒီးဟီၣ်ခိၣ်ကဟ့ၣ်ထီၣ်ဘုဧိၤဟုဧိၤဒီးစပံးသၣ်တဖၣ်ဒီးသ့ၣ်စၤယံး တဖၣ်န့ၣ်လီၤ.

²³ယကဒုးအိၣ်ဂၢၢ်ဆိးကျၢၤယပှၤဂီၢ်မုၢ်လၢထံကီၢ်အပူၤဒီးဒုး ဘီၣ်ထီၣ်ညီထီၣ်အီၤန့ၣ်လီၤ. ယကဒုးနဲၣ်ယတၢ်အဲၣ်ဆူပှၤတဖၣ်လၢအဘၣ်တၢ်ကိးအီၤလၢ “တၢ်တအဲၣ်အီၤ” အအိၣ်ဒီးဆူပှၤတဖၣ်လၢအဘၣ်တၢ်ကိးအီၤလၢ “တမ့ၢ်ယွၤအပှၤဂီၢ်မုၢ်ဘၣ်” အအိၣ်န့ၣ်လီၤ. ယကစံး, “သုမ့ၢ်ယပှၤဂီၢ်မုၢ်” ဒီးအဝဲသ့ၣ်ကစံးဆၢ, “နမ့ၢ်ပကစၢ်ယွၤ” န့ၣ်လီၤ.