Read S'gaw Karen လံာ်ယိၤအ့လး 1 Bible Online

လံာ်ယိၤအ့လး 1 - S'gaw Karen bible

လံာ်ယိၤအ့လး 1

¹တၢ်အံၤမ့ၢ်ယွၤအတၢ်ကစီၣ်ဆူစီၤပသူၤအ့လးအဖိခွါစီၤယိၤ အ့လးန့ၣ်လီၤ.

²ပှၤသူၣ်က့သးပှၢ်သ့ၣ်ဧၢ, ကနၣ်တၢ်အံၤ, ဒီးပှၤတဂၤလၢ်လၢ်လၢကီၢ် ယူဒၤဧၢ, ဒိကနၣ်တက့ၢ်. မ့ၢ်တၢ်ဒ်သိးအံၤမၤအသးတဘျီဘျီလၢသုဆၢသုကတီၢ်မ့ၢ်ဂ့ၤ, သုပၢ်တဖၣ်အဆၢကတီၢ်မ့ၢ်ဂ့ၤန့ၣ်ဧါ.

³ဒီးတဲဘၣ်သုဖိသုလံၤ, ဒီးသုဖိသုလံၤကတဲဘၣ်အဖိအလံၤ, ဒီးအဝဲသ့ၣ်အဖိအလံၤကတဲဘၣ်ကဒီး အဖိအလံၤန့ၣ်လီၤ.

⁴ဒွဲၣ်ဧိၤတြၤဧိၤတဖုဝံၤတဖုဟဲထီၣ်ဒီးမၤဟးဂီၤကွံာ်တၢ်မုၢ်တၢ်ဘိတဖၣ်လီၤ. တၢ်လၢဒွဲၣ်တဖုပာ်လီၤတဲာ်တ့ၢ်ဝဲန့ၣ်, အဂၤတဖုမၤဟးဂီၤကွံာ်ဝဲလီၤ.

⁵ဖုးသံနီၣ်ပှၤအီမူၤအသးသ့ၣ်ဧၢ, ဒီးဟီၣ်တက့ၢ်. ဒီးပှၤလၢအအီစပံးထံသ့ၣ်ဧၢ, ဟီၣ်ပသူထီၣ်လၢစပံးထံအသီ လၢအဘၣ်တၢ်မၤဟးဂီၤအီၤအဃိန့ၣ်တက့ၢ်.

⁶ဒွဲၣ်ဧိၤတြၤဧိၤတဖၣ်ဟဲထီဒါပထံပကီၢ်လီၤ. အဝဲသ့ၣ်အဂံၢ်အဘါဆူၣ်ဝဲဒီးအါဝဲဂီၢ်ဝဲလၢပကဂံၢ်အီၤအဂီၢ်န့ၣ်လီၤ. အဝဲသ့ၣ်အမဲအ့ၣ်ဒ်သိးခ့ယုၢ်အမဲအသိးန့ၣ်လီၤ.

⁷အဝဲသ့ၣ်မၤဟးဂီၤကွံာ်ပစပံးမုၢ် တဖၣ်ဒီးအ့ၣ်ကွံာ်ပချၢၣ်ဒၢအထူၣ်တဖၣ်လီၤ. အဝဲသ့ၣ်အီးကွံာ်ပချၢၣ်ဒၢအထူၣ်တဖၣ်အဖံးဒီးကွံာ်ကွံာ်ဝဲ, ဒီးအဒ့တဖၣ်အိၣ်တ့ၢ်ဝါဝဲဒၣ်န့ၣ်လီၤ.

⁸ပှၤဂီၢ်မုၢ်သ့ၣ်ဧၢ, ဟီၣ်ဒ်မုၣ်ကနီၤတဂၤလၢအသူၣ်အုးသးအုး လၢပိာ်ခွါလၢအဝဲကဒိးတ့ဒိးဖျီအသး ဒီးအီၤတဂၤအတၢ်သံအဃိန့ၣ်တက့ၢ်.

⁹ဘုဧိၤဟုဧိၤမ့ၢ်ဂ့ၤ, စပံးထံမ့ၢ်ဂ့ၤတအိၣ်ဝဲဒၣ်လၢတၢ်ကလုၢ်ထီၣ်အီၤလၢတၢ်လုၢ်ဟံၣ် အပူၤန့ၣ်ဘၣ်. ပှၤလုၢ်တၢ်အခိၣ်တဖၣ်သူၣ်အုးသးအုးဝဲဒၣ်လၢတအိၣ်ဘၣ်ဒီးတၢ် လုၢ်တၢ်ပာ်နီတမံၤလၢကလုၢ်ထီၣ်ဝဲလၢကစၢ်အဂီၢ်ဘၣ်အဃိလီၤ.

¹⁰စံာ်ဧိၤပျီဧိၤတဖၣ်ဘၣ်တၢ်မၤဟးဂီၤကွံာ်အီၤ, ဟီၣ်ခိၣ်ဃ့ထီကွံာ်ဝဲ, မ့ၢ်လၢဘုဧိၤဟုဧိၤဘၣ်တၢ်မၤဟးဂီၤကွံာ်အီၤ, စပံးထံဃ့ထီကွံာ်ဝဲ, ဒီးသ့ၣ်စၤယံးအထံးတဖၣ်လီၤညွံးလီၤဘဲကွံာ်ဝဲဒၣ်အဃိန့ၣ်လီၤ.

¹¹ပှၤထူစံာ်ဖိသ့ၣ်ဧၢ, သူၣ်အုးသးအုးတက့ၢ်. ပှၤလၢအအံးထွဲကွၢ်ထွဲစပံးလီၢ်သ့ၣ်ဧၢ, ဟီၣ်တၢ်ယၢၤတၢ်တက့ၢ်. အဂ့ၢ်ဒ်အံၤ, ဘုကၠူၣ်, ဘုမုယီၤ, ဒီးတၢ်မုၢ်တၢ်ဘိခဲလၢာ်န့ၣ် ဘၣ်တၢ်မၤဟးဂီၤကွံာ်အီၤလံ.

¹²စပံးမုၢ်ဒီးချၢၣ်ဒၢအထူၣ်တဖၣ်လီၤညွံးလီၤဘဲကွံာ်လံ. ကယဲၢ်တၤသူတၤသၣ်အမုၢ်ခဲလၢာ်လီၤဘီဒီးသံကွံာ်လံ. ပှၤဂီၢ်မုၢ်အတၢ်သူၣ်ခုသးခုလီၤမၢ်ကွံာ်လံ.

¹³ပှၤလုၢ်တၢ်အခိၣ်လၢအမၤတၢ်လၢတၢ်လုၢ်လီၢ်သ့ၣ်ဧၢ, ကူထီၣ်သိးထီၣ်တၢ်သူၣ်အုးသးအုးအဆ့ကၤဒီးဟီၣ်တက့ၢ်. လဲၤနုာ်ဆူယွၤအတၢ်လုၢ်ဟံၣ်ပူၤဒီးသူၣ်အုးသးအုးသီတနၤ ကျၢၤတက့ၢ်. ဘုဧိၤဟုဧိၤမ့ၢ်ဂ့ၤ, စပံးထံမ့ၢ်ဂ့ၤတအိၣ်ဝဲဒၣ်လၢတၢ်ကလုၢ်ထီၣ်အီၤ ဆူသုကစၢ်ယွၤအအိၣ်န့ၣ်ဘၣ်.

¹⁴ဘိးဘၣ်သ့ၣ်ညါလၢတၢ်ဒုၣ်တၢ်အီၣ်တၢ်အီအဂီၢ်, ကိးတၢ်အိၣ်ဖှိၣ်ရိဖှိၣ်, ကိးဖှိၣ်ပှၤခိၣ်ပှၤနၢ်တဖၣ် ဒီးယူဒၤအပှၤဂီၢ်မုၢ်ခဲလၢာ် ဆူယွၤအတၢ်လုၢ်ဟံၣ်အပူၤဒီးကိးထီၣ်ဆူ ယွၤအအိၣ်တက့ၢ်.

¹⁵ကစၢ်အမုၢ်နံၤ, မုၢ်တနံၤလၢသ့တၢ်လၢာ်ကစၢ်ကဟဲမၤဟးဂူာ်ဟးဂီၤတၢ်န့ၣ်ဘူး ထီၣ်လံ. မုၢ်နံၤအဝဲန့ၣ်မ့ၢ်တၢ်လီၤပျံၤလီၤဖုးအမုၢ်နံၤလီၤ.

¹⁶ပကွၢ်တၢ်ဒ်ပှၤလၢတၢ်မၤစၢၤအီၤတအိၣ်ဘၣ်မ့ၢ်လၢ ပတၢ်မုၢ်တၢ်ဘိတဖၣ်ဘၣ်တၢ်မၤဟးဂီၤကွံာ်အီၤအဃိန့ၣ်လီၤ. ဒီးတၢ်သူၣ်ဖှံသးညီန့ၣ်တအိၣ်ဝဲဒၣ်လၢပကစၢ်ယွၤ အတၢ်လုၢ်ဟံၣ်အပူၤန့ၣ်ဘၣ်.

¹⁷တၢ်ချံတဖၣ်သံလၢဟီၣ်ခိၣ်ဃ့အဃိလီၤ. ဘုချံလၢတၢ်ကပာ်ဖှိၣ်အီၤအဂီၢ်တအိၣ်ဘၣ်, ဒီးဘုဖီတဖၣ်ဟးဂီၤကွံာ်ဝဲဒၣ်န့ၣ်လီၤ.

¹⁸ဂီၤဘုၣ်ဂီၤဖံးတဖၣ်သူၣ်ကိၢ်သးဂီၤလၢအီၣ်ဆၣ် အလီၢ်တအိၣ်လၢအဝဲသ့ၣ်အဂီၢ်နီတပူၤအဃိန့ၣ်လီၤ. သိတဖၣ်တူၢ်ဘၣ်ခီၣ်ဘၣ်တၢ်စ့ၢ်ကီးန့ၣ်လီၤ.

¹⁹ယွၤဧၢ, ယကိးထီၣ်နၤလီၤ. အဂ့ၢ်ဒ်အံၤ, အီၣ်ဆၣ်အလီၢ်လါဟ့ဒီးသ့ၣ်တဖၣ်ဃ့ထီကွံာ် မၤအသးဒ်မ့ၣ်အူအီၣ်ကွံာ်အီၤအသိးန့ၣ်လီၤ.

²⁰ဆၣ်ဖိကီၢ်ဖိလၢပှၢ်လၢ်ကျါဒၣ်လဲာ်ကိးထီၣ်ဆူနအိၣ်လီၤ. အဂ့ၢ်ဒ်အံၤ, ထံဖိကျိတဖၣ်လီၤသံးကွံာ်ဝဲလံန့ၣ်လီၤ.