Read S'gaw Karen လံာ်ယိၤနါ 2 Bible Online

လံာ်ယိၤနါ 2 - S'gaw Karen bible

လံာ်ယိၤနါ 2

¹တုၤနုၤတစု, စီၤယိၤနါဃ့ဘါထုကဖၣ်တၢ်ဆူယွၤ, အကစၢ်ယွၤအအိၣ်လၢညၣ်အဟၢဖၢအပူၤ,

²စံးဝဲဒၣ်, “လၢယဘၣ်တၢ်နးတၢ်ဖှီၣ်န့ၣ်ယကိးထီၣ်နၤ, ဒီးနစံးဆၢယၤလီၤ. ယကိးထီၣ်လၢတၢ်သံအတၢ်ယိာ်ပူၤဒီးနနၢ်ဟူ ယကလုၢ်လီၤ.

³နတ့ၢ်လီၤကွံာ်ယၤဆူထံယိာ်ပူၤ, ဆူပီၣ်လဲၣ်အသးကံၢ်ပူၤ, ဒီးထံတဖၣ်အိၣ်ဝးတရံးယၤ, ကယဲၢ်နလပီဒီးနလၢဖးဒိၣ်တဖၣ်လဲၤခီယၤန့ၣ်လီၤ.

⁴အန့ၣ်တစုယစံး, ယဘၣ်တၢ်ဟီထီၣ်ကွံာ်ယၤလၢနမဲာ်ညါ, ယကထံၣ်ဘၣ်ကဒီးနတၢ်လုၢ်ဟံၣ်စီဆှံဒ်လဲၣ်.

⁵ထံလုၣ်ဘၢယၤဒီးတၢ်ယိာ်ပူၤအိၣ်ဝးတရံးယၤလီၤ. ပီၣ်လဲၣ်လုၣ်ဘၢယၤလၢာ်လၢာ်ဆ့ဆ့လီၤ. ဆှဲတဖၣ်စၢဘိၣ်ဃာ်အသးဝးတရံးယခိၣ်န့ၣ်လီၤ.

⁶ယလဲၤလီၤဆူကစၢၢ်ဂံၢ်ထံး ကီၢ်လၢတြဲၤကးတံာ်ဃာ်အသးအစိၤစိၤ အဃၣ်ဃၣ်န့ၣ်လီၤ. ဘၣ်ဆၣ်နဲဒၣ်ယွၤယကစၢ်ဧၢ, နထုးထီၣ်ကွံာ်ယၤလၢတၢ်ယိာ်ပူၤဒီးမၤမူထီၣ်ယၤလီၤ.

⁷တုၤယသးလီၤဘှါဝဲလၢယပူၤဘူးလၢယကသံန့ၣ်ဒီးယသ့ၣ် နီၣ်ထီၣ်နၤလီၤ. ဒီးယတၢ်ထုကဖၣ်လဲၤထီၣ်ဆူနအိၣ်ဆူနတၢ်လုၢ်ဟံၣ်စီဆှံ အပူၤန့ၣ်လီၤ.

⁸ပှၤလၢအဘူၣ်ထီၣ်ဘါထီၣ်တၢ်ဂီၤ တၢ်ဖီၣ်တဂိာ်တသီၣ်ဘၣ်တဖၣ်န့ၣ်ညိကွံာ်အတၢ်သးတီဒီးနၤလီၤ.

⁹မ့မ့ၢ်ယဲဒၣ်အံၤယကလုၢ်ထီၣ်နၤလၢ တၢ်လုၢ်အိၣ်ဒီးတၢ်သးဝံၣ်စံးထီၣ်ပတြၢၤနၤ ဒီးယကမၤတၢ်လၢယအၢၣ်လီၤအီလီၤန့ၣ်လီၤ. တၢ်အုၣ်က့ၤခီၣ်က့ၤန့ၣ်ဟဲလၢယွၤလီၤ.”

¹⁰တုၤနုၤတစု, ယွၤမၤလိာ်ညၣ်, ဒီးညၣ်န့ၣ်ဘှိးထီၣ်ကွံာ်စီၤယိၤနါဆူ ထံကၢၢ်ခိၣ်န့ၣ်လီၤ.