Read S'gaw Karen လံာ်ယိၤနါ 4 Bible Online

လံာ်ယိၤနါ 4 - S'gaw Karen bible

လံာ်ယိၤနါ 4

¹ဘၣ်ဆၣ်ဒီး, တၢ်အံၤန့ၣ်မ့ၢ်တၢ်လၢအတမၤမုာ်ဘၣ်စီၤယိၤနါအသး ဒိၣ်ဒိၣ်ကလဲာ်, ဒီးအသးဒိၣ်ထီၣ်ဝဲလီၤ.

²အဝဲဘါထုကဖၣ်တၢ်ဆူယွၤအအိၣ်ဒီးစံးဝဲ, “ယွၤဧၢ, အဝဲအံၤတမ့ၢ်ဘၣ်တၢ်လၢယစံးတ့ၢ်ဖဲယအိၣ်လၢယကီၢ် အပူၤဘၣ်န့ၣ်ဧါ. လၢတၢ်န့ၣ်အဃိဒီးလၢအခီၣ်ထံးန့ၣ်ယဃ့ၢ်ကွံာ်ဆူဝ့ၢ်တၢ်ၡံၣ်, အဂ့ၢ်ဒ်အံၤ, ယသ့ၣ်ညါလၢနမ့ၢ်ကစၢ်ယွၤလၢအသးအိၣ်တၢ်ဒီးသးကညီၤတၢ်, သးထီၣ်ကီဒီးလၢဝဲပှဲၤဝဲဒီးတၢ်အဲၣ်ဂၢၢ်ကျၢၤဒီးနပာ်နသးလၢ နကသးကညီၤက့ၤတၢ်ဒီးတသိၣ်ဃီၣ်ဘၣ်တၢ်ဘၣ်န့ၣ်လီၤ.

³ဒီးခဲကနံၣ်အံၤ, ယွၤဧၢ, ဟံးန့ၢ်ကွံာ်ယသးသမူလၢယၤန့ၣ်တက့ၢ်. ယဃ့ကညးနၤလီၤ. အဂ့ၢ်ဒ်အံၤ, ယသံဂ့ၤန့ၢ်ယမူတက့ၢ်လီၤ.”

⁴ဒီးယွၤစံးဘၣ်အီၤ, “နသးထီၣ်န့ၣ်ဂ့ၤစ့ၢ်ကီးဧါ.”

⁵အန့ၣ်ဒီးစီၤယိၤနါဟးထီၣ်လၢဝ့ၢ်ပူၤဒီး ဆ့ၣ်နီၤဝဲဖဲအမုၢ်ထီၣ်ဒီးမၤထီၣ်ဒဲတဖျၢၣ်လၢအဂီၢ်ဖဲန့ၣ်လီၤ. ဆ့ၣ်နီၤဝဲလၢဒဲအကဒုပူၤတုၤလၢအ ကထံၣ်ဘၣ်ဝဲတၢ်ကမၤအသးဒီးဝ့ၢ်ဒ်လဲၣ်န့ၣ်လီၤ.

⁶ဒီးကစၢ်ယွၤပာ်လီၤမာ်တိတထံးဒီးဒုးကဟုအီၤလၢစီၤယိၤနါအဖီခိၣ်, ဒ်သိးအကလီၤကဒုလၢအခိၣ်, ဒီးကမၤမုာ်အီၤလၢအတၢ်သူၣ်တမုာ်သးတမုာ်န့ၣ်လီၤ. အန့ၣ်ဒီးစီၤယိၤနါသးခုဒိၣ်ဒိၣ်ကလဲာ်လၢမာ်တိတထံးန့ၣ်အဃိလီၤ.

⁷ဘၣ်ဆၣ်လၢခံတနံၤမုၢ်ဆ့ၣ်ထီၣ်ဂီၤဂီၤန့ၣ်ကစၢ် ယွၤမၤလိာ်တၢ်ဖိဃၢ်တဘိလၢကအီၣ်ကွံာ်မာ်တိဒီးအလၣ် လီၤညွံးလီၤဘဲကွံာ်ဝဲလီၤ.

⁸တုၤမုၢ်ဟဲထီၣ်န့ၣ်ကစၢ်ယွၤဆှၢလီၤကလံၤကိၢ်လၢမုၢ်ထီၣ်, ဒီးမုၢ်ဆဲးဘၣ်စီၤယိၤနါအခိၣ်ဒီးလီၤဘှါဝဲလီၤ. မၤသးဒ်န့ၣ်ဒီး, ဆၢဝဲလၢအကသံလီၤ. ဒီးစံးဝဲဒၣ်, “အဂ့ၢ်ဒ်အံၤ, ယသံန့ၣ်ဂ့ၤန့ၢ်ယမူတက့ၢ်လီၤ.”

⁹ဘၣ်ဆၣ်ကစၢ်ယွၤစံးဘၣ်စီၤယိၤနါ, “နသးဒိၣ်လၢမာ်တိ အဃိန့ၣ်ဂ့ၤစ့ၢ်ကီးဧါ.” ဒီးစီၤယိၤနါစံးဆၢ, “ယသးဒိၣ်န့ၣ်ဂ့ၤဝဲ, ဒီးယသးဒိၣ်တုၤယကသံဒၣ်လဲာ်န့ၣ်လီၤ.”

¹⁰ဒီးယွၤစံးဘၣ်အီၤ, “နသးအိၣ်မာ်တိလၢနတမၤဘၣ်, လၢနတသူၣ်လီၤဘၣ်, လၢအမဲထီၣ်လၢမုၢ်တနၤဒီးဟးဂီၤကွံာ်လၢမုၢ်တနၤန့ၣ်လီၤ.

¹¹ဒီးမ့ၢ်တကြၢးယသးအိၣ်ဘၣ်နံၤနဝ့, ဝ့ၢ်ဖးဒိၣ်တဖျၢၣ်, လၢပှၤကညီတသ့ၣ်ညါအစုထွဲဒီးအစု စ့ၣ်အိၣ်ဝဲလၢတကလီၢ်ခံကလးအဘျဲၣ်ဒီးဆၣ်ဖိကီၢ်ဖိအါအါကလဲာ် န့ၣ်ဘၣ်ဧါ.”