Read S'gaw Karen လံာ်တၢ်ဂံၢ် 12 Bible Online

လံာ်တၢ်ဂံၢ် 12 - S'gaw Karen bible

လံာ်တၢ်ဂံၢ် 12

¹စီၤမိၤၡ့ထီၣ်ပှၢ်ဝဲဒီးပှၤကူၤၡးမုၣ်တဂၤ, ဒီးနီၢ်မံးရယၣ်ဒီးစီၤအၤဟရိၣ်ကတိၤထီဒါအီၤလၢတၢ်န့ၣ်အဃိ န့ၣ်လီၤ.

²အဝဲသ့ၣ်စံးဝဲဒၣ်, “မ့ၢ်ယွၤကတိၤတၢ်ခီဖျိဒၣ်ထဲစီၤမိၤၡ့ တဂၤဧိၤလီၤဧါ. မ့ၢ်အတကတိၤတၢ်ခီဖျိစ့ၢ်ကီးပှၤဘၣ်ဧါ.” ယွၤနၢ်ဟူတၢ်လၢအဝဲသ့ၣ်စံးတ့ၢ်ဝဲန့ၣ်လီၤ.

³(စီၤမိၤၡ့မ့ၢ်ပှၤဆီၣ်လီၤအသးတဂၤဒီးဆီၣ်လီၤအသးဒိၣ်န့ၢ် ဒံးကယဲၢ်ပှၤတဂၤလၢ်လၢ်လၢဟီၣ်ခိၣ်ချၢအံၤန့ၣ်လီၤ.)

⁴သတူၢ်ကလာ်ယွၤစံးဘၣ်စီၤမိၤၡ့, စီၤအၤဟရိၣ်ဒီးနီၢ်မံးရယၣ်, “ယအဲၣ်ဒိးလၢသုသကိးသၢဂၤအံၤကဟဲထီၣ်ဆူယအိၣ်ယဆိး အဒဲစီဆှံအပူၤန့ၣ်လီၤ.” အဝဲသ့ၣ်လဲၤဝဲ,

⁵ဒီးယွၤဟဲလီၤလၢတၢ်အၢၣ်အလၢၢ်ထူၣ်တထူၣ်အပူၤ, ဒီးအိၣ်ဆၢထၢၣ်ဖဲဒဲစီဆှံအကျဲစၢၤဒီး ကိးထီၣ်ဝဲ, “စီၤအၤဟရိၣ်, နီၢ်မံးရယၣ်ဧၢ,” န့ၣ်လီၤ. အဝဲသ့ၣ်ခံဂၤခါထီၣ်ဆူညါ,

⁶ဒီးယွၤစံးဝဲဒၣ်, “ခဲအံၤဒိကနၣ်တၢ်လၢယကစံးယဲန့ၣ်တက့ၢ်. ဖဲဝံတဖၣ်အိၣ်လၢသုကျါန့ၣ်ယလီၣ်ဖျါယသးဆူအဝဲသ့ၣ်အအိၣ်လၢ တၢ်ထံၣ်လၢညါခီတဖၣ်အပူၤဒီးကတိၤတၢ်ဆူအဝဲသ့ၣ်အအိၣ်လၢတၢ် မံမီၢ်တဖၣ်အပူၤန့ၣ်လီၤ.

⁷ဖဲယကတိၤတၢ်ဒီးယခ့ယပှၤစီၤမိၤၡ့န့ၣ်လီၤဆီဝဲဒၣ်လီၤ. ယပာ်အီၤလၢကယဲၢ်ယပှၤဂီၢ်မုၢ်အံၣ်စရ့လးခဲလၢာ်အခိၣ်န့ၣ်လီၤ.

⁸မၤသးဒ်န့ၣ်ဒီးယကတိၤတၢ်ဒီးအီၤမဲာ်သကိးမဲာ်, ဖျိဖျိဖျါဖျါဒီးတမ့ၢ်လၢတၢ်ပှိၤပှံပှိၤပှီၢ်တဖၣ်အပူၤဘၣ်. အဝဲထံၣ်ဘၣ်ဒၣ်လဲာ်ယက့ၢ်ယဂီၤန့ၣ်လီၤ. သုကတိၤထီဒါယခ့ယပှၤစီၤမိၤၡ့န့ၣ်ဘူၣ်ဝဲဒ်လဲၣ်.”

⁹ယွၤအသးဒိၣ်ဘၣ်အဝဲသ့ၣ်လီၤ. ဒီးလၢတၢ်န့ၣ်အဃိတုၤယွၤဟးထီၣ်ကွံာ်,

¹⁰ဒီးတၢ်အၢၣ်ဟးထီၣ်ကွံာ်လၢဒဲစီဆှံအအိၣ်န့ၣ်နီၢ်မံးရယၣ်အဖံးဘ့ၣ်, ဘၣ်တၢ်ကးဘၢအီၤသတူၢ်ကလာ်ဒီးတၢ်ဆါအၢတမံၤဒီးလီၤဝါဝဲဒ်မူ ခိၣ်ဖီအသိးန့ၣ်လီၤ. ဖဲစီၤအၤဟရိၣ်ကွၢ်ဃီၤအီၤဒီးထံၣ်ဘၣ်ဝဲလၢအဝဲဘၣ်တၢ်ဆါအၢ ဒီဂၤညါန့ၣ်,

¹¹စီၤအၤဟရိၣ်စံးဘၣ်စီၤမိၤၡ့, “ဝံသးစူၤ, တၢ်ဒိၣ်ဧၢ, တဘၣ်ဒုးတူၢ်ပှၤလၢတၢ်စံၣ်ညီၣ်အံၤလၢပတၢ်ဒဲးဘးအမၢး အဃိတဂ့ၤ.

¹²တဘၣ်ပျဲအဝဲကဲထီၣ်ဒ်တၢ်တမံၤလၢအအိၣ်ဖျဲၣ်အသံအိၣ်ဒီး အညၣ်တဝာ်လၢတၢ်အီၣ်ကွံာ်အီၤန့ၣ်တဂ့ၤ.”

¹³လၢတၢ်န့ၣ်အဃိစီၤမိၤၡ့ကိးထီၣ်ဆူယွၤအအိၣ်, ဒီးစံးဝဲဒၣ် “အိ, ကစၢ်ယွၤဧၢ, မၤဘျါအီၤတက့ၢ်.”

¹⁴ယွၤစံးဆၢအီၤ, “အဝဲအပၢ်မ့ၢ်ထူးပှဲာ်ဆူအမဲာ်သၣ်ပူၤဒီး အဝဲကဘၣ်ဒိးအတၢ်မဲာ်ဆှးအံၤနွံသီန့ၣ်လီၤ. မၤသးဒ်န့ၣ်ဒီး, နီၣ်ထီၣ်ကွံာ်အီၤဆူသူၣ်ဒဲလီၢ်အချၢတနွံတ က့ၢ်. အန့ၣ်ဝံၤဒီး, အဝဲဘၣ်တၢ်ကိးကဒါက့ၤအီၤသ့န့ၣ်လီၤ.”

¹⁵နီၢ်မံးရယၣ်ဘၣ်တၢ်နီၣ်ထီၣ်ကွံာ်အီၤဆူသူၣ်ဒဲလီၢ်အချၢနွံသီ ဒီးပှၤဂီၢ်မုၢ်န့ၣ်တသုးဘၣ်အသးဆူညါတချုးလၢအဝဲဘၣ် တၢ်ကိးကဒါက့ၤအီၤဒံးဘၣ်န့ၣ်လီၤ.

¹⁶အန့ၣ်ဝံၤဒီးအဝဲသ့ၣ်ဟးထီၣ်ကွံာ်လၢဃစ့ရိၤဒီးသူၣ်ဒဲလၢပၤရၣ်အပှၢ်မုၢ်ကနၢပူၤန့ၣ်လီၤ.