Read S'gaw Karen လံာ်တၢ်ဂံၢ် 19 Bible Online

လံာ်တၢ်ဂံၢ် 19 - S'gaw Karen bible

လံာ်တၢ်ဂံၢ် 19

¹ယွၤမၤလိာ်စီၤမိၤၡ့ဒီးစီၤအၤဟရိၣ်, လၢအကဟ့ၣ်လီၤပှၤအံၣ်စရ့လးဖိတဖၣ် အတၢ်သိၣ်တၢ်သီတဖၣ်ဒ်အဖီလာ်အံၤအသိးန့ၣ်လီၤ. ဟဲစိာ်ဂီၤဖံးမိၢ်ဂီၤတဒုလၢအမဲၣ်သူမဲၣ်ဂီၤတအိၣ်ဘၣ်ဒီး တဘၣ်တၢ်မၢအမၤဒံးတၢ်နီတဘျီ,

³ဒီးဟ့ၣ်လီၤအီၤဆူပှၤလုၢ်တၢ်အခိၣ်စီၤအလၤဧစၢ်အအိၣ်တက့ၢ်. တၢ်န့ၣ်ကဘၣ်တၢ်လဲၤစိာ်အီၤဆူသူၣ်ဒဲလီၢ်အချၢဒီးမၤသံအီၤလၢ အဝဲအမဲာ်ညါန့ၣ်လီၤ.

⁴အန့ၣ်ဝံၤဒီးစီၤအလၤဧစၢ်ကဘၣ်ဟံးန့ၢ်အသွံၣ်တနီၤဒီးကဘၣ်ဖှံ အီၤလိၤလိၤဆူဒဲစီဆှံန့ၣ်နွံဘျီလၢအစုမုၢ်လီၤ.

⁵ဆၣ်ဖိကီၢ်ဖိဒီဒုညါဃုာ်ဒီးအဖံးအညၣ်, အသွံၣ်ဒီးအပှံာ်အကဖု ခဲလၢာ်န့ၣ်ကဘၣ်တၢ်ဆိၣ်ကဲၤထီၣ်ကွံာ်အီၤလၢပှၤလုၢ်တၢ်အခိၣ် အမဲာ်ညါန့ၣ်လီၤ.

⁶အန့ၣ်ဝံၤဒီးအဝဲကဘၣ်ဟံးန့ၢ်သ့ၣ်ဆှိးအ့ရ့းတနီၤ, ကဖျီၣ်အ့စိးအဒ့တဒ့, ဒီးပျံၤအလွဲၢ်ဂီၤတဘိဒီးကွံာ်နုာ်အီၤဆူမ့ၣ်အူကျါန့ၣ်လီၤ.

⁷အန့ၣ်ဝံၤဒီးအဝဲကဘၣ်ဆှုၣ်အတၢ်ကူတၢ်သိးတဖၣ်ဒီးလူလီၤထံ လၢအနီၢ်ကစၢ်အဖီခိၣ်, ဝံၤဒီးအဝဲက့ၤနုာ်ဆူသူၣ်ဒဲအလီၢ်သ့ဝဲလီၤ. ဘၣ်ဆၣ်ဒီးအဝဲကမ့ၢ်ဒံးတၢ်တကဆှီဘၣ်ဒ်တၢ်ဘူၣ်တၢ်ဘါ အလုၢ်အလၢ်အိၣ်ဝဲအသိးတုၤမုၢ်ဟါတစုန့ၣ်လီၤ.

⁸ပှၤလၢအဆိၣ်ကဲၤဂီၤဖံးမိၢ်န့ၣ်စ့ၢ်ကီးကဘၣ်ဆှုၣ်အကူအသိးတဖၣ် ဒီးလူလီၤထံလၢအနီၢ်ကစၢ်အဖီခိၣ်ဘၣ်ဆၣ်ဒီး အဝဲစ့ၢ်ကီးကမ့ၢ်တၢ်တကဆှီဘၣ်တုၤမုၢ်ဟါလီၤတစုန့ၣ်လီၤ.

⁹အန့ၣ်ဝံၤဒီးပှၤတဂၤလၢအကဆှီဝဲဒ်တၢ်ဘူၣ်တၢ်ဘါအလုၢ်အလၢ်အသိး န့ၣ်ကဘၣ်ထၢဖှိၣ်ဂီၤဖံးမိၢ်န့ၣ်အချါဒီးပာ်အီၤလၢတၢ်လီၢ်လၢ အကဆှီဝဲဒ်တၢ်ဘူၣ်တၢ်ဘါအလုၢ်အလၢ်အိၣ်ဝဲအသိးအပူၤလၢဒဲအလီၢ် အချၢတၢ်လီၢ်ဖဲအဝဲသ့ၣ်ကဘၣ်တၢ်ပာ်အီၤလၢပှၤအံၣ်စရ့လးဖိ အကမျၢၢ်ဒီဖုကသူအီၤလၢတၢ်ကတဲာ်ကတီၤထံလၢတၢ်သ့ ကဆှီကွံာ်တၢ်တကဆှီဘၣ်ဒ်တၢ်ဘူၣ်တၢ်ဘါအလုၢ်အလၢ်အသိး တဖၣ်အဂီၢ်လီၤ.

¹⁰ပှၤတဂၤလၢအထၢဖှိၣ်ချါတဖၣ်န့ၣ်ကဘၣ်ဆှုၣ်အတၢ်ကူတၢ်သိးတဖၣ်, ဘၣ်ဆၣ်ဒီးအဝဲမ့ၢ်တၢ်တကဆှီဘၣ်တုၤမုၢ်ဟါလီၤအကတီၢ်န့ၣ်လီၤ. အအံၤမ့ၢ်တၢ်သိၣ်တၢ်ဘျၢအဂၢၢ်အကျၢၤအစိၤစိၤအဃၣ်ဃၣ်လၢပှၤ အံၣ်စရ့လးဖိတဖၣ်ဒီးပှၤတခီဘီမုၢ်ဖိလၢအအိၣ်ဆိးလၢအဝဲသ့ၣ် အကျါခံဖုလိာ်အဂီၢ်န့ၣ်လီၤ.

¹¹ပှၤတဂၤလၢ်လၢ်လၢအထိးဘၣ်တၢ်သံစိၣ်တခါန့ၣ်ကဲထီၣ်တၢ် တကဆှီဘၣ်ဒ်တၢ်ဘူၣ်တၢ်ဘါအလုၢ်အလၢ်အသိးနွံသီန့ၣ်လီၤ.

¹²အဝဲကဘၣ်မၤကဆှီထီၣ်အသးဒၣ်ထဲလၢထံလၢတၢ်မၤ ကဆှီသးအဂီၢ်လၢသၢသီတသီဒီးလၢနွံသီတသီန့ၣ်လီၤ. အန့ၣ်ဝံၤဒီးအဝဲကကဆှီထီၣ်က့ၤဝဲဒၣ်လီၤ. ဘၣ်ဆၣ်ဒီးအဝဲမ့ၢ်တမၤကဆှီထီၣ်အသးဒၣ်ဝဲ လၢသၢသီတသီဒီးနွံသီတသီဘၣ်န့ၣ်အဝဲတကဆှီထီၣ်ဝဲဒၣ်ဘၣ်.

¹³ပှၤတဂၤလၢ်လၢ်လၢအထိးဘၣ်တၢ်သံစိၣ်တခါဒီးတမၤကဆှီ ဘၣ်အသးဒၣ်ဝဲန့ၣ်ကအိၣ်လီၤတဲာ်တ့ၢ်တကဆှီဘၣ်မ့ၢ်လၢထံလၢ အမၤကဆှီတၢ်န့ၣ်တဘၣ်တၢ်လူလီၤဒံးအီၤလၢအလိၤဘၣ်အဃိန့ၣ်လီၤ. အဝဲမၤဘၣ်အၢယွၤအဒဲစီဆှံဒီး အဝဲတဘၣ်တၢ်ပာ်အီၤဒ်ယွၤအပှၤဂီၢ်မုၢ်အကျါတဂၤလၢၤဘၣ်န့ၣ်လီၤ.

¹⁴ပှၤတဂၤမ့ၢ်သံလၢဒဲတဖျၢၣ်အပူၤဒီး, ပှၤတဂၤလၢ်လၢ်လၢအအိၣ်လၢဒဲပူၤဖဲတၢ်သံအဆၢကတီၢ်န့ၣ်မ့ၢ်ဂ့ၤ, ပှၤလၢအဟဲနုာ်ဝဲဆူဒဲပူၤမ့ၢ်ဂ့ၤန့ၣ်ကဲထီၣ်တၢ်တကဆှီဘၣ် ဒ်တၢ်ဘူၣ်တၢ်ဘါအလုၢ်အလၢ်အသိး, နွံသီန့ၣ်လီၤ.

¹⁵ကယဲၢ်ကိဒီးသပၢၤအိၣ်လၢဒဲပူၤလၢအခိၣ်ကျၢၢ်တအိၣ်ဘၣ်လၢ အလိၤတဖၣ်န့ၣ်စ့ၢ်ကီးကဲထီၣ်တၢ်တကဆှီဘၣ်န့ၣ်လီၤ.

¹⁶ပှၤတဂၤဂၤမ့ၢ်ထိးဘၣ်ပှၤတဂၤလၢတၢ်မၤသံအီၤမ့ၢ်ဂ့ၤသံဒၣ်ဝဲဒ်န့ ဆၢၣ်အသိးလၢဒဲအချၢမ့ၢ်ဂ့ၤ, ပှၤတဂၤဂၤမ့ၢ်ထိးဘၣ်ပှၤကညီတဂၤအဃံမ့ တမ့ၢ်တၢ်သွၣ်ခိၣ်တခါန့ၣ်အဝဲကဲထီၣ်တၢ်တကဆှီဘၣ်နွံသီန့ၣ်လီၤ.

¹⁷လၢတၢ်သုးကွံာ်တၢ်တကဆှီဘၣ်အဂီၢ်န့ၣ်, တၢ်ကဘၣ်ဟံးန့ၢ်ဂီၤဖံးမိၢ်ဂီၤလၢတၢ်ဆိၣ်ကဲၤတ့ၢ်အီၤဒ်သိးတၢ်ဒဲးဘး ကဘၣ်တၢ်ပျၢ်အီၤန့ၣ်အချါတနီၤဒီးဒၢနုာ်အီၤလၢထံသပၢၤတဖျၢၣ် အပူၤဒီးဃါဃုာ်အီၤဒီးထံအကဆှီန့ၣ်လီၤ.

¹⁸အဆိကတၢၢ်န့ၣ်, ပှၤတဂၤဂၤလၢအကဆှီဝဲဒ်တၢ်ဘူၣ်တၢ်ဘါအလုၢ် အလၢ်အသိးန့ၣ်ကဘၣ်မၤန့ၢ်ကဖျီၣ်အ့စိးအဒ့ဖိတဒ့, ဘျုးလီၤအီၤလၢ ထံကျါဒီးဖှံဒဲန့ၣ်ဒီး ကယဲၢ်တၢ်ကိးမံၤဒဲးလၢအအိၣ်လၢဒဲပူၤ ဒီးပှၤကိးဂၤဒဲးလၢအအိၣ်ဖဲန့ၣ်လီၤ. ဝံၤဒီး, ပှၤလၢအကဆှီဝဲ ဒ်တၢ်ဘူၣ်တၢ်ဘါအလုၢ်အလၢ်အသိးတဂၤန့ၣ် ကဘၣ်ဖှံထံန့ၣ်လၢပှၤတဂၤ လၢအထိးဘၣ်ပှၤကညီအဃံမ့ၢ်ဂ့ၤ, ပှၤသံစိၣ်မ့ၢ်ဂ့ၤ, တၢ်သွၣ်ခိၣ်တခါမ့ၢ်ဂ့ၤအဖီခိၣ်န့ၣ်လီၤ.

¹⁹လၢသၢသီတသီဒီးနွံသီတသီန့ၣ် ပှၤတဂၤလၢအကဆှီ ဝဲဒ်တၢ်ဘူၣ်တၢ်ဘါအလုၢ်အလၢ်အသိးန့ၣ်ကဘၣ်ဖှံ ထံမၤကဆှီတၢ်လၢပှၤတကဆှီဘၣ်တဂၤအဖီခိၣ်လီၤ. လၢနွံသီတသီဖဲမုၢ်လီၤနုာ်န့ၣ်အဝဲဒၣ်ကဘၣ်မၤကဆှီပှၤ တဂၤန့ၣ်, ပှၤတဂၤလၢအဆှုၣ်အတၢ်ကူတၢ်သိးတဖၣ်ဒီး လူလီၤအသးလၢထံလၢအကစၢ်ဒၣ်ဝဲအလိၤဝံၤအလီၢ်ခံကဲ ထီၣ်က့ၤပှၤလၢအကဆှီလံဒ်တၢ်ဘူၣ်တၢ်ဘါအလုၢ်အလၢ်အသိး န့ၣ်လီၤ.

²⁰ပှၤတဂၤလၢ်လၢ်လၢအကဲထီၣ်တၢ်တကဆှီဘၣ်ဒ်တၢ်ဘူၣ်တၢ်ဘါ အလုၢ်အလၢ်အသိးမ့ၢ်တမၤကဆှီဘၣ်အသးဒၣ်ဝဲန့ၣ်ကမ့ၢ်ဒံးဒၣ်တၢ် တကဆှီဘၣ်, မ့ၢ်လၢထံမၤကဆှီတၢ်န့ၣ်တဘၣ်တၢ်လူလီၤ အီၤလၢအဖီခိၣ်ဒံးဘၣ်အဃိလီၤ. အဝဲမၤဘၣ်အၢယွၤအဒဲစီဆှံဒီးတဘၣ်တၢ်ပာ်လၢၤအီၤဒ်ပှၤတဂၤ လၢယွၤအပှၤဂီၢ်မုၢ်အကျါနီတစုလၢၤဘၣ်န့ၣ်လီၤ.

²¹သုကဘၣ်တိၢ်န့ၢ်တၢ်သိၣ်တၢ်ဘျၢအံၤအစိၤစိၤအဃၣ်ဃၣ်လီၤ. ပှၤတဂၤလၢအဖှံထံမၤကဆှီတၢ်န့ၣ်ကဘၣ်ဆှုၣ်စ့ၢ်ကီး အတၢ်ကူတၢ်သိးတဖၣ်လီၤ. ပှၤတဂၤလၢ်လၢ်လၢအထိးဘၣ်ထံမၤကဆှီ တၢ်လၢအအိၣ်တ့ၢ်ဒံးန့ၣ်ကကဲထီၣ်တၢ်တကဆှီဘၣ်တုၤမုၢ်ဟါလီၤ အကတီၢ်န့ၣ်လီၤ.

²²တၢ်တမံၤလၢ်လၢ်လၢပှၤတကဆှီဘၣ်တဂၤထိးဘၣ်ဝဲန့ၣ်ကဲထီၣ်တၢ် တကဆှီဘၣ်ဒီးပှၤတဂၤလၢ်လၢ်လၢအထိးဘၣ်တၢ်န့ၣ်ကဲထီၣ်တၢ် တကဆှီဘၣ်တုၤမုၢ်ဟါအကတီၢ်န့ၣ်လီၤ.