Read S'gaw Karen လံာ်မံကၤ 7 Bible Online

လံာ်မံကၤ 7 - S'gaw Karen bible

လံာ်မံကၤ 7

¹တၢ်မုၢ်လၢ်တအိၣ်လၢၤဘၣ်. ယလီၤဂာ်ဒ်ပှၤလီၤဒိတဂၤလၢတထံၣ်န့ၢ်ဘၣ်သ့ၣ်သၣ်နီတဖျၢၣ်လၢ သ့ၣ်တဖၣ်အလိၤဒီးစပံးသၣ်နီတဖျၢၣ်လၢစပံးမုၢ်အလိၤအသိးန့ၣ် လီၤ. ကယဲၢ်စပံးသၣ်ခဲလၢာ်ဒီးချၢၣ်ဒၢသၣ်လၢအဝံၣ်တဖၣ်ဘၣ်တၢ်ဒဲး ကွံာ်အီၤခဲလၢာ်လံ.

²ပှၤသူၣ်လိၤသးဘျၢတဂၤဒၣ်လဲာ်တအိၣ်လၢၤဘၣ် လၢကီၢ်ပူၤဘၣ်. ပှၤတတီဒီးယွၤနီတဂၤဘၣ်. ပှၤကိးဂၤအိၣ်ခိးဝဲတၢ်ခွဲးတၢ်ယာ်လၢကမၤသံမၤဝီတၢ်လီၤ. ပှၤကိးဂၤဒဲးလူၤဃုဖီၣ်န့ၢ်အထံဖိကီၢ်ဖိကဒဲကဒဲလီၤ.

³အဝဲသ့ၣ်ခဲလၢာ်မ့ၢ်ပှၤစဲၣ်နီးလၢတၢ်မၤတၢ်အၢန့ၣ်လီၤ. ပဒိၣ်ဖးဒိၣ်တဖၣ်ဒီးပှၤစံၣ်ညီၣ်ကွီၢ်တဖၣ်ဃ့ခိၣ်ဖးလာ် ဆှိးတဖၣ်လီၤ. ပှၤဟံးစိဟံးကမီၤတဲဘၣ်အဝဲသ့ၣ်တၢ်လၢအသးလီဝဲသတးဒီးအဝဲ သ့ၣ်ကူၣ်ထီၣ်သကိးတၢ်အၢလီၤ.

⁴ပှၤအဂ့ၤကတၢၢ်ဒီးပှၤအသူၣ်လိၤသးဘျၢကတၢၢ်လၢအဝဲသ့ၣ်အကျါဒၣ် လဲာ်အလုၢ်အပှ့ၤတအိၣ်ဘၣ်ဒ်သိးဒၣ်နီၣ်ဧိၤမံၤဧိၤတဖၣ်လီၤ. မုၢ်နံၤလၢကစၢ်ယွၤကစံၣ်ညီၣ်အပှၤဂီၢ်မုၢ်ဒ်အဟ့ၣ်ပလီၢ်ပာ်တ့ၢ် ဝဲခီဖျိအပှၤပၢၤတၢ်, ဝံတဖၣ်န့ၣ်ဟဲတုၤဝဲလံ. ခဲကနံၣ်အံၤအဝဲသ့ၣ်အိၣ်လၢတၢ်သဘံၣ်ဘုၣ်အပူၤလီၤ.

⁵နာ်ပှၤအိၣ်လၢနဃၢၤမ့တမ့ၢ်သန့ၤနသးလၢနတံၤသကိးတဂ့ၤ. ပလီၢ်နသးလၢတၢ်လၢနစံးဘၣ်နမါဒၣ်လဲာ်တက့ၢ်. လၢဆၢကတီၢ်တဖၣ်အံၤအပူၤ, ဖိခွါတဖၣ်မၤအပၢ်တဖၣ်ဒ်ပှၤဟးဂီၤ ဖိတဖၣ်အသိး,

⁶ဖိမုၣ်တဖၣ်ထီဒါက့ၤအမိၢ်တဖၣ်, ပိာ်မုၣ်သးစၢ်တဖၣ်အ့ၣ်လိာ် အသးဒီးမံၤပှၢ်ပိာ်မုၣ်တဖၣ်လီၤ. ပှၤတဂၤအဒုၣ်အဒါတဖၣ်မ့ၢ်အဟံၣ်ဖိဃီဖိဒၣ်ဝဲတဖၣ်လီၤ.

⁷မ့မ့ၢ်ယဲဒၣ်အံၤယကအိၣ်ခိးကွၢ်လၢ်ယွၤ, ယကအိၣ်ခိးကစၢ်ယွၤလၢ အကအုၣ်က့ၤခီၣ်က့ၤယၤလၢတၢ်သူၣ်ဂၢၢ်သးကျၢၤအပူၤလီၤ. ယကစၢ်ယွၤကနၢ်ဟူယကလုၢ်လီၤ.

⁸တၢ်ဂ့ၢ်တအိၣ်ဘၣ်နီတမံၤလၢပဒုၣ်ပဒါတဖၣ်ကသးခုခူသူၣ်လၢ ပဖီခိၣ်ဘၣ်. ပလီၤဃံၤတ့ၢ်လံ. ဘၣ်ဆၣ်ဒီးပကဂဲၤထၢၣ်က့ၤကဒီးလီၤ. ခဲအံၤပအိၣ်လၢတၢ်ခံးကျါဘၣ်ဆၣ်ဒီးယွၤကဟ့ၣ်ပှၤတၢ်ကပီၤလီၤ.

⁹ပမၤတ့ၢ်တၢ်ဒဲးဘးထီဒါယွၤလီၤ. မၤသးဒ်န့ၣ်ဒီးခဲကနံၣ်အံၤပကဘၣ်တူၢ်အတၢ်သးဒိၣ်တစိၢ်တလီၢ် လီၤ. ဘၣ်ဆၣ်လၢခံကတၢၢ်န့ၣ်အဝဲဒၣ်ကလိာ်န့ၢ်ပကွီၢ်ဒီးမၤတၢ် စံၣ်ညီၣ်တီလၢပဂီၢ်လီၤ. အဝဲကဒုးဟဲထီၣ်ပှၤဆူတၢ်ကပီၤအပူၤ, ဒီးပကအိၣ်မူဒ်သိးပကထံၣ်ဘၣ်အတၢ်အုၣ်က့ၤခီၣ်က့ၤပှၤလီၤ.

¹⁰တုၤနုၤတစုပဒုၣ်ပဒါတဖၣ်, ပှၤတဖုဃီလၢအဒုၣ်ဒွဲၣ် တ့ၢ်ပှၤဒီးစံး, “သုယွၤ, သုကစၢ်ယွၤအိၣ်ဖဲလဲၣ်” န့ၣ်, ကသ့ၣ်ညါနၢ်ပၢၢ်တၢ်အံၤဒီးကဘၣ်တၢ်မၤမဲာ်ဆှးအီၤလီၤ. ပကထံၣ်ဘၣ်အဝဲသ့ၣ်ဃၣ်ကွံာ်ဒီးဘၣ်တၢ်ယီၢ်တံၢ်လီၤအီၤဒ်ကပံာ်လၢ ကျဲမုၢ်တဖၣ်အပူၤအန့ၣ်သိးလီၤ.

¹¹ဝ့ၢ်ယရူၤၡလ့ၣ်အပှၤဂီၢ်မုၢ်ဧၢ, အကတီၢ်ကတုၤဝဲလၢတၢ်ကဘှီထီၣ် ကဒါက့ၤသုဝ့ၢ်ခိၣ်ဒူတဖၣ်လီၤ. ဖဲန့ၣ်အကတီၢ်သုထံဆၢကီၢ်ဆၢတဖၣ်ကဘၣ်တၢ်မၤလဲၢ်ထီၣ်အီၤလီၤ.

¹²သုပှၤဂီၢ်မုၢ်လၢတၢ်လီၢ်ကိးပူၤဒဲးကဟဲက့ၤဆူသုအိၣ်, လၢမုၢ်ထီၣ်တခီကဟဲက့ၤလၢကီၢ်အၤၡူၢ်, လၢကလံၤထံးတခီ လၢကီၢ်အဲၤကူပတူး, လၢထံကျိဖရၤသးအကီၢ်အဃၢၤ, ဒီးလၢပီၣ်လဲၣ်အယံၤတဖၣ်ဒီးလၢ ကစၢၢ်ကလိဖးယံၤတဖၣ်လီၤ.

¹³မ့မ့ၢ်ဟီၣ်ခိၣ်အလီၢ်အိၣ်လီၤတဲာ်တဖၣ်န့ၣ်ကကဲထီၣ်ပှၢ်မုၢ်ကနၢ လၢပှၤအိၣ်ဝဲဆိးဝဲလၢအပူၤတဖၣ်အတၢ်အၢတၢ်သီအဃိလီၤ.

¹⁴ယွၤဧၢ, မ့ၢ်နဲပှၤကွၢ်သိတဂၤလၢနပှၤဂီၢ်မုၢ်, ပှၤဂီၢ်မုၢ်လၢနဃုထၢအီၤအဂီၢ်တက့ၢ်. မ့ၢ်အိၣ်ဒၣ်ဝဲလၢပှၢ်မုၢ်ကနၢသနာ်က့ဟီၣ်ခိၣ်ညၣ်ထ့ၣ်ဂ့ၤ အကီၢ်တဖၣ်အိၣ်ဝးတရံးအီၤလီၤ. မ်အလဲၤဒီးအီၣ်တၢ်လၢကီၢ်ဘၤၡၣ်ဒီးကီၢ်ကံးလဧးအအီၣ်ဆၣ်လီၢ် လါဟ့တဖၣ်အပူၤဒ်အဝဲသ့ၣ်မၤတ့ၢ်လၢပျၢၤအသိးန့ၣ်တက့ၢ်.

¹⁵ယွၤဧၢ, မၤတၢ်လီၤလးတဖၣ်လၢပဂီၢ်ဒ်နမၤတ့ၢ်နဲဖဲမုၢ်နံၤတဖၣ် လၢနထုးထီၣ်ကွံာ်ပှၤလၢကီၢ်အဲၤကူပတူးအပူၤအသိးန့ၣ်တက့ၢ်.

¹⁶ပှၤကလုာ်တဖၣ်ကထံၣ်တၢ်အံၤဒီးလၢအတၢ်ဂံၢ်ဆူၣ်ဘါဆူၣ်အပူၤဒၣ် လဲာ်အသးကဘၣ်တံာ်တာ်လီၤ. လၢတၢ်သးဟးဂီၤအပူၤန့ၣ်ကကးတံာ်ဃးအထးခိၣ်တဖၣ်ဒီးမၤဘၢ အနၢ်တဖၣ်လီၤ.

¹⁷အဝဲသ့ၣ်ကစွါဝဲလၢဖၣ်ကမူၣ်အကျါဒ်ဂုၢ်တဖၣ်အသိး, ကဟဲထီၣ်လၢအတိာ်ဧိၤတာ်ဧိၤတဖၣ်အပူၤလၢတၢ် ကနိးကစုာ်ဒီးတၢ်ပျံၤတၢ်ဖုးအပူၤလီၤ. အဝဲသ့ၣ်ကဃၣ်အသးဆူ ယွၤ, ပကစၢ်ယွၤအအိၣ်လၢတၢ်ပျံၤတၢ်ဖုးအပူၤလီၤ.

¹⁸ယွၤဧၢ, ကစၢ်လၢအဒ်သိးဒီးနၤတအိၣ်ဘၣ်နီတဂၤဘၣ်. နပျၢ်ကွံာ်နပှၤဂီၢ်မုၢ်လၢအအိၣ်မူတ့ၢ်တဖၣ်အတၢ်ဒဲးဘးတဖၣ်လီၤ. နသးတဒိၣ်တထံၣ်ဃီဘၣ်. မ့မ့ၢ်နသးမုာ်လၢတၢ်ဒုးနဲၣ်ပှၤနတၢ်အဲၣ်တပယူာ်ဃီန့ၣ်လီၤ.

¹⁹နကသူၣ်ကညီၤသးကညီၤဒံးကဒီးပှၤတဘျီလီၤ. နကယီၢ်တံၢ်ပတၢ်ဒဲးဘးတဖၣ်လၢနခီၣ်အဖီလာ်ဒီးကွံာ်လီၤကွံာ် အီၤဆူပီၣ်လဲၣ်အခံဒးလီၤ.

²⁰နကဒုးနဲၣ်နတၢ်သးတီဒီးတၢ်အဲၣ်တပယူာ်ဃီဆူနပှၤဂီၢ်မုၢ်, စီၤအၤဘြၣ်ဟၣ်ဒီးစီၤယၤကိာ်အစၢၤအသွဲၣ်တဖၣ်, ဒ်နအၢၣ်လီၤတ့ၢ်တၢ်ဒီးပမိၢ်ပၢ်ဖံဖုသ့ၣ်လၢပျၢၤလံၤလံၤအသိး န့ၣ်လီၤ.