Read S'gaw Karen လံာ်စဖါနယၤ 3 Bible Online

လံာ်စဖါနယၤ 3 - S'gaw Karen bible

လံာ်စဖါနယၤ 3

¹ဝ့ၢ်ယရူၤၡလ့ၣ်လၢအတတီတတြၢ်, ပူထီၣ်လီထီၣ်ဒီးမၤနးမၤဖှီၣ်အပှၤဂီၢ်မုၢ်ဒၣ်ဝဲန့ၣ်ဘၣ်တၢ် စံၣ်ညီၣ်ဃါမနၤလီၤ.

²တဒိကနၣ်တ့ၢ်ဘၣ်ယွၤမ့ၢ်ဂ့ၤ, တတူၢ်လိာ်တ့ၢ် အတၢ်သိၣ်တၢ်ဘျၢမ့ၢ်ဂ့ၤန့ၣ်ဘၣ်. တပာ်ဘၣ်အတၢ်နာ်လၢယွၤမ့ၢ်ဂ့ၤ, ဃ့အတၢ်မၤစၢၤမ့ၢ်ဂ့ၤန့ၣ်ဘၣ်.

³အပဒိၣ်ဖးဒိၣ်တဖၣ်လီၤဂာ်ဒ်ခ့ယုၢ် တဖၣ်လၢအကညီၤတၢ်အသိး, အပှၤစံၣ်ညီၣ်ကွီၢ်တဖၣ်လီၤ ဂာ်ဒ်ထွံၣ်မံၤတဖၣ်လၢအသူၣ်ဝံၤသၣ်စ့ၤဒီးသူၣ်လီသးကွံတၢ် အါတုၤအတပာ်တ့ၢ်တၢ်ဃံတဘိဒၣ်လဲာ်တုၤလၢမုၢ်ဂီၤ အကတီၢ်ဘၣ်အသိးန့ၣ်လီၤ.

⁴အဝံတဖၣ်တမၤအမူအဒါဘၣ်ဒီးအသူၣ်တလိၤ အသးတဘျၢဘၣ်န့ၣ်လီၤ. အပှၤလုၢ်တၢ်အခိၣ်သ့ၣ် တဖၣ်မၤဘၣ်အၢဘၣ်သီတၢ်လၢအစီအဆှံဒီးဝံၢ်ကဒံကဒါကစၢ် ယွၤအတၢ်သိၣ်တၢ်သီလၢအဝဲသ့ၣ်အတၢ်ဘၣ်ဘျုးဒၣ်ဝဲအဂီၢ်လီၤ.

⁵ဘၣ်ဆၣ်ယွၤအိၣ်ဒံးဝဲလၢဝ့ၢ်ပူၤ, မၤတၢ်လၢအဘၣ်ဒီးတၢ်လၢအကမၣ်န့ၣ်တမၤဝဲနီတစုဘၣ်. အဝဲဟဲစိာ်တၢ်တီတၢ်လိၤဆူအပှၤဂီၢ်မုၢ်အအိၣ်ကိးမုၢ်ဂီၤဒဲး ဒီးတလီၤတဲာ်တူာ်ဘၣ်. အန့ၣ်ဒၣ်လဲာ်ပှၤတတီတလိၤမၤဒံးတၢ် ကမၣ်ဒီးအမဲာ်တဆှးဘၣ်ဝဲဘၣ်.

⁶ယွၤစံးဝဲဒၣ်, “ယတြူာ်ပျီကွံာ်လံပှၤကလုာ်ခဲလၢာ်, ယမၤဟးဂီၤကွံာ်လံအဝ့ၢ်တဖၣ်ဒီးယပာ်တီၢ်အဝ့ၢ်ခိၣ်ဒူဒီး အတၢးထီၣ်ထီတဖၣ်လၢတၢ်ဟးဂူာ်ဟးဂီၤအပူၤန့ၣ်လီၤ. ဝ့ၢ်တဖၣ်အိၣ်တ့ၢ်သယုၢ်ဝဲ, ကျဲတဖၣ်လီၤဟိဝဲဒီးပှၤ တအိၣ်တီၢ်နီတဂၤဘၣ်.

⁷ယဆိကမိၣ်တ့ၢ်လၢတုၤတၢ်မၤအသးဒ်န့ၣ်ဒီးယပှၤဂီၢ်မုၢ် ကပာ်ကဲယၤဒီးတူၢ်လိာ်ယတၢ်သိၣ်တၢ်ဘျၢဒ်သိးအသု တသးပ့ၤနီၣ်တၢ်မၤလိလၢယသိၣ်လိအဝဲသ့ၣ်လ့ၤတက့ၤန့ၣ်လီၤ. ဘၣ်ဆၣ်ဒီးလၢတၢ်စွံကတုၤအပူၤမၤဒံးတၢ်ဒဲးဘးဒ်လၢညါ အသိးန့ၣ်လီၤ.”

⁸ယွၤစံးဝဲဒၣ်, “အိၣ်ခိး, ခိးတုၤမုၢ်တနံၤလၢယဂဲၤဆၢထၢၣ် အုၣ်ယသးထီဒါပှၤကလုာ်တဖၣ်န့ၣ်တက့ၢ်. ယပာ်လီၤယသးလၢယကပာ်ဖှိၣ်ပှၤကလုာ်တဖၣ်ဒီးဘီမုၢ် တဖၣ်ဒ်သိးယကပျဲအဝဲသ့ၣ်ကလၢၢ်ဘၣ်ယတၢ်သးထီၣ် အသဟီၣ်လီၤ. ဟီၣ်ခိၣ်ဒီဘ့ၣ်ကဘၣ်တၢ်မၤဟးဂီၤကွံာ်အီၤလၢယတၢ်သးကဲၤထီၣ် အမ့ၣ်အူန့ၣ်လီၤ.

⁹အန့ၣ်တစု, ယကလဲလိာ်ကွံာ်ပှၤကလုာ်တဖၣ်အပှၤဂီၢ်မုၢ်, ဒီးအဝဲသ့ၣ်ကဃ့ထီၣ်တၢ်ထဲဆူယၤတဂၤလီၤ. ဒီးဆူကစၢ်အဂၤတဖၣ်အအိၣ်န့ၣ်တဃ့လၢၤတၢ်ဘၣ်န့ၣ်လီၤ. အဝဲသ့ၣ်ခဲလၢာ်ကစူၢ်ယၤလီၤ.

¹⁰ဒီးယပှၤဂီၢ်မုၢ်လၢအအိၣ်လီၤပြံလီၤပြါ လၢကီၢ်အယံၤဒ်ကီၢ်ကူၤၡးဒၣ်လဲာ်န့ၣ်ကဟဲစိာ်တၢ်လုၢ်တၢ်ပာ်တဖၣ် ဆူယအိၣ်န့ၣ်လီၤ.

¹¹ဒီးလၢအကတီၢ်အဝဲန့ၣ်, သုဝဲယပှၤဂီၢ်မုၢ်အံၤ သုမဲာ်ဆှးလၢသုပူထီၣ်ထီဒါတ့ၢ်ယၤအဃိအလီၢ်တအိၣ်လၢၤဘၣ်. ယကသုးကွံာ်ပှၤကိးဂၤဒဲးလၢအသးထီၣ်ထီဒီးအပာ် ကဖိအသးတဖၣ်ဒီးသုတပူထီၣ် ထီဒါကဒီးယၤလၢယကစၢၢ်စီဆှံအလိၤနီတစုလၢၤဘၣ်န့ၣ်လီၤ.

¹²ဒီးဖဲန့ၣ်ယကပာ်တီၢ်တ့ၢ်ပှၤလၢအသးစူၤဒီးဆီၣ်လီၤအသးလၢ အကဟဲဆူယအိၣ်လၢတၢ်မၤစၢၤအဂီၢ်န့ၣ်လီၤ.

¹³အံၣ်စရ့လးအပှၤဂီၢ်မုၢ်လၢအအိၣ်မူတ့ၢ်တဖၣ်တမၤ ကမၣ်လၢၤဘၣ်ပှၤနီတဂၤ, တကတိၤလီတၢ်နီတမံၤမ့ၢ်ဂ့ၤ, တကျဲးစၢးလွဲန့ၢ်ပှၤနီတဂၤမ့ၢ်ဂ့ၤဘၣ်န့ၣ်လီၤ. အဝဲသ့ၣ်ကအီၣ်ကုးအီပှဲၤဒီးအိၣ်မုာ်ဆိးပၢၤဒီးတဘၣ် ပျံၤပှၤနီတဂၤဘၣ်န့ၣ်လီၤ.”

¹⁴အံၣ်စရ့လးအပှၤဂီၢ်မုၢ်ဧၢ, သးဝံၣ်ဒီးကိးထီၣ်လၢတၢ်သူၣ်ဖှံသးညီ အပူၤတက့ၢ်. ဝ့ၢ်ယရူၤၡလ့ၣ်အပှၤဂီၢ်မုၢ်ဧၢ, သူၣ်ခုသးခုလၢနသးဒီဖျၢၣ်ညါန့ၣ်တက့ၢ်.

¹⁵ယွၤဆိကတီၢ်ကွံာ်တၢ်စံၣ်ညီၣ်လၢသုဂီၢ်, အဝဲသုးကွံာ်ကယဲၢ်သုဒုၣ်သုဒါခဲလၢာ်န့ၣ်လံ. ယွၤ, အံၣ်စရ့လးအစီၤပၤအိၣ်ဒီးသု, ဒီးခဲအံၤတၢ်ဂ့ၢ်တအိၣ်လၢၤနီတမံၤ လၢသုကဘၣ်ပျံၤတၢ်ဖုးတၢ်န့ၣ်ဘၣ်.

¹⁶တၢ်ဆၢကတီၢ်သုးဘူးအသးဖဲအဝဲသ့ၣ်ကစံးဘၣ်ဝ့ၢ်ယရူၤၡလ့ၣ်, “ပျံၤတၢ်တဂ့ၤ, ဝ့ၢ်စံယိၣ်ဧၢ, ပျဲနစုတဖၣ်လီၤစၢ်လီၤဘျ့တဂ့ၤ.

¹⁷ယွၤ, နကစၢ်ယွၤန့ၣ်အိၣ်ဒီးနၤလီၤ. အစိအကမီၤဟ့ၣ်နၤတၢ်မၤနၢၤလီၤ. ယွၤကသးခုလၢနဃိ ဒီးလၢအတၢ်အဲၣ်အဝဲကဟ့ၣ်နၤတၢ်အိၣ်မူအသီလီၤ. အဝဲကသးဝံၣ်တၢ်ဒီးသူၣ်ဖှံနသးညီလၢနဃိ,

¹⁸ဒ်ပှၤဂီၢ်မုၢ်လၢအသူၣ်ဖှံသးညီဖဲမူးဖးဒိၣ်တဘျီအသိးန့ၣ် လီၤ.” ယွၤစံးဝဲဒၣ်, “ယမၤကတၢၢ်ကွံာ်တၢ်စံၣ်ညီၣ်ဃါမနၤလၢ အမၤပျံၤမၤဖုးတၢ် ဒီးစိာ်ကွံာ်လံနတၢ်မဲာ်ဆှးန့ၣ်လံ.

¹⁹ကွၢ်ကွၢ်, အကတီၢ်ဖဲန့ၣ် ယကစံၣ်ညီၣ်ပှၤမၤအၢမၤနးနၤတဖၣ်, ယကအုၣ်က့ၤခီၣ်က့ၤကယဲၢ်ပှၤခီၣ်ဟးဂီၤ, ဒီးဟဲက့ၤစိာ်ပှၤဘၣ်တၢ်စိာ်မၢကဲကုၢ်အီၤ တဖၣ်ဆူဟံၣ်န့ၣ်လီၤ. ယကလဲလိာ်ကွံာ်အတၢ်မဲာ်ဆှးဆူတၢ်လၤတၢ်ကပီၤ, ဒီးကယဲၢ်ပှၤဟီၣ်ခိၣ်ဖိခဲလၢာ်ကစံးထီၣ်ပတြၢၤ အဝဲသ့ၣ်လီၤ.

²⁰တၢ်ဆၢကတီၢ်သုးဘူးအသးလံ. ယကဟဲက့ၤစိာ်သုပှၤဂီၢ်မုၢ်လီၤပြံလီၤပြါဆူဟံၣ်, ယကမၤဟူထီၣ်သါလီၤသုမံၤလၢဟီၣ်ခိၣ်ဒီဘ့ၣ်ညါ ဒီးဒုးအီၣ်ကုးအီပှဲၤကဒီးသုတဘျီန့ၣ်လီၤ.”