Read S'gaw Karen လံာ်ဃးကဲ 2 Bible Online

လံာ်ဃးကဲ 2 - S'gaw Karen bible

လံာ်ဃးကဲ 2

¹လၢနံၣ်တနံၣ်ဃီ, လါနွံလါတလါထီၣ်ခံဆံတသီအနံၤန့ၣ်, ယွၤကတိၤကဒီးတၢ်ခီဖျိဝံဃးကဲလီၤ.

²အဝဲစံးဘၣ်တ့ၢ်စီၤဃးကဲလၢကကတိၤတၢ်ဒီးကီၢ်ယူဒၤအပဒိၣ် ဖးဒိၣ်စီၤစရူၤဘၤဘ့လး, ပှၤလုၢ်တၢ်အခိၣ်အဒိၣ်ကတၢၢ်စီၤယိၤရူဒီးဆူပှၤဂီၢ်မုၢ်ဒီး ကဘၣ်စံးဘၣ်အဝဲသ့ၣ်,

³“မ့ၢ်ပှၤအိၣ်လၢသုကျါတဂၤဂၤလၢအသ့ၣ်နီၣ် ထီၣ်ဒံးတၢ်လုၢ်ဟံၣ်န့ၣ်အတၢ်ဃံဒိၣ်လၤဒိၣ်အိၣ်ဒ်လဲၣ်န့ၣ်ဧါ. ခဲအံၤသုကွၢ်အီၤမၤသးဒ်လဲၣ်. ကအိၣ်ဖျါဒ်တမ့ၢ်ဘၣ်တၢ်နီ တမံၤအသိးန့ၣ်လီၤ.

⁴ဘၣ်ဆၣ်ခဲအံၤသးဟးဂီၤနီတဂၤတဂ့ၤ. မၤတၢ်တက့ၢ်. အဂ့ၢ်ဒ်အံၤ, ယအိၣ်ဒီးသုလီၤ.

⁵ဖဲသုဟးထီၣ်ကွံာ်လၢကီၢ်အဲၤကူပတူးန့ၣ်, ယအၢၣ်လီၤအီလီၤတ့ၢ်လၢယကအိၣ်ဒီးသုထီဘိလီၤ. ယအိၣ်ဒံးဒီးသုအဃိဒီး, ပျံၤတၢ်တဂ့ၤ.

⁶တယံာ်ဘၣ်န့ၣ်, ယကမၤဟူးဝးမူခိၣ်ဒီးဟီၣ်ခိၣ်, ခိဒီးပီၣ်လဲၣ်လီၤ.

⁷ယကမၤနၢၤကွံာ်ပှၤကလုာ်ခဲလၢာ်, ဒီးအဝဲသ့ၣ်အတၢ်ထူးတၢ်တီၤတဖၣ်ကဘၣ်တၢ်ဟဲစိာ်အီၤဖဲအံၤ, ဒီးတၢ်လုၢ်ဟံၣ်န့ၣ်ကဘၣ်တၢ်မၤပှဲၤအီၤဒီးတၢ်ထူးတၢ်တီၤလီၤ.

⁸စ့ဒီးထူခဲလၢာ်လၢဟီၣ်ခိၣ်ဒီဘ့ၣ်ညါန့ၣ်, မ့ၢ်ယတၢ်လီၤ.

⁹တၢ်လုၢ်ဟံၣ်အသီန့ၣ်ကဃံဒိၣ်လၤဒိၣ်န့ၢ်ဒံးအလီၢ်လံၤတဖျၢၣ်, ဒီးဖဲန့ၣ်, ယကဟ့ၣ်ယပှၤဂီၢ်မုၢ်လၢတၢ်ဘီၣ်တၢ်ညီဒီးတၢ်ဃူ တၢ်ဖိးလီၤ.” ယွၤသ့တၢ်လၢာ်ကစၢ်ကတိၤတ့ၢ်တၢ်လံ.

¹⁰ဖဲစီၤဒၤရယါဝ့ၣ်ကဲစီၤပၤဖးဒိၣ်ခံနံၣ်တနံၣ်, လါခွံလါတလါထီၣ်ခံဆံလွံၢ်သီအနံၤန့ၣ်, ယွၤသ့တၢ်လၢာ်ကစၢ်ကတိၤတ့ၢ်ကဒီးတၢ်ဆူဝံဃးကဲလီၤ.

¹¹အဝဲစံးဝဲ, “သံကွၢ်ပှၤလုၢ်တၢ်အခိၣ်တဖၣ်လၢတၢ်သိၣ်တၢ်ဘျၢ တမံၤဘၣ်ထွဲဒီးတၢ်သံကွၢ်အံၤအဂ့ၢ်တက့ၢ်.

¹²ပစံးဒၣ်ကလိာ်, ပှၤတဂၤဂၤဟံးန့ၢ်တၢ်ညၣ်စီဆှံတလိၣ် လၢတၢ်လုၢ်တၢ်ပာ်တမံၤအကျါဒီးစိာ်ဝဲလၢအဆ့ကၤဒိၣ် အထၢၣ်တဖျၢၣ်အပူၤလီၤ. အဝဲမ့ၢ်ပျဲအဆ့ကၤဒိၣ်ထိးဘၣ်ကိၣ် တဖျၢၣ်ဖျၢၣ်, တၢ်အီၣ်လၢပှၤဖီဝံၤ, စပံးထံ, သ့ၣ်စၤယံးအသိ မ့တမ့ၢ်တၢ်အီၣ်ထီရီၤတမံၤမံၤဒီး, တၢ်န့ၣ်ကမၤစီဆှံထီၣ်ကွံာ်တၢ်အီၣ်န့ၣ်စ့ၢ်ကီးဧါ.” ဖဲတၢ်သံကွၢ်န့ၣ်ဘၣ်တၢ်သံကွၢ်အီၤဒီး ပှၤလုၢ်တၢ်အခိၣ်တဖၣ်စံးဆၢဝဲ, “တမ့ၢ်ဘၣ်.”

¹³ဒီးစီၤဃးကဲသံကွၢ်ဝဲ, “ပစံးဒၣ်ကလိာ်, ပှၤတဂၤကဲထီၣ်ကွံာ်ပှၤတကဆှီဘၣ်မ့ၢ်လၢအထိး ဘၣ်ပှၤသံစိၣ်တဂၤအဃိလီၤ. အဝဲမ့ၢ်ထိးဘၣ်တၢ်အီၣ်တဖၣ်အံၤတမံၤမံၤန့ၣ်, တၢ်န့ၣ်ကဒုးကဲထီၣ်တၢ်အီၣ်တဖၣ်န့ၣ်လၢတၢ်တကဆှီဘၣ်စ့ၢ်ကီးဧါ.” ပှၤလုၢ်တၢ်အခိၣ်တဖၣ်စံးဆၢဝဲ, “မ့ၢ်လီၤ.”

¹⁴အန့ၣ်ဒီးစီၤဃးကဲစံးဝဲ, “ယွၤစံးလၢတၢ်တမံၤဃီဒုးဘၣ်ဃးပှၤကလုာ်အံၤအပှၤဂီၢ်မုၢ် ဒီးတၢ်တမံၤလၢ်လၢ်လၢအဝဲသ့ၣ်ဟ့ၣ်ထီၣ်န့ၣ်လီၤ. သတးဒီးတၢ်တမံၤလၢ်လၢ်လၢအဝဲသ့ၣ်လုၢ်ထီၣ်အီၤလၢတၢ်လုၢ်လီၢ် အဖီခိၣ်န့ၣ်, မ့ၢ်တၢ်တကဆှီဘၣ်လီၤ.”

¹⁵ယွၤစံးဝဲ, “တၢ်မနုၤမၤတ့ၢ်အသးဒီးသုလဲၣ်န့ၣ်, သုထံၣ်တသ့ဘၣ်ဧါ. တချုးလၢသုစးထီၣ်ဘှီကဒါက့ၤတၢ်လုၢ်ဟံၣ်ဒံးဘၣ်န့ၣ်,

¹⁶သုကလဲၤတ့ၢ်ဆူဘုဧိၤဟုဧိၤပာ်ဖှိၣ်သးအလီၢ်တပူၤ ဒီးမုၢ်လၢ်ထံၣ်ဘၣ်တၢ်ဃီၣ်န့ၢ်, ခံဆံနာ်ဘၣ်ဆၣ်, ဖဲန့ၣ်ကအိၣ်ထဲတဆံ နာ်ဧိၤလီၤ. သုကလဲၤတ့ၢ်ဒ်သိးသုကဃီၣ်န့ၢ်စပံးထံလၢနီၣ်စံၢ်စပံးထံ အပူၤအခွးယဲၢ်ဆံဘၣ်ဆၣ်, ဖဲန့ၣ်ကအိၣ်ထဲခံဆံခွးဧိၤလီၤ.

¹⁷ယမၢလီၤတ့ၢ်ကလံၤကိၢ်တဖၣ်ဒီးသူၣ်, ဒ်သိးကမၤဟးဂီၤတၢ်တမံၤလၢ်လၢ်လၢသုကျဲးစၢးသူၣ်လီၤဖျး လီၤအီၤ, ဘၣ်ဆၣ်သုတပီၢ်ယၢ်လီၤက့ၤတ့ၢ်ဒံးသုသးဘၣ်.

¹⁸တနံၤအံၤမ့ၢ်လါခွံလါတလါထီၣ်ခံဆံလွံၢ်နံၤတနံၤ, မုၢ်တနံၤဖဲတၢ်လုၢ်ဟံၣ်အခီၣ်ထံးဘၣ်တၢ်ပာ်လီၤအီၤ ဝံၤဝဲန့ၣ်လီၤ. စးထီၣ်ခဲအံၤဒီးဆူညါတၢ်မနုၤကမၤအသးလဲၣ်န့ၣ်, ကွၢ်တက့ၢ်.

¹⁹ဘုဧိၤဟုဧိၤမ့ၢ်တအိၣ်တ့ၢ်လၢၤဘၣ်ဆၣ်, စပံးမုၢ်တဖၣ်, ချၢၣ်ဒၢအထူၣ်တဖၣ်, သ့ၣ်သလဲတဖၣ်ဒီးသ့ၣ်စၤယံးတဖၣ်မ့ၢ်တသၣ်ထီၣ်ဒံးဒၣ်လဲာ်, စးထီၣ်ခဲအံၤဒီးဆူညါန့ၣ်ယကဆိၣ်ဂ့ၤသုလီၤ.”

²⁰လၢလါထီၣ်ခံဆံလွံၢ်သီအနံၤ, တနံၤဃီန့ၣ်, ယွၤဟ့ၣ်တ့ၢ်စီၤဃးကဲလၢတၢ်ကစီၣ်ခံမံၤတမံၤ,

²¹လၢကီၢ်ယူဒၤအပဒိၣ်ဖးဒိၣ်စီၤစရူၤဘၤဘ့လးအဂီၢ်လီၤ. “ယကမၤဟူးမၤဝးမူခိၣ်ဒီးဟီၣ်ခိၣ်,

²²ဒီးမၤနၢၤကွံာ်ဘီမုၢ်တဖၣ်ဒီးမၤကတၢၢ်ကွံာ်အဝဲသ့ၣ်အစိအ ကမီၤလီၤ. ယကမၤလီၤတကျၢၢ်ကွံာ်လ့ၣ်ကဟၣ်သုးဒီးအပှၤနီၣ်တၢ်တဖၣ်, ကသ့ၣ်တဖၣ်ကသံဝဲ, ဒီးအပှၤဒိးအီၤတဖၣ်ကမၤသံလိာ်အသးတဂၤဒီး တဂၤလီၤ.

²³လၢမုၢ်နံၤအဝဲန့ၣ်, ယကဟံးန့ၢ်နၤ, ယခ့ယပှၤစီၤစရူၤဘၤဘ့လးဧၢ, ယကဃုထၢပာ်လီၤနၤဒ်သိးနကပၢတၢ်လၢယမံၤအပူၤလီၤ. နမ့ၢ်ပှၤတဂၤလၢယဃုထၢတ့ၢ်အီၤလံ.” ယွၤသ့တၢ်လၢာ်ကစၢ်စံးတ့ၢ်ဝဲ.