Read S'gaw Karen လံာ်စကၤရယၤ 10 Bible Online

လံာ်စကၤရယၤ 10 - S'gaw Karen bible

လံာ်စကၤရယၤ 10

¹ဃ့တၢ်စူၤထံလၢယွၤ, တၢ်စူၤထံလၢနံၣ်တနံၣ်န့ၣ်အတၢ်မဲထီၣ်အကတီၢ်အဂီၢ်တက့ၢ်. အဂ့ၢ်ဒ်အံၤ, ယွၤမ့ၢ်ပှၤလၢအဟ့ၣ်လီၤတၢ်စူၤအတၢ်အၢၣ်တဖၣ်ဒီးတၢ် စူၤအထံတဖၣ်လၢကဒုးလါဟ့ထီၣ်စံာ်ပျီတဖၣ်လၢပှၤကိးဂၤဒဲး အဂီၢ်န့ၣ်လီၤ.

²ပှၤဂီၢ်မုၢ်ဃ့တၢ်ဟ့ၣ်ကူၣ်လၢတၢ်ဂီၤတၢ်ဖီၣ်တဖၣ်ဒီးပှၤဖးတၢ် ဟဲဝံဟဲစိာ်တဖၣ်အအိၣ်ဘၣ်ဆၣ်ဒီးတၢ် စံးဆၢတဖၣ်လၢအမၤန့ၢ်ဝဲန့ၣ်မ့ၢ်ဒၣ်တၢ်ကဘျံးကဘျၣ် ဒီးတၢ်ကလီကလီလီၤ. ပှၤတနီၤဖးတၢ်မံမီၢ်တဖၣ်အခီပညီ, ဘၣ်ဆၣ်မ့ၢ်ဒၣ်တၢ်ဆှၢကမၣ်သုလီၤ. တၢ်မၤမုာ်ထီၣ်လၢအဝဲသ့ၣ်ဟ့ၣ်သုန့ၣ်မ့ၢ်ဒၣ်တၢ်ကလီကလီလီၤ. လၢတၢ်န့ၣ်အဃိပှၤဂီၢ်မုၢ်ဟးဝ့ၤဝီၤဒ်သိလၢအဟးဖျိးကျဲအသိးန့ၣ်လီၤ. အဝဲသ့ၣ်အိၣ်လၢတၢ်ကိၢ်တၢ်ဂီၤအပူၤမ့ၢ်လၢအခိၣ်အနၢ် တအိၣ်ဘၣ်နီတဂၤအဃိန့ၣ်လီၤ.

³ယွၤစံးဝဲဒၣ်, “ယသးဒိၣ်ထီၣ်ဘၣ်ပှၤတခီဘီမုၢ်ဖိတဖၣ်လၢအပၢ ယပှၤဂီၢ်မုၢ်, ဒီးယကစံၣ်ညီၣ်အဝဲသ့ၣ်လီၤ. ကီၢ်ယူဒၤအပှၤဂီၢ်မုၢ်တဖၣ်မ့ၢ်ယတၢ်, ဒီးယၤ, သ့တၢ်လၢာ်ယွၤကကွၢ်ထွဲကဟုကယာ်အဝဲသ့ၣ်လီၤ. အဝဲသ့ၣ်ကမ့ၢ်ယကသ့ၣ်ဒုးသုးတဖၣ်လၢအဂံၢ်ဆူၣ်ဘါဆူၣ်လီၤ.”

⁴လၢအဝဲသ့ၣ်အကျါန့ၣ်ပဒိၣ်ပပှၢ်တဖၣ်, ပှၤခိၣ်ပှၤနၢ်တဖၣ်, ဒီးသုးခိၣ်သုးနၢ်တဖၣ်ကအိၣ်ထီၣ်ဝဲလၢကပၢ ယပှၤဂီၢ်မုၢ်န့ၣ်လီၤ.

⁵ကီၢ်ယူဒၤအပှၤဂီၢ်မုၢ်ကမၤနၢၤတၢ်ဒ်ပှၤ သုးဖိတဖၣ်လၢယီၢ်တံၢ်လီၤအဒုၣ်အဒါတဖၣ် လၢကျဲဘိတဖၣ်အကပံၢ်အကျါအသိးန့ၣ်လီၤ. အဝဲသ့ၣ်ကဒုးတၢ်မ့ၢ်လၢကစၢ်ယွၤအိၣ်ဒီးအဝဲသ့ၣ်အဃိဒီးအဝဲ သ့ၣ်ကမၤနၢၤဒၣ်လဲာ်ဒုၣ်ဒါအပှၤဒိးကသ့ၣ်တဖၣ်န့ၣ်လီၤ.

⁶“ယကဒုးဂံၢ်ဆူၣ်ဘါဆူၣ်ကီၢ်ယူဒၤအပှၤဂီၢ်မုၢ်, ယကမၤပူၤမၤဖျဲးကီၢ်အံၣ်စရ့လးအပှၤဂီၢ်မုၢ်လီၤ. ယကအိၣ်ဒီးတၢ်သးကညီၤဘၣ်အဝဲသ့ၣ်, ဒီးဟဲက့ၤစိာ်ကဒါက့ၤအဝဲသ့ၣ်ခဲလၢာ်ဆူဟံၣ်လီၤ. အဝဲသ့ၣ်ကမၤအသးဒ်ပှၤလၢယတညိကွံာ်တ့ၢ်ဘၣ်အီၤနီတဘျီအသိး န့ၣ်လီၤ. ယမ့ၢ်ယွၤ, အဝဲသ့ၣ်အကစၢ်ယွၤ, ယကစံးဆၢအဝဲသ့ၣ်အတၢ်ထုကဖၣ်တဖၣ် လီၤ.

⁷ကီၢ်အံၣ်စရ့လးအပှၤဂီၢ်မုၢ်ကဂံၢ်ဆူၣ်ဘါဆူၣ်ထီၣ်ဒ် ပှၤသုးဖိတဖၣ်အသိး, ကသူၣ်ခုသးခုဒ်ပှၤတဖၣ်လၢအအီစပံးထံအသိးလီၤ. အဝဲသ့ၣ်အစၢၤအသွဲၣ်သ့ၣ်တဖၣ်ကသ့ၣ်နီၣ်ထီၣ် တၢ်မၤနၢၤအံၤ, ဒီးကသးခုဝဲလၢတၢ်လၢယွၤမၤတ့ၢ်ဝဲအဃိန့ၣ်လီၤ.

⁸ယကကိးယပှၤဂီၢ်မုၢ်, ဒီးပာ်ဖှိၣ်က့ၤအဝဲသ့ၣ်တပူၤဃီလီၤ. ယကမၤပူၤဖျဲးအဝဲသ့ၣ် ဒီးမၤအါထီၣ်ဂီၢ်ထီၣ်အဝဲသ့ၣ်ဒ်အညီနုၢ် အဝဲသ့ၣ်မ့ၢ်တ့ၢ်ဝဲအသိးန့ၣ်လီၤ.

⁹ယမ့ၢ်မၤလီၤပြံလီၤပြါတ့ၢ်အဝဲသ့ၣ်လၢ ပှၤကလုာ်ဂၤအကျါသနာ်က့, အဝဲသ့ၣ်ကသ့ၣ်နီၣ်ထီၣ်က့ၤယၤလၢ ထံယံၤကီၢ်ယံၤအပူၤဒၣ်လဲာ်လီၤ. အဝဲသ့ၣ်ဒီးအဝဲသ့ၣ်အဖိတဖၣ်ကအိၣ်မူတ့ၢ်ဒံးဝဲ ဒီးကဟဲက့ၤကဒါက့ၤသကိးဆူဟံၣ်တပူၤဃီလီၤ.

¹⁰ယကဟဲက့ၤစိာ်က့ၤအဝဲသ့ၣ်ဆူဟံၣ်လၢ ကီၢ်အဲၤကူပတူးဒီးကီၢ်အၤၡူၢ်, ဒီးဒုးအိၣ်ဒုးဆိးအဝဲသ့ၣ်လၢအထံအကီၢ် ဒၣ်ဝဲအပူၤန့ၣ်လီၤ. ယကဒုးအိၣ်ဒုးဆိးအဝဲသ့ၣ်လၢကီၢ်ကံးလဧး, ဒီးလၢကီၢ်လဘၤနိၣ်စ့ၢ်ကီး, ဒီးကီၢ်ဒီတဘ့ၣ်ညါကပှဲၤဝဲဒီးပှၤဂီၢ်မုၢ်န့ၣ်လီၤ.

¹¹ဖဲအဝဲသ့ၣ်ခီဂာ်အတၢ်ကီတၢ်ခဲအပီၣ်လဲၣ်န့ၣ်, ယဲဒၣ်, ယွၤ, ယကတီၢ်လပီတဖၣ် ဒီးထံကျိနံၤလါအတၢ်ယိာ်အထံကလီၤသံးကွံာ် ခဲလၢာ်လီၤ. ကီၢ်အၤၡူၢ်လၢအပာ်ထီၣ်ထီအသးန့ၣ် ကဘၣ်တၢ်ဆီၣ်လီၤကွံာ်အီၤ, ဒီးကီၢ်အဲၤကူပတူးလၢအဂံၢ်ဆူၣ်ဘါဆူၣ်အစိကမီၤကဟးဂီၤန့ၢ် အီၤလီၤ.

¹²ယကဒုးဂံၢ်ဆူၣ်ဘါဆူၣ်ထီၣ်ယပှၤဂီၢ်မုၢ်, ဒီးအဝဲသ့ၣ်ကဘါထီၣ်ယၤဒီးစူၢ်ယၤလီၤ,” ယွၤကတိၤလံတၢ်လံ.