Read S'gaw Karen လံာ်စကၤရယၤ 11 Bible Online

လံာ်စကၤရယၤ 11 - S'gaw Karen bible

လံာ်စကၤရယၤ 11

¹ကီၢ်လဘၤနိၣ်ဧၢ, အိးထီၣ်နတြဲၤတဖၣ်ဒ်သိးမ့ၣ်အူကအီၣ်ကွံာ်နသ့ၣ်ဆှိအ့ရ့း တဖၣ်တက့ၢ်.

²သ့ၣ်ဆှိသ့ၣ်ဧၢ, ဟီၣ်တၢ်ယၢၤတၢ်ဒီးဟီၣ်ပသူဟီၣ်ပသီတက့ၢ်. အဂ့ၢ်ဒ်အံၤ, သ့ၣ်ဆှိအ့ရ့းတဖၣ်လီၤဃံၤလံ ဒီးသ့ၣ်လၢအအိၣ်ဒီးအလၤကပီၤတဖၣ်န့ၣ် ဘၣ်တၢ်မၤဟးဂီၤကွံာ်အီၤလံ. ကီၢ်ဘၤၡၣ်အသ့ထိးဖၣ်သ့ၣ်ဧၢ, ဟီၣ်တၢ်ယၢၤတၢ်ဒီးဟီၣ်ပသူ ဟီၣ်ပသီတက့ၢ်. အဂ့ၢ်ဒ်အံၤ, သ့ၣ်ပှၢ်လၢအတီၣ်ဘၣ်တၢ်ကူာ်လီၤကွံာ်အီၤလံ.

³ပှၤပၢတၢ်တဖၣ်ဟီၣ်ပသူထီၣ်လၢတၢ်သးအုးအပူၤလီၤ. အဂ့ၢ်ဒ်အံၤ, အဝဲသ့ၣ်အလၤကပီၤလီၤမၢ်ကွံာ်လံ. ဒိကနၣ်ခ့ယုၢ်တဖၣ်အတၢ်ကညီၤထီၣ်န့ၣ်တက့ၢ်. အဂ့ၢ်ဒ်အံၤ, အဝဲသ့ၣ်အိၣ်ဆိးအလီၢ်လၢအအိၣ်ဝဲဖဲထံကျိ ယၣ်ဒ့ၣ်အသရ့ၤန့ၣ်ဘၣ်တၢ်မၤဟးဂီၤအီၤလံ.

⁴ယွၤ, ကစၢ်ယွၤစံးဘၣ်ယၤ, “မၤပှၤကွၢ်သိအတၢ်မၤလၢသိတဖၣ်လၢတၢ်ကမၤသံဒီးဆါအီၣ်အီၤ အဂီၢ်န့ၣ်တက့ၢ်.

⁵အဝဲသ့ၣ်အကစၢ်တဖၣ်မၤသံအဝဲသ့ၣ်, ဒီးတဘၣ်တၢ်စံၣ်ညီၣ်အီၤဘၣ်. အဝဲသ့ၣ်ဆါကွံာ်တၢ်ညၣ်ဒီးစံးဝဲ, စံးထီၣ်ပတြၢၤယွၤတက့ၢ်. ပထူးထီၣ်တီၤထီၣ်လံ. အပှၤကွၢ်သိတဖၣ်ဒၣ်လဲာ်တသးကညီၤဘၣ်အဝဲသ့ၣ်ဘၣ်.”

⁶(ယွၤစံးဝဲဒၣ်, “ယတသးကညီၤလၢၤဘၣ်ပှၤနီတဂၤလၢဟီၣ်ခိၣ်အံၤဘၣ်. ယကစၢ်ဒၣ်ယဲယကပာ်ပှၤဂီၢ်မုၢ်ခဲလၢာ်လၢအပှၤပၢတၢ်တဖၣ်အတၢ်စိတၢ် ကမီၤအပူၤလီၤ. ပှၤပၢတၢ်တဖၣ်န့ၣ်ကမၤဟးဂီၤကွံာ်ဟီၣ်ခိၣ်ဒိၣ်ဒိၣ်မုၢ်မုၢ်, ဒီးယတအုၣ်က့ၤခီၣ်က့ၤဘၣ်အီၤလၢအဝဲသ့ၣ်အတၢ်စိတၢ်ကမီၤအပူၤ ဘၣ်.”)

⁷ပှၤလၢအပှ့ၤဒီးဆါသိတဖၣ်, ဒိးလဲယၤဒီးယကဲထီၣ်ပှၤကွၢ်သိလၢ သိလၢကဘၣ်တၢ်မၤသံဆါအီၣ်အညၣ်တဖၣ်အဂီၢ်လီၤ. ဒီးယဟံးန့ၢ်နီၣ်ထိးဘိခံဘိ, တဘိန့ၣ်ယကိးအီၤလၢ “တၢ်ဘျုးတၢ်ဖှိၣ်,” ဒီးအဂၤတဘိန့ၣ်ယကိးအီၤလၢ “တၢ်ဃူတၢ်ဖိး,” ဒီးယကွၢ်သိတဖုန့ၣ်လီၤ.

⁸ပှၤကွၢ်သိအဂၤသၢဂၤလၢအသးဟ့ယၤန့ၣ်, ယဝံသးစူၤအီၤတကဲဘၣ်ဒီးလၢတလါဃီဧိၤအတီၢ်ပူၤ ယဒီၣ်တဲာ်ကွံာ်အဝဲသ့ၣ်လီၤ.

⁹အန့ၣ်ဝံၤဒီး, ယစံးဘၣ်သိတဖုန့ၣ်, “ယတမ့ၢ်သုပှၤကွၢ်သိ လၢၤဘၣ်. မ်ပှၤလၢအကသံန့ၣ်ကသံဒၣ်ဝဲတက့ၢ်. မ်ပှၤလၢအကဘၣ်တၢ်မၤဟးဂီၤကွံာ်အီၤန့ၣ် ကဘၣ်တၢ်မၤဟးဂီၤကွံာ်အီၤတက့ၢ်. ဒီးပှၤလၢအအိၣ်လီၤတဲာ်တ့ၢ်တဖၣ်န့ၣ်ကမၤဟးဂီၤလိာ်အသးတဂၤ ဒီးတဂၤလီၤ.”

¹⁰ဒီးယဟံးန့ၢ်နီၣ်ထိးဘိလၢအဘၣ်တၢ်ကိးအီၤလၢတၢ်ဘျုး တၢ်ဖှိၣ်ဒီးယမၤကၢ်ကွံာ်အီၤဒ်သိးယကတြူာ်ကွံာ်တၢ်အၢၣ်လီၤ အီလီၤလၢယွၤမၤတ့ၢ်ဝဲဒီးပှၤကလုာ်ခဲလၢာ်န့ၣ်လီၤ.

¹¹လၢတၢ်န့ၣ်အဃိတၢ်အၢၣ်လီၤအီလီၤဘၣ်တၢ်တြူာ်ကွံာ်အီၤဖဲမုၢ် တနံၤန့ၣ်လီၤ. ဒီးပှၤလၢအပှ့ၤဒီးဆါသိတဖၣ်န့ၣ်ကွၢ်ယၤ, ဒီးအဝဲသ့ၣ်သ့ၣ်ညါဝဲလၢယွၤကတိၤတၢ်ခီဖျိတၢ်လၢယမၤတ့ၢ်န့ၣ်လီၤ.

¹²ယစံးဘၣ်အဝဲသ့ၣ်, “သုသးမ့ၢ်အိၣ်ဒီးဟ့ၣ်ယၤယဘူးယလဲတက့ၢ်. ဘၣ်ဆၣ်သုသးမ့ၢ်တအိၣ်န့ၣ်, တဘၣ်ဟ့ၣ်ယၤတဂ့ၤ.” လၢတၢ်န့ၣ်အဃိအဝဲသ့ၣ်ဟ့ၣ်ယၤလၢစ့အဘ့ၣ်သၢဆံဒ်ယဘူးယလဲအသိး န့ၣ်လီၤ.

¹³ယွၤစံးဘၣ်ယၤ, “ဒၢနုာ်အီၤလၢတၢ်လုၢ်ဟံၣ်စ့ပာ်ဖှိၣ်အလီၢ်တက့ၢ်.” ဒီးယဟံးန့ၢ်စ့လီၤဘီလီၤမုၢ်အဘ့ၣ်သၢဆံလၢအဝဲသ့ၣ် ဆိကမိၣ်ဝဲဒ်အမ့ၢ်ယတၢ်ယကၢပှ့ၤကၢကလံၤန့ၣ်ဒီးဒၢနုာ် အီၤဆူတၢ်လုၢ်ဟံၣ်အစ့ပာ်ဖှိၣ်အလီၢ်လီၤ.

¹⁴အန့ၣ်ဝံၤဒီးယမၤကၢ်ကွံာ်နီၣ်ထိး ဘိခံဘိတဘိလၢအဘၣ်တၢ်ကိးအီၤလၢတၢ်ဃူတၢ်ဖိးလီၤ. ဒီးကီၢ်ယူဒၤဒီးကီၢ်အံၣ်စရ့လးအတၢ်ဃူတၢ်ဖိးန့ၣ်ဟးဂီၤ ကွံာ်ဝဲဒၣ်န့ၣ်လီၤ.

¹⁵ဒီးယွၤစံးဘၣ်ယၤ, “အအံၤတစုမၤပှၤကွၢ်သိလၢအတဂီာ်တသီၣ်တဂၤအတၢ်မၤတက့ၢ်.

¹⁶ယပာ်လီၤတ့ၢ်ပှၤကွၢ်သိတဂၤလၢကကွၢ်ယသိတဖၣ်လီၤ. ဘၣ်ဆၣ်အဝဲတမၤစၢၤသိလၢအဘၣ်တၢ်မၤပျံၤ အီၤလၢတၢ်ဟးဂီၤမ့ၢ်ဂ့ၤ, တဃုက့ၤသိလၢအဟါမၢ်မ့ၢ်ဂ့ၤ, တမၤဘျါက့ၤသိလၢအဘၣ်ဒိဘၣ်ထံးမ့ၢ်ဂ့ၤ, တဒုးအီၣ်သိလၢအအိၣ်ဆူၣ်အိၣ်ချ့အဆၣ်မ့ၢ်ဂ့ၤန့ၣ်ဘၣ်. အခိၣ်တလိာ်, အဝဲအီၣ်ကွံာ်သိလၢအဘီၣ်ကတၢၢ်အညၣ်ဒီးဖှီယာ်ကွံာ်အဝဲသ့ၣ် အခီၣ်မ့ၣ်တဖၣ်လီၤ.

¹⁷ပှၤကွၢ်သိလၢအတဂိာ်တသီၣ်အံၤဘၣ်တၢ်စံၣ်ညီၣ်ဃါမနၤလီၤ. အဝဲဒၣ်လဲၤသဒၣ်ကွံာ်အသိတဖုလီၤ. တၢ်ဒုးတၢ်ယၤကမၤဟးဂီၤကွံာ်အတၢ်စိတၢ်ကမီၤလီၤ. အစုဒုၣ်ကသံတခီပၤ, ဒီးအမဲာ်ချံထွဲကဘျီၣ်ကွံာ်ဝဲဒၣ်န့ၣ်လီၤ.”