Read S'gaw Karen လံာ်စကၤရယၤ 14 Bible Online

လံာ်စကၤရယၤ 14 - S'gaw Karen bible

လံာ်စကၤရယၤ 14

¹မုၢ်တနံၤလၢယွၤကစံၣ်ညီၣ်တၢ်န့ၣ်ဘူးထီၣ်လံ. အန့ၣ်ဒီးဝ့ၢ်ယရူၤၡလ့ၣ်ကဘၣ်တၢ်ဂုာ်ဆူၣ်ပျီဆူၣ်အီၤ, ဒီးတၢ်ဖိတၢ်လံၤလၢအဘၣ်တၢ်ဂုာ်ဆူၣ်ပျီဆူၣ် တဖၣ်န့ၣ်ကဘၣ်တၢ်နီၤဖးအီၤလၢသုမဲာ်ညါလီၤ.

²ယွၤကဒုးဟဲဖှိၣ်ပှၤကလုာ်ခဲလၢာ်လၢကဒုး တၢ်ထီဒါဝ့ၢ်ယရူၤၡလ့ၣ်န့ၣ်လီၤ. ဝ့ၢ်န့ၣ်ကဘၣ်တၢ်မၤန့ၢ်အီၤ, ဟံၣ်တဖၣ်ကဘၣ်တၢ်ဂုာ်ဆူၣ်ပျီဆူၣ်အီၤ, ဒီးပိာ်မုၣ်တဖၣ်ကဘၣ်တၢ်မၤဆူၣ်မၤစိးအီၤန့ၣ်လီၤ. ဒီးပှၤဂီၢ်မုၢ်တဝာ်န့ၣ်ကလဲၤလီၤဆူတၢ်စိာ်မၢကဲကုၢ်အလီၢ်, မ့မ့ၢ်ပှၤဂီၢ်မုၢ်လၢအအိၣ်လီၤတဲာ်န့ၣ်ကအိၣ်တ့ၢ်ဝဲဒၣ်ဖဲဝ့ၢ်ပူၤလီၤ.

³ဒီးယွၤကဟးထီၣ်ဒီးဒုးတၢ်ထီဒါပှၤကလုာ်တဖၣ်န့ၣ်, ဒ်အဝဲဒုးတ့ၢ်ဝဲလၢခါပူၤကွံာ်တဖၣ်အသိးန့ၣ်လီၤ.

⁴ဖဲအဆၢကတီၢ်အဝဲန့ၣ်န့ၣ်, အဝဲကဆၢထၢၣ်လၢကစၢၢ်သ့ၣ်စၤယံးအ လိၤ, လၢအအိၣ်ဝဲဒၣ်လၢဝ့ၢ်ယရူၤၡလ့ၣ်အမုၢ်ထီၣ်န့ၣ်လီၤ. အန့ၣ်ဒီး, ကစၢၢ်သ့ၣ်စၤယံးကသ့ၣ်ဖးကွံာ်ဝဲဒၣ်ခံခီလၢမုၢ်ထီၣ်ဒီးမုၢ်နုာ်, တၢ်တြီၤဖးဒိၣ်တပူၤကအိၣ်ထီၣ်ဝဲဒၣ်လီၤ. ကစၢၢ်တဝာ်န့ၣ်ကသုးအသးဆူကလံၤစိးတကပၤ, ဒီးအတဝာ်န့ၣ်ဆူကလံၤထံးလီၤ.

⁵သုကပူၤဖျဲးထီၣ်ခီဖျိတၢ်တြီၤဖးဒိၣ်အံၤလၢအနီၤဖးကစၢၢ်ခံခီန့ၣ်လီၤ. သုကဃ့ၢ်ထီၣ်ကွံာ်ဒ်သုမိၢ်ပၢ်ဖံဖုလၢပျၢၤတဖၣ်မၤတ့ၢ်ဝဲအသိး ဖဲဟီၣ်ခိၣ်ဟူးဝးမၤအသးလၢကီၢ်ယူဒၤအစီၤပၤဧူးစံယါအမုၢ်နံၤန့ၣ်လီၤ. ယွၤ, ကစၢ်ယွၤကဟဲဝဲ, ဒီးကဟဲကိးဃုာ်အကလူးတဖၣ်ခဲလၢာ်ဃုာ် ဒီးအီၤန့ၣ်လီၤ.

⁶ဖဲတၢ်ဆၢကတီၢ်အဝဲန့ၣ်တုၤဃီၤန့ၣ်, တၢ်ဂိၢ်တၢ်ခုၣ်မ့ၢ်ဂ့ၤ, ပစီၤထံလီၤသကၤမ့ၢ်ဂ့ၤ, တၢ်ခံးတၢ်နၤမ့ၢ်ဂ့ၤတအိၣ်လၢၤဘၣ်.

⁷ဖဲန့ၣ်တၢ်ကပီၤကအိၣ်ဝဲဒၣ်ထီဘိ, လၢမုၢ်နၤခီအဆၢကတီၢ်ဒၣ်လဲာ်န့ၣ်လီၤ. တၢ်အံၤကမၤအသးအခါဖဲလဲၣ်န့ၣ်ပှၤလၢအသ့ၣ်ညါမ့ၢ်ဒၣ်ထဲယွၤတဂၤ ဧိၤလီၤ.

⁸ဖဲမုၢ်နံၤအဝဲန့ၣ်တုၤဃီၤန့ၣ်, ထံမူကယွၤလီၤဝဲဒၣ်လၢဝ့ၢ်ယရူၤၡလ့ၣ်, တဝာ်န့ၣ်ကယွၤလီၤဆူပီၣ်လဲၣ်သံ, ဒီးအဂၤတဝာ်န့ၣ်ကယွၤလီၤဝဲဒၣ်ဆူပီၣ်လဲၣ်ဖးဒိၣ်မဲးထံးထၢၣ် ရ့နယၢၣ်န့ၣ်လီၤ. ထံမူအံၤကယွၤလီၤဝဲဒၣ်လၢဒီတနံၣ်ညါအတီၢ်ပူၤ, လၢတၢ်ယီၤအကတီၢ်ဒီးတၢ်စူၤအကတီၢ်စ့ၢ်ကီးန့ၣ်လီၤ.

⁹အန့ၣ်ဒီးယွၤကကဲထီၣ်စီၤပၤလၢဟီၣ်ခိၣ်ဒီဘ့ၣ်ညါအဖီခိၣ်, ဒီးပှၤကိးဂၤဒဲးကဘူၣ်ထီၣ်ဘါထီၣ်အီၤဒ်ကစၢ်ယွၤအသိးဒီး ကသ့ၣ်ညါအီၤလၢအမံၤတယုၢ်ဃီန့ၣ်လီၤ.

¹⁰လီၢ်ကဝီၤဒီတကဝီၤညါ, စးထီၣ်လၢဝ့ၢ်က့ဘၢ်လၢကလံၤစိး, ပၢၢ်လၢဝ့ၢ်ရံးမိၣ်လၢကလံၤထံးန့ၣ်ကဘၣ်တၢ်မၤပၢၤအီၤလီၤ. ဝ့ၢ်ယရူၤၡလ့ၣ်ကအိၣ်ထီၣ်ထီလၢတၢ်လီၢ်လၢအအိၣ်ဝးတရံးအီၤ တဖၣ်အဖီခိၣ်န့ၣ်လီၤ. ဝ့ၢ်န့ၣ်အိၣ်သူၣ်လီၤဒၣ်အသးဖဲအလီၢ်လီၢ်စးထီၣ်လၢဘံၣ် ယၤမံၣ်အတြဲၤဒီးတုၤဆူဝ့ၢ်သနၢၣ်အတြဲၤ, လၢအမ့ၢ်တြဲၤလၢအအိၣ်ပာ်တ့ၢ်လၢပျၢၤ, ဒီးစးထီၣ်လၢတၢးထီဃနၤန့လးဒီးတုၤဆူစီၤပၤအနီၣ်စံၣ် စပံးထံတဖၣ်အလီၢ်န့ၣ်လီၤ.

¹¹ပှၤဂီၢ်မုၢ်ကအိၣ်ကဆိးဖဲန့ၣ်လၢတၢ်ပူၤဖျဲး, ဒီးတဘၣ်တၢ်မၤပျံၤမၤဖုးလၢၤအီၤလၢတၢ်ဟးဂီၤဘၣ်.

¹²ယွၤကဒုးလီၤဘၣ်တၢ်ဆါလီၤပျံၤလီၤဖုးတမံၤဆူပှၤကလုာ်ခဲ လၢာ်လၢအဟဲဒုးတၢ်ဒီးဝ့ၢ်ယရူၤၡလ့ၣ်လီၤ. ဖဲအအိၣ်မူဒံးအဖၢမုၢ်ဒၣ်လဲာ်, အဝဲသ့ၣ်အဖံးအညၣ်ကအုၣ်သံကျၣ်သံ, ဒီးအမဲာ်ချံတဖၣ်ဒီးအပျ့ၤတဖၣ်ကအုၣ်ကကျၣ်ကွံာ်ဝဲဒၣ် န့ၣ်လီၤ.

¹³ဖဲအဆၢကတီၢ်အဝဲန့ၣ်န့ၣ်, ယွၤကမၤသဘံၣ်သဘုၣ်, ကဒံကဒါဒီးမၤပျံၤမၤဖုးအဝဲသ့ၣ်နးမးတုၤ ပှၤကိးဂၤဒဲးကဖီၣ်ဃာ်ပှၤလၢအဃၢၤအစု ဒီးထီဒါလိာ်အသးတဂၤဒီးတဂၤန့ၣ်လီၤ.

¹⁴ပှၤကီၢ်ယူဒၤဖိတဖၣ်ကဒုးတၢ်လၢတၢ်ဒီဒၣ်ကဟု ကယာ်က့ၤဝ့ၢ်ယရူၤရှလ့ၣ်အဂီၢ်လီၤ. အဝဲသ့ၣ်ကဟံးန့ၢ်ပှၤကလုာ်တဖၣ်အတၢ်ထူးတၢ်တီၤခဲလၢာ်လၢအမ့ၢ် ထူ, စ့ဒီးတၢ်ကူတၢ်သိးအါအါကလဲာ်ဒ်တၢ်ဂုာ်န့ၢ်ဆူၣ်အသိးန့ၣ် လီၤ.

¹⁵တၢ်ဆါလီၤပျံၤလီၤဖုးတမံၤကလီၤဘၣ်စ့ၢ်ကီးလၢကသ့ၣ်တဖၣ်, ကသ့ၣ်လၤတဖၣ်, ကီၤလၤအူးတဖၣ်ဒီးကသ့ၣ်ယီၤတဖၣ်, ဃုာ်ဒီးကယဲၢ်ဆၣ်ဖိကီၢ်ဖိခဲလၢာ်အလိၤ, လၢအအိၣ်ဝဲဒၣ်လၢဒုၣ်ဒါအသူၣ်ဒဲအလီၢ်တဖၣ်အပူၤန့ၣ်လီၤ.

¹⁶အန့ၣ်တစု, ကယဲၢ်ပှၤလၢအအိၣ်လီၤတဲာ်လၢပှၤကလုာ်ခဲလၢာ်လၢ အဟဲထီဒါဝ့ၢ်ယရူၤၡလ့ၣ်အကျါန့ၣ်, ကိးနံၣ်ဒဲးကလဲၤဆူ ဝ့ၢ်ယရူၤၡလ့ၣ်လၢတၢ်ဘူၣ်ထီၣ်ဘါထီၣ်သ့တၢ်လၢာ်အယွၤဒ်စီၤပၤ အသိးဒီးသ့ၣ်နီၣ်မၤလၤကပီၤဘူၣ်ဒဲအဂီၢ်န့ၣ်လီၤ.

¹⁷ပှၤတကလုာ်ဂ့ၤတကလုာ်ဂ့ၤ, မ့ၢ်ဂ့ၢ်လိာ်လၢကလဲၤဘူၣ်ထီၣ်ဘါထီၣ်သ့တၢ်လၢာ်အယွၤဒ်စီၤပၤ အသိးန့ၣ်, တၢ်တစူၤလီၤဘၣ်လၢအထံလီၢ်ကီၢ်ပူၤဘၣ်.

¹⁸ပှၤအဲၤကူပတူးဖိတဖၣ်မ့ၢ်ဂ့ၢ်လိာ်သ့ၣ်နီၣ်မၤလၤကပီၤဘူၣ်ဒဲန့ၣ်, ယွၤကဒုးလီၤဘၣ်တၢ်ဆါတမံၤဃီလၢအဝဲသ့ၣ်အလိၤ, ဒ်အဒုးလီၤဘၣ်ဝဲလၢပှၤကလုာ်ဂၤတဖၣ်လၢအဂ့ၢ်လိာ်လဲၤဘူၣ်ထီၣ် ဘါထီၣ်တၢ်အလိၤအသိးန့ၣ်လီၤ.

¹⁹တၢ်အံၤကမ့ၢ်တၢ်စံၣ်ညီၣ်လၢအကဘၣ်လၢကီၢ်အဲၤကူပတူးအလိၤဒီး လၢကယဲၢ်ပှၤကလုာ်အဂၤခဲလၢာ်အလိၤ, ဖဲအဝဲသ့ၣ်, တသ့ၣ်နီၣ်မၤလၤကပီၤဘူၣ်ဒဲဘၣ်န့ၣ်လီၤ.

²⁰ဖဲအဆၢကတီၢ်အဝဲန့ၣ်န့ၣ်, လၢကသ့ၣ်အကိာ်လိၤ, ပှ့ၤသၣ်အလိၤဒၣ်လဲာ်တၢ်ကကွဲးလီၤတၢ်ကတိၤလၢအစံးဝဲ, “ဘၣ်တၢ်ပာ်စီဆှံအီၤလၢယွၤအဂီၢ်လီၤ.” တၢ်တ့ၤတၢ်ဖီအသပၢၤတဖၣ်လၢတၢ်လုၢ်ဟံၣ်ပူၤန့ၣ်, ကစီဝဲဆှံဝဲဒ်သလၢတဖၣ်လၢတၢ်လုၢ်လီၢ်အမဲာ်ညါအသိးန့ၣ်လီၤ.

²¹ကယဲၢ်တၢ်တ့ၤတၢ်ဖီအသပၢၤတဖၣ်လၢဝ့ၢ်ယရူၤၡလ့ၣ် အပူၤဒီးလၢကီၢ်ယူဒၤအပူၤခဲလၢာ်ကဘၣ်တၢ်ပာ်စီဆှံအီၤ လၢတၢ်ကသူအီၤလၢတၢ်ဘူၣ်ထီၣ်ဘါထီၣ်သ့တၢ်လၢာ်အယွၤအဂီၢ်န့ၣ် လီၤ. ပှၤဂီၢ်မုၢ်လၢအဟဲစိာ်တၢ်လုၢ်တၢ်ပာ်တဖၣ်ကသူသပၢၤတဖၣ်န့ၣ်လၢ ကချီတၢ်လုၢ်တၢ်ပာ်အတၢ်ညၣ်အဂီၢ်လီၤ. ဖဲအဆၢကတီၢ် အဝဲန့ၣ်တုၤဃီၤန့ၣ်, လၢသ့တၢ်လၢာ်အယွၤအတၢ်လုၢ်ဟံၣ်အပူၤ, ပှၤကူၣ်တၢ်ကၤတၢ်တအိၣ်လၢၤဘၣ်ဝဲဘၣ်.