Read S'gaw Karen လံာ်စကၤရယၤ 2 Bible Online

လံာ်စကၤရယၤ 2 - S'gaw Karen bible

လံာ်စကၤရယၤ 2

¹လၢတၢ်ထံၣ်လၢညါခီအဂၤတမံၤအပူၤန့ၣ်, ယထံၣ်ဘၣ်ပှၤတဂၤလၢအအိၣ်ဒီးနီၣ်ထိၣ်ပျံၤတဘိလၢအစုပူၤလီၤ.

²ယသံကွၢ်အီၤ, “နကလဲၤဆူလဲၣ်.” အဝဲစံးဆၢဝဲ, “ယကလဲၤထိၣ်ဝ့ၢ်ယရူၤၡလ့ၣ် လၢယကသ့ၣ်ညါဝ့ၢ်အံၤထီဆံးအါဒီး လဲၢ်ဆံးဒိၣ်လဲၣ်အဂီၢ်န့ၣ်လီၤ.”

³အန့ၣ်ဝံၤဒီးယထံၣ်ကလူးလၢအကတိၤတ့ၢ်တၢ်ဒီးယၤဟးထီၣ်ဝဲ, ဒီးကလူးအဂၤတဂၤဟဲသဂၢၢ်အီၤလီၤ.

⁴ကလူးအခီၣ်ထံးတဂၤတဲဘၣ်အဂၤတဂၤ, “ဃ့ၢ်ဒီးလဲၤတဲဘၣ်ပှၤသးစၢ်လၢအအိၣ်ဒီးနီၣ်ထိၣ်ပျံၤန့ၣ် လၢပှၤဂီၢ်မုၢ်ဒီးဆၣ်ဖိကီၢ်ဖိကအိၣ်ဝဲဒၣ်လၢဝ့ၢ်ယရူၤၡလ့ၣ် အပူၤဂီၢ်မုၢ်ဂီၢ်ပၤတုၤဒၣ်လဲာ်ဝ့ၢ်န့ၣ်ကဒိၣ်ကဲာ်ဆိးလၢ ကအိၣ်ဒီးအခိၣ်ဒူတဖၣ်လီၤ.

⁵ယွၤအၢၣ်လီၤတ့ၢ်ဝဲလၢအကစၢ်ဒၣ်ဝဲကမ့ၢ်ဝ့ၢ်ခိၣ်ဒူမ့ၣ်အူ တခါလၢအအိၣ်ဝးတရံးဝ့ၢ်န့ၣ်လၢကအိၣ်ပှိၤဒီဒၣ် အီၤဒီးအဝဲကအိၣ်ဆိးဖဲန့ၣ်လၢအတၢ်လၤကပီၤခဲလၢာ်အပူၤန့ၣ်လီၤ.”

⁶ယွၤစံးဘၣ်အပှၤဂီၢ်မုၢ်, “ယမၤလီၤပြံလီၤပြါတ့ၢ်သုလၢမူ ပၤလွံၢ်ထံးန့ၣ်လီၤ.

⁷မ့မ့ၢ်ခဲအံၤ, သုဝဲပှၤလၢအဘၣ်တၢ်စိာ်မၢကဲကုၢ်သ့ၣ်ဧၢ, မၤပူၤမၤဖျဲးသုသးလၢကီၢ်ဘၤဘူၤလိၣ်ဒီးဟဲက့ၤက ဒါက့ၤဆူဝ့ၢ်ယရူၤၡလ့ၣ်တက့ၢ်.

⁸ပှၤတဂၤဂ့ၤတဂၤဂ့ၤလၢအတီၢ်သုန့ၣ်မ့ၢ်အတီၢ်တၢ်လၢ အလုၢ်ဒိၣ်ပှ့ၤဒိၣ်ကတၢၢ်လၢယဂီၢ်န့ၣ်လီၤ.” လၢတၢ်န့ၣ်အဃိယွၤသ့တၢ်လၢာ်မၢလီၤ ယၤအိၣ်ဒီးတၢ်ကစီၣ်အံၤလၢပှၤကလုာ်တဖၣ်လၢအဂုာ်ဆူၣ် ပျီဆူၣ်အပှၤဂီၢ်မုၢ်အဂီၢ်ဒ်အံၤ,

⁹“ယွၤအနီၢ်ကစၢ်ဒၣ်ဝဲကဒုးတၢ်ထီဒါသု, ဒီးသုကဘၣ်တၢ်ဂုာ်ဆူၣ်ပျီဆူၣ်သုလၢပှၤဂီၢ်မုၢ်, လၢတဘျီအမ့ၢ်တ့ၢ်သုခ့သုပှၤတဖၣ်န့ၣ်လီၤ.” ဖဲတၢ်အံၤမၤအသးန့ၣ်, ပှၤကိးဂၤဒဲးကသ့ၣ်ညါဝဲဒၣ်လၢယွၤသ့ တၢ်လၢာ်ဆှၢလီၤယၤန့ၣ်လီၤ.

¹⁰ယွၤစံးဝဲဒၣ်, “ဝ့ၢ်ယရူၤၡလ့ၣ်အပှၤဂီၢ်မုၢ်သ့ၣ်ဧၢ, သးဝံၣ်တၢ်လၢတၢ်သးခုအဃိတက့ၢ်. ယကဟဲအိၣ်ဆိးလၢသုသိးသုကျါလီၤ.”

¹¹ဖဲအဆၢကတီၢ်အဝဲန့ၣ်, ပှၤအါကလုာ်ကဟဲဆူယွၤအအိၣ်ဒီးကဲထီၣ်အပှၤဂီၢ်မုၢ်န့ၣ်လီၤ. အဝဲကအိၣ်ဆိးလၢသုကျါ, ဒီးသုကသ့ၣ်ညါလၢအဝဲမၢလီၤယၤဆူသုအိၣ်န့ၣ်လီၤ.

¹²ကီၢ်ယူဒၤကမ့ၢ်ကဒီးယွၤအတၢ်လီၢ်လီၤဆီလၢအကီၢ်စီဆှံအပူၤ, ဒီးဝ့ၢ်ယရူၤၡလ့ၣ်ကမ့ၢ်ဝ့ၢ်လၢအဝဲအဲၣ်ဝဲအဒိၣ်ကတၢၢ်လီၤ.

¹³ပှၤကိးဂၤဒဲးသ့ၣ်ဧၢ, အိၣ်ဘှီၣ်ကလာ်လၢယွၤအမဲာ်ညါတက့ၢ်. အဂ့ၢ်ဒ်အံၤ, အဝဲဟဲလၢအအိၣ်အဆိးအလီၢ်စီဆှံန့ၣ်လီၤ.