Read S'gaw Karen လံာ်စကၤရယၤ 4 Bible Online

လံာ်စကၤရယၤ 4 - S'gaw Karen bible

လံာ်စကၤရယၤ 4

¹ဒီးကလူးလၢအကတိၤတ့ၢ်တၢ်ဒီးယၤန့ၣ်ဟဲကဒီး, ဒီးထိၣ်ဂဲၤထီၣ်ယၤဒ်ပှၤလၢအမံဘၣ်အသးအသိးန့ၣ်လီၤ.

²အဝဲသံကွၢ်ယၤ, “နထံၣ်တၢ်မနုၤလဲၣ်.” ယစံးဆၢအီၤ, “မ့ၣ်အူဒၢအလီၢ်လၢအဘၣ်တၢ်မၤအီၤလၢထူဒီးသလၢလၢသိအဂီၢ် တဖျၢၣ်အိၣ်လၢအဖီခိၣ်လီၤ. လၢမ့ၣ်အူဒၢအလီၢ်အလိၤန့ၣ်မ့ၣ်အူဒၢဖိအိၣ်ဝဲဒၣ်နွံဖျၢၣ်, တဖျၢၣ်စုာ်စုာ်အိၣ်ဒီးမ့ၣ်အူဒၢအပှံာ်နွံဘိန့ၣ်လီၤ.

³သ့ၣ်စၤယံးခံထံးအိၣ်ဝဲဒၣ်လၢမ့ၣ်အူဒၢအလီၢ်အကပၤ, တထံးလၢစုထွဲတခီ, ဒီးတထံးလၢစုစ့ၣ်တခီန့ၣ်လီၤ.”

⁴အန့ၣ်ဒီးယသံကွၢ်ကလူး, “တၢ်ဒိၣ်ဧၢ, တၢ်သ့ၣ်တဖၣ်အံၤအခီ ပညီဒ်လဲၣ်.”

⁵အဝဲသံကွၢ်ယၤ, “နတသ့ၣ်ညါဘၣ်ဧါ.” ယစံးဆၢအီၤ, “ယတသ့ၣ်ညါဘၣ်. တၢ်ဒိၣ်ဧၢ.”

⁶ကလူးမၢယတဲဘၣ်စီၤစရူၤဘၤဘ့လးလၢယွၤ အတၢ်ကစီၣ်ဒ်အံၤ, “နကမၤနၢၤတၢ်, ဘၣ်ဆၣ်ဒီးတမ့ၢ်ဘၣ်လၢသုးမုၢ်သံၣ်ဘိအစိ ကမီၤဒီးနဂံၢ်နဘါဒၣ်နဲဘၣ်. မ့မ့ၢ်တခီမ့ၢ်လၢယသးလီၤ.

⁷တၢ်မၤတံာ်တၢ်တဖၣ်မ့ၢ်ဒိၣ်ထဲသိးကစၢၢ်တဖၣ်ဘၣ်ဆၣ် ကဟါမၢ်ကွံာ်လၢနမဲာ်ညါလီၤ. နကဘှီထီၣ်ကဒါက့ၤတၢ်လုၢ်ဟံၣ်, ဒီးဖဲနပာ်လီၤလၢၢ်လၢခံကတၢၢ်တဖျၢၣ်လၢအလီၢ်န့ၣ်, ပှၤဂီၢ်မုၢ်ကကိးထီၣ်ဝဲ, ဃံလၤမးလဲၣ်, ဃံလၤမးလဲၣ်န့ၣ် လီၤ.”

⁸ယွၤအတၢ်ကစီၣ်အဂၤတမံၤဟဲကဒီးဆူယအိၣ်လီၤ.

⁹အဝဲစံးဝဲဒၣ်, “စီၤစရူၤဘၤဘ့လးပာ်လီၤတၢ်လုၢ်ဟံၣ်အခီၣ်ထံးလံ. ဒီးအဝဲဒၣ်ကမၤဝံၤတၢ်သူၣ်ထီၣ်န့ၣ်လီၤ. ဖဲတၢ်အံၤမၤအသးန့ၣ်, ယပှၤဂီၢ်မုၢ်ကသ့ၣ်ညါလၢပှၤလၢအဆှၢလီၤအီၤဆူအဝဲသ့ၣ်အအိၣ်န့ၣ်, မ့ၢ်ယၤလီၤ.”

¹⁰အဝဲသ့ၣ်အသးဟးဂီၤဝဲမ့ၢ်လၢတၢ်လဲၤထီၣ်လဲၤထီမၤအသးထဲ တဆံးတက့ၢ်အဃိန့ၣ်လီၤ. ဘၣ်ဆၣ်ဒီးအဝဲသ့ၣ်ကထံၣ်ဘၣ်စီၤစရူၤဘၤ ဘ့လးဘှီထီၣ်ဒံးတၢ်လုၢ်ဟံၣ်န့ၣ်, ဒီးအဝဲသ့ၣ်ကသူၣ်ဖှံသးညီ ဝဲလီၤ. ကလူးန့ၣ်စံးဘၣ်ယၤ, “မ့ၣ်အူဒၢနွံဖျၢၣ်န့ၣ်မ့ၢ်ယွၤအမဲာ်ချံ နွံဖျၢၣ်လၢအထံၣ်တၢ်လၢဟီၣ်ခိၣ်ဒီဘ့ၣ်ညါန့ၣ်လီၤ.”

¹¹အန့ၣ်ဒီးယသံကွၢ်အီၤ, “သ့ၣ်စၤယံးခံထံးလၢအအိၣ်လၢမ့ၣ်အူဒၢအလီၢ်အကပၤစုာ်စုာ် န့ၣ်အခီပညီဒ်လဲၣ်.

¹²ဒီးသ့ၣ်စၤယံးအဒ့ခံဒ့လၢအအိၣ်ဝဲဒၣ် လၢထူအပီၤခံပီၤလၢအဒုးယွၤလီၤသ့ၣ်စၤယံးအသိအကပၤန့ၣ်, အခီပညီမ့ၢ်တၢ်မနုၤလဲၣ်.”

¹³အဝဲသံကွၢ်ယၤ, “နတသ့ၣ်ညါဘၣ်ဧါ.” ယစံးဆၢအီၤ, “တၢ်ဒိၣ်ဧၢ, ယတသ့ၣ်ညါဘၣ်.”

¹⁴တုၤနုၤတစုအဝဲစံးဝဲဒၣ်, “အဝဲသ့ၣ်တဖၣ်အံၤမ့ၢ်ပှၤခံဂၤလၢကစၢ်ယွၤဃုထၢတ့ၢ်လံအီၤ ဒီးဖှူတ့ၢ်လံအီၤလၢကမၤအဝဲဒၣ်, လၢအမ့ၢ်ဟီၣ်ခိၣ်ဒီဘ့ၣ်အယွၤ, အတၢ်န့ၣ်လီၤ.”