Read S'gaw Karen လံာ်စကၤရယၤ 9 Bible Online

လံာ်စကၤရယၤ 9 - S'gaw Karen bible

လံာ်စကၤရယၤ 9

¹အအံၤမ့ၢ်ယွၤအတၢ်ကစီၣ်လီၤ. အဝဲခါလီၤအကလုၢ်လၢတၢ်စံၣ်ညီၣ်ကီၢ်ဃၤဒြး, ဒီးဝ့ၢ်ဒၤမ့းစ့းအဂီၢ်လီၤ. တမ့ၢ်ထဲလၢကီၢ်အံၣ်စရ့လးအဒူၣ်တဖၣ်ဧိၤဘၣ် ဃးဒီးယွၤဘၣ်. မ့မ့ၢ်စူၤရံအဝ့ၢ်ခိၣ်ဘၣ်ဃးစ့ၢ်ကီးဒီးယွၤလီၤ.

²ဝ့ၢ်ဃမါသးလၢအအိၣ်သူၣ်လီၤအသးလၢကီၢ်ဃၤဒြးအကီၢ်အဆၢ, ဘၣ်ဃးစ့ၢ်ကီးဒီးအီၤ, ဒီးဝ့ၢ်ထါယၢၣ်ဒီးဝ့ၢ်စံဒိၣ်ဃုာ်ဒီး အတၢ်သ့တၢ်ဘၣ်ခဲလၢာ်န့ၣ်ဘၣ်ဃးစ့ၢ်ကီးဒီးယွၤလီၤ.

³ဝ့ၢ်ထါယၢၣ်ဘှီထီၣ်တိာ်တဖၣ်လၢအဂီၢ်ဒၣ်ဝဲဒီးပာ်ပူၣ်ထီၣ်စ့ဒီး ထူအါမးတလီၤဆီဘၣ်ဒီးတၢ်ကမူၣ်ကဖ့ဘၣ်လီၤ.

⁴ဘၣ်ဆၣ်ဒီးယွၤကစိာ်ကွံာ်တၢ်ခဲလၢာ်လၢအအိၣ်ဒီးအီၤန့ၣ်လီၤ. ဒီးအဝဲကတ့ၢ်လီၤကွံာ်ဝ့ၢ်န့ၣ်အတၢ်ထူးတၢ်တီၤဆူပီၣ်လဲၣ်ပူၤ, ဒီးမ့ၣ်အူကအီၣ်ကွံာ်ဝ့ၢ်န့ၣ်လီၤ.

⁵ဝ့ၢ်အၤၡကလိၣ်ကထံၣ်ဘၣ်တၢ်အံၤဒီးကပျံၤတၢ်လီၤ. ဝ့ၢ်ဂါစၤကထံၣ်ဘၣ်တၢ်အံၤဒီးကကနိးကစုာ်ဖးဒိၣ်လီၤ. ဒ်န့ၣ်အသိးဝ့ၢ်ဧ့ကြိၣ်ဒီးအတၢ်မုၢ်လၢ်တဖၣ်စ့ၢ်ကီးကဟးဂီၤဝဲလီၤ. ဝ့ၢ်ဂါစၤအစီၤပၤကလီၤမၢ်သဒၣ်အီၤဒီးဝ့ၢ်အၤၡကလိၣ်ကအိၣ်တ့ၢ် သယုၢ်သညိလီၤ.

⁶ပှၤအါကလုာ်ဃါဃုာ်သးအပှၤဂီၢ်မုၢ်ကအိၣ်ကဆိးလၢဝ့ၢ်အၤစဒိး အပူၤလီၤ. ယွၤစံးဝဲဒၣ်, “ယကဟီထီၣ်ကွံာ်ကယဲၢ်ပှၤဖလ့ၡသး ဖိလၢအပာ်ထီၣ်ထီအသးတဖၣ်အံၤခဲလၢာ်န့ၣ်လီၤ.

⁷အဝဲသ့ၣ်တအီၣ်လၢၤဘၣ်တၢ်ညၣ်လၢအအိၣ်ဒီးတၢ်သွံၣ်လၢအပူၤ မ့ၢ်ဂ့ၤ, တၢ်အီၣ်အဂၤလၢအဘၣ်တၢ်တြီၤအီၤမ့ၢ်ဂ့ၤန့ၣ်ဘၣ်. ကယဲၢ်ပှၤလၢအအိၣ်လီၤတဲာ်တ့ၢ်န့ၣ်ကကဲထီၣ်ပှၤတနီၤလၢ ယပှၤဂီၢ်မုၢ်အကျါဒီးကမ့ၢ်ဒ်ပှၤအဒူၣ်တဒူၣ်လၢကီၢ်ယူဒၤအပူၤ အသိးန့ၣ်လီၤ. ဒီးပှၤဧ့ကြိၣ်ဖိကကဲထီၣ်ပှၤတနီၤလၢယ ပှၤဂီၢ်မုၢ်အကျါဒ်ပှၤယဘူၣ်ဖိအသိးန့ၣ်လီၤ.

⁸ယကပၢၤဃာ်ယထံယကီၢ်ဒီးယတပျဲသုးမုၢ်တဖၣ်ဟဲခီဂာ်အီၤလၢၤဘၣ်. ယတပျဲပှၤပၢတၢ်အၢအၢသီသီဖဲအသးဒၣ်ဝဲတဖၣ် လၢကမၤနၢၤမၤပ့ၤယပှၤဂီၢ်မုၢ်နီတစုလၢၤဘၣ်. ယထံၣ်ဘၣ်တ့ၢ်လံယပှၤဂီၢ်မုၢ်တူၢ်ဘၣ်တ့ၢ်လံတၢ်ဒ်လဲၣ်န့ၣ်လီၤ.”

⁹ဝ့ၢ်စံယိၣ်အပှၤဂီၢ်မုၢ်သ့ၣ်ဧၢ, သူၣ်ဖှံသးညီဒီးသူၣ်ခုသးခုတက့ၢ်. ယရူၤၡလ့ၣ်အပှၤဂီၢ်မုၢ်သုဝဲသ့ၣ်ဧၢ, ကိးပသူထီၣ်လၢတၢ်သးခု အပူၤတက့ၢ်. ကွၢ်ကွၢ်, နစီၤပၤဟဲဆူနအိၣ်လံ. အဝဲဟဲဝဲအိၣ်ဒီးတၢ်သးခုအတၢ်မၤနၢၤ, ဒီးဒ်ပှၤလၢအမၤနၢၤတၢ်အသိးလီၤ. ဘၣ်ဆၣ်လၢတၢ်ဆီၣ်လီၤသးအပူၤ ဒိးကသ့ၣ်ယီၤတဒုလၢအမ့ၢ်, ကသ့ၣ်ယီၤသးစၢ်, ကသ့ၣ်ယီၤအဖိဒၣ်လဲာ်လီၤ.

¹⁰ဒီးယွၤစံးဝဲဒၣ်, ယကထုးကွံာ်လ့ၣ်ကဟၣ်ဒုးသုးတဖၣ်လၢ ကီၢ်အံၣ်စရ့လး, ဒီးဟံးန့ၢ်ကွံာ်ကသ့ၣ်တဖၣ်လၢဝ့ၢ်ယရူၤၡလ့ၣ်လီၤ. ချံၣ်တဖၣ်လၢအဘၣ်တၢ်သူအီၤ လၢတၢ်ဒုးတၢ်ယၤအပူၤန့ၣ်ကဘၣ်တၢ်မၤဟးဂီၤကွံာ်အီၤန့ၣ်လီၤ. နစီၤပၤကမၤတၢ်ဃူတၢ်ဖိးလၢပှၤကလုာ်တဖၣ်အကျါ, အဝဲကပၢတၢ်လၢပီၣ်လဲၣ်တုၤလၢပီၣ်လဲၣ်, စးထီၣ်လၢထံမိၢ်ပှၢ်ဖရၤသးဒီးတုၤလၢဟီၣ်ခိၣ်အကတၢၢ်လီၤ.”

¹¹ယွၤစံးဝဲဒၣ်, “မ့ၢ်လၢယတၢ်အၢၣ်လီၤအီလီၤလၢယမၤဒီးနၤ လၢအဘၣ်တၢ်စဲပနီၣ်ဃာ်အီၤ လၢတၢ်လုၢ်တဖၣ်အတၢ်သွံၣ်အဃိဒီး, ယကမၤထူၣ်ဖျဲးနပှၤဂီၢ်မုၢ်, ကထူၣ်ဖျဲးထီၣ်လၢတၢ်ကဲကုၢ်အတၢ်ယိာ်ပူၤ, ဖဲထံတအိၣ်ဘၣ်အလီၢ်န့ၣ်လီၤ.

¹²က့ၤကဒါက့ၤ, သုဝဲပှၤကဲကုၢ်ဖိလၢခဲအံၤ အိၣ်ဒီးတၢ်မုၢ်လၢ်သ့ၣ်ဧၢ, က့ၤကဒါက့ၤဆူ သုတၢ်ပူၤဖျဲးအလီၢ်န့ၣ်တက့ၢ်. ခဲကနံၣ်အံၤယစံးဘၣ်တဲဘၣ်သု, ယကဟ့ၣ်ကဒါက့ၤသုတၢ်ခံစး လၢအမ့ၢ်တၢ်ဆိၣ်ဂ့ၤလၢကယဲၢ်တၢ်လၢ သုတူၢ်ဘၣ်တ့ၢ်လံအဂီၢ်န့ၣ်လီၤ.

¹³ယကသူကီၢ်ယူဒၤဒ်ပှၤသုးဖိတဂၤအချံၣ်အသိးဒီး ကီၢ်အံၣ်စရလးဒ်ပျၢ်တဖၣ်အသိးန့ၣ်လီၤ. ယကသူဝ့ၢ်စံယိၣ်အပှၤကညီတဖၣ်ဒ်နးတဘ့ၣ်အသိးလၢ တၢ်ဒုးကီၢ်ကြံး(စ်) အပှၤကညီတဖၣ်အဂီၢ်န့ၣ်လီၤ.”

¹⁴ယွၤကအိၣ်ဖျါထီၣ်လၢအပှၤဂီၢ်မုၢ်အဖီခိၣ်, အဝဲကခးအပျၢ်တဖၣ်ဒ်အလီဝၢ်အဒံးအသိးန့ၣ်လီၤ. ယွၤပၢဘၣ်တၢ်ခဲလၢာ်ကစၢ်ကအူထီၣ်ကွဲၤ, ဒီးကလဲၤလၢကလံၤမုၢ်အပူၤလၢ ကလံၤထံးတခီန့ၣ်လီၤ.

¹⁵ယွၤသ့တၢ်လၢာ်ကစၢ်ကအိၣ်ပှိၤဒီဒၣ်အပှၤဂီၢ်မုၢ်, ဒီးအဝဲသ့ၣ်ကမၤဟးဂီၤကွံာ်အဒုၣ်အဒါတဖၣ်န့ၣ်လီၤ. အဝဲသ့ၣ်ကကိးပသူထီၣ်လၢတၢ်ဒုးအပူၤဒ်ပှၤအီမူၤသံးတဖၣ်အသိး, ဒီးကဒုးယွၤလီၤအဒုၣ်အဒါတဖၣ်အသွံၣ်လီၤ. အဒုၣ်အဒါတဖၣ်အသွံၣ်ကလီၤဂာ်ဒ်တၢ်လုၢ်တၢ်ပာ်တမံၤ အသွံၣ်လၢအဘၣ်တၢ်လူလီၤအီၤလၢသလၢတဖျၢၣ်အပူၤဆူတၢ်လုၢ် လီၢ်အဖီခိၣ်အသိးန့ၣ်လီၤ.

¹⁶ဖဲမုၢ်နံၤဝဲန့ၣ်တုၤဃီၤန့ၣ်, ယွၤကအုၣ်က့ၤခီၣ်က့ၤ အပှၤဂီၢ်မုၢ်, ဒ်ပှၤကွၢ်သိတဂၤအုၣ်က့ၤခီၣ်က့ၤအသိတဖုလၢ တၢ်အၢတၢ်သီအပူၤအသိးန့ၣ်လီၤ. အဝဲသ့ၣ်ကကပီၤထီၣ်လၢယွၤအထံအကီၢ်အပူၤ ဒ်ခိၣ်သလုးတဖျၢၣ်အတၢ်မျၢ်ပလဲတဖၣ် အသိးန့ၣ်လီၤ.

¹⁷ထံကီၢ်ကဂ့ၤဝဲဒီးကဃံဝဲလၤဝဲဆံးဒိၣ်လဲၣ်. အဘုဧိၤဟုဧိၤဒီးအစပံးထံကဒုးဒိၣ်ထီၣ် ဒီးဒုးဂံၢ်ဆူၣ်ဘါဆူၣ်ထီၣ်အပှၤသးစၢ်ပိာ်ခွါပိာ်မုၣ်တဖၣ်လီၤ.