Read S'gaw Karen လံာ်မၤလကံ 3 Bible Online

လံာ်မၤလကံ 3 - S'gaw Karen bible

လံာ်မၤလကံ 3

¹ယွၤသ့တၢ်လၢာ်စံးဆၢဝဲ, “ယကဆှၢလီၤယပှၤစိာ်တၢ်ကစီၣ်ဒ်သိးကကတဲာ်ကတီၤကျဲလၢယဂီၢ် လီၤ. တုၤနုၤတစု, ယွၤလၢသုဃုအီၤန့ၣ်ကဟဲသတူၢ်ကလာ်ဆူအတၢ်လုၢ် ဟံၣ်လီၤ. ပှၤစိာ်တၢ်ကစီၣ်လၢသုဆၢထံၣ်ဘၣ်အီၤန့ၣ်ကဟဲဒီးစံးဘၣ်တဲ ဘၣ်ယတၢ်အၢၣ်လီၤအီလီၤန့ၣ်လီၤ.”

²ဘၣ်ဆၣ်ဒီး, မုၢ်တနံၤလၢအဝဲဟဲန့ၣ်မ့ၢ်မတၤတူၢ်ကကဲန့ၣ်လဲၣ်. ဒီးတုၤအဝဲအိၣ်ဖျါထီၣ်န့ၣ်မ့ၢ်မတၤကပူၤဖျဲးန့ၣ်လဲၣ်. အဝဲကလီၤဂာ်ဒ်ပှၤဆှုၣ်တၢ်အချါသိမ့ၢ်ဂ့ၤ, ဒ်မ့ၣ်အူလၢအမၤကဆှီ, တိၢ်ဒီးထးတဖၣ်မ့ၢ်ဂ့ၤန့ၣ်လီၤ.

³ဒီးကဟဲဝဲဒ်သိးကစံၣ်ညီၣ်တၢ်လီၤဂာ်ဒီးပှၤတဂၤလၢအမၤ စီဒီးမၤကဆှီထီၣ်စ့န့ၣ်လီၤ. ဒ်ပှၤသိတၢ်ဖိတဂၤမၤကဆှီထီၣ်စ့ ဒီးထူအသိးန့ၣ်, ယွၤအပှၤစိာ်တၢ်ကစီၣ်ကမၤကဆှီထီၣ်ပှၤလုၢ်တၢ် အခိၣ်တဖၣ်, ဒ်သိးအဝဲသ့ၣ်ကဟဲစိာ်တၢ်လုၢ်လၢအဘၣ် ဆူယွၤအအိၣ်န့ၣ်လီၤ.

⁴တုၤနုၤတစု, တၢ်လုၢ်တဖၣ်လၢပှၤလၢကီၢ်ယူဒၤဒီးဝ့ၢ်ယရူၤၡလ့ၣ် ဟဲစိာ်ဆူယွၤအအိၣ်န့ၣ်, ကမ့ၢ်တၢ်လၢအဘၣ်အသးဒ်လၢညါ အသိးန့ၣ်လီၤ.

⁵ယွၤသ့တၢ်လၢာ်စံးဝဲ, “ယကလီၣ်ဖျါထီၣ်ယသးလၢသုကျါလၢယကစံၣ်ညီၣ်တၢ်, ဒီးယကအုၣ်ယသးတကီၢ်ခါထီဒါပှၤလၢအမၤကဒါပှၤမဲာ်, ထီဒါပှၤအဲၣ်ဘၢမါအဲၣ်ဘၢဝၤ, ထီဒါပှၤအုၣ်အသးကဘျံးကဘျၣ်, ပှၤလၢအလီန့ၢ်ပှၤမၤတၢ်ဖိလၢအဘူးအလဲတဖၣ်အပူၤ, ဒီးပှၤလၢအဟံးန့ၢ်တၢ်ခွဲးတၢ်ယာ်လၢပှၤမုၣ်ကမဲ, ပှၤဖိၣ်ဃဲတဖၣ်ဒီးပှၤတခီဘီမုၢ်ဖိတဖၣ် အဖီခိၣ်ဒီးထီဒါကယဲၢ်ပှၤလၢအတယူးယီၣ်ပာ်ကဲဘၣ်ယၤတဖၣ် န့ၣ်လီၤ.

⁶ဒီးယဲဒၣ်အံၤယမ့ၢ်ယွၤ, ဒီးယတကဒံကဒါဘၣ်. မၤသးဒ်န့ၣ်ဒီးသုဝဲ, ပှၤလၢအဟဲလီၤစၢၤလီၤသွဲၣ်လၢစီၤယၤကိာ်သ့ၣ်ဧၢ, သုတတုၤဘၣ်လၢတၢ်ဟးဂူာ်ဟးဂီၤဘၣ်.

⁷ဒ်သုမိၢ်ပၢ်ဖံဖုလၢပျၢၤလၢသုမဲာ်ညါသ့ၣ်တဖၣ်အသိး, သုဃၣ်ကွံာ်သုသးလၢယတၢ်သိၣ်တၢ်သီဒီးတတိၢ်န့ၢ်ဘၣ်အီၤဘၣ်. ဟဲက့ၤဆူယအိၣ်တက့ၢ်. ဒီးယကဟဲက့ၤဆူသုအိၣ်န့ၣ်လီၤ. ဘၣ်ဆၣ်သုသံကွၢ်, ‘ပကဟဲက့ၤကဒါက့ၤဒ်လဲၣ်.’

⁸ဒီးယသံကွၢ်သု, ပှၤတဂၤကလီကစၢ်ယွၤန့ၣ်, မ့ၢ်အဘၣ်ကစီဒီဧါ. တဘၣ်ဘၣ်. ဒီးအန့ၣ်ဒၣ်လဲာ်သုလီယၤလီၤ. ဒီးသုသံကွၢ်, ‘ပလီနၤဒ်လဲၣ်.’ လၢတၢ်ဆံဆဲၣ်ပူတပူဒီးတၢ်မၤဘူၣ်မၤတီၢ်တဖၣ်န့ၣ်လီၤ.

⁹တၢ်ဆိၣ်အၢအိၣ်လၢသုဝဲခဲလၢာ်အဖီခိၣ်မ့ၢ်လၢပှၤဒီကလုာ်လီ န့ၢ်ယၤအဃိလီၤ.

¹⁰ဟဲစိာ်သုတၢ်ဆံဆဲၣ်ပူတပူပှဲၤထီၣ်ပှဲၤထီဆူတၢ်လုၢ်ဟံၣ်, ဒ်သိးတၢ်အီၣ်တၢ်အီကအိၣ်အါအါဂီၢ်ဂီၢ်ဖဲန့ၣ်တက့ၢ်. မၤကွၢ်ယၤဒီးသုကထံၣ်ဘၣ်လၢယကအိးထီၣ်မူခိၣ်အပဲတြီ တဖၣ်ဒီးလူလီၤကယဲၢ်တၢ်ဂ့ၤခဲလၢာ်လၢသုဖီခိၣ်တုၤအပှဲၤ လုၣ်ကွံာ်ဒၣ်လဲာ်န့ၣ်လီၤ.

¹¹ယတပျဲတၢ်ဖိဃၢ်တဖၣ်မၤဟးဂီၤသုတၢ်မုၢ်တၢ်ဘိဘၣ်, ဒီးသုစပံးမုၢ်တဖၣ်အသၣ်တလီၤဆှုဘၣ်ဝဲဘၣ်.

¹²တုၤနုၤတစု, ကယဲၢ်ပှၤကလုာ်ခဲလၢာ်ကကိးသုလၢပှၤဘၣ်ဆိၣ်ဂ့ၤ, မ့ၢ်လၢသုထံသုကီၢ်ကမ့ၢ်တၢ်လီၢ် အမုာ်လၢတၢ်အိၣ်တၢ်ဆိးအဂီၢ်အဃိန့ၣ်လီၤ.”

¹³ယွၤစံးဝဲဒၣ်, “သုစံးတ့ၢ်လံတၢ်တဂ့ၤထီဒါယၤလီၤ.” ဘၣ်ဆၣ်ဒီးသုစံး “ပကတိၤတၢ်ထီဒါနၤလၢမနုၤလဲၣ်.”

¹⁴သုစံးတ့ၢ်သုဝဲ, “ပမၤယွၤအတၢ်န့ၣ်အဘျုးတအိၣ်ဘၣ်. တၢ်မၤထွဲတၢ်လၢအဝဲစံးမ့ၢ်ဂ့ၤ, ကျဲးစၢးပာ်ဖျါဆူယွၤသ့တၢ်လၢာ်လၢပသးအုးလၢတၢ်လၢပမၤဘၣ် တ့ၢ်အီၤအဃိန့ၣ်အဘျုးမနုၤကအိၣ်န့ၣ်လဲၣ်.

¹⁵ဒ်ပထံၣ်တ့ၢ်လံအသိးန့ၣ်, ပှၤလၢအပာ်ထီၣ်ထီအသးတဖၣ်န့ၣ်မ့ၢ်ပှၤ လၢအဘၣ်ဆိၣ်ဂ့ၤန့ၣ်လီၤ. ပှၤတတီတလိၤတဖၣ်တမ့ၢ်ထဲအဘီၣ် ထီၣ်ညီထီၣ်ဘၣ်. မ့မ့ၢ်, အဝဲသ့ၣ်မၤကွၢ်ကစၢ်ယွၤအတၢ်သးစူၤလၢအတၢ်မၤအအၢ အသီတဖၣ်ဒီးလူၤပိာ်ထွဲဝဲအခံန့ၣ်လီၤ.”

¹⁶တုၤနုၤတစု, ပှၤလၢအပျံၤယွၤန့ၣ်စံးလိာ်အသးတဂၤဒီးတဂၤ, ဒီးယွၤဒိကနၣ်, ဒီးနၢ်ဟူတၢ်လၢအဝဲသ့ၣ်စံးဝဲဒၣ်န့ၣ်လီၤ. လၢအဝဲအမဲာ်ညါန့ၣ်, တၢ်ကွဲးနီၣ်အိၣ်ကွဲးလီၤအသးလၢလံာ်တဘ့ၣ် အပူၤဘၣ်ထွဲဒီးပှၤလၢအပျံၤယွၤဒီးယူးယီၣ်ပာ်ကဲအီၤန့ၣ်လီၤ.

¹⁷ယွၤသ့တၢ်လၢာ်စံးဝဲ, “အဝဲသ့ၣ်ကမ့ၢ်ယပှၤဂီၢ်မုၢ်” န့ၣ်လီၤ. ဒီးမုၢ်တနံၤလၢယပာ်ဖှိၣ်ယတၢ်လုၢ်ဒိၣ်ပှ့ၤဒိၣ်န့ၣ်အဝဲသ့ၣ်ကကဲ ထီၣ်တၢ်လုၢ်ဒိၣ်ပှ့ၤဒိၣ်လၢယဂီၢ်လီၤ. ယကအိၣ်ဒီးတၢ်သးကညီၤအဝဲသ့ၣ်, ဒ်ပၢ်သးကညီၤအဖိခွါလၢအမၤအတၢ်အသိးန့ၣ်လီၤ.

¹⁸တုၤနုၤတစု, ယပှၤဂီၢ်မုၢ်ကထံၣ်ဘၣ်တၢ်လီၤဆီလၢအမၤအ သးလၢပှၤတီပှၤလိၤဒီးပှၤတတီတလိၤ, ပှၤလၢအမၤယတၢ်ဒီးပှၤလၢ အတမၤယတၢ်အဘၢၣ်စၢၤန့ၣ်လီၤ.”