Read S'gaw Karen လံာ်မးသဲ 10 Bible Online

လံာ်မးသဲ 10 - S'gaw Karen bible

လံာ်မးသဲ 10

¹ယ့ၣ်ၡူးကိးဖှိၣ်အပျဲၢ်အဘီၣ်တဆံခံဂၤဆူအအိၣ် ဒီးဟ့ၣ်လီၤအဝဲသ့ၣ်တၢ်စိတၢ်ကမီၤလၢကဟီထီၣ်ကွံာ်တၢ်နါတဖၣ် ဒီးလၢကမၤဘျါက့ၤတၢ်ဆူးတၢ်ဆါဒီးတၢ်က့တၢ်ကွဲၣ်ကိးမံၤဒဲး အဂီၢ်လီၤ.

²အအံၤမ့ၢ်ပှၤတၢ်မၢဖိတဆံခံဂၤအမံၤလီၤ. အဆိကတၢၢ် (စီၤၡံမိၣ်လၢအဘၣ်တၢ်ကိးစ့ၢ်ကီးအီၤလၢစီၤပ့းတရူး), ဝံၤအဒီပုၢ်ဝဲၢ်စီၤအၣ်ဒရ့း, စီၤစ့းဘ့းဒဲအဖိခွါစီၤယၤကိာ်ဒီး စီၤယိၤဟၣ်တဖၣ်,

³စီၤဖံလံးပူးဒီးစီၤဘၢ်သလီးမဲ, စီၤသိၤမါဒီးပှၤဃ့သွဲ ဖိစီၤမးသဲ, စီၤယၤကိာ်လၢအမ့ၢ်စီၤအၤလဖဲအဖိခွါ, ဒီးစီၤလ့းဘဲကိးဝဲအမံၤသီလၢစီၤသးဒဲ,

⁴ပှၤအဲၣ်အထံအကီၢ်စီၤၡံမိၣ်ဒီး စီၤယူဒၤအံၣ်စကၤရံၤအိာ်လၢ အဟ့ၣ်လီၤကွံာ်ယ့ၣ်ၡူးလီၤ.

⁵ယ့ၣ်ၡူးမၢလီၤတၢ်မၢဖိတဆံခံဂၤအံၤအိၣ်ဒီးတၢ်မၤလိာ်ထွဲ အဝဲသ့ၣ်ဒီးစံး, “သုတလဲၤဆူပှၤကလုာ်အဂၤတဖၣ်အအိၣ်တဂ့ၤ, ဒီးသုတလဲၤနုာ်ဆူ ပှၤၡၤမရံဖိအခူအဝ့ၢ်အပူၤတဂ့ၤ.

⁶မ့မ့ၢ်လဲၤသုဝဲဆူပှၤအံၣ်စရ့လးဖိလၢအမ့ၢ်သိလၢအဟါမၢ် တဖၣ်အအိၣ်န့ၣ်တက့ၢ်.

⁷လဲၤဒီးစံၣ်တဲၤတဲလီၤတၢ်ဒီးစံး, ‘မူခိၣ်အဘီအမုၢ်ဘူးထီၣ် လံ.’

⁸မၤဘျါပှၤဆူးပှၤဆါ, မၤမူထီၣ်က့ၤပှၤသံ, မၤကဆှီထီၣ်က့ၤပှၤလိၤတဂ့ၤတဖၣ်, ဒီးဟီထီၣ်ကွံာ်တၢ်နါတဖၣ်န့ၣ်တက့ၢ်. သုဒိးန့ၢ်ကလီလံတၢ်လံ, ဟ့ၣ်ကလီတၢ်သုဝဲတက့ၢ်.

⁹တဘၣ်စိာ်ထူမ့ၢ်ဂ့ၤ, စ့မ့ၢ်ဂ့ၤ, တိၢ်မ့ၢ်ဂ့ၤလၢယီၢ်တကိးအပူၤ တဂ့ၤ.

¹⁰လၢသုတၢ်လဲၤအဂီၢ်န့ၣ်, တဘၣ်စိာ်ထၢၣ်မ့ၢ်ဂ့ၤ, ဆ့ကၤအဂၤတဘ့ၣ်မ့ၢ်ဂ့ၤ, ခီၣ်ဖံးအဂၤတစူၣ်မ့ၢ်ဂ့ၤ, နီၣ်ထိးအဂၤတဘိမ့ၢ်ဂ့ၤန့ၣ်တဂ့ၤ. ပှၤမၤတၢ်ဖိန့ၣ်ကြၢးဘၣ်တၢ်ဟ့ၣ်အီၤလၢတၢ်လၢအလိၣ်ဘၣ်ဝဲတဖၣ် န့ၣ်လီၤ.

¹¹ဖဲသုလဲၤတုၤလၢဝ့ၢ်မ့တမ့ၢ်ဒူသဝီတဖျၢၣ်န့ၣ်, ဃုထံၣ်န့ၣ်ပှၤလၢအကြၢးဝဲဘၣ်ဝဲလၢအသးအိၣ်တူၢ်လိာ်သုတဂၤ ဒီးအိၣ်ဆိးသုဝဲဒီးအီၤတုၤသုဟးထီၣ်လၢတၢ်လီၢ်အဝဲန့ၣ်တက့ၢ်.

¹²ဖဲသုလဲၤနုာ်ဆူဟံၣ်တဖျၢၣ်အပူၤန့ၣ်စံးသုဝဲ, ‘မ်တၢ်ဃူတၢ်မုာ်အိၣ်ဒီးသုတက့ၢ်.’

¹³ပှၤမ့ၢ်တူၢ်လိာ်သုဒီးပျဲသုတၢ်ဃူတၢ်မုာ်တုၤအိၣ်အီၤတက့ၢ်. ဘၣ်ဆၣ်ဒီးမ့ၢ်တတူၢ်လိာ်သုဘၣ်ဒီး ပျဲသုတၢ်ဃူတၢ်မုာ်ဟဲက့ၤကဒါက့ၤဆူ သုအိၣ်တက့ၢ်.

¹⁴ဒီးဟံၣ်မ့တမ့ၢ်ဝ့ၢ်တဖျၢၣ်ဖျၢၣ်မ့ၢ်တတူၢ်လိာ်သု, မ့ၢ်တဒိကနၣ်သုတၢ်ကတိၤဘၣ်ဒီးတုၤသုဟးထီၣ်လၢဟံၣ်အဝဲန့ၣ်မ့ၢ်ဂ့ၤ, ဝ့ၢ်အဝဲန့ၣ်မ့ၢ်ဂ့ၤ, တြူၤလီၤကွံာ်ဟီၣ်ခိၣ်ကမူၣ်လၢ သုခီၣ်လိၤတက့ၢ်.

¹⁵နာ်ယၤတက့ၢ်. လၢမုၢ်စံၣ်ညီၣ်အနံၤန့ၣ်ကစၢ်ယွၤကပာ်ဖျါထီၣ်အတၢ်သး ကညီၤလၢပှၤအိၣ်လၢဝ့ၢ်စဒိၣ်ဒီးဂမိရၤတဖၣ်အဖီခိၣ်အါန့ၢ်ဒံး အကပာ်ဖျါဝဲလၢပှၤတဖၣ်လၢဝ့ၢ်အဝဲန့ၣ်အပူၤအဖီခိၣ်တက့ၢ်လီၤ.

¹⁶ကနၣ်တက့ၢ်. ယဆှၢလီၤသုဒ်သိအသိး ဆူထွံၣ်မံၤတဖၣ်အကျါလီၤ. လၢတၢ်န့ၣ်အဃိသုကဘၣ်ကူၣ်သ့ဒ်ဂုၢ် ဒီးတကူၣ်အၢဘၣ်တၢ်ဒ်ထိၣ်လွံၢ်အသိးလီၤ.

¹⁷ပလီၢ်သုသးတက့ၢ်. အဂ့ၢ်ဒ်အံၤ ပှၤကအိၣ်ဝဲတနီၤလၢကဖီၣ်န့ၢ်သု ဒီးဆှၢထီၣ်သုဆူတၢ်ဘူၣ်တၢ်ဘါခိၣ်နၢ်တဖၣ်အကီၣ်ကးဒီးပှၤတဖၣ် န့ၣ်ကတီၢ်သုလၢဘူၣ်ဘျီၣ်လၢအမ့ၢ်တၢ်ဘါလီၢ်တဖၣ်အပူၤလီၤ.

¹⁸လၢယဃိန့ၣ်သုကဘၣ်တၢ်မိၤထီၣ်သုဆူပဒိၣ်ပပှၢ်, စီၤလိၣ်စီၤပၤတဖၣ်အမဲာ်ညါလၢတၢ်သမံသမိးအဂီၢ်ဒ်သိးဒီး သုကတဲဘၣ်အဝဲသ့ၣ်ဒီးပှၤတခီဘီမုၢ်ဖိတဖၣ်လၢတၢ် သးခုအကစီၣ်အဂီၢ်န့ၣ်လီၤ.

¹⁹တုၤသုဘၣ်တၢ်သမံသမိးသုဒီးသုကဘၣ်စံးတၢ်မနုၤလဲၣ်, သုကဘၣ်စံးဆၢတၢ်ဒ်လဲၣ်န့ၣ်သုတဘၣ်ယိၣ်တဂ့ၤ. တၢ်ဆၢကတီၢ်မ့ၢ်ဘၣ်ဒီး ယွၤကဟ့ၣ်လီၤသုလၢ တၢ်စံးတၢ်ကတိၤလီၤ.

²⁰အဂ့ၢ်ဒ်အံၤ, တၢ်ကတိၤလၢသုကကတိၤန့ၣ်တမ့ၢ်သုတၢ်ကတိၤဒၣ်သုဝဲ ဘၣ်. မ့မ့ၢ်တၢ်ကတိၤတဖၣ်အံၤကမ့ၢ်သုပၢ်အသးစီဆှံကတိၤတၢ်ခီဖျိ သုလီၤ.

²¹ပှၤကဟ့ၣ်လီၤကွံာ်အဒီပုၢ်ဝဲၢ်ဒၣ်ဝဲဆူတၢ်သံ, ပၢ်တဖၣ်ကဟ့ၣ်လီၤကွံာ်အဖိတဖၣ်, ဖိတဖၣ်ကထီဒါက့ၤအမိၢ်အပၢ်တဖၣ်ဒီး ဟ့ၣ်လီၤကွံာ်အဝဲသ့ၣ်ဒ်သိးကဘၣ်တၢ်မၤသံအီၤအဂီၢ်လီၤ.

²²ပှၤကိးဂၤဒဲးကသးဟ့သုလၢယဃိ, ဘၣ်ဆၣ်ဒီးယွၤကအုၣ်က့ၤခီၣ် က့ၤပှၤလၢအတူၢ်တၢ်ကဲတုၤအကတၢၢ်န့ၣ်လီၤ.

²³တုၤပှၤမၤနးမၤဖှီၣ်သုလၢဝ့ၢ်တဖျၢၣ်အပူၤဒီးဃ့ၢ်ပူၤဖျဲးကွံာ်ဆူ ဝ့ၢ်အဂၤတဖျၢၣ်တက့ၢ်. နာ်ယၤတက့ၢ်. သုမၤတၢ်လၢအံၣ်စရ့လး အဝ့ၢ်တဖၣ်အပူၤတချုးသကုၤဒံးဘၣ်န့ၣ်, ပှၤကညီဖိခွါကဟဲဝဲလီၤ.

²⁴ပျဲၢ်တဒိၣ်န့ၢ်အသရၣ်နီတဂၤဘၣ်. ကုၢ်တဒိၣ်န့ၢ်အကစၢ်နီတဂၤဘၣ်.

²⁵လၢတၢ်န့ၣ်အဃိပျဲၢ်မ့ၢ်ဂ့ၤ, ကုၢ်မ့ၢ်ဂ့ၤ, ကြၢးသးမံဝဲဖဲအလီၤဂာ်ဒီးအသရၣ်မ့ၢ်ဂ့ၤ, အကစၢ်မ့ၢ်ဂ့ၤန့ၣ်လီၤ. ပှၤမ့ၢ်ကိးဟံၣ်အကစၢ်လၢ ဘဧၤလးစဘူာ်ဒီး, ကကိးအပှၤဟံၣ်ဖိဃီဖိအါန့ၢ်အန့ၣ်တက့ၢ်ဆံးဒိၣ်လဲၣ်.

²⁶လၢတၢ်န့ၣ်အဃိတဘၣ်ပျံၤပှၤတဖၣ်န့ၣ်တဂ့ၤ. အဂ့ၢ်ဒ်အံၤတၢ်လၢအဘၣ် တၢ်ကးဘၢအီၤလၢအတဘၣ်တၢ်မၤဖျါထီၣ်အီၤန့ၣ်, တအိၣ်ဘၣ်နီတမံၤဘၣ်. ဒီးတၢ်လၢအအိၣ်သဒၢတဖၣ်န့ၣ်, ကဘၣ်တၢ်လီၣ်ဖျါထီၣ်အီၤခဲလၢာ်လီၤ.

²⁷တၢ်လၢယတဲဘၣ်သုလၢတၢ်ခံးကျါန့ၣ်, သုကဘၣ်ကတိၤဖျါထီၣ်အီၤ လၢတၢ်ကပီၤအကျါဒီးတၢ်လၢသုနၢ်ဟူကသွံဒံန့ၣ်, သုကဘၣ်ကိးသတြီထီၣ်အီၤလၢဟံၣ်ခိၣ်အဖီခိၣ်ဒ်သိးပှၤဂၤကနၢ်ဟူ အဂီၢ်လီၤ.

²⁸တဘၣ်ပျံၤပှၤလၢအမၤသံပနီၢ်ခိဘၣ်ဆၣ်မၤသံပသးတသ့ဘၣ်န့ၣ်တဂ့ၤ. မ့မ့ၢ်ပျံၤကစၢ်ယွၤလၢအမၤဟးဂီၤပနီၢ်ခိဒီးပသးလၢလရာ် အပူၤသ့ဝဲတဂၤန့ၣ်တက့ၢ်.

²⁹ထိၣ်ဖှံးဖိခံဘ့ၣ်ဘၣ်တၢ်ဆါအီၤလၢတိၢ်တဘ့ၣ်တမ့ၢ်ဘၣ်ဧါ. ဘၣ်ဆၣ်မ့တမ့ၢ်ဘၣ်လၢသုပၢ်ဟ့ၣ်အခွဲးဘၣ်ဒီး, ထိၣ်ဖှံးဖိတဘ့ၣ်ဒၣ်လဲာ်တလီၤတဲာ်ဘၣ်ဆူဟီၣ်ခိၣ်လိၤဘၣ်.

³⁰နခိၣ်သူအဘိဒၣ်လဲာ်ဘၣ်တၢ်ဂံၢ်နီၣ်အီၤလၢယွၤလီၤ.

³¹လၢတၢ်န့ၣ်အဃိပျံၤတၢ်တဂ့ၤ. နလုၢ်နပှ့ၤဒိၣ်န့ၢ်အါန့ၢ်ထိၣ်ဖှံးဖိအါဘ့ၣ်တက့ၢ်လီၤ.

³²ပှၤတဂၤဂၤမ့ၢ်အၢၣ်လီၤလၢပှၤကညီအမဲာ်ညါလၢအဘၣ်ဃးဒီးယၤန့ၣ်, ယကအၢၣ်လီၤစ့ၢ်ကီးအီၤလၢယပၢ်အိၣ်လၢမူခိၣ်အမဲာ်ညါလီၤ.

³³ဘၣ်ဆၣ်ပှၤတဂၤလၢ်လၢ်လၢအသမၢယၤလၢပှၤကညီအမဲာ်ညါန့ၣ်, ယကသမၢစ့ၢ်ကီးအီၤလၢယပၢ်အိၣ်လၢမူခိၣ်အမဲာ်ညါလီၤ.

³⁴တဘၣ်ဆိကမိၣ်လၢယဟဲစိာ်တၢ်ဃူတၢ်ဖိးဆူဟီၣ်ခိၣ်ချၢ တဂ့ၤ. ယတဟဲစိာ်တၢ်ဃူတၢ်ဖိးဘၣ်. မ့ၢ်ယဟဲစိာ်ယဲနးတဘ့ၣ်လီၤ.

³⁵ယဟဲယဲဒ်သိး ဖိခွါတဖၣ်ကထီဒါပၢ်တဖၣ်, ဖိမုၣ်တဖၣ်ကထီဒါမိၢ်တဖၣ်, ဒဲၣ်တဖၣ်ကထီဒါမံၤပှၢ်ပိာ်မုၣ်တဖၣ်

³⁶ဒီးဒ်သိးပှၤတဂၤအဒုၣ်အဒါအအၢကတၢၢ်တဖၣ်ကမ့ၢ် အပှၤဟံၣ်ဖိဃီဖိဒၣ်ဝဲတဖၣ်အဂီၢ်န့ၣ်လီၤ.

³⁷ပှၤတဂၤလၢ်လၢ်လၢအအဲၣ်အမိၢ်မ့တမ့ၢ်အပၢ်အါန့ၢ်အအဲၣ်ယၤန့ၣ်, တကြၢးဘၣ်ဒီးယၤဘၣ်. ဒီးပှၤလၢအအဲၣ်အဖိခွါမ့တမ့ၢ်အဖိမုၣ်အါန့ၢ်အအဲၣ်ယၤန့ၣ်, တကြၢးဘၣ်ဒီးယၤဘၣ်.

³⁸ဒီးပှၤလၢအတယိးအထူၣ်စုညါဒီးပိာ်ယခံဘၣ်န့ၣ်, တကြၢးဘၣ်ဒီးယၤဘၣ်.

³⁹ပှၤလၢအဂုာ်ကျဲးစၢးဟံးဃာ်အသးသမူန့ၣ်, အသးသမူကလီၤမၢ်န့ၢ် အီၤလီၤ. ဘၣ်ဆၣ်ဒီးပှၤတဂၤလၢ်လၢ်လၢအဒုးလီၤမၢ်ကွံာ်အသးသမူလၢယဃိန့ၣ်, ကထံၣ်န့ၢ်တၢ်မူနီၢ်နီၢ်လီၤ.

⁴⁰ပှၤတဂၤလၢ်လၢ်လၢအတူၢ်လိာ်သုန့ၣ်တူၢ်လိာ်ယၤလီၤ. ဒီးပှၤတဂၤလၢ်လၢ်လၢအတူၢ်လိာ်ယၤန့ၣ်တူၢ်လိာ်ပှၤလၢ အမၢလီၤယၤတဂၤန့ၣ်လီၤ.

⁴¹ပှၤတဂၤလၢ်လၢ်လၢအတူၢ်လိာ်ဝံတဂၤလၢအမ့ၢ်ဝံအဃိန့ၣ်, ကဒိးန့ၢ်ဃုာ်တၢ်အဘျုးလၢအကြၢးဝဲဘၣ်ဝဲဒီးဝံန့ၣ်လီၤ. ဒီးပှၤတဂၤလၢ်လၢ်လၢအတူၢ်လိာ်ပှၤတီပှၤလိၤလၢ အမ့ၢ်ပှၤတီပှၤလိၤအဃိဒီး, ကဒိးန့ၢ်ဃုာ်တၢ်အဘျုးလၢ အကြၢးဝဲဘၣ်ဝဲဒီးပှၤတီပှၤလိၤတဂၤန့ၣ်လီၤ.

⁴²နာ်ယၤတက့ၢ်. ပှၤလၢအဟ့ၣ်အီပှၤအဆံးကတၢၢ်လၢသုကျါတဂၤ လၢအမ့ၢ်ယပျဲၢ်ယဘီၣ်အဃိလၢထံခုၣ်ထဲတလီခီဒၣ်လဲာ်န့ၣ်, ကန့ၢ်ဘၣ်တၢ်ဘျုးလၢယွၤအအိၣ်သပှၢ်ကတၢၢ်လီၤ.”