Read S'gaw Karen လံာ်မးသဲ 11 Bible Online

လံာ်မးသဲ 11 - S'gaw Karen bible

လံာ်မးသဲ 11

¹တုၤယ့ၣ်ၡူးမၤလိာ်အပျဲၢ်အဘီၣ်တဆံခံဂၤဝံၤဒီး, အဝဲဟးထီၣ်လၢတၢ်လီၢ်န့ၣ်ဒီးလဲၤဝဲဆူဝ့ၢ်လၢအအိၣ်ဘူး အိၣ်တံၢ်တဖၣ်ဒီးသိၣ်လီၤသီလီၤဒီးစံၣ်တဲၤတဲလီၤတၢ်လီၤ.

²တုၤပှၤဘျၢတၢ်စီၤယိၤဟၣ်လၢအအိၣ်လၢဃိာ်ပူၤတဂၤနၢ်ဟူခရံာ် အတၢ်ဖံးတၢ်မၤတဖၣ်အဂ့ၢ်ဒီး, မၢလီၤအပျဲၢ်အဘီၣ်တနီၤဆူယ့ၣ် ၡူးအအိၣ်လီၤ.

³အဝဲသ့ၣ်သံကွၢ်ယ့ၣ်ၡူးဒီးစံး, “တဲဘၣ်ပှၤတက့ၢ်. ပှၤလၢစီၤယိၤဟၣ်စံးဝဲလၢအကဟဲတဂၤန့ၣ်မ့ၢ်နၤဧါ. မ့တမ့ၢ်ဘၣ်ဒီးမ့ၢ်ပကဘၣ်ခိးကွၢ်လၢ်ဒံးပှၤအဂၤတဂၤဧါ.”

⁴ယ့ၣ်ၡူးစံးဆၢတၢ်ဒီးစံး, “က့ၤကဒါက့ၤဒီးတဲဘၣ်စီၤယိၤဟၣ်တၢ်လၢ သုနၢ်ဟူဒီးထံၣ်ဘၣ်တဖၣ်တက့ၢ်.

⁵ပှၤအမဲာ်ဘျီၣ်တဖၣ်ထံၣ်ထီၣ်က့ၤတၢ်, ပှၤအခီၣ်ဟးဂီၤတဖၣ်ဟးထီၣ် က့ၤဝဲ, ပှၤဘၣ်တၢ်ဆါအၢတဖၣ်ဘျါက့ၤဝဲ, ပှၤအနၢ်တအၢတဖၣ်နၢ်ဟူထီၣ် က့ၤတၢ်ဒီးပှၤသံတဖၣ်ဘၣ်တၢ်ဒုးဂဲၤဆၢထၢၣ်က့ၤအီၤဒီးတၢ်သးခု ကစီၣ်ဘၣ်တၢ်စံၣ်တဲၤတဲလီၤအီၤဆူပှၤဖှီၣ်ဖိယာ်ဖိအအိၣ်လံ.

⁶ပှၤလၢအသးတဒ့ဒီဘၣ်လၢတၢ်နာ်ယၤအပူၤတဖၣ်န့ၣ်, ဘၣ်ဆိၣ်ဂ့ၤနီၢ်နီၢ်လီၤ.”

⁷ဖဲစီၤယိၤဟၣ်အပျဲၢ်အဘီၣ်တဖၣ်က့ၤဟးထီၣ်ဝဲန့ၣ်, ယ့ၣ်ၡူးကတိၤတၢ်ဒီး ပှၤဂီၢ်မုၢ်ဘၣ်ဃးဒီးစီၤယိၤဟၣ်အဂ့ၢ်ဒီးစံးဝဲ, “ဖဲသုလဲၤဆူပှၢ်မုၢ်ကနၢဆူစီၤယိၤဟၣ်အအိၣ်န့ၣ်, မ့ၢ်သုမုၢ်လၢ်လၢသုကထံၣ်ဘၣ်တၢ်မနုၤလဲၣ်. မ့ၢ်တပိၢ်တဘိလၢအဘၣ် တၢ်မၤဟူးဝးအီၤလၢကလံၤန့ၣ်ဧါ.

⁸မ့တမ့ၢ်ဘၣ်ဒီးမ့ၢ်သုလဲၤဒ်သိးသုကထံၣ်ဘၣ်ပှၤလၢအကူအသိး ဆှုၣ်ဆှုၣ်ဘှဲၣ်ဘှဲၣ် တဂၤန့ၣ်ဧါ. ပှၤကူပှၤသိးဒ်န့ၣ်တဖၣ်အိၣ် ဆိးဒၣ်လၢနီတဖၣ်အပူၤလီၤ.

⁹မ့မ့ၢ်ဒ်န့ၣ်ဒီး မ့ၢ်သုလဲၤလၢသုကထံၣ်ဘၣ်တၢ်မနုၤအဂီၢ်လဲၣ်. မ့ၢ်ဒ်သိးသုကထံၣ်ဘၣ်ဝံတဂၤန့ၣ်ဧါ. မ့မ့ၢ်ဒ်န့ၣ်ဒီးဘၣ်မး လီၤ. ဘၣ်ဆၣ်သုထံၣ်ဘၣ်တ့ၢ်လံပှၤလၢအဒိၣ်န့ၢ်ဒံးဝံတဂၤတက့ၢ်လီၤ.

¹⁰အဂ့ၢ်ဒ်အံၤစီၤယိၤဟၣ်မ့ၢ်ပှၤလၢတၢ်ကွဲးအသးကွဲးတ့ၢ်လၢအဂ့ၢ်ဒီးစံး, ‘ကစၢ်ယွၤစံးဝဲ, ယကဆှၢလီၤယပှၤစိာ်တၢ်ကစီၣ်လၢနမဲာ်ညါဒ်သိး ကကတဲာ်ကတီၤကျဲလၢနဂီၢ်လီၤ.’ (မၤ ၃:၁)

¹¹နာ်ယၤတက့ၢ်. ပှၤဘျၢတၢ်စီၤယိၤဟၣ်န့ၣ်, ဒိၣ်န့ၢ်ဒံးကယဲၢ်ပှၤ ဟီၣ်ခိၣ်ဖိလၢအအိၣ်ဖျဲၣ်ထီၣ်လၢပိာ်မုၣ်န့ၣ်လီၤ. ဘၣ်ဆၣ်ဒီးပှၤအဆံးကတၢၢ်လၢမူခိၣ်အဘီအမုၢ်န့ၣ်, ဒိၣ်န့ၢ်ဒံးအီၤတက့ၢ်လီၤ.

¹²မူခိၣ်အဘီအမုၢ်ဘၣ်တၢ်ဂုာ်ဆူၣ်အီၤစးထီၣ်လၢစီၤယိၤဟၣ် အစိၤပၢၢ်တုၤလၢမုၢ်မဆါတနံၤအံၤလီၤ. ပှၤစုဆူၣ်ခီၣ်တကးဖိတဖၣ် ဂုာ်ကျဲးစၢးဒုးန့ၢ်ဟံးန့ၢ်ဆူၣ်အီၤလီၤ.

¹³တုၤလီၤလၢစီၤယိၤဟၣ်အစိၤန့ၣ်, ဝံတဖၣ်ခဲလၢာ်ဒီးစီၤမိၤၡ့ အတၢ်သိၣ်တၢ်သီတဖၣ်ကတိၤဆိတ့ၢ်တၢ်ဘၣ်ဃးဒီးဘီမုၢ်အံၤအဂ့ၢ်လီၤ.

¹⁴ဒီးသုမ့ၢ်သးဆူၣ်လၢသုကနာ်အဝဲသ့ၣ်အတၢ်ကစီၣ်တဖၣ်ဒီး, စီၤယိၤဟၣ်မ့ၢ်ဒၣ်ဝံအ့ၤလံယၤလၢတၢ်ကတိၤဆိပာ်စၢၤလၢ အကဟဲကဒါက့ၤအဂ့ၢ်တဂၤန့ၣ်လီၤ.

¹⁵ပှၤအိၣ်ဒီးအနၢ်လၢအနၢ်ဟူတၢ်မ်အဒိကနၣ်တၢ်တက့ၢ်.

¹⁶ယကဒိလီၤဘၣ်ပှၤတစိၤအံၤလၢတၢ်မနုၤတမံၤလဲၣ်. အဝဲသ့ၣ်လီၤဂာ်ဒီးဖိသၣ်တဖၣ်လၢအဆ့ၣ်နီၤလၢဖၠါပူၤလီၤ. ဖိသၣ်တဖုန့ၣ်, ကိးထီၣ်ဆူဖိသၣ်အဂၤတဖုအအိၣ်ဒီးစံး,

¹⁷‘ပအူန့ၢ်သုတၢ်ဖျီအတၢ်သးဝံၣ်အသီၣ်လၢပံဘၣ်ဆၣ်ဒီးသုတဂဲၤ ကလံာ်ဘၣ်. ပသးဝံၣ်န့ၢ်သုတၢ်သံအတၢ်သးဝံၣ် ဘၣ်ဆၣ်သုတဟီၣ်တယၢၤဘၣ်.’

¹⁸စီၤယိၤဟၣ်ဟဲဝဲဒီးဒုၣ်တၢ်အီၣ်တၢ်အီ, ဒီးတအီဘၣ်စပံးထံ ဘၣ်. ဒီးပှၤကိးဂၤဒဲးစံးလၢတၢ်နါအိၣ်လၢအပူၤလီၤ.

¹⁹တုၤပှၤကညီဖိခွါဟဲဝဲဒီးအီၣ်တၢ်အီတၢ်ဒီးပှၤကိးဂၤစံးဝဲ, ‘ကွၢ်တက့ၢ်. ပှၤတဂၤအံၤမ့ၢ်ပှၤအီၣ်လုၣ်ကိတၢ်ဒီးအီလုၣ်ကိစပံးထံ, ပှၤဃ့သွဲဒီးပှၤတၢ်ဒဲးဘးဖိတဖၣ်အတံၤသကိးလီၤ.’ ဘၣ်ဆၣ်ကစၢ်ယွၤအတၢ်ကူၣ်သ့န့ၣ်ဘၣ်တၢ်ပာ်တီပာ်လိၤအီၤလၢ အတၢ်ဖံးတၢ်မၤဒၣ်ဝဲန့ၣ်လီၤ.”

²⁰ပှၤအိၣ်လၢဝ့ၢ်တဖၣ်ဖဲယ့ၣ်ၡူးမၤတ့ၢ်တၢ်လီၤလးအါမးလၢ အပူၤန့ၣ်တသ့ၣ်နီၣ်ပီၢ်ယၢ်ဒီးဃၣ်လိၤက့ၤအသးဘၣ်. ဒီးယ့ၣ်ၡူးစံၣ်ညီၣ်ဃၣ်အဝဲသ့ၣ်ဒီးစံး,

²¹“ဝ့ၢ်ဃၤရၤစံၣ်ဧၢ, နကဘၣ်တၢ်နးတၢ်ဖှီၣ်ဆံးဒိၣ်လဲၣ်. ဝ့ၢ်ဘ့ၤသစဲဒၤဧၢ, နကဘၣ်တၢ်နးတၢ်ဖှီၣ်ဆံးဒိၣ်လဲၣ်. တၢ်လီၤလးတဖၣ်လၢအဘၣ်တၢ်မၤတ့ၢ်အီၤလၢသုပူၤန့ၣ် မ့ၢ်ဘၣ်တၢ်မၤတ့ၢ်အီၤလၢဝ့ၢ်ထါယၢၣ်ဒီးဝ့ၢ်စံဒိၣ်အပူၤဒီး, ပှၤဝ့ၢ်ဖိတဖၣ်ကကူထီၣ်သိးထီၣ်တ့ၢ်ထၢၣ်တၢ်ကံးယာ် ဒီးဖှံလီၤတ့ၢ်အသးဒီးဖၣ်ဆါဒ်သိးကပာ်ဖျါထီၣ် အတၢ်ပီၢ်ယၢ်လီၤက့ၤအသးဃဲးဃဲးလံန့ၣ်လီၤ.

²²နာ်ယၤတက့ၢ်. လၢမုၢ်စံၣ်ညီၣ်အနံၤန့ၣ် ကစၢ်ယွၤကပာ်ဖျါထီၣ်အတၢ်သးကညီၤလၢ ပှၤဝ့ၢ်ထါယၢၣ်ဖိဒီးပှၤဝ့ၢ်စံဒိၣ်ဖိတဖၣ် အဖီခိၣ်အါန့ၢ်ဒံးအကပာ်ဖျါထီၣ်ဝဲလၢ သုဖီခိၣ်တက့ၢ်လီၤ.

²³နဲဒၣ်ဝ့ၢ်ကပ့းရနီၣ်ဧၢ, နအဲၣ်ဒိးဘၣ်တၢ်ပာ်ဒိၣ်ပာ်ထီနၤတုၤ လၢမူခိၣ်န့ၣ်ဧါ. ယွၤကတ့ၢ်လီၤကွံာ်နၤဆူလရာ်အပူၤလီၤ. တၢ်လီၤလးတဖၣ်လၢအဘၣ်တၢ်မၤအီၤလၢနပူၤန့ၣ် မ့ၢ်ဘၣ်တၢ်မၤတ့ၢ်အီၤလၢဝ့ၢ်စဒိၣ်အပူၤဒီး, ဝ့ၢ်အံၤကအိၣ်ဒံးတုၤမုၢ်မဆါတနံၤအံၤလီၤ.

²⁴နာ်ယၤတက့ၢ်. လၢမုၢ်စံၣ်ညီၣ်အနံၤန့ၣ်ကစၢ် ယွၤကပာ်ဖျါထီၣ်အတၢ်သးကညီၤလၢဝ့ၢ်စဒိၣ် အဖီခိၣ်အါန့ၢ်အကပာ်ဖျါထီၣ်ဝဲလၢနဖီခိၣ်တက့ၢ်လီၤ.”

²⁵အကတီၢ်ဖဲန့ၣ်ယ့ၣ်ၡူးစံးဝဲ, “မူခိၣ်ဒီးဟီၣ်ခိၣ်အကစၢ်, ယပၢ်ယွၤဧၢ, ယစံးဘျုးနၤလၢနပာ်ခူသူၣ်တၢ်မ့ၢ်တၢ်တီတဖၣ်အံၤလၢပှၤကူၣ်ဘၣ် ကူၣ်သ့ဒီးပှၤသ့လံာ်သ့လဲၢ်တဖၣ်, ဒီးနလီၣ်ဖျါထီၣ်အီၤလၢပှၤ အဆံးပှၤအစၢ်ပှၤလၢအတမၤလိဘၣ်တၢ်တဖၣ်အမဲာ်ညါလီၤ.

²⁶မ့ၢ်လီၤပၢ်ဧၢ, တၢ်အံၤမ့ၢ်အမၤအသးဒ်နအဲၣ်ဒိးလၢအကမၤ အသးအသိးန့ၣ်လီၤ.

²⁷ယပၢ်ဟ့ၣ်လီၤလံယၤတၢ်ခဲလၢာ်လံ. မ့တမ့ၢ်ဘၣ်ပၢ်ဘၣ်ဒီး ပှၤတသ့ၣ်ညါဘၣ်ဖိခွါနီတဂၤဘၣ်. မ့တမ့ၢ်ဘၣ်ဖိခွါဒီး ပှၤလၢဖိခွါဃုထၢလီၣ်ဖျါထီၣ်န့ၢ်အီၤဘၣ်ဒီး, ပှၤတသ့ၣ်ညါဘၣ်ပၢ်နီတဂၤဘၣ်.

²⁸ပှၤလၢတၢ်ဘှံးအသးဒီးဝံတၢ်ယိးတၢ်ဃၢခဲလၢာ်သ့ၣ်သုဧၢ, ဟဲဆူယအိၣ်တက့ၢ်. ဒီးယကဒုးအိၣ်ဘှံးသုလီၤ.

²⁹ဟံးထီၣ်ယနီၣ်ယိးဘိလၢသုလိၤဒီးမၤလိတၢ်လၢယၤတက့ၢ်. အဂ့ၢ်ဒ်အံၤ, ယသးစူၤဒီးယဆီၣ်လီၤယသးလီၤ. ဒီးသုကထံၣ်န့ၢ်တၢ်အိၣ်ဘှံးလၢသုသးအဂီၢ်လီၤ.

³⁰အဂ့ၢ်ဒ်အံၤ, ယနီၣ်ယိးဘိမ့ၢ်တၢ်လၢပယိးအီၤညီဒီးယတၢ်ဝံတၢ် ယိးမ့ၢ်တၢ်လၢအဖှံလီၤ.”