Read S'gaw Karen လံာ်မးသဲ 14 Bible Online

လံာ်မးသဲ 14 - S'gaw Karen bible

လံာ်မးသဲ 14

¹အကတီၢ်ဖဲန့ၣ် ပှၤပၢကီၢ်ကၤလံၤလါစီၤဟ့ၤရိာ်နၢ်ဟူယ့ၣ်ၡူးအကစီၣ်

²ဒီးစံးဘၣ်အခ့အပှၤတဖၣ်, “ပှၤအံၤမ့ၢ်နီၢ်နီၢ်ပှၤဘျၢတၢ်စီၤယိၤဟၣ်လၢ အဘၣ်တၢ်မၤမူထီၣ်က့ၤအီၤလီၤ. လၢတၢ်န့ၣ်အဃိ, အဝဲအိၣ်ဒီးတၢ်စိတၢ်ကမီၤလၢ ကမၤတၢ်လီၤလးတဖၣ်အံၤလီၤ.”

³အဂ့ၢ်ဒ်အံၤ, စီၤဟ့ၤရိာ်ဖီၣ်ဃာ်တ့ၢ်စီၤယိၤဟၣ်ဒီးစၢဃာ်အီၤဒီးဒၢနုာ် တ့ၢ်အီၤလၢဃိာ်ပူၤ, မ့ၢ်လၢအဒီပုၢ်ဝဲၢ်စီၤဖံလံးပူးအမါနီၢ်ဟ့ၤရိၤဒံအဃိ လီၤ.

⁴အဂ့ၢ်မ့ၢ်လၢစီၤယိၤဟၣ်တဲတ့ၢ်စီၤဟ့ၤရိာ်လၢအဟံးန့ၢ်နီၢ်ဟ့ၤရိၤဒံန့ၣ် မ့ၢ်တၢ်လၢအထီဒါတၢ်သိၣ်တၢ်သီအဃိလီၤ.

⁵စီၤဟ့ၤရိာ်သးအိၣ်မၤသံအီၤဘၣ်ဆၣ်, မ့ၢ်လၢအပျံၤပှၤယူဒၤဖိတဖၣ်လၢ အပာ်စီၤယိၤဟၣ်ဒ်ဝံတဂၤအသိးအဃိ, တမၤဝဲဘၣ်.

⁶ဘၣ်ဆၣ်ဒီးလၢစီၤဟ့ၤရိာ်အတၢ်အိၣ်ဖျဲၣ်ဆၢက့ၤအနံၤအမူးန့ၣ်, နီၢ်ဟ့ၤရိၤဒံအဖိမုၣ်ဂဲၤကလံာ်လၢပှၤခဲလၢာ်အမဲာ်ညါဒီး စီၤဟ့ၤရိာ်ဘၣ်သူၣ်ဘၣ်သးဝဲဒိၣ်မး,

⁷တုၤဒၣ်လဲာ်အအၢၣ်လီၤအီလီၤအီၤ, အိၣ်ဒီးတၢ်ဆိၣ်လီၤအသးလၢ အကဟ့ၣ်အီၤတၢ်တမံၤလၢ်လၢ်လၢအကဃ့ဝဲန့ၣ်လီၤ.

⁸ဒ်အမိၢ်ဟ့ၣ်ကူၣ်အီၤအသိးအဝဲစံးဝဲ, “ဟ့ၣ်ယၤပှၤဘျၢ တၢ်စီၤယိၤဟၣ်အခိၣ်လၢသီတ့ၤအပူၤအခဲအံၤတက့ၢ်.”

⁹စီၤပၤအသးအုး, ဘၣ်ဆၣ်မ့ၢ်လၢအတၢ်အၢၣ်လီၤအီလီၤလၢ အမၤတ့ၢ်ဝဲလၢပှၤသမှံၤတဖၣ်အမဲာ်ညါအဃိ, အဝဲဟ့ၣ်လီၤအကလုၢ်လၢတၢ်ကဟ့ၣ်အီၤတၢ်လၢအဃ့ဝဲန့ၣ်လီၤ.

¹⁰အဝဲဆှၢလီၤအခ့အပှၤလၢကဒီၣ်တဲာ်ကွံာ်စီၤယိၤဟၣ် အကိာ်လၢဃိာ်ပူၤ,

¹¹ဒီးအခိၣ်ဘၣ်တၢ်ဟဲစိာ်အီၤဆူပိာ်မုၣ်ဖိအအိၣ်လၢသီတ့ၤ အပူၤ, ဒီးအဝဲက့ၤစိာ်ဝဲဆူအမိၢ်အအိၣ်လီၤ.

¹²စီၤယိၤဟၣ်အပျဲၢ်တဖၣ်ဟဲဒီးက့ၤစိာ်အစိၣ်, ဒီးခူၣ်လီၤဝဲဝံၤအဝဲသ့ၣ်လဲၤစံးဘၣ်တဲဘၣ်ယ့ၣ်ၡူးန့ၣ်လီၤ.

¹³တုၤယ့ၣ်ၡူးနၢ်ဟူတၢ်ကစီၣ်ဘၣ်ဃးစီၤယိၤဟၣ်ဒီး, အဝဲဟးထီၣ်ဖဲတၢ်လီၢ်န့ၣ်, ဒိးထီၣ်ချံတဘ့ၣ်ဒီးလဲၤဝဲဆူတၢ်လီၢ်ဖဲပှၤတအိၣ်နီတဂၤဘၣ် လီၤ. ဘၣ်ဆၣ်တုၤပှၤဂီၢ်မုၢ်တဖၣ်နၢ်ဟူဝဲဒီး, အဝဲသ့ၣ်ဟးထီၣ်လၢအဝ့ၢ်တဖၣ်ဒီးပိာ်ထီၣ်အခံလၢအခီၣ်လီၤ.

¹⁴ဖဲယ့ၣ်ၡူးစံၣ်လီၤလၢချံအလိၤဒီးထံၣ်ပှၤဂီၢ်မုၢ်ဖးဒိၣ်န့ၣ်, အသူၣ်ကညီၤသးကညီၤဘၣ်အဝဲသ့ၣ်ဒီး, မၤဘျါက့ၤအဝဲသ့ၣ်အပှၤဆူးပှၤဆါတဖၣ်လီၤ.

¹⁵တုၤမုၢ်ဟါလီၤအကတီၢ်ဘၣ်ဒီး, အပျဲၢ်အဘီၣ်တဖၣ်ဟဲဆူအအိၣ်ဒီးစံး, “တၢ်လီၢ်အံၤ မ့ၢ်တၢ်လီၢ်လၢပှၤတအိၣ်နီတဂၤဘၣ်ဒီးမုၢ်ဟါလီၤလံ. ပျၢ်ကွံာ်ပှၤဂီၢ်မုၢ်တဖၣ်, ဒ်သိးအကလဲၤနုာ်ဆူဒူသဝီတဖၣ်အပူၤဒီးပှ့ၤန့ၢ်တၢ်အီၣ်လၢ အဝဲသ့ၣ်အဂီၢ်ဒၣ်ဝဲန့ၣ်တက့ၢ်.”

¹⁶ယ့ၣ်ၡူးစံးဆၢအဝဲသ့ၣ်, “အလီၢ်တအိၣ်လၢအဝဲသ့ၣ်ကလဲၤပှ့ၤအီၣ် တၢ်ဘၣ်. ဟ့ၣ်အီၣ်အဝဲသ့ၣ်လၢတၢ်တမံၤမံၤတက့ၢ်.”

¹⁷အဝဲသ့ၣ်စံးဆၢအီၤ, “တၢ်အီၣ်လၢအအိၣ်ဒီးပှၤအံၤမ့ၢ်ဒၣ်ထဲကိၣ်ယဲၢ်ဖျၢၣ်ဒီးညၣ် ခံဘ့ၣ်ဧိၤလီၤ.”

¹⁸ယ့ၣ်ၡူးစံးဝဲ, “ဟဲစိာ်န့ၢ်ယၤတက့ၢ်.”

¹⁹ဒီးမၢပှၤဂီၢ်မုၢ်တဖၣ်ဆ့ၣ်နီၤလၢတပံၢ်အဖီခိၣ်လီၤ. အဝဲဟံးထီၣ်ကိၣ်ယဲၢ်ဖျၢၣ်ဒီးညၣ်ခံဘ့ၣ်, ဝံၤကွၢ်ထီၣ်တၢ်ဆူမူခိၣ်, ဒီးစံးထီၣ်ပတြၢၤယွၤလီၤ. အဝဲစိၢ်ဘျဲးဝဲကိၣ်တဖၣ်, ဒီးဟ့ၣ်လီၤဝဲအပျဲၢ်အဘီၣ်ဒီးအပျဲၢ်အဘီၣ်တဖၣ်ဟ့ၣ်ပှၤဂီၢ်မုၢ် တဖၣ်လီၤ.

²⁰ပှၤခဲလၢာ်အီၣ်ဝဲဒီးဘျဲးအီၣ်ဝဲလီၤ. ဒီးအဝဲသ့ၣ်ထၢဖှိၣ်က့ၤတၢ်အီၣ်အဘျဲၣ်အစဲၢ်ပှဲၤကုတဆံခံဒုလီၤ.

²¹ဒီးလၢပိာ်မုၣ်ဒီးဖိသၣ်အမဲာ်ညါ, ပှၤပိာ်ခွါလၢအအီၣ်တၢ်ခဲလၢာ်အိၣ်ဝဲယဲၢ်ကထိဃၣ်ဃၣ်ညါလီၤ.

²²အန့ၣ်ဝံၤဒီး, ယ့ၣ်ၡူးမၢအပျဲၢ်အဘီၣ်တဖၣ်ဒိးထီၣ်ချံ, ဒီးလဲၤဆိလၢအမဲာ်ညါဆူဝၢ်ဘးခီ, ဖဲအဝဲပျၢ်ကွံာ်ပှၤဂီၢ်မုၢ်တဖၣ်အခါန့ၣ်လီၤ.

²³တုၤအဝဲပျၢ်ကွံာ်ပှၤဂီၢ်မုၢ်တဖၣ်ဝံၤဒီး, လဲၤထီၣ်ဝဲဆူတၢ်လူၢ်အဒီခိၣ်အလိၤထဲတဂၤဧိၤ, ဒ်သိးကဃ့ဘါထုကဖၣ်ယွၤလီၤ. တုၤမုၢ်ဟါလီၤအကတီၢ်ဘၣ်ဒီး, အိၣ်ဝဲဖဲန့ၣ်ထဲတဂၤဧိၤလီၤ.

²⁴အကတီၢ်ဖဲန့ၣ်ချံလဲၤတၢ်ယံၤထီၣ်ဒီးကၢၢ်ပၤနံၤဖးယံၤလံ. ဒီးချံန့ၣ်ဟူးဝးဝဲလၢလပီစံၣ်စုးအဃိ, အဂ့ၢ်မ့ၢ်လၢကလံၤတလိၤဘၣ်အဃိလီၤ.

²⁵ဖဲဂီၤသၢနၣ်ရံၣ်ဒီးဃုနၣ်ရံၣ်အဘၢၣ်စၢၤန့ၣ်, ယ့ၣ်ၡူးလဲၤဆူအပျဲၢ်အဘီၣ်တဖၣ်အအိၣ်, ဟးဝဲလၢထံဖံးခိၣ်လီၤ.

²⁶ဘၣ်ဆၣ်တုၤအပျဲၢ်အဘီၣ်တဖၣ်ထံၣ်အဟးဝဲလၢထံဖံးခိၣ်ဒီး, အဝဲသ့ၣ်ပျံၤတၢ်ဒိၣ်မးဒီးစံး, “မ့ၢ်တၢ်တဃၣ်လီၤ.” ဒီးကိးပသူထီၣ်ဝဲလၢတၢ်သူၣ်ပျံၤသးဖုးအပူၤလီၤ.

²⁷ဘၣ်ဆၣ်တဘျီဃီယ့ၣ်ၡူးကတိၤတၢ်ဒီးအဝဲသ့ၣ်ဒီးစံး, “ပာ်သုသးဒူဒူတက့ၢ်. မ့ၢ်ဒၣ်ယၤလီၤ. တဘၣ်ပျံၤတၢ်တဂ့ၤ.”

²⁸ဒီးစီၤပ့းတရူးစံးဝဲ, “ကစၢ်ဧၢ, မ့မ့ၢ်နၤနီၢ်နီၢ်ဒီး, ခါလီၤနကလုၢ်လၢယကလဲၤဆူနအိၣ်လၢထံဖံးခိၣ်တက့ၢ်.”

²⁹ယ့ၣ်ၡူးစံးဝဲ, “ဟဲတက့ၢ်.” အန့ၣ်ဒီးစီၤပ့းတရူးစံၣ်လီၤလၢချံအလိၤ, ဒီးဟးဝဲဒၣ်လၢထံဖံးခိၣ်ဆူယ့ၣ်ၡူးအအိၣ်လီၤ.

³⁰ဘၣ်ဆၣ်တုၤအထံၣ်ကလံၤအူတၢ်ဆူၣ်ဆူၣ်ဒီး, အသူၣ်ပျံၤသးဖုးဝဲ, ဒီးလီၤဘျၢဝဲဘူးတ့ၢ်မးအကလီၤအုးဒီးကိးထီၣ်ဝဲ, “ကစၢ်ဧၢ, မၤစၢၤယၤတက့ၢ်.”

³¹ဒီးယ့ၣ်ၡူးယူာ်ဃီၤအစုတဘျီဃီ, ဒီးဟံးဃာ်အီၤဒီးစံးဝဲ, “နနာ်တၢ်စှၤမးလဲၣ်. ဘၣ်မနုၤလၢနသးဒ့ဒီလဲၣ်.”

³²အဝဲသ့ၣ်ခံဂၤလၢာ်ဟဲက့ၤထီၣ်ဆူချံပူၤဒီးကလံၤဂၢၢ်ထီၣ်က့ၤ ဝဲလီၤ.

³³ဒီးအပျဲၢ်အဘီၣ်လၢအအိၣ်လၢချံပူၤတဖၣ်ဘူၣ်ထီၣ်ဘါထီၣ်အီၤဒီး စံး, “နမ့ၢ်နီၢ်နီၢ်ကစၢ်ယွၤအဖိခွါလီၤ.”

³⁴အဝဲသ့ၣ်ခီဂာ်ပီၣ်လဲၣ်, ဒီးတုၤဃီၤဝဲလၢကီၢ်ကံးန့ၤရ့သး, ဒီးတိၢ်ထီၣ်အချံဖဲန့ၣ်လီၤ.

³⁵တုၤပှၤဖဲန့ၣ်တဖၣ်သ့ၣ်ညါလၢအမ့ၢ်ယ့ၣ်ၡူးဒီး, မၢလီၤပှၤလဲၤသကုၤကီၢ်န့ၣ်, ဒီးဟဲစိာ်ပှၤဆူးပှၤဆါတဖၣ်ဆူအအိၣ်,

³⁶ဒီးဃ့ကညးအီၤဒ်သိးအကထိးဘၣ်အစှၤကတၢၢ်ထဲအဆ့ဖးထီ အနွံဧိၤန့ၣ်လီၤ. ဒီးကယဲၢ်ပှၤလၢအထိးဘၣ်ဝဲတဖၣ်ဘျါက့ၤဝဲခဲလၢာ်လီၤ.