Read S'gaw Karen လံာ်မးသဲ 15 Bible Online

လံာ်မးသဲ 15 - S'gaw Karen bible

လံာ်မးသဲ 15

¹ပှၤဖၤရံၤၡဲဒီးပှၤသ့တၢ်ဘူၣ်တၢ်ဘါအတၢ်သိၣ်တၢ်သီတဖၣ်, ဟဲလၢဝ့ၢ်ယရူၤၡလ့ၣ်ဆူယ့ၣ်ၡူးအအိၣ်ဒီးသံကွၢ်အီၤ,

²“ဘၣ်မနုၤလၢနပျဲၢ်နဘီၣ်တဖၣ်လုၣ်သ့ၣ်ခါပတာ် ပမိၢ်ပၢ်ဖံဖုလၢပျၢၤအလုၢ်အလၢ်တဖၣ်လဲၣ်. တချုးလၢအဝဲသ့ၣ်အီၣ်တၢ်အီၣ်န့ၣ်, အဝဲသ့ၣ်တသ့အစုဒ်တၢ်အလုၢ်အလၢ်အိၣ်ဝဲအသိးဘၣ်.”

³ယ့ၣ်ၡူးစံးဆၢအဝဲသ့ၣ်, “ဘၣ်မနုၤလၢသုလုၣ်သ့ၣ်ခါပတာ် ကစၢ်ယွၤအတၢ်မၤလိာ်ဒ်သိးသုကမၤထွဲဘၣ်သုတၢ်လုၢ်တၢ်လၢ် ဒၣ်ဝဲအခံန့ၣ်လဲၣ်.

⁴အဂ့ၢ်ဒ်အံၤ, ကစၢ်ယွၤမၤလိာ်ဝဲဒီးစံး, ‘ယူးယီၣ်နမိၢ်ဒီးနပၢ်တက့ၢ်. (ဟးထီၣ် ၂၀:၁၂), ဒီးကယဲၢ်ပှၤလၢအဆိၣ်အၢအမိၢ်မ့ၢ်ဂ့ၤ, အပၢ်မ့ၢ်ဂ့ၤန့ၣ်, မ်အဘၣ်တၢ်မၤသံအီၤတက့ၢ်.’ (ဟးထီၣ် ၂၁:၁၇)

⁵ဘၣ်ဆၣ်ဒီး, သုစံးလၢပှၤတဂၤလၢ်လၢ်လၢအအိၣ်ဒီးတၢ်တမံၤမံၤလၢ ကဟ့ၣ်မၤစၢၤအမိၢ်မ့ၢ်ဂ့ၤ, အပၢ်မ့ၢ်ဂ့ၤန့ၣ်, မ့ၢ်စံးဝဲလၢအလုၢ်ထီၣ်တ့ၢ်တၢ်န့ၣ်လၢယွၤလံဒီး,

⁶အလီၢ်တအိၣ်ဘၣ်လၢအကယူးယီၣ်အမိၢ်အပၢ်လၢၤဘၣ်န့ၣ်လီၤ. လၢကျဲဒ်အံၤ, သုမၤဟးဂီၤကွံာ်ယွၤအတၢ်မၤလိာ်, ဒ်သိးသုကမၤဘၣ်သုလုၢ်သုလၢ်ဒၣ်ဝဲန့ၣ်လီၤ.

⁷ပှၤပာ်မၤအသးဖိသ့ၣ်ဧၢ, တၢ်လၢဝံယၡါယၤစံးတ့ၢ်ဝဲလၢသုဂ့ၢ် န့ၣ်တီမးလီၤ. စံးဝဲ,

⁸‘ကစၢ်ယွၤစံးဝဲဒၣ်, ပှၤတကလုာ်အံၤ ယူးယီၣ်ယၤလၢအထးခိၣ် ဘၣ်ဆၣ်အသးန့ၣ်ယံၤမးဒီးယၤလီၤ.

⁹အဝဲသ့ၣ်အတၢ်ဘူၣ်ထီၣ်ဘါထီၣ်ယၤန့ၣ် အဘျုးတအိၣ်ဘၣ်. အဂ့ၢ်ဒ်အံၤ, အဝဲသ့ၣ်သိၣ်လီၤသီလီၤတၢ်သိၣ်တၢ်သီလၢ ပှၤကညီဒုးအိၣ်ထီၣ်တဖၣ်, ဒ်အမ့ၢ်ယတၢ်မၤလိာ်တဖၣ်အသိးအဃိလီၤ’ ” (ၡါ. ၂၉:၁၃).

¹⁰ယ့ၣ်ၡူးကိးပှၤဂီၢ်မုၢ်ဆူအအိၣ်ဒီးစံးဘၣ်အဝဲသ့ၣ်, “ဒိကနၣ်ဒီးနၢ်ပၢၢ်တက့ၢ်.

¹¹တၢ်လၢအလဲၤနုာ်ဆူပှၤအကိာ်ပူၤန့ၣ်, တမ့ၢ်ဘၣ်တၢ်လၢအမၤတကဆှီဘၣ်ပှၤကညီဘၣ်. မ့မ့ၢ်တၢ်လၢအဟဲထီၣ်လၢပှၤအကိာ်ပူၤန့ၣ်, မ့ၢ်တၢ်လၢအမၤတကဆှီဘၣ်ပှၤကညီန့ၣ်လီၤ.”

¹²တုၤနုၤတစု, အပျဲၢ်အဘီၣ်တဖၣ်ဟဲဆူအအိၣ်ဒီးစံးဘၣ်အီၤ, “တၢ်လၢနတဲတဖၣ်မၤဆါပှၤဖၤရံၤၡဲတဖၣ်အသးန့ၣ်, မ့ၢ်နသ့ၣ်ညါစ့ၢ်ကီးဧါ.”

¹³အဝဲစံးဆၢတၢ်ဒီးစံး, “ကယဲၢ်တၢ်မုၢ်တၢ်ဘိလၢယပၢ်လၢမူခိၣ်တဂၤ တသူၣ်လီၤဘၣ်ဝဲန့ၣ်, ကဘၣ်တၢ်ထဲးထီၣ်ကွံာ်အီၤလီၤ.

¹⁴ပျဲအဝဲသ့ၣ်အိၣ်ဒၣ်အတၢ်တက့ၢ်. အဝဲသ့ၣ်မ့ၢ်ပှၤဆှၢတၢ်လၢအမဲာ်ဘျီၣ်တဖၣ်လီၤ. ဒီးဖဲပှၤမဲာ်ဘျီၣ်ဆှၢပှၤမဲာ်ဘျီၣ်န့ၣ်, အဝဲသ့ၣ်ကလီၤတဲာ်နုာ်ဆူတၢ်ပူၤခံဂၤလၢာ်န့ၣ်လီၤ.”

¹⁵စီၤပ့းတရူးစံး, “တဲဘၣ်ပှၤလၢတၢ်ကတိၤဒိအံၤအခီ ပညီတက့ၢ်.”

¹⁶ယ့ၣ်ၡူးစံးဆၢဝဲ, “သုဝဲစ့ၢ်ကီးသုတနၢ်ပၢၢ်ဒံးဘၣ်ဧါ.

¹⁷တၢ်တမံၤလၢ်လၢ်လၢအလဲၤနုာ်ဆူပှၤအကိာ်ပူၤန့ၣ်, လဲၤခီဖျိပှၤအဟၢဖၢ, ဒီးဟးထီၣ်ကွံာ်လၢအနီၢ်ခိအပူၤန့ၣ်, မ့ၢ်သုတသ့ၣ်ညါဘၣ်ဧါ.

¹⁸ဘၣ်ဆၣ်တၢ်လၢအဟဲထီၣ်လၢပှၤအကိာ်ပူၤန့ၣ်, ဟဲထီၣ်လၢပှၤအသးကံၢ်ပူၤလီၤ. တၢ်န့ၣ်မ့ၢ်တၢ်လၢအမၤတကဆှီဘၣ်ပှၤကညီန့ၣ်လီၤ.

¹⁹အဂ့ၢ်ဒ်အံၤ, တၢ်ဆိကမိၣ်အအၢအသီလၢအဆှၢပှၤဆူတၢ်မၤသံပှၤ, တၢ်အဲၣ်ဘၢမါအဲၣ်ဘၢဝၤ, တၢ်မၤကမၣ်မုၣ်ကမၣ်ခွါ, တၢ်ဟုၣ်တၢ်ဘျၣ်တၢ်, တၢ်အုၣ်အသးကဘျံးကဘျၣ်, ဒီးတၢ်ဒုၣ်ဒွဲၣ်စံးအၢတၢ်တဖၣ်န့ၣ်, ဟဲထီၣ်ဒၣ်လၢပှၤကညီအသးကံၢ်ပူၤလီၤ.

²⁰တၢ်တဖၣ်အံၤ, မ့ၢ်တၢ်လၢအမၤတကဆှီဘၣ်ပှၤကညီလီၤ. မ့မ့ၢ်, ပှၤအီၣ်တၢ်ဒီးအစုလၢအတဘၣ်တၢ်သ့အီၤန့ၣ်, တမၤတကဆှီဘၣ်ပှၤကညီဘၣ်.”

²¹ယ့ၣ်ၡူးဟးထီၣ်ဖဲန့ၣ်, ဒီးလဲၤဝဲဆူတၢ်လီၢ်လၢအအိၣ်ဘူးဒီးဝ့ၢ်ထါယၢၣ် ဒီးစံဒိၣ်တဖၣ်လီၤ.

²²ဒီးပှၤကနၤဧၣ်မုၣ်တဂၤ, လၢအအိၣ်ဖဲတၢ်လီၢ်န့ၣ်ဟဲဆူအအိၣ်ဒီးကိးထီၣ်ဝဲ, “စီၤဒၤဝံးအဖိခွါ, ကစၢ်ဧၢ, သူၣ်ကညီၤသးကညီၤလၢ်ယၤတက့ၢ်. ယဖိမုၣ်န့ၣ် တၢ်နါဒိးအီၤဒီးဘၣ်တူၢ်ဝဲနးမးလီၤ.”

²³ဘၣ်ဆၣ် ယ့ၣ်ၡူးတကတိၤဆၢအီၤနီတဘီဘၣ်. အပျဲၢ်အဘီၣ်တဖၣ်ဟဲဆူအအိၣ်ဒီးဃ့ကညးအီၤဒီးစံး, “မၢအက့ၤတက့ၢ်. အဂ့ၢ်ဒ်အံၤအဝဲဟးပိာ်ပခံဒီးကိးပသူထီၣ်ဝဲလၢပလီၢ်ခံလီၤ.”

²⁴ယ့ၣ်ၡူးစံးဆၢတၢ်ဒီးစံး, “ယဘၣ်တၢ်ဆှၢလီၤဒၣ်ယၤဆူသိဖိလၢအလီၤမၢ်လၢအမ့ၢ် ပှၤအံၣ်စရ့လးဖိအဒူၣ်အထၢတဖၣ်အအိၣ်လီၤ.”

²⁵ဘၣ်ဆၣ်ပိာ်မုၣ်န့ၣ် ဟဲဒီးတီၤလီၤကဒွံကျိာ်လၢအမဲာ်ညါဒီး စံး, “ကစၢ်ဧၢ, မၤစၢၤယၤတက့ၢ်.”

²⁶ယ့ၣ်ၡူးစံးဆၢဝဲ, “တၢ်လၢဖိအတၢ်အီၣ်န့ၣ်တဂ့ၤဘၣ်တၢ်ဟံးန့ၢ်ဒီးကွံာ်လီၤအီၤဆူ ထွံၣ်အအိၣ်န့ၣ်ဘၣ်.”

²⁷ပိာ်မုၣ်စံးဆၢတၢ်ဒီးစံး, “ကစၢ်ဧၢ, နတဲတၢ်န့ၣ်မ့ၢ်တီမးလီၤ. ဘၣ်ဆၣ်, တၢ်အီၣ်အဘျဲၣ်အစဲၢ်လၢအဟဲလီၤတဲာ်လၢ ကစၢ်အစီၢ်နီၤခိၣ်ဒၣ်လဲာ်န့ၣ်, ထွံၣ်အီၣ်ဘၣ်ဝဲလီၤ.”

²⁸တုၤနုၤတစု, ယ့ၣ်ၡူးစံးဆၢအီၤ, “ပိာ်မုၣ်ဧၢ, နတၢ်နာ်အသဟီၣ်ဆူၣ်ဒိၣ်မးလီၤ. မ်တၢ်ကမၤအသးလၢနဂီၢ်, ဒ်နဆၢနဲအသိးန့ၣ်တက့ၢ်.” ဒီးအဖိမုၣ်န့ၣ်, ဘျါက့ၤဝဲတကတီၢ်ဃီန့ၣ်လီၤ.

²⁹ယ့ၣ်ၡူးဟးထီၣ်ဝဲဖဲတၢ်လီၢ်န့ၣ်, ဒီးလဲၤတၢ်လၢပီၣ်လဲၣ်ကၤလံၤလါအနံၤလီၤ. လဲၤထီၣ်ဝဲဆူတၢ်လူၢ်တလူၢ်အဒီခိၣ်, ဒီးဆ့ၣ်နီၤဝဲဖဲန့ၣ်လီၤ.

³⁰ဒီးပှၤဂီၢ်မုၢ်ဖးဒိၣ်ဟဲဆူအအိၣ်, ဟဲစိာ်ဃုာ်ဒီးပှၤအခီၣ်ဟးဂီၤ, ပှၤအစုကၢ်အခီၣ်ချံး, ပှၤအမဲာ်ဘျီၣ်, ပှၤအုးအးဒီးပှၤဘၣ်ဆူးဘၣ်ဆါအဂုၤအဂၤအါဂၤ, ဒီးပာ်လီၤဝဲလၢယ့ၣ်ၡူးအခီၣ်ထံး, ဒီးအဝဲဒၣ်မၤဘျါက့ၤအဝဲသ့ၣ်လီၤ.

³¹တုၤပှၤဂီၢ်မုၢ်တဖၣ်ထံၣ်ဘၣ်ပှၤအုးအးကတိၤထီၣ်တၢ်, ပှၤအစုကၢ်အခီၣ်ချံးတဖၣ်ဂ့ၤထီၣ်က့ၤ, ပှၤအခီၣ်ဟးဂီၤတဖၣ်ဟးထီၣ်က့ၤ, ဒီးပှၤအမဲာ်ဘျီၣ်ထံၣ်ထီၣ်က့ၤတၢ်ဒီး, ကမၢကမၣ်ဝဲ ဒီးစံးထီၣ်ပတြၢၤအံၣ်စရ့လးအကစၢ်ယွၤလီၤ.

³²ယ့ၣ်ၡူးကိးန့ၢ်အပျဲၢ်အဘီၣ်တဖၣ်ဆူအအိၣ်ဒီးစံးဘၣ်အဝဲသ့ၣ်, “ယသးကညီၤဘၣ်ပှၤဂီၢ်မုၢ်တဖၣ်အံၤလီၤ. အဂ့ၢ်ဒ်အံၤ, အဝဲသ့ၣ်အိၣ်တ့ၢ်ဒီးယၤသၢနံၤလံ. ဒီးအခဲအံၤ အတၢ်အီၣ်တအိၣ်ဘၣ်နီတမံၤဘၣ်. ယတအဲၣ်ဒိးဒုးက့ၤအဝဲသ့ၣ်လၢ တၢ်သၣ်ဝံၤသၣ်စ့ၤအပူၤဘၣ်. ကလီၤဘှံးလီၤဘှါဘၣ်ဖုးလၢကျဲလီၤ.”

³³အပျဲၢ်အဘီၣ်တဖၣ်စံးဘၣ်အီၤ, “ပကလဲၤမၤန့ၢ်ဘၣ်တၢ်အီၣ်တၢ်အီလၢ အကလၢဝဲလၢပကဒုးအီၣ်ပှၤဂီၢ်မုၢ်ဖးဒိၣ်အံၤအဂီၢ်, လၢပှၢ်မုၢ်ကနၢအံၤအပူၤဖဲလဲၣ်.”

³⁴ယ့ၣ်ၡူးသံကွၢ်အဝဲသ့ၣ်, “သုကိၣ်အိၣ်ပှံၤဖျၢၣ်လဲၣ်.” အဝဲသ့ၣ်စံးဆၢဝဲ, “ကိၣ်နွံဖျၢၣ်ဒီးညၣ်ဖိစှၤဘ့ၣ်လီၤ.”

³⁵တုၤနုၤတစုယ့ၣ်ၡူးမၤလိာ်ပှၤဂီၢ်မုၢ်လၢကဆ့ၣ်နီၤလၢဟီၣ်ခိၣ်အလိၤလီၤ.

³⁶အဝဲဟံးန့ၢ်ကိၣ်နွံဖျၢၣ်ဒီးညၣ်ဖိတဖၣ်န့ၣ်, စံးထီၣ်ပတြၢၤကစၢ်ယွၤအဘျုးအဖှိၣ်ဝံၤဒီးစိၢ်ဘျဲးဝဲ, ဒီးဟ့ၣ်လီၤဝဲအပျဲၢ်အဘီၣ်, ဒီးအပျဲၢ်အဘီၣ်တဖၣ်ဟ့ၣ်လီၤပှၤဂီၢ်မုၢ်တဖၣ်လီၤ.

³⁷အဝဲသ့ၣ်ကိးဂၤဒဲးအီၣ်ဝဲဒီးဘျဲးအီၣ်ဘျဲးအီဝဲလီၤ. အပျဲၢ်အဘီၣ်တဖၣ်ထၢဖှိၣ်က့ၤတၢ်အဘျဲၣ်အစဲၢ်ပှဲၤကုနွံဒုလီၤ.

³⁸လၢပိာ်မုၣ်ဒီးဖိသၣ်အမဲာ်ညါ, ပှၤပိာ်ခွါလၢအအီၣ်တၢ်ခဲလၢာ်အိၣ်ဝဲလွံၢ်ကထိဂၤလီၤ.

³⁹ဒီးပျၢ်ကွံာ်ပှၤဂီၢ်မုၢ်တဖၣ်န့ၣ်ဒီး, လဲၤနုာ်ဆူချံပူၤဒီးလဲၤဆူကီၢ်မၤကဒၣ်အခိၣ်အဃၢၤန့ၣ်လီၤ.