Read S'gaw Karen လံာ်မးသဲ 19 Bible Online

လံာ်မးသဲ 19 - S'gaw Karen bible

လံာ်မးသဲ 19

¹တုၤယ့ၣ်ၡူးစံးတၢ်တဖၣ်အံၤဝံၤဒီး, ဟးထီၣ်ကွံာ်ဝဲလၢကီၢ်ကၤလံၤလါ, ဒီးလဲၤနုာ်ဝဲဆူကီၢ်ယူဒၤလၢအအိၣ်လၢယၢ်ဒ့ၣ်အဝၢ်ဘးခီအပူၤ န့ၣ်လီၤ.

²ဒီးပှၤဂီၢ်မုၢ်ဖးဒိၣ်တဖၣ်ပိာ်ထီၣ်အခံ, ဒီးအဝဲဒၣ်မၤဘျါက့ၤအဝဲသ့ၣ်ဖဲန့ၣ်လီၤ.

³ပှၤဖၤရံၤၡဲတနီၤဟဲဆူအအိၣ်, ဒီးဒ်သိးအကမၤကွၢ်အီၤအဂီၢ်န့ၣ်, သံကွၢ်တၢ်ဒီးစံးဝဲ, “မ့ၢ်ပတၢ်သိၣ်တၢ်သီဟ့ၣ်ပှၤကညီတၢ်ပျဲလၢအကပာ်မၢ် အမါလၢတၢ်ဂ့ၢ်တမံၤဂ့ၤတမံၤဂ့ၤအဃိဧါ.”

⁴ယ့ၣ်ၡူးစံးဆၢဝဲ, “ပှၤလၢအတ့လီၤပှၤကညီလၢအခီၣ်ထံးလံၤလံၤန့ၣ်, တ့လီၤအီၤပိာ်ခွါဒီးပိာ်မုၣ်န့ၣ်, မ့ၢ်သုတဖးဘၣ်ဘၣ်ဧါ.

⁵ဒီးကစၢ်ယွၤစံးဝဲ, ‘လၢတၢ်န့ၣ်အဃိ, ပိာ်ခွါကဟးသဒၣ်ကွံာ်အမိၢ်ဒီးအပၢ်, ဒီးကဘျုးအသးဒီးအမါ, ဒီးတၢ်လၢပှၤခံဂၤန့ၣ်ကကဲထီၣ်တၢ်တသွံၣ်ဃီတညၣ်ဃီလီၤ’ (ကဲထီၣ်. ၂:၂၄).

⁶မၤသးဒ်န့ၣ်ဒီး, အဝဲသ့ၣ်တမ့ၢ်လၢၤပှၤခံဂၤဘၣ်, မ့ၢ်တသွံၣ်ဃီတညၣ်ဃီလီၤ. လၢတၢ်န့ၣ်အဃိ, တၢ်လၢကစၢ်ယွၤပာ်ဃုာ်ဝဲန့ၣ်, မ်ပှၤကညီသုတထုးဖှၣ်တဂ့ၤ.”

⁷ပှၤဖၤရံၤၡဲတဖၣ်စံးဘၣ်အီၤ, “မ့မ့ၢ်ဒ်န့ၣ်ဒီး, ဘၣ်မနုၤစီၤမိၤၡ့ဟ့ၣ်တၢ်သိၣ်တၢ်သီလၢပှၤပိာ်ခွါကဟ့ၣ် အမါလၢလံာ်လီၤဖှၣ်ဒီးကပာ်မၢ်အီၤန့ၣ်လဲၣ်.”

⁸ယ့ၣ်ၡူးစံးဆၢအဝဲသ့ၣ်, “မ့ၢ်လၢပှၤသိၣ်က့ၤသီက့ၤသုကီဒိၣ်မးအဃိ, စီၤမိၤၡ့ဟ့ၣ်သုတၢ်ပျဲလၢသုကပာ်မၢ်သုမါလီၤ. ဘၣ်ဆၣ်ဒီး လၢယွၤတ့လီၤသီတၢ်အခီၣ်ထံးန့ၣ်, တမ့ၢ်ဘၣ်ဒ်န့ၣ်အသိးဘၣ်.

⁹ဒီးယစံးဘၣ်သု, ပှၤတဂၤလၢ်လၢ်လၢအပာ်မၢ်ကွံာ်အမါလၢ အတမ့ၢ်ဘၣ်တၢ်အဲၣ်ဘၢဝၤအဃိ, ဝံၤအိၣ်ဃုာ်ဒီးပိာ်မုၣ်အဂၤတဂၤန့ၣ်, မ့ၢ်ပှၤလၢအအဲၣ်ဘၢအမါလီၤ. (ဒီးပှၤလၢအအိၣ်ဃုာ်ဒီးပိာ်မုၣ် လၢအဘၣ်တၢ်ပာ်မၢ်ကွံာ်အီၤန့ၣ်မၤကမၣ်ပှၤအမါလီၤ.)”

¹⁰အပျဲၢ်အဘီၣ်တဖၣ်စံးဘၣ်အီၤ, “တၢ်မ့မ့ၢ်ဒ်အံၤလၢဝၤဒီးမါအဘၢၣ်စၢၤဒီး, ပှၤတဂ့ၤန့ၢ်မါန့ၢ်ဝၤဘၣ်လီၤ.”

¹¹ယ့ၣ်ၡူးစံးဆၢအဝဲသ့ၣ်, “တၢ်သိၣ်လီၤသီလီၤအံၤပှၤတူၢ်လိာ်တသ့ဘၣ်ခဲလၢာ်ဘၣ်. ပှၤတူၢ်လိာ်သ့ဒၣ်ထဲပှၤလၢကစၢ်ယွၤဟ့ၣ်လီၤအီၤတဖၣ်ဧိၤလီၤ.

¹²အဂ့ၢ်ဒ်အံၤ, ပှၤတနီၤမ့ၢ်ပှၤဒ့ဒံၣ်ဖိလၢအမိၢ်အဟၢဖၢပူၤလံၤလံၤ, ဒီးပှၤတနီၤဘၣ်တၢ်ဒုးကဲထီၣ်အီၤလၢပှၤဒ့ဒံၣ်ဖိလၢပှၤကညီအစုပူၤ, ဒီးပှၤတနီၤဒုးကဲထီၣ်လီၤက့ၤအသးလၢပှၤဒ့ဒံၣ်ဖိလၢမူခိၣ် အဘီအမုၢ်အဃိလီၤ. ပှၤလၢအတူၢ်လိာ်တၢ်အံၤသ့န့ၣ်မ်အတူၢ်လိာ်ဒၣ်ဝဲတက့ၢ်.”

¹³ပှၤတနီၤဟဲဆှၢဖိသၣ်တဖၣ်ဆူအအိၣ်, ဒ်သိးအကပာ်ထီၣ်အစုလၢ အလိၤ, ဒီးကဃ့ဘါထုကဖၣ်လၢအဂီၢ်လီၤ. ဘၣ်ဆၣ်အပျဲၢ်အဘီၣ်တဖၣ်ဒူပှၤတဖၣ်န့ၣ်အလိၤလီၤ.

¹⁴ယ့ၣ်ၡူးစံးဝဲ, “ပျဲဖိသၣ်တဖၣ်န့ၣ်ဟဲဆူယအိၣ်တက့ၢ်. ဒီးတြီအီၤ တဂ့ၤ. အဂ့ၢ်ဒ်အံၤ မူခိၣ်အဘီအမုၢ်ဘၣ်ဃးဒီးပှၤဒ်ဖိသၣ်တဖၣ်အံၤ အသိးန့ၣ်လီၤ.”

¹⁵ဒီးအဝဲပာ်ထီၣ်အစုလၢအဝဲသ့ၣ်အလိၤ, ဝံၤဒီးဟးထီၣ်ကွံာ်ဝဲဖဲန့ၣ်လီၤ.

¹⁶ဘၣ်တဘျီပှၤတဂၤဟဲဆူယ့ၣ်ၡူးအအိၣ်ဒီးစံးဝဲ, “သရၣ်ဧၢ, ဒ်သိးယကဒိးန့ၢ်ဘၣ်တၢ်မူအထူအယိာ်န့ၣ်, ယကဘၣ်မၤတၢ်ဂ့ၤမနုၤတမံၤလဲၣ်.”

¹⁷ယ့ၣ်ၡူးစံးဆၢအီၤ, “ဘၣ်မနုၤလၢနသံကွၢ်ယၤဘၣ်ဃးဒီးတၢ်ဂ့ၤန့ၣ်လဲၣ်. ပှၤအဂ့ၤအိၣ်ဒၣ်ထဲယွၤတဂၤဧိၤလီၤ. နမ့ၢ်အဲၣ်ဒိးလဲၤနုာ်လီၤဆူတၢ်မူအထူအယိာ်အပူၤဒီး, တိၢ်န့ၢ်တၢ်မၤလိာ်တဖၣ်န့ၣ်တက့ၢ်.”

¹⁸အဝဲသံကွၢ်တၢ်ဒီးစံး, “တၢ်မၤလိာ်မနုၤတဖၣ်လဲၣ်.” ဒီးယ့ၣ်ၡူးစံးဆၢအီၤ, “မၤသံပှၤကညီတဂ့ၤ. အဲၣ်ဘၢမါအဲၣ်ဘၢဝၤတဂ့ၤ. ဟုၣ်တၢ်တဂ့ၤ. အုၣ်နသးကဘျံးကဘျၣ်တဂ့ၤ.

¹⁹ယူးယီၣ်နမိၢ်ဒီးနပၢ်တက့ၢ်. ဒီးအဲၣ်ပှၤလၢနဃၢၤဒ်နအဲၣ်လီၤနသးဒၣ်နဲ အသိးန့ၣ်တက့ၢ်” (ဟးထီၣ်. ၂၀:၁၂-၁၆).

²⁰ဒီးပှၤဖိၣ်သၣ်ခွါန့ၣ်စံးဘၣ်ယ့ၣ်ၡူး, “တၢ်မၤလိာ်တဖၣ်အံၤ, ယတိၢ်န့ၢ်ဒီးမူထွဲအီၤခဲလၢာ်လံ. မ့ၢ်ယကဘၣ်မၤဒံးတၢ်အဂၤမနုၤလဲၣ်.”

²¹ယ့ၣ်ၡူးစံးဘၣ်အီၤ, “နမ့ၢ်သးအိၣ်လၢနကလၢထီၣ်ပှဲၤထီၣ်န့ၣ်, လဲၤဒီးဆါလီၤကွံာ်တၢ်လၢအအိၣ်ဒီးနၤခဲလၢာ်, ဒီးဟ့ၣ်လီၤနကျိၣ်နစ့ဆူပှၤဖှီၣ်ဖိယာ်ဖိတက့ၢ်. တုၤနုၤတစု နကအိၣ်ဒီးတၢ်ထူးတၢ်တီၤလၢမူခိၣ်လီၤ. အန့ၣ်ဝံၤ, ဟဲဒီးကဲဘၣ်ယပျဲၢ်ယဘီၣ်တက့ၢ်.”

²²တုၤပှၤဖိၣ်သၣ်ခွါနၢ်ဟူတၢ်ကတိၤအံၤဒီး, ဟးထီၣ်ကွံာ်ဝဲလၢတၢ်သးအုးအပူၤလီၤ. အဂ့ၢ်ဒ်အံၤ, အဝဲအိၣ်ဒီးတၢ်ထူးတၢ်တီၤအါအါကလဲာ်လီၤ.

²³တုၤနုၤတစု, ယ့ၣ်ၡူးစံးဘၣ်အပျဲၢ်အဘီၣ်တဖၣ်, “နာ်ယၤတက့ၢ်. ယစံးဘၣ်သု, ပှၤထူးပှၤတီၤကလဲၤနုာ်ဆူမူခိၣ်အဘီအမုၢ်ပူၤန့ၣ်, မ့ၢ်တၢ်ကီဒိၣ်မးလီၤ.

²⁴ယစံးဘၣ်ကဒီးသု, ကီၤလၤအူးတဒုဝၣ်ဖျိထးအမဲၢ်ခံန့ၣ်, ညီဒိၣ်န့ၢ်ဒံးပှၤထူးပှၤတီၤတဂၤကလဲၤနုာ်ဆူမူခိၣ်ဘီမုၢ် အပူၤတက့ၢ်လီၤ.”

²⁵တုၤအပျဲၢ်အဘီၣ်တဖၣ်နၢ်ဟူတၢ်ကတိၤအံၤဒီး, ကမၢကမၣ်ဝဲဒိၣ်ဒိၣ်ကလဲာ်, ဒီးသံကွၢ်တၢ်ဒီးစံးဝဲ, “မ့မ့ၢ်ဒ်န့ၣ်ဒီးမ့ၢ်မတၤဒိးန့ၢ်ဘၣ်တၢ်အုၣ်က့ၤခီၣ်က့ၤ ကသ့တဂၤလဲၣ်.”

²⁶ယ့ၣ်ၡူးကွၢ်အဝဲသ့ၣ်လိၤလိၤဒီးစံး, “လၢပှၤကညီအဂီၢ်တၢ်အံၤမ့ၢ်တၢ်လၢအမၤအသးတသ့ဘၣ်လီၤ. ဘၣ်ဆၣ်လၢကစၢ်ယွၤအဂီၢ်န့ၣ်တၢ်ခဲလၢာ်မၤအသးသ့ဝဲလီၤ.”

²⁷တုၤနုၤတစု စီၤပ့းတရူးကတိၤထီၣ်တၢ်ဒီးစံးဝဲ, “ပဝဲဒၣ်အံၤပပာ်တ့ၢ်တၢ်ခဲလၢာ်, ဒီးပပိာ်တ့ၢ်နခံလံ, မ့ၢ်ပကဒိးန့ၢ်ဘၣ်တၢ်မနုၤလဲၣ်.”

²⁸ယ့ၣ်ၡူးစံးဘၣ်အဝဲသ့ၣ်, “နာ်ယၤတက့ၢ်. လၢစိၤအသီအပူၤ, ဖဲပှၤကညီဖိခွါကဆ့ၣ်နီၤလၢအလီၢ်ပစိာ်လၢအအိၣ်ဒီး အလၤကပီၤအဖီခိၣ်န့ၣ်, သုဝဲလၢအပိာ်တ့ၢ်ယခံတဖၣ်, သုကဆ့ၣ်နီၤလၢလီၢ်ပစိာ်တဆံခံဖျၢၣ်အဖီခိၣ်, ဒီးပၢဘၣ်ပှၤအံၣ်စရ့လးဖိတဆံခံဒူၣ်န့ၣ်လီၤ.

²⁹ဒီးပှၤတဂၤလၢ်လၢ်လၢအပာ်တ့ၢ်အဟံၣ်တဖၣ်မ့ၢ်ဂ့ၤ, အဒီပုၢ်ဝဲၢ်ခွါမ့ၢ်ဂ့ၤ, အဒီပုၢ်ဝဲၢ်မုၣ်မ့ၢ်ဂ့ၤ, အပၢ်မ့ၢ်ဂ့ၤ, အမိၢ်မ့ၢ်ဂ့ၤ, အဖိအလံၤမ့ၢ်ဂ့ၤ, အဟီၣ်ခိၣ်မ့ၢ်ဂ့ၤ, လၢယမံၤအဃိန့ၣ်, ကဒိးန့ၢ်အါထီၣ်က့ၤဝဲအစးတကယၤဒီးကန့ၢ်သါဘၣ်တၢ်မူအထူ အယိာ်လီၤ.

³⁰ဘၣ်ဆၣ်ဒီး, ပှၤအိၣ်ဝဲလၢညါကတၢၢ်ခဲအံၤအါဂၤ, ကအိၣ်က့ၤလၢခံကတၢၢ်, ဒီးပှၤအိၣ်လၢခံကတၢၢ်ခဲအံၤအါဂၤ, ကအိၣ်က့ၤလၢညါကတၢၢ်လီၤ.