Read S'gaw Karen လံာ်မးသဲ 21 Bible Online

လံာ်မးသဲ 21 - S'gaw Karen bible

လံာ်မးသဲ 21

¹ဖဲယ့ၣ်ၡူးဒီးအပျဲၢ်အဘီၣ်တဖၣ်လဲၤဘူးထီၣ်ဒီးဝ့ၢ်ယရူၤၡလ့ၣ်, တုၤဃီၤဝဲလၢသဝီဘ့ၤသဖၤက့လၢကစၢၢ်သ့ၣ်စၤယံးဒီး, ယ့ၣ်ၡူးမၢလီၤဆိအပျဲၢ်အဘီၣ်ခံဂၤ

²ဒီးစံးဘၣ်အဝဲသ့ၣ်, “လဲၤနုာ်ဆူသဝီလၢအအိၣ်လၢသုမဲာ်ညါတက့ၢ်. ဒီးတဘျီဃီသုကထံၣ်ဘၣ်ကသ့ၣ်ယီၤမိၢ်တဒုအိၣ်စၢဃာ်အသးအိၣ် ဃုာ်ဒီးအဖိတဒုလၢအကပၤလီၤ. ဃ့ၣ်လီၤဒီးဟဲက့ၤမိၤအဝဲသ့ၣ်ဆူယအိၣ်တက့ၢ်.

³ဒီးပှၤတဂၤဂၤမ့ၢ်စံးဘၣ်သုတၢ်တမံၤမံၤဒီး, သုဘၣ်စံးဘၣ်က့ၤအီၤလၢကစၢ်လိၣ်ဘၣ်အီၤလီၤ, ဒီးကဟ့ၣ်လီၤဝဲတဘျီဃီလီၤ.”

⁴တၢ်အံၤမၤအသး, မ့ၢ်ဒ်သိးဒီးတၢ်လၢဝံစံးတ့ၢ်ဝဲကလၢ ထီၣ်ပှဲၤထီၣ်အဂီၢ်, ဖဲအစံးဝဲ,

⁵“စံးဘၣ်တဲဘၣ်ဝ့ၢ်စံယိၣ် ကွၢ်တက့ၢ်. နစီၤပၤဟဲဆူနအိၣ်, အသူၣ်စူၤအသးစူၤဒီးဒိးဝဲကသ့ၣ်ယီၤ ကသ့ၣ်ယီၤအသးစၢ်, ကသ့ၣ်ယီၤအဖိလီၤ” (ကၤ. ၉:၉).

⁶လၢတၢ်န့ၣ်အဃိအပျဲၢ်အဘီၣ်တဖၣ်လဲၤဒီးမၤဝဲဒ်ယ့ၣ်ၡူးမၤလိာ် အဝဲသ့ၣ်အသိးန့ၣ်လီၤ.

⁷အဝဲသ့ၣ်ဟဲက့ၤမိၤကသ့ၣ်ယီၤမိၢ်ဒီးအဖိ, ပာ်ထီၣ်အဝဲသ့ၣ်အကူအသိးလၢကသ့ၣ်ယီၤတဖၣ်အလိၤ, ဒီးယ့ၣ်ၡူးဆ့ၣ်နီၤဝဲလၢအဖီခိၣ်လီၤ.

⁸ပှၤဂီၢ်မုၢ်အါဒံအါဂၤဒါလီၤအကူအသိးလၢကျဲအလိၤ, ဒီးအဂၤတဖၣ်ပဲာ်လီၤသ့ၣ်ဒ့တဖၣ်ဒီးပာ်လီၤဝဲလၢကျဲအလိၤလီၤ.

⁹ဒီးပှၤဂီၢ်မုၢ်လၢအလဲၤလၢယ့ၣ်ၡူးအမဲာ်ညါဒီးပှၤလၢအပိာ်ထီၣ် အခံတဖၣ်ကိးပသူထီၣ်ဒီးစံး, “စီၤဒၤဝံးအဖိခွါဧၢ, အုၣ်က့ၤခီၣ်က့ၤပှၤတက့ၢ်. ပှၤလၢအဟဲလၢကစၢ်အမံၤတဂၤန့ၣ်မ်ယွၤဆိၣ်ဂ့ၤအီၤတက့ၢ်. မ်ကစၢ်ယွၤအမံၤဘၣ်တၢ်စံးထီၣ်ပတြၢၤအီၤတက့ၢ်” (စံး. ၁၁၈:၂၅-၂၆).

¹⁰တုၤယ့ၣ်ၡူးလဲၤနုာ်ဆူဝ့ၢ်ယရူၤၡလ့ၣ်အပူၤဒီး, တၢ်တၢထီၣ်တၢလီၤဒီဝ့ၢ်ညါဒီးပှၤဝ့ၢ်ဖိတဖၣ်သံကွၢ်တၢ်ဒီး စံး, “ပှၤအံၤမ့ၢ်မတၤလဲၣ်.”

¹¹ဒီးပှၤဂီၢ်မုၢ်တဖၣ်စံးဆၢဝဲ, “အအံၤမ့ၢ်ဝံယ့ၣ်ၡူးလၢဝ့ၢ်နစၤရ့းဘၣ်ဃးဒီး ကီၢ်ကၤလံၤလါန့ၣ်လီၤ.”

¹²ယ့ၣ်ၡူးလဲၤနုာ်ဆူတၢ်လုၢ်ဟံၣ်အပူၤ, ဒီးဟီထီၣ်ကွံာ်ပှၤလၢအဆါတၢ်ပှ့ၤတၢ်လၢတၢ်လုၢ်ဟံၣ်အပူၤခဲလၢာ်, ဒီးမၤလီၤတကျၢၢ်ကွံာ်ပှၤခီလဲကျိၣ်စ့တဖၣ်အစီၢ်နီၤခိၣ် တဖၣ်, ဒီးပှၤဆါထိၣ်လွံၢ်တဖၣ်အလီၢ်ဆ့ၣ်နီၤတဖၣ်န့ၣ်လီၤ.

¹³ဒီးစံးဘၣ်အဝဲသ့ၣ်, “တၢ်ကွဲးအသးစီဆှံစံးဝဲလၢကစၢ်ယွၤစံးဝဲဒၣ်, ‘ယဟံၣ်ကဘၣ်တၢ်ကိးအီၤလၢတၢ်ထုကဖၣ်အဟံၣ်လီၤ.’ ဘၣ်ဆၣ်ဒီး, သုဒုးကဲထီၣ်အီၤလၢတၢ်ဟုၣ်တၢ်ဘျၣ်တဖၣ်အတၢ်အိၣ်ခူ သူၣ်အလီၢ်တပူၤလီၤ” (ၡါ. ၅၆:၇; ယံး ၇:၁၁).

¹⁴ပှၤမဲာ်ဘျီၣ်ဒီးပှၤစုကၢ်ခီၣ်ချံးတဖၣ်ဟဲဆူအအိၣ်လၢတၢ်လုၢ် ဟံၣ်အပူၤ, ဒီးအဝဲမၤဘျါက့ၤအဝဲသ့ၣ်လီၤ.

¹⁵ပှၤလုၢ်တၢ်အခိၣ်အဒိၣ်တဖၣ်, ဒီးပှၤသ့တၢ်ဘူၣ်တၢ်ဘါအတၢ်သိၣ် တၢ်သီတဖၣ်, အသးဒိၣ်ထီၣ်ဝဲဖဲအထံၣ်တၢ်လီၤလးတဖၣ်လၢအဝဲဒၣ်မၤဝဲ, ဒီးနၢ်ဟူဖိဒံဖိသၣ်တဖၣ်ကိးပသူထီၣ်လၢတၢ်လုၢ်ဟံၣ်အပူၤဒီး စံး, “တၢ်စံးထီၣ်ပတြၢၤမ်အဘၣ်စီၤဒၤဝံးအဖိခွါတက့ၢ်” အခါန့ၣ်လီၤ.

¹⁶ဒီးအဝဲသ့ၣ်စံးဘၣ်ယ့ၣ်ၡူး, “အဝဲသ့ၣ်တဲတၢ်န့ၣ်နနၢ်ဟူဧါ.” ယ့ၣ်ၡူးစံးဆၢအဝဲသ့ၣ်, “ယနၢ်ဟူယဲသၢၣ်. မ့ၢ်သုတဖးဘၣ်တၢ်ကွဲးအသးစီဆှံလၢအစံး, ‘ယွၤကတဲာ်ကတီၤတၢ်စံးထီၣ်ပတြၢၤလၢဖိသၣ်တဖၣ်ဒီးဖိဆံးအီၣ် နုၢ်ထံဖိတဖၣ်အထးခိၣ်’ နီတဘျီဘၣ်ဧါ” (စံး. ၈:၂).

¹⁷ဒီးယ့ၣ်ၡူးဟးထီၣ်ကွံာ်လၢအဝဲသ့ၣ်အအိၣ်လၢဝ့ၢ်ပူၤ, ဒီးလဲၤဝဲဆူဝ့ၢ်ဘ့ၤသနံဒီးအိၣ်ဝဲဖဲန့ၣ်ဒီနၤညါလီၤ.

¹⁸တုၤမုၢ်ဆ့ၣ်ထီၣ်ဂီၤဂီၤဖဲယ့ၣ်ၡူးက့ၤကဒါက့ၤဆူဝ့ၢ်အဖၢမုၢ်န့ၣ်, တၢ်သၣ်ဝံၤအသးလီၤ.

¹⁹အဝဲထံၣ်ချၢၣ်ဒၢတထူၣ်လၢကျဲကပၤဒီးလဲၤဝဲဆူအခီၣ်ထံး, ဘၣ်ဆၣ်တထံၣ်န့ၢ်အသၣ်နီတဖျၢၣ်ဘၣ်, ထံၣ်ဝဲထဲအလၣ်ဧိၤလီၤ. ဒီးအဝဲစံးဘၣ်သ့ၣ်န့ၣ်, “မ်နသုတသၣ်ထီၣ်နီတဘျီလၢၤတဂ့ၤ.” တဘျီဃီချၢၣ်ဒၢတထူၣ်န့ၣ်ဃ့ထီကွံာ်ဝဲလီၤ.

²⁰အပျဲၢ်အဘီၣ်တဖၣ်ထံၣ်တၢ်မၤအသးအံၤဒီး, ကမၢကမၣ်ဝဲဒိၣ်မး, ဒီးစံး, “ချၢၣ်ဒၢတထူၣ်အံၤဃ့ထီကွံာ်ဝဲချ့သဒံးဒ်လဲၣ်.”

²¹ယ့ၣ်ၡူးစံးဆၢအဝဲသ့ၣ်ဒီးစံး, “နာ်ယၤတက့ၢ်. ယစံးဘၣ်တဲဘၣ်သု, သုမ့ၢ်အိၣ်ဒီးတၢ်နာ်ဒီးသုသးမ့ၢ်တဒ့ဒီဘၣ်န့ၣ်, တၢ်လၢယမၤဘၣ်ချၢၣ်ဒၢအံၤသုမၤကသ့ဒီးအါန့ၢ်အန့ၣ်သုမ့ၢ်စံးဘၣ် ကစၢၢ်အံၤ, ‘သုးကွံာ်နသးဒီးတ့ၢ်လီၤကွံာ်နသးဆူပီၣ်လဲၣ်ပူၤတက့ၢ်’ န့ၣ်, ကမၤအသးလီၤ.

²²သုမ့ၢ်နာ်တၢ်ဒီးတၢ်လၢသုဃ့ယွၤလၢသုတၢ်ထုကဖၣ်အပူၤန့ၣ်, သုကဒိးန့ၢ်ဘၣ်အီၤလီၤ.”

²³ယ့ၣ်ၡူးက့ၤကဒါက့ၤဆူတၢ်လုၢ်ဟံၣ်အပူၤ, ဒီးဖဲအဝဲသိၣ်လီၤသီလီၤတၢ်အဖၢမုၢ်န့ၣ်, ပှၤလုၢ်တၢ်အခိၣ်အဒိၣ်တဖၣ်ဒီးပှၤယူဒၤဖိကရၢအခိၣ်အနၢ်တဖၣ် ဟဲဆူအအိၣ်ဒီးသံကွၢ်အီၤ, “လၢနကမၤတၢ်တဖၣ်အံၤအဂီၢ်န့ၣ်, နန့ၢ်ဘၣ်တၢ်စိတၢ်ကမီၤဖဲလဲၣ်. မတၤတဂၤဟ့ၣ်စိဟ့ၣ်ကမီၤနၤလဲၣ်.”

²⁴ယ့ၣ်ၡူးစံးဆၢအဝဲသ့ၣ်ဒီးစံး, “ယကသံကွၢ်သုထဲတၢ်သံကွၢ်တဘီဧိၤလီၤ. သုစံးဆၢယၤမ့ၢ်ဘၣ်ဒီး, လၢယကမၤတၢ်တဖၣ်အံၤအဂီၢ်, ယန့ၢ်ဘၣ်တၢ်စိတၢ်ကမီၤဖဲလဲၣ်န့ၣ်ယကတဲဘၣ်သုလီၤ.

²⁵စီၤယိၤဟၣ်ဘျၢပှၤလၢထံန့ၣ်, ဒိးန့ၢ်တၢ်စိတၢ်ကမီၤလၢလဲၣ်. မ့ၢ်အဒိးန့ၢ်ဝဲလၢကစၢ်ယွၤအအိၣ်ဧါ. မ့တမ့ၢ်ဘၣ်ဒီး လၢပှၤဟီၣ်ခိၣ်ဖိအအိၣ်လဲၣ်.” အဝဲသ့ၣ်ကတိၤဂ့ၢ်လိာ်ဘှီလိာ်အသးဒီးစံး, “ပမ့ၢ်စံး, ‘လၢကစၢ်ယွၤအအိၣ်’ ဒီးကတဲပှၤ, ‘မ့မ့ၢ်ဒ်န့ၣ်ဒီးဘၣ်မနုၤလၢသုတနာ်စီၤယိၤဟၣ်လဲၣ်.’

²⁶ပမ့ၢ်စံး, ‘လၢပှၤဟီၣ်ခိၣ်ဖိအအိၣ်’ ဒီးပဘၣ်ပျံၤဘၣ်ပှၤဂီၢ်မုၢ်လီၤ. အဂ့ၢ်ဒ်အံၤ, ပှၤဂီၢ်မုၢ်နာ်လၢစီၤယိၤဟၣ်မ့ၢ်ဝံတဂၤလီၤ.”

²⁷လၢတၢ်န့ၣ်အဃိ, အဝဲသ့ၣ်စံးဆၢယ့ၣ်ၡူးဒီးစံး, “ပတသ့ၣ်ညါဘၣ်.” ဒီးယ့ၣ်ၡူးစံးဘၣ်အဝဲသ့ၣ်, “မ့မ့ၢ်ဒ်န့ၣ်ဒီး, ယဲစ့ၢ်ကီးယမၤတၢ်တဖၣ်အံၤလၢမတၤအစိကမီၤလဲၣ်န့ၣ်, ယတတဲသုဘၣ်.

²⁸သုကစံးဒ်လဲၣ်. တၢ်စံးဝဲလၢပှၤတဂၤအဖိခွါအိၣ်ခံဂၤလီၤ. လဲၤဝဲဆူအဖိခွါအဒိၣ်တဂၤအအိၣ်ဒီးစံး, ‘ဖိခွါဧၢ, တနံၤအံၤလဲၤဒီးမၤတၢ်လၢစပံးလီၢ်အပူၤတက့ၢ်.’

²⁹ဒီးအဖိခွါန့ၣ်စံးဆၢအီၤ, ‘ယတလဲၤဘၣ်.’ ဘၣ်ဆၣ်လၢခံက့ၤအသးလဲလိာ်အသးဒီးလဲၤဝဲလီၤ.

³⁰ပၢ်အံၤလဲၤကဒီးဆူအဖိခွါအဆံးတဂၤအအိၣ်ဒီးစံးတၢ်တမံၤဃီလီၤ. ဖိခွါအံၤစံးဆၢဝဲ, ‘မ့ၢ်ပၢ်ဧၢ, ယကလဲၤ’ ဘၣ်ဆၣ်ဒီးတလဲၤဝဲဘၣ်.

³¹ဖိခွါခံဂၤအံၤ, မ့ၢ်ပှၤမၤတၢ်ဘၣ်အပၢ်အသးလၢလဲၣ်တဂၤလဲၣ်.” ဒီးအဝဲသ့ၣ်စံးဆၢအီၤ, “မ့ၢ်ဖိခွါလၢအဒိၣ်တဂၤလီၤ.” တုၤနုၤတစုယ့ၣ်ၡူးစံးဘၣ်အဝဲသ့ၣ်, “နာ်ယၤတက့ၢ်. ပှၤဃ့သွဲတဖၣ်ဒီးပိာ်မုၣ်ဟးဂီၤတဖၣ်ကလဲၤနုာ်ဆိဆူ ကစၢ်ယွၤအဘီအမုၢ်အပူၤလၢသုမဲာ်ညါလီၤ.

³²အဂ့ၢ်ဒ်အံၤ, ပှၤဘျၢတၢ်စီၤယိၤဟၣ်ဟဲဒုးနဲၣ်သုလၢတၢ်တီတၢ်လိၤ အကျဲလၢသုကပိာ်အီၤအဂီၢ်, ဒီးသုတနာ်အီၤဘၣ်. မ့မ့ၢ်ပှၤဃ့သွဲတဖၣ်ဒီးပိာ်မုၣ်ဟးဂီၤတဖၣ်နာ်အီၤလီၤ. သုထံၣ်တၢ်အံၤဝံၤအလီၢ်ခံဒၣ်လဲာ်, သုသးတလဲလိာ်အသးဒီးနာ်အီၤဘၣ်.”

³³ယ့ၣ်ၡူးစံးဝဲ, “ကနၣ်ကဒီးတၢ်ကတိၤဒိအဂၤတခါတက့ၢ်. တၢ်စံးဝဲတဘျီ, စပံးလီၢ်ကစၢ်အိၣ်တဂၤလၢအသူၣ်လီၤစပံးလီၢ်တလီၢ်, ဝံၤကရၢဃာ်အီၤဝးတရံး, ဒီးခူၣ်န့ၢ်တၢ်ပူၤတပူၤလၢကဆီလီၤနီၣ်စံၢ်စပံးသၣ်အကျိး အဂီၢ်, ဒီးဘှီထီၣ်ဒဲအခီၣ်ဖးထီတဖျၢၣ်လၢပှၤကခိးစပံးလီၢ်အဂီၢ်လီၤ. တုၤနုၤတစု, ဒိးလဲလီၤဝဲလၢပှၤဒိးလဲစပံးလီၢ်တဖၣ်အစုပူၤ, ဒီးဟးထီၣ်လၢအဟံၣ်ဒီးလဲၤတၢ်လီၤ.

³⁴တုၤတၢ်ဒ့စပံးသၣ်အဆၢကတီၢ်ဘူးထီၣ်ဒီး, အဝဲဆှၢလီၤအခ့အပှၤတဖၣ်ဆူ ပှၤလၢအဒိးလဲစပံးလီၢ်တဖၣ်အအိၣ်, ဒ်သိးအကန့ၢ်ဘၣ်က့ၤတၢ်လၢအဂ့ၤန့ၢ်ဘၣ်ဝဲအဂီၢ်န့ၣ်လီၤ.

³⁵ပှၤဒိးလဲစပံးလီၢ်တဖၣ် ဟံးဃာ်အဝဲအခ့အပှၤတဖၣ်, ဒီးတီၢ်ဝဲတဂၤ, မၤသံဝဲတဂၤ, ဒီးကွံာ်ဝဲလၢလၢၢ်တဂၤလီၤ.

³⁶မၤကဒီး, ဆှၢလီၤအခ့အပှၤအဂၤတဖၣ်အါန့ၢ်လၢအခီၣ်ထံးတဘျီတက့ၢ်, ဒီးအဝဲသ့ၣ်မၤအီၤဒ်လၢညါတဘျီအသိးလီၤ.

³⁷လၢခံကတၢၢ်အဝဲဆှၢလီၤအဖိခွါဆူအဝဲသ့ၣ်အအိၣ်ဒီးစံး, ‘မ့မ့ၢ်ယဖိခွါန့ၣ်, အဝဲသ့ၣ်ကယူးယီၣ်ပာ်ကဲဝဲသပှၢ်ကတၢၢ်လီၤ.’

³⁸ဘၣ်ဆၣ်ဒီး, တုၤပှၤဒိးလဲစပံးလီၢ်တဖၣ်ထံၣ်အဖိခွါန့ၣ်, အဝဲသ့ၣ် စံးလိာ်အသး, ‘အအံၤမ့ၢ်စပံးလီၢ်အကစၢ်အဖိခွါလၢအကန့ၢ်သါတၢ် တဂၤလီၤ. ဟဲ, မ်ပကမၤသံကွံာ်အီၤ, ဒီးပကန့ၢ်ဘၣ်အတၢ်န့ၢ်သါလီၤ.’

³⁹လၢတၢ်န့ၣ်အဃိ, အဝဲသ့ၣ်ဟံးဃာ်အီၤ, ထုးထီၣ်အီၤဆူစပံးလီၢ် အချၢ, ဝံၤမၤသံကွံာ်အီၤလီၤ.”

⁴⁰ယ့ၣ်ၡူးသံကွၢ်အဝဲသ့ၣ်, “တုၤစပံးလီၢ်ကစၢ်ဟဲက့ၤဒီး, ကမၤပှၤဒိးလဲစပံးလီၢ်တဖၣ်အံၤဒ်လဲၣ်.”

⁴¹အဝဲသ့ၣ်စံးဆၢအီၤ, “ကမၤသံပှၤအၢပှၤသီတဖၣ်န့ၣ်သပှၢ်ကတၢၢ်လီၤ. ဒီးကဒိးလဲလီၤဝဲစပံးလီၢ်ဆူပှၤဒိးလဲစပံးလီၢ်အဂၤ, လၢအကဟ့ၣ်အီၤတၢ်လၢအဂ့ၤဒိးန့ၢ်ဝဲဘၣ်ဆၢဘၣ်ကတီၢ် တဖၣ်န့ၣ်လီၤ.”

⁴²ယ့ၣ်ၡူးစံးဘၣ်အဝဲသ့ၣ်, “တၢ်ကွဲးအသးစီဆှံလၢအစံး, ‘လၢၢ်တဖျၢၣ်လၢပှၤသူၣ်ထီၣ်ဟံၣ်တဖၣ်ညိကွံာ်အီၤဒ် တၢ်လၢအလုၢ်အပှ့ၤတအိၣ်ဘၣ်အသိးန့ၣ်, ကဲထီၣ်က့ၤလၢၢ်ခိၣ်စိလၢ အကါဒိၣ်ကတၢၢ်တဖျၢၣ်လီၤ. အအံၤမ့ၢ်ကစၢ်အတၢ်မၤ, ဒီးမ့ၢ်တၢ်လီၤလးဒိၣ်မးလၢပမဲာ်ညါလီၤ’ န့ၣ်, မ့ၢ်သုတဖးဘၣ်ဘၣ်ဧါ” (စံး. ၁၁၈:၂၂-၂၃).

⁴³ယ့ၣ်ၡူးစံးကဒီးဝဲ, “လၢတၢ်န့ၣ်အဃိ, ယစံးဘၣ်သု, ကစၢ်ယွၤအဘီအမုၢ်ကဘၣ်တၢ်ဟံးထီၣ်ကွံာ်အီၤလၢသုအိၣ်, ဒီးဟ့ၣ်လီၤအီၤဆူပှၤတကလုာ်လၢအဟ့ၣ်ထီၣ်တၤသၣ် လၢအကြၢးဝဲဘၣ်ဝဲန့ၣ်လီၤ.”

⁴⁴(ပှၤတဂၤလၢ်လၢ်လၢအလီၤဃံၤလၢလၢၢ်အံၤအဖီခိၣ်န့ၣ်, ကကၢ်ဝဲဒီး လၢၢ်အံၤမ့ၢ်လီၤတဲာ်ဒီးဘၣ်ပှၤတဂၤဂၤဒီး, ကမၤလီၤသဘှံးကွံာ်အီၤလီၤ.)

⁴⁵တုၤပှၤလုၢ်တၢ်အခိၣ်အဒိၣ်တဖၣ်, ဒီးပှၤဖၤရံၤၡဲတဖၣ်နၢ်ဟူယ့ၣ်ၡူးအတၢ်ကတိၤဒိတဖၣ်အံၤဒီး, သ့ၣ်ညါဝဲလၢအစံးတၢ်ဘၣ်ဃးဒီးအဝဲသ့ၣ်အဂ့ၢ်န့ၣ်လီၤ.

⁴⁶လၢတၢ်န့ၣ်အဃိ, အဝဲသ့ၣ်ဂုာ်ကျဲးစၢးဒ်သိးကဖီၣ်ဒီးဟံးဃာ်အီၤန့ၣ်လီၤ. ဘၣ်ဆၣ်, ပျံၤဝဲပှၤဂီၢ်မုၢ်တဖၣ်လၢအပာ်ယ့ၣ်ၡူးဒ်ဝံတဂၤအသိးန့ၣ်လီၤ.