Read S'gaw Karen လံာ်မးသဲ 25 Bible Online

လံာ်မးသဲ 25 - S'gaw Karen bible

လံာ်မးသဲ 25

¹တုၤနုၤတစု, မူခိၣ်အဘီအမုၢ်န့ၣ်ကမၤအသးဒ်အံၤလီၤ. တဘျီပှၤမုၣ်ကနီၤအိၣ်ဝဲအဂၤတဆံ, လၢအဟံးန့ၢ်အမ့ၣ်အူဒၢ, ဒီးဟးထီၣ်လဲၤသဂၢၢ်တလးမူးပိာ်ခွါတဂၤန့ၣ်လီၤ.

²အဝဲသ့ၣ်အကျါယဲၢ်ဂၤမ့ၢ်ပှၤလၢအသးတဆးဘၣ်, ဒီးအဂၤယဲၢ်ဂၤမ့ၢ်ပှၤလၢအသူၣ်ဆးအသးဆးတဖၣ်လီၤ.

³မုၣ်ကနီၤလၢအသးတဆးတဖၣ်န့ၣ်, လဲၤစိာ်အမ့ၣ်အူဒၢတဖၣ်ဘၣ်ဆၣ် တလဲၤစိာ်ဃုာ်ဒီးသိဘၣ်.

⁴မုၣ်ကနီၤလၢအသူၣ်ဆးအသးဆးတဖၣ်န့ၣ်, လဲၤစိာ်ဃုာ်ဒီးသိပှဲၤတၢ်ပူၤတၢ်တ့ၤအဂၤတခါအပူၤလီၤ.

⁵တလးမူးပိာ်ခွါန့ၣ်စဲၤခံဝဲသတးဒီး, အဝဲသ့ၣ်မံခ့မံသပ့ၤ, ဒီးမံဘၣ်အသးခဲလၢာ်လီၤ.

⁶ဒီးလၢဖးဖီမုၢ်န့ၣ်, တၢ်ကိးသတြီထီၣ်ဝဲ, ‘တလးမူးပိာ်ခွါဟဲလံ, ဟဲဒီးသဂၢၢ်အီၤတက့ၢ်.’

⁷တုၤနုၤတစု, မုၣ်ကနီၤဆံဆဲၣ်ဂၤန့ၣ်ပၢၢ်ထီၣ်ဒီးမၤဂ့ၤထီၣ် အမ့ၣ်အူဒၢတဖၣ်လီၤ.

⁸တုၤနုၤတစု, မုၣ်ကနီၤလၢအသးတဆးတဖၣ်စံးဘၣ်ပှၤလၢအသးဆး တဖၣ်, ‘ဟ့ၣ်ပှၤလၢသုသိတနီၤတက့ၢ်. အဂ့ၢ်ဒ်အံၤပမ့ၣ်အူဒၢတဖၣ် ကလီၤပံာ်လီၤ.’

⁹ပှၤအသူၣ်ဆးအသးဆးတဖၣ်စံးဆၢဝဲ, ‘တသ့ဘၣ်. ပသိတအိၣ်လၢအိၣ်လီၣ်လၢသုဂီၢ်ဒီးပဂီၢ်ဘၣ်. လဲၤဆူတၢ်ဆါတၢ်ပှ့ၤအကျးဒီးပှ့ၤန့ၢ်သိလၢ သုဂီၢ်ဒၣ်သုဝဲတက့ၢ်.’

¹⁰လၢတၢ်န့ၣ်အဃိ, မုၣ်ကနီၤလၢအသးတဆးတဖၣ်လဲၤဝဲဒ်သိး ကပှ့ၤန့ၢ်သိလီၤ. ဒီးဖဲအလဲၤတၢ်အဖၢမုၢ်န့ၣ်, တလးမူးပိာ်ခွါဟဲတုၤဝဲလီၤ. မုၣ်ကနီၤဖိလၢအသးဆးယဲၢ်ဂၤန့ၣ် အိၣ်ကတဲာ်ကတီၤအသးအဃိ လဲၤနုာ်ဃုာ်ဒီးတလးမူးပိာ်ခွါဆူတၢ်ဖျီအမူးပူၤန့ၣ်လီၤ. ဒီးတြဲၤဘၣ်တၢ်ကးတံာ်ဃာ်အီၤလီၤ.

¹¹လၢခံ, မုၣ်ကနီၤအဂၤတဖၣ်ဟဲတုၤစ့ၢ်ကီးဝဲ, ဒီးကိးပသူထီၣ်ဝဲဒီး စံး, ‘ကစၢ်ဧၢ, ကစၢ်ဧၢ, ပျဲလဲၤနုာ်ပှၤတက့ၢ်.’

¹²ဘၣ်ဆၣ်ဒီး, တလးမူးပိာ်ခွါစံးဆၢအဝဲသ့ၣ်, ‘တသ့လ့ၤတက့ၤဘၣ်. ယတသ့ၣ်ညါသုဘၣ်.’ ”

¹³ဒီးယ့ၣ်ၡူးမၤကတၢၢ်က့ၤအတၢ်ကတိၤဒီးစံး, “ဆိးသီတက့ၢ်. အဂ့ၢ်ဒ်အံၤ, မုၢ်နံၤမ့ၢ်ဂ့ၤ, နၣ်ရံၣ်မ့ၢ်ဂ့ၤသုတသ့ၣ်ညါဘၣ်.

¹⁴တုၤနုၤတစု, မူခိၣ်အဘီအမုၢ်ကလီၤဂာ်ဒီးတၢ်အံၤလီၤ. တဘျီပှၤအိၣ်တဂၤလၢအသါကဟးထီၣ်လၢအဟံၣ်ဒီး လဲၤတၢ်လီၤ. အဝဲကိးန့ၢ်အခ့အပှၤတဖၣ်, ဒီးဟ့ၣ်လီၤအဝဲသ့ၣ်မူဒါလၢ အကကွၢ်ထွဲအတၢ်ဖိတၢ်လံၤတဖၣ်လီၤ.

¹⁵အဝဲဟ့ၣ်လီၤဝဲအခ့အပှၤတဖၣ်ဒ်အတၢ်သ့တၢ်ဘၣ်အိၣ်ဝဲအသိးလီၤ. အခီၣ်ထံးတဂၤန့ၣ်ဟ့ၣ်ဝဲယဲၢ်တၤလၣ်, လၢခံတဂၤန့ၣ်ဟ့ၣ်ဝဲခံတၤလၣ်, ဒီးအဂၤတဂၤန့ၣ်တတၤလၣ်လီၤ. တုၤနုၤတစုအဝဲဟးထီၣ်ဒီးလဲၤတၢ်လီၤ.

¹⁶တၢ်အခ့အပှၤလၢအဒိးန့ၢ်စ့ယဲၢ်တၤလၣ်တဂၤန့ၣ်, လဲၤဒီးကၤတၢ်တဘျီဃီဒီးအဝဲမၤန့ၢ်အါထီၣ်စ့ယဲၢ်တၤလၣ်န့ၣ် လီၤ.

¹⁷ပှၤလၢအဒိးန့ၢ်စ့ခံတၤလၣ်တဂၤန့ၣ်, မၤစ့ၢ်ကီးဝဲဒၣ်ဒ်န့ၣ်ဒီးဒိးန့ၢ်အါထီၣ်စ့ခံတၤလၣ်န့ၣ် လီၤ.

¹⁸မ့မ့ၢ်ပှၤလၢအဒိးန့ၢ်စ့တတၤလၣ်တဂၤန့ၣ်, လဲၤဒီးခူၣ်န့ၢ်တၢ်ပူၤတပူၤလၢဟီၣ်ခိၣ်လာ်, ဒီးပာ်ခူသူၣ်အကစၢ်အစ့ဖဲန့ၣ်လီၤ.

¹⁹ဆၢကတီၢ်ဖးယံာ်ဝံၤအလီၢ်ခံ, တၢ်အခ့အပှၤတဖၣ်အံၤအကစၢ်ဟဲက့ၤ, ဒီးသုးကျဲၤမၤဘၣ်လိာ်ဘၣ်စးက့ၤအစ့စရီလၢအခ့အပှၤတဖၣ် လီၤ.

²⁰တၢ်အခ့အပှၤလၢအဒိးန့ၢ်ဘၣ်စ့ယဲၢ်တၤလၣ်တဂၤဟဲဆူအကစၢ် အအိၣ်စိာ်ဃုာ်ဒီးအစ့အဂၤယဲၢ်တၤလၣ်လၢအမၤန့ၢ်အါထီၣ်ဝဲဒီးဟ့ၣ် လီၤဝဲဆူအကစၢ်အစုပူၤဒီးစံး, ‘ကစၢ်ဧၢ, နဟ့ၣ်တ့ၢ်ယၤစ့ယဲၢ်တၤလၣ်လီၤ. အအံၤမ့ၢ်အဂၤယဲၢ်တၤလၣ်လၢယမၤအါထီၣ်န့ၣ်လီၤ.’

²¹အကစၢ်စံးဘၣ်အီၤ, ‘နမၤတၢ်ဂ့ၤမးလီၤ. တၢ်အခ့အပှၤလၢအဂ့ၤဒီးအကလုၢ်တီတဂၤဧၢ, နကလုၢ်တီလၢတၢ်ပၢၤဘၣ်တၢ်အဆံးအစှၤအပူၤအဃိ ယကပာ်နၤလၢတၢ်ပၢၤဘၣ်တၢ်အဒိၣ်အအါအလီၢ်လီၤ. ဟဲနုာ်ဒီးသးခုဃုာ်ဒီးယၤတက့ၢ်.’

²²တၢ်အခ့အပှၤလၢအဒိးန့ၢ်စ့ခံတၤလၣ်တဂၤစ့ၢ်ကီးဟဲဝဲဒီး စံး, ‘ကစၢ်ဧၢ, နဟ့ၣ်ယၤစ့ခံတၤလၣ်လီၤ. အအံၤတခီမ့ၢ်စ့အဂၤခံတၤလၣ်လၢယမၤအါထီၣ်န့ၣ်လီၤ.’

²³အကစၢ်စံးဘၣ်အီၤ, ‘နမၤတၢ်ဂ့ၤမးလီၤ. တၢ်အခ့အပှၤလၢအဂ့ၤဒီးအကလုၢ်တီတဂၤဧၢ, နကလုၢ်တီလၢတၢ်ပၢၤဘၣ်တၢ်အဆံးအစှၤအပူၤအဃိ ယကပာ်နၤလၢတၢ်ပၢၤဘၣ်တၢ်အဒိၣ်အအါအလီၢ်လီၤ. ဟဲနုာ်ဒီးသးခုဃုာ်ဒီးယၤတက့ၢ်.’

²⁴တၢ်အခ့အပှၤလၢအဒိးန့ၢ်စ့တတၤလၣ်တဂၤစ့ၢ်ကီး ဟဲဝဲဒီးစံး, ‘ကစၢ်ဧၢ, ယသ့ၣ်ညါလၢနမ့ၢ်ပှၤလၢအကီတဂၤလီၤ. နကူးအီၣ်တၤသူတၤသၣ်ဖဲနတသူၣ်လီၤဖျးလီၤဘၣ်တၢ်အလီၢ်, ဒီးနထၢဖှိၣ်က့ၤတၢ်ဖဲနတဖှံလီၤတၢ်အချံအလီၢ်န့ၣ်လီၤ.

²⁵လၢတၢ်န့ၣ်အဃိယပျံၤတၢ်, ဒီးလဲၤပာ်ခူသူၣ်နစ့အံၤလၢဟီၣ်ခိၣ် လာ်လီၤ. ကွၢ်အအံၤမ့ၢ်တၢ်လၢအမ့ၢ်နတၢ်ဒၣ်နဲလီၤ.’

²⁶ဘၣ်ဆၣ်အကစၢ်စံးဆၢတၢ်ဒီးစံး, ‘တၢ်အခ့အပှၤလၢအအၢဒီးအကၢၣ်မးတဂၤဧၢ, လၢယမ့ၢ်ပှၤလၢအကူးအီၣ်က့ၤတၢ်လၢယတသူၣ်တၢ်အလီၢ်, ဒီးထၢဖှိၣ်က့ၤတၢ်လၢယတဖှံလီၤတၢ်အလီၢ်န့ၣ်, နသ့ၣ်ညါကစီဒီမးလဲၣ်.

²⁷မ့မ့ၢ်ဒ်န့ၣ်ဒီး, ကြၢးမးလၢနလဲၤပာ်ယစ့လၢစ့တၢးအပူၤလီၤ. ဒီးတုၤယဟဲက့ၤအဆၢကတီၢ်န့ၣ်, ယကဒိးန့ၢ်ဘၣ်က့ၤယစ့ဃုာ်ဒီးအအ့ၣ်ခဲလၢာ်လီၤ.

²⁸ခဲအံၤ, ဟံးန့ၢ်စ့လၢအအိၣ်ဒီးပှၤတဂၤအံၤ, ဒီးဟ့ၣ်လီၤအီၤဆူပှၤလၢအစ့အိၣ်အတၤလၣ်တဆံတဂၤအစုပူၤ တက့ၢ်.

²⁹အဂ့ၢ်ဒ်အံၤ, ပှၤလၢအတၢ်အိၣ်တဖၣ်တၢ်ကဟ့ၣ်အါထီၣ် အီၤတၢ်ကိးဂၤဒဲး, ဒီးအတၢ်ကအိၣ်အါအါကလဲာ်လီၤ. ဘၣ်ဆၣ်ဒီး, ပှၤလၢအတၢ်တအိၣ်ဘၣ်တဂၤန့ၣ်, တၢ်တစဲးဖိလၢအအိၣ်ဒီးအီၤဒၣ်လဲာ်ကဘၣ်တၢ်ဟံးန့ၢ်ကွံာ်လၢ အအိၣ်လီၤ.

³⁰မ့မ့ၢ်တၢ်အခ့အပှၤလၢအဘျုးတအိၣ်တဂၤအံၤ, ဟီထီၣ်ကွံာ်အီၤဆူတၢ်ချၢလၢတၢ်ခံးကျါတက့ၢ်. ဖဲန့ၣ်ကဟီၣ်ကယၢၤတၢ် ဒီးကအ့ၣ်စဃံးအမဲလီၤ.’

³¹တုၤပှၤကညီဖိခွါဟဲဝဲအိၣ်ဒီးအလၤကပီၤဒ်စီၤပၤတဂၤအသိး ဃုာ်ဒီးအကလူးခဲလၢာ်န့ၣ်, ကဆ့ၣ်နီၤဝဲလၢအလီၢ်ပစိာ်ကဟုကညီၢ်တဖျၢၣ်အဖီခိၣ်,

³²ဒီးပှၤကလုာ်ခဲလၢာ်ကအိၣ်ဖှိၣ်ရိဖှိၣ်လၢအဝဲအမဲာ်ညါလီၤ. တုၤနုၤတစုအဝဲကနီၤဖးလီၤအဝဲသ့ၣ်ခံဖု, ဒ်ပှၤကွၢ်သိတဂၤနီၤဖးအသိဒီးမဲာ်တဲးလဲးတဖၣ်အသိး န့ၣ်လီၤ.

³³ဒီးကပာ်သိတဖၣ်လၢအစုထွဲတခီ, မ့မ့ၢ်မဲာ်တဲးလဲးတဖၣ် လၢအစုစ့ၣ်တခီလီၤ.

³⁴တုၤနုၤတစု, စီၤပၤကစံးဘၣ်ပှၤအိၣ်လၢအစုထွဲတဖၣ်ဒ်အံၤ, ‘ဟဲ, သုလၢအဘၣ်ဆိၣ်ဂ့ၤလၢယပၢ်သ့ၣ်ဧၢ, ဟဲဒီးန့ၢ်သါဘၣ်ဘီမုၢ်လၢအဘၣ်တၢ်ကတဲာ်ကတီၤပာ်န့ၢ်လၢသု ဂီၢ်, စးထီၣ်လၢဟီၣ်ခိၣ်ဘၣ်တၢ်တ့လီၤအီၤလံၤလံၤန့ၣ်တက့ၢ်.

³⁵အဂ့ၢ်ဒ်အံၤ, တၢ်သၣ်ဝံၤယသးဒီးသုဟ့ၣ်အီၣ်ဟ့ၣ်အီယၤ, တၢ်သူယသးလၢထံဒီးသုဒုးအီယၤ, ယမ့ၢ်ပှၤသမှံၤတဂၤဒီးသုတူၢ်လိာ်ယၤလၢသုဟံၣ်သုဃီတဖၣ် အပူၤ,

³⁶ယအိၣ်ဘ့ၣ်ဆ့ဒီးသုဒုးကူဒုးသိးယၤ, ယဘၣ်ဆူးဘၣ်ဆါဒီးသုအံးက့ၤကွၢ်က့ၤယၤ, ယအိၣ်လၢဃိာ်ပူၤဒီးသုဟဲအိၣ်သကိးယၤလီၤ.’

³⁷တုၤနုၤတစု, ပှၤအတီအလိၤတဖၣ်ကစံးဆၢအီၤ, ‘ကစၢ်ဧၢ, မ့ၢ်ပထံၣ်ဘၣ်တၢ်သၣ်ဝံၤနသးဒီးပဟ့ၣ်အီၣ်ဟ့ၣ်အီနၤမ့ၢ်ဂ့ၤ, တၢ်သူနသးလၢထံဒီးပဒုးအီနၤမ့ၢ်ဂ့ၤအခါဖဲလဲၣ်.

³⁸မ့ၢ်ပထံၣ်ဘၣ်နမ့ၢ်ပှၤသမှံၤတဂၤဒီးတူၢ်လိာ်နၤလၢပဟံၣ် တဖၣ်အပူၤမ့ၢ်ဂ့ၤ, နအိၣ်ဘ့ၣ်ဆ့ဒီးပဒုးကူဒုးသိးနၤမ့ၢ်ဂ့ၤအခါဖဲလဲၣ်.

³⁹မ့ၢ်ပထံၣ်ဘၣ်နၤလၢနဘၣ်ဆူးဘၣ်ဆါမ့ၢ်ဂ့ၤ, အိၣ်လၢဃိာ်ပူၤမ့ၢ်ဂ့ၤဒီး လဲၤအိၣ်သကိးနၤအခါဖဲလဲၣ်.’

⁴⁰စီၤပၤကစံးဆၢက့ၤအဝဲသ့ၣ်, ‘ယစံးဘၣ်တဲဘၣ်သုတီတီ, တဘျီလၢ်လၢ်ဖဲသုမၤဘၣ်တၢ်အံၤလၢပှၤအဆံးကတၢၢ်လၢယဒီပုၢ် ဝဲၢ်တဖၣ်အံၤအကျါတဂၤဂၤဒီးမ့ၢ်သုမၤဘၣ်ယၤန့ၣ်လီၤ.’

⁴¹တုၤနုၤတစု, စီၤပၤကစံးဘၣ်ပှၤအိၣ်လၢအစုစ့ၣ်တဖၣ်ဒ်အံၤ, ‘ဟးဖးဒီးယၤတက့ၢ်. ပှၤလၢအဘၣ်ကစၢ်ယွၤအတၢ်ဆိၣ်အၢသ့ၣ်ဧၢ, လဲၤနုာ်ဆူမ့ၣ်အူလၢအတလီၤပံာ်ဘၣ်နီတဘျီဘၣ်, လၢအဘၣ်တၢ်ကတဲာ်ကတီၤပာ်စၢၤလၢမုၣ်ကီၤလံၢ်ဒီးအကလူးတဖၣ် အဂီၢ်, အပူၤန့ၣ်တက့ၢ်.

⁴²တၢ်သၣ်ဝံၤယသးဘၣ်ဆၣ်သုတဟ့ၣ်အီၣ်ဟ့ၣ်အီယၤဘၣ်. တၢ်သူယသးလၢထံဘၣ်ဆၣ်သုတဒုးအီယၤဘၣ်.

⁴³ယမ့ၢ်ပှၤသမှံၤဘၣ်ဆၣ် သုတတူၢ်လိာ်ယၤလၢသုဟံၣ်သုဃီဘၣ်. ယအိၣ်ဘ့ၣ်ဆ့ဘၣ်ဆၣ်သုတဒုးကူဒုးသိးယၤဘၣ်. ယဘၣ်ဆူးဘၣ်ဆါဒီးအိၣ်လၢဃိာ်ပူၤဘၣ်ဆၣ်သု တအံးက့ၤကွၢ်က့ၤယၤဘၣ်.’

⁴⁴တုၤနုၤတစုအဝဲသ့ၣ်စံးဆၢက့ၤစီၤပၤဒီးစံး, ‘ကစၢ်ဧၢ, မ့ၢ်ပထံၣ်ဘၣ်တၢ်သၣ်ဝံၤနသးမ့ၢ်ဂ့ၤ, တၢ်သူနသးလၢထံမ့ၢ်ဂ့ၤ, နမ့ၢ်ပှၤသမှံၤမ့ၢ်ဂ့ၤ, နအိၣ်ဘ့ၣ်ဆ့မ့ၢ်ဂ့ၤ, နဆူးနဆါမ့ၢ်ဂ့ၤ, နအိၣ်လၢဃိာ်ပူၤမ့ၢ်ဂ့ၤဒီးပတမၤစၢၤဘၣ်နၤန့ၣ်, မ့ၢ်အခါဖဲလဲၣ်.’

⁴⁵စီၤပၤကစံးဆၢတၢ်ဒီးစံး, ‘ယစံးဘၣ်တဲဘၣ်သုတီတီ, တဘျီလၢ်လၢ်ဖဲသုတမၤစၢၤဘၣ်ပှၤအဆံးကတၢၢ်လၢယဒီပုၢ်ဝဲၢ် အကျါတဂၤဂၤန့ၣ်, မ့ၢ်သုတမၤစၢၤဘၣ်ယၤန့ၣ်လီၤ.’

⁴⁶တုၤနုၤတစု, ပှၤတဖၣ်အံၤကလဲၤနုာ်ဆူတၢ်စံၣ်ညီၣ်အထူ အယိာ်အပူၤ, မ့မ့ၢ်ပှၤအတီအလိၤတဖၣ်ကလဲၤနုာ်ဆူ တၢ်မူအထူအယိာ်အပူၤလီၤ.”