Read S'gaw Karen လံာ်မးသဲ 27 Bible Online

လံာ်မးသဲ 27 - S'gaw Karen bible

လံာ်မးသဲ 27

¹တုၤမုၢ်ဆ့ၣ်ထီၣ်ဂီၤဂီၤအကတီၢ်န့ၣ်, ပှၤလုၢ်တၢ်အခိၣ်အဒိၣ်ခဲလၢာ်ဒီးပှၤယူဒၤဖိကရၢအခိၣ်အနၢ် တဖၣ်, ကူၣ်ထီၣ်တၢ်ထီဒါယ့ၣ်ၡူး ဒ်သိးအကမၤသံဘၣ်အီၤအဂီၢ်လီၤ.

²အဝဲသ့ၣ်စၢဃာ်ယ့ၣ်ၡူးအစုလၢပျံၤထးတဖၣ်, မိၤထီၣ်အီၤဒီးဟ့ၣ်လီၤအီၤဆူရိမ့ၤအပဒိၣ်ဖးဒိၣ်စီၤပံၤလးအစုပူၤလီၤ.

³တုၤစီၤယူဒၤ, ပှၤလၢအဆါလီၤကွံာ်ယ့ၣ်ၡူး, သ့ၣ်ညါလၢယ့ၣ်ၡူးဘၣ်တၢ်စံၣ်ညီၣ်အီၤလံဒီး, အဝဲသ့ၣ်နီၣ်ပီၢ်ယၢ်လီၤက့ၤအသး, ဒီးလဲၤဆှၢကဒါက့ၤစ့အဘ့ၣ်သၢဆံန့ၣ်ဆူပှၤလုၢ်တၢ်အခိၣ် အဒိၣ်တဖၣ်ဒီးပှၤယူဒၤဖိကရၢအခိၣ်အနၢ်တဖၣ်အအိၣ်,

⁴ဒီးစံး, “ယမၤဘၣ်တၢ်ဒဲးဘးခီဖျိတၢ်ဆါလီၤကွံာ်ပှၤလၢ အတၢ်ကမၣ်တအိၣ်ဘၣ်တဂၤဆူတၢ်သံအပူၤလံ.” ဒီးအဝဲသ့ၣ်စံးဆၢအီၤ, “တၢ်အဝဲန့ၣ်တဘၣ်ဃးဒီးပှၤဘၣ်. ဘၣ်ဃးဒၣ်ဒီးနၤလီၤ.”

⁵စီၤယူဒၤကွံာ်လီၤအစ့အဘ့ၣ်တဖၣ်လၢတၢ်လုၢ်ဟံၣ်အပူၤ, ဒီးဟးထီၣ်ကွံာ်ဖဲန့ၣ်လီၤ. တုၤနုၤတစုအဝဲဟးထီၣ်ကွံာ်ဝဲဆူတၢ်ချၢ, ဒီးလဲၤစၢသံလီၤအသးလီၤ.

⁶ပှၤလုၢ်တၢ်အခိၣ်အဒိၣ်တဖၣ်ထၢထီၣ်က့ၤစ့အဘ့ၣ်တဖၣ်ဒီးစံး, “စ့အံၤမ့ၢ်တၢ်သွံၣ်တၢ်စီၤအစ့အဃိ, ပကပာ်အီၤလၢတၢ်လုၢ်ဟံၣ်အတၢ်ပာ်ဖှိၣ်စ့အလီၢ်န့ၣ် ထီဒါပတၢ်သိၣ်တၢ်သီလီၤ.”

⁷တုၤအဝဲသ့ၣ်ကတိၤသကိးဒီးအၢၣ်လီၤသကိးဝဲဘၣ်ထွဲဒီးစ့န့ၣ်ဝံၤဒီး, အဝဲသ့ၣ်ပှ့ၤန့ၢ်ပှၤတ့သပၢၤအစံာ်ပျီတဘ့ၣ်လၢကခူၣ်လီၤ ပှၤကလုာ်အဂၤတဖၣ်အဂီၢ်လီၤ.

⁸လၢတၢ်န့ၣ်အဃိ, ပျီအဝဲန့ၣ်ဘၣ်တၢ်ကိးအီၤလၢတၢ်သွံၣ်အပျီ” တုၤလီၤလၢမုၢ်မဆါတနံၤအံၤလီၤ.

⁹တုၤနုၤတစု, တၢ်လၢဝံယံးရမံယၤစံးတ့ၢ်ဝဲန့ၣ်လၢထီၣ်ပှဲၤထီၣ်ဝဲလီၤ. “အဝဲသ့ၣ်ဟံးန့ၢ်စ့အဘ့ၣ်သၢဆံ, လၢအမ့ၢ်တၢ်အပှ့ၤလၢပှၤအံၣ်စရ့လးဖိတဖၣ် ပာ်ဝဲဒ်အဝဲဒၣ်အပှ့ၤအသိးန့ၣ်,

¹⁰ဒီးသူစ့န့ၣ်လၢအကပှ့ၤန့ၢ်ပှၤတ့သပၢၤအပျီတဘ့ၣ်, ဒ်ကစၢ်မၤလိာ်တ့ၢ်ယၤအသိးန့ၣ်လီၤ.” (ကၤ ၁၁:၁၃)

¹¹ယ့ၣ်ၡူးအိၣ်ဆၢထၢၣ်လၢပှၤရိမ့ၤဖိအပဒိၣ်ဖးဒိၣ်အမဲာ်ညါ, ဒီးပဒိၣ်ဖးဒိၣ်သမံသမိးအီၤဒီးစံး, “နမ့ၢ်ပှၤယူဒၤဖိ အစီၤပၤဧါ.” ယ့ၣ်ၡူးစံးဆၢအီၤ, “နစံးတ့ၢ်လံနဲလံ.”

¹²ဘၣ်ဆၣ်ဒီးယ့ၣ်ၡူးတကတိၤဆၢက့ၤပှၤလုၢ်တၢ်အခိၣ်အဒိၣ်တဖၣ်ဒီး ပှၤယူဒၤဖိကရၢအခိၣ်အနၢ်တဖၣ်အတၢ်ကတိၤဃုတုာ်တၢ်ကမၣ်ထီဒါ အီၤ, နီတဘီဘၣ်.

¹³လၢတၢ်န့ၣ်အဃိ, စီၤပံၤလးစံးဘၣ်အီၤ, “ပှၤတဖၣ်အံၤအတၢ်ဃုတုာ်နတၢ်ကမၣ် ခဲလၢာ်န့ၣ်မ့ၢ်နတနၢ်ဟူဘၣ်ဧါ.”

¹⁴ဘၣ်ဆၣ်ဒီး, ယ့ၣ်ၡူးတစံးဆၢအီၤဘၣ်. ထဲတၢ်ကတိၤတဘီဒၣ်လဲာ်တတဲဝဲဘၣ်. တၢ်အံၤဒုးကမၢကမၣ်ပဒိၣ်ဖးဒိၣ်, ဒိၣ်ဒိၣ်အါအါလီၤ.

¹⁵ဖဲဘူၣ်လဲၤကပာ်ကိးဘျီဒဲးန့ၣ်, ရိမ့ၤအပဒိၣ်အိၣ်ဒီးအလုၢ်အလၢ်လၢ ကပျၢ်န့ၢ်ပှၤဃိာ်ဖိတဂၤဂၤလၢပှၤဂီၢ်မုၢ်ဃ့ဝဲန့ၣ်လီၤ.

¹⁶အခါဖဲန့ၣ်ပှၤဃိာ်ဖိလၢအမံၤဒိၣ်ဝဲ, စီၤယ့ၣ်ၡူးဘၤရးဘါအိၣ်ဝဲတဂၤလီၤ.

¹⁷လၢတၢ်န့ၣ်အဃိ, တုၤပှၤဂီၢ်မုၢ်တဖၣ်ဟဲပာ်ဖှိၣ်ထီၣ်အသးဒီး, စီၤပံၤလးသံကွၢ်အဝဲသ့ၣ်ဒီးစံး, “သုအဲၣ်ဒိးလၢယကပျၢ်န့ၢ်သုလၢမတၤတဂၤလဲၣ်, စီၤယ့ၣ်ၡူးဘၤရးဘါဧါ. မ့တမ့ၢ်ဘၣ်ဒီးယ့ၣ်ၡူးလၢပှၤကိးအီၤလၢခရံာ်န့ၣ်လဲၣ်.”

¹⁸အဝဲသ့ၣ်ညါထံဝဲလၢပှၤယူဒၤဖိအခိၣ်အနၢ်တဖၣ်ဟ့ၣ်လီၤယ့ၣ် ၡူးဆူအဝဲအစုပူၤ, မ့ၢ်ဒၣ်လၢတၢ်သးကါဘၣ်ယ့ၣ်ၡူးအဃိန့ၣ်လီၤ.

¹⁹ဖဲစီၤပံၤလးဆ့ၣ်နီၤဝဲလၢတၢ်စံၣ်ညီၣ်ကွီၢ်အလီၢ်ဆ့ၣ်နီၤအဖီ ခိၣ်အဖၢမုၢ်န့ၣ်, အမါဆှၢလီၤန့ၢ်အီၤတၢ်ကစီၣ်လၢအစံး, “တဘၣ်မၤဘၣ်ဃးနသးဒီးပှၤလၢအတၢ်ကမၣ်တအိၣ်ဘၣ် တဂၤအံၤတဂ့ၤ. အဂ့ၢ်ဒ်အံၤ, လၢတၢ်မံမီၢ်အဃိန့ၣ်, တနံၤအံၤယသးဘၣ်နးဘၣ်ဖှီၣ် ဒီးဘၣ်တံာ်တာ်ဒိၣ်မးလၢအဝဲဒၣ်အဂ့ၢ်န့ၣ်လီၤ.”

²⁰ပှၤလုၢ်တၢ်အခိၣ်အဒိၣ်တဖၣ်ဒီးပှၤယူဒၤဖိကရၢအခိၣ်အနၢ် တဖၣ်လွဲကညးန့ၢ်ပှၤဂီၢ်မုၢ်တဖၣ်လၢအကဃ့စီၤပံၤလး, ဒ်သိးအကပျၢ်န့ၢ်အဝဲသ့ၣ်လၢစီၤဘၤရးဘါဒီးမၤသံကွံာ် ယ့ၣ်ၡူးအဂီၢ်န့ၣ်လီၤ.

²¹စီၤပံၤလးသံကွၢ်ပှၤဂီၢ်မုၢ်ဒီးစံး, “သုအဲၣ်ဒိးလၢယကပျၢ်န့ၢ် သုလၢပှၤခံဂၤအကျါလၢလဲၣ်တဂၤလဲၣ်.” အဝဲသ့ၣ်စံးဆၢဝဲ, “စီၤဘၤရးဘါလီၤ.”

²²စီၤပံၤလးသံကွၢ်အဝဲသ့ၣ်, “မ့မ့ၢ်ဒ်န့ၣ်ဒီးယ့ၣ်ၡူးလၢပှၤကိးအီၤလၢခရံာ်န့ၣ်, ယကဘၣ်မၤအီၤဒ်လဲၣ်.” အဝဲသ့ၣ်ခဲလၢာ်စံးဆၢဝဲ, “ပျၤထီအီၤလၢထူၣ်စုညါအလိၤတက့ၢ်.”

²³ဘၣ်ဆၣ်, စီၤပံၤလးသံကွၢ်တၢ်ဒီးစံး, “အဝဲမၤကမၣ်တ့ၢ်တၢ်မနုၤလဲၣ်.” တုၤနုၤတစုအဝဲသ့ၣ်ကိးပသူထီၣ်ဒိၣ်န့ၢ်အလီၢ်ဒီးစံး, “ပျၤထီအီၤလၢထူၣ်စုညါအလိၤတက့ၢ်.”

²⁴တုၤစီၤပံၤလးထံၣ်လၢအဝဲမ့ၢ်သံကွၢ်တၢ်ဆူညါနာ်သက့အဘျုး တအိၣ်လၢၤဘၣ်. မ့မ့ၢ်တၢ်ကတၢထီၣ်တၢလီၤဘၣ်ဖုးအဃိ, အဝဲဟံးန့ၢ်ထံဝံၤသ့လီၤအစုလၢပှၤဂီၢ်မုၢ်တဖၣ်အမဲာ်ညါဒီး စံး, “ပှၤအံၤအသွံၣ်တလီၤတီလၢယဖီခိၣ်ဘၣ်. ဘၣ်ဃးဒၣ်ဒီးသုလီၤ.”

²⁵ပှၤဂီၢ်မုၢ်ခဲလၢာ်စံးဆၢဝဲ, “မ်အသွံၣ်ကလီၤတီဒၣ်ဝဲလၢပဝဲဒီးလၢ ပဖိပလံၤအဖီခိၣ်န့ၣ်တက့ၢ်.”

²⁶တုၤနုၤတစု, စီၤပံၤလးပျၢ်ပူၤဖျဲးန့ၢ်အဝဲသ့ၣ်လၢစီၤဘၤရးဘါဒီးမၢပှၤဖျ့ ယ့ၣ်ၡူးဝံၤအလီၢ်ခံ, ဟ့ၣ်လီၤကွံာ်အီၤဒ်သိးအကဘၣ်တၢ်ပျၤထီအီၤလၢထူၣ်စုညါအလိၤ အဂီၢ်န့ၣ်လီၤ.

²⁷တုၤနုၤတစုစီၤပံၤလးအသုးဖိတဖၣ် လဲၤဆှၢယ့ၣ်ၡူးဆူပဒိၣ်ဖးဒိၣ်အနီပူၤ, ဒီးသုးမုၢ်ဒီဖုညါဟဲပာ်ဖှိၣ်ထီၣ်အသးဝးတရံးအီၤလီၤ.

²⁸အဝဲသ့ၣ်ဘ့ၣ်လီၤကွံာ်ယ့ၣ်ၡူးအကူအသိးတဖၣ်, ဒီးဒုးသိးထီၣ်အီၤလၢ ဆ့ကၤဖးထီအလုးတကုာ်တဘ့ၣ်လီၤ.

²⁹တုၤနုၤတစုအဝဲသ့ၣ်မၤန့ၢ်အီၤလၢတၤဆှုၣ်အခိၣ်သလုးတဖျၢၣ်, ဒီးဒုးကၢၢ်ထီၣ်အီၤဝံၤ, ဟ့ၣ်ဒုးစိာ်အီၤတပိၢ်တဘိလၢအစုထွဲတခီန့ၣ်လီၤ. ဒီးအဝဲသ့ၣ်ချံးခီၣ်တီၤလီၤလၢ ယ့ၣ်ၡူးအမဲာ်ညါ, ဒီးဒုၣ်ဒွဲၣ်နံၤဘၣ်ဖၣ်လဲအီၤဒီးစံး, “ပဟ့ၣ်နၤတၢ်ယူးယီၣ် လီၤယူဒၤအစီၤပၤဧၢ.”

³⁰အဝဲသ့ၣ်ထူးပှဲာ်ယ့ၣ်ၡူးဒီးဟံးန့ၢ်တပိၢ်တဘိဒီးဒိအခိၣ် လီၤ.

³¹တုၤအဝဲသ့ၣ်ဒုၣ်ဒွဲၣ်ဒီးနံၤဘၣ်ဖၣ်လဲယ့ၣ်ၡူးဝံၤန့ၣ်, အဝဲသ့ၣ်ဘ့ၣ်လီၤကွံာ်ဆ့ကၤဖးထီဒီးဒုးသိးထီၣ်က့ၤအီၤလၢ အကူအသိးဒၣ်ဝဲဝံၤ, မိၤထီၣ်အီၤဆူတၢ်ချၢဒ်သိး အကပျၤထီကွံာ်အီၤလၢထူၣ်စုညါအလိၤအဂီၢ်လီၤ.

³²ဖဲအဝဲသ့ၣ်ဟးထီၣ်ဆူဝ့ၢ်အချၢအဖၢမုၢ်န့ၣ်, အဝဲသ့ၣ်ထံၣ်န့ၢ်ပှၤကူၤရ့ၤန့ဖိတဂၤလၢအမံၤမ့ၢ်ဝဲစီၤၡံမိၣ်, ဒီးပှၤသုးဖိတဖၣ်မၢဆူၣ်အီၤလၢအကယိးယ့ၣ်ၡူးအထူၣ်စုညါ န့ၣ်လီၤ.

³³ဒီးအဝဲသ့ၣ်လဲၤတုၤဝဲဆူတၢ်လီၢ်တတီၤလၢအဘၣ်တၢ်ကိးအီၤလၢ ကီၤလၤကီၤသါ, အခီပညီမ့ၢ်ဝဲ, “တၢ်ခိၣ်သၣ်ဃံအလီၢ်” န့ၣ်လီၤ.

³⁴ဖဲန့ၣ်ပှၤဒုးဟ့ၣ်အီယ့ၣ်ၡူးလၢစပံးထံဃါဃုာ်အသးဒီးတၢ် ခၣ်ထံလီၤ. ဘၣ်ဆၣ်အဝဲလ့ၣ်ကွၢ်ဝဲဝံၤဒီးတအီဝဲဘၣ်.

³⁵ဖဲအဝဲသ့ၣ်ပျၤထီအီၤလၢထူၣ်စုညါအလိၤဝံၤန့ၣ်, ဖီၣ်တၢ်ဖးဒီးနီၤဟ့ၣ်လိာ်အသးလၢယ့ၣ်ၡူးအကူအသိးလီၤ.

³⁶တုၤနုၤတစုအဝဲသ့ၣ်ဆ့ၣ်နီၤဖဲန့ၣ်ဒီးအိၣ်ခိးကွၢ်အီၤလီၤ.

³⁷လၢထူၣ်စုညါအလိၤဖဲယ့ၣ်ၡူးအခိၣ်ထးန့ၣ်, ပှၤကွဲးလီၤတၢ်ကွဲး, “အဝဲအံၤ မ့ၢ်ယ့ၣ်ၡူး, ပှၤယူဒၤဖိအစီၤပၤ” လၢအမ့ၢ်တၢ်ကမၣ်လၢအဘၣ်တၢ်ပာ်ဝဲလၢ ယ့ၣ်ၡူးအလိၤန့ၣ်လီၤ.

³⁸အဝဲသ့ၣ်ပျၤထီတမျာ်ခံဂၤဃုာ်ဒီးယ့ၣ်ၡူး, တဂၤလၢအစုထွဲ ဒီးတဂၤလၢအစုစ့ၣ်တကပၤလီၤ.

³⁹ပှၤတဖၣ်လၢအလဲၤထီၣ်က့ၤလီၤဘၣ်ကျဲဖဲတၢ်လီၢ်န့ၣ်, ဂံၤဂုၤအခိၣ်ဒီး ကတိၤဒုၣ်ဒွဲၣ်စံးအၢယ့ၣ်ၡူးဒီးစံး,

⁴⁰“နသါကမၤလီၤပှီၢ်ကွံာ်တၢ်လုၢ်ဟံၣ်ဒီးဘှီထီၣ်က့ၤအီၤလၢ သၢသီအတီၢ်ပူၤဘၣ်. နမ့မ့ၢ်ကစၢ်ယွၤအဖိခွါဒီး, မၤပူၤဖျဲးက့ၤနသးဒၣ်နဲတက့ၢ်. ဟဲက့ၤလီၤလၢထူၣ်စုညါအလိၤတက့ၢ်.”

⁴¹ပှၤလုၢ်တၢ်အခိၣ်အဒိၣ်, ပှၤသ့တၢ်ဘူၣ်တၢ်ဘါအတၢ်သိၣ်တၢ်သီ, ဒီးပှၤယူဒၤဖိအကရၢအခိၣ်အနၢ်တဖၣ်စ့ၢ်ကီး, ဒုၣ်ဒွဲၣ်နံၤဘၣ်ဖၣ်လဲအီၤဒ်န့ၣ်အသိးဒီးစံး,

⁴²“အဝဲမၤပူၤဖျဲးပှၤအဂၤတဖၣ်သ့, မ့မ့ၢ်အနီၢ်ကစၢ်ဒၣ်ဝဲန့ၣ်မၤပူၤဖျဲးလီၤက့ၤအသးတသ့ဘၣ်. ပှၤအံၤမ့ၢ်ပှၤအံၣ်စရ့လးဖိအစီၤပၤတမ့ၢ်ဘၣ်ဧါ. အဝဲမ့ၢ်ဟဲက့ၤလီၤလၢ ထူၣ်စုညါအလိၤအခဲအံၤဒီးပကနာ်အီၤလီၤ.

⁴³အဝဲနာ်န့ၢ်ကစၢ်ယွၤဒီးစံးလီၤအသးလၢအမ့ၢ်ကစၢ်ယွၤအဖိခွါလီၤ. ဂ့ၤလံ. မ့မ့ၢ်ဒ်န့ၣ်ဒီးမ်ပကွၢ်သကိးတက့ၢ်. မ့ၢ်ယွၤကအဲၣ်ဒိး မၤပူၤဖျဲးအီၤခဲအံၤန့ၣ်ဧါ.”

⁴⁴တမျာ်လၢအဘၣ်တၢ်ပျၤထီဃုာ်ဒီးအီၤခံဂၤစ့ၢ်ကီး, ဒုၣ်ဒွဲၣ်အီၤဒ်န့ၣ်အသိးလီၤ.

⁴⁵ဖဲမုၢ်ထူၣ်အကတီၢ်န့ၣ်, တၢ်ခံးလီၤလၢကီၢ်ဒီဘ့ၣ်ညါအပူၤတုၤလီၤလၢ ဟါသၢနၣ်ရံၣ်အကတီၢ်န့ၣ်လီၤ.

⁴⁶ဖဲအကဘၣ်သၢနၣ်ရံၣ်န့ၣ်, ယ့ၣ်ၡူးကိးပသူထီၣ်လၢအကလုၢ်ဖးဒိၣ်ဒီးစံး, “အ့ၤလံၤ, အ့ၤလံၤ, လၤမၤစၤဘၤဃသၤနံ,” အခီပညီမ့ၢ်ဝဲ, “ယကစၢ်ယွၤဧၢ, ယကစၢ်ယွၤဧၢ, ဘၣ်မနုၤလၢနလဲၤသဒၣ်ကွံာ်ယၤလဲၣ်.”

⁴⁷ပှၤအိၣ်ဆၢထၢၣ်ဖဲတၢ်လီၢ်န့ၣ်တနီၤနၢ်ဟူဝဲဒီးစံး, “ပှၤအံၤကိးထီၣ်တၢ်ဆူ စီၤအ့ၤလံယၤအအိၣ်လီၤ.”

⁴⁸ဒီးပှၤလၢအဝဲသ့ၣ်ကျါတဂၤဃ့ၢ်ထီၣ်တဘျီဃီဒီးဟံးန့ၢ် ကုၤပီၣ်လဲၣ်တလိၣ်, စုၣ်လီၤဝဲလၢစပံးထံအဆံၣ်အကျါ, ဆှိးထီၣ်အီၤလၢတပိၢ်တဘိအခိၣ်စိးနါ, ဒီးကျဲးစၢးဒုးအီအီၤလီၤ.

⁴⁹ဘၣ်ဆၣ်ပှၤအဂၤတဖၣ်စံး, “ခိးဒၣ်ကလိာ်တက့ၢ်. မ်ပအိၣ်ခိးကွၢ်သကိးလၢမ့ၢ်စီၤအ့ၤလံယၤကဟဲမၤပူၤဖျဲးအီၤဧါ.”

⁵⁰ယ့ၣ်ၡူးကိးထီၣ်ကဒီးလၢအကလုၢ်ဖးဒိၣ်တဘီ, ဒီးအသးဟးထီၣ်ဝဲလီၤ.

⁵¹တုၤနုၤတစု, ယၣ်ဘျးသဒၢလၢအအိၣ်စဲၤလီၤအသးလၢတၢ်လုၢ်ဟံၣ်ပူၤတဘ့ၣ်န့ၣ်, ယာ်ကွံာ်ခံခီစးထီၣ်လၢအခိၣ်ပၢၢ်လၢအခီၣ်ထံးလီၤ. ဟီၣ်ခိၣ်ဟူးဝဲ, လၢၢ်ဧိၤလ့ဧိၤတဖၣ်သ့ၣ်မုၢ်သ့ၣ်ဖးကွံာ်,

⁵²တၢ်သွၣ်ခိၣ်အပူၤတဖၣ်အိးထီၣ်အသး, ဒီးကစၢ်ယွၤအပှၤဂီၢ်မုၢ်အါဒံ အါဂၤလၢအသံတ့ၢ်ဝဲတဖၣ်ဘၣ်တၢ်ဒုးဂဲၤဆၢထၢၣ်သမူထီၣ်က့ၤ အီၤလီၤ.

⁵³အဝဲသ့ၣ်ဟးထီၣ်ကွံာ်လၢတၢ်သွၣ်ခိၣ်အပူၤတဖၣ်, ဒီးတုၤယ့ၣ်ၡူးဂဲၤဆၢထၢၣ်သမူထီၣ်က့ၤဝံၤအလီၢ်ခံ, အဝဲသ့ၣ်လဲၤနုာ်ဆူဝ့ၢ်စီဆှံအပူၤဒီးပှၤအါဒံ အါဂၤထံၣ်ဘၣ်အီၤလီၤ.

⁵⁴တုၤသုးခိၣ်တဂၤဃုာ်ဒီးအသုးဖိလၢအအိၣ်ခိးကွၢ်ယ့ၣ်ၡူးတဖၣ်, ထံၣ်ဟီၣ်ခိၣ်ဟူးဒီးတၢ်ခဲလၢာ်လၢအမၤအသးတဖၣ်န့ၣ်, အဝဲသ့ၣ်အသူၣ်ပျံၤအသးဖုးဒီးစံး, “ပှၤအဝဲအံၤ မ့ၢ်နီၢ်နီၢ်ကစၢ်ယွၤအဖိခွါလီၤ.”

⁵⁵ဖဲန့ၣ်ပှၤပိာ်မုၣ်အါဒံအါဂၤလၢအဟဲပိာ်ယ့ၣ်ၡူးအခံလၢကၤ လံၤလါဒီးမၤစၢၤတ့ၢ်အီၤတဖၣ်, အိၣ်ဆၢထၢၣ်ကွၢ်စိတၢ်လၢအယံၤလီၤ.

⁵⁶ပှၤမၤကဒါလၣ်မုၣ်နီၢ်မၤရံ, နီၢ်မၤရံလၢအမ့ၢ်စီၤယၤကိာ်ဒီးစီၤယိၤသး အမိၢ်ဒီးစီၤစ့းဘ့းဒဲအမါအိၣ်လၢပှၤပိာ်မုၣ်သ့ၣ်တဖၣ်န့ၣ်အကျါ လီၤ.

⁵⁷တုၤလီၤလၢဟါခီန့ၣ်, ပှၤထူးပှၤတီၤလၢဝ့ၢ်အရံၤမၤသဲဟဲတုၤဝဲ တဂၤလီၤ. အဝဲအမံၤမ့ၢ်စီၤယိၤသးဒီးမ့ၢ်စ့ၢ်ကီးယ့ၣ်ၡူးအပျဲၢ် အဘီၣ်တဂၤလီၤ.

⁵⁸အဝဲလဲၤဆူစီၤပံၤလးအအိၣ်, ဒီးဃ့န့ၢ်ယ့ၣ်ၡူးအစိၣ်လီၤ. စီၤပံၤလးဟ့ၣ်လီၤအကလုၢ်လၢယ့ၣ်ၡူးအစိၣ်ကဘၣ်တၢ်ဟ့ၣ်လီၤ အီၤဆူစီၤယိၤသးအအိၣ်လီၤ.

⁵⁹လၢတၢ်န့ၣ်အဃိစီၤယိၤသးဟံးန့ၢ်ယ့ၣ်ၡူးအစိၣ်ဝံၤ, ဘိၣ်ဘံထီၣ်ဝဲလၢတၢ်ကံးယာ်အဝါအသီတဘ့ၣ်,

⁶⁰ဒီးပာ်လီၤအီၤလၢအဝဲဒၣ်အနီၢ်ကစၢ်ဒၣ်ဝဲအတၢ်သွၣ်ခိၣ် အပူၤ, လၢအစိးပျၤန့ၢ်ဝဲလၢလ့အကပၤဖဲတယံာ်ဒံးဘၣ် အကတီၢ်န့ၣ်လီၤ. ဝံၤဒီး, တလ့ၣ်တံၢ်လၢၢ်ဖးဒိၣ်တဖျၢၣ် လၢတၢ်သွၣ်ခိၣ်အပူၤအခိၣ်ထိးဒီးဟးထီၣ်ကွံာ်ဝဲဖဲန့ၣ်လီၤ.

⁶¹ပှၤမၤကဒါလၣ်မုၣ်နီၢ်မၤရံဒီးနီၢ်မၤရံလၢအဂၤတဂၤန့ၣ်, ဆ့ၣ်နီၤဖဲတၢ်သွၣ်ခိၣ်အပူၤအမဲာ်ညါန့ၣ်လီၤ.

⁶²လၢခံတနံၤ, ဘၣ်ဖဲပှၤယူဒၤဖိအမုၢ်အိၣ်ဘှံးအနံၤန့ၣ်, ပှၤလုၢ်တၢ်အခိၣ်အဒိၣ်တဖၣ်ဒီးပှၤဖၤရံၤၡဲတဖၣ် လဲၤထံၣ်လိာ်စီၤပံၤလး

⁶³ဒီးစံး, “တၢ်ဒိၣ်ဧၢ, ပသ့ၣ်နီၣ်ထီၣ်လၢပှၤလီတၢ်ဖိတဂၤန့ၣ်, ဖဲအမူဒံးအခါစံးတ့ၢ်ဝဲ, ‘သၢသီတသီန့ၣ်ယကဂဲၤဆၢထၢၣ်သမူထီၣ်က့ၤလီၤ.’

⁶⁴လၢတၢ်န့ၣ်အဃိ, ဝံသးစူၤဟ့ၣ်လီၤနကလုၢ်ဒ်သိးဒီးတၢ်ကခိးဒီးပၢၤဃာ် အသွၣ်ခိၣ်အပူၤဂ့ၤဂ့ၤဘၣ်ဘၣ်တုၤလီၤသၢသီတသီ, ဒ်သိးအပျဲၢ်အဘီၣ်တဖၣ်လဲၤဒီးဟုၣ်န့ၢ်အစိၣ် ဒီးစံးဘၣ်တဲဘၣ်ပှၤဂီၢ်မုၢ်လၢအဝဲဂဲၤဆၢထၢၣ်က့ၤလၢတၢ်သံ လံန့ၣ်, အသုတသ့တဂ့ၤအဂီၢ်န့ၣ်တက့ၢ်. တၢ်ကတိၤလီတၢ်အကတၢၢ်တမံၤအံၤကအၢဒိၣ်န့ၢ်ဒံးတၢ် ကတိၤလီတၢ်လၢအခီၣ်ထံးကတၢၢ်တမံၤတက့ၢ်လီၤ.”

⁶⁵စီၤပံၤလးစံးဘၣ်အဝဲသ့ၣ်, “လဲၤကိးပှၤသုးဖိတဖုဒီး ဒုးခိးဃာ်ပၢၤဃာ်အဝဲသ့ၣ်လၢတၢ်သွၣ်ခိၣ်အပူၤန့ၣ်ဂ့ၤဂ့ၤ တသ့ဖဲသုသ့န့ၣ်တက့ၢ်.”

⁶⁶လၢတၢ်န့ၣ်အဃိ, အဝဲသ့ၣ်လဲၤဒီးစဲပနီၣ်ဃာ်လၢၢ်လၢတၢ်ပူၤခိၣ်ထိးန့ၣ်ဝံၤ ဒီး, ပာ်တ့ၢ်ပှၤသုးဖိလၢအကခိးဃာ်တၢ်သွၣ်ခိၣ်အပူၤအဂီၢ်, ဖဲန့ၣ်လီၤ.