Read S'gaw Karen လံာ်မၢ်ကူး 1 Bible Online

လံာ်မၢ်ကူး 1 - S'gaw Karen bible

လံာ်မၢ်ကူး 1

¹လံာ်တၢ်သးခုအကစီၣ်ဘၣ်ဃးယ့ၣ်ၡူးခရံာ်, ကစၢ်ယွၤအဖိခွါန့ၣ်အခီၣ်ထံးမ့ၢ်ဒ်အံၤလီၤ.

²ဒ်တၢ်ကွဲးတ့ၢ်အသးလၢလံာ်ဝံယၡါယၤအပူၤအသိး, “ကစၢ်ယွၤစံးဝဲဒၣ်, ကွၢ်ကွၢ်ယကဆှၢလီၤယပှၤစိာ်တၢ်ကစီၣ် လၢနမဲာ်ညါတဂၤ, ဒီးအဝဲဒၣ်ကကတဲာ်ကတီၤန့ၢ်နကျဲလီၤ.

³ပှၤတဂၤန့ၣ်ကိးသတြီထီၣ်လၢပှၢ်မုၢ်ကနၢဒီးစံးဝဲ, ကတဲာ်ကတီၤဒီးမၤဘျၢပာ်ကျဲလၢကစၢ်အဂီၢ်တက့ၢ်.”

⁴စီၤယိၤဟၣ်ဟဲဝဲဆူပှၢ်မုၢ်ကနၢဒီးဘျၢတၢ်ဒီးစံၣ်တဲၤတဲလီၤ တၢ်ဒီးစံးဝဲ, “ပီၢ်ယၢ်ဒီးဃၣ်လိၤက့ၤသုသးဒီးဒိးဘျၢသုသး လၢထံတက့ၢ်. ဒီးကစၢ်ယွၤကပျၢ်သုတၢ်ဒဲးဘးတဖၣ်န့ၣ်လီၤ.”

⁵ပှၤအိၣ်လၢကီၢ်ယူဒၤဒီကီၢ်ညါဒီးပှၤလၢဝ့ၢ်ယရူၤၡလ့ၣ် အပူၤတဖၣ်လဲၤဒိကနၣ်စီၤယိၤဟၣ်အတၢ်စံၣ်တဲၤတဲလီၤ န့ၣ်လီၤ. အဝဲသ့ၣ်တဲလီၤကျဲၤလီၤအတၢ်ဒဲးဘးတဖၣ်ဒီးဘၣ် တၢ်ဘျၢအီၤလၢထံဖဲထံကျိယၢ်ဒ့ၣ်အပူၤန့ၣ်လီၤ.

⁶စီၤယိၤဟၣ်ကူကၤဝဲတၢ်ကူတၢ်ကၤလၢပှၤထါအီၤလၢကီၤ လၤအူးအဆူၣ်ဒီးစၢဃာ်အယီၢ်ဒ့လၢယီၢ်တကိးတၢ်ဖံး တဘ့ၣ်လီၤ. အတၢ်အီၣ်တၢ်အီတခီမ့ၢ်ဒွဲၣ်ဧိၤတကံၤ ဧိၤဒီးကနဲမံၤအစီလီၤ.

⁷အဝဲစံၣ်တဲၤတဲလီၤတၢ်ဒီးစံးဝဲ, “ပှၤလၢအကဟဲလၢယလီၢ်ခံတဂၤန့ၣ် မ့ၢ်ပှၤအိၣ်ဒီးအစိကမီၤဒိၣ်န့ၢ်ယၤတက့ၢ်လီၤ. ထဲယကသကူးလီၤယသးဒီးဃ့ၣ်လီၤအခီၣ်ဖံးအပျံၤဒၣ်လဲာ်န့ၣ် ယတကြၢးဘၣ်.

⁸ယဲဒၣ်အံၤယဘျၢသုလၢထံလီၤ. မ့မ့ၢ်အဝဲဒၣ်ကဘျၢသုလၢသး စီဆှံလီၤ.”

⁹တၢ်န့ၣ်ဝံၤအလီၢ်ခံတယံာ်တမီၢ်ဘၣ်န့ၣ်, ယ့ၣ်ၡူးဟဲဝဲလၢဝ့ၢ်နစၤရ့းဘၣ်ဃးဒီးကီၢ်ကၤလံၤလါဒီးဒိး ဘျၢအသးလၢစီၤယိၤဟၣ်အစုပူၤလၢထံကျိယၢ်ဒ့ၣ်အပူၤန့ၣ်လီၤ.

¹⁰ယ့ၣ်ၡူးဟဲက့ၤထီၣ်က့ၤလၢထံကျါဝံၤတဘျီဃီအဝဲဒၣ်ထံၣ်မူ ခိၣ်အိးထီၣ်အသးဒီးယွၤအသးဟဲလီၤလၢအလိၤဒ်ထိၣ်လွံၢ် အသိးလီၤ.

¹¹ဒီးတၢ်ကလုၢ်သီၣ်ထီၣ်လၢမူခိၣ်လၢအစံးဝဲ, “နဲဒၣ်အံၤနမ့ၢ်ယဖိခွါလၢယအဲၣ်အီၤဒီးဘၣ်သူၣ်ဘၣ်သးယၤဒိၣ်မး တဂၤလီၤ.”

¹²တဘျီဃီယွၤအသးမၢန့ၢ်ဆီၣ်ခံအီၤလၢအကလဲၤဆူပှၢ်မုၢ်ကနၢန့ၣ်လီၤ.

¹³အဝဲဒၣ်အိၣ်ဖဲန့ၣ် အသီလွံၢ်ဆံဒီးဘၣ်တၢ်လ့ပစီအီၤလၢမုၣ်ကီၤလံၢ်လီၤ. ဆၣ်ဖိကီၢ်ဖိအမံၤတဖၣ်အိၣ်စ့ၢ်ကီးဖဲန့ၣ်, ဒီးမူခိၣ်ကလူးတဖၣ် ဟဲမၤတၢ်ခ့တၢ်ပှၤအတၢ်မၤလၢအဂီၢ်လီၤ.

¹⁴စီၤယိၤဟၣ်ဘၣ်တၢ်ဒၢနုာ်အီၤလၢဃိာ်ပူၤဝံၤအလီၢ်ခံ, ယ့ၣ်ၡူးဟဲဝဲဆူကီၢ်ကၤလံၤလါဒီးစံၣ်တဲၤတဲလီၤကစၢ်ယွၤ အတၢ်သးခုအကစီၣ်,

¹⁵ဒီးစံးဝဲဒၣ်, “တၢ်ဆၢကတီၢ်ဘၣ်လံဒီးကစၢ်ယွၤအဘီအမုၢ်ဘူး ထီၣ်လံ. ပီၢ်ယၢ်ဒီးဃၣ်လိၤက့ၤသုသးဒီးစူၢ်က့ၤနာ်က့ၤတၢ်သးခု အကစီၣ်န့ၣ်တက့ၢ်.”

¹⁶ဖဲယ့ၣ်ၡူးလဲၤတၢ်လၢပီၣ်လဲၣ်ကၤလံၤလါအနံၤအကတီၢ်န့ၣ်, အဝဲထံၣ်ဘၣ်စီၤၡံမိၣ်ဒီးအပုၢ်စီၤအၣ်ဒရ့းတ့ၢ်လီၤစၤလၢပီၣ် လဲၣ်ပူၤလီၤ. အဂ့ၢ်ဒ်အံၤအဝဲသ့ၣ်မ့ၢ်ပှၤမၤညၣ်ဖိတဖၣ်လီၤ.

¹⁷ယ့ၣ်ၡူးစံးဘၣ်အဝဲသ့ၣ်, “ဟဲဒီးကဲဘၣ်ယပျဲၢ်ယဘီၣ်တက့ၢ်. ယကသိၣ်လိသုဒ်သိးသုကဒုးကဲထီၣ်ပှၤကညီလၢယပျဲၢ် ယဘီၣ်တဖၣ်လီၤ.”

¹⁸တဘျီဃီအဝဲသ့ၣ်ပာ်တ့ၢ်ကွံာ်အစၤတဖၣ်ဒီးပိာ်ထီၣ်အခံလီၤ.

¹⁹အဝဲလဲၤယံၤထီၣ်ကဒီးဆူညါတစဲးဒီးထံၣ်ဘၣ်စီၤစ့းဘ့းဒဲ အဖိခွါစီၤယၤကိာ်ဒီးအပုၢ်စီၤယိၤဟၣ်အိၣ်လၢချံပူၤဒီးဆးက့ၤ အစၤတဖၣ်လီၤ.

²⁰တဘျီဃီယ့ၣ်ၡူးကိးအဝဲသ့ၣ်, ဒီးအဝဲသ့ၣ်ပာ်တ့ၢ်အပၢ်စီၤစ့းဘ့းဒဲဒီးတၢ်ခ့တၢ်ပှၤ ဒိးလဲအသးတဖၣ်ဖဲချံပူၤန့ၣ်ဝံၤပိာ်ထီၣ်အခံလီၤ.

²¹ယ့ၣ်ၡူးဒီးအပျဲၢ်အဘီၣ်တဖၣ်လဲၤဝဲဆူဝ့ၢ်ကပ့းရနီၣ်, ဒီးပှၤယူဒၤဖိအမုၢ်အိၣ်ဘှံးနံၤတုၤဃီၤဝဲတဘျီဃီ, အဝဲဒၣ်လဲၤနုာ်ဆူဘူၣ်ဘျီၣ်လၢအမ့ၢ်တၢ်ဘါလီၢ်အပူၤဒီး သိၣ်လီၤသီလီၤတၢ်လီၤ.

²²ဒီးတုၤပှၤဂီၢ်မုၢ်တဖၣ်နၢ်ဟူအတၢ်သိၣ်လီၤသီလီၤဒီး, တၢ်လီၤကမၢကမၣ်ဘၣ်အဝဲသ့ၣ်လီၤ. အဂ့ၢ်ဒ်အံၤအဝဲဒၣ်သိၣ်လီၤသီလီၤတၢ်ဒ်ပှၤလၢအအိၣ်ဒီးတၢ်စိ တၢ်ကမီၤနီၢ်နီၢ်တဂၤအသိးဒီးတမ့ၢ်ဒ်ပှၤသ့တၢ်ဘူၣ်တၢ်ဘါ အတၢ်သိၣ်တၢ်သီတဖၣ်အသိးဘၣ်.

²³အကတီၢ်ဖဲန့ၣ်, ပှၤလၢတၢ်နါဒိးအီၤတဂၤဟဲနုာ်ဆူဘူၣ်ဘျီၣ်လၢ အမ့ၢ်တၢ်ဘါလီၢ်အပူၤန့ၣ်လီၤ.

²⁴အဝဲဒၣ်ကိးပသူထီၣ်ဒီးစံး, “ပှၤနစၤရ့းဖိယ့ၣ်ၡူးဧၢ, နတၢ်ဘၣ်ဃးဒီးပှၤအိၣ်မနုၤလဲၣ်. နဟဲလၢနကမၤဟးဂီၤကွံာ် ပှၤအဂီၢ်ဧါ. နမ့ၢ်မတၤတဂၤလဲၣ်န့ၣ်ယသ့ၣ်ညါနမ့ၢ်ပှၤစီဆှံ လၢကစၢ်ယွၤမၢလီၤအီၤတဂၤန့ၣ်လီၤ.”

²⁵ဘၣ်ဆၣ်ယ့ၣ်ၡူးဒူအလိၤဒီးစံး, “အိၣ်ဘှီၣ်ဒီးဟးထီၣ်ကွံာ်လၢပှၤတဂၤအံၤအပူၤတက့ၢ်.”

²⁶ဒီးတၢ်နါတရုၤဆှဲးဆှု ပှၤတဂၤန့ၣ်နးနးကလဲာ်ဝံၤ, ကိးပသူထီၣ်လၢအကလုၢ်ဖးဒိၣ်ဒီးဟးထီၣ်ကွံာ်လၢအပူၤလီၤ.

²⁷ပှၤလၢအထံၣ်ဘၣ်တၢ်မၤအသးတဖၣ်အံၤကမၢကမၣ်ဝဲဒိၣ်မးတုၤဒၣ် လဲာ်သံကွၢ်လိာ်အသးဒီးစံးဝဲ, “တၢ်အံၤမ့ၢ်တၢ်ဒ်လဲၣ်. တၢ်သိၣ်လီၤသီလီၤအံၤမ့ၢ်တၢ်အသီလီၤ. ပှၤတဂၤအံၤအိၣ်ဒီးအစိကမီၤလၢကဒူတၢ်နါတဖၣ်အလိၤတုၤဒၣ် လဲာ်အဝဲသ့ၣ်ဒိကနၣ်အီၤလီၤ.”

²⁸လၢတၢ်အံၤအဃိ, ယ့ၣ်ၡူးအကစီၣ်ဟူထီၣ်သါလီၤချ့မးသကုၤကီၢ်ကၤလံၤလါ အပူၤလီၤ.

²⁹ယ့ၣ်ၡူးဒီးအပျဲၢ်အဘီၣ်တဖၣ်ဟးထီၣ်ကွံာ်လၢဘူၣ်ဘျီၣ်လၢ အမ့ၢ်တၢ်ဘါလီၢ်အပူၤအိၣ်ဃုာ်ဒီးစီၤယၤကိာ်ဒီး စီၤယိၤဟၣ် ဒီးလဲၤနုာ်ဆူစီၤၡံမိၣ်ဒီးစီၤအၣ်ဒရ့းအဟံၣ်ပူၤလီၤ.

³⁰အကတီၢ်ဖဲန့ၣ်စီၤၡံမိၣ်အမံၤပှၢ်ပိာ်မုၣ်အလိၤကိၢ်ဒီးဆိးက့မံနီၤ ဝဲဒၣ်လီၤ. ယ့ၣ်ၡူးဟဲတုၤတဘျီဃီဒီးပှၤတဲဘၣ်အီၤလၢအဝဲဒၣ် အဂ့ၢ်လီၤ.

³¹ယ့ၣ်ၡူးလဲၤဃီၤဆူအအိၣ်, ဟံးထီၣ်အစုဒီးဝံၢ်ထီၣ်အီၤလီၤ. အတၢ်လိၤကိၢ်လီၤက့ၤတကီၢ်ခါဒီးအဝဲဒၣ်ဒုးအီၣ်ဒုးအီ အဝဲသ့ၣ်လီၤ.

³²ဒီးဟါအဝဲန့ၣ်ဖဲမုၢ်လီၤနုာ်ဝံၤအလီၢ်ခံ, ပှၤဟဲစိာ်ကယဲၢ်ပှၤဘၣ်ဆူးဘၣ်ဆါဒီးပှၤလၢတၢ်နါဒိးအီၤ တဖၣ်ဆူယ့ၣ်ၡူးအအိၣ်လီၤ.

³³ပှၤဝ့ၢ်ဖိအါဒံအါဂၤဟဲပာ်ဖှိၣ်ထီၣ်အသးလၢဟံၣ်မဲာ်ညါ အတြဲၤအခိၣ်အဃၢၤန့ၣ်လီၤ.

³⁴ဒီးအဝဲဒၣ်မၤဘျါက့ၤပှၤဆူးပှၤဆါလၢအဘၣ်န့ၢ်တၢ်ဆူးတၢ်ဆါ အကလုာ်ကလုာ်အါဒံအါဂၤလီၤ. ဟီထီၣ်ကွံာ်စ့ၢ်ကီးတၢ်နါအါဒုလီၤ. ဘၣ်ဆၣ်ဒီးတပျဲတၢ်နါတဖၣ်ကတိၤတၢ်နီတထံၣ်နီတဘီဘၣ်. မ့ၢ်လၢတၢ်နါတဖၣ်သ့ၣ်ညါဝဲလၢအမ့ၢ်မတၤတဂၤလဲၣ်အဃိလီၤ.

³⁵လၢခံတဂီၤ, ဂီၤဂီၤကလဲာ်တချုးမုၢ်ဆ့ၣ်ထီၣ်န့ၣ်, ယ့ၣ်ၡူးဂဲၤဆၢထၢၣ်ဒီးဟးထီၣ်လၢဟံၣ်ပူၤဒီးလဲၤဝဲဆူတၢ် လီၢ်လၢပှၤတအိၣ်ဝဲနီတဂၤဘၣ်ဒီးဖဲန့ၣ်ဘါထုကဖၣ်တၢ်လီၤ.

³⁶စီၤၡံမိၣ်ဒီးအသကိးတဖၣ်ဟးထီၣ်လၢအလီၢ်ခံဒီးလူၤဃုက့ၤအီၤလီၤ.

³⁷တုၤအထံၣ်အီၤတစုဒီးအဝဲသ့ၣ်စံးဘၣ်အီၤ, “ပှၤကိးဂၤဒဲးဃုထံၣ်နၤလီၤ.”

³⁸အဝဲစံးဆၢတၢ်ဒီးစံး, “မ်ပလဲၤသကိးဆူဝ့ၢ်ဖိဝ့ၢ်ဆၣ်အဂုၤ အဂၤတက့ၢ်. ယကဘၣ်စံၣ်တဲၤတဲလီၤတၢ်လၢတၢ်လီၢ်တဖၣ်န့ၣ် အပူၤဒံး, အဂ့ၢ်ဒ်အံၤယဟဲလၢတၢ်န့ၣ်အဂီၢ်လီၤ.”

³⁹ဒီးလဲၤဝဲသကုၤကီၢ်ကၤလံၤလါ, စံၣ်တဲၤတဲလီၤတၢ်လၢဘူၣ်ဘျီၣ်လၢ အမ့ၢ်တၢ်ဘါလီၢ်တဖၣ်အပူၤဒီးဟီထီၣ်ကွံာ်တၢ်နါတဖၣ်လီၤ.

⁴⁰ပှၤဘၣ်တၢ်ဆါအၢတဂၤဟဲဆူယ့ၣ်ၡူးအအိၣ်, ချံးခီၣ်တီၤလီၤလၢ အမဲာ်ညါ, ဒီးဃ့ကညးအီၤဒီးစံးဝဲဒၣ်, “နသးမ့ၢ်အိၣ်ဒီး, နမၤဘျါက့ၤယၤသ့လီၤ.”

⁴¹ယ့ၣ်ၡူးသးကညီၤဘၣ်အီၤဒီးယူာ်ဃီၤအစုဒီးထိးဘၣ်အီၤဒီး စံးဝဲ, “ယသးအိၣ်နၤ, မ်နကဆှီထီၣ်က့ၤတက့ၢ်.”

⁴²တကီၢ်ခါဖဲန့ၣ်, အတၢ်ဆါလီၤမၢ်ကွံာ်ဒီးကဆှီထီၣ်က့ၤဝဲလီၤ.

⁴³အန့ၣ်တစုယ့ၣ်ၡူးမၢအဟးထီၣ်ဒီးမၤလိာ်အီၤဆူၣ်ဆူၣ် ကလဲာ်ဒီးစံးဝဲ,

⁴⁴“မ်နသုတစံးဘၣ်တဲဘၣ်တၢ်ဂ့ၢ်အံၤလၢပှၤနီတဂၤတဂ့ၤ. မ့မ့ၢ်လဲၤနဲတဘျီဃီဆူပှၤလုၢ်တၢ်အခိၣ်အအိၣ်ဒီးဒုးနဲၣ် နသးလၢအီၤတက့ၢ်. အန့ၣ်ဝံၤ, ဒ်သိးကကဲဒၣ်ဝဲတၢ်အုၣ်အသးလၢပှၤကိးဂၤဒဲးအမဲာ်ညါ လၢနဘျါက့ၤလံဒီး, လုၢ်ထီၣ်တၢ်လုၢ်ဒ်စီၤမိၤၡ့မၤလိာ် အသိးန့ၣ်တက့ၢ်.”

⁴⁵ဘၣ်ဆၣ်ဒီးပှၤအံၤဟးထီၣ်ဒီးရၤလီၤတၢ်ဂ့ၢ်အံၤသကုၤဆးဒး ဒီးတဲတၢ်အါဒိၣ်မးတုၤဒၣ်လဲာ်ယ့ၣ်ၡူးလဲၤနုာ်ဖျိဖျိဖျါဖျါ ဆူဝ့ၢ်ပူၤတသ့လၢၤဘၣ်. မ့မ့ၢ်ဘၣ်အိၣ်ဝဲလၢတၢ်လီၢ်လၢပှၤ တအိၣ်နီတဂၤ, ဒီးပှၤလၢတၢ်လီၢ်ကိးပူၤဒဲးဟဲဆူအအိၣ်လီၤ.