Read S'gaw Karen လံာ်မၢ်ကူး 12 Bible Online

လံာ်မၢ်ကူး 12 - S'gaw Karen bible

လံာ်မၢ်ကူး 12

¹အန့ၣ်တစု, ယ့ၣ်ၡူးစံးကတိၤကဒီးတၢ်ဒီးပှၤတဖၣ်န့ၣ်လၢတၢ် ကတိၤဒိတဖၣ်လီၤ. တဘျီပှၤအိၣ်ဝဲတဂၤလၢအသူၣ်စပံးမုၢ်တဖၣ်လၢစပံးလီၢ်တလီၢ် အပူၤ, ကရၢဃာ်အစပံးလီၢ်ဝးတရံး, ခူၣ်လီၤဆၢၣ်ဝဲတၢ်ပူၤတပူၤလၢကဆီလီၤနီၣ်စံၢ်စပံးသၣ်အကျိး အဂီၢ်, ဝံၤဘှီထီၣ်ဝဲတၢ်လီၢ်ကစီၤထီၣ်ဖးထီတခါလီၤ. အန့ၣ်ဝံၤ, ဒိးလဲလီၤဝဲအစပံးလီၢ်လၢပှၤဒိးလဲအီၣ်တၢ်တဖၣ်အစုပူၤ ဒီးလဲၤဝဲဆူတခီထံတခီကီၢ်န့ၣ်လီၤ.

²တုၤစပံးသၣ်မံထီၣ်အကတီၢ်ဘၣ်ဒီး, အဝဲဒၣ်မၢလီၤအခ့အပှၤတဂၤလၢအကလဲၤဟံးန့ၢ်စပံးသၣ်လၢ အဝဲဒၣ်ကြၢးန့ၢ်ဘၣ်ဝဲန့ၣ်လီၤ.

³ပှၤဒိးလဲအီၣ်တၢ်တဖၣ်ဖီၣ်ဃာ်တၢ်ခ့တၢ်ပှၤတဂၤန့ၣ်, ဒိအီၤတီၢ်အီၤ, ဒီးဒုးက့ၤအီၤထဲစုယၢ်ခီလီၤ.

⁴အန့ၣ်ဝံၤ, စပံးလီၢ်ကစၢ်မၢလီၤကဒီးအခ့အပှၤအဂၤတဂၤဆူအဝဲသ့ၣ် အအိၣ်လီၤ. အဝဲသ့ၣ်တဖၣ်ဒိဝဲတီၢ်ဝဲအခိၣ်ဒီးမၤမဲာ်ဆှးအီၤဒိၣ်ဒိၣ် ကလဲာ်လီၤ.

⁵စပံးလီၢ်ကစၢ်မၢလီၤအခ့အပှၤအဂၤတဂၤဒီးအဝဲတဂၤအံၤ အဝဲသ့ၣ်မၤသံကွံာ်ဝဲလီၤ. ဒီးအဝဲသ့ၣ်မၤပှၤတဘျုးဂၤဒ်န့ၣ်အသိး, ဒိဝဲတီၢ်ဝဲတနီၤဒီးမၤသံကွံာ်ဝဲတနီၤန့ၣ်လီၤ.

⁶အဝဲကမၢလီၤဝဲအဂီၢ်ပှၤအိၣ်တီၢ်ထဲတဂၤလၢအမ့ၢ်အဖိခွါလၢ အအဲၣ်ဘၣ်ဝဲဒိၣ်မးန့ၣ်လီၤ. လၢခံကတၢၢ်မၢလီၤဝဲဆူပှၤဒိးလဲအီၣ်တၢ်တဖၣ်အအိၣ်လီၤ. အဝဲဒၣ်စံးဝဲ, “ယနာ်လၢအဝဲသ့ၣ်ကပာ်ကဲယဖိခွါလီၤ.”

⁷ဘၣ်ဆၣ်ဒီးပှၤဒိးလဲအီၣ်တၢ်တဖၣ်စံးလိာ်အသးတဂၤဒီးတဂၤ, “အဝဲတဂၤအံၤမ့ၢ်စပံးလီၢ်ကစၢ်အဖိခွါလၢကန့ၢ်ဘၣ် သါတၢ်ဖိတၢ်လံၤလီၤ. ဟဲဃီၤ, မ်ပကမၤသံကွံာ်အီၤ, အန့ၣ်ဒီးတၢ်ဖိတၢ်လံၤလၢအကြၢးန့ၢ်ဘၣ်ဝဲန့ၣ်ကကဲပတၢ်လီၤ.”

⁸ဒီးအဝဲသ့ၣ်ဖီၣ်ဃာ်အီၤဒီးမၤသံကွံာ်အီၤဝံၤတၢၤကွံာ်အစိၣ် ဆူစပံးလီၢ်ကရၢၢ်အချၢလီၤ.

⁹ယ့ၣ်ၡူးသံကွၢ်ဝဲ, “မ့မ့ၢ်ဒ်န့ၣ်ဒီးစပံးလီၢ်ကစၢ်တဂၤန့ၣ်ကမၤဝဲဒ်လဲၣ်. အဝဲဒၣ်ကဟဲဒီးမၤသံကွံာ်ပှၤဒိးလဲအီၣ်စပံးလီၢ်တဖၣ်န့ၣ်, ဒီးကဒိးလဲလီၤက့ၤအစပံးလီၢ်လၢပှၤဂၤတဖၣ်လီၤ.

¹⁰တၢ်ကွဲးအသးအံၤမ့ၢ်သုတဖးဘၣ်ဒံးဘၣ်ဧါ. ‘လၢၢ်တဖျၢၣ်လၢပှၤဘှီထီၣ်ဟံၣ်တဖၣ်ညိကွံာ်ဝဲ ဒ်တၢ်လၢအဘျုးတအိၣ်နီတမံၤဘၣ်န့ၣ်, ကဲထီၣ်တ့ၢ်လံဟံၣ်သနၢၣ်အလၢၢ် လၢအဘျုးအဖှိၣ်အိၣ်ဒိၣ်ကတၢၢ်န့ၣ်လီၤ.

¹¹အအံၤမ့ၢ်ကစၢ်အတၢ်မၤ, ဒီးအိၣ်ဖျါလၢပမဲာ်ညါ လၢအမ့ၢ်တၢ်လီၤလးဒိၣ်မးလီၤ.’ ”

¹²ပှၤယူဒၤဖိအခိၣ်အနၢ်လၢယ့ၣ်ၡူးကတိၤတ့ၢ်တၢ်ဒီးအီၤတဖၣ်နၢ် ပၢၢ်ဝဲလၢတၢ်ကတိၤဒိအံၤမ့ၢ်တၢ်ကတိၤထီဒါအဝဲသ့ၣ်အဃိ, ဃုကျဲလၢအကဖီၣ်န့ၢ်အီၤလီၤ. ဘၣ်ဆၣ်ဒီးမ့ၢ်လၢအဝဲသ့ၣ်ပျံၤဘၣ်ပှၤဂီၢ်မုၢ်တဖၣ်အဃိ, ပာ်တ့ၢ်အီၤဒီးဟးထီၣ်ကွံာ်ဝဲဖဲန့ၣ်လီၤ.

¹³ပှၤဖၤရံၤၡဲတနီၤဒီးဟ့ၤရိာ်ကရၢဖိတနီၤဘၣ်တၢ်မၢလီၤအီၤ ဒ်သိးအကလဲၤဆူယ့ၣ်ၡူးအအိၣ်ဒီးသံကွၢ်သံဒိးအီၤ, ဒ်သိးအကဖီၣ်န့ၢ်အီၤလၢအတၢ်ကတိၤဒၣ်ဝဲတဖၣ်န့ၣ်လီၤ.

¹⁴အဝဲသ့ၣ်ဟဲဆူအအိၣ်ဒီးစံးဘၣ်အီၤ, “သရၣ်ဧၢ, ပသ့ၣ်ညါလၢနမ့ၢ်ပှၤတီပှၤလိၤဒီးကတိၤတၢ်တီတီလိၤလိၤ, ဒီးနတပျံၤဒီးကွၢ်မဲာ်ပှၤနီတဂၤဘၣ်န့ၣ်လီၤ. ပှၤအိၣ်ဒီးပှၤလီၢ်ပှၤလၤန့ၣ်နတပာ်ဒိၣ်လီၤဆီအီၤဘၣ်, မ့မ့ၢ်ကစၢ်ယွၤအကျဲလၢအပာ်လီၤဝဲလၢပှၤကညီအဂီၢ်န့ၣ်နသိၣ် လိသီလိအီၤတီတီလိၤလိၤလီၤ. တဲဘၣ်ပှၤတက့ၢ်. ပဟ့ၣ်တၢ်ခိတၢ်သွဲဆူရိမ့ၤအစီၤပၤဖးဒိၣ်န့ၣ် မ့ၢ်အကြၢးဝဲဘၣ်ဝဲကစီဒီဧါ. မ့ၢ်အတကြၢးတဘၣ်ဘၣ်လဲၣ်. မ့ၢ်ပကြၢးဟ့ၣ်ဧါ, မ့တမ့ၢ်တကြၢးဟ့ၣ်ဘၣ်လဲၣ်.”

¹⁵ဘၣ်ဆၣ်ဒီးယ့ၣ်ၡူးသ့ၣ်ညါန့ၢ်အတၢ်ပာ်မၤအသးသတးဒီးစံးဆၢ အဝဲသ့ၣ်, “ဘၣ်မနုၤသုဘၣ်သံကွၢ်သံဒိးယၤဒ်သိးသုကဖီၣ်န့ၢ်ယၤလၢ ယတၢ်ကတိၤဒၣ်ယဲန့ၣ်လဲၣ်. ဟဲစိာ်န့ၢ်ယၤစ့ဒန့ၤရံတဘ့ၣ်ဒီးပျဲယကွၢ်အီၤတက့ၢ်.”

¹⁶အဝဲသ့ၣ်ဟဲစိာ်စ့ဒန့ၤရံတဘ့ၣ်ဆူအအိၣ်, ဒီးအဝဲဒၣ်သံကွၢ် အဝဲသ့ၣ်, “တၢ်အံၤမ့ၢ်မတၤအခိၣ်အဂီၤဒီးအမံၤလဲၣ်.” အဝဲသ့ၣ်စံးဆၢက့ၤ, “မ့ၢ်ရိမ့ၤအစီၤပၤဖးဒိၣ်ကဲစၢ်အဂီၤဒီးအမံၤလီၤ.”

¹⁷ယ့ၣ်ၡူးစံးဘၣ်အဝဲသ့ၣ်, “ဂ့ၤလံ, မ့မ့ၢ်ဒ်န့ၣ်ဒီး ရိမ့ၤအစီၤပၤဖးဒိၣ် အတၢ်န့ၣ်ဟ့ၣ်ရိမ့ၤအစီၤပၤဖးဒိၣ်, ဒီးကစၢ်ယွၤအတၢ်န့ၣ်ဟ့ၣ်ကစၢ်ယွၤတက့ၢ်.” ယ့ၣ်ၡူးစံးတၢ်အံၤဒုးကမၢကမၣ်အဝဲသ့ၣ်ဒိၣ်ဒိၣ်ကလဲာ်လီၤ.

¹⁸ပှၤစးဒူၤကဲတနီၤလၢအစံးဝဲလၢပှၤသံန့ၣ်တမ့ၢ်ကဂဲၤဆၢထၢၣ် သမူထီၣ်က့ၤနီတစုဘၣ်န့ၣ်, ဟဲဆူယ့ၣ်ၡူးအအိၣ်ဒီးစံးဘၣ်အီၤ,

¹⁹“သရၣ်ဧၢ, စီၤမိၤၡ့ကွဲးဟ့ၣ်ပဝဲဒၣ်ပှၤယူဒၤဖိတဖၣ်အတၢ်သိၣ်တၢ်သီ တထံၣ်လၢအစံးဝဲ, ‘ပှၤပိာ်ခွါတဂၤအဒီပုၢ်ဝဲၢ်ခွါမ့ၢ်သံဒီးပာ်တ့ၢ် အမါဘၣ်ဆၣ်အဖိမ့ၢ်တအိၣ်နီတဂၤဘၣ်ဒီး, ပှၤတဂၤန့ၣ်ကဘၣ်ဟံးန့ၢ်အဒီပုၢ်ဝဲၢ်အမါ, ဒီးဒုးအိၣ်ထီၣ်ဖိလံၤလၢအဒီပုၢ်ဝဲၢ်ခွါအဂီၢ်လီၤ.’

²⁰ဘၣ်တဘျီပှၤဒီပုၢ်ဝဲၢ်အိၣ်နွံဂၤထဲအပိာ်ခွါလီၤ. အဒိၣ်ကတၢၢ်တဂၤဟံးန့ၢ်အမါဒီးသံဝဲ, ဒီးဖိလံၤတအိၣ်နီတဂၤဘၣ်.

²¹အန့ၣ်ဒီး, အဒီပုၢ်ဝဲၢ်ခံဂၤတဂၤဟံးန့ၢ်ပိာ်မုၣ်န့ၣ်ဝံၤသံဝဲ, ဒီးဖိလံၤတအိၣ်နီတဂၤဘၣ်. တၢ်မၤအသးဒီးအဒီပုၢ်ဝဲၢ်သၢဂၤတဂၤမ့ၢ်တမံၤဃီ,

²²ဒီးတၢ်မၤအသးဒီးအဒီပုၢ်ဝဲၢ်လၢအိၣ်တ့ၢ်အဂၤတဖၣ်မ့ၢ်တၢ်တမံၤ ဃီစ့ၢ်ကီးန့ၣ်လီၤ. အဒီပုၢ်ဝဲၢ်နွံဂၤလၢာ်ဟံးန့ၢ်ပိာ်မုၣ်တဂၤဃီန့ၣ်ဝံၤ သံဝဲဒီးဖိလံၤတအိၣ်တ့ၢ်နီတဂၤဘၣ်န့ၣ်လီၤ. လၢခံကတၢၢ်ပိာ်မုၣ်န့ၣ်သံဝဲစ့ၢ်ကီးလီၤ.

²³တုၤမုၢ်နံၤလၢပှၤသံတဖၣ်ဂဲၤဆၢထၢၣ်သမူထီၣ်က့ၤန့ၣ်, အဝဲဒၣ်ကမ့ၢ်ပှၤဖဲလဲၣ်တဂၤအမါလဲၣ်. အဝဲသ့ၣ်နွံဂၤလၢာ်ဟံးန့ၢ်တ့ၢ်အီၤလီၤ.”

²⁴ယ့ၣ်ၡူးစံးဘၣ်အဝဲသ့ၣ်, “သုစံးတၢ်န့ၣ်မ့ၢ်အကမၣ်ဒ်လဲၣ်န့ၣ်မ့ၢ်သုသ့ၣ်ညါစ့ၢ်ကီး ဧါ. အဂ့ၢ်မ့ၢ်လၢတၢ်ကွဲးအသးစီဆှံသုတသ့ၣ်ညါဘၣ်, ဒီးယွၤအစိကမီၤအိၣ်ဒ်လဲၣ်န့ၣ်သုတသ့ၣ်ညါဘၣ်အဃိလီၤ.

²⁵အဂ့ၢ်ဒ်လဲၣ်န့ၣ်, တုၤပှၤသံတဖၣ်ဂဲၤဆၢထၢၣ်သမူထီၣ်က့ၤဒီး, ပှၤတန့ၢ်မါန့ၢ်ဝၤလၢၤဘၣ်ဒီးတၢ်ဒိးတ့ဒိးဖျီလိာ်သးတအိၣ် လၢၤဘၣ်.

²⁶မ့မ့ၢ်တခီန့ၣ်, ပှၤကအိၣ်မူဒ်မူခိၣ်ကလူးတဖၣ်အသိးန့ၣ်လီၤ. တၢ်ဂ့ၢ်ဘၣ်ဃးပှၤသံတဖၣ်ဘၣ်တၢ်ဒုးဂဲၤဆၢထၢၣ်က့ၤအီၤန့ၣ်, မ့ၢ်သုတဖးဘၣ်လၢလံာ်မိၤၡ့အပူၤတၢ်ကွဲးတတီၤလၢအစံး တၢ်ဘၣ်ဃးတၤဆှုၣ်တပှီာ်တလိၣ် လၢမ့ၣ်အူအီၣ်အီၤအဂ့ၢ်န့ၣ်နီတဘျီဘၣ်ဧါ. လၢတၢ်ကွဲးဖဲန့ၣ်အပူၤကစၢ်ယွၤစံးဘၣ်စီၤမိၤၡ့, ‘ယမ့ၢ်စီၤအၤဘြၤဟၣ်အကစၢ်ယွၤ, စီၤအံၤစဲး အကစၢ်ယွၤဒီးစီၤယၤကိာ်အကစၢ်ယွၤလီၤ.’

²⁷အဝဲဒၣ်မ့ၢ်ပှၤမူဝဲတဖၣ်အကစၢ်ယွၤ, ဒီးတမ့ၢ်ဘၣ်ပှၤသံတဖၣ် အယွၤဘၣ်. သုတၢ်န့ၣ်ကမၣ်န့ၢ်သုဒိၣ်ဒိၣ်ကလဲာ်လီၤ.”

²⁸အကတီၢ်ဖဲန့ၣ်ပှၤသ့တၢ်ဘူၣ်တၢ်ဘါအတၢ်သိၣ်တၢ်သီ တဂၤအိၣ်ဖဲပှၤသ့ၣ်တဖၣ်အကျါ, ဒီးနၢ်ဟူအဝဲသ့ၣ်ဂ့ၢ်လိာ်ဘှီလိာ်အသးတဂၤဒီးတဂၤန့ၣ်လီၤ. ထံၣ်ဝဲလၢယ့ၣ်ၡူးစံးဆၢက့ၤပှၤစးဒူၤကဲတဖၣ်သ့ဂ့ၤမး သတးဒီးဟဲဝဲဆူအအိၣ်ဒီးသံကွၢ်အီၤ, “တၢ်မၤလိာ်အဒိၣ်ကတၢၢ်မ့ၢ်ဖဲလဲၣ်တထံၣ်လဲၣ်.”

²⁹ယ့ၣ်ၡူးစံးဆၢက့ၤအီၤ, “တၢ်မၤလိာ်အဒိၣ်ကတၢၢ်မ့ၢ်အအံၤ, ‘ကနၣ်တက့ၢ်. သုဝဲပှၤအံၣ်စရ့လးဖိသ့ၣ်ဧၢ, ကစၢ်လၢအမ့ၢ်ပယွၤန့ၣ်မ့ၢ်ကစၢ်ထဲတဂၤဧိၤလီၤ.

³⁰ဒီးသုဘၣ်အဲၣ်သုယွၤသုကစၢ်ယွၤလၢသုသးဒီဖျၢၣ်ညါ, လၢသုသူၣ်ကံၢ်သးလဲ, လၢသုတၢ်ကူၣ်တၢ်ဆးတုၤအလၢာ်, ဒီးသုဂံၢ်သုဘါခဲလၢာ်လီၤ.’

³¹တၢ်မၤလိာ်အဒိၣ်ကတၢၢ်ခံထံၣ်တထံၣ်မ့ၢ်အအံၤလီၤ. သုဘၣ်အဲၣ်ပှၤဂၤဒ်သုအဲၣ်လီၤသုသးဒၣ်သုဝဲအသိးန့ၣ်လီၤ. တၢ်မၤလိာ်အဂၤလၢအဒိၣ်န့ၢ်တၢ်ခံထံၣ်အံၤတအိၣ်ဘၣ်.”

³²ပှၤသ့တၢ်ဘူၣ်တၢ်ဘါအတၢ်သိၣ်တၢ်သီတဂၤန့ၣ်စံးဘၣ်ယ့ၣ်ၡူး, “သရၣ်ဧၢ, နစံးတၢ်န့ၣ်ဘၣ်ဂ့ၤမးလီၤ. နစံးလၢထဲယွၤတဂၢၤဧိၤမ့ၢ်ကစၢ်ယွၤန့ၣ်မ့ၢ်တၢ်ကတိၤအမ့ၢ် အတီလီၤ. ယွၤအဂၤတအိၣ်နီတဂၤဘၣ်.

³³ပှၤကညီတဂၤမ့ၢ်အဲၣ်ကစၢ်ယွၤလၢအသးဒီဖျၢၣ်ညါ, လၢအတၢ်ကူၣ်တၢ်ဆးတုၤအလၢာ်, ဒီးလၢအတၢ်ဂံၢ်တၢ်ဘါခဲလၢာ်, ဒီးမ့ၢ်အဲၣ်ပှၤကညီကဒဲကဒဲဒီးအီၤဒ်အအဲၣ်လီၤအသးဒၣ်ဝဲန့ၣ်, မ့ၢ်တၢ်အဂ့ၤဒိၣ်န့ၢ်ဒံးတၢ်လုၢ်မ့ၣ်အူလၢအမ့ၢ်တၢ်လုၢ်ဆၣ်ဖိကီၢ်ဖိဒီဒု, ဒီးတၢ်လုၢ်အဂၤတဖၣ်ခဲလၢာ်တက့ၢ်လီၤ.”

³⁴ယ့ၣ်ၡူးထံၣ်ဘၣ်ဝဲလၢပှၤတဂၤအတၢ်စံးဆၢအံၤအိၣ်ဒီးတၢ်ကူၣ် သ့သတးဒီးစံးဘၣ်အီၤ, “နတယံၤဘၣ်ဒီးကစၢ်ယွၤအဘီအမုၢ်ဘၣ်.” အန့ၣ်ဝံၤအလီၢ်ခံပှၤသံကွၢ်ယ့ၣ်ၡူးလၢတၢ်သံကွၢ်တဘူၣ်လၢၤနီတဂၤဘၣ်.

³⁵ဖဲယ့ၣ်ၡူးသိၣ်လီၤသီလီၤတၢ်လၢတၢ်လုၢ်ဟံၣ်ပူၤအကတီၢ်န့ၣ်, သံကွၢ်ဝဲတၢ်သံကွၢ်တထံၣ်, “ပှၤသ့တၢ်ဘူၣ်တၢ်ဘါအတၢ်သိၣ်တၢ်သီတဖၣ်စံးဝဲလၢ ခရံာ်မ့ၢ်စီၤဒၤဝံးအစၢၤအသွဲၣ်လီၤန့ၣ်, မ့ၢ်အစံးဝဲသ့ဒ်လဲၣ်.

³⁶စီၤဒၤဝံးအကစၢ်ဒၣ်ဝဲန့ၣ်သးစီဆှံထိးဘၣ်အသးဒီးစံးဝဲ, ‘ယွၤစံးဘၣ်ယကစၢ်, ဆ့ၣ်နီၤလၢယစုထွဲတခီ, တုၤယဒုးအိၣ်နဒုၣ်နဒါတဖၣ်လၢ နခီၣ်ညါသးအဖီလာ်တစုတက့ၢ်.’

³⁷စီၤဒၤဝံးအကစၢ်ဒၣ်ဝဲကိးအီၤလၢ ‘ကစၢ်’ သတးဒီး, အကစၢ်န့ၣ်ကကဲလၢအစၢၤအသွဲၣ်တခီကသ့ဒ်လဲၣ်.” ပှၤဂီၢ်မုၢ်ဖးဒိၣ်ဒိကနၣ်ယ့ၣ်ၡူးအတၢ်သိၣ်လီၤသီလီၤပှဲၤ ဒီးတၢ်သူၣ်ဖှံသးညီလီၤ.

³⁸လၢအတၢ်သိၣ်လီၤသီလီၤတၢ်အပူၤယ့ၣ်ၡူးစံးဝဲ, “ပလီၢ်သုသးလၢ ပှၤသ့တၢ်ဘူၣ်တၢ်ဘါအတၢ်သိၣ်တၢ်သီတဖၣ်န့ၣ်တက့ၢ်. အဝဲသ့ၣ်မိၣ်ဟးထီၣ်ဟးလီၤသး, သိးဒီးဆ့ကၤဖီခိၣ်ဖးထီ, ဒီးလၢဖၠါပူၤန့ၣ်အဲၣ်ဒိးဝဲလၢပှၤကကတိၤဒိၣ်အဝဲသ့ၣ်လၢတၢ် ယူးယီၣ်ပာ်ကဲအပူၤန့ၣ်လီၤ.

³⁹လၢဘူၣ်ဘျီၣ်လၢအမ့ၢ်တၢ်ဘါလီၢ်တဖၣ်အပူၤန့ၣ်အဝဲသ့ၣ်အဲၣ်ဒိး န့ၢ်ဘၣ်တၢ်လီၢ်အဂ့ၤကတၢၢ်, ဒီးလၢတၢ်အီၣ်အမူးပူၤန့ၣ်အဲၣ်ဒိးန့ၢ်ဘၣ်တၢ်လီၢ်လၢ ပှၤပာ်လီၤဆီတဖၣ်န့ၣ်လီၤ.

⁴⁰အဝဲသ့ၣ်ဂုာ်ဆူၣ်ပျိဆူၣ်မုၣ်ကမဲတဖၣ်အဟံၣ်ဒီးအစုလီၢ်ခီၣ် ခိၣ်, ဒီးပာ်မၤအသးဒ်အမ့ၢ်ပှၤဂ့ၤပှၤဝါအသိးခီဖျိတၢ်ဃ့ထု ကဖၣ်တၢ်ထီထီကလဲာ်န့ၣ်လီၤ. လၢမုၢ်စံၣ်ညီၣ်အနံၤန့ၣ်အဝဲသ့ၣ်ကဘၣ်တၢ်စံၣ်ညီၣ်အီၤနးန့ၢ် ပှၤဂၤတက့ၢ်န့ၣ်လီၤ.”

⁴¹ယ့ၣ်ၡူးဆ့ၣ်နီၤဝဲဖဲပှၤဒၢနုာ်တိၢ်မၤဘူၣ်အလီၢ်အမဲာ်ညါလိၤ လိၤအဖၢမုၢ်န့ၣ်, ထံၣ်ပှၤတဖၣ်ဒၢနုာ်အတိၢ်မၤဘူၣ်လၢတၢ်မၤဘူၣ်အတလါတဖၣ်ပူၤ လီၤ. ပှၤထူးပှၤတီၤအါဂၤဒၢနုာ်တိၢ်အါအါကလဲာ်လီၤ.

⁴²အန့ၣ်ဝံၤမုၣ်ကမဲလၢအဖှီၣ်တဂၤဟဲဒီးဒၢနုာ်လီၤဝဲတိၢ်ဂီၤ မဲာ်ဖိခံဘ့ၣ်လၢအလီၤလၢတိၢ်တဘ့ၣ်န့ၣ်လီၤ.

⁴³ယ့ၣ်ၡူးကိးဃီၤအပျဲၢ်အဘီၣ်တဖၣ်ဒီးစံးဘၣ်အဝဲသ့ၣ်, “ယစံးဘၣ်သုတီတီလီၤ. မုၣ်ကမဲလၢအဖှီၣ်တဂၤအံၤဒၢနုာ်တိၢ်မၤဘူၣ်လၢတလါအပူၤ အါန့ၢ်ပှၤအဂၤတဖၣ်ခဲလၢာ်တက့ၢ်လီၤ.

⁴⁴အဂ့ၢ်ဒ်လဲၣ်န့ၣ်, အဝဲသ့ၣ်တဖၣ်ဟ့ၣ်မၤဘူၣ်လီၤဒၣ်အတၢ်အိၣ်ဘျဲၣ် အိၣ်စဲၢ်လီၤ. မ့မ့ၢ်ပိာ်မုၣ်တဂၤအံၤ, လၢအတၢ်ဖှီၣ်တၢ်ယာ်အပူၤဒၢနုာ်လီၤဝဲကယဲၢ်တၢ်အိၣ်ဒီးအီၤန့ၣ် ခဲလၢာ်, တၢ်လၢကလုၢ်အီၣ်အသးသမူအဂီၢ်န့ၣ်လီၤ.”