Read S'gaw Karen လံာ်မၢ်ကူး 13 Bible Online

လံာ်မၢ်ကူး 13 - S'gaw Karen bible

လံာ်မၢ်ကူး 13

¹ဖဲယ့ၣ်ၡူးဟဲက့ၤထီၣ်လၢတၢ်လုၢ်ဟံၣ်ပူၤအကတီၢ်န့ၣ်, အပျဲၢ်အဘီၣ်အကျါတဂၤစံးဘၣ်အီၤ, “ကွၢ်တက့ၢ်, သရၣ်ဧၢ, လၢၢ်သ့ၣ်တဖၣ်ဒီးတၢ်သူၣ်ထီၣ်သ့ၣ်တဖၣ်မ့ၢ်တၢ်လၢ အလီၤဘီလီၤမုၢ်မးလဲၣ်.”

²ယ့ၣ်ၡူးစံးဆၢက့ၤအီၤ, “နထံၣ်နဲတၢ်သူၣ်ထီၣ်အဒိၣ်အမုၢ်တဖၣ်အံၤစ့ၢ်ကီးဧါ. လၢၢ်တဖၣ်အံၤတၢ်ကမၤလီၤပှီၢ်ကွံာ်အီၤခဲလၢာ်, ဒီးကအိၣ်စဲဘူးလိာ်အသးခံဖျၢၣ်တပူၤဃီဒၣ်လဲာ်န့ၣ်တအိၣ်လၢၤ နီတပူၤဘၣ်.”

³ဖဲယ့ၣ်ၡူးဆ့ၣ်နီၤဝဲလၢကစၢၢ်သ့ၣ်စၤယံးအဒီခိၣ်ဒီးကွၢ်ဃီၤ တၢ်ဆူတၢ်လုၢ်ဟံၣ်အကတီၢ်န့ၣ်, စီၤပ့းတရူး, စီၤယၤကိာ်, စီၤယိၤဟၣ်, ဒီးစီၤအၣ်ဒရ့းတဖၣ်သံကွၢ်အီၤကစုဒု,

⁴“တၢ်လၢနစံးနဲတမံၤန့ၣ်ကမၤအသးအကတီၢ်ဖဲလဲၣ်ဒီးတၢ်ပနီၣ်လၢ ကဒုးသ့ၣ်ညါပှၤတၢ်ဆၢကတီၢ်လၢတၢ်ခဲလၢာ်အံၤကမၤအသးန့ၣ် မ့ၢ်မနုၤတဖၣ်လဲၣ်. စံးဘၣ်တဲဘၣ်ပှၤတက့ၢ်.”

⁵ယ့ၣ်ၡူးစံးဘၣ်အဝဲသ့ၣ်, “ပလီၢ်သုသးတက့ၢ်. သုတပျဲပှၤလီန့ၢ်သုနီတဂၤတဂ့ၤ.

⁶ပှၤအါဂၤကဟဲဒီးကမၤအသးဒ်အမ့ၢ်ယၤအသိးဒီးကစံးဝဲလၢအမ့ၢ် ခရံာ်ဒီးကလီန့ၢ်လွဲန့ၢ်ပှၤအါဂၤအသးလီၤ.

⁷ဒီးတုၤသုနၢ်ဟူဘၣ်တၢ်ဒုးတၢ်ယၤသီၣ်ထီၣ်သဲထီၣ်ဖဲတၢ်လီၢ် ဘူးဒီးသု, ဒီးသုမ့ၢ်န့ၢ်ဘၣ်တၢ်ကစီၣ်လၢတၢ်ဒုးတၢ်ယၤအိၣ်ထီၣ် စ့ၢ်ကီးလၢအယံၤန့ၣ်, သုတသူၣ်ကိၢ်သးဂီၤတဂ့ၤ. တၢ်တဖၣ်အံၤကဘၣ်မၤအသး, ဘၣ်ဆၣ်တမ့ၢ်ဒံးတၢ်အစိၤကတၢၢ်ဘၣ်.

⁸ပှၤကလုာ်တဖၣ်ကဂဲၤဆၢထၢၣ်ထီဒါလိာ်အသး တကလုာ်ဒီး တကလုာ်, ဒီးထံကီၢ်ဘီမုၢ်တဖၣ်ကဒုးလိာ်အသးတဘီမုၢ်ဒီး တဘီမုၢ်လီၤ. ဟီၣ်ခိၣ်ကဟူးဝးဝဲလၢတၢ်လီၢ်သကုၤဆးဒး, ဒီးတၢ်သၣ်ဝံၤလီၤဒိတဖၣ်ကအိၣ်စ့ၢ်ကီးဝဲလီၤ. တၢ်တဖၣ်အံၤမ့ၢ်တၢ်နးတၢ်ဖှီၣ်အခီၣ်ထံးန့ၣ်လီၤ.

⁹ကစၢ်ဒၣ်သုဝဲ, သုဘၣ်ပလီၢ်သုသးလီၤ. တၢ်ကဖီၣ်သုဒီးတၢ် ကဆှၢထီၣ်သုဆူသူၣ်က့သးပှၢ်အခိၣ်အနၢ်တဖၣ်အမဲာ်ညါလီၤ. သုကဘၣ်တၢ်ဒိတၢ်တီၢ်သုလၢဘူၣ်ဘျီၣ်လၢအမ့ၢ်တၢ်ဘါ အလီၢ်တဖၣ်အပူၤလီၤ. လၢယဃိသုကဘၣ်အိၣ်ဆၢထၢၣ်လၢကီၢ် ပဒိၣ်ဖးဒိၣ်ဒီးစီၤပၤတဖၣ်အမဲာ်ညါလၢတၢ်ကစံၣ်ညီၣ်သုအဂီၢ်, ဒီးသုကကဲထီၣ်ပှၤအုၣ်အသးတဖၣ်လၢအဝဲသ့ၣ်အမဲာ်ညါလီၤ.

¹⁰ဘၣ်ဆၣ်ဒီးတချုးတၢ်အကတၢၢ်ဟဲတုၤဒံးဘၣ်န့ၣ်, အလီၢ်အိၣ်လၢပှၤကဘၣ်ဒုးဟူထီၣ်သါလီၤတၢ်သးခု ကစီၣ်လၢပှၤကိးကလုာ်ဒဲးလီၤ.

¹¹ဒီးတဘျီလၢ်လၢ်ဖဲတၢ်ဖီၣ်သုဒီးတၢ်ဆှၢထီၣ်သုလၢတၢ် ကစံၣ်ညီၣ်သုအဂီၢ်န့ၣ်, သုကဘၣ်စံးဘၣ်ကတိၤတၢ်မနုၤလဲၣ်န့ၣ်သုတဘၣ်သူၣ်ကိၢ်သးဂီၤဆိ ပာ်တဂ့ၤ. မ့မ့ၢ်တုၤအဆၢကတီၢ်ဘၣ်ဒီး, ကတိၤတၢ်ကတိၤလၢတၢ်ဟ့ၣ်သုဖဲအကတီၢ်န့ၣ်တက့ၢ်. အဂ့ၢ်ဒ်လဲၣ်န့ၣ်တမ့ၢ်သုကတိၤသုတၢ်ကတိၤဒၣ်ဝဲဘၣ်. သုတၢ်ကတိၤတဖၣ်ဟဲလၢသးစီဆှံတခီလီၤ.

¹²ဒီပုၢ်ဝဲၢ်ကဒဲကဒဲကဟ့ၣ်လီၤကွံာ်အဒီပုၢ်ဝဲၢ်လၢတၢ်ကမၤသံ အီၤအဂီၢ်, ဒီးပၢ်တဖၣ်ကဟ့ၣ်လီၤကွံာ်အဖိတဖၣ်လၢတၢ် တမံၤဃီအဂီၢ်လီၤ. ဖိလံၤတဖၣ်ကဂဲၤဆၢထၢၣ်ထီဒါမိၢ်ပၢ် တဖၣ်ဒီးပျဲတၢ်မၤသံကွံာ်အဝဲသ့ၣ်လီၤ.

¹³လၢယဃိပှၤခဲလၢာ်ကသးဟ့သုလီၤ. ဘၣ်ဆၣ်ဒီးပှၤတဂၤလၢ်လၢ်လၢအအိၣ်ဂၢၢ်ကျၢၤဝဲတုၤအကတၢၢ် တစုန့ၣ်, ယွၤကအုၣ်က့ၤခီၣ်က့ၤအီၤလီၤ.

¹⁴သုဝဲသ့ၣ်သုကထံၣ်ဘၣ်တၢ်မၤလီၤပျံၤလီၤဖုးတၢ်လၢအလီၤ သးဘၣ်အၢဒိၣ်ဒိၣ်ကလဲာ်န့ၣ်အိၣ်ဝဲလၢတၢ်လီၢ်လၢအတကြၢး အိၣ်ဝဲဘၣ်န့ၣ်လီၤ. (ပှၤဖးတၢ်ဖိတဂၤကဘၣ်နၢ်ပၢၢ်တၢ်တမံၤအံၤ အခီပညီသပှၢ်ကတၢၢ်လီၤ.) အန့ၣ်တစုပှၤအိၣ်လၢကီၢ်ယူဒၤပူၤ တဖၣ်ကဘၣ်ဃ့ၢ်ပူၤဖျဲးအသးဆူကစၢၢ်ကလိတဖၣ်အကျါလီၤ.

¹⁵ပှၤတဂၤလၢအအိၣ်လၢအဟံၣ်ခိၣ်ဒုးအဖီခိၣ်န့ၣ်, တဘၣ်က့ၤနုာ်ဆူ အဟံၣ်ပူၤလၢကဟံးန့ၢ်တၢ်ဖိတၢ်လံၤတမံၤမံၤလၢကဃ့ၢ်စိာ်ဝဲလၢ အသိးအဂီၢ်န့ၣ်ဘၣ်.

¹⁶ပှၤတဂၤလၢအဖံးတၢ်မၤတၢ်လၢစံာ်ပျီပူၤန့ၣ်, မ်အသုတက့ၤကဒါက့ၤဆူအဟံၣ်လၢကဟံးန့ၢ်အဆ့ကၤဖီခိၣ် အဂီၢ်တဂ့ၤ.

¹⁷တုၤမုၢ်နံၤမုၢ်သီတဖၣ်ဘၣ်ဝဲဒီးပိာ်မုၣ်လၢအအိၣ်ဒီးအဟုး အသး, ဒီးမိၢ်လၢအအိၣ်ဒီးဖိဆံးအီၣ်နုၢ်ဖိတဖၣ်, ကမ့ၢ်တၢ်အကတီၢ်လၢအဖှီၣ်အနးဒိၣ်မးလၢအဝဲသ့ၣ် အဂီၢ်လီၤ.

¹⁸ဃ့ထုကဖၣ်လၢကစၢ်ယွၤဒ်သိးတၢ်သ့ၣ်တဖၣ်အံၤအသု တမၤအသးလၢတၢ်ဂိၢ်တၢ်ခုၣ်အကတီၢ်တဂ့ၤန့ၣ်တက့ၢ်.

¹⁹အဂ့ၢ်ဒ်လဲၣ်န့ၣ်, တၢ်နးတၢ်ဖှီၣ်တကလုာ်လၢမုၢ်နံၤမုၢ်သီတဖၣ်န့ၣ်ကမ့ၢ်တၢ်လၢ အနးဒိၣ်မးတကလုာ်လၢအတမၤဒံးဘၣ်အသးနီတစုလၢ ယွၤတ့လီၤပာ်လီၤတၢ်လၢထံးလၢသီတုၤလီၤလၢအခါခဲအံၤ န့ၣ်လီၤ. ဒီးတမ့ၢ်လၢတၢ်ကမၤအသးဒ်သိးအံၤနီတစုလၢၤဘၣ်.

²⁰ကစၢ်မ့ၢ်တမၤစှၤလီၤမုၢ်နံၤမုၢ်သီတဖၣ်န့ၣ်ဘၣ်ဒီး, တမ့ၢ်လၢပှၤကတုၤဘၣ်က့ၤလၢတၢ်အုၣ်က့ၤခီၣ်က့ၤနီတဂၤ ဘၣ်. ဘၣ်ဆၣ်ဒီးပှၤလၢအဘၣ်တၢ်ဃုထၢပာ်ဝဲတဖၣ် အဂီၢ်န့ၣ်, ကမၤစှၤလီၤမုၢ်နံၤမုၢ်သီတဖၣ်န့ၣ်လီၤ.

²¹အန့ၣ်ဝံၤပှၤတဂၤဂၤမ့ၢ်စံးဘၣ်နၤ, ‘ကွၢ်တက့ၢ်, ခရံာ်ကစၢ်အိၣ်လၢအံၤ’ မ့တမ့ၢ်ဘၣ်ဒီးမ့ၢ်စံးဘၣ်နၤ, ‘ကွၢ်တက့ၢ်, ခရံာ်ကစၢ်အိၣ်လၢန့ၣ်’ ဒီး, နာ်အီၤတဂ့ၤ.

²²အဂ့ၢ်ဒ်လဲၣ်န့ၣ်, ခရံာ်အဘျၣ်ဒီးဝံအဘျၣ်တဖၣ်ကဟဲပၢၢ်ထီၣ်, ဒီးကဒုးနဲၣ်ပှၤလၢတၢ်ပနီၣ်လီၤဆီအါမံၤဒီးကမၤတၢ်လီၤလး တဖၣ်ဒ်သိးမ့ၢ်သ့ဒီးကလီန့ၢ်လွဲန့ၢ်ကစၢ်ယွၤအပှၤဃုထၢဖိ တဖၣ်ဒၣ်လဲာ်န့ၣ်လီၤ.

²³ပလီၢ်သုသးတက့ၢ်. တချုးတၢ်တဖၣ်အံၤမၤဒံးအသးဘၣ်ဒီး, ယတဲပလီၢ်တ့ၢ်သုတၢ်ကိးမံၤဒဲးလံ.

²⁴မုၢ်နံၤမုၢ်သီတဖၣ်လၢတၢ်နးတၢ်ဖှီၣ်ဘၣ်ပှၤဝံၤအလီၢ်ခံန့ၣ်, မုၢ်ကခံးလီၤကွံာ်ဒီးလါအတၢ်ကပီၤကလီၤမၢ်ကွံာ်,

²⁵ဆၣ်အိၣ်လၢမူကပိာ်လိၤတဖၣ်ကလီၤတဲာ်ဒီးတၢ်အစိ အကမီၤအိၣ်လၢမူကပိာ်လိၤတဖၣ်ကဘၣ်တၢ်မၤဟူးဝး ဆှဲးဆှိးအီၤလီၤ.

²⁶တုၤနုၤတစုပှၤကထံၣ်ဘၣ်ပှၤကညီဖိခွါဟဲလီၤဝဲလၢတၢ် အၢၣ်တဖၣ်အကျါ, အိၣ်ဒီးတၢ်စိဒိၣ်ကမီၤဒိၣ်ဒီးတၢ်လၤ တၢ်ကပီၤန့ၣ်လီၤ.

²⁷အဝဲဒၣ်ကမၢလီၤမူခိၣ်ကလူးတဖၣ်လၢကလဲၤဒီးကိးဖှိၣ်က့ၤ ကစၢ်ယွၤအပှၤဃုထၢဖိတဖၣ်အိၣ်လၢကလံၤထံးဒီးကလံၤစိး, လၢမုၢ်ထီၣ်ဒီးလၢမုၢ်နုာ်, လၢဟီၣ်ခိၣ်အကတၢၢ်ပၢၢ်တုၤလၢမူခိၣ်အကတၢၢ်န့ၣ်လီၤ.

²⁸ဟံးန့ၢ်မၤလိတၢ်လၢချၢၣ်ဒၢအအိၣ်န့ၣ်တက့ၢ်. တုၤအဒ့တဖၣ်ဒိးစၢ်ထီၣ်ဒီးအလၣ်တဖၣ်ဟဲထီၣ်လံန့ၣ်, သုသ့ၣ်ညါလၢတၢ်ကိၢ်ခါအကတီၢ်ကဘၣ်ဘူးထီၣ်လံန့ၣ်လီၤ.

²⁹ဒ်န့ၣ်အသိး, တုၤသုထံၣ်ဘၣ်တၢ်တဖၣ်အံၤမၤအသးဒီး, သုဘၣ်သ့ၣ်ညါလၢတၢ်ဆၢကတီၢ်ကဘၣ်ဘူးထီၣ်လံ.

³⁰ယတဲသုသပှၢ်ကတၢၢ်လီၤ. တချုးလၢပှၤတစိၤအံၤသံဝဲခဲလၢာ်န့ၣ်, တၢ်သ့ၣ်တဖၣ်အံၤကမၤအသးလီၤ.

³¹မူခိၣ်ဒီးဟီၣ်ခိၣ်အစိၤကကတၢၢ်ကွံာ်ဝဲဒၣ်, ဘၣ်ဆၣ်ဒီးယတၢ်ကတိၤတဖၣ်ကအိၣ်ဂၢၢ်ဆိးကျၢၤလီၤစိၤလီၤထီလီၤ.

³²မ့မ့ၢ်တၢ်တဖၣ်အံၤကမၤအသးအမုၢ်နံၤမုၢ်သီအဆၢကတီၢ်နၣ်ရံၣ် န့ၣ်, ပှၤတသ့ၣ်ညါနီတဂၤဘၣ်. ကလူးလၢမူခိၣ်တဖၣ်မ့ၢ်ဂ့ၤ, ဖိခွါမ့ၢ်ဂ့ၤတသ့ၣ်ညါဝဲဘၣ်. ပှၤသ့ၣ်ညါတၢ်အံၤမ့ၢ်ထဲပၢ်တဂၤဧိၤလီၤ.

³³ပလီၢ်သုသးတက့ၢ်. အိၣ်ကတီၤသးဒီးထုကဖၣ်တက့ၢ်. အဂ့ၢ်ဒ်လဲၣ်န့ၣ်, တၢ်ကမၤအသးအဆၢကတီၢ်ကဘၣ်ခဲလဲၣ်န့ၣ်သု တသ့ၣ်ညါဘၣ်.

³⁴တၢ်မၤအသးအံၤလီၤဂာ်ဒီးပှၤတဂၤလၢအဟးထီၣ်လၢ အဟံၣ်ဒီးလဲၤတၢ်န့ၣ်လီၤ. ပာ်တ့ၢ်တၢ်ခဲလၢာ်လၢအခ့အပှၤတဖၣ် အစုပူၤ, ဒီးတဂၤစုာ်စုာ်ဟ့ၣ်ဝဲမူဒါလၢကဘၣ်မၤဝဲအဂီၢ်, ဒီးမၤလိာ်တ့ၢ်ပှၤပၢၤကျဲစၢၤတဂၤန့ၣ်ဒ်သိးအကဆိးသီဝဲ အဂီၢ်န့ၣ်လီၤ.

³⁵လၢတၢ်န့ၣ်အဃိဆိးသီတက့ၢ်. အဂ့ၢ်ဒ်လဲၣ်န့ၣ်ဟံၣ်ကစၢ်ကဟဲက့ၤအကတီၢ်ဖဲလဲၣ်, လၢဟါခီ, လၢဖးဖီမုၢ်, လၢဆီဖါအိၣ်အိအကတီၢ်, လၢမုၢ်ဆ့ၣ်ထီၣ်ဧါန့ၣ်, သုတသ့ၣ်ညါသုဝဲဘၣ်.

³⁶ဟံၣ်ကစၢ်မ့ၢ်ဟဲက့ၤဝဲသတူၢ်ကလာ်ဒီး, ကထံၣ်န့ၢ်ဘၣ်ဖုးသုမံသပ့ၤဘၣ်သုသးလီၤ.

³⁷တၢ်လၢယစံးဘၣ်သုအံၤမ့ၢ်ယစံးဘၣ်ပှၤကိးဂၤဒဲးလီၤ. ဆိးသီတက့ၢ်.”