S'gaw Karen bible online

လံာ်မၢ်ကူး 14

¹အကတီၢ်မ့ၢ်ဖဲဘူၣ်လဲၤကပာ်ဒီးဘူၣ်ကိၣ်တအိၣ်ဒီးကိၣ်မံၣ် တချုးဘၣ်ဒံးဘၣ်ခံသီန့ၣ်, ပှၤလုၢ်တၢ်အခိၣ်အဒိၣ်တဖၣ်ဒီးပှၤသ့တၢ်ဘူၣ်တၢ်ဘါအတၢ် သိၣ်တၢ်သီတဖၣ်ဃုဝဲကျဲလၢတၢ်ခူသူၣ်အပူၤလၢအကဖီၣ် န့ၢ်ယ့ၣ်ၡူးဒီးမၤသံကွံာ်အီၤအဂီၢ်န့ၣ်လီၤ.

²အဝဲသ့ၣ်စံးဝဲ, “တၢ်အံၤပတဘၣ်မၤအီၤဖဲဘူၣ်အဆၢကတီၢ် အံၤဘၣ်. ပမ့ၢ်မၤအီၤဖဲဘူၣ်အဆၢကတီၢ်အံၤဒီးပှၤဂီၢ်မုၢ်တဖၣ် ကတၢထီၣ်တၢလီၤဘၣ်ဖုးလီၤ.”

³ယ့ၣ်ၡူးအိၣ်ဝဲဒၣ်လၢသဝီဘ့ၤသနံလၢပှၤဘၣ်တၢ်ဆါအၢ စီၤၡံမိၣ်အဟံၣ်ပူၤလီၤ. ဖဲအဝဲဆ့ၣ်နီၤအီၣ်တၢ်အခါ, ပိာ်မုၣ်တဂၤဟဲနုာ်စိာ်ဃုာ်ဒီးသိကိလၢၢ်ဝါတကိပှဲၤဒီးနၢ် ဒူးသိနၢမူနီၢ်နီၢ်လၢအပှ့ၤဒိၣ်နီၢ်မးန့ၣ်လီၤ. ပိာ်မုၣ်န့ၣ်မၤကၢ်အသိကိအကိာ်ဒီးလူလီၤဝဲသိနၢ မူန့ၣ်လၢယ့ၣ်ၡူးအခိၣ်လိၤလီၤ.

⁴ပှၤအိၣ်ဖဲန့ၣ်တနီၤအသးဟဲဒိၣ်ထီၣ်ဒီးစံးလိာ်အသးတဂၤ ဒီးတဂၤ, “သိနၢမူအံၤဘၣ်မနုၤတၢ်မၤလၢာ်ဂီၤကွံာ်အီၤဒ်အံၤလဲၣ်.

⁵သိနၢမူဒ်အံၤပှၤမ့ၢ်ဆါလီၤဒီးကန့ၢ်စ့ဒန့ၤရံအဘ့ၣ်သၢကယၤ ဒီးစ့န့ၣ်တၢ်ဟ့ၣ်လီၤပှၤလၢအဖှီၣ်သ့လီၤ. ဒီးအဝဲသ့ၣ်ကတိၤအ့ၣ်လိာ်ပိာ်မုၣ်န့ၣ်ဆါဆါကလဲာ်လီၤ.”

⁶မ့မ့ၢ်ယ့ၣ်ၡူးစံးဝဲ, “ကတိၤအီၤနီတမံၤတဂ့ၤ. ဘၣ်မနုၤသုဘၣ်မၤတံာ်တာ်အီၤလဲၣ်. တၢ်လၢအဝဲဒၣ်မၤ ဘၣ်ယၤအံၤမ့ၢ်တၢ်လၢအဃံလၤဂ့ၤမးလီၤ.

⁷ပှၤဖှီၣ်ဖိတဖၣ်အိၣ်လၢသုသိးသုကျါထီဘိ, ဒီးတဘျီလၢ်လၢ်ဖဲသုအဲၣ်ဒိးမၤစၢၤအဝဲသ့ၣ်န့ၣ်, သုမၤစၢၤသ့လီၤ. မ့မ့ၢ်ယဲဒၣ်ယတအိၣ်ဒီးသုထီဘိဘၣ်.

⁸ပိာ်မုၣ်အံၤတၢ်လၢအမၤဝဲသ့န့ၣ်မၤတ့ၢ်ဝဲလံ. ဟဲဒီးဖှူဆိပာ်လံ ယလိၤဒ်အမ့ၢ်တၢ်ကတဲာ်ကတီၤယနီၢ်ခိလၢတၢ်ခူၣ်လီၤအီၤ အဂီၢ်န့ၣ်လီၤ.

⁹ယစံးဘၣ်သုသပှၢ်ကတၢၢ်လီၤ. လၢဟီၣ်ခိၣ်ဒီဘ့ၣ်တၢ်လီၢ်တပူၤ လၢ်လၢ်ဖဲပှၤစံၣ်တဲၤတဲလီၤတၢ်သးခုအကစီၣ်န့ၣ်, ပှၤကစံးကတိၤစ့ၢ်ကီးတၢ်လၢပိာ်မုၣ်တဂၤအံၤမၤတ့ၢ်ဝဲအဂ့ၢ်, လၢတၢ်ကသ့ၣ်နီၣ်ထီၣ်က့ၤအီၤအဂီၢ်န့ၣ်လီၤ.”

¹⁰အန့ၣ်ဝံၤ စီၤယူဒၤအံၣ်စကၤရံၤအိာ်လၢအမ့ၢ်အပျဲၢ်အဘီၣ် တဆံခံဂၤအကျါတဂၤန့ၣ်, လဲၤဝဲဆူပှၤလုၢ်တၢ်အခိၣ်အဒိၣ်တဖၣ်အအိၣ်ဒ်သိးအကဟ့ၣ် လီၤကွံာ်ယ့ၣ်ၡူးဆူအဝဲသ့ၣ်အစုပူၤအဂီၢ်န့ၣ်လီၤ.

¹¹တုၤအဝဲသ့ၣ်နၢ်ဟူဘၣ်အဝဲဟဲလၢမနုၤအဂီၢ်လဲၣ်န့ၣ်ဒီး, သူၣ်ခုသးခုဝဲဒီးအၢၣ်လီၤအီလီၤဝဲလၢအကဟ့ၣ် လီၤအီၤစ့လီၤ. အန့ၣ်ဒီးစီၤယူဒၤစးထီၣ်ဃုကျဲလၢကန့ၢ် ဘၣ်ဆၢဂ့ၤကတီၢ်ဘၣ်လၢကဟ့ၣ်လီၤကွံာ်ယ့ၣ်ၡူးဆူ အဝဲသ့ၣ်အစုပူၤအဂီၢ်လီၤ.

¹²ဖဲဘူၣ်ကိၣ်တအိၣ်ဘၣ်ဒီးကိၣ်မံၣ်ဘၣ်ဝဲအခီၣ်ထံးတနံၤ, လၢအမ့ၢ်မုၢ်နံၤလၢတၢ်မၤသံဒီးလုၢ်ထီၣ်ဘူၣ်လဲၤကပာ်အသိဖိ န့ၣ်, ယ့ၣ်ၡူးအပျဲၢ်အဘီၣ်တဖၣ်သံကွၢ်အီၤ, “နအဲၣ်ဒိးလၢပကလဲၤကတဲာ်ကတီၤပာ်ဘူၣ်လဲၤကပာ်အတၢ် အီၣ်လၢနဂီၢ်ဖဲလဲၣ်တပူၤလဲၣ်.”

¹³အန့ၣ်ဒီးယ့ၣ်ၡူးမၢလီၤအပျဲၢ်အဘီၣ်ခံဂၤဒီးစံးဘၣ်အဝဲသ့ၣ်, “လဲၤနုာ်ဆူဝ့ၢ်ပူၤဒီးသုကထံၣ်ဘၣ်ပှၤတဂၤယိးသပၢၤထံတဖျၢၣ်လီၤ. လဲၤပိာ်အခံ,

¹⁴ဒီးဖဲအလဲၤနုာ်ဝဲဟံၣ်တဖျၢၣ်န့ၣ်, စံးဘၣ်ဟံၣ်ကစၢ်, ‘သရၣ်စံးဝဲ, ပှၤသမှံၤအဒၢးလၢယဂီၢ်, လၢယၤဒီးယပျဲၢ်ယဘီၣ်တဖၣ်ကအီၣ် တၢ်အီတၢ်လၢဘူၣ်လဲၤကပာ်တဘျီအဂီၢ်န့ၣ်, အိၣ်ဖဲလဲၣ်.’

¹⁵အန့ၣ်ဒီး အဝဲဒၣ်ကဒုးနဲၣ်သုဒၢးဖးလဲၢ်တဖျၢၣ်လၢဟံၣ်ဖီခိၣ် တဆီ, အိၣ်လၢအိၣ်ပှဲၤဒီးတၢ်လၢပလိၣ်ဘၣ်တဖၣ်ဒီးအိၣ်ကတဲာ် ကတီၤပာ်အသးဂ့ၤဂ့ၤဘၣ်ဘၣ်န့ၣ်လီၤ. ကတဲာ်ကတီၤပာ်တၢ်အီၣ်တၢ်အီလၢပဂီၢ်ဖဲဒၢးအဝဲန့ၣ်အပူၤ တက့ၢ်.”

¹⁶အပျဲၢ်အဘီၣ်တဖၣ်ဟးထီၣ်ဒီးလဲၤဝဲဆူဝ့ၢ်န့ၣ်အပူၤ, ဒီးထံၣ်ဘၣ်တၢ်ခဲလၢာ်ဒ်ယ့ၣ်ၡူးစံးဘၣ်တ့ၢ်အဝဲသ့ၣ်အသိးလီၤ. ဒီးအဝဲသ့ၣ်ကတဲာ်ကတီၤဝဲတၢ်အီၣ်လၢဘူၣ်လဲၤကပာ်အဂီၢ်န့ၣ်လီၤ.

¹⁷တုၤမုၢ်ဟါလီၤဒီး, ယ့ၣ်ၡူးဟဲဝဲဒီးအပျဲၢ်အဘီၣ်တဆံခံဂၤန့ၣ်လီၤ.

¹⁸ဖဲအဝဲသ့ၣ်ဆ့ၣ်နီၤဒီးအီၣ်တၢ်အဖၢမုၢ်န့ၣ်, ယ့ၣ်ၡူးစံးဝဲ, “ယစံးဘၣ်သုသပှၢ်ကတၢၢ်လီၤ. ပှၤလၢအီၣ်သကိးအီသကိးတၢ်ဒီးယၤလၢသုကျါတဂၤန့ၣ် ကဟ့ၣ်လီၤကွံာ်ယၤလီၤ.”

¹⁹အဝဲသ့ၣ်အသးတမုာ်လၢၤနီတစဲးဘၣ်ဒီးသံကွၢ်အီၤတဂၤဝံၤတဂၤ “မ့ၢ်ယၤဧါ” န့ၣ်လီၤ.

²⁰အဝဲဒၣ်စံးဆၢက့ၤအဝဲသ့ၣ်, “မ့ၢ်ပှၤလၢသုတဆံခံဂၤအကျါ တဂၤ, ပှၤလၢအစုၣ်လီၤအကိၣ်လၢလီခီတဘ့ၣ်ဃီအပူၤဒီးယၤ တဂၤန့ၣ်လီၤ.

²¹ပှၤကညီဖိခွါအံၤကဘၣ်လဲၤဝဲဆူတၢ်မၤသံအလီၢ်ဒ်တၢ်ကွဲး အသးစီဆှံစံးဝဲအသိးလီၤ. ဘၣ်ဆၣ်ဒီးပှၤလၢအဟ့ၣ်လီၤပှၤကညီဖိခွါအံၤဆူဒုၣ်ဒါ အစုပူၤတဂၤန့ၣ်ကဘၣ်အဖှီၣ်လီၤ. ပှၤတဂၤန့ၣ်မ့ၢ်တအိၣ် ဖျဲၣ်ထီၣ်ဘၣ်ဒီးကမ့ၢ်တၢ်ဂ့ၤဒၣ်တၢ်တက့ၢ်လၢအဂီၢ်လီၤ.”

²²ဖဲအဝဲသ့ၣ်အီၣ်တၢ်အကတီၢ်န့ၣ်, ယ့ၣ်ၡူးဟံးန့ၢ်ကိၣ်, ဃ့ထုကဖၣ်ယွၤအိၣ်ဒီးတၢ်စံးထီၣ်ပတြၢၤယွၤ အဘျုးအဖှိၣ်, စိၢ်ဘျဲးကိၣ်န့ၣ်, ဒီးဟ့ၣ်လီၤဝဲအပျဲၢ်အဘီၣ်တဖၣ် ဒီးစံးဝဲဒၣ်, “ဟံးန့ၢ်ဒီးအီၣ်တက့ၢ်. အအံၤမ့ၢ်ယနီၢ်ခိလီၤ.”

²³အန့ၣ်ဝံၤအဝဲဒၣ်ဟံးန့ၢ်စပံးထံလီခီ, စံးထီၣ်ပတြၢၤကစၢ်ယွၤအဘျုး အဖှိၣ်ဝံၤဟ့ၣ်လီၤအဝဲသ့ၣ်, ဒီးအဝဲသ့ၣ်ကိးဂၤဒဲးအီဝဲစပံးထံလၢလီခီန့ၣ်အပူၤလီၤ.

²⁴ယ့ၣ်ၡူးစံးဘၣ်အဝဲသ့ၣ်, “အအံၤမ့ၢ်ယသွံၣ်လၢအဘၣ်တၢ်ဂၢ်လီၤ အီၤလၢပှၤအါဂၤအဂီၢ်, သွံၣ်လၢအမၤဂၢၢ်မၤကျၢၤကစၢ်ယွၤအတၢ်အၢၣ်လီၤအီလီၤန့ၣ်လီၤ.

²⁵ယစံးဘၣ်သုသပှၢ်ကတၢၢ်လီၤ. တချုးဒံးဘၣ်လၢယအီစပံးထံအသီလၢကစၢ်ယွၤအဘီမုၢ်အပူၤန့ၣ်, ယတအီလၢၤဘၣ်စပံးထံဖဲအံၤနီတဘျီလၢၤဘၣ်.”

²⁶အန့ၣ်ဒီးအဝဲသ့ၣ်သးဝံၣ်ထါစံးပတြၢၤယွၤတယုၢ်ဝံၤဟးထီၣ် ဝဲဒီးလဲၤဝဲဆူကစၢၢ်သ့ၣ်စၤယံးအဒီခိၣ်န့ၣ်လီၤ.

²⁷ယ့ၣ်ၡူးစံးဘၣ်အဝဲသ့ၣ်, “သုဝဲသ့ၣ်ကိးဂၤဒဲးသုသးကဟး ဂီၤကွံာ်လၢယပူၤ, အဂ့ၢ်ဒ်အံၤတၢ်ကွဲးအသးစံးဝဲ, ‘ယကမၤသံကွံာ်ပှၤကွၢ်သိ, ဒီးသိတဖၣ်ကလီၤပြံလီၤပြါကွံာ်ဝဲလီၤ.’

²⁸ဘၣ်ဆၣ်ဒီးလၢတၢ်ဒုးဂဲၤဆၢထၢၣ်က့ၤယၤလၢတၢ်သံဝံၤအလီၢ်ခံန့ၣ်, ယကလဲၤပာ်စၢၤဆူကီၢ်ကၤလံၤလါလၢသုမဲာ်ညါလီၤ.”

²⁹စီၤပ့းတရူးစံးဘၣ်အီၤ, “ပှၤဂၤခဲလၢာ်မ့ၢ်သးဟးဂီၤကွံာ်လၢနပူၤ သနာ်က့, ယဲဒၣ်ယသးတဟးဂီၤနီတစုဘၣ်.”

³⁰ယ့ၣ်ၡူးစံးဘၣ်စီၤပ့းတရူး, “ယစံးဘၣ်နၤသပှၢ်ကတၢၢ်, တနၤအံၤတချုးဆီဖါကီၢ်အိၣ်အိဒံးဘၣ်ခံဘျီန့ၣ်, နဲဒၣ်နကသမၢယၤသၢဘျီလၢနတသ့ၣ်ညါယၤဘၣ်န့ၣ်လီၤ.”

³¹စီၤပ့းတရူးစံးဆၢက့ၤအီၤဆူၣ်ဆူၣ်ကလဲာ်, “ယမ့ၢ်ဘၣ်တၢ်မၤသံဃုာ်ဒီးနၤဒၣ်လဲာ်န့ၣ်, ယတသမၢနၤနီတစုဘၣ်.” ဒီးအပျဲၢ်အဘီၣ်အဂၤတဖၣ်စံးစ့ၢ်ကီးတၢ်တမံၤဃီဒ်သိးန့ၣ်ကိး ဂၤဒဲးလီၤ.

³²အဝဲသ့ၣ်လဲၤတုၤတၢ်လီၢ်တကဝီၤလၢတၢ်ကိးအမံၤလၢက့ၤသစ့းမ နၤ, ဒီးယ့ၣ်ၡူးစံးဘၣ်အပျဲၢ်အဘီၣ်တဖၣ်, “ဆ့ၣ်နီၤသုဝဲဖဲအံၤ, ဖဲယဃ့ဘါထုကဖၣ်တၢ်အကတီၢ်န့ၣ်တက့ၢ်.”

³³အဝဲဒၣ်ကိးန့ၢ်ဝဲစီၤပ့းတရူး, စီၤယၤကိာ်, ဒီးစီၤယိၤဟၣ်လၢအကလဲၤသကိးဒီးအီၤလီၤ. အကတီၢ်ဖဲန့ၣ်အသးဘၣ်တံာ်တာ်ဒီးတၢ်သူၣ်ကိၢ်သးဂီၤအိၣ်ဝဲလၢ အပူၤဒိၣ်ဒိၣ်မုၢ်မုၢ်,

³⁴ဒီးစံးဘၣ်အဝဲသ့ၣ်, “တၢ်သူၣ်အုးသးအုးအဒိၣ်အမုၢ်အိၣ်ပှဲၤ ယသးပူၤ, တုၤဒၣ်လဲာ်ယကသံဘၣ်ယသးလီၤ. အိၣ်သုဝဲဖဲအံၤ, ဒီးဆိးသီတက့ၢ်.”

³⁵အဝဲဒၣ်လဲၤဒံးဝဲဆူညါတစဲး, ထိၣ်လီၤပှီၤအသးလၢဟီၣ်ခိၣ် လိၤ, ဒီးဃ့ထုကဖၣ်ယွၤလၢမ့ၢ်သ့ဒီးအကတီၢ်နၣ်ရံၣ်လၢအဝဲ ကတူၢ်ဘၣ်တၢ်နးတၢ်ဖှီၣ်န့ၣ်ကလဲၤပူၤကွံာ်အီၤအဂီၢ်လီၤ.

³⁶ဒီးအဝဲဒၣ်စံးဝဲ, “အးဘၤ, ပၢ်ဧၢ, နမၤတၢ်သ့ခဲလၢာ်လီၤ. တၢ်နးတၢ်ဖှီၣ်အလီခီအံၤဒုးလဲၤပူၤကွံာ်လၢယၤတက့ၢ်. သနာ်က့ဒီး, အသုတမ့ၢ်ဒ်တၢ်ဘၣ်ယသးအသိးတဂ့ၤ. မ်အမ့ၢ်ဒ်တၢ်ဘၣ်နသးအသိးတက့ၢ်.”

³⁷အန့ၣ်ဝံၤ အဝဲဒၣ်က့ၤကဒါက့ၤဒီးထံၣ်ဘၣ်အပျဲၢ်အဘီၣ် သၢဂၤန့ၣ်မံဘၣ်အသးလီၤ. အဝဲဒၣ်သံကွၢ်စီၤပ့းတရူး, “စီၤၡံမိၣ်ဧၢ, နမံဘၣ်နသးလံဧါ. နကဆိးသီထဲတနၣ်ရံၣ်ဧိၤတကဲဘၣ်ဧါ.”

³⁸ဒီးအဝဲဒၣ်စံးဘၣ်အဝဲသ့ၣ်တဖၣ်န့ၣ်, “ဆိးသီဒီးဃ့ထုကဖၣ်ယွၤဒ်သိးသုဝဲသ့ၣ်အံၤ သုတလီၤနုာ်ဘၣ်ဆူတၢ်လ့ပစီပူၤတဂ့ၤန့ၣ်တက့ၢ်. သုသးအဂံၢ်အဘါဆူၣ်ကစီဒီ, မ့မ့ၢ်သုနီၢ်ခိတခီအဂံၢ်အဘါစၢ်ဝဲလီၤ.”

³⁹အဝဲဒၣ်လဲၤကဒီးဝဲတဘျီဒီးဃ့ထုကဖၣ်ယွၤလၢတၢ်ကတိၤတမံၤ ဃီဒ်လၢညါတဘျီအသိးန့ၣ်လီၤ.

⁴⁰အန့ၣ်ဝံၤအဝဲဒၣ်ဟဲက့ၤကဒီးတဘျီဆူအပျဲၢ်အဘီၣ်တဖၣ်အအိၣ် ဒီးထံၣ်ဘၣ်ဝဲလၢအဝဲသ့ၣ်မံဘၣ်အသးလီၤ. အဝဲသ့ၣ်အမဲာ်ဖံးဃၢဒီးစီၣ်ထီၣ်အမဲာ်တန့ၢ်ဘၣ်ဒီး ကဘၣ်စံးဆၢအီၤလၢတၢ်ကတိၤမနုၤလဲၣ်န့ၣ်တသ့ၣ်ညါလၢၤ ဝဲဘၣ်.

⁴¹တုၤအဟဲက့ၤသၢဘျီတဘျီဒီး, အဝဲဒၣ်စံးဘၣ်အဝဲသ့ၣ်, “သုမံဘၣ်ဒံးသုသးဒီးအိၣ်ဘှံးအိၣ်သါဒံးဒၣ်အဖၢမုၢ်လီၤ ဧါ. ထဲန့ၣ်ဘၣ်လံ. တၢ်အကတီၢ်နၣ်ရံၣ်တုၤဃီၤဝဲလံ. ကွၢ်ကွၢ်ခဲအံၤပှၤကညီဖိခွါအံၤဘၣ်တၢ် ဟ့ၣ်လီၤအီၤဆူပှၤတၢ်ဒဲးဘးဖိတဖၣ်အစုပူၤလံ.

⁴²ဂဲၤဆၢထၢၣ်, ဒီးမ်ပလဲၤသကိးတက့ၢ်. ကွၢ်တက့ၢ်. ပှၤလၢအဟ့ၣ်လီၤကွံာ်ယၤန့ၣ်ဟဲတုၤဝဲလံ.”

⁴³ဖဲယ့ၣ်ၡူးကတိၤဒံးတၢ်အဖၢမုၢ်, စီၤယူဒၤလၢအမ့ၢ်အပျဲၢ်အဘီၣ်တဆံခံဂၤအကျါတဂၤန့ၣ်ဟဲတုၤဃီၤဝဲဒၣ်လီၤ. ပှၤဂီၢ်မုၢ်တဖၣ်ဟဲဃုာ်ဒီးအီၤ, စိာ်ဒီးနးဒီးနီၣ်တီၢ်တဖၣ်လီၤ. အဝဲသ့ၣ်တဖၣ်အံၤဘၣ်တၢ်မၢလီၤအီၤလၢပှၤလုၢ်တၢ်အခိၣ်အဒိၣ် တဖၣ်, ပှၤသ့တၢ်ဘူၣ်တၢ်ဘါအတၢ်သိၣ်တၢ်သီတဖၣ်, ဒီးပှၤယူဒၤဖိကရၢအခိၣ်အနၢ်တဖၣ်လီၤ.

⁴⁴ပှၤလၢအဟ့ၣ်လီၤကွံာ်ယ့ၣ်ၡူးဆူဒုၣ်ဒါအစုပူၤတဂၤန့ၣ်, ဟ့ၣ်အဝဲသ့ၣ်တၢ်ပနီၣ်တမံၤဒီးစံး, “ပှၤလၢယနၢမူအီၤတဂၤန့ၣ်မ့ၢ်ပှၤလၢသုအဲၣ်ဒိးအီၤန့ၣ်လီၤ. ဖီၣ်အီၤ, ဒီးက့ၤမိၤအီၤတက့ၢ်.”

⁴⁵တုၤစီၤယူဒၤဟဲတုၤဒီးလဲၤဝဲဆူယ့ၣ်ၡူးအအိၣ်တဘျီဃီဒီးစံးဝဲ, “သရၣ်ဧၢ,” ဒီးနၢမူအီၤလီၤ.

⁴⁶အန့ၣ်ဒီး ပှၤသ့ၣ်တဖၣ်ဖီၣ်ယ့ၣ်ၡူးဒီးဟံးဃာ်အီၤန့ၣ်လီၤ.

⁴⁷မ့မ့ၢ်ပှၤလၢအဆၢထၢၣ်အိၣ်လၢပှၤအကျါဖဲန့ၣ်တဂၤထုးထီၣ်အနး ဒီးကျီဝဲပှၤလုၢ်တၢ်အခိၣ်အဒိၣ်ကတၢၢ်တဂၤအကုၢ်, ဘၣ်ဖဲအနၢ်ဒီးထီၣ်တဲာ်ကွံာ်ဝဲန့ၣ်လီၤ.

⁴⁸ဒီးယ့ၣ်ၡူးသံကွၢ်အဝဲသ့ၣ်, “သုဟဲစိာ်ဃုာ်ဒီးဃဲာ်ဒီးနီၣ် တီၢ်တဖၣ်လၢသုကဖီၣ်ယၤအဂီၢ်အံၤ, မ့ၢ်သုပာ်ယၤဒ်တမျာ်တဂၤအသိးဧါ.

⁴⁹တနံၤဘၣ်တနံၤယအိၣ်ယဲလၢသုသိးသုကျါလၢတၢ်လုၢ်ဟံၣ်ပူၤဒီး သိၣ်လီၤသီလီၤတၢ်, ဒီးသုတဖီၣ်ယၤဘၣ်. ဘၣ်ဆၣ်ဒီးတၢ်ကွဲးအသးစီဆှံကဘၣ်လၢထီၣ်ပှဲၤထီၣ်ဝဲဒၣ်လီၤ.”

⁵⁰အန့ၣ်ဒီးအပျဲၢ်အဘီၣ်ခဲလၢာ်ဟးသဒၣ်ကွံာ်အီၤဒီးဃ့ၢ်ပူၤဖျဲး ကွံာ်အသးန့ၣ်လီၤ.

⁵¹ပိာ်ခွါသးစၢ်တဂၤလူၤပိာ်ထွဲယ့ၣ်ၡူးအခံ, ဒီးမ့တမ့ၢ်ဘၣ်လၢအဘံထီၣ်အသးလၢတၢ်ကံးယာ်အဝါတခီဘၣ်ဒီး, တၢ်ကူတၢ်သိးအဂၤလၢအလိၤတအိၣ်နီတမံၤဘၣ်. ပှၤအိၣ်ဖဲန့ၣ်တနီၤဖီၣ်အီၤ,

⁵²ဘၣ်ဆၣ်ဒီးအဝဲပာ်တ့ၢ်အတၢ်ကံးယာ်အဝါတခီန့ၣ်, ဒီးဃ့ၢ်ထီၣ်ကွံာ်ဘ့ၣ်ဆ့လီၤ.

⁵³ဒီးအဝဲသ့ၣ်မိၤထီၣ်ယ့ၣ်ၡူးဆူပှၤလုၢ်တၢ်အခိၣ်အဒိၣ်ကတၢၢ်တဂၤ အအိၣ်ဒီးဖဲန့ၣ်, ပှၤလုၢ်တၢ်အခိၣ်အဒိၣ်တဖၣ်, ပှၤယူဒၤဖိကရၢအခိၣ်အနၢ်တဖၣ်, ဒီးပှၤသ့တၢ်ဘူၣ်တၢ်ဘါအတၢ်သိၣ်တၢ်သီတဖၣ်ဟဲပာ်ဖှိၣ်ထီၣ်အသး န့ၣ်လီၤ.

⁵⁴စီၤပ့းတရူးလဲၤပိာ်ဝဲယ့ၣ်ၡူးအခံလၢအယံၤ, ဒီးလဲၤနုာ်ဝဲဆူတၢ်လီၢ်လီၤပျီတကဝီၤလၢပှၤလုၢ်တၢ်အခိၣ် အဒိၣ်ကတၢၢ်တဂၤအဟံၣ်အဂၢၤပူၤလီၤ. ဆ့ၣ်နီၤဝဲဖဲန့ၣ်ဒီးဆူးမ့ၣ်အူလၢပှၤပၢၤတၢ်ဖိတဖၣ်အသကိးလီၤ.

⁵⁵ပှၤလုၢ်တၢ်အခိၣ်အဒိၣ်တဖၣ်ဒီးကီၣ်ကးဒီဖုညါန့ၣ်, ဃုထံၣ်န့ၢ်တၢ်အုၣ်အသးထီဒါယ့ၣ်ၡူးဒ်သိးစံၣ်ညီၣ်သံဝဲကသ့ အဂီၢ်လီၤ. ဘၣ်ဆၣ်တထံၣ်န့ၢ်ဝဲနီတမံၤဘၣ်.

⁵⁶ပှၤအါဂၤအုၣ်အသးကဘျံးကဘျၣ်ထီဒါယ့ၣ်ၡူး, ဘၣ်ဆၣ်ဒီးအတၢ်အုၣ်အသးတဖၣ်တဂၤဒီးတဂၤတလီၤပလိာ်လိာ် အသးဘၣ်.

⁵⁷ပှၤတနီၤဂဲၤဆၢထၢၣ်အုၣ်အသးကဘျံးကဘျၣ်ထီဒါယ့ၣ်ၡူးဒီးစံး ဝဲ,

⁵⁸“ပနၢ်ဟူအဝဲဒၣ်စံးဝဲ, ‘ယကမၤလီၤပှီၢ်ကွံာ်တၢ်လုၢ်ဟံၣ်လၢအဘၣ်တၢ်ဘှီထီၣ်အီၤလၢပှၤ ကညီအစုတဖျၢၣ်အံၤ, ဒီးလၢသၢသီတသီန့ၣ်ယကဘှီထီၣ်အဂၤတဖျၢၣ်လၢအတဘၣ် တၢ်မၤအီၤလၢပှၤကညီအစုဘၣ်န့ၣ်လီၤ.’ ”

⁵⁹ဘၣ်ဆၣ်ဒီးအဝဲသ့ၣ်တဖၣ်ဒၣ်လဲာ်, အတၢ်အုၣ်အသးလၢတၢ်ကတိၤတထံၣ်အံၤအဖီခိၣ်တဒ်သိးလိာ် အသးဘၣ်.

⁶⁰ပှၤလုၢ်တၢ်အခိၣ်အဒိၣ်ကတၢၢ်တဂၤဂဲၤဆၢထၢၣ်လၢပှၤခဲလၢာ် အမဲာ်ညါဒီးသံကွၢ်ယ့ၣ်ၡူး, “နတစံးဆၢတၢ်နီတမံၤဘၣ်ဧါ. တၢ်လၢအဝဲသ့ၣ်အုၣ်အသးထီဒါနၤအံၤမ့ၢ်တၢ်မနုၤတမံၤလဲၣ်.”

⁶¹ဘၣ်ဆၣ်ဒီးယ့ၣ်ၡူးအိၣ်ဒၣ်ကစုဒု ဒီးတကတိၤဆၢတၢ်နီတဘီ ဘၣ်. ပှၤလုၢ်တၢ်အခိၣ်အဒိၣ်ကတၢၢ်တဂၤသံကွၢ်ကဒီးအီၤ, “နမ့ၢ်ခရံာ်, ကစၢ်ယွၤတၢ်ဘၣ်ဆိၣ်ဂ့ၤတဂၤအဖိခွါန့ၣ်ဧါ.”

⁶²ယ့ၣ်ၡူးစံးဆၢက့ၤအီၤ, “ယမ့ၢ်အဝဲလီၤ. ဒီးသုကထံၣ်ဘၣ်ပှၤကညီဖိခွါအံၤအိၣ်ဆ့ၣ်နီၤလၢတၢ်သ့တၢ်လၢာ် တဂၤအစုထွဲဒီးသုကထံၣ်အဟဲဒိးဝဲမူခိၣ်အတၢ်အၢၣ်တဖၣ်လီၤ.”

⁶³ပှၤလုၢ်တၢ် အခိၣ်အဒိၣ်ကတၢၢ်တဂၤန့ၣ်ဖှီယာ်ကွံာ်အကူအသိး တဖၣ်ဒီးစံးဝဲ, “ပတလိၣ်အါထီၣ်ပှၤလၢကအုၣ်အသးထီဒါအီၤနီတဂၤလၢၤဘၣ်.

⁶⁴သုနၢ်ဟူဘၣ်တ့ၢ်အတၢ်ကတိၤတရီတပါယွၤန့ၣ်လံ. သုကစံၣ်ညီၣ်ဒ်လဲၣ်.” အန့ၣ်ဒီးအဝဲသ့ၣ်ကိးဂၤဒဲးစံးဝဲလၢအတၢ်ကမၣ်အိၣ် ဒီးကြၢးလၢအဘၣ်တၢ်မၤသံအီၤလီၤ.

⁶⁵ထဲန့ၣ်ဒီး, ပှၤတနီၤထူးပှဲာ်ယ့ၣ်ၡူးဒီးမၤဘၢအမဲာ်ဒီးထိအီၤလီၤ. ဒီးစံးဘၣ်အီၤ, “တယာ်ဒီးတဲတဘီ, မ့ၢ်မတၤထိနၤလဲၣ်.” ဒီးပှၤပၢၤတၢ်ဖိတဖၣ်ဒဲအီၤလီၤ.

⁶⁶ဖဲစီၤပ့းတရူးအိၣ်ဒံးဒၣ်လၢတၢ်ဖီလာ်လၢတၢ်လီၢ်လီၤပျီတကဝီၤ အပူၤအကတီၢ်န့ၣ်, ပှၤလုၢ်တၢ်အခိၣ်အဒိၣ်ကတၢၢ်အခ့အပှၤပိာ်မုၣ်အကျါတဂၤဟဲဃီၤ ဝဲဖဲတၢ်ကပၤထံးန့ၣ်လီၤ.

⁶⁷တုၤအထံၣ်စီၤပ့းတရူးဆူးမ့ၣ်အူန့ၣ်ဒီး, ကွၢ်ထံကွၢ်ဆးအီၤဒီးစံးဝဲ, “နဲစ့ၢ်ကီး, နမ့ၢ်တ့ၢ်ပှၤအိၣ်တပူၤဃီဒီးပှၤနစၤရ့းဖိယ့ၣ်ၡူးန့ၣ်လီၤ.”

⁶⁸ဘၣ်ဆၣ်ဒီးအဝဲဒၣ်သမၢတၢ်ဒီးစံးဝဲ, “တၢ်လၢနစံးန့ၣ်ယတသ့ၣ်ညါဒီးယတနၢ်ပၢၢ်ဘၣ်.” ဒီးစီၤပ့းတရူးဟးထီၣ်ကွံာ်လၢတၢ်လီၢ်လီၤပျီတကဝီၤန့ၣ် အပူၤဒီးလဲၤနုာ်ဝဲလၢကျဲတဘိလၢပှၤကဟးထီၣ်ဆူတၢ်ချၢ အဂီၢ်လီၤ. အကတီၢ်ဖဲန့ၣ်ဆီဖါတဘ့ၣ်အိၣ်အိထီၣ်ဝဲဒၣ်လီၤ.

⁶⁹တၢ်ခ့တၢ်ပှၤပိာ်မုၣ်န့ၣ်ထံၣ်အီၤဖဲန့ၣ်ဒီးကတိၤထီၣ်ကဒီးတၢ် ဒီးစံးဘၣ်ပှၤဆၢထၢၣ်ဖဲတၢ်ကပၤတဖၣ်, “ပှၤအံၤမ့ၢ်ပှၤတဂၤလၢပှၤတဖၣ်န့ၣ်အကျါလီၤ.”

⁷⁰ဘၣ်ဆၣ်ဒီးစီၤပ့းတရူးသမၢကဒီးဝဲလီၤ. လၢခံတစဲးဖိကဒီးန့ၣ် ပှၤအိၣ်ဆၢထၢၣ်ဖဲတၢ်ကပၤတဖၣ်စံးဘၣ် စီၤပ့းတရူး, “နမ့ၢ်ပှၤတဂၤလၢပှၤတဖၣ်န့ၣ်အကျါအနီၢ်ကီၢ်လီၤ. ဘၣ်မနုၤလဲၣ်န့ၣ်, နမ့ၢ်နဲပှၤကီၢ်ကၤလံၤလါဖိလီၤ.”

⁷¹အန့ၣ်ဒီးစီၤပ့းတရူးဆိၣ်အၢလီၤအသးဒီးဆိၣ်လီၤစ့ၢ်ကီးအ သးဒီးစံးဝဲ, “ပှၤတဂၤလၢသုယၢၤထီၣ်အဂ့ၢ်ခဲအံၤန့ၣ်ယတသ့ၣ်ညါအီၤ လ့ၤတက့ၤဘၣ်.”

⁷²တကီၢ်ခါဖဲန့ၣ်ဆီဖါကီၢ်အိၣ်အိထီၣ်ခံဘျီတဘျီ, ဒီးစီၤပ့းတရူးသ့ၣ်နီၣ်ထီၣ်က့ၤဝဲလၢယ့ၣ်ၡူးစံးဘၣ်တ့ၢ် အီၤ, “တချုးဆီဖါကီၢ်အိၣ်အိဒံးဘၣ်ခံဘျီန့ၣ်, နကသမၢယၤသၢဘျီန့ၣ်လီၤ.” ဒီးအသးဘၣ်ဒိဘၣ်ထံးဒီးဟီၣ်ဝဲလၢာ်သးလီၤ.

Read S'gaw Karen လံာ်မၢ်ကူး 14 Bible Online

လံာ်မၢ်ကူး 14 - S'gaw Karen bible

လံာ်မၢ်ကူး 14