Read S'gaw Karen လံာ်မၢ်ကူး 15 Bible Online

လံာ်မၢ်ကူး 15 - S'gaw Karen bible

လံာ်မၢ်ကူး 15

¹လၢဂီၤဂီၤဖဲမုၢ်ဟဲထီၣ်အကတီၢ်န့ၣ်, ပှၤလုၢ်တၢ်အခိၣ်အဒိၣ်တဖၣ်, ဃုာ်ဒီးပှၤယူဒၤဖိကရၢအခိၣ်အနၢ်တဖၣ်ဒီးပှၤသ့တၢ်ဘူၣ်တၢ် ဘါအတၢ်သိၣ်တၢ်သီတဖၣ်, ဒီးကီၣ်ကးဒီဖုညါအိၣ်ဖှိၣ်သကိးဒီးကူၣ်ထီၣ်ဖးလီၤတၢ်လီၤ. အဝဲသ့ၣ်စၢဃာ်ယ့ၣ်ၡူးဝံၤ, မိၤထီၣ်အီၤ, ဒီးလဲၤဟ့ၣ်လီၤအီၤလၢစီၤပံၤလးအစုပူၤလီၤ.

²စီၤပံၤလးသံကွၢ်ယ့ၣ်ၡူး, “နမ့ၢ်ပှၤယူဒၤဖိအစီၤပၤဧါ.” အဝဲဒၣ်စံးဆၢက့ၤအီၤ, “နစံးတ့ၢ်လံနဲလံ.”

³ပှၤလုၢ်တၢ်အခိၣ်အဒိၣ်တဖၣ်ကတိၤပာ်ထီၣ်တၢ်ကမၣ်လၢယ့ၣ်ၡူး အလိၤအါမံၤလီၤ.

⁴အန့ၣ်ဒီးစီၤပံၤလးသံကွၢ်ကဒီးအီၤ, “နတစံးဆၢနဲတၢ်နီတမံၤဘၣ်ဧါ. အဝဲသ့ၣ်ပာ်ထီၣ်တၢ်ကမၣ်လၢနလိၤအါမံၤလီၤ.

⁵ဘၣ်ဆၣ်ဒီးယ့ၣ်ၡူးတစံးဆၢလၢၤတၢ်နီတမံၤဘၣ်အဃိ, တၢ်လီၤကမၢကမၣ်ဘၣ်စီၤပံၤလးဒိၣ်မးလီၤ.

⁶တဘျီလၢ်လၢ်ဖဲဘူၣ်လဲၤကပာ်ဘၣ်ဝဲအကတီၢ်န့ၣ်, စီၤပံၤလးညီနုၢ်ပျၢ်ပူၤဖျဲးကွံာ်ဝဲပှၤဃိာ်ဖိတဂၤဂၤလၢ ပှၤဃ့ဝဲန့ၣ်လီၤ.

⁷အကတီၢ်ဖဲန့ၣ်လၢဃိာ်ပူၤ, ပှၤလၢအပူထီၣ်တၢ်ဒီးမၤသံဘၣ်ပှၤ ကညီလၢတၢ်တၢထီၣ်တၢလီၤအပူၤတဖၣ်အကျါ, ပှၤအိၣ်ဝဲတဂၤလၢအမံၤမ့ၢ်စီၤဘၤရးဘါန့ၣ်လီၤ.

⁸တုၤပှၤဂီၢ်မုၢ်တဖၣ်ဟဲထီၣ်ဝဲဒၣ်ဆူစီၤပံၤလးအအိၣ်ဒီးဃ့ ကညးအီၤလၢအကမၤဘျုးအီၤဒ်အညီနုၢ်မၤတ့ၢ်ဝဲအသိးန့ၣ်,

⁹အဝဲဒၣ်သံကွၢ်အဝဲသ့ၣ်, “မ့ၢ်သုဘၣ်သုသးလၢယကပျၢ်ပူၤဖျဲးန့ၢ်သုလၢပှၤ ယူဒၤဖိအစီၤပၤတဂၤန့ၣ်ဧါ.”

¹⁰စီၤပံၤလးသ့ၣ်ညါဝဲဂ့ၤဂ့ၤကလဲာ်လၢပှၤလုၢ်တၢ်အခိၣ်အဒိၣ် တဖၣ်သူၣ်က့ၣ်သးကါဘၣ်ယ့ၣ်ၡူးအဃိ, အဝဲသ့ၣ်ဟ့ၣ်လီၤအီၤဆူအဝဲဒၣ်အစုပူၤန့ၣ်လီၤ.

¹¹ဘၣ်ဆၣ်ဒီးပှၤလုၢ်တၢ်အခိၣ်အဒိၣ်တဖၣ်သဆၣ်ထီၣ်ပှၤဂီၢ်မုၢ် အခံလၢအကဃ့စီၤပံၤလးလၢကပျၢ်ပူၤဖျဲးန့ၢ်အဝဲသ့ၣ်လၢ စီၤဘၤရးဘါတခီန့ၣ်လီၤ.

¹²စီၤပံၤလးသံကွၢ်ကဒီးပှၤဂီၢ်မုၢ်တဖၣ်န့ၣ်, “မ့မ့ၢ်ဒ်န့ၣ်ဒီးပှၤတဂၤလၢသုကိးအီၤလၢပှၤယူဒၤဖိအစီၤပၤန့ၣ်, ယကဘၣ်မၤအီၤဒ်လဲၣ်.”

¹³အဝဲသ့ၣ်ကိးပသူထီၣ်ဒီးစံးဆၢကဒါက့ၤဝဲ, “ပျၤထီအီၤလၢထူၣ်စုညါအလိၤတက့ၢ်.”

¹⁴စီၤပံၤလးသံကွၢ်အဝဲသ့ၣ်, “ဘၣ်မနုၤလဲၣ်, အဝဲမၤတ့ၢ်တၢ်အၢမနုၤတမံၤန့ၣ်လဲၣ်.” ဘၣ်ဆၣ်အဝဲသ့ၣ်ကိးပသူထီၣ်နးန့ၢ်အလီၢ်တက့ၢ်, “ပျၤထီအီၤလၢထူၣ်စုညါအလိၤတက့ၢ်.”

¹⁵စီၤပံၤလးသးအိၣ်လူၤဘၣ်ပှၤဂီၢ်မုၢ်အသးအဃိ, ပျၢ်ပူၤဖျဲးကွံာ်ဝဲစီၤဘၤရးဘါလၢအဝဲသ့ၣ်အဂီၢ်လီၤ. အန့ၣ်ဝံၤမၢပှၤဖျ့ယ့ၣ်ၡူးဆါဆါကလဲာ်, ဒီးဟ့ၣ်လီၤကွံာ်အီၤဆူပှၤသုးဖိတဖၣ်အစုပူၤလၢတၢ်ကပျၤ ထီအီၤလၢထူၣ်စုညါအလိၤအဂီၢ်န့ၣ်လီၤ.

¹⁶ပှၤသုးဖိတဖၣ်ဆှၢယ့ၣ်ၡူးဆူတၢ်လီၢ်လီၤပျီအိၣ်လၢ စီၤပံၤလးအဟံၣ်ကရၢၢ်ပူၤ, လၢတၢ်ကိးစ့ၢ်ကီးအီၤလၢပရ့ၣ်ထီရယၢၢ်, ဒီးကိးဖှိၣ်ဝဲပှၤသုးဖိအဂၤတဖၣ်ဖဲတၢ်လီၢ်န့ၣ်ခဲလၢာ်လီၤ.

¹⁷အဝဲသ့ၣ်ဒုးကၤထီၣ်ယ့ၣ်ၡူးလၢဆ့ကၤလုးတကုာ်တဘ့ၣ်, ဝံၤမၤန့ၢ်ခိၣ်သလုးတၤဆှုၣ်တဖျၢၣ်ဒီးဒုးကုာ်ထီၣ်ဝဲလၢအခိၣ် လိၤလီၤ.

¹⁸အန့ၣ်ဝံၤအဝဲသ့ၣ်ကတိၤဒိၣ်အီၤဒ်အယူးယီၣ်ဘၣ်အီၤအသိးဒီး စံး, “ပှၤယူဒၤဖိအစီၤပၤဧၢ, ပဟ့ၣ်နၤတၢ်ယူးယီၣ်လီၤ.”

¹⁹အဝဲသ့ၣ်ဒိအခိၣ်လၢတပိၢ်ဘိ, ထူးပှဲာ်အလိၤ, ဒီးချံးခီၣ်တီၤလီၤလၢအမဲာ်ညါဒ်အယူးယီၣ်ဘၣ်အီၤ အသိးန့ၣ်လီၤ.

²⁰တုၤအဝဲသ့ၣ်မၤတရီတပါဒီးနံၤဘၣ်ဖၣ်လဲအီၤဝံၤန့ၣ်, ဘ့ၣ်လီၤကွံာ်ဝဲအဆ့ကၤလုးတကုာ်တဘ့ၣ်ဒီးဒုးသိးထီၣ်က့ၤအီၤ လၢအဆ့ကၤဒၣ်ဝဲလီၤ. အန့ၣ်ဝံၤအလီၢ်ခံ, အဝဲသ့ၣ်မိၤထီၣ်ကွံာ်အီၤလၢကပျၤထီအီၤလၢထူၣ်စုညါလိၤ အဂီၢ်လီၤ.

²¹ပှၤသုးဖိတဖၣ်မၢဆူၣ်ပှၤဟဲဘၣ်အတီၤတဂၤလၢအမ့ၢ်ပှၤကူၤရ့ၤ န့ဖိစီၤၡံမိၣ်လၢအဟဲလၢခိတခီ, လၢအကစိာ်ထီၣ်ဒီးယိးန့ၢ်ထူၣ်စုညါလၢယ့ၣ်ၡူးအဂီၢ်လီၤ. (စီၤၡံမိၣ်မ့ၢ်ဝဲစီၤအလ့းစၣ်ဒြူးဒီးစီၤရူဖၢးတဖၣ်အပၢ်လီၤ.)

²²အဝဲသ့ၣ်လဲၤကိးယ့ၣ်ၡူးဆူတၢ်လီၢ်လၢတၢ်ကိးအမံၤ လၢကီၤလၤကီၤသါ, အခီပညီမ့ၢ်ဝဲ, “ပှၤခိၣ်ဃံအလီၢ်” န့ၣ်လီၤ.

²³ဖဲန့ၣ်အဝဲဘၣ်တၢ်ဟ့ၣ်အီအီၤလၢစပံးထံအိၣ်ကျဲၣ်ကျီဃုာ်ဒီး မူရၣ်, ဘၣ်ဆၣ်ယ့ၣ်ၡူးတအီဝဲဘၣ်.

²⁴ဒီးအဝဲသ့ၣ်ပျၤထီအီၤလၢထူၣ်စုညါအလိၤ, ဒီးနီၤဟ့ၣ်လီၤလိာ်သးလၢယ့ၣ်ၡူးအကူအကၤတဖၣ်, ခီဖျိလၢအဖီၣ်တၢ်ဖး, ဒ်သိးကသ့ၣ်ညါဘၣ်ပှၤဖဲလဲၣ်တဂၤကြၢးန့ၢ်ဘၣ်တၢ်ကူတၢ်ကၤဖဲ လဲၣ်တဘ့ၣ်လဲၣ်အဂီၢ်လီၤ.

²⁵ဖဲဂီၤခီခွံနၣ်ရံၣ်ဘၣ်ဝဲအကတီၢ်န့ၣ်, အဝဲသ့ၣ်ပျၤထီအီၤလၢထူၣ်စုညါအလိၤလီၤ.

²⁶ဒီးလံာ်ပာ်တၢ်ကမၣ်လၢအလိၤန့ၣ်ဘၣ်တၢ်ကွဲးဖျါထီၣ်အီၤလၢတၢ် ကတိၤလၢအစံးဝဲ, “ပှၤယူဒၤဖိအစီၤပၤ” န့ၣ်လီၤ.

²⁷အဝဲသ့ၣ်ပျၤထီစ့ၢ်ကီးတမျာ်ခံဂၤတပူၤဃီဒီးယ့ၣ်ၡူး, တဂၤလၢအစုထွဲဒီးတဂၤလၢအစုစ့ၣ်လီၤ.

²⁸(ဒီးတၢ်ကွဲးအသးဘၣ်တၢ်မၤလၢထီၣ်ပှဲၤထီၣ်အီၤလၢအစံးဝဲ, “အဝဲဒၣ်ဘၣ်တၢ်ဂံၢ်ဃုာ်အီၤလၢပှၤမၤကမၣ်တၢ်ဖိတဖၣ်အကျါ လီၤ.”)

²⁹ပှၤလၢအလဲၤဘၣ်ဖဲန့ၣ် တဖၣ်ကတိၤဒုၣ်ဒွဲၣ်စံးအၢအီၤ, ဒီးဂံၤဂုၤအခိၣ်ဒီးစံးဝဲ, “အီၢ်, နစံးလၢနကမၤဟးဂီၤကွံာ်တၢ်လုၢ်ဟံၣ် ဒီးဘှီထီၣ်က့ၤကဒီးအီၤလၢသၢသီအတီၢ်ပူၤတမ့ၢ်ဘၣ်ဧါ.

³⁰မ့မ့ၢ်ဒ်န့ၣ်ဒီးစံၣ်လီၤကွံာ်လၢထူၣ်စုညါအလိၤခဲအံၤဒီးမၤပူၤဖျဲး နသးသမူတက့ၢ်.”

³¹ဒ်န့ၣ်အသိး, ပှၤလုၢ်တၢ်အခိၣ်အဒိၣ်တဖၣ်ဒီးပှၤသ့တၢ်ဘူၣ်တၢ်ဘါအတၢ်သိၣ်တၢ် သီတဖၣ်ကတိၤဒုၣ်ဒွဲၣ်ယ့ၣ်ၡူးဒီးစံးလိာ်အသးကဒဲကဒဲ, “အဝဲဒၣ်မၤပူၤဖျဲးတ့ၢ်ပှၤဂၤအသးသမူ, ဘၣ်ဆၣ်ကမၤပူၤဖျဲးအသးသမူဒၣ်ဝဲန့ၣ်မၤဝဲတသ့ဘၣ်.

³²ခရံာ်လၢအမ့ၢ်အံၣ်စရ့လးအစီၤပၤတဂၤအံၤ, မ်အကဟဲက့ၤလီၤလၢထူၣ်စုညါအလိၤခဲအံၤဒ်သိး ပကထံၣ်ဘၣ်တၢ်မၤအသးဒီးနာ်အီၤကသ့အဂီၢ်န့ၣ်တက့ၢ်.” ဒီးပှၤခံဂၤလၢအဘၣ်တၢ်ပျၤထီအီၤတပူၤဃီဒီးယ့ၣ်ၡူးန့ၣ်, ကတိၤစံးအၢစံးသီစ့ၢ်ကီးအီၤလီၤ.

³³တုၤမုၢ်ထူၣ်အကတီၢ်ဘၣ်ဒီး, တၢ်ဟဲခံးလီၤလၢကီၢ်ဒီဘ့ၣ်ညါ အပူၤပၢၢ်တုၤလၢမုၢ်ဃ့ၢ်လီၤသၢနၣ်ရံၣ်လီၤ.

³⁴ဖဲသၢနၣ်ရံၣ်ဘၣ်န့ၣ်, ယ့ၣ်ၡူးကိးပသူထီၣ်လၢအကလုၢ်ဖးဒိၣ်, “အ့းလိအံၤ, အ့းလိအံၤ, လၤမါစၤဘၤဃသၤနံ,” လၢအခီပညီမ့ၢ်ဝဲ, “ယကစၢ်ယွၤဧၢ, ယကစၢ်ယွၤဧၢ, ဘၣ်မနုၤနပာ်တ့ၢ်ကွံာ်ယၤလဲၣ်.”

³⁵ပှၤတနီၤလၢအဆၢထၢၣ်အိၣ်ဖဲတၢ်ကပၤန့ၣ်နၢ်ဟူအတၢ်ကတိၤဒီးစံး ဝဲ, “ကနၣ်တက့ၢ်. အဝဲဒၣ်ကိးထီၣ်တၢ်ဆူဝံအ့ၤလံယၤအအိၣ်လီၤ.”

³⁶လၢအဝဲသ့ၣ်အကျါပှၤတဂၤဃ့ၢ်ထီၣ်စိာ်ဝဲဒီးကုၤပီၣ်လဲၣ်တလိၣ် ဝံၤ, စုၣ်လီၤဝဲလၢစပံးထံအဆံၣ်အကျါ, ဒီးဆှီးထီၣ်ဝဲလၢတပိၢ်ဘိတဘိအစိးခံလီၤ. ဝံၤဒီးယူာ်ထီၣ်ဝဲလၢယ့ၣ်ၡူးကအီဝဲအဂီၢ်ဒီးစံးဝဲ, “အိၣ်ခိးကွၢ်သကိးတက့ၢ်. မ့ၢ်ပကထံၣ်ဘၣ်ဝံအ့ၤလံယၤဟဲဒီးစိာ်လီၤကွံာ်အီၤလၢထူၣ်စု ညါအလိၤန့ၣ်ဧါ.”

³⁷ဒီးယ့ၣ်ၡူးကိးပသူထီၣ်လၢအကလုၢ်ဖးဒိၣ်, ဒီးအသးသမူဟးထီၣ်ကွံာ်ဝဲဒၣ်လီၤ.

³⁸ဒီးယၣ်ဘျးသဒၢလၢတၢ်လုၢ်ဟံၣ်ပူၤတဘ့ၣ်န့ၣ်ယာ်ကွံာ်ဝဲခံခီ, စးထီၣ်လၢအဖီခိၣ်တုၤလီၤလၢအခီၣ်ထံးန့ၣ်လီၤ.

³⁹ပှၤသုးဖိတကယၤအခိၣ်တဂၤလၢအဆၢထၢၣ်ကွၢ်တၢ်ဖဲထူၣ်စုညါ အမဲာ်ညါန့ၣ်, ထံၣ်ဘၣ်ယ့ၣ်ၡူးအသးသမူဟးထီၣ်ကွံာ်ဒ်န့ၣ်သတးဒီးစံးဝဲ, “သပှၢ်ကတၢၢ်ပှၤတဂၤအံၤမ့ၢ်မးကစၢ်ယွၤအဖိခွါန့ၣ်လီၤ.”

⁴⁰ဖဲန့ၣ်ပှၤပိာ်မုၣ်အိၣ်စ့ၢ်ကီးဝဲတနီၤလၢအဆၢထၢၣ်ကွၢ်စိတၢ် လၢအယံၤလီၤ. လၢအဝဲသ့ၣ်အကျါမ့ၢ်ဝဲပှၤမၤကဒါလၣ်မုၣ်နီၢ်မၤရံ, စီၤယၤကိာ်လၢအသးစၢ်တဂၤဒီးစီၤယိၤစ့ၣ်တဖၣ်အမိၢ်နီၢ်မၤရံ, ဒီးနီၢ်စၤလိၣ်လီၤ.

⁴¹ပိာ်မုၣ်တဖၣ်အံၤဖဲယ့ၣ်ၡူးအိၣ်ဝဲလၢကီၢ်ကၤလံၤလါအခါအဝဲ သ့ၣ်ပိာ်အခံဒီးဖံးစၢၤမၤစၢၤဘၣ်အီၤန့ၣ်လီၤ. ဒီးဖဲန့ၣ်အိၣ်စ့ၢ်ကီးဒီးပိာ်မုၣ်အဂၤအါဂၤလၢအဟဲထီၣ်သကိး ဒီးအီၤဆူဝ့ၢ်ယရူၤၡလ့ၣ်န့ၣ်လီၤ.

⁴²တုၤမုၢ်ဟါလီၤတ့ၢ်ဒီး, ဒ်မုၢ်နံၤမ့ၢ်မုၢ်ကတဲာ်ကတီၤအနံၤလၢတၢ် ကအီၣ်ဘူၣ်အဂီၢ် (အခီပညီမ့ၢ်မုၢ်နံၤတချုးပှၤယူဒၤဖိအမုၢ် အိၣ်ဘှံးနံၤဘၣ်ဒံးဘၣ်တသီ) အသိး,

⁴³အကတီၢ်ဖဲန့ၣ်ပှၤအရံၤမၤသဲဖိစီၤယိၤသးဟဲတုၤဝဲဒၣ်လီၤ. အဝဲမ့ၢ်ပှၤခိၣ်ပှၤနၢ်တဂၤလၢအလီၤယူးယီၣ်ပာ်ကဲဒိၣ်မးလၢ ကီၣ်ကးအကျါ, ဒီးမ့ၢ်ပှၤလၢအအိၣ်ခိးကွၢ်လၢ်ကစၢ်ယွၤ အဘီမုၢ်ကဟဲအကျဲလီၤ. အဝဲဒၣ်ပာ်အသးဒူဒူဒီးလဲၤဝဲဆူစီၤပံၤလးအအိၣ်ဒီးဃ့ဝဲ လၢအကဟ့ၣ်အီၤယ့ၣ်ၡူးအစိၣ်န့ၣ်လီၤ.

⁴⁴တၢ်လီၤကမၢကမၣ်ဘၣ်စီၤပံၤလးအသးဖဲအနၢ်ဟူဘၣ်ဝဲလၢ ယ့ၣ်ၡူးသံတ့ၢ်လံအဂ့ၢ်ဒီး အဝဲဒၣ်ကိးဃီၤပှၤသုးဖိ တကယၤအခိၣ်ဆူအအိၣ်ဒီးသံကွၢ်ဝဲမ့ၢ်ယ့ၣ်ၡူးသံတ့ၢ် ယံာ်လံဧါန့ၣ်လီၤ.

⁴⁵တုၤပှၤသုးဖိတကယၤအခိၣ်ဒုးသ့ၣ်ညါအီၤလၢအသံ တ့ၢ်လံဒီး, စီၤပံၤလးပျဲစီၤယိၤသးက့ၤစိာ်ယ့ၣ်ၡူးအစိၣ်န့ၣ်လီၤ.

⁴⁶စီၤယိၤသးပှ့ၤန့ၢ်တၢ်ကံးယာ်ဝါတဘ့ၣ်, စိာ်လီၤယ့ၣ်ၡူးလၢထူၣ်စုညါ အလိၤ, ဘိၣ်ဘံထီၣ်အီၤလၢတၢ်ကံးယာ်ဝါတဘ့ၣ်န့ၣ်, ဒီးပာ်လီၤအီၤလၢပှၤသွၣ်ခိၣ်အပူၤတပူၤလၢတၢ်ခူၣ်န့ၢ်အီၤလၢလ့ ကပၤန့ၣ်လီၤ. ဝံၤဒီးအဝဲဒၣ်တလ့ၣ်လီၤလၢၢ်ဖးဒိၣ်တဖျၢၣ်ဒီး မၤတံာ်ဃာ်ဝဲတၢ်ပူၤအခိၣ်ထိးလၢလၢၢ်န့ၣ်လီၤ.

⁴⁷ပှၤမၤကဒါလၣ်မုၣ်နီၢ်မၤရံဒီးစီၤယိၤစ့ၣ်အမိၢ်နီၢ်မၤရံ တဖၣ်ထံၣ်ဘၣ်ဝဲဒီးကွၢ်နီၣ်ဃာ်ဝဲတၢ်လီၢ်လၢတၢ်ပာ်လီၤ ယ့ၣ်ၡူးန့ၣ်လီၤ.