Read S'gaw Karen လံာ်မၢ်ကူး 6 Bible Online

လံာ်မၢ်ကူး 6 - S'gaw Karen bible

လံာ်မၢ်ကူး 6

¹ယ့ၣ်ၡူးဟးထီၣ်ကွံာ်ဖဲတၢ်လီၢ်န့ၣ်ဝံၤက့ၤကဒါက့ၤဝဲဆူအခူအဝ့ၢ်ဒၣ်ဝဲ, ဒီးအပျဲၢ်အဘီၣ်တဖၣ်လဲၤသကိးဒီးအီၤလီၤ.

²တုၤပှၤယူဒၤဖိအမုၢ်အိၣ်ဘှံးနံၤတုၤဃီၤဒီးအဝဲဒၣ်စးထီၣ် သိၣ်လီၤသီလီၤတၢ်လၢဘူၣ်ဘျီၣ်လၢအမ့ၢ်တၢ်ဘါလီၢ်အပူၤလီၤ. ပှၤအါဒံအါဂၤလၢအနၢ်ဟူအတၢ်သိၣ်လီၤသီလီၤတဖၣ်ကမၢကမၣ်ဒီး စံးဝဲ, “တၢ်ကူၣ်သ့ကူၣ်ဘၣ်ဒီးတၢ်သ့မၤတၢ်လီၤလးတဖၣ်ခဲလၢာ်အံၤ မ့ၢ်အလဲၤမၤန့ၢ်ဝဲဖဲလဲၣ်. တၢ်ဟ့ၣ်အီၤတၢ်ကူၣ်သ့ကူၣ်ဘၣ်တခါအံၤမ့ၢ်တၢ်ဒ်လဲၣ်. တၢ်လီၤလးတဖၣ်အံၤမၤဝဲဒ်လဲၣ်.

³ပှၤအံၤတမ့ၢ်ပှၤစုသ့တဂၤလၢအမ့ၢ်နီၢ်မၤရံအဖိခွါ, လၢအဒီပုၢ်ဝဲၢ်ဒီးစီၤယၤကိာ်, စီၤယိၤစ့, စီၤယူဒၤဒီးစီၤၡံမိၣ်တဖၣ်န့ၣ်ဘၣ်ဧါ. ဒီးအဒီပုၢ်ဝဲၢ်မုၣ်တဖၣ်အိၣ်ဒၣ်လၢပသိးပကျါဖဲအံၤလီၤတမ့ၢ် ဘၣ်ဧါ. ဒီးအဝဲသ့ၣ်အသးက့ၣ်ယ့ၣ်ၡူးဒီးတပာ်ကဲလၢၤအီၤဘၣ်.”

⁴ယ့ၣ်ၡူးစံးဘၣ်အဝဲသ့ၣ်, “တၢ်လၢဝံတဖၣ်န့ၣ်မ့တမ့ၢ်ဘၣ်လၢအကီၢ်ဒၣ်ဝဲအပူၤ, လၢအဘူးအတံၢ်ဒီးအဒူၣ်ဖိထၢဖိအကျါဘၣ်ဒီး, ဘၣ်တၢ်ယူးယီၣ်ပာ်ကဲအီၤလၢတၢ်လီၢ်အဂုၤအဂၤကိးပူၤဒဲးန့ၣ် လီၤ.”

⁵မ့တမ့ၢ်ဘၣ်လၢအပာ်ထီၣ်အစုလၢပှၤဆူးပှၤဆါစှၤဂၤအလိၤ ဒီးမၤဘျါက့ၤအီၤဘၣ်ဒီး, အဝဲဒၣ်မၤတၢ်လီၤလးဖဲတၢ်လီၢ်န့ၣ်တသ့နီတမံၤဘၣ်.

⁶ဒီးကမၢကမၣ်ဝဲဒိၣ်မးလၢပှၤသ့ၣ်တဖၣ်အတၢ်နာ်အီၤတအိၣ်ဘၣ်အဃိ လီၤ. ယ့ၣ်ၡူးဟးဝ့ၤဝီၤလၢသဝီအိၣ်ဘူးအိၣ်တံၢ်တဖၣ်အပူၤဒီးသိၣ် လီၤသီလီၤတၢ်လီၤ.

⁷အန့ၣ်ဝံၤအဝဲကိးဖှိၣ်အပျဲၢ်အဘီၣ်တဆံခံဂၤဒီးမၢလီၤဝဲလၢ အကဟးထီၣ်ခံဂၤတပူၤခံဂၤတပူၤဒီးဟ့ၣ်လီၤစ့ၢ်ကီးဝဲ တၢ်စိတၢ်ကမီၤလၢတၢ်နါတဖၣ်အဖီခိၣ်လီၤ.

⁸ယ့ၣ်ၡူးမၤလိာ်အဝဲသ့ၣ်ဒီးစံး, “မ့တမ့ၢ်ဘၣ်လၢနီၣ်ထိးဘိတဘိဘၣ်ဒီး, သုတဘၣ်စိာ်တၢ်ဂၤလၢအမ့ၢ်ကိၣ်မ့ၢ်ဂ့ၤ, ထၢၣ်မ့ၢ်ဂ့ၤ, တိၢ်လၢယီၢ်တကိးအပူၤမ့ၢ်ဂ့ၤနီတမံၤဘၣ်.

⁹ဒိးခီၣ်ဖံး, ဘၣ်ဆၣ်ကၤဆ့ခံဘ့ၣ်တဂ့ၤ.”

¹⁰စံးဘၣ်စ့ၢ်ကီးအဝဲသ့ၣ်, “ဖဲသုလဲၤတၢ်လီၢ်တပူၤဂ့ၤတပူၤဂ့ၤန့ၣ်, ပှၤမ့ၢ်တူၢ်လိာ်သုလၢဟံၣ်တဖျၢၣ်ဖျၢၣ်အပူၤဒီးအိၣ်ဖဲန့ၣ်တုၤ သုဟးထီၣ်လၢတၢ်လီၢ်အဝဲန့ၣ်တစုတက့ၢ်.

¹¹သုလဲၤတၢ်လီၢ်တပူၤဂ့ၤတပူၤ ဂ့ၤပှၤမ့ၢ်တတူၢ်လိာ်သုဒီးတဒိကနၣ်သုဘၣ်ဒီး, ဟးထီၣ်ကွံာ်ဖဲန့ၣ်ဒီးတရုၤလီၤကွံာ်ဟီၣ်ခိၣ် ကမူၣ်လၢသုခီၣ်အလိၤတက့ၢ်. တၢ်န့ၣ်ကကဲထီၣ်တၢ်ပနီၣ်လၢ အဝဲသ့ၣ်မၤကမၣ်ဘၣ်လံတၢ်လံန့ၣ်လီၤ.”

¹²အန့ၣ်ဒီးအဝဲသ့ၣ်တဖၣ်ဟးထီၣ်ဒီးစံၣ်တဲၤတဲလီၤတၢ်လၢပှၤ ကပီၢ်ယၢ်ဒီးဃၣ်လိၤက့ၤအသးလၢအတၢ်ဒဲးဘးတဖၣ်အဂီၢ်လီၤ.

¹³အဝဲသ့ၣ်ဟီထီၣ်ကွံာ်တၢ်နါတဘျုးဒု, ဖှူပှၤဘၣ်ဆူးဘၣ်ဆါတဘျုးဂၤလၢသိဒီးမၤဘျါက့ၤအဝဲသ့ၣ် လီၤ.

¹⁴စီၤပၤဟ့ၤရိာ်နၢ်ဟူဘၣ်တ့ၢ်ဝဲတၢ်မၤအသးတဖၣ်အံၤအဂ့ၢ်ခဲ လၢာ်, မ့ၢ်လၢယ့ၣ်ၡူးအမံၤဂ့ၤန့ၣ် ဟူထီၣ်သါလီၤသကုၤဆးဒးအဃိလီၤ. ပှၤတနီၤစံးဝဲ, “ပှၤဘျၢတၢ်စီၤယိၤဟၣ်ဂဲၤဆၢထၢၣ်က့ၤလၢတၢ်သံလံ. လၢတၢ်န့ၣ်အဃိအဝဲအိၣ်ဒီးတၢ်စိတၢ်ကမီၤလၢအပူၤ လၢကမၤတၢ်လီၤလးတဖၣ်အံၤအဂီၢ်လီၤ.

¹⁵ပှၤအဂၤတနီၤစံးဝဲ, “အဝဲဒၣ်မ့ၢ်စီၤအ့ၤလံယၤလီၤ.” ပှၤအဂၤကဒီးတနီၤစံးဝဲ, “အဝဲဒၣ်မ့ၢ်ဝံတဂၤဒ်ဝံလၢအအိၣ် တ့ၢ်လၢပျၢၤတဖၣ်အသိးန့ၣ်လီၤ.”

¹⁶မ့မ့ၢ်တုၤစီၤပၤဟ့ၤရိာ်နၢ်ဟူတၢ်ဂ့ၢ်အံၤဒီးစံးဝဲ, “အဝဲဒၣ်မ့ၢ်စီၤယိၤဟၣ်လၢယမၢပှၤဒီၣ်တဲာ်ကွံာ်အကိာ် တဂၤလီၤ. အဝဲဒၣ်မူထီၣ်က့ၤလံ.”

¹⁷စီၤပၤဟ့ၤရိာ်အကစၢ်ဒၣ်ဝဲဟ့ၣ်လီၤတ့ၢ်အကလုၢ်လၢပှၤကဖီၣ်စၢ ဃာ်စီၤယိၤဟၣ်ဒီးဒၢနုာ်အီၤလၢဃိာ်ပူၤလီၤ. အဝဲမၤတၢ်အံၤမ့ၢ်လၢအဟံးန့ၢ်ဘၣ်အဒီပုၢ်ဝဲၢ်ပိာ်ခွါ စီၤဖံလံးပူးအမါနီၢ်ဟ့ၤရိၤဒံအဃိလီၤ.

¹⁸စီၤယိၤဟၣ်စံးဘၣ်တ့ၢ်စီၤပၤဟ့ၤရိာ်, “နဟံးန့ၢ်နဒီပုၢ်ဝဲၢ်အမါန့ၣ်ထီဒါတၢ်သိၣ်တၢ်သီလီၤ.”

¹⁹အန့ၣ်ဒီး, နီၢ်ဟ့ၤရိၤဒံသးက့ၣ်ထီၣ်စီၤယိၤဟၣ်ဒီးအဲၣ်ဒိးမၤသံအီၤ, ဘၣ်ဆၣ်မၤဝဲတသ့ဘၣ်.

²⁰စီၤပၤဟ့ၤရိာ်ပျံၤစီၤယိၤဟၣ်မ့ၢ်လၢအသ့ၣ်ညါဝဲလၢစီၤယိၤ ဟၣ်မ့ၢ်ပှၤတီပှၤလိၤဒီးပှၤစီပှၤဆှံတဂၤသတးဒီးကဟုကယာ် ဃာ်ဝဲဂ့ၤဂ့ၤလီၤ. တဘျီလၢ်လၢ်တုၤအနၢ်ဟူဘၣ်အတၢ်စံးတၢ်ကတိၤဒီး, အဝဲဒၣ်အသးဘၣ်တံာ်တာ်ဒိၣ်ဒိၣ်ကလဲာ်ဘၣ်ဆၣ်သးခုဒိကနၣ်အီၤ လီၤ.

²¹လၢခံကတၢၢ်, တၢ်ဆၢကတီၢ်အဂ့ၤလၢနီၢ်ဟ့ၤရိၤဒံအဂီၢ်တုၤဃီၤ ဖဲစီၤပၤဟ့ၤရိာ်အိၣ်ဖျဲၣ်ဆၢက့ၤအမုၢ်နံၤဒီးအဝဲဒၣ်အိၣ်ဒီးတၢ်အီၣ် သကိးအီသကိးအမူးဖးဒိၣ်လၢအပဒိၣ်ပပှၢ်တဖၣ်, သုးခိၣ်သုးနၢ်တဖၣ်ဒီးကီၢ်ကၤလံၤလါအပှၤကဲခိၣ်ကဲနၢ်တဖၣ် အဂီၢ်အခါလီၤ.

²²နီၢ်ဟ့ၤရိၤဒံအဖိမုၣ်ဟဲနုာ်ဒီးဂဲၤကလံာ်ဝဲ, ဒီးတၢ်န့ၣ်မၤမုာ်စီၤပၤဟ့ၤရိာ်ဒီးအပှၤသမှံၤတဖၣ်အသးလီၤ. အန့ၣ်ဒီးစီၤပၤစံးဘၣ်ပိာ်မုၣ်သးစၢ်န့ၣ်, “ဖဲနအဲၣ်ဒိးတၢ်တမံၤလၢ်လၢ်န့ၣ်ဃ့တက့ၢ်, ဒီးယကဟ့ၣ်နၤလီၤ.”

²³အဝဲဆိၣ်လီၤအသးဒီးစံးဝဲ, “တၢ်တမံၤလၢ်လၢ်လၢနဃ့န့ၣ်ယကဟ့ၣ်လီၤနၤပၢၢ်တုၤလၢယဘီယမုၢ် တဝာ်ဒၣ်လဲာ်လီၤ.”

²⁴လၢတၢ်န့ၣ်အဃိ, ပိာ်မုၣ်သးစၢ်အံၤဟးထီၣ်ဆူတၢ်ချၢဒီးသံကွၢ်အမိၢ်, “မ့ၢ်ယကဘၣ်ဃ့တၢ်မနုၤတမံၤလဲၣ်.” အမိၢ်စံးဆၢအီၤ, “ပှၤဘျၢတၢ်စီၤယိၤဟၣ်အခိၣ်လီၤ.”

²⁵တဘျီဃီပိာ်မုၣ်သးစၢ်န့ၣ်ဟဲက့ၤနုာ်ဝဲချ့သဒံးဆူစီၤပၤ အအိၣ်ဒီးစံးဝဲ, “ယအဲၣ်ဒိးလၢနကဟ့ၣ်ယၤဘျၢတၢ်စီၤယိၤဟၣ်အခိၣ်, အခဲအံၤဒီးဖဲအံၤလၢလီခီကဘျၣ်လၣ်အပူၤလီၤ.”

²⁶အန့ၣ်တဘျီစီၤပၤအသးအုးဒိၣ်ဒိၣ်ကလဲာ်ဘၣ်ဆၣ် မ့ၢ်လၢအဆိၣ်လီၤဘၣ်အသးလၢပိာ်မုၣ်သးစၢ်န့ၣ်လၢအပှၤသမှံၤ တဖၣ်အမဲာ်ညါအဃိ, တအဲၣ်ဒိးမၤဟးဂီၤအတၢ်အၢၣ်လီၤအီလီၤဒီးအီၤဘၣ်န့ၣ်လီၤ.

²⁷လၢတၢ်န့ၣ်အဃိ, စီၤပၤဟ့ၣ်လီၤအကလုၢ်တဘျီဃီဒီးမၢလီၤ ပှၤသုးဖိခိးတၢ်တဂၤလၢအကဟဲက့ၤစိာ်စီၤယိၤဟၣ်အခိၣ်အဂီၢ်လီၤ. အဝဲလဲၤဝဲဆူဃိာ်ပူၤဒီးဒီၣ်တဲာ်ကွံာ်စီၤယိၤဟၣ်အကိာ်လီၤ.

²⁸အန့ၣ်ဝံၤဟဲက့ၤစိာ်ဝဲစီၤယိၤဟၣ်အခိၣ်လၢလီခီကဘျၣ်လၣ် အပူၤဒီးဟ့ၣ်လီၤဝဲပိာ်မုၣ်သးစၢ်န့ၣ်ဝံၤပိာ်မုၣ်သးစၢ်တခီ ဟ့ၣ်လီၤဝဲဆူအမိၢ်န့ၣ်လီၤ.

²⁹တုၤစီၤယိၤဟၣ်အပျဲၢ်အဘီၣ်တဖၣ်နၢ်ဟူတၢ်ဂ့ၢ်အံၤဒီး အဝဲသ့ၣ်လဲၤဟံးန့ၢ်က့ၤဝဲအစိၣ်ဒီးခူၣ်လီၤဝဲလၢပှၤသွၣ် ခိၣ်အပူၤလီၤ.

³⁰ပှၤတၢ်မၢဖိတဖၣ် ဟဲက့ၤဆူယ့ၣ်ၡူးအအိၣ်ဒီးစံးဘၣ်တဲဘၣ် အီၤလၢကယဲၢ်တၢ်လၢအဝဲသ့ၣ်မၤတ့ၢ်ဝဲဒီးသိၣ်လီၤသီလီၤတ့ၢ်ဝဲ တဖၣ်န့ၣ်လီၤ.

³¹ပှၤဟဲထီၣ်က့ၤလီၤတဖၣ်အိၣ်အါအါဂီၢ်ဂီၢ်တုၤဒၣ်လဲာ်ယ့ၣ်ၡူး ဒီးအပျဲၢ်အဘီၣ်တဖၣ်ကအီၣ်ကအီတၢ်အဆၢကတီၢ်တအိၣ်ဘၣ် အဃိ, ယ့ၣ်ၡူးစံးဘၣ်အပျဲၢ်အဘီၣ်တဖၣ်, “မ်ပကလဲၤသကိးထဲပဝဲဒၣ်တဖၣ်ဧိၤဆူတၢ်လီၢ်တပူၤလၢပှၤ တအိၣ်နီတဂၤဘၣ်, လၢသုကအိၣ်ဘှံးအိၣ်သါတစိၢ်တလီၢ်အဂီၢ်တက့ၢ်.”

³²လၢတၢ်န့ၣ်အဃိအဝဲသ့ၣ်ဒိးထီၣ်ချံတဘ့ၣ်ဒီးလဲၤဝဲထဲ အဝဲသ့ၣ်ဆူတၢ်လီၢ်တပူၤဖဲပှၤတအိၣ်နီတဂၤဘၣ်န့ၣ်လီၤ.

³³ဘၣ်ဆၣ်ပှၤအါဂၤထံၣ်အဝဲသ့ၣ်ဟးထီၣ်ဒီးအဝဲသ့ၣ်မ့ၢ် မတၤတဖၣ်လဲၣ်န့ၣ်သ့ၣ်ညါဝဲသတးဒီး, ပှၤတဖၣ်လၢဝ့ၢ်ကိးဝ့ၢ်ဒဲးဃ့ၢ်ဝဲချ့သဒံးလၢခိတခီဒီး လဲၤတုၤလၢတၢ်လီၢ်န့ၣ်လၢယ့ၣ်ၡူးဒီး အပျဲၢ်အဘီၣ်တဖၣ်အမဲာ်ညါလီၤ.

³⁴တုၤယ့ၣ်ၡူးစံၣ်လီၤလၢချံပူၤဝံၤဒီးထံၣ်ဘၣ်ပှၤဂီၢ်မုၢ်ဖး ဒိၣ်အံၤန့ၣ်သးကညီၤဘၣ်အဝဲသ့ၣ်, မ့ၢ်လၢအဝဲသ့ၣ်လီၤဂာ်ဒီးသိတဖုလၢပှၤကွၢ်အီၤတအိၣ်ဘၣ် အသိးအဃိန့ၣ်လီၤ. လၢတၢ်န့ၣ်အဃိ, အဝဲစးထီၣ်သိၣ်လီၤသီလီၤအဝဲသ့ၣ်လၢတၢ်မၤလိအါထံၣ်အါဘီလီၤ.

³⁵တုၤအအိၣ်ဝဲဖဲန့ၣ်ယံာ်ထီၣ်ဒီးဘူးထီၣ်လၢမုၢ်ကလီၤနုာ်န့ၣ်, အပျဲၢ်အဘီၣ်တဖၣ်ဟဲဆူအအိၣ်ဒီးစံးဝဲ, “တၢ်လီၢ်အံၤမ့ၢ်တၢ်လီၢ်လၢပှၤတအိၣ်ဘၣ်, တၢ်ဆၢကတီၢ်စ့ၢ်ကီးယံာ်ထီၣ်ဒီးမုၢ်ကဟါန့ၢ်ပှၤလီၤ.

³⁶ပျၢ်ကွံာ်ပှၤတဖၣ်အံၤဒီးပျဲအလဲၤနုာ်ဆူဒူသဝီအိၣ်ဘူးအိၣ် တံၢ်တဖၣ်ဒ်သိးအကပှ့ၤအီၣ်ပှ့ၤအီဒၣ်အတၢ်တက့ၢ်.”

³⁷ယ့ၣ်ၡူးစံးဆၢအဝဲသ့ၣ်, “ဟ့ၣ်ဒုးအီၣ်ဒုးအီအဝဲသ့ၣ်လၢတၢ် တမံၤမံၤလၢသုနီၢ်ကစၢ်ဒၣ်သုဝဲတက့ၢ်.” အဝဲသ့ၣ်သံကွၢ်ဝဲ, “နအဲၣ်ဒိးလၢပကလဲၤပှ့ၤကိၣ် လီၤလၢစ့ဒန့ၤရံခံကယၤလၢပကဒုးအီၣ်ပှၤတဖၣ်အံၤအဂီၢ်န့ၣ်ဧါ.”

³⁸အန့ၣ်ဒီးယ့ၣ်ၡူးသံကွၢ်အဝဲသ့ၣ်, “သုကိၣ်အိၣ်ပှံၤဖျၢၣ်လဲၣ်. လဲၤကွၢ်တက့ၢ်.” တုၤအဝဲသ့ၣ်ဃုထံၣ်ဝဲဒီးစံးဘၣ်အီၤ, “ကိၣ်အိၣ်ယဲၢ်ဖျၢၣ်ဒီးညၣ်အိၣ်ခံဘ့ၣ်လီၤ.”

³⁹တုၤနုၤတစုယ့ၣ်ၡူးမၤလိာ်အဝဲသ့ၣ်လၢကဒုးပာ်ဖှိၣ်ထီၣ်ပှၤ ဂီၢ်မုၢ်တဖၣ်ဒီးဒုးဆ့ၣ်နီၤအဝဲသ့ၣ်တဖုဘၣ်တဖုလၢနီၣ်လါဟ့ အဖီခိၣ်န့ၣ်လီၤ.

⁴⁰သတးဒီးအဝဲသ့ၣ်ဆ့ၣ်နီၤဝဲတဂ့ၢ်ဘၣ်တဂ့ၢ်တဖုဘၣ်တဖု, တနီၤအိၣ်အဂၤလၢအကယၤဒီးတနီၤအိၣ်အဂၤယဲၢ်ဆံလီၤ.

⁴¹အန့ၣ်ဝံၤယ့ၣ်ၡူးဟံးထီၣ်ကိၣ်ယဲၢ်ဖျၢၣ်ဒီးညၣ်ခံဘ့ၣ်န့ၣ်, ကွၢ်ထီၣ်တၢ်ဆူမူခိၣ်ဒီးစံးထီၣ်ပတြၢၤကစၢ်ယွၤအဘျုး အဖှိၣ်လီၤ. အဝဲဒၣ်စိၢ်ဘျဲးကိၣ်ဝံၤဟ့ၣ်လီၤဝဲအပျဲၢ်အဘီၣ်တဖၣ် လၢအကဟ့ၣ်နီၤလီၤပှၤဂီၢ်မုၢ်တဖၣ်အဂီၢ်လီၤ. ဟ့ၣ်နီၤလီၤစ့ၢ်ကီးဝဲညၣ်ခံဘ့ၣ်န့ၣ်လၢပှၤခဲလၢာ်အဂီၢ်လီၤ.

⁴²ပှၤကိးဂၤအီၣ်ဘၣ်ဝဲတုၤအဘျဲးအီၣ်ဘျဲးအီဝဲလီၤ.

⁴³အန့ၣ်ဝံၤအပျဲၢ်အဘီၣ်တဖၣ်ပာ်ဖှိၣ်က့ၤကိၣ်ဒီးညၣ်အိၣ်ဘျဲၣ်အိၣ် စဲၢ်တဖၣ်ပှဲၤကုတဆံခံဒုလီၤ.

⁴⁴ပှၤလၢအအီၣ်တၢ်တဖၣ်ထဲပိာ်ခွါန့ၣ်အိၣ်အဂၤယဲၢ်ကထိလီၤ.

⁴⁵တၢ်န့ၣ်ဝံၤတဘျီဃီ, ယ့ၣ်ၡူးမၤလိာ်ဆူၣ်အပျဲၢ်အဘီၣ်တဖၣ်လၢအကလဲၤနုာ်လီၤဆူချံ ပူၤဒီးလဲၤပာ်လၢအဝဲအမဲာ်ညါဆူဝ့ၢ်ဘ့ၤသစဲဒၤ, အိၣ်လၢပီၣ်လဲၣ်ကၤလံၤလါဝၢ်ဘးခီ, ဖဲအဝဲဒၣ်ပျၢ်ကွံာ်ပှၤဂီၢ်မုၢ်တဖၣ်ဆူအဟံၣ်အဃီဒၣ်ဝဲအကတီၢ် န့ၣ်လီၤ.

⁴⁶အဝဲပျၢ်ကွံာ်ပှၤသ့ၣ်တဖၣ်န့ၣ်မုာ်မုာ်ဝံၤအလီၢ်ခံ, လဲၤထီၣ်ဝဲဆူကစၢၢ်ဒီခိၣ် လၢကဃ့ထုကဖၣ်ယွၤအဂီၢ်လီၤ.

⁴⁷တုၤမုၢ်ဟါလီၤဒီးချံန့ၣ်လဲၤတုၤလၢပီၣ်လဲၣ်အခၢၣ်သး, ဖဲယ့ၣ်ၡူးတခီအိၣ်တီၢ်ထဲတဂၤဧိၤလၢခိန့ၣ်လီၤ.

⁴⁸အဝဲထံၣ်စိဃီၤအပျဲၢ်အဘီၣ်တဖၣ်ဘၣ်ကၢၤချံဒီးဝၢ်ချံကီကီခဲ ခဲမ့ၢ်လၢကလံၤတလိၤအဃိန့ၣ်လီၤ. ဒီးဘၣ်ဖဲဂီၤသၢနၣ်ရံၣ်ဒီးဃုနၣ်ရံၣ်အဘၢၣ်စၢၤန့ၣ်, ယ့ၣ်ၡူးဟးဝဲလၢပီၣ်လဲၣ်ထံဖံးခိၣ်ဒီးလဲၤဝဲဆူအဝဲသ့ၣ် အအိၣ်မၤအသးဒ်အကလဲၤပူၤကွံာ်အဝဲသ့ၣ်လီၤ.

⁴⁹ဘၣ်ဆၣ်ဒီးအဝဲသ့ၣ်ထံၣ်အဟးလၢထံဖံးခိၣ်ဒီးဆိကမိၣ်ဝဲလၢ အမ့ၢ်တၢ်တဃၣ်ဒီးကိးပသူထီၣ်ဝဲ, “တၢ်တဃၣ်” န့ၣ်လီၤ.

⁵⁰တုၤအဝဲသ့ၣ်ခဲလၢာ်ထံၣ်အီၤဒီးပျံၤတၢ်ဒိၣ်ဒိၣ်ကလဲာ်လီၤ. ယ့ၣ်ၡူးကတိၤထီၣ်တၢ်တဘျီဃီဒီးအဝဲသ့ၣ်ဒီးစံးဝဲ, “ပာ်သုသးဒူဒူတက့ၢ်. မ့ၢ်ယၤလီၤ. ပျံၤတၢ်တဂ့ၤ.”

⁵¹အန့ၣ်ဝံၤအဝဲဒၣ်လဲၤနုာ်ဒိးထီၣ်ချံလၢအဝဲသ့ၣ်အသိးဒီးကလံၤ န့ၣ်အိၣ်က့ၤဂၢၢ်တပၢၢ်လီၤ. အပျဲၢ်အဘီၣ်တဖၣ်တၢ်လီၤကမၢကမၣ်ဘၣ်အီၤဒိၣ်မးန့ၣ်လီၤ.

⁵²အဂ့ၢ်မ့ၢ်လၢတၢ်လီၤလးဘၣ်ဃးတၢ်ဒုးအီၣ်ပှၤယဲၢ်ကထိလၢကိၣ် အခီပညီနီၢ်နီၢ်န့ၣ်အဝဲသ့ၣ်တနၢ်ပၢၢ်ဒံးဝဲဘၣ်အဃိလီၤ. မ့ၢ်လၢအတၢ်ဆိကမိၣ်တထီၣ်ဘးဘၣ်အဃိလီၤ.

⁵³အဝဲသ့ၣ်ခီဂာ်ပီၣ်လဲၣ်န့ၣ်ဒီးတုၤဃီၤဝဲလၢကီၢ်ကံးန့ၤရ့သးဒီး တိၢ်ထီၣ်အချံဖဲန့ၣ်လီၤ.

⁵⁴တုၤမ့ၢ်အဝဲသ့ၣ်စံၣ်လီၤလၢချံပူၤဒီး, ပှၤတဖၣ်ထံၣ်ယ့ၣ်ၡူးဒီးကွၢ်နီၣ်အီၤဘၣ်တဘျီဃီလီၤ.

⁵⁵အန့ၣ်ဒီးအဝဲသ့ၣ်ဃ့ၢ်ဝ့ၤဝီၤသကုၤကီၢ်န့ၣ်လီၤ. ဒီးဖဲအဝဲသ့ၣ်နၢ်ဟူယ့ၣ်ၡူးအိၣ်ဝဲအလီၢ်တပူၤလၢ်လၢ်န့ၣ်, ဟဲစိာ်ပှၤဆူးပှၤဆါတဖၣ်အိၣ်မံနီၤလၢလီၢ်မံဒါအဖီခိၣ်ဆူ အအိၣ်လီၤ.

⁵⁶ဒီးဖဲယ့ၣ်ၡူးလဲၤတုၤဝဲတပူၤလၢ်လၢ်လၢသဝီပူၤမ့ၢ်ဂ့ၤ, ဝ့ၢ်ပူၤမ့ၢ်ဂ့ၤ, ခိဖဲဟံၣ်အိၣ်စှၤဖျၢၣ်မ့ၢ်ဂ့ၤ, ပှၤသ့ၣ်တဖၣ်န့ၣ်ဟဲစိာ်ဒီးပာ်လီၤပှၤဆါတဖၣ်လၢဖၠါပူၤဒီး ဃ့သကွံၢ်ကညးအီၤလၢအကပျဲအဝဲသ့ၣ်ထိးဘၣ်ထဲ အဆ့ကၤအနွံဧိၤန့ၣ်လီၤ. ဒီးကယဲၢ်ပှၤလၢအထိးဘၣ်ဝဲတဖၣ်ဘျါက့ၤဝဲခဲလၢာ်လီၤ.