Read S'gaw Karen လံာ်မၢ်ကူး 7 Bible Online

လံာ်မၢ်ကူး 7 - S'gaw Karen bible

လံာ်မၢ်ကူး 7

¹ပှၤဖၤရံၤၡဲတဖၣ်ဒီးပှၤသ့တၢ်ဘူၣ်တၢ်ဘါအတၢ်သိၣ်တၢ်သီတ နီၤလၢအဟဲလၢဝ့ၢ်ယရူၤၡလ့ၣ်တခီန့ၣ်, ဟဲဖှိၣ်သကိးဆူယ့ၣ်ၡူးအအိၣ်လီၤ.

²အဝဲသ့ၣ်ထံၣ်ဝဲလၢအပျဲၢ်အဘီၣ်တနီၤအီၣ်တၢ်အီတၢ်လၢအစုတကဆှီ ဘၣ်, အခီပညီ, အဝဲသ့ၣ်တသ့အစုဒ်တၢ်ဘူၣ်တၢ်ဘါအလုၢ်အလၢ် အိၣ်ဝဲအသိးဘၣ်အဃိလီၤ.

³(အဂ့ၢ်မ့ၢ်လၢပှၤဖၤရံၤၡဲဒီးပှၤယူဒၤဖိအဂၤတဖၣ်စ့ၢ်ကီး မၤဝဲဒ်မိၢ်ပၢ်ဖံဖုလၢပျၢၤအလုၢ်အလၢ်အသိးအဃိဒီး အဝဲသ့ၣ်မ့ၢ်တသ့ကဆှီဘၣ်အစုဒ်တၢ်သိၣ်တၢ်သီအိၣ်ဝဲအသိး ဘၣ်ဒီးတအီၣ်တၢ်နီတမံၤဘၣ်.

⁴တုၤအဝဲသ့ၣ်ဟဲက့ၤလၢဖၠါပူၤန့ၣ်, မ့တမ့ၢ်လၢအမၤကဆှီ ဘၣ်တၢ်အီၣ်လၢအဟဲက့ၤစိာ်ဝဲလၢဖၠါပူၤဘၣ်ဒီး အဝဲသ့ၣ် တအီၣ်ဝဲဘၣ်. မိၢ်ပၢ်ဖံဖုလၢပျၢၤအလုၢ်အလၢ်အဂၤလၢ အဝဲသ့ၣ်ဟံးဃာ်ဒီးမၤဝဲတဖၣ်အိၣ်ဒံးအါမံၤ, ဒ်တၢ်ကဘၣ်သ့ကဆှီလီခီ, သပၢၤ, လီခီတိၢ်ဘီဒီးလီၢ်မံခးတဖၣ်လၢကျဲအဘၣ်န့ၣ်လီၤ.)

⁵အန့ၣ်သတးဒီး ပှၤဖၤရံၤၡဲဒီးပှၤသ့တၢ်ဘူၣ်တၢ်ဘါ အတၢ်သိၣ်တၢ်သီတဖၣ်သံကွၢ်ယ့ၣ်ၡူးဒီးစံးဝဲ, “ဘၣ်မနုၤနပျဲၢ်နဘီၣ်တဖၣ်တအိၣ်မူဒ်မိၢ်ပၢ်ဖံဖုလၢပျၢၤ အလုၢ်အလၢ်အသိးဘၣ်, မ့မ့ၢ်အီၣ်တၢ်အီတၢ်လၢအစုလၢအတကဆှီဘၣ်န့ၣ်လဲၣ်.”

⁶ယ့ၣ်ၡူးစံးဆၢအဝဲသ့ၣ်, “ဝံယၡါယၤအတၢ်ကတိၤဆိပာ်လၢသုဂ့ၢ်န့ၣ်ဘၣ်မးလီၤ. သုမ့ၢ်ပှၤပာ်မၤအသးတဖၣ်ဒ်အဝဲကွဲးတၢ်အသိး, ‘ကစၢ်ယွၤစံးဝဲပှၤသ့ၣ်တဖၣ်အံၤမၤလၤကပီၤယၤလၢ အထးခိၣ်ဘၣ်ဆၣ်ဒီး အသးတခီ အိၣ်ယံၤဒီးယၤလီၤ.

⁷အတၢ်ဘူၣ်ထီၣ်ဘါထီၣ်ယၤကဲတၢ်ကလီကလီ မ့ၢ်လၢအဝဲသ့ၣ်သိၣ်လိပှၤကညီအတၢ်သိၣ်တၢ်သီတဖၣ် ဒ်ကစၢ်ယွၤအတၢ်သိၣ်တၢ်သီအသိးအဃိန့ၣ်လီၤ.’

⁸သုညိကွံာ်ကစၢ်ယွၤအတၢ်မၤလိာ်ဒီးဟံးဃာ်ဂၢၢ်ကျၢၤ ပှၤကညီအတၢ်သိၣ်တၢ်သီလီၤ.”

⁹ယ့ၣ်ၡူးစံးကဒီးဝဲ, “ဒ်သိးသုကဟံးဃာ်ဘၣ်သုတၢ်သိၣ်လိသီလိလၢ အဟဲလီၤစၢၤလၢမိၢ်ပၢ်ဖံဖုလၢပျၢၤတဖၣ်အအိၣ်အဂီၢ်န့ၣ်, သုဃုထံၣ်န့ၢ်ကျဲလၢသုကညိကွံာ်ကစၢ်ယွၤအတၢ်မၤလိာ်န့ၣ်သ့ဒိၣ်မးလီၤ.

¹⁰အဂ့ၢ်ဒ်အံၤစီၤမိၤၡ့မၤလိာ်သု, ‘ယူးယီၣ်နမိၢ်ဒီးနပၢ်တက့ၢ်.’ ဒီး ‘ပှၤတဂၤလၢ်လၢ်လၢအကတိၤအၢကတိၤသီအပၢ်မ့တမ့ၢ် အမိၢ်န့ၣ်, ကဘၣ်တၢ်စံၣ်ညီၣ်သံကွံာ်အီၤန့ၣ်လီၤ.’

¹¹ဘၣ်ဆၣ်ဒီးသုစံးသုဝဲ, ပှၤတဂၤမ့ၢ်တဲဘၣ်အမိၢ်မ့တမ့ၢ်အပၢ်လၢ တၢ်လၢအဝဲကြၢးဟ့ၣ်မၤစၢၤအဝဲသ့ၣ်တဖၣ်န့ၣ် ‘ကဲထီၣ်ကီၤဘၣ်လံ’ (အခီပညီ, ကဲထီၣ်ကစၢ်ယွၤအတၢ်လံ) န့ၣ်,

¹²ပှၤအဝဲန့ၣ်, တလိၣ်အမၤတၢ်လၢအပၢ်ဒီးအမိၢ်အဂီၢ်နီတမံၤ လၢၤဘၣ်န့ၣ်လီၤ.

¹³သုမၤဒ်အံၤန့ၣ်, မ့ၢ်သုဒုးကဲထီၣ်ကစၢ်ယွၤအကလုၢ်ကထါလၢတၢ် ကလီကလီခီဖျိသုဟ့ၣ်ယုၢ်လီၤမိၢ်ပၢ်ဖံဖုလၢပျၢၤ အတၢ်သိၣ်လိသီလိတဆီဘၣ်တဆီအဃိန့ၣ်လီၤ. ဒီးတၢ်ဒ်သိးအံၤလၢသုမၤအီၤန့ၣ်, အိၣ်အါမံၤလီၤ.”

¹⁴အန့ၣ်ဝံၤယ့ၣ်ၡူးကိးဃီၤကဒီးပှၤဂီၢ်မုၢ်တဖၣ်ဆူအအိၣ်ဒီးစံးဝဲ, “သုဝဲသ့ၣ်ခဲလၢာ်ကနၣ်ယတၢ်ကတိၤဒီးနၢ်ပၢၢ်ဘၣ်တက့ၢ်.

¹⁵တၢ်လၢအလဲၤနုာ်ဆူပှၤကညီတဂၤအပူၤဒီးကဒုးကဲထီၣ် အီၤလၢပှၤတကဆှီဘၣ်န့ၣ်, တအိၣ်နီတမံၤဘၣ်. မ့မ့ၢ်တၢ်လၢအဟဲထီၣ်လၢပှၤကညီတဂၤအပူၤန့ၣ်, မ့ၢ်တၢ်လၢအဒုးကဲထီၣ်အီၤလၢပှၤတကဆှီဘၣ်တခီန့ၣ်လီၤ.

¹⁶(ပှၤလၢအအိၣ်ဒီးအနၢ်လၢအနၢ်ဟူတၢ်သ့န့ၣ်, မ်အဒိကနၣ်တၢ်တက့ၢ်.)”

¹⁷တုၤမ့ၢ်အဟးထီၣ်ကွံာ်လၢပှၤဂီၢ်မုၢ်အအိၣ်ဒီးက့ၤနုာ်ဝဲဆူဟံၣ်ပူၤန့ၣ်, အပျဲၢ်အဘီၣ်တဖၣ်သံကွၢ်အီၤတၢ်ကတိၤဒိအခီပညီန့ၣ်လီၤ.

¹⁸ယ့ၣ်ၡူးစံးဘၣ်အဝဲသ့ၣ်, “သုတၢ်သ့ၣ်ညါနၢ်ပၢၢ်တထီၣ်ဘးဒ်ပှၤဂၤတဖၣ်အသိးလီၤမးလဲၣ်. တၢ်အိၣ်လၢတၢ်ချၢလၢအလဲၤနုာ်ဆူပှၤတဂၤအပူၤ ဒီးကမၤတကဆှီအီၤတအိၣ်နီတမံၤဘၣ်န့ၣ်, သုတနၢ်ပၢၢ်ဘၣ်ဧါ.

¹⁹အဂ့ၢ်မ့ၢ်လၢအတလဲၤနုာ်ဆူအသးကံၢ်ပူၤဘၣ်, မ့မ့ၢ်လဲၤနုာ်ဝဲဆူအဟၢဖၢပူၤဝံၤဒီးဟးထီၣ်ကွံာ်ဝဲလၢ အနီၢ်ခိအပူၤလီၤ.” (ယ့ၣ်ၡူးစံးတၢ်ဒ်သိးအံၤန့ၣ်မ့ၢ်အတဲဖျါထီၣ်ဝဲလၢ တၢ်အီၣ်ခဲလၢာ်မ့ၢ်တၢ်လၢအကဆှီဝဲန့ၣ်လီၤ.)

²⁰ဒီးစံးကဒီးဝဲ, “တၢ်လၢအဟဲထီၣ်လၢပှၤကညီတဂၤအပူၤန့ၣ်, မ့ၢ်တၢ်လၢအမၤတကဆှီဘၣ်အီၤန့ၣ်လီၤ.

²¹အဂ့ၢ်ဒ်လဲၣ်န့ၣ်, တၢ်လၢအဟဲထီၣ်လၢပှၤအသးကံၢ်ပူၤ မ့ၢ်တၢ်ဆိကမိၣ်အအၢအသီတဖၣ်လၢအဒုးမၤအီၤလၢတၢ်မၤ ကမၣ်မုၣ်ကမၣ်ခွါ, တၢ်ဟုၣ်တၢ်ဘျၣ်, တၢ်မၤသံပှၤကညီ,

²²တၢ်အဲၣ်ဘၢမါအဲၣ်ဘၢဝၤ, တၢ်မၤတၢ်သူၣ်လီသးကွံတၢ်, တၢ်အၢတၢ်သီကိးကလုာ်ဒဲး, တၢ်လီတၢ်ဝ့ၤ, တၢ်တဃံတလၤ, တၢ်သးကါ, တၢ်ဒုၣ်ဒွဲၣ်စံးအၢ, တၢ်ပာ်ထီၣ်ထီသး, ဒီးတၢ်သူၣ်တဆးသးတဆးတဖၣ်လီၤ.

²³တၢ်တဂ့ၤတဘၣ်တဖၣ်အံၤဟဲထီၣ်လၢပှၤကညီတဂၤအပူၤဒီး ဒုးကဲထီၣ်အီၤလၢပှၤတကဆှီဘၣ်တဂၤလီၤ.”

²⁴အန့ၣ်ဝံၤယ့ၣ်ၡူးဟးထီၣ်ဖဲန့ၣ်ဒီးလဲၤဝဲဆူတၢ်လီၢ်ကဝီၤအိၣ်ဘူး ဒီးဝ့ၢ်ထါယၢၣ်ဒီးစံဒိၣ်လီၤ. လဲၤနုာ်ဝဲဆူဟံၣ်တဖျၢၣ်အပူၤ, ဒီးတအဲၣ်ဒိးလၢပှၤကသ့ၣ်ညါ န့ၢ်အီၤလၢအဝဲအိၣ်ဖဲန့ၣ်ဘၣ်. ဘၣ်ဆၣ်ဒီးအိၣ်ဝဲလၢတၢ်ခူသူၣ်ပူၤတန့ၢ်ဘၣ်.

²⁵ပိာ်မုၣ်လၢအဖိမုၣ်ဖိတၢ်နါဒိးအီၤတဂၤန့ၣ်, နၢ်ဟူယ့ၣ်ၡူးအဂ့ၢ်တဘျီဃီဟဲဝဲဆူအအိၣ်ဒီးထိၣ်လီၤပှီၤ အသးဖဲအခီၣ်ထံးန့ၣ်လီၤ.

²⁶ပိာ်မုၣ်န့ၣ်မ့ၢ်ပှၤကြံးခ်မုၣ်တဂၤလၢအအိၣ်ဖျဲၣ်ထီၣ်လၢ ဖံၤနံက့ၤဘၣ်ဃးဒီးကီၢ်စူၤရံန့ၣ်လီၤ. အဝဲဒၣ်ဃ့သကွံၢ်ကညးယ့ၣ်ၡူးလၢအကဟီထီၣ်ကွံာ် တၢ်နါလၢအဒိးအဖိမုၣ်န့ၣ်လီၤ.

²⁷ဘၣ်ဆၣ်ဒီးယ့ၣ်ၡူးစံးဘၣ်အီၤ, “တၢ်အီၣ်န့ၣ်ပျဲပဒုးအီၣ်ဆိဖိတဖၣ်တက့ၢ်. ပကဟံးန့ၢ်ဖိအတၢ်အီၣ်ဒီးကွံာ်လီၤန့ၢ်ထွံၣ်တဖၣ် န့ၣ်တကြၢးဘၣ်.”

²⁸အဝဲဒၣ်စံးဆၢက့ၤအီၤ, “မ့ၢ်ယၢာ်, ကစၢ်ဧၢ, ဘၣ်ဆၣ်ဒီးထွံၣ်အိၣ်လၢစီၢ်နီၤခိၣ်အဖီလာ်တဖၣ်ဒၣ်လဲာ် အီၣ်ဘၣ်ဝဲဖိတဖၣ်အတၢ်အီၣ်အိၣ်ဘျဲၣ်အိၣ်စဲၢ်တဖၣ်န့ၣ်လီၤ.”

²⁹အန့ၣ်ဒီးယ့ၣ်ၡူးစံးဘၣ်အီၤ, “မ့ၢ်လၢနတၢ်ကတိၤတထံၣ်အံၤအဃိ, က့ၤမုာ်မုာ်ဆူနဟံၣ်န့ၣ်တက့ၢ်. နဖိမုၣ်န့ၣ်တၢ်နါဟးထီၣ်ကွံာ်လၢအလိၤလံ.”

³⁰အဝဲဒၣ်က့ၤက့ၤဆူအဟံၣ်ဒီးထံၣ်ဘၣ်အဖိမုၣ်အိၣ်မံလီၤလၢ အလီၢ်မံခိၣ်ဒီးတၢ်နါဟးထီၣ်ကွံာ်လၢအလိၤလံန့ၣ်လီၤ.

³¹အန့ၣ်ဝံၤယ့ၣ်ၡူးဟးထီၣ်လၢတၢ်လီၢ်ကဝီၤဘူးဒီးဝ့ၢ်ထါယၢၣ်, လဲၤခီဖျိဝ့ၢ်စံဒိၣ်ဆူပီၣ်လဲၣ်ကၤလံၤလါ, ဒီးလၢကျဲန့ၣ်လဲၤခီဂာ်ဘၣ်ဝဲဒ့းကၤပလံၣ်လၢအမ့ၢ်ဝ့ၢ် အဖျၢၣ်တဆံအတၢ်ပၢန့ၣ်လီၤ.

³²ပှၤတနီၤဟဲကိးပှၤနၢ်တအၢဒီးအုးအးကတာ်ပျ့ၤတဂၤဆူအအိၣ်, ဒီးအဝဲသ့ၣ်ဃ့သကွံၢ်ကညးယ့ၣ်ၡူးဒ်သိးအကပာ်ထီၣ်အစုလၢအလိၤ အဂီၢ်လီၤ.

³³အန့ၣ်ဒီးယ့ၣ်ၡူးမိၤထီၣ်အီၤထဲတဂၤဧိၤစီၤစုၤဒီးကမျၢၢ်အိၣ်တၢ်အလီၢ်, ဆွံနုာ်အစုနၢတဖၣ်လၢအနၢ်ခံခီလၢာ်အပူၤဝံၤထုးထီၣ်က့ၤအီၤ, ဒီးထူးပှဲာ်လီၤအစုနၢ, ဒီးထိးဘၣ်အဝဲဒၣ်အပျ့ၤန့ၣ်လီၤ.

³⁴အန့ၣ်ဝံၤ, ယ့ၣ်ၡူးကွၢ်ထီၣ်တၢ်ဆူမူခိၣ်, ကအုထီၣ်ဝဲဒီးစံးဘၣ်ပှၤတဂၤန့ၣ်, “အ့ၤဖၤသါ” အခီပညီ, “အိးဟိထီၣ်တက့ၢ်,” န့ၣ်လီၤ.

³⁵တဘျီဃီပှၤတဂၤန့ၣ်နၢ်ဟူထီၣ်က့ၤတၢ်, အပျ့ၤအထူၣ်အပျၢ်လီၤကဆှၣ်ကွံာ်, ဒီးကတိၤထီၣ်က့ၤတၢ်သ့ဝဲဂ့ၤဂ့ၤဘၣ်ဘၣ်န့ၣ်လီၤ.

³⁶ဝံၤဒီးယ့ၣ်ၡူးမၤလိာ်အဝဲသ့ၣ်ဒ်သိးအသုတစံးဘၣ်တဲဘၣ်တၢ် ဂ့ၢ်အံၤလၢပှၤနီတဂၤတဂ့ၤလီၤ. ဘၣ်ဆၣ်ဒီးဒံးမၤလိာ်ဝဲသပှၢ်ပှၢ်, အဝဲသ့ၣ်ရၤလီၤတၢ်ကစီၣ်ဒ်အါထီၣ်တခီန့ၣ်လီၤ.

³⁷အဝဲသ့ၣ်တဖၣ်န့ၣ်တၢ်လီၤကမၢကမၣ်ဘၣ်အီၤဒိၣ်မးဒီးစံးဝဲ, “အဝဲဒၣ်တဂၤအံၤ, မၤတၢ်ကိးမံၤဒဲးသ့ဝဲဂ့ၤဂ့ၤဘၣ်ဘၣ်လီၤ. ပှၤလၢအနၢ်တအၢဒၣ်လဲာ်န့ၣ်ဒုးနၢ်ဟူထီၣ်က့ၤဝဲတၢ်, ဒီးပှၤလၢအအုးအးန့ၣ်ဒုးကတိၤထီၣ်က့ၤဝဲတၢ်လီၤ.”