S'gaw Karen bible online

လံာ်လူၤကၣ် 1

¹စီၤသီးဖံၤလူးသးဘိဧၢ, ပှၤအါဒံအါဂၤဂုာ်ကျဲးစၢးတ့ၢ်ဝဲအဂ့ၤကတၢၢ်လၢအကကွဲး ဖျါထီၣ်က့ၤတၢ်ဂ့ၢ်လၢအမၤတ့ၢ်အသးလၢပသိးပကျါသ့ၣ် တဖၣ်န့ၣ်လီၤ.

²အဝဲသ့ၣ်ကွဲးတၢ်ဂ့ၢ်ဘၣ်ထွဲဒီးပှၤလၢအထံၣ်ဘၣ်တၢ်သ့ၣ် တဖၣ်အံၤလၢအမဲာ်ချံဒၣ်ဝဲစးထီၣ်လၢအခီၣ်ထံးကတၢၢ် ဒီးတဲဘၣ်ပှၤ ဒီးဒုးဟူထီၣ်သါလီၤတၢ်ကစီၣ်တမံၤအံၤန့ၣ်လီၤ.

³ဒီးလၢတၢ်န့ၣ်အဃိတၢ်ဒိၣ်ဧၢ, ဒ်ယဃုသ့ၣ်ညါနၢ်ပၢၢ်တ့ၢ်လံယဲ ဘၣ်ဃးတၢ်ဂ့ၢ်သ့ၣ်တဖၣ်အံၤခဲလၢာ်ခဲဆ့စးထီၣ်လၢအခီၣ်ထံး အသိး, ယဆိကမိၣ်ယမ့ၢ်ကွဲးလီၤတၢ်ဂ့ၢ်တမံၤအံၤလၢအဂ့ၢ်အဝီ ဒ်သိးနကဖးဘၣ်နဲအဂီၢ်ဒီး, ကမ့ၢ်တၢ်လၢအဂ့ၤလီၤ.

⁴ယမၤတၢ်အဝဲအံၤန့ၣ် မ့ၢ်ဒ်သိးနကသ့ၣ်ညါဘၣ်တၢ်မ့ၢ်တၢ်တီ လၢာ်လၢာ်ဆ့ဆ့ဘၣ်ဃးဒီးကယဲၢ်တၢ်သ့ၣ်တဖၣ်လၢ နဘၣ်တၢ်သိၣ်လိတ့ၢ်နၤန့ၣ်လီၤ.

⁵ဖဲဆၢကတီၢ်လၢစီၤဟ့ၤရိာ်ကဲကီၢ်ယူဒၤအစီၤပၤန့ၣ်, ပှၤလုၢ်တၢ်အခိၣ်လၢအမံၤမ့ၢ်စီၤစဃၤရံအိၣ်ဝဲဒၣ်တဂၤ ဒီးအဝဲဒၣ်ဘၣ်ထွဲလၢစီၤအဘံယၤတစိၣ်ပှၤလုၢ်တၢ်အခိၣ် အကရူၢ်လီၤ. အဝဲဒၣ်အမါအမံၤမ့ၢ်နီၢ်အ့းလံၤစါဘ့း ဒီးဘၣ်ထွဲစ့ၢ်ကီးလၢပှၤလုၢ်တၢ်အဒိၣ်အဒူၣ်ဖိထၢဖိန့ၣ်လီၤ.

⁶အဝဲသ့ၣ်ခံဂၤလၢာ်အိၣ်မူတၢ်အိၣ်မူလၢအဂ့ၤအဝါလၢကစၢ် ယွၤအမဲာ်ညါဒီးစူၢ်ကစၢ်ယွၤအတၢ်သိၣ်တၢ်သီဒီး အတၢ်မၤလိာ်တဖၣ်လၢလၢပှဲၤပှဲၤလီၤ.

⁷အဝဲသ့ၣ်အဖိတအိၣ်နီတဂၤဘၣ်. အဂ့ၢ်မ့ၢ်လၢ နီၢ်အ့းလံၤစါဘ့းမ့ၢ်ပှၤတူာ်ဖိဒီးအဝဲဒၣ်ဒီးစီၤစဃၤရံခံဂၤလၢာ် အသးပှၢ်ထီၣ်ဖးဒိၣ်လံအဃိန့ၣ်လီၤ.

⁸ဘၣ်မုၢ်တနံၤန့ၣ်စီၤစဃၤရံမၤအတၢ်မၤဒ်ပှၤလုၢ်တၢ်အခိၣ်တဂၤအသိး လၢတၢ်လုၢ်ဟံၣ်အပူၤ, အဂ့ၢ်မ့ၢ်လၢအတုၤဃီၤအဝဲဒၣ်အတီၤလၢအကဟံးန့ၢ်မူဒါဖဲ တနံၤဘၣ်တနံၤအတၢ်ဘူၣ်တၢ်ဘါအကတီၢ်အဃိန့ၣ်လီၤ.

⁹ဒ်ပှၤလုၢ်တၢ်အခိၣ်တဖၣ်အလုၢ်အလၢ်အိၣ်ဝဲအသိးန့ၣ်, အဝဲဒၣ်ဘၣ်တၢ်ဃုထၢထီၣ်အီၤခီဖျိတၢ်ဖီၣ်တၢ်ဖးလၢ အကဆိၣ်ကဲၤတၢ်နၢမူလၢတၢ်လုၢ်လီၢ်အဖီခိၣ်လီၤ. လၢတၢ်န့ၣ်အဃိ အဝဲဒၣ်လဲၤနုာ်ဆူကစၢ်ယွၤအတၢ်လုၢ်ဟံၣ် အပူၤ

¹⁰ဒီးပှၤဂီၢ်မုၢ်အိၣ်လၢတၢ်ချၢတဖၣ်ဃ့ဘါထုကဖၣ်တၢ်ဖဲ နၣ်ရံၣ်အကတီၢ်လၢတၢ်နၢမူဘၣ်တၢ်ဆိၣ်ကဲၤအီၤန့ၣ်လီၤ.

¹¹ကစၢ်ယွၤအကလူးတဂၤလီၣ်ဖျါထီၣ်အသးလၢအီၤဒီး အိၣ်ဆၢထၢၣ်ဝဲဒၣ်ဖဲတၢ်လုၢ်လီၢ်, လၢတၢ်နၢမူဘၣ်တၢ်ဆိၣ် ကဲၤအီၤလၢအဖီခိၣ်န့ၣ်အစုထွဲတကပၤလီၤ.

¹²ဖဲစီၤစဃၤရံထံၣ်အီၤန့ၣ်, အဝဲဒၣ်ဖုးသံပျီၢ်သံဒီးပျံၤတၢ်လီၤ.

¹³ဘၣ်ဆၣ်ဒီးကလူးန့ၣ်စံးဘၣ်အီၤ, “ပျံၤတၢ်တဂ့ၤ စီၤစဃၤရံဧၢ, ကစၢ်ယွၤနၢ်ဟူလံနတၢ်ထုကဖၣ်လံ. ဒီးနမါနီၢ်အ့းလံၤစါဘ့းကဆံးစၢ်န့ၢ်နၤလၢဖိခွါတဂၤလီၤ. နကဘၣ်ယုၢ်န့ၢ်အမံၤလၢစီၤယိၤဟၣ်လီၤ.

¹⁴ဖဲအဝဲဒၣ်အိၣ်ဖျဲၣ်ထီၣ်န့ၣ်, နကသူၣ်ဖှံသးညီသူၣ်ခုသးခုနဲဒၣ်အဒိၣ် အအါဒီးပှၤအဂၤအါဒံအါဂၤကသးခုဝဲန့ၣ်လီၤ.

¹⁵အဝဲဒၣ်ကမ့ၢ်ပှၤဖးဒိၣ်တဂၤလၢကစၢ်အမဲာ်ညါလီၤ. စပံးထံမ့ၢ်ဂ့ၤ, တၢ်လၢအကဒုးမူၤဒုးဘှီးပှၤမ့ၢ်ဂ့ၤ, အဝဲတဘၣ်အီဝဲနီတမံၤဘၣ်. အဝဲဒၣ်ကလၢပှဲၤဒီးသးစီဆှံဖဲအအိၣ်ဒံးလၢအမိၢ်အဟၢဖၢပူၤလံၤလံၤ,

¹⁶ဒီးအဝဲကဆှၢက့ၤအံၣ်စရ့လးအပှၤဂီၢ်မုၢ်အါဒံအါဂၤဆူအဝဲသ့ၣ်အယွၤ, ကစၢ်ယွၤအအိၣ်လီၤ.

¹⁷အဝဲဒၣ်ကလဲၤလၢကစၢ်အမဲာ်ညါအိၣ်ဒီးသးအဂံၢ်အဘါဒီးတၢ်စိတၢ် ကမီၤဒ်ဝံအ့ၤလံယၤအသိးန့ၣ်လီၤ. အဝဲဒၣ်ကဘိးဃၣ်က့ၤပၢ်တဖၣ်အသးဆူဖိတဖၣ်အအိၣ်, အဝဲဒၣ်ကဃၣ်ကဒါက့ၤပှၤတဒိကနၣ်တၢ်တဖၣ်ဆူပှၤတီပှၤလိၤ အတၢ်ဆိကမိၣ်အကျဲ, အဝဲဒၣ်ကကတဲာ်ကတီၤကစၢ်ယွၤ အပှၤဂီၢ်မုၢ်တဖၣ်လၢယွၤအဂီၢ်လီၤ.”

¹⁸စီၤစဃၤရံစံးဘၣ်ကလူးအဝဲန့ၣ်, “တၢ်အဝဲအံၤမ့ၢ်, တမ့ၢ်လဲၣ်န့ၣ်, ယကသ့ၣ်ညါယဲလၢကျဲဒ်လဲၣ်. ယမ့ၢ်ပှၤလၢအသးပှၢ်ထီၣ်လံတဂၤဒီးယမါစ့ၢ်ကီး အသးပှၢ်လံန့ၣ်လီၤ.”

¹⁹“ယဲဒၣ်အံၤယမ့ၢ်ကၤဘြံၤအ့လးလီၤ,” ကလူးစံးဆၢအီၤ, “ယဆၢထၢၣ်လၢယွၤအမဲာ်ညါဒီးအဝဲဒၣ် ဆှၢလီၤယၤဒ်သိးယကကတိၤတၢ်ဒီးနၤဒီးစံးဘၣ်တဲဘၣ်နၤ လၢတၢ်သးခုကစီၣ်တမံၤအံၤန့ၣ်လီၤ.

²⁰ဘၣ်ဆၣ်ဒီးယတၢ်ကစီၣ်လၢအကဟဲလၢထီၣ်ပှဲၤထီၣ်ဖဲဆၢ ကတီၢ်တုၤဃီၤအံၤန့ၣ်နတစူၢ်တနာ်နဲဒၣ်ဘၣ်. မ့ၢ်လၢနတစူၢ်တနာ်တၢ်အဃိ, နကအိၣ်တအုၣ်ဒီးအိၣ်ဘှ့ၣ်အိၣ်ဘှီၣ် တုၤဃီၤမုၢ်တနံၤဖဲ ယတၢ်အၢၣ်လီၤအီလီၤတၢ်ဒီးနၤဟဲလၢထီၣ်ပှဲၤထီၣ်ဝဲန့ၣ်လီၤ.”

²¹ဖဲအဆၢကတီၢ်ဝဲန့ၣ်ပှၤဂီၢ်မုၢ်တဖၣ်အိၣ်ခိးစီၤစဃၤရံလၢတၢ်ချၢဒီး ကမၢကမၣ်ဝဲလၢအဝဲဒၣ်အိၣ်လၢတၢ်လုၢ်ဟံၣ်အပူၤယံာ်တ့ၢ် ဃဲးဃဲးအဃိန့ၣ်လီၤ.

²²ဖဲအဝဲဒၣ်ဟဲက့ၤထီၣ်ဆူခိန့ၣ်, ကတိၤတၢ်ဒီးအဝဲသ့ၣ်တသ့ဘၣ် သတးဒီးအဝဲသ့ၣ်သ့ၣ်ညါလၢအဝဲဒၣ်ထံၣ်ဘၣ်တ့ၢ်တၢ်ထံၣ်လၢညါ ခီလၢတၢ်လုၢ်ဟံၣ်အပူၤန့ၣ်လီၤ. မ့ၢ်လၢအဝဲဒၣ်ကတိၤတၢ်လၢအထးခိၣ်တသ့ဝဲနီတဘီအဃိ ကတိၤတၢ်ဒီးအဝဲသ့ၣ်ခီဖျိအဒုးနဲၣ်မၤဟူးမၤဂဲၤအစုန့ၣ်လီၤ.

²³ဒီးဖဲစီၤစဃၤရံအတၢ်ဖံးတၢ်မၤအဆၢကတီၢ်လၢတၢ်လုၢ်ဟံၣ်အပူၤ ကတၢၢ်န့ၣ်, အဝဲဒၣ်က့ၤက့ၤဆူအဟံၣ်လီၤ.

²⁴တၢ်မၤအသးဝံၤအလီၢ်ခံတစိၢ်တလီၢ်န့ၣ်, အဝဲဒၣ်အမါနီၢ်အ့းလံၤစါဘ့းအိၣ်ထီၣ်ဒီးအဟုးအသး ဒီးပာ်တဒၢအသးလၢဟံၣ်ပူၤလၢယဲၢ်လါအတီၢ်ပူၤလီၤ.

²⁵“ခဲကနံၣ်အံၤကစၢ်ယွၤမၤစၢၤလံယၤလံ,” အဝဲဒၣ်စံးဝဲ, “အဝဲဒၣ်စိာ်ကွံာ်လံတၢ်လၢအမၤမဲာ်ဆှးယၤလၢပှၤ ဂီၢ်မုၢ်ဂီၢ်ပၤအမဲာ်ညါတမံၤန့ၣ်လံ.”

²⁶ဖဲနီၢ်အ့းလံၤစါဘ့းအိၣ်ဒီးအဟုးအသးပှဲၤထီၣ်ဃုလါတလါန့ၣ်, ယွၤဆှၢလီၤကလူးကၤဘြံၤအ့လး ဆူဝ့ၢ်တဖျၢၣ်လၢအမံၤမ့ၢ်နစၤရ့း အိၣ်ဝဲဖဲကီၢ်ကၤလံၤလါန့ၣ်လီၤ.

²⁷အဝဲဒၣ်အိၣ်ဒီးတၢ်ကစီၣ်တမံၤလၢပှၤမုၣ်ကနီၤတဂၤလၢ အဘၣ်တၢ်အၢၣ်လီၤပာ်အီၤလၢအကကဲထီၣ်ပှၤတဂၤလၢ အမံၤမ့ၢ်စီၤယိၤသးအမါအဂီၢ်န့ၣ်လီၤ. စီၤယိၤသးမ့ၢ်ဝဲပှၤဟဲလီၤစၢၤလီၤသွဲၣ်လၢစီၤပၤဒၤဝံး အဒူၣ်ဖိထၢဖိဒီးမုၣ်ကနီၤအမံၤမ့ၢ်နီၢ်မၤရံလီၤ.

²⁸ကလူးဟဲဆူအဝဲဒၣ်အအိၣ်ဒီးစံးဘၣ်အီၤ, “မ်တၢ်ဃူတၢ်ဖိးအိၣ်ဒီးနၤတက့ၢ်. ကစၢ်အိၣ်ဒီးနၤဒီးဆိၣ်ဂ့ၤတ့ၢ်လံနၤအဒိၣ်အမုၢ်လံ.”

²⁹နီၢ်မၤရံအသးဘၣ်တံာ်တာ်ဝဲဒိၣ်မးလၢကလူးအတၢ်ကစီၣ် တမံၤန့ၣ်အဃိဒီးဆိကမိၣ်ဝဲကလူးအတၢ်ကတိၤတဖၣ်န့ၣ်, မ့ၢ်တၢ်မနုၤလဲၣ်အဂ့ၢ်န့ၣ်လီၤ.

³⁰ကလူးန့ၣ်စံးဘၣ်အီၤ, “တဘၣ်ပျံၤတၢ်တဂ့ၤနီၢ်မၤရံဧၢ, ယွၤမၤဘျုးမၤဖှိၣ်လံနၤလံ.

³¹နကဒၢထီၣ်ဒီးဆံးစၢ်န့ၢ်ဖိခွါတဂၤဒီးနကဘၣ်ယုၢ်အမံၤလၢယ့ၣ်ၡူး လီၤ.

³²အဝဲဒၣ်ကမ့ၢ်ပှၤအဒိၣ်ကစၢ်ယွၤတဂၤဒီးကဘၣ်တၢ်ကိးအီၤလၢ ယွၤလၢအမ့ၢ်တၢ်ထီကတၢၢ်တဂၤအဖိခွါလီၤ. ယွၤကစၢ်ယွၤကဒုးကဲအီၤလၢစီၤပၤဒ်ပှၤလၢအဝဲဒၣ်ဟဲလီၤစၢၤ ဝဲလၢအီၤ, စီၤဒၤဝံးတဂၤအသိး

³³ဒီးအဝဲဒၣ်ကကဲထီၣ်စီၤယၤကိာ်အစၢၤအသွဲၣ်တဖၣ်အစီၤပၤလီၤ ထူလီၤယိာ်ဒီးအဘီအမုၢ်တကတၢၢ်ဝဲနီတစုဘၣ်လီၤ.”

³⁴နီၢ်မၤရံစံးဘၣ်ကလူးဒီးစံးဝဲ, “ယမ့ၢ်ဒၣ်မုၣ်ကနီၤတဂၤလီၤ. လၢတၢ်န့ၣ်အဃိ, တၢ်တမံၤအံၤမၤအသးကသ့ဝဲလၢကျဲဒ်လဲၣ်.”

³⁵ကလူးစံးဆၢတၢ်ဒီးစံးဝဲ, “သးစီဆှံကဟဲလီၤလၢနလိၤဒီး ကစၢ်ယွၤအစိကမီၤအကဒုကလီၤဘၣ်နၤလီၤ. လၢတၢ်ဂ့ၢ်တမံၤအံၤအဃိ, ဖိသၣ်စီဆှံတဂၤန့ၣ်ကဘၣ်တၢ်ကိးအီၤလၢကစၢ်ယွၤအဖိခွါန့ၣ်လီၤ.

³⁶သ့ၣ်နီၣ်ထီၣ်နဘူးနတံၢ်နီၢ်အ့းလံၤစါဘ့းတက့ၢ်. တၢ်စံးတ့ၢ်ဝဲလၢအဝဲဒၣ်အဖိအိၣ်တသ့ဘၣ်. ဘၣ်ဆၣ်ဒီး, ခဲကနံၣ်အံၤအဝဲအသးပှၢ်ဒိၣ်မးသနာ်က့ အနီၢ်ကစၢ်ဒၣ်ဝဲအိၣ်ဒီးအဟုးအသးန့ၣ်အိၣ်လံဃုလါလံ.

³⁷အဂ့ၢ်ဒ်အံၤတၢ်လၢကစၢ်ယွၤမၤတသ့န့ၣ်တအိၣ်နီတမံၤဘၣ်.”

³⁸“ယမ့ၢ်ယဲကစၢ်အခ့အပှၤတဂၤလီၤ.” နီၢ်မၤရံစံးဝဲ, “မ်တၢ်ကမၤအသးဒ်နစံးတ့ၢ်လံနဲအသိးတက့ၢ်.” ဒီးကလူးန့ၣ်ဟးထီၣ်ကွံာ်လၢအဃၢၤလီၤ.

³⁹တၢ်န့ၣ်ဝံၤအလီၢ်ခံတယံာ်ဘၣ်န့ၣ်, နီၢ်မၤရံအိၣ်ကတဲာ်ကတီၤထီၣ် အသးဒီးလဲၤဝဲဒၣ်ချ့ချ့ဆူဝ့ၢ်တဖျၢၣ်အိၣ်လၢကီၢ်ယူဒၤအတၢ်လူၢ် တၢ်တြီၤအကျါန့ၣ်လီၤ.

⁴⁰အဝဲဒၣ်လဲၤနုာ်ဆူစီၤစဃၤရံအဟံၣ်ပူၤဒီးဆၢဂ့ၤဆၢဝါနီၢ်အ့းလံၤ စါဘ့းလီၤ.

⁴¹ဖဲနီၢ်အ့းလံၤစါဘ့းနၢ်ဟူဘၣ်နီၢ်မၤရံအတၢ်ကတိၤဆၢဂ့ၤဆၢဝါန့ၣ်, ပှၤဖိသၣ်ဟူးဂဲၤဝဲလၢအဟၢဖၢပူၤလီၤ. နီၢ်အ့းလံၤစါဘ့းလၢထီၣ်ပှဲၤထီၣ်ဝဲဒီးသးစီဆှံ,

⁴²ဒီးကတိၤထီၣ်တၢ်လၢအကလုၢ်ဖးဒိၣ်ဒီးစံးဝဲ, “လၢပိာ်မုၣ်တဖၣ်ခဲလၢာ်အကျါန့ၣ်, နမ့ၢ်ပှၤဘၣ်ဆိၣ်ဂ့ၤကတၢၢ်ဒီးဖိသၣ်လၢနကဒၢထီၣ်အီၤ တဂၤန့ၣ်ဘၣ်ဆိၣ်ဂ့ၤဝဲဒၣ်လီၤ.

⁴³တၢ်အဒိၣ်အမုၢ်တမံၤလၢအမ့ၢ်ဝဲယကစၢ်အမိၢ်အတၢ်ဟဲအိၣ် သကိးယၤအံၤ, မၤအသးဒီးယၤလၢတၢ်ဂ့ၢ်မနုၤတမံၤအဃိလဲၣ်.

⁴⁴အဂ့ၢ်ဒ်အံၤ, တစုဃီဖဲယနၢ်ဟူဘၣ်နတၢ်ကတိၤဆၢဂ့ၤဆၢဝါန့ၣ်, ဖိသၣ်အိၣ်လၢယဟၢဖၢပူၤတဂၤဟူးဂဲၤထီၣ်ဝဲလၢတၢ်သးခုအပူၤလီၤ.

⁴⁵မ့ၢ်လၢနနာ်လၢကစၢ်အတၢ်ကစီၣ်ကဟဲလၢထီၣ်ပှဲၤထီၣ်လၢနဂီၢ် အဃိ, နဘၣ်ဆိၣ်ဂ့ၤနဲလီၤ.”

⁴⁶နီၢ်မၤရံစံးဝဲဒၣ်, “ယသးအံၤစံးထီၣ်ပတြၢၤကစၢ်လီၤ.

⁴⁷ယသူၣ်ခုသးခုယဲလၢကစၢ်ယွၤ, ယတၢ်အုၣ်က့ၤခီၣ်က့ၤကစၢ်တဂၤအဃိလီၤ.

⁴⁸အဂ့ၢ်ဒ်အံၤအဝဲသ့ၣ်နီၣ်ထီၣ်ယၤ, ပှၤလၢအမ့ၢ်အဝဲဒၣ်အခ့အပှၤအဆံးတဂၤလီၤ. စးထီၣ်ခဲကနံၣ်အံၤဒီးဆူညါန့ၣ်, ပှၤကိးကလုာ်ဒဲး ကကိးယၤလၢပှၤဘၣ်ဆိၣ်ဂ့ၤတဂၤ,

⁴⁹အဂ့ၢ်မ့ၢ်လၢတၢ်အဒိၣ်အမုၢ်တဖၣ်လၢယွၤ, တၢ်စိဒိၣ်ကမီၤထီတဂၤမၤတ့ၢ်ဝဲလၢယဂီၢ်အဃိလီၤ. အဝဲဒၣ်အမံၤစီဝဲဆှံဝဲလီၤ.

⁵⁰အဝဲဒၣ်ဒုးနဲၣ်တၢ်သးကညီၤလၢ ပှၤမၤလၤကပီၤအီၤသ့ၣ်တဖၣ်အဖီခိၣ် လၢပှၤတစိၤဘၣ်တစိၤန့ၣ်လီၤ.

⁵¹အဝဲဒၣ်ယူာ်ထီၣ်အစုလၢအဂံၢ်ဆူၣ်ဘါဆူၣ် ဒီးမၤလီၤပြံလီၤပြါပှၤပာ်ထီၣ်ထီအသးလၢ ကယဲၢ်အတၢ်ကူၣ်ထီၣ်ဖးလီၤအပူၤတဖၣ်လီၤ.

⁵²အဝဲဒၣ်ပာ်လီၤကွံာ်စီၤပၤလၢအစိဒိၣ်ကမီၤထီတဖၣ်လၢ အလီၢ်ပစိာ်အလိၤ ဒီးယူာ်ထီၣ်ထီပှၤအိၣ်လၢတၢ်လီၢ် အတီၤဖုၣ်တဖၣ်လီၤ.

⁵³ပှၤလၢတၢ်သၣ်ဝံၤအသးတဖၣ်န့ၣ်, ဒုးဘျဲးအီၣ်ဘျဲးအီဝဲလၢတၢ်အဝံၣ်အဘဲ ဒီးပှၤအထူးအတီၤတဖၣ်န့ၣ် ဒုးက့ၤကလီကလီဝဲလီၤ.

⁵⁴အဝဲဒၣ်သ့ၣ်နီၣ်ထီၣ်တၢ်အၢၣ်လီၤအီလီၤလၢ အမၤတ့ၢ်ဝဲဒီးမိၢ်ပၢ်ဖံဖုလၢပျၢၤတဖၣ် ဒီးဟဲဝဲဒ်သိးအကမၤစၢၤ အခ့အပှၤအံၣ်စရ့လးန့ၣ်လီၤ.

⁵⁵အဝဲဒၣ်သ့ၣ်နီၣ်ထီၣ်လၢအကသးကညီၤ စီၤအၤဘြၤဟၣ်ဒီးအစၢၤအသွဲၣ်တဖၣ် ကိးဂၤဒဲးလီၤစိၤလီၤထီလီၤ.”

⁵⁶နီၢ်မၤရံအိၣ်ဒီးနီၢ်အ့းလံၤစါဘ့းကဘၣ်သၢလါဒီး အန့ၣ်ဝံၤအလီၢ်ခံက့ၤကဒါက့ၤဝဲဆူအဟံၣ်လီၤ.

⁵⁷တၢ်ဆၢကတီၢ်တုၤဃီၤဝဲလၢနီၢ်အ့းလံၤစါဘ့းအဖိကအိၣ် ဖျဲၣ်ထီၣ်ဒီးအဝဲဒၣ်ဆံးစၢ်န့ၢ်ဖိခွါတဂၤလီၤ.

⁵⁸ပှၤအိၣ်လၢအဝဲဒၣ်အဃၢၤဒီးအဝဲဒၣ်အဘူးအတံၢ်တဖၣ်နၢ်ဟူဘၣ်ဝဲလၢ ကစၢ်ယွၤဂ့ၤတ့ၢ်လၢအဝဲဒၣ်အဖီခိၣ်လီၤလိၢ်လီၤလးမးဒီး အဝဲသ့ၣ်ကိးဒံကိးဂၤဒဲးသးခုဃုာ်ဒီးအီၤလီၤ.

⁵⁹ဒီးဃိးသီတသီန့ၣ်, အဝဲသ့ၣ်ဟဲဒ်သိးအကကူးတရံးဖိသၣ်ဒီး သါကယုၢ်န့ၢ်အမံၤလၢစီၤစဃၤရံဒ်အပၢ်အမံၤအသိးလီၤ.

⁶⁰ဘၣ်ဆၣ်ဒီးအမိၢ်စံးဝဲ, “တမ့ၢ်ဘၣ်. အဝဲဒၣ်အမံၤကဘၣ်မ့ၢ်စီၤယိၤဟၣ်လီၤ.”

⁶¹အဝဲသ့ၣ်စံးဘၣ်အီၤ, “သုဘူးသုတံၢ်လၢအမံၤဒ်န့ၣ်တအိၣ်နီတဂၤဘၣ်.”

⁶²တုၤနုၤတစုအဝဲသ့ၣ်သံကွၢ်အပၢ်ခီဖျိအဒုးနဲၣ်တၢ်ပနီၣ်ဆူအအိၣ်လၢ အဝဲသးအိၣ်ယုၢ်အဖိခွါအမံၤဒ်လဲၣ်န့ၣ်လီၤ.

⁶³ဖဲန့ၣ်စီၤစဃၤရံဃ့တၢ်အဘ့ၣ်ဘၣ်လၢပှၤကွဲးတၢ်အဂီၢ်တဘ့ၣ်ဒီးကွဲးလီၤဝဲ, “အဝဲဒၣ်အမံၤမ့ၢ်စီၤယိၤဟၣ်လီၤ.” အဝဲသ့ၣ်ကမၢကမၣ်မးဝဲကိးဂၤဒဲးလီၤ.

⁶⁴တဘျီဃီဖဲန့ၣ်စီၤစဃၤရံကတိၤတၢ်သ့ထီၣ်က့ၤဒီးအဝဲဒၣ် စံးထီၣ်ပတြၢၤကစၢ်ယွၤလီၤ.

⁶⁵ကယဲၢ်ပှၤအိၣ်ဆိးလၢအခိၣ်အဃၢၤတဖၣ်ပှဲၤဒီးတၢ်ပျံၤတၢ်ဖုးဒီး တၢ်ကစီၣ်ဘၣ်ဃးတၢ်သ့ၣ်တဖၣ်အံၤအဂ့ၢ်ဟူထီၣ်သါလီၤဝဲ သကုၤကီၢ်ယူဒၤအတၢ်လူၢ်တၢ်တြီၤတၢ်လီၢ်တၢ်ကျဲတဖၣ်လီၤ.

⁶⁶ကယဲၢ်ပှၤလၢအနၢ်ဟူဘၣ်တၢ်ဂ့ၢ်တမံၤအံၤန့ၣ်, ဆိကမိၣ်ဝဲလၢအဂ့ၢ်ဒီးသံကွၢ်ဝဲ, “ဖိသၣ်တဂၤအံၤကကဲထီၣ်တၢ်မနုၤလဲၣ်.” အဂ့ၢ်ဒ်အံၤအိၣ်ဖျါဝဲဒၣ်ဆှံဆှံလၢကစၢ်အစိကမီၤအိၣ်လၢ အဝဲဒၣ်အလိၤန့ၣ်လီၤ.

⁶⁷စီၤယိၤဟၣ်အပၢ်စီၤစဃၤရံလၢထီၣ်ပှဲၤထီၣ်လၢသးစီဆှံဒီး အဝဲဒၣ်ကတိၤထီၣ်ကစၢ်ယွၤအတၢ်ကစီၣ်လီၤ.

⁶⁸“မ်ပကစံးထီၣ်ပတြၢၤသကိးကစၢ်, အံၣ်စရ့လးအကစၢ်ယွၤန့ၣ်တက့ၢ်. အဝဲဒၣ်ဟဲဒ်သိးအကမၤစၢၤအပှၤဂီၢ်မုၢ်ဒီးဒုးထူၣ်ဖျဲးထီၣ်ကွံာ်အဝဲသ့ၣ်လီၤ.

⁶⁹အဝဲဒၣ်ဒုးအိၣ်ထီၣ်တၢ်အုၣ်က့ၤခီၣ်က့ၤကစၢ် အဂံၢ်ဆူၣ်ဘါဆူၣ်တဂၤလၢပဂီၢ်, လၢအမ့ၢ် အခ့အပှၤစီၤဒၤဝံးအစၢၤအသွဲၣ်တဂၤလီၤ.

⁷⁰လၢအပူၤကွံာ်ဖးယံာ်န့ၣ်, အဝဲဒၣ်အၢၣ်လီၤအီလီၤဝဲခီဖျိအဝံစီဆှံတဖၣ်,

⁷¹လၢအဝဲကအုၣ်က့ၤခီၣ်က့ၤပှၤလၢ ပဒုၣ်ပဒါတဖၣ်အစုပူၤ, ဒီးကယဲၢ်ပှၤလၢအသးဟ့ပှၤတဖၣ် အတၢ်စိတၢ်ကမီၤအပူၤလီၤ.

⁷²အဝဲဒၣ်စံးဝဲလၢအကဒုးနဲၣ်တၢ်သးကညီၤလၢ မိၢ်ပၢ်ဖံဖုလၢပျၢၤတဖၣ် ဒီးသ့ၣ်နီၣ်ထီၣ်အတၢ်အၢၣ်လီၤစီဆှံန့ၣ်လီၤ.

⁷³အဝဲဒၣ်အိၣ်ဒီးတၢ်ဆိၣ်လီၤအသးသညူးသပှၢ်ဒီး ပပၢ်ဖးဒိၣ်စီၤအၤဘြၤဟၣ်,

⁷⁴အဝဲဒၣ်အၢၣ်လီၤအီလီၤလၢအကအုၣ်က့ၤခီၣ်က့ၤပှၤလၢပဒုၣ် ပဒါတဖၣ်အစုပူၤ ဒီးပျဲပမၤအတၢ်ဖံးတၢ်မၤပူၤဖျဲးဒီးတၢ်ပျံၤတၢ်ဖုး,

⁷⁵ဒ်သိးပကစီဝဲဆှံဝဲဒီးတီဝဲလိၤဝဲလၢအဝဲဒၣ်အမဲာ်ညါ လၢပတၢ်အိၣ်မူဒီစိၤညါန့ၣ်လီၤ.

⁷⁶နဲဒၣ်ယဖိခွါ, နကဘၣ်တၢ်ကိးနၤလၢ ကစၢ်ယွၤတၢ်ထီကတၢၢ်အဝံတဂၤန့ၣ်လီၤ. နကလဲၤဆိနဲလၢကစၢ်အမဲာ်ညါ ဒ်သိးနကကတဲာ်ကတီၤကျဲလၢအဂီၢ်,

⁷⁷ဒ်သိးနကစံးဘၣ်တဲဘၣ်အဝဲဒၣ်အပှၤဂီၢ်မုၢ်လၢ အဝဲသ့ၣ်ကဒိးန့ၢ်ဘၣ်တၢ်အုၣ်က့ၤခီၣ်က့ၤ ခီဖျိအတၢ်ဒဲးဘးတဖၣ် ဘၣ်တၢ်ပျၢ်ကွံာ်အီၤန့ၣ်လီၤ.

⁷⁸ပကစၢ်ယွၤမ့ၢ်ပှၤလၢ အသူၣ်ကညီၤသးကညီၤတၢ်လီၤ. အဝဲဒၣ်ကပျဲတၢ်အုၣ်က့ၤခီၣ်က့ၤအမုၢ်ဆ့ၣ်ဟဲဝါထီၣ် လၢပဖီခိၣ်ကပြုၢ်ကပြီၤ,

⁷⁹ဒီးကပီၤလီၤလၢမူခိၣ်လၢ ပှၤကိးဂၤဒဲးလၢ အအိၣ်မူလၢတၢ်ခံးဒီးတၢ်သံအကဒုအပူၤ, ဒီးကဆှၢပခီၣ်ခါတဖၣ်ဆူ တၢ်ဃူတၢ်ဖိးအကျဲပူၤန့ၣ်လီၤ.”

⁸⁰ဖိသၣ်ဒိၣ်ထီၣ်လၢနီၢ်ခိဒီးနီၢ်သးလီၤ. အဝဲဒၣ်အိၣ်ဝဲဆိးဝဲလၢပှၢ်မုၢ်ကနၢတုၤလီၤမုၢ်တနံၤ ဖဲအဝဲမၤဖျါထီၣ်အသးလၢကမျၢၢ်အမဲာ်ညါ, လၢအံၣ်စရ့လးအပှၤဂီၢ်မုၢ်န့ၣ်လီၤ.

Read S'gaw Karen လံာ်လူၤကၣ် 1 Bible Online

လံာ်လူၤကၣ် 1 - S'gaw Karen bible

လံာ်လူၤကၣ် 1