Read S'gaw Karen လံာ်လူၤကၣ် 10 Bible Online

လံာ်လူၤကၣ် 10 - S'gaw Karen bible

လံာ်လူၤကၣ် 10

¹တၢ်မၤအသးတမံၤအံၤဝံၤအလီၢ်ခံန့ၣ်, ကစၢ်ယ့ၣ်ၡူးဃုထၢထီၣ်ကဒီးပှၤအသီနွံဆံဂၤ, ဒီးမၢလီၤအဝဲသ့ၣ်ခံဂၤတပူၤခံဂၤတပူၤ, ဒ်သိးအကလဲၤဆိလၢအဝဲဒၣ်အမဲာ်ညါဆူခူဝ့ၢ်ဒီး တၢ်လီၢ်ကိးပူၤဒဲးဖဲအဝဲဒၣ်ကလဲၤဝဲအလီၢ်န့ၣ်လီၤ.

²အဝဲဒၣ်စံးဘၣ်အဝဲသ့ၣ်, “ဘုလၢတၢ်ကဘၣ်ကူးအီၤအိၣ်ဝဲဒၣ်အါမးလီၤ. ဘၣ်ဆၣ်ဒီးပှၤမၤတၢ်ဖိလၢအကကူးဒီးထၢဖှိၣ်တၢ်န့ၣ်အိၣ်ဝဲစှၤဒိၣ်မးလီၤ. ဃ့ထုကဖၣ်လၢကူးဘုအကစၢ်လၢအကဆှၢလီၤပှၤမၤတၢ်ဖိတဖၣ်ဒ်သိး အကကူးဒီးထၢဖှိၣ်က့ၤအဝဲအဘုတဖၣ်အဂီၢ်န့ၣ်တက့ၢ်.

³လဲၤတက့ၢ်. ယမၢလီၤသုဒ်သိတဖၣ်လၢထွံၣ်မံၤတဖၣ်အကျါအသိးန့ၣ်လီၤ.

⁴စ့အထၢၣ်မ့ၢ်ဂ့ၤ, တၢ်အီၣ်အထၢၣ်မ့ၢ်ဂ့ၤ, ခီၣ်ဖံးတဖၣ်မ့ၢ်ဂ့ၤ, တဘၣ်စိာ်အီၤနီတမံၤတဂ့ၤ. တဘၣ်အိၣ်ကတီၢ်ဒ်သိး သုကကတိၤဆၢဂ့ၤဆၢဝါပှၤလၢကျဲလိၤနီတဂၤတဂ့ၤ.

⁵တဘျီလၢ်လၢ်ဖဲသုလဲၤနုာ်လီၤဆူဟံၣ်တဖျၢၣ်အပူၤန့ၣ်, စံးဆိသုဝဲ, ‘မ်တၢ်ဃူတၢ်ဖိးအိၣ်လၢဟံၣ်တဖျၢၣ်အံၤအပူၤတက့ၢ်.’

⁶ပှၤလၢအအဲၣ်တၢ်ဃူတၢ်ဖိးမ့ၢ်အိၣ်ဖဲန့ၣ်န့ၣ်, ပျဲနတၢ်ဃူတၢ်ဖိးအတၢ်ဆၢဂ့ၤဆၢဝါအိၣ်တ့ၢ်လၢအလိၤတက့ၢ်. ပှၤလၢအအဲၣ်တၢ်ဃူတၢ်ဖိးမ့ၢ်တအိၣ်ဘၣ်ဒီး, ဟံးန့ၢ်က့ၤနတၢ်ဃူတၢ်ဖိးအတၢ်ဆၢဂ့ၤဆၢဝါန့ၣ်တက့ၢ်.

⁷အိၣ်ဖဲဟံၣ်တဖျၢၣ်ဃီန့ၣ်, ဒီးအီၣ်တၢ်အီတၢ်လၢအဝဲသ့ၣ် ဟ့ၣ်သုန့ၣ်တက့ၢ်. အဂ့ၢ်ဒ်အံၤ, ပှၤမၤတၢ်ဖိတဂၤကြၢးဘၣ်တၢ်ဟ့ၣ်အီၤလၢအဘူးအလဲလီၤ. တဘၣ်ဟးဝ့ၤဝီၤလၢဟံၣ်တဖျၢၣ်ဆူအဂၤတဖျၢၣ်န့ၣ်တဂ့ၤ.

⁸တဘျီလၢ်လၢ်ဖဲသုလဲၤဆူဝ့ၢ်တဖျၢၣ်အပူၤဒီးတၢ်တူၢ်လိာ်ခီၣ်ဆၢသုန့ၣ်, အီၣ်တၢ်လၢအဘၣ်တၢ်ပာ်လီၤအီၤလၢသုမဲာ်ညါန့ၣ်တက့ၢ်.

⁹မၤဘျါပှၤဆူးပှၤဆါဖဲဝ့ၢ်တဖျၢၣ်န့ၣ်အပူၤ, ဒီးစံးဘၣ်ပှၤအိၣ်ဖဲန့ၣ်တဖၣ်, ‘ကစၢ်ယွၤအဘီအမုၢ်ဟဲဘူးဒီးသုလံ.’

¹⁰ဘၣ်ဆၣ်ဒီးတဘျီလၢ်လၢ်ဖဲသုလဲၤလၢဝ့ၢ်တဖျၢၣ်အပူၤဒီးသု တဘၣ်တၢ်တူၢ်လိာ်ခီၣ်ဆၢသုဖဲန့ၣ်န့ၣ်, လဲၤလီၤဆူကျဲမုၢ်ခိၣ်ဒီးစံး,

¹¹‘ဖၣ်ကမူၣ်ဖၣ်ဆါလၢသုဝ့ၢ်ပူၤလၢအအိၣ်ထီဝဲလၢပခီၣ်လၣ် အလိၤတဖၣ်ဒၣ်လဲာ်န့ၣ်, ပတြူာ်ကွံာ်ပဝဲထီဒါသုလီၤ. ဘၣ်ဆၣ်ဒီး, သ့ၣ်နီၣ်ထီၣ်တၢ်အဝဲအံၤတက့ၢ်. ကစၢ်ယွၤအဘီအမုၢ်ဟဲဘူးဒီးသုလံ.’

¹²ယစံးဘၣ်တဲဘၣ်သု, ဖဲမုၢ်စံၣ်ညီၣ်အနံၤန့ၣ်, ကစၢ်ယွၤကပာ်ဖျါထီၣ်တၢ်သးကညီၤလၢ ဝ့ၢ်စဒိၣ်အဖီခိၣ်အါန့ၢ်ဒံးဝ့ၢ်တဖျၢၣ်န့ၣ်တက့ၢ်လီၤ.

¹³“ဝ့ၢ်ဃရၤစံၣ်ဧၢ, တၢ်ကနးကဖှီၣ်လၢနဂီၢ်ဆံးဒိၣ်လဲၣ်. နၤစ့ၢ်ကီး, ဝ့ၢ်ဘ့ၤသစဲဒၤဧၢ, တၢ်ကနးကဖှီၣ်လၢနဂီၢ်ဆံးဒိၣ်လဲၣ်. တၢ်လီၤလးလၢအဘၣ်တၢ်မၤတ့ၢ်အီၤလၢသုပူၤတဖၣ် မ့ၢ်ဘၣ်တၢ်မၤတ့ၢ်အီၤလၢဝ့ၢ်ထါယၢၣ်ဒီးဝ့ၢ်စံဒိၣ်န့ၣ်, ပှၤထံဖိကီၢ်ဖိတဖၣ်ကဆ့ၣ်နီၤဝဲအိၣ်ဒီးတၢ်ကူထီၣ်သိးထီၣ် ထၢၣ်တၢ်ကံးယာ်ဒီးဖှံလီၤက့ၤဖၣ်ဆါလၢအလိၤဒ်သိး အကပာ်ဖျါလၢအဝဲသ့ၣ်ပီၢ်ယၢ်လီၤက့ၤအသးဃဲးဃဲးလံန့ၣ်လီၤ.

¹⁴ဖဲမုၢ်စံၣ်ညီၣ်အနံၤန့ၣ်, ကစၢ်ယွၤကပာ်ဖျါထီၣ်တၢ်သးကညီၤ လၢဝ့ၢ်ထါယၢၣ်ဒီးဝ့ၢ်စံဒိၣ်အဖီခိၣ်အါန့ၢ်လၢသုဖီခိၣ်တက့ၢ်လီၤ.

¹⁵မ့မ့ၢ်နဲဒၣ်ဝ့ၢ်ကပ့းရနီၣ်ဧၢ, နသးအိၣ်ယူာ်ထီၣ်ထီနသးဆူမူခိၣ်, မ့ၢ်ဧါ. နကဘၣ်တၢ်တ့ၢ်လီၤနၤဆူလရာ်အပူၤလီၤ.”

¹⁶ယ့ၣ်ၡူးစံးဘၣ်အပျဲၢ်အဘီၣ်တဖၣ်, “ပှၤတဂၤလၢ်လၢ်လၢအဒိကနၣ်သုတၢ်ကတိၤန့ၣ်, မ့ၢ်အဒိကနၣ်ယတၢ်ကတိၤလီၤ. ပှၤတဂၤလၢ်လၢ်လၢအညိကွံာ်သုန့ၣ်, မ့ၢ်အညိကွံာ်ယၤ, ဒီးပှၤတဂၤလၢ်လၢ်လၢအညိကွံာ်ယၤန့ၣ်မ့ၢ်အညိကွံာ်ပှၤလၢ အမၢလီၤယၤတဂၤန့ၣ်လီၤ.”

¹⁷ပှၤနွံဆံဂၤဟဲက့ၤဝဲလၢတၢ်သူၣ်ဖှံသးညီဖးဒိၣ်အပူၤလီၤ. အဝဲသ့ၣ်စံးဝဲ, “ကစၢ်ဧၢ, တၢ်ဝံတၢ်နါတဖၣ်ဒၣ်လဲာ် စူၢ်ပကလုၢ်လၢနမံၤအဃိလီၤ.”

¹⁸ယ့ၣ်ၡူးစံးဆၢအဝဲသ့ၣ်, “ယထံၣ်မုၣ်ကီၤလံၢ်ဟဲလီၤတဲာ်လၢမူခိၣ်ဒ်လီဝၢ်ဒံးအသိးလီၤ.

¹⁹ကနၣ်တက့ၢ်. ယဟ့ၣ်စိဟ့ၣ်ကမီၤလံသုဒ်သိးသုယီၢ်သုခါဂုၢ်ဧိၤဒးဧိၤတဖၣ်, ပတ့ၤချဲးတဖၣ်ဒီးဒုၣ်ဒါအစိကမီၤခဲလၢာ်ကသ့ဝဲအဂီၢ် ဒီးတၢ်တမၤဆူးမၤဆါသုနီတမံၤဘၣ်လီၤ.

²⁰ဘၣ်ဆၣ်ဒီး, တဘၣ်သူၣ်ခုသးခုလၢတၢ်ဝံတၢ်နါတဖၣ်စူၢ်သု ကလုၢ်အဃိတဂ့ၤ. မ့မ့ၢ်, သူၣ်ခုသးခုလၢသုမံၤတဖၣ်ဘၣ်တၢ်ကွဲးလီၤပာ်အီၤလၢမူခိၣ် အဃိန့ၣ်တက့ၢ်.”

²¹ဖဲအဆၢကတီၢ်ဝဲန့ၣ်, ယ့ၣ်ၡူးလၢပှဲၤဒီးတၢ်သးခုခီဖျိသးစီဆှံဒီးစံးဝဲ, “မူခိၣ်ဒီးဟီၣ်ခိၣ်အကစၢ်, ပၢ်ယွၤဧၢ, ယစံးဘျုးနၤမ့ၢ်လၢနပာ်ဖျါထီၣ်တၢ်သ့ၣ်တဖၣ်အံၤလၢ နပာ်တဒၢအီၤလၢပှၤကူၣ်ဘၣ်ကူၣ်သ့ဒီးပှၤမၤလိမၤဒိးဘၣ်တၢ်တဖၣ်, ဆူပှၤလၢအတမၤလိမၤဒိးဘၣ်တၢ်တဖၣ်အဃိန့ၣ်လီၤ. မ့ၢ်လီၤ, ပၢ်ဧၢ, တၢ်အဝဲအံၤဘၣ်တၢ်မၤအီၤလၢနတၢ်ဘၣ်နသးဒၣ်ဝဲအဃိလီၤ.

²²ယပၢ်ဟ့ၣ်လီၤလံယၤလၢတၢ်ကိးမံၤဒဲးလံ. ဖိခွါမ့ၢ်မတၤလဲၣ်န့ၣ်ပှၤတသ့ၣ်ညါနီတဂၤဘၣ်. ပှၤသ့ၣ်ညါမ့ၢ်ထဲပၢ်တဂၤဧိၤလီၤ. ဒီးပၢ်မ့ၢ်မတၤလဲၣ်န့ၣ်ပှၤတသ့ၣ်ညါနီတဂၤဘၣ်. ပှၤသ့ၣ်ညါမ့ၢ်ဝဲထဲဖိခွါဒီးပှၤသ့ၣ်တဖၣ်လၢဖိခွါသးအိၣ် ပာ်ဖျါထီၣ်ပၢ်လၢအီၤန့ၣ်လီၤ.”

²³တုၤနုၤတစုယ့ၣ်ၡူးဃၣ်ဃီၤအသးဆူအပျဲၢ်အဘီၣ်သ့ၣ်တဖၣ်အအိၣ်ဒီး စံးဘၣ်အဝဲသ့ၣ်ကစုဒု, “သုထံၣ်တၢ်လၢသုကဘၣ်ထံၣ်သ့ၣ်တဖၣ် အံၤဒီး, သုဘၣ်ဆိၣ်ဂ့ၤဆိၣ်ဝါသုဝဲဆံးဒိၣ်လဲၣ်.

²⁴ယစံးဘၣ်တဲဘၣ်သု, ဝံဒီးစီၤလိၣ်စီၤပၤတဖၣ်သးအိၣ်ထံၣ်ဘၣ် တၢ်လၢသုထံၣ်, ဘၣ်ဆၣ်တထံၣ်ဘၣ်ဝဲဘၣ်. ဒီးသးအိၣ်နၢ်ဟူဘၣ်တၢ်လၢသုနၢ်ဟူ, ဘၣ်ဆၣ်တနၢ်ဟူဘၣ်ဝဲဘၣ်.”

²⁵ပှၤသ့တၢ်ဘူၣ်တၢ်ဘါအတၢ်သိၣ်တၢ်သီတဂၤဂဲၤဆၢထၢၣ်ဒီး ဂုာ်ကျဲးစၢးဝဲဒ်သိးအကဖီၣ်န့ၢ်ယ့ၣ်ၡူးလၢအတၢ်ကတိၤဒၣ်ဝဲလီၤ. အဝဲဒၣ်သံကွၢ်ယ့ၣ်ၡူး, “သရၣ်ဧၢ, ဒ်သိးယကဒိးန့ၢ်ဘၣ်တၢ်မူအထူအယိာ်န့ၣ်ယကဘၣ်မၤဒ်လဲၣ်.”

²⁶ယ့ၣ်ၡူးစံးဆၢအီၤ, “တၢ်ကွဲးအသးစီဆှံတဖၣ်စံးဝဲဒ်လဲၣ်. နထုးထီၣ်နဲအခီပညီဒ်လဲၣ်.”

²⁷ပှၤတဂၤန့ၣ်စံးဆၢတၢ်ဒီးစံးဝဲ, “နကဘၣ်အဲၣ်ကစၢ်ယွၤနကစၢ်လၢနသူၣ်ကံၢ်သးလဲ, လၢနသးဒီဖျၢၣ်, လၢနဂံၢ်နဘါခဲလၢာ်, ဒီးလၢနတၢ်ကူၣ်တၢ်ဆးခဲလၢာ်, ဒီးနကဘၣ်အဲၣ်ပှၤလၢနဃၢၤဒ်နအဲၣ်လီၤနသးဒၣ်နဲအသိးလီၤ.”

²⁸ယ့ၣ်ၡူးစံးဆၢအီၤ, “နတၢ်စံးဆၢဘၣ်မးလီၤ. အိၣ်မူထွဲအခံ, ဒီးနကမူနဲလီၤ.”

²⁹ဘၣ်ဆၣ်ဒီး, ပှၤသ့တၢ်ဘူၣ်တၢ်ဘါအတၢ်သိၣ်တၢ်သီတဂၤအံၤသးအိၣ် ပာ်တီပာ်လိၤအသးသတးဒီးသံကွၢ်ယ့ၣ်ၡူး, “ပှၤလၢယဃၢၤမ့ၢ်မတၤတဂၤလဲၣ်.”

³⁰ယ့ၣ်ၡူးစံးဆၢဝဲ, “တဘျီပှၤအိၣ်ဝဲဒၣ်တဂၤ, ဒီးဖဲအဝဲလဲၤလီၤလၢဝ့ၢ်ယရူၤၡလ့ၣ်ဆူဝ့ၢ်ယရံၤဃိန့ၣ်, လီၤဘၣ်လၢတမျာ်အကျါ, ဒီးအဝဲသ့ၣ်ဘ့ၣ်လီၤကွံာ်အကူအသိး, ဟံးန့ၢ်အတၢ်ခဲလၢာ်, တီၢ်အီၤဘူးအကသံဒီးပာ်တ့ၢ်အီၤန့ၣ်လီၤ.

³¹တၢ်မၤအသးလၢပှၤလုၢ်တၢ်အခိၣ်တဂၤလဲၤဘၣ်အတီၤဖဲကျဲအဝဲန့ၣ်လီၤ. ဖဲအဝဲဒၣ်ထံၣ်ပှၤတဂၤန့ၣ်, အဝဲဒၣ်လဲၤပူၤကွံာ်အီၤလၢကျဲအဂၤတကပၤလီၤ.

³²ဒ်န့ၣ်အသိး, ပှၤလ့ၤဝံဖိတဂၤဟဲဖဲန့ၣ်စ့ၢ်ကီး, လဲၤဃီၤဝဲ, ဒီးကွၢ်ပှၤတဂၤန့ၣ်ဒီး လဲၤပူၤကွံာ်အီၤလၢကျဲအဂၤတကပၤန့ၣ်လီၤ.

³³မ့မ့ၢ်ပှၤၡၤမရံဖိတဂၤ, ဖဲအဝဲဒၣ်လဲၤတၢ်, ဒီးဟဲဘၣ်ဖဲပှၤတဂၤအိၣ်ဝဲအလီၢ်ဒီးထံၣ်ဘၣ်အီၤန့ၣ်, အဝဲဒၣ်သးကညီၤဘၣ်အီၤလီၤ.

³⁴အဝဲဒၣ်လဲၤဃီၤဆူအအိၣ်, လူလီၤသိဒီးစပံးထံလၢအပူၤလီၢ်ပူၤကျဲတဖၣ်အလိၤ, ဒီးဘိၣ်ဘံထီၣ်ဝဲလီၤ. အန့ၣ်ဝံၤအလီၢ်ခံအဝဲဒၣ်ပာ်ထီၣ်အီၤလၢအနီၢ်ကစၢ်ဒၣ်ဝဲအဆၣ်ဖိကီၢ်ဖိ အလိၤ, ဒီးဆှၢအီၤဆူပှၤသမှံၤအဘျီၣ်တဖျၢၣ်ဒီးအံးထွဲကွၢ်ထွဲအီၤဖဲန့ၣ်လီၤ.

³⁵မုၢ်ဆ့ၣ်ထီၣ်တနံၤန့ၣ်, အဝဲဒၣ်ထုးထီၣ်စ့ဒန့ၤရံခံဘ့ၣ်, ဒီးဟ့ၣ်ဝဲဘျီၣ်ခိၣ်, ဒီးစံးဘၣ်အီၤ, ‘အံးထွဲကွၢ်ထွဲအီၤတက့ၢ်. ဒီးဖဲယဟဲက့ၤန့ၣ်, ယကဟ့ၣ်ကဒါက့ၤနၤကယဲၢ်တၢ်လၢနဘၣ်လၢာ်အါထီၣ်နဲလၢ အဝဲဒၣ်အဂီၢ်န့ၣ်လီၤ.’ ”

³⁶ဒီးယ့ၣ်ၡူးမၤကတၢၢ်အတၢ်ကတိၤဒီးစံးဝဲ, “လၢနတၢ်ထံၣ်န့ၣ်, ပှၤသၢဂၤအံၤအကျါ, ပှၤမၤဘၣ်ပှၤလၢတမျာ်ဒိအီၤတဂၤဒ်ပှၤလၢအဃၢၤတဂၤအသိးန့ၣ်, မ့ၢ်ဖဲလဲၣ်တဂၤလဲၣ်.”

³⁷ပှၤသ့တၢ်ဘူၣ်တၢ်ဘါအတၢ်သိၣ်တၢ်သီတဂၤအံၤစံးဆၢဝဲ, “မ့ၢ်ပှၤလၢအဂ့ၤလၢအဝဲဒၣ်အဖီခိၣ်တဂၤန့ၣ်လီၤ.” ယ့ၣ်ၡူးစံးဆၢဝဲ, “လဲၤ ဒီးမၤနဲဒ်န့ၣ်အသိးတက့ၢ်.”

³⁸ဖဲယ့ၣ်ၡူးဒီးအပျဲၢ်အဘီၣ်တဖၣ်လဲၤကဒီးတၢ်ဆူညါန့ၣ်, အဝဲသ့ၣ်လဲၤတုၤလၢသဝီတဖျၢၣ်ဖဲပိာ်မုၣ်တဂၤလၢအမံၤမ့ၢ် နီၢ်မၢ်သၤ, တူၢ်လိာ်ခီၣ်ဆၢအီၤလၢအဝဲဒၣ်အဟံၣ်ပူၤလီၤ.

³⁹အဝဲဒၣ်အိၣ်ဒီးအဒီပုၢ်ဝဲၢ်မုၣ်တဂၤလၢအမံၤမ့ၢ်နီၢ်မၤရံ, လၢအဆ့ၣ်နီၤဖဲကစၢ်အခီၣ်ထံးဒီးဒိကနၣ်အဝဲအတၢ်သိၣ် လီၤသီလီၤတၢ်န့ၣ်လီၤ.

⁴⁰နီၢ်မၢ်သၤအသးဘၣ်တံာ်တာ်လၢတၢ်ဖံးတၢ်မၤခဲလၢာ်လၢ အဘၣ်မၤဝဲတဖၣ်အဃိလီၤ. လၢတၢ်န့ၣ်အဃိအဝဲဒၣ်လဲၤဃီၤဆူ အအိၣ်ဒီးစံးဝဲ, “ကစၢ်ဧၢ, ယဒီပုၢ်ဝဲၢ်မုၣ်ဒုးမၤယၤတၢ်မၤခဲလၢာ်ထဲ တဂၤဧိၤန့ၣ်, နတပာ်လၢအမ့ၢ်တၢ်နီတမံၤဘၣ်ဧါ. တဲအီၤလၢအကဟဲမၤစၢၤယၤတက့ၢ်.”

⁴¹ကစၢ်ယ့ၣ်ၡူးစံးဆၢအီၤ, “နီၢ်မၢ်သၤဧၢ, နီၢ်မၢ်သၤဧၢ, နဲဒၣ်အံၤ, နဘၣ်ကိၢ်ဘၣ်ဂီၤဒီးနသးဘၣ်တံာ်တာ်လၢတၢ်အါမံၤအဃိလီၤ.

⁴²ဘၣ်ဆၣ်ဒီးတၢ်လၢအလိၣ်အိၣ်ဝဲထဲတမံၤဧိၤလီၤ. နီၢ်မၤရံဃုထၢတ့ၢ်ဝဲတၢ်လၢအဂ့ၤအဘၣ်တမံၤဒီးပှၤ တဟံးထီၣ်ကွံာ်အီၤလၢအအိၣ်နီတဂၤဘၣ်လီၤ.”