Read S'gaw Karen လံာ်လူၤကၣ် 14 Bible Online

လံာ်လူၤကၣ် 14 - S'gaw Karen bible

လံာ်လူၤကၣ် 14

¹တဘျီဖဲမုၢ်အိၣ်ဘှံးအနံၤတနံၤန့ၣ်, ယ့ၣ်ၡူးလဲၤဆူပှၤဖၤရံၤၡဲအခိၣ်အနၢ်အကျါတဂၤအဟံၣ် ဒ်သိးအကအီၣ်တၢ်, ဒီးပှၤဂီၢ်မုၢ်တဖၣ်ကွၢ်ဟုၣ်ကွၢ်စုာ်အီၤလီၤ.

²ပှၤလၢအစုညိးခီၣ်ညိးတဂၤဟဲဆူယ့ၣ်ၡူးအအိၣ်,

³ဒီးယ့ၣ်ၡူးကတိၤထီၣ်တၢ်ဒီးသံကွၢ်သရၣ်သိၣ်လိလံာ်တၢ် သိၣ်တၢ်သီတဖၣ်, ဒီးပှၤဖၤရံၤၡဲတဖၣ်, “တၢ်မၤဘျါက့ၤ တၢ်ဖဲမုၢ်အိၣ်ဘှံးနံၤန့ၣ်, ပတၢ်သိၣ်တၢ်သီဟ့ၣ်အခွဲးကစီဒီဧါ. မ့တမ့ၢ်တဟ့ၣ်ဝဲလဲၣ်.”

⁴ဘၣ်ဆၣ်ဒီးအဝဲသ့ၣ်တစံးတၢ်နီတမံၤဘၣ်. ယ့ၣ်ၡူးဟံးဃာ်ပှၤတဂၤန့ၣ်, မၤဘျါအီၤ, ဒီးပျဲက့ၤအီၤလီၤ.

⁵တုၤနုၤတစုအဝဲဒၣ်စံးဘၣ်အဝဲသ့ၣ်, “သုဝဲအကျါတဂၤဂၤသုမ့ၢ်အိၣ်ဒီးဖိခွါတဂၤမ့တမ့ၢ်ကျီၢ် တဒုလၢအလီၤတဲာ်နုာ်လၢထံပူၤဖဲမုၢ်အိၣ်ဘှံးနံၤန့ၣ်, မ့ၢ်သုတထုးထီၣ်က့ၤအီၤတဘျီဃီဖဲမုၢ်အိၣ်ဘှံးနံၤန့ၣ်ဘၣ်ဧါ.”

⁶ဘၣ်ဆၣ်ဒီးအဝဲသ့ၣ်စံးဆၢက့ၤအီၤဘၣ်ဃးတၢ်ဂ့ၢ်တမံၤအံၤန့ၣ်တသ့ ဘၣ်.

⁷ယ့ၣ်ၡူးပာ်သူၣ်ပာ်သးဝဲဒၣ်လၢပှၤသမှံၤသပျီၤတနီၤဃုထၢတၢ်လီၢ် တၢ်ကျဲအဂ့ၤကတၢၢ်လၢအကဆ့ၣ်နီၤဝဲအဂီၢ်, သတးဒီးအဝဲဒၣ်စံးဘၣ်တဲဘၣ်အဝဲသ့ၣ်လၢတၢ်ကတိၤဒိတထံၣ်အံၤ လီၤ.

⁸“ဖဲနဘၣ်တၢ်ကွဲနၤလၢပှၤတဂၤဂၤဆူတၢ်ဖျီအမူးတမူးန့ၣ်, တဘၣ်ဆ့ၣ်နီၤနဲလၢတၢ်လီၢ်အဂ့ၤကတၢၢ်တဂ့ၤ. တၢ်ကမၤဘၣ်ဖုးအသးလၢပှၤအကါဒိၣ်န့ၢ်နၤတဂၤဘၣ် တၢ်ကွဲတ့ၢ်အီၤစ့ၢ်ကီး,

⁹ဒီးဟံၣ်ကစၢ်လၢအကွဲသုဝဲခံဂၤလၢာ်န့ၣ်ကဟဲဆူနအိၣ်ဒီးစံးဝဲ, ‘ပျဲအဝဲဒၣ်ဟံးန့ၢ်တၢ်လီၢ်အဝဲအံၤတက့ၢ်’ န့ၣ်လီၤ. တုၤနုၤတစုနမဲာ်ကဆှးဒီးနကဘၣ်ဆ့ၣ်နီၤက့ၤနဲလၢ တၢ်လီၢ်အဖုၣ်ကတၢၢ်လီၤ.

¹⁰မ့မ့ၢ်ဖဲတၢ်ကွဲနၤန့ၣ်, လဲၤဒီးဆ့ၣ်နီၤလၢတၢ်လီၢ်လၢအဖုၣ်ကတၢၢ်, ဒ်သိးဟံၣ်ကစၢ်လၢအကွဲနၤတဂၤန့ၣ်ကဟဲဆူနအိၣ်ဒီးစံးဝဲ, ‘တံၤသကိးဧၢ, ဟဲထီၣ်ဆ့ၣ်နီၤလၢတၢ်လီၢ်အဂ့ၤတက့ၢ်.’ တုၤနုၤတစုနကဒိးန့ၢ်တၢ်လၤတၢ်ကပီၤလၢပှၤသမှံၤအဂၤခဲလၢာ် အမဲာ်ညါလီၤ.

¹¹အဂ့ၢ်ဒ်အံၤပှၤတဂၤလၢ်လၢ်လၢအပာ်ထီၣ်ထီအသးန့ၣ်ကဘၣ် တၢ်ဆီၣ်လီၤအီၤ, ဒီးပှၤတဂၤလၢ်လၢ်လၢအဆီၣ်လီၤအသးန့ၣ် ကဘၣ်တၢ်ပာ်ထီၣ်ထီအီၤလီၤ.”

¹²အန့ၣ်ဝံၤဒီးယ့ၣ်ၡူးစံးဘၣ်ဟံၣ်ကစၢ်လၢအတူၢ်လိာ်အီၤတဂၤန့ၣ်, “ဖဲနကတဲာ်ကတီၤမုၢ်ဆါခီအတၢ်အီၣ်မ့တမ့ၢ်ဟါအတၢ်အီၣ်န့ၣ်, နတံၤသကိးတဖၣ်မ့ၢ်ဂ့ၤ, နဒီပုၢ်ဝဲၢ်ခွါတဖၣ်မ့ၢ်ဂ့ၤ, နဘူးနတံၢ်တဖၣ်မ့ၢ်ဂ့ၤ, ပှၤလၢနဃၢၤအထူးအတီၤတဖၣ်မ့ၢ်ဂ့ၤ, တဘၣ်ကွဲအီၤတဂ့ၤ. အဂ့ၢ်ဒ်အံၤ, အဝဲသ့ၣ်ကကွဲကဒါက့ၤနၤ, ဒီးလၢကျဲဒ်အံၤအပူၤ, နကဘၣ်တၢ်ဟ့ၣ်ဘူးဟ့ၣ်လဲနၤလၢတၢ်လၢနမၤနဲအဃိန့ၣ်လီၤ.

¹³မ့မ့ၢ်နဲဒၣ်အံၤ, ဖဲနကတဲာ်ကတီၤတၢ်အီၣ်တၢ်အီအမူးန့ၣ်, ကွဲပှၤဖှီၣ်ဖိယာ်ဖိ, ပှၤက့ပှၤကွဲၣ်, ပှၤခီၣ်ဟးဂီၤဒီးပှၤမဲာ်ဘျီၣ်တဖၣ်န့ၣ်တက့ၢ်.

¹⁴ဒီးနကဘၣ်တၢ်ဆိၣ်ဂ့ၤနၤလီၤ. အဂ့ၢ်ဒ်အံၤ, အဝဲသ့ၣ်ဟ့ၣ်ဆၢက့ၤနၤတသ့ဘၣ်. ဖဲပှၤဂ့ၤပှၤဝါတဖၣ်ဂဲၤဆၢထၢၣ်သမူထီၣ်က့ၤလၢတၢ်သံအဆၢ ကတီၢ်န့ၣ်, နကဘၣ်တၢ်ဟ့ၣ်ဘျုးက့ၤနၤလၢကစၢ်ယွၤလီၤ.”

¹⁵ဖဲပှၤလၢအဆ့ၣ်နီၤဖဲစီၢ်နီၤခိၣ်အကျါတဂၤနၢ်ဟူတၢ်ကတိၤ အဝဲအံၤန့ၣ်, အဝဲဒၣ်စံးဘၣ်ယ့ၣ်ၡူး, “ပှၤလၢအကဆ့ၣ်နီၤအီၣ်တၢ် ဖဲစီၢ်နီၤခိၣ်လၢကစၢ်ယွၤအဘီအမုၢ်အပူၤတဖၣ်န့ၣ်, ဘၣ်ဆိၣ်ဂ့ၤဆံးဒိၣ်လဲၣ်.”

¹⁶ယ့ၣ်ၡူးစံးဘၣ်အီၤ, “တဘျီပှၤတဂၤအိၣ်ဒီးတၢ်အီၣ်အမူးဖးဒိၣ် တမူးဒီးအဝဲဒၣ်ကွဲပှၤအါဒံအါဂၤလီၤ.

¹⁷ဖဲတၢ်အီၣ်အမူးအဆၢကတီၢ်တုၤဃီၤန့ၣ်, အဝဲဒၣ်ဆှၢလီၤအခ့အပှၤဒ်သိး အကစံးဘၣ်ပှၤလၢအဘၣ်တၢ်ကွဲအီၤတဖၣ်, ‘ဟဲဘၣ်တက့ၢ်, တၢ်ခဲလၢာ်အိၣ်ကတဲာ်ကတီၤပာ်အသးလံ.’

¹⁸ဘၣ်ဆၣ်ဒီး အဝဲသ့ၣ်ကိးဂၤဒဲး, တဂၤဘၣ်တဂၤ, ဟ့ၣ်ထီၣ်အတၢ်ဂ့ၢ်တၢ်ကျိၤတဖၣ်လၢတၢ်ကပျဲပူၤအီၤအဂီၢ်လီၤ. ပှၤအဆိကတၢၢ်တဂၤစံးဘၣ်တၢ်ခ့တၢ်ပှၤ, ‘ယပှ့ၤစံာ်တလီၢ်, ဒီးယကဘၣ်လဲၤကွၢ်အီၤလီၤ. ဝံသးစူၤဘၣ်ယၤတက့ၢ်.’

¹⁹ပှၤအဂၤတဂၤစံးဝဲ, ‘ယပှ့ၤဂီၤဖံးယဲၢ်စူၣ်, ဒီးယကလဲၤမၤကွၢ်အီၤခဲအံၤလီၤ. ဝံသးစူၤဘၣ်ယၤတက့ၢ်.’

²⁰ပှၤအဂၤတဂၤစံးဝဲ, ‘ယဖျီလံယသးဝံၤသီသီလီၤ. လၢတၢ်န့ၣ်အဃိယဟဲယဲတသ့ဘၣ်.’

²¹တၢ်ခ့တၢ်ပှၤက့ၤကဒါက့ၤဒီးစံးဘၣ်တဲဘၣ်အကစၢ် လၢတၢ်သ့ၣ်တဖၣ်အံၤခဲလၢာ်လီၤ. ဟံၣ်ကစၢ်အသူၣ်ဒိၣ်သးဖျိးဒီးစံးဘၣ်အတၢ်ခ့တၢ်ပှၤ, ‘ဟးထီၣ်ချ့ချ့ဆူဝ့ၢ်အကျဲမုၢ်ခိၣ်ဒီးကျဲဖိတဖၣ် ဒီးဟဲက့ၤကိးပှၤဖှီၣ်ဖိယာ်ဖိ, ပှၤက့ပှၤကွဲၣ်, ပှၤမဲာ်ဘျီၣ်, ဒီးပှၤခီၣ်ဟးဂီၤတဖၣ်န့ၣ်တက့ၢ်.’

²²တယံာ်ဘၣ်ဒီးတၢ်ခ့တၢ်ပှၤန့ၣ်စံးဝဲ, ‘တၢ်ဒိၣ်ဧၢ, ဒ်နခါလီၤနကလုၢ်အသိးန့ၣ်, တၢ်မၤလၢထီၣ်ပှဲၤထီၣ်လံအီၤလံ. ဘၣ်ဆၣ်ဒီးတၢ်လီၢ်လီၤဟိဒံးဝဲလီၤ.’

²³လၢတၢ်န့ၣ်အဃိကစၢ်စံးဘၣ်အတၢ်ခ့တၢ်ပှၤ, ‘လဲၤဆူဒူသဝီကျဲမုၢ်ဒီးကျဲဖိတဖၣ်, ဒီးမၢပှၤဟဲဒ်သိးယဟံၣ်ကပှဲၤအဂီၢ်န့ၣ်တက့ၢ်.

²⁴ယစံးဘၣ်တဲဘၣ်သု, ပှၤလၢအဘၣ်တၢ်ကွဲအီၤတဖၣ်တလ့ၣ်ကွၢ်ဘၣ်ယဟါ အတၢ်အီၣ်နီတဂၤဘၣ်.’ ”

²⁵ပှၤဂီၢ်မုၢ်ဖးဒိၣ်လဲၤဃုာ်တၢ်ဒီးယ့ၣ်ၡူးလီၤ. အဝဲဒၣ်ဃၣ်ဃီၤအသးဆူအဝဲသ့ၣ်အအိၣ်, ဒီးစံးဘၣ်အီၤ,

²⁶ပှၤတဂၤလၢ်လၢ်လၢအဟဲဆူယအိၣ်န့ၣ်, မ့တမ့ၢ်လၢအဝဲဒၣ်အဲၣ်ယၤအါန့ၢ်အပၢ်, ဒီးအမိၢ်, အမါဒီးအဖိအလံၤတဖၣ်, အဒီပုၢ်ဝဲၢ်ခွါတဖၣ်, ဒီးအဒီပုၢ်ဝဲၢ်မုၣ်တဖၣ်, ဒီးအနီၢ်ကစၢ်ဒၣ်ဝဲစ့ၢ်ကီးဘၣ်ဒီး, ကဲယပျဲၢ်ယဘီၣ်တသ့ဘၣ်.

²⁷ပှၤတဂၤလၢ်လၢ်လၢအတယိးအထူၣ်စုညါဒၣ်ဝဲဒီးပိာ်ယခံန့ၣ်, ကဲယပျဲၢ်ယဘီၣ်တသ့ဘၣ်.

²⁸သုဝဲအကျါတဂၤမ့ၢ်ကူၣ်ထီၣ်ဖးလီၤလၢအကဘှီထီၣ်တၢးထီ တဖျၢၣ်န့ၣ်, အဝဲဒၣ်ကဆ့ၣ်နီၤဆိဝဲ, ဒီးဒွးကွၢ်ဝဲအပှ့ၤအကလံၤ ကလီၤလၢဆံးအါ, ဒ်သိးအကထံၣ်ဘၣ်ဝဲလၢအကမၤဝဲတုၤလၢ အကတၢၢ်အဂီၢ်, အကျိၣ်အစ့လၢတလၢလဲၣ်န့ၣ်လီၤ.

²⁹အဝဲမ့ၢ်တမၤဒ်န့ၣ်ဘၣ်ဒီး, ပာ်လီၤဝဲလၢၢ်ခီၣ်ထံးဝံၤအလီၢ်ခံဘှီဝံၤက့ၤအတၢးထီတသ့ဘၣ် သတးဒီး, ပှၤကိးဂၤဒဲးလၢအထံၣ်ဘၣ်တၢ်မၤအသးတဖၣ် ကနံၤဘၣ်ဖၣ်လဲအီၤလီၤ.

³⁰အဝဲသ့ၣ်ကစံးဝဲ, “ပှၤတဂၤအံၤစးထီၣ်သူၣ်ထီၣ်တၢ်ဘၣ်ဆၣ်ဒီး မၤဝံၤက့ၤဝဲတသ့ဘၣ်.” န့ၣ်လီၤ.

³¹စီၤပၤတဂၤမ့ၢ်ဟးထီၣ်ဒီးပှၤအဂၤတကလးဒ်သိးအကဒုးစီၤပၤ အဂၤတဂၤလၢအဟဲထီဒါအီၤအိၣ်ဒီးပှၤအဂၤခံကလးန့ၣ်, အဝဲဒၣ်ကဆ့ၣ်နီၤဆိဒီးကွၢ်ဆိကမိၣ်ဘၣ်ဃးအဂံၢ် အဘါလၢအကကွၢ်ဆၢၣ်မဲာ်စီၤပၤအဂၤတဂၤအဂီၢ်အိၣ် တအိၣ်လဲၣ်အဂ့ၢ်န့ၣ်လီၤ.

³²အဝဲအဂံၢ်အဘါမ့ၢ်တအိၣ်န့ၣ်, ကဆှၢလီၤဝဲကလူးစိာ်တၢ်ကစီၣ် တဖၣ်ဒ်သိးအကထံၣ်လိာ်အသးဒီးစီၤပၤအဂၤတဂၤန့ၣ်ဖဲ အအိၣ်ဒံးလၢကျဲဖးယံၤအဖၢမုၢ်, ဒီးကကတိၤတၢ်ဒီးအီၤဘၣ်ဃး တၢ်ဃူတၢ်ဖိးအဂ့ၢ်န့ၣ်လီၤ.”

³³ယ့ၣ်ၡူးမၤကတၢၢ်အတၢ်ဂ့ၢ်တမံၤအံၤဒီးစံးဝဲ, “ဒ်န့ၣ်အသိးမ့တမ့ၢ်လၢသုဟ့ၣ်လီၤကွံာ်တၢ်လၢအအိၣ်ဒီး သုခဲလၢာ်ဘၣ်ဒီး, သုကဲထီၣ်ယပျဲၢ်ယဘီၣ်တသ့နီတဂၤဘၣ်.

³⁴အံသၣ်န့ၣ်မ့ၢ်တၢ်လၢအဂ့ၤလီၤ. ဘၣ်ဆၣ်ဒီးအံသၣ်အဟီမ့ၢ်လီၤမၢ်ကွံာ်န့ၣ်, တၢ်မၤဟီထီၣ်က့ၤအီၤကသ့ဒ်လဲၣ်.

³⁵လၢဟီၣ်ခိၣ်အဂီၢ်မ့ၢ်ဂ့ၤ, ဟီၣ်ခိၣ်ညၣ်ထ့ၣ်အဂီၢ်မ့ၢ်ဂ့ၤ, အဘျုးအဖှိၣ်တအိၣ်နီတမံၤဘၣ်ဒီးပှၤစူးကွံာ်အီၤလီၤ. ပှၤအိၣ်ဒီးအနၢ်လၢအနၢ်ဟူတၢ်သ့န့ၣ်မ်အဒိကနၣ်တၢ်တက့ၢ်.”