Read S'gaw Karen လံာ်လူၤကၣ် 15 Bible Online

လံာ်လူၤကၣ် 15 - S'gaw Karen bible

လံာ်လူၤကၣ် 15

¹တနံၤန့ၣ်, ပှၤဃ့သွဲအါဒံအါဂၤဒီးပှၤတၢ်ဒဲးဘးဖိတဖၣ်ဟဲဒ်သိး အကဒိကနၣ်ယ့ၣ်ၡူးအတၢ်စံးတၢ်ကတိၤအဂီၢ်လီၤ.

²ပှၤဖၤရံၤၡဲဒီးပှၤသ့တၢ်ဘူၣ်တၢ်ဘါအတၢ်သိၣ်တၢ်သီတဖၣ်စးထီၣ် ကဒူးကဒ့ၣ်တၢ်ဒီးစံးဝဲ, “ပှၤတဂၤအံၤတူၢ်လိာ်ပှၤတၢ်ဒဲးဘးဖိတဖၣ်, ဒီးအီၣ်သကိးအီသကိးဃုာ်တၢ်ဒီးအဝဲသ့ၣ်ဒၣ်လဲာ်န့ၣ်လီၤ.”

³လၢတၢ်န့ၣ်အဃိ, ယ့ၣ်ၡူးစံးဘၣ်တဲဘၣ်အဝဲသ့ၣ်လၢတၢ်ကတိၤဒိတထံၣ်အံၤလီၤ.

⁴ပစံးဒၣ်ကလိာ်, သုဝဲအကျါတဂၤအိၣ်ဒီးသိအဒုတကယၤ ဒီးလီၤမၢ်ကွံာ်န့ၢ်အီၤတဒုလီၤ. အဝဲဒၣ်ကမၤဒ်လဲၣ်. အဝဲဒၣ်ကပာ်တီၢ်သိအဂၤခွံဆံခွံဒုလၢအအီၣ်ဆၣ်အလီၢ်ဒီးလဲၤ လူၤဃုသိလၢအလီၤမၢ်ကွံာ်တဒုတုၤအထံၣ်န့ၢ်က့ၤဝဲတစုလီၤ.

⁵ဖဲအထံၣ်န့ၢ်က့ၤအီၤန့ၣ်, ကသူၣ်ခုသးခုဝဲဒိၣ်မးတုၤဒၣ်လဲာ် ကပာ်ထီၣ်ဝဲလၢအဖံဘၣ်ခိၣ်,

⁶ဒီးကဟဲက့ၤစိာ်ဝဲဆူဟံၣ်လီၤ. အန့ၣ်ဝံၤဒီး, အဝဲဒၣ်ကကိးဖှိၣ်အတံၤ သကိးဒီးပှၤလၢအဃၢၤတဖၣ်တပူၤဃီဒီးစံးဘၣ်အဝဲသ့ၣ်, ‘ယထံၣ်န့ၢ်က့ၤယသိလၢအလီၤမၢ်တဒုအဃိယသးခုဒိၣ်မးလီၤ. မ်ပကသူၣ်ဖှံသးညီသကိးလၢအဃိတက့ၢ်.’

⁷ဒ်န့ၣ်အသိး, ယစံးဘၣ်တဲဘၣ်သု, လၢမူခိၣ်န့ၣ်, တၢ်သးခုကအိၣ်ဝဲလၢပှၤတၢ်ဒဲးဘးဖိတဂၤ လၢအပီၢ်ယၢ်လီၤက့ၤအသးအဃိအါန့ၢ်ပှၤတီပှၤလိၤခွံဆံခွံဂၤ လၢအပီၢ်ယၢ်လီၤက့ၤအသးအလီၢ်တအိၣ်ဘၣ်တဖၣ်အဃိ တက့ၢ်လီၤ.

⁸မ့တမ့ၢ်, ပစံးဒၣ်ကလိာ်ပိာ်မုၣ်တဂၤလၢအအိၣ်ဒီးစ့အဘ့ၣ်တဆံ အတၢ်လီၤမၢ်န့ၢ်အီၤတဘ့ၣ်လီၤ. အဝဲဒၣ်ကမၤဒ်လဲၣ်. အဝဲဒၣ်ကဒွဲၣ်ထီၣ်မ့ၣ်အူဒၢတဖျၢၣ်, ခွဲသိၣ်ခွဲပျီအဟံၣ်, ဒီးကွၢ်ဝဲလီၤတံၢ်လီၤဆဲးလၢတၢ်လီၢ်ကိးပူၤဒဲး တုၤလၢအထံၣ်န့ၢ်က့ၤဝဲတစုလီၤ.

⁹ဖဲအဝဲဒၣ်ထံၣ်န့ၢ်က့ၤဝဲန့ၣ်, ကကိးဖှိၣ်အတံၤသကိးဒီးပှၤလၢအဃၢၤတဖၣ်တပူၤဃီဒီးစံးဘၣ်အဝဲသ့ၣ်, ‘ယသးခုဒိၣ်မးလၢယထံၣ်န့ၢ်က့ၤစ့လၢအလီၤမၢ်န့ၢ်ယၤတဘ့ၣ်အဃိန့ၣ်လီၤ. မ်ပသူၣ်ခုသးခုသကိးလၢအဃိတက့ၢ်.’

¹⁰ဒ်န့ၣ်အသိးယစံးဘၣ်တဲဘၣ်သု, ကစၢ်ယွၤအကလူးတဖၣ်သူၣ်ခု သးခုလၢပှၤတၢ်ဒဲးဘးဖိတဂၤလၢအပီၢ်ယၢ်လီၤက့ၤအသး အဃိန့ၣ်လီၤ.”

¹¹ယ့ၣ်ၡူးစံးကဒီးဝဲ, “ပှၤအိၣ်ဝဲတဂၤလၢအအိၣ်ဒီးအဖိခွါခံဂၤလီၤ.

¹²ဖိလၢအသးစၢ်တဂၤန့ၣ်စံးဘၣ်အပၢ်, ‘ပၢ်ဧၢ, ယတၢ်န့ၢ်သါလၢယကဘၣ်ဒိးန့ၢ်အီၤန့ၣ်ဟ့ၣ်လီၤယၤခဲကနံၣ်အံၤ တက့ၢ်.’ လၢတၢ်န့ၣ်အဃိအဝဲဒၣ်နီၤဖးလီၤတၢ်စုလီၢ်ခီၣ်ခိၣ်လၢဖိခံ ဂၤန့ၣ်အဂီၢ်လီၤ.

¹³စှၤသီအလီၢ်ခံန့ၣ်, ဖိခွါလၢအသးစၢ်တဂၤဆါကွံာ်အတၢ်စုလီၢ်ခီၣ်ခိၣ် လၢအန့ၢ်ဘၣ်သါဝဲတဖၣ်, ဒီးစိာ်ထီၣ်စ့လၢအဒိးန့ၢ်ဝဲဒီးဟးထီၣ်ကွံာ်လၢအဟံၣ်လီၤ. အဝဲဒၣ်လဲၤဆူထံကီၢ်လၢအစီၤစုၤယံၤတဘ့ၣ်, ဒီးဖဲန့ၣ်အဝဲဒၣ်မၤလၢာ်ဂီၤကွံာ်အကျိၣ်အစ့လၢတၢ်လုၣ်ကိလုၣ် ကပာ်အပူၤလီၤ.

¹⁴အဝဲဒၣ်သူလၢာ်ကွံာ်တၢ်လၢအအိၣ်ဒီးအီၤခဲလၢာ်လီၤ. တၢ်န့ၣ်ဝံၤအလီၢ်ခံ တၢ်သၣ်ဝံၤလီၤဒိဖးဒိၣ်အိၣ်ထီၣ်ဝဲဒၣ်လၢကီၢ်အဝဲန့ၣ်အပူၤ, ဒီးတၢ်တအိၣ်ဒီးအီၤနီတမံၤလၢၤဘၣ်လီၤ.

¹⁵လၢတၢ်န့ၣ်အဃိအဝဲဒၣ်လဲၤမၤတၢ်လၢပှၤထံဖိကီၢ်ဖိဖဲန့ၣ်တဂၤ အအိၣ်, ဒီးအဝဲဒၣ်မၢလီၤအီၤဒ်သိးအကလဲၤကွၢ်အထိးတဖၣ် လၢအစံာ်ပျီပူၤန့ၣ်လီၤ.

¹⁶အဝဲဒၣ်အဲၣ်ဒိးအီၣ်ပှဲၤအဟၢဖၢလၢထိးဆၣ်ဘၣ်ဆၣ်, ပှၤတဟ့ၣ်အီၤတၢ်လၢအကအီၣ်ဝဲအဂီၢ်နီတမံၤနီတဂၤဘၣ်.

¹⁷လၢခံကတၢၢ်အဝဲဒၣ်သ့ၣ်နီၣ်လီၤက့ၤအသးဒီးစံးဝဲ, ‘ယပၢ်အပှၤဒိးလဲအသးဖိကိးဂၤဒဲးအီၣ်ဘၣ်အီဘၣ်အါန့ၢ်ဒံး အအီၣ်ဝဲကဲတက့ၢ်လီၤ. မ့မ့ၢ်ယဲတခီယအိၣ်ဖဲအံၤဘူးတ့ၢ်မးယက သံလၢတၢ်သၣ်ဝံၤလီၤဒိအဃိလီၤ.

¹⁸ယကဂဲၤဆၢထၢၣ်ဒီးက့ၤဆူယပၢ်အအိၣ်ဒီးစံးယဲ, ပၢ်ဧၢ, ယမၤကမၣ်ဘၣ်လံကစၢ်ယွၤဒီးနၤလံ.

¹⁹ယတကြၢးတဘၣ်လၢၤလၢပှၤကကိးယၤလၢနဖိခွါဘၣ်. ပာ်ယၤဒ်နပှၤမၤတၢ်ဖိလၢအဒိးလဲအသးအကျါတဂၤအသိးန့ၣ် တက့ၢ်.’

²⁰လၢတၢ်န့ၣ်အဃိအဝဲဒၣ်ဂဲၤဆၢထၢၣ်ဒီးက့ၤကဒါက့ၤဝဲဆူအပၢ် အအိၣ်လီၤ. ဖဲအဝဲဒၣ်အိၣ်စီၤစုၤယံၤဒံးလၢအဟံၣ်န့ၣ်, အပၢ်ထံၣ်အီၤ, အသးပူၤပှဲၤဒီးတၢ်သးကညီၤဒီးအဝဲဒၣ်ဃ့ၢ်ဝဲ, ဖိးဃာ်အဖိခွါဒီးနၢမူအီၤလီၤ.

²¹ဖိခွါကတိၤတၢ်ဒီးစံးဝဲ, ‘ပၢ်ဧၢ, ယမၤကမၣ်ဘၣ်လံကစၢ်ယွၤဒီးနၤလံ. ယတကြၢးတဘၣ်လၢၤလၢပှၤကကိးယၤလၢနဖိခွါဘၣ်.’

²²ဘၣ်ဆၣ်ဒီးပၢ်ကိးဃီၤအတၢ်ခ့တၢ်ပှၤတဖၣ်ဒီးစံး, ‘မၤချ့ချ့တက့ၢ်. ဟဲစိာ်ဆ့ကၤဖးထီအဂ့ၤကတၢၢ်တဘ့ၣ်ဒီးဒုးကၤထီၣ်အီၤတက့ၢ်. ဖျီၣ်လီၤပသံးတဘိလၢအစုမုၢ်လိၤဒီးဒုးဒိးထီၣ်အီၤခီၣ်ဖံးတက့ၢ်.

²³အန့ၣ်ဝံၤအလီၢ်ခံ, လဲၤမၤန့ၢ်ဂီၤဖံးဖိလၢအဘီၣ်တဒုဒီးမၤသံအီၤ, ဝံၤဒီး မ်ပကသူၣ်ဖှံသးညီသကိးခီဖျိတၢ်အီၣ်တၢ်အီအမူးန့ၣ်တက့ၢ်.

²⁴အဂ့ၢ်ဒ်အံၤယဖိခွါတဂၤအံၤသံတ့ၢ်ဝဲ, ဘၣ်ဆၣ်ဒီးခဲကနံၣ်အံၤအဝဲဒၣ်မူထီၣ်က့ၤလံ. အဝဲဒၣ်လီၤမၢ်, ဘၣ်ဆၣ်ဒီးခဲကနံၣ်အံၤဘၣ်တၢ်ထံၣ်န့ၢ်က့ၤအီၤလံ.’ မၤသးဒ်န့ၣ်ဒီး တၢ်အီၣ်တၢ်အီအမူးစးထီၣ်ဝဲဒၣ်လီၤ.

²⁵ဖဲဆၢကတီၢ်အဝဲန့ၣ်, ဖိခွါအဒိၣ်တဂၤအိၣ်ဝဲဒၣ်လၢစံာ်ပျီပူၤလီၤ. ဖဲအဝဲဒၣ်ဟဲက့ၤဒီးဘူးထီၣ်ဝဲလၢဟံၣ်န့ၣ်, နၢ်ဟူဘၣ်ဝဲတၢ်သးဝံၣ်ဒီးတၢ်ဂဲၤကလံၣ်အသီၣ်လီၤ.

²⁶လၢတၢ်န့ၣ်အဃိအဝဲဒၣ်ကိးဃီၤတၢ်ခ့တၢ်ပှၤအကျါတဂၤ, ဒီးသံကွၢ်အီၤ, ‘တၢ်သီၣ်တၢ်သဲအဝဲအံၤ မ့ၢ်ပှၤမၤတၢ်မနုၤလဲၣ်.’

²⁷တၢ်ခ့တၢ်ပှၤစံးဆၢအီၤ, ‘နဒီပုၢ်ဝဲၢ်ခွါဟဲက့ၤတုၤဟံၣ်, ဒီးနပၢ်မၤသံဂီၤဖံးဖိလၢအဘီၣ်တဒု, အဂ့ၢ်မ့ၢ်လၢအဝဲဒၣ်ဟဲက့ၤတုၤဂ့ၤဂ့ၤဘၣ်ဘၣ်အဃိလီၤ.’

²⁸ဒီပုၢ်ဝဲၢ်ပိာ်ခွါအဒိၣ်တဂၤအံၤအသးဒိၣ်ထီၣ်တုၤဒၣ်လဲာ်တက့ၤ နုာ်ဝဲဆူဟံၣ်ပူၤဘၣ်. လၢတၢ်န့ၣ်အဃိအပၢ်ဟဲထီၣ်လၢခိဒီးဃ့ ကညးအီၤဒ်သိးအကနုာ်လီၤဆူဟံၣ်ပူၤလီၤ.

²⁹အဝဲဒၣ်စံးဆၢအပၢ်, ‘ကွၢ်လၢအံၤ, လၢအနံၣ်အလါတဖၣ်အံၤအပူၤ, ယမၤတ့ၢ်တၢ်လၢနဂီၢ်ဒ်ကုၢ်တဂၤအသိး ဒီးယတလုၣ်သ့ၣ်ခါပတာ်နကလုၢ်နီတစုဘၣ်. နဟ့ၣ်တ့ၢ်လံယၤတၢ်မနုၤ တမံၤလဲၣ်. လၢယကမၤတၢ်အီၣ်သကိးအီသကိးအမူး ဒီးယတံၤသကိးတဖၣ်အဂီၢ်မဲာ်တဲးလဲးတဒုဒၣ်လဲာ်နတဟ့ၣ်ယၤဘၣ်.

³⁰မ့မ့ၢ်နဖိခွါတဂၤအံၤမၤလၢာ်ဂီၤနတၢ်စုလီၢ်ခီၣ်ခိၣ်ခဲလၢာ်လၢတၢ်ဂဲၤ ဃုာ်ဒီးဃဲသဲမုၣ်, ဒီးဖဲအဝဲဒၣ်ဟဲက့ၤတုၤဟံၣ်န့ၣ်နမၤသံဂီၤဖံးဖိအဘီၣ်ကတၢၢ် တဒုလၢအဝဲဒၣ်အဂီၢ်လီၤ.’

³¹ပၢ်စံးဆၢအီၤ, ‘ယဖိခွါဧၢ, နအိၣ်ဒီးယၤဖဲအံၤထီဘိဒီးတၢ်ခဲလၢာ်ခဲဆ့ လၢအအိၣ်ဒီးယၤန့ၣ်မ့ၢ်နတၢ်လီၤ.

³²ဘၣ်ဆၣ်, ပဂ့ၤအိၣ်ဒီးတၢ်အီၣ်တၢ်အီအမူးဒီးသူၣ်ခုသးခုလီၤ. အဂ့ၢ်ဒ်အံၤ, နပုၢ်သံတ့ၢ်ဝဲ, မ့မ့ၢ်ခဲကနံၣ်အံၤအဝဲဒၣ်မူဝဲလီၤ. အဝဲဒၣ်လီၤမၢ်တ့ၢ်, ဘၣ်ဆၣ်ဒီးခဲကနံၣ်အံၤဘၣ်တၢ်ထံၣ်န့ၢ်က့ၤလံအီၤလံ.’ ”